Book List

<h2 style="text-align: center;">အခန်း ၂၇၇ - မဂျစ်စီးတီး၏ ခုနစ်ပွဲဆက်တိုက် အောင်ပွဲ အကြွင်းမဲ့ လွှမ်းမိုးခြင်း</h2> <h2 style="text-align: center;">*</h2> <p> </p> <p> </p> <p> </p> <p> </p> <p style="text-align:justify">အားကစားကွင်းတစ်ခုလုံးကို လွှမ်းခြုံထားသော စွမ်းအင်ဒိုင်းလွှာက အသံများကိုတော့ တားဆီးထားနိုင်စွမ်း မရှိပေ။ အရပ်မျက်နှာအနှံ့မှ ထောင်သောင်းချီသော ပရိသတ်များ၏ အော်ဟစ်သံများက တစ်ခုနှင့်တစ်ခု ထပ်နေတော့သည်။ သာမန်လူတစ်ယောက်အတွက်မူ မည်သည့်စကားလုံးမှ ခွဲခြားကြားနိုင်မည် မဟုတ်သော်လည်း စတုတ္ထအဆင့် စွမ်းရည်ပိုင်ရှင်တစ်ဦး ဖြစ်သည့် ဆုတက္ကသိုလ် အဖွဲ့ခေါင်းဆောင်အတွက်မူ ထိုအသံများမှာ နားထဲ၌ အထင်အရှားပင်။</p> <p style="text-align:justify">ခုနက သူ ရှောင်တိမ်းလိုက်သည့်အပေါ် ပရိသတ်များ၏ လှောင်ပြောင်သံကို သူ အတိုင်းသား ကြားလိုက်ရသည်။ အမှန်တကယ်တော့ သူလည်း ထိုသို့ မရှောင်ချင်ခဲ့ပေ။ သို့သော် သူ၏ တိုက်ခိုက်ရေးအာရုံက ထိုလှံချက်ကို ထိပ်တိုက်ရင်ဆိုင်လျှင် သေလိမ့်မည်ဟု သူ့ကို သတိပေးနေခဲ့ခြင်း ဖြစ်သည်။ တောနက်ထဲတွင် အကြိမ်ကြိမ် အသက်လုခဲ့ရသော ထိုအာရုံခံစားမှုက သူ့အသက်ကို တစ်ကြိမ်ထက်မက ကယ်တင်ခဲ့ဖူးသည်။ ဤအခြေအနေမျိုးတွင် သူက ထိုအာရုံကိုသာ ယုံကြည်လိုက်ခြင်း ဖြစ်သည်။</p> <p style="text-align:justify">"အာရုံခံစားမှုကတော့ ထက်မြက်သားပဲ... ဒါပေမဲ့ ထွက်ပြေးနေရုံနဲ့တော့ ဒီပွဲကို မနိုင်နိုင်ဘူးလေ"</p> <p style="text-align:justify">ရွှေရောင်လျှပ်စီးများ ဝန်းရံလျက် ရှုကျင်းမင်က လိုက်လံတိုက်ခိုက်ခြင်း မပြုဘဲ မိုးကြိုးနတ်ဘုရားတစ်ပါးကဲ့သို့ ခန့်ညားစွာ ရပ်နေသည်။ မသေနိုင်သော မိုးကြိုးခန္ဓာ၏ ပဉ္စမအဆင့်က သူ၏ ခန္ဓာကိုယ် ကြံ့ခိုင်မှုကို မိစ္ဆာတစ်ကောင်ကဲ့သို့ ဖြစ်စေခဲ့သည်။ ၎င်းအပြင် လေလွင့်တိမ်တိုက် ရွှေရောင်လှံ၏ အလေးချိန်ကို မျက်စိတစ်မှိတ်အတွင်း ခြောက်တန်အထိ တိုးမြှင့်နိုင်သော စွမ်းရည်ပါ ပေါင်းစပ်လိုက်သည့်အခါ မည်သူမဆို ထိုလှံချက်ကို ထိပ်တိုက်တွေ့ပါက အရိုးအကြေ ဒဏ်ရာအပြင်းအထန်ဖြင့် မြေပြင်ပေါ်မှာသာ လဲလျောင်းနေရပေလိမ့်မည်။</p> <p style="text-align:justify">"ပြီးတော့ ငါ့အဖွဲ့ဖော်တွေ ရောက်လာပြီ... မင်းတို့အတွက် အခွင့်အရေး မရှိတော့ဘူး" ရှုကျင်းမင်က ခေါင်းခါလျက် ပြောလိုက်သည်။</p> <p style="text-align:justify">သူ၏ နောက်ကွယ်မှနေ၍ ထက်မြက်လှသော ရေခဲစိုင် မိုးဖွဲများ ဝေါကနဲ ပန်းထွက်လာသည်။</p> <p style="text-align:justify">အလွန်အေးစက်လှသော ရေခဲစိုင်များက မြှားတန်းများကဲ့သို့ ပြေးထွက်သွားကြသည်။ ၎င်းမှာ ယောင်ဖန်၏ Sအဆင့် တိုက်ခိုက်ရေးနည်းစနစ် ရေခဲစိုင် မိုးဖွဲများ ဖြစ်ပြီး အကျိုးသက်ရောက်မှု ဧရိယာ ကျယ်ပြန့်သလို ထိခိုက်မှုမှာလည်း ကြောက်စရာကောင်းလှသည်။ ရေခဲစိုင် တစ်ခုချင်းစီမှာ Dအဆင့် သတ္တုစပ်ကဲ့သို့ မာကျောလှသည်။ ပို၍ ဆိုးသည်မှာ ယောင်ဖန်က စတုတ္ထအဆင့်လတ် စွမ်းရည်ပိုင်ရှင် တစ်ဦး ဖြစ်ခြင်းပင်။ သူမ၏ နည်းစနစ်က ဆုတက္ကသိုလ် အဖွဲ့သားများကို သွေးအိုင်ထဲ ရောက်သွားစေရန် လုံလောက်လှသည်။</p> <p style="text-align:justify">ဆုတက္ကသိုလ်မှ သုံးဦးစလုံး မျက်နှာ ပျက်သွားကြသည်။ သူတို့က ထိုသေမင်းတမန်ဇုန်မှ လွတ်မြောက်ရန် ဘေးဘက်သို့ အသည်းအသန် ခုန်ရှောင်လိုက်ကြရသည်။</p> <p style="text-align:justify">"ထွက်ပြေးမလို့လား... နောက်ကျသွားပြီနော်"</p> <p style="text-align:justify">ညို့ယူဖမ်းစားနိုင်သော ရယ်သံတစ်ခုနှင့်အတူ ရှန်ဒုံလင်းက ရောက်ရှိလာသည်။ သူမ၏ မြေခွေးနားလေးများက လှုပ်ခတ်နေပြီး လက်ထဲတွင် ဓားမြှောင်များက လက်ခနဲ ဖြစ်သွားသည်။ သူမ၏ နောက်ကွယ်တွင်မူ သုံးမီတာခန့် မြင့်မားသော ခုန်းရှီက ဘယ်ဘက်လက်တွင် ဒိုင်း၊ ညာဘက်လက်တွင် ဓားကို ကိုင်စွဲလျက် ရောက်လာချေပြီ။ သူ၏ မျက်နှာမှာ ကျောက်ဆစ်ထားသကဲ့သို့ တည်ကြည်နေပြီး ဝက်ဝံအသွင် လက္ခဏာများက အထင်သား ပေါ်လွင်နေသည်။ သူက ဝုန်းကနဲ ခုန်အုပ်လိုက်ရာ ဆုတက္ကသိုလ် သုံးဦး၏ နောက်ကျောဘက်သို့ ကျရောက်သွားပြီး သူ၏ နီရဲသော မျက်ဝန်းများက သူတို့အား စိုက်ကြည့်နေတော့သည်။</p> <p style="text-align:justify">ရှုကျင်းမင်၏ ထိန်းချုပ်မှုအောက်တွင် ဒုထျန်း နတ်ဘုရား မိုးကြိုးများက အဖွဲ့ဖော် နှစ်ဦးကို မထိခိုက်စေဘဲ သူတို့၏ ပတ်လည်တွင် ဝန်းရံပေးထားသည်။ လျှပ်စီးဒဏ်ကြောင့် နာကျင်နေရသော ဆုဟန်အဖွဲ့သား သုံးဦးမှာမူ မျက်နှာများ ညှိုးငယ်သွားကြတော့သည်။</p> <p style="text-align:justify">"ငါတို့ရဲ့ ပြေးလမ်း ပိတ်သွားပြီ..." အဖွဲ့ခေါင်းဆောင်က အသက်ကို ပြင်းပြင်းရှူကာ သွေးစွမ်းအင်များကို ထပ်မံ ပေါက်ကွဲစေလိုက်သည်။ "ပြေးလမ်းမရှိရင်... တိုက်မယ်ကွာ"</p> <p style="text-align:justify">လွတ်မြောက်ရန် မဖြစ်နိုင်တော့မှန်း သိလိုက်ရသည့်အခါ ထိုသုံးဦးမှာ နောက်ပြန်လှည့်၍ တိုက်ခိုက်ရန် ပြင်လိုက်ကြသည်။</p> <p style="text-align:justify">"တိုက်ကြစို့"</p> <p style="text-align:justify">သူတို့၏ နောက်ကွယ်မှ မိုးကြိုးဓာတ်ရှင် ဆွန်းဖန်နှင့် ပံ့ပိုးမှုအဖွဲ့သားတို့ကလည်း အဝေးမှနေ၍ တတ်နိုင်သမျှ ကူညီပေးနေကြသည်။ သို့သော်လည်း ရှုကျင်းမင်အဖွဲ့၏ ပြင်းထန်လှသော ထိုးစစ်အောက်တွင် သူတို့၏ ခုခံမှုမှာ အနှစ်သာရ မရှိလှပေ။</p> <p style="text-align:justify">"စတုတ္ထမြောက် ပွဲစဉ်... မဂျစ်စီးတီး တက္ကသိုလ် အနိုင်ရပါတယ်"</p> <p style="text-align:justify">မိနစ်အနည်းငယ်အတွင်းမှာပင် အစီအစဉ်မှူးက ရလဒ်ကို ကြေညာလိုက်သည်။ ကောင်းကင်ယံရှိ အမှတ်စာရင်း ဇယားတွင် မဂျစ်စီးတီး၏ အနိုင်ရရှိမှုမှာ နှစ်ပွဲအထိ တိုးသွားခဲ့ပြီ ဖြစ်သည်။</p> <p style="text-align:justify">"မြန်လိုက်တာ... အားတောင် မရသေးဘူး"</p> <p style="text-align:justify">"မတတ်နိုင်ဘူးလေ... ကွာခြားချက်က အရမ်းကြီးလွန်းနေတာကိုး... ဒါက အနိုင်ရတာတင် မဟုတ်ဘဲ နင်းခြေပစ်လိုက်သလိုပဲ"</p> <p style="text-align:justify">"မိုးကြိုးဧကရာဇ်က ဒီလောက်တောင် အစွမ်းထက်လိမ့်မယ်လို့ ဘယ်သူ ထင်မှာလဲ... သူ တစ်ယောက်တည်းနဲ့တင် ဆုတက္ကသိုလ်ကို အလဲထိုးနိုင်တဲ့ပုံပဲ..."</p> <p style="text-align:justify">သုံးမိနစ်ပင် မပြည့်သော တိုက်ပွဲကြောင့် ပရိသတ်များမှာ အားမလိုအားမရ ဖြစ်နေကြသည်။ ရှုကျင်းမင် အစောပိုင်းတွင် ပြသခဲ့သော လွှမ်းမိုးမှုက စိုးရိမ်မှုအားလုံးကို ဖျက်ဆီးပစ်လိုက်သည်။ ငါးယောက်နှင့် တစ်ယောက် ရင်ဆိုင်ရချိန်တွင်ပင် သူ၏ လှံတစ်ချက်က ပြိုင်ဘက်များကို သေလုမတတ် ကြောက်လန့်သွားစေခဲ့သည် မဟုတ်ပါလား။ ချင်းကျင် တက္ကသိုလ်မှ ဝမ်ချီပင်လျှင် ထိုကဲ့သို့ လုပ်ဆောင်နိုင်ခြင်း မရှိပေ။ ပို၍ သိသာသောအချက်မှာ ရှုကျင်းမင်က သူ၏ ခွန်အားအစစ်ကို ထုတ်မသုံးရသေးခြင်းပင်။ ဤသည်မှာ လူအများ ပြောနေကြသော "ငါ အတည်တောင် မလုပ်ရသေးဘူး မင်းတို့က လဲနေပြီ" ဆိုသည့် စကားပုံနှင့် ကွက်တိပင် ဖြစ်နေတော့သည်။ ထို့ကြောင့် သူ၏ နောက်ထပ် ပွဲစဉ်များအပေါ် မျှော်လင့်ချက်များမှာ ပိုမို မြင့်တက်လာခဲ့သည်။</p> <p style="text-align:justify">ပရိသတ်များ စိတ်လှုပ်ရှားနေကြစဉ် အတွင်းပိုင်းဇုန်ရှိ အခြားတက္ကသိုလ်များမှာမူ မှင်သက်နေကြသည်။ နောက်ထပ် အပြတ်အသတ် အနိုင်ရရှိမှု တစ်ခုပင်။ ပိုင်ရှန်း တက္ကသိုလ်ကဲ့သို့ပင် ဆုဟန် တက္ကသိုလ်သည်လည်း ချေမှုန်းခြင်း ခံလိုက်ရသည်။ သူတို့ သိလိုက်ရသည်မှာ ရှုကျင်းမင်၏ လျှပ်စီး ဖြန့်ကျက်နိုင်စွမ်းမှာ မယုံနိုင်စရာ ကောင်းလောက်အောင် ကျယ်ပြန့်သည်ဆိုသည့် အချက်သာ ရှိပြီး အခြား အသုံးဝင်သော အချက်အလက်များ မရရှိခဲ့ကြပေ။</p> <p style="text-align:justify">"ခွဲခြမ်းစိတ်ဖြာဦးမလို့လား... ဘာကို ခွဲခြမ်းစိတ်ဖြာမှာလဲ... ဆုတက္ကသိုလ်တောင် မခံနိုင်ဘူးဆိုရင် သူ့ရဲ့ တိုက်ခိုက်ပုံကို သိနေလည်း မင်းတို့ ခုခံနိုင်မှာ မဟုတ်ဘူး"</p> <p style="text-align:justify">သူတို့က ခုန်းရှီနှင့် ယောင်ဖန်တို့၏ အကြောင်းကို သိထားသော်လည်း ရှုကျင်းမင်၏ အထွတ်အထိပ် စွမ်းအားက မည်မျှရှိသည်ကိုမူ လျှို့ဝှက်ချက်အဖြစ် ရှိနေဆဲ ဖြစ်သဖြင့် သူတို့ လက်လျှော့လိုက်ကြရသည်။</p> <p style="text-align:justify">"ဆုတက္ကသိုလ်တောင် အကျေအနယ် ရှုံးသွားတာပဲ... ငါတို့က ညံ့လို့ မဟုတ်ဘူး... မဂျစ်စီးတီး... မဟုတ်ဘူး ရှုကျင်းမင်ကပဲ အရမ်းကို အစွမ်းထက်လွန်းနေတာ" ပိုင်ရှန်းအဖွဲ့သားများသာလျှင် သူတို့နှင့်အတူ အဖော်ရသွားသဖြင့် စိတ်သက်သာရာ ရနေကြတော့သည်။</p> <p style="text-align:justify">နောက်ထပ် အပြတ်အသတ် အောင်ပွဲတစ်ခုကြောင့် မဂျစ်စီးတီး အဖွဲ့သားများ၏ စိတ်ဓာတ်မှာ အထွတ်အထိပ်သို့ ရောက်ရှိနေသည်။ သို့သော် သူတို့ အားလုံး သိထားသည်မှာ သူတို့၏ အဖွဲ့ခေါင်းဆောင်က ဆုတက္ကသိုလ်ကို အစောကတည်းက အရှိန်အဝါဖြင့် ဖိနှိပ်မထားခဲ့ပါက ဤတိုက်ပွဲမှာ ယခုထက် ပို၍ ခက်ခဲပေလိမ့်မည်။</p> <p style="text-align:justify">"ချင်းကျင်နဲ့ ကျင်းချန်း တက္ကသိုလ်တွေကတော့ အဖွဲ့ခေါင်းဆောင်ရဲ့ ခွန်အားကို စူးစမ်းနေတုန်းပဲ... ဒီလောက်အဆင့် တိုက်ပွဲက သွေးပူလေ့ကျင့်ခန်းတောင် မဖြစ်သေးဘူးဆိုတာ သူတို့ မသိကြဘူးလေ..." ယောင်ဖန်က နောက်ပြောင်လိုက်သည်။</p> <p style="text-align:justify">ရှုကျင်းမင် သူ၏ အစွမ်းအစ အစစ်အမှန်ကို ထုတ်ပြလိုက်သည့်အခါ ထိုပြိုင်ဘက်များ အထူးသဖြင့် ချင်းကျင် တက္ကသိုလ်မှ လူများ၏ မျက်နှာပေါ်က ထိတ်လန့်မှုကို မြင်တွေ့ရန် သူမ မစောင့်နိုင်တော့ပေ။ ရှုကျင်းမင်အတွက်မူ ဤပွဲမှာ အရေးမပါလှပါ။ သာမန် တက္ကသိုလ်များမှာ သူ့အတွက် စိတ်ဝင်စားစရာ မကောင်းတော့ဘဲ ထိပ်တန်း တက္ကသိုလ်များသာ သူ၏ ပစ်မှတ် ဖြစ်တော့သည်။ သို့သော် ကျင်းချန်းနှင့် ချင်းကျင် တက္ကသိုလ်များအတွက်မူ ဤခြိမ်းခြောက်မှုကြီးမှာ သူတို့ ရင်ဆိုင်ရမည့် လက်တွေ့ဘဝ ဖြစ်နေသည်။</p> <p style="text-align:justify">နောက်ရက်များတွင် သူတို့က ရှုကျင်းမင်ကို စောင့်ကြည့်ရန် ကင်းထောက်များကို ပိုမို စေလွှတ်ခဲ့ကြသည်။ ပြိုင်ပွဲကြီး ဆက်လက် ကျင်းပလာသည်နှင့်အမျှ မဂျစ်စီးတီးက ပြိုင်ဘက်တိုင်းကို ချေမှုန်းနိုင်ခဲ့သည်။ ပွဲစဉ်တိုင်းနီးပါးမှာ တစ်ဖက်သတ် အနိုင်ရရှိမှုများသာ ဖြစ်သည်။</p> <p style="text-align:justify">ဆဋ္ဌမမြောက်နေ့ အပြီးတွင် မဂျစ်စီးတီးက အသင်းလိုက်ပွဲ ခုနစ်ပွဲဆက်တိုက် အနိုင်ရရှိခဲ့သည်။ တစ်ဦးချင်း ပြိုင်ပွဲတွင်လည်း ရှုကျင်းမင်က သုံးပွဲဆက်တိုက် အနိုင်ရကာ ထိပ်တန်း ရှစ်ယောက်စာရင်းသို့ တက်လှမ်းနိုင်ခဲ့ပြီ ဖြစ်သည်။</p> <p style="text-align:justify">မတ်လ ၁၆ ရက်နေ့သို့ ရောက်ရှိလာခဲ့သည်။ နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲ၏ သတ္တမမြောက်နေ့ ဖြစ်သည်။ ယနေ့၏ အသင်းလိုက်ပွဲစဉ်မှာ မဂျစ်စီးတီးနှင့် ကျင်းချန်း တက္ကသိုလ်တို့ ပထမဆုံးအကြိမ် ထိပ်တိုက်တွေ့ဆုံမည့် ပွဲစဉ်ပင် ဖြစ်တော့သည်။<br /> ***</p>


Save