Book List

<h2 style="text-align: center;">အခန်း ၂၈၅ - အကဲဖြတ်ဒိုင်လူကြီးများ ရောက်ရှိလာပြီ မိုးကြိုးသိုင်းသင်တန်းကျောင်း၏ ပိုင်ရှင် ဆုချင်းလီ</h2> <h2 style="text-align: center;">*</h2> <h2 style="text-align: center;"> </h2> <p> </p> <p> </p> <p style="text-align:justify">"ကျောက်တုံးဘုရင် နိုင်သွားပြီ"</p> <p style="text-align:justify">"သူက တကယ်ကို အစွမ်းထက်တာပဲ... ထိပ်တန်းတက္ကသိုလ်က ရေခဲတောင်ကိုတောင် တစ်ချက်တည်းနဲ့ အပြတ်ရှင်းသွားတာ"</p> <p style="text-align:justify">"ကျောက်တုံးဘုရင်ရယ် မိုးကြိုးဧကရာဇ်ရယ်... ဒီနှစ် လိဂ်ပြိုင်ပွဲကတော့ တကယ်ကို ထိတ်ထိတ်ကြဲ နှစ်ယောက်ကို မွေးထုတ်ပေးလိုက်တာပဲ"</p> <p style="text-align:justify">ပွဲကြည့်စင်များထက်တွင် အံ့ဩချီးကျူးသံများက အဆက်မပြတ် ထွက်ပေါ်နေသည်။</p> <p style="text-align:justify">အကဲဖြတ်နိုင်စွမ်းရှိသူတိုင်းက ပေကျင်းတက္ကသိုလ်မှ ဝမ်ချီနှင့် မဂျစ်စီးတီးတက္ကသိုလ်မှ ရှုကျင်းမင်တို့မှာ ကျန်လူများနှင့် လုံးဝကို ကွာခြားသော အဆင့်တစ်ခုတွင် ရှိနေကြောင်း သိမြင်နိုင်ကြသည်။</p> <p style="text-align:justify">"ပြောရရင်တော့ ဝမ်ချီနဲ့ ရှုကျင်းမင်ရဲ့ တိုက်ခိုက်ရေးဟန်တွေက တော်တော်လေး ဆင်တူတယ်နော်"</p> <p style="text-align:justify">"ပေကျင်းတက္ကသိုလ်က ဝမ်ချီက ခန္ဓာကိုယ်ကြံ့ခိုင်ရေး တိုက်ခိုက်ရေးနည်းစနစ် မြေထုအားပြင်း ခန္ဓာကိုယ်ကို ကျင့်ထားတယ်... အဲဒါက ခန္ဓာကိုယ်ပုံစံ ပြောင်းလဲမှုနဲ့ သူ့ရဲ့ စွမ်းရည်ကို အစွမ်းမြှင့်ပေးတဲ့ အာနိသင်လည်း ပါတယ်"</p> <p style="text-align:justify">"ဟုတ်တယ်... နှမြောစရာကောင်းတာက ရှုကျင်းမင်ရဲ့ အဆင့်က နိမ့်နေသေးတာပဲ... သူ ဒီနှစ်တော့ ဝမ်ချီကို နိုင်ဖို့ မလွယ်လောက်ဘူး"</p> <p style="text-align:justify">အတွင်းပိုင်း ပွဲကြည့်ဧရိယာရှိ ဆရာများမှာလည်း တက်ကြွစွာ ဆွေးနွေးနေကြသည်။ ဝမ်ချီနှင့် ရှုကျင်းမင်တို့မှာ ယခုနှစ် နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲ၏ တစ်ဦးချင်းပြိုင်ပွဲတွင် ဗိုလ်စွဲရန် အကြိုက်ဆုံးသူများ ဖြစ်ကြသည်။ မထင်မှတ်ထားသည်များ မဖြစ်ခဲ့ပါက ချန်ပီယံဆုမှာ သူတို့နှစ်ဦးထဲမှ တစ်ဦးဦးသာ ရရှိမည် ဖြစ်သည်။</p> <p style="text-align:justify">မည်သူက ပို၍ အနိုင်ရနိုင်ခြေ ရှိသလဲဆိုသည်နှင့် ပတ်သက်၍မူ ဆရာအများစုမှာ ပေကျင်းတက္ကသိုလ်မှ ဝမ်ချီဘက်သို့ ပိုယိမ်းနေကြဆဲ ဖြစ်သည်။ အဘယ်ကြောင့်ဆိုသော် မြေဓာတ်စွမ်းရည်မှာ မိုးကြိုးဓာတ်စွမ်းရည်ကို ဖိနှိပ်နိုင်ပြီး ဝမ်ချီက ရှုကျင်းမင်ထက် အဆင့်ကြီးတစ်ခုစာ မြင့်မားနေသောကြောင့်ပင်။</p> <p style="text-align:justify">ရှုကျင်းမင်၏ မိုးကြိုးဓာတ်စွမ်းရည်က SSအဆင့် ဖြစ်နေလျှင်တောင်မှ စွမ်းရည်ကွာဟချက်ကို အဆင့်ကွာဟချက်ဖြင့် ချေဖျက်နိုင်လောက်သည်ဟု ယူဆထားကြသည်။ ထို့အပြင် ဝမ်ချီ၏ ကောင်းကင်ဘုံ ကြွေကျမိုးကြိုးမြေမှာ သာမန် Aအဆင့် စွမ်းရည်မဟုတ်ဘဲ ပိုမိုအားကောင်းသော Sအဆင့်အတုစွမ်းရည် ဖြစ်နေသည်။ ထိုသို့ဆိုခြင်းက ရှုကျင်းမင်ကို မသန်မာဘူးဟု ဆိုလိုခြင်း မဟုတ်ပေ။ အမှန်တကယ်တွင် ရှုကျင်းမင်မှာ မယုံနိုင်လောက်အောင် သန်မာလှသည်။</p> <p style="text-align:justify">သူ၏ ကြောက်မက်ဖွယ်ကောင်းသော စွမ်းအားမှာ SSအဆင့် စွမ်းရည်ကြောင့်တစ်ခုတည်း မဟုတ်ဘဲ သူ၏ အထွေထွေ အရည်အချင်းများမှာ ကြောက်စရာကောင်းလောက်အောင် မြင့်မားနေသောကြောင့် ဖြစ်သည်။ သူ၏ ခန္ဓာကိုယ်ကြံ့ခိုင်ရေး တိုက်ခိုက်ရေးနည်းစနစ်မှာ အလွန်မြင့်မားသော အဆင့်တစ်ခုအထိ ရောက်ရှိနေပြီ ဖြစ်သည်။ သူက မိုးကြိုးဓာတ် Aအဆင့် တိုက်ခိုက်ရေးနည်းစနစ် များစွာကို ကျွမ်းကျင်ရုံသာမက အစွမ်းထက်လှသော Sအဆင့် တိုက်ခိုက်ရေးနည်းစနစ်များကိုပါ ကျွမ်းကျင်နေသည်။</p> <p style="text-align:justify">ဤသည်မှာ စတုတ္ထအဆင့်လတ် စွမ်းရည်ပိုင်ရှင်များစွာပင် မလုပ်နိုင်သောအရာ ဖြစ်သည်။ သို့သော် ရှုကျင်းမင်မှာ တတိယအဆင့်မြင့်မျှသာ ရှိသေးသည်။ ပို၍အရေးကြီးသည်မှာ သူက အသက် ၁၉ နှစ်သာ ရှိသေးခြင်းပင်။ ပါရမီရှင် ဆိုသည့် စကားလုံးမှာ သူ့အတွက် အားနည်းလွန်းနေပြီး နတ်ဆိုးဆန်တဲ့ ပါရမီရှင် ဆိုသည့် စကားလုံးကသာ သူ့ကို ဖော်ပြရန် အသင့်တော်ဆုံး ဖြစ်ပေမည်။</p> <p style="text-align:justify">ငယ်ရွယ်ခြင်းက သူ၏ အားသာချက်ဖြစ်သော်လည်း အားနည်းချက်လည်း ဖြစ်နေပြန်သည်။ အဘယ်ကြောင့်ဆိုသော် သူ၏ ကျင့်ကြံချိန်မှာ ဝမ်ချီထက် သုံးနှစ်ခန့် လျော့နည်းနေသောကြောင့်ပင်။ ယခုလိဂ်ပြိုင်ပွဲတွင်တော့ ရှုကျင်းမင်မှာ အနည်းငယ် နောက်ကောက်ကျနေသည်မှာ အမှန်ပင်။</p> <p style="text-align:justify">"ဒီနှစ်တော့ သူ့ကို တားနိုင်တဲ့ ပေကျင်းတက္ကသိုလ်က ဝမ်ချီ ရှိနေသေးတယ် ဒါပေမဲ့ နောက်နှစ်တွေကျရင်ကော... ဒုတိယ ဝမ်ချီ တစ်ယောက် ပေါ်လာရင်တောင်မှ သူ့ကို တားနိုင်ပါ့မလား"</p> <p style="text-align:justify">ဆရာများစွာမှာ စိတ်ထဲမှ သက်ပြင်းချနေမိကြသည်။ သူတို့က သက်ပြင်းချနေရုံသာ ဖြစ်ပြီး တကယ်တမ်း ပူပန်ရမည်မှာ အခြားသော ထိပ်တန်းတက္ကသိုလ်ကြီး နှစ်ခုသာ ဖြစ်သည်။ သူတို့ကဲ့သို့ သာမန် ထိပ်တန်း ၁၀ ကျောင်းစာရင်းဝင် တက္ကသိုလ်များအတွက်မူ ကြီးမားသော သက်ရောက်မှု မရှိပေ။ မဂျစ်စီးတီးတက္ကသိုလ်တွင် ရှုကျင်းမင် မရှိလျှင်တောင်မှ သူတို့က ထိပ်တန်းသုံးကျောင်းစာရင်းထဲ ဝင်နိုင်မည် မဟုတ်ပေ။</p> <p style="text-align:justify">ပြင်းထန်စွာ ဒဏ်ရာရသွားသော ယောင်ဖန်ကို ဆေးဘက်ဆိုင်ရာ အဖွဲ့က ထမ်းစင်ဖြင့် အလျင်အမြန် သယ်ထုတ်သွားကြသည်။ မဂျစ်စီးတီးတက္ကသိုလ်၏ အတူလိုက်ပါလာသော ဆရာများထဲတွင် သတ္တမအဆင့် အထွတ်အထိပ် ကုသရေးဆရာတစ်ဦး ပါလာသည်မှာ သေချာပေါက်ပင်။ ယောင်ဖန်ကို ဆေးအဖွဲ့ထံမှ လွှဲပြောင်းရယူပြီးနောက် သူက ချက်ချင်းပင် ကုသမှုကို စတင်တော့သည်။</p> <p style="text-align:justify">"ရှုကျင်းမင် တစ်ချက်တည်းနဲ့ အပြတ်ရှင်းတာကို ငါလည်း လုပ်ပြလိုက်ပြီ မနက်ဖြန် တစ်ဦးချင်းပြိုင်ပွဲ ဗိုလ်လုပွဲမှာ မင်းနဲ့ ရင်ဆိုင်ရဖို့ ငါ တကယ်ကို မျှော်လင့်နေတယ်... အဲဒီအချိန်ကျရင် မင်း ပျက်ကွက်တာမျိုး မဖြစ်ပါစေနဲ့"</p> <p style="text-align:justify">ထိုအချိန်တွင် ဝမ်ချီမှာလည်း စင်မြင့်ပေါ်မှ ဆင်းလာခဲ့ပြီ ဖြစ်သည်။ အရိုင်းဆန်သော အပြုံးတစ်ခုနှင့်အတူ သူက ရှုကျင်းမင်ကို စကားတစ်ခွန်း ပစ်ပေါက်လိုက်ပြီးနောက် သူ၏ တိုက်ခိုက်ရေးဓားကို ကိုင်ကာ ထွက်ခွာသွားတော့သည်။</p> <p style="text-align:justify">"တစ်ဦးချင်းပြိုင်ပွဲ ဗိုလ်လုပွဲ..." ရှုကျင်းမင်၏ အကြည့်များက အနည်းငယ် မှေးစင်းသွားသည်။</p> <p style="text-align:justify">ယနေ့ ကွာတားဖိုင်နယ် ပွဲစဉ်များမှ ၄ ဦး တက်လှမ်းခွင့် ရရှိမည် ဖြစ်သည်။ မနက်ဖြန် မွန်းလွဲပိုင်း တစ်ဦးချင်းပြိုင်ပွဲတွင်မူ ဆီမီးဖိုင်နယ်နှင့် ဗိုလ်လုပွဲများကို အစဉ်လိုက် ကျင်းပသွားမည် ဖြစ်သည်။ ဆိုလိုသည်မှာ တစ်ဦးချင်းပြိုင်ပွဲ၏ ချန်ပီယံကို မနက်ဖြန် မွန်းလွဲပိုင်းတွင် အဆုံးအဖြတ်ပေးမည် ဖြစ်သည်။</p> <p style="text-align:justify">"ဒီကောင်က တကယ်ကို မောက်မာတာပဲ"<br /> "သူ့လေသံကို နားထောင်ရတာ တစ်ဦးချင်းပြိုင်ပွဲကို သူ နိုင်ဖို့ သေချာနေပြီလို့ ထင်နေပုံရတယ်"</p> <p style="text-align:justify">ဂုဝမ်နှင့် အခြားသူများမှာ ထိုစကားကို ကြားသောအခါ ဒေါသထွက်သွားကြသော်လည်း ရှုကျင်းမင်ကမူ တည်ငြိမ်သော အမူအရာဖြင့် လက်ကာပြလိုက်သည်။ "ရပါတယ်... ဘယ်လိုပဲဖြစ်ဖြစ် ဗိုလ်လုပွဲမှာ တွေ့ကြမှာပဲလေ... အဲဒီအချိန်ကျရင် ဘယ်သူက ဆရာကြီးလဲဆိုတာ သူ အလိုလို နားလည်သွားမှာပါ..."</p> <p style="text-align:justify">ဝမ်ချီနှင့် ယောင်ဖန်တို့၏ ပွဲစဉ်အပြီးတွင် ကုန်းရှီနှင့် ချန်နန်စွမ်းရည်ပိုင်ရှင်တက္ကသိုလ် ကိုယ်စားပြုအသင်း ခေါင်းဆောင် ရှန်ယာတို့၏ ပွဲစဉ် စတင်တော့သည်။</p> <p style="text-align:justify">ဆုဟန်စွမ်းရည်ပိုင်ရှင်တက္ကသိုလ်ကဲ့သို့ပင် ချန်နန်စွမ်းရည်ပိုင်ရှင်တက္ကသိုလ်မှာလည်း ထိပ်တန်း ၅ ကျောင်းစာရင်းတွင် မကြာခဏ ပါဝင်လေ့ရှိသော တက္ကသိုလ်တစ်ခု ဖြစ်သည်။ သူတို့၏ အဖွဲ့ခေါင်းဆောင်မှာလည်း သဘာဝကျစွာပင် အလွန်အစွမ်းထက်လှသည်။ သို့သော် နှမြောစရာကောင်းသည်မှာ ကုန်းရှီက ပို၍ အစွမ်းထက်နေခြင်းပင် သူက ထိုတိုက်ပွဲကို ဆယ်မိနစ်အတွင်းမှာပင် အဆုံးသတ်လိုက်သည်။</p> <p style="text-align:justify">ယင်းနှင့်အတူ တစ်ဦးချင်းပြိုင်ပွဲ၏ ကွာတားဖိုင်နယ် ပွဲစဉ်များ ပြီးဆုံးသွားခဲ့ပြီ ဖြစ်သည်။ မဂျစ်စီးတီးတက္ကသိုလ်မှ ရှုကျင်းမင်နှင့် ကုန်းရှီ၊ ပေကျင်းတက္ကသိုလ်မှ ဝမ်ချီနှင့် ကျိုးထိုက်ကျိ စုစုပေါင်း လေးဦးမှာ ဆီမီးဖိုင်နယ်သို့ တက်လှမ်းခွင့် ရရှိသွားကြပြီ ဖြစ်သည်။</p> <p style="text-align:justify">မတ်လ ၁၇ ရက်နေ့မှာ နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲ ဒုတိယအဆင့်၏ (၈) ရက်မြောက်နေ့ ဖြစ်သည်။ ယနေ့တွင် ချင်းကျင်စွမ်းရည်ပိုင်ရှင်တက္ကသိုလ်နှင့် ကျင်းချန်းစွမ်းရည်ပိုင်ရှင်တက္ကသိုလ်တို့၏ အသင်းလိုက်ပြိုင်ပွဲများ ရှိသကဲ့သို့ တစ်ဦးချင်းပြိုင်ပွဲ၏ ဆီမီးဖိုင်နယ်နှင့် ဗိုလ်လုပွဲများကိုလည်း ကျင်းပမည် ဖြစ်သည်။ ထို့ကြောင့် အားကစားကွင်းတစ်ခုလုံး၏ ပွဲကြည့်စင်များမှာ ခြွင်းချက်အနေဖြင့် အလွန်ပင် စည်ကားနေတော့သည်။ အွန်လိုင်းတိုက်ရိုက်ထုတ်လွှင့်မှု အခန်းအသီးသီးမှ ကြည့်ရှုသူအရေအတွက်မှာလည်း ငါးသန်းနီးပါးအထိ ရောက်ရှိသွားခဲ့သည်။</p> <p style="text-align:justify">နံနက်ပိုင်းတွင် အသင်းလိုက်ပြိုင်ပွဲ ၅ ပွဲ ရှိပြီး ပေကျင်းတက္ကသိုလ်နှင့် ကျင်းတက္ကသိုလ်တို့၏ ပွဲစဉ်ကို ပထမဆုံး ကျင်းပခဲ့သည်။ ပွဲစသည်နှင့် ကျင်းတက္ကသိုလ်အသင်းမှာ အလွန်ပြင်းထန်သော ဖိနှိပ်မှုစွမ်းအားကို ပြသခဲ့သည်။ အဝေးပစ် စွမ်းအင်ဓာတ်ရှင် သုံးဦးက ဆက်တိုက် တိုက်ခိုက်မှုများ ပြုလုပ်ခဲ့ပြီး ဝမ်ချီကိုယ်တိုင် ရှေ့ထွက်ကာ ပေကျင်းတက္ကသိုလ်အတွက် ဒဏ်ရာများကို ခံပေးခဲ့သည့်တိုင် Sအဆင့် စွမ်းအင်ကာကွယ်ရေးဒိုင်း အထပ်ထပ်ကို တစ်ချီတည်းနှင့် မဖြိုခွဲနိုင်ခဲ့ပေ။</p> <p style="text-align:justify">ထိုနည်းအတိုင်း ပေကျင်းတက္ကသိုလ်မှာ လေးငါးကြိမ်ခန့် အပြန်အလှန် ကြိုးစားခဲ့ရသည်။ မိနစ် ၂၀ နီးပါး ကြာမှသာ ကျင်းတက္ကသိုလ်ကို အနိုင်ယူကာ အောင်ပွဲကို ရယူနိုင်ခဲ့သည်။ ကျင်းတက္ကသိုလ် အသင်းသားများမှာ ဤရလဒ်အတွက် အနည်းငယ် ယူကျုံးမရ ဖြစ်နေကြသည်။ မနေ့က ရှုကျင်းမင်၏ မိုးကြိုးနတ်ဘုရား လက်ချောင်းကြောင့် ရရှိခဲ့သော ပြင်းထန်သည့် ဒဏ်ရာများသာ မရှိခဲ့လျှင် ယခုအချိန်အထိ အပြည့်အဝ ပြန်မကောင်းသေးဘဲ သူတို့၏ အထွေထွေစွမ်းအားများ သိသိသာသာ လျော့ကျမနေခဲ့လျှင် ဤအသင်းလိုက်ပြိုင်ပွဲ၏ ရလဒ်မှာ တကယ်ကို မသေချာနိုင်ပေ။</p> <p style="text-align:justify">အောင်ပွဲရပြီးနောက် ပေကျင်းတက္ကသိုလ်နှင့် မဂျစ်စီးတီးတက္ကသိုလ်တို့မှာ (၈) ပွဲနိုင် (၀) ပွဲရှုံးဖြင့် ရလဒ်တူညီနေကြသည်။ အသင်းလိုက်ပြိုင်ပွဲ၏ ချန်ပီယံကို အဆုံးအဖြတ်ပေးမည့် နောက်ဆုံးတိုက်ပွဲကိုမူ မနက်ဖြန် မတ်လ ၁၈ ရက်နေ့၏ တတိယမြောက် ပွဲစဉ်တွင် ကျင်းပမည် ဖြစ်သည်။ ထိုမတိုင်မီ မွန်းလွဲပိုင်းတွင် တစ်ဦးချင်းပြိုင်ပွဲ၏ ချန်ပီယံမှာ တစ်လှမ်းစော၍ ထွက်ပေါ်လာမည် ဖြစ်သည်။</p> <p style="text-align:justify">မတ်လ၏ ချင်းရွှီမြို့မှာ နွေဦးရာသီသို့ ဝင်ရောက်နေပြီဖြစ်ရာ မွန်းတည့်နေမှာ မပူလွန်းဘဲ နွေးထွေးသာယာနေသည်။ မွန်းလွဲပိုင်း ပွဲစဉ်များ စတင်မည့် တရားဝင်အချိန် ၂ နာရီပင် မထိုးသေးသော်လည်း အားကစားကွင်းတစ်ခုလုံးမှာ ပြည့်နှက်နေပြီ ဖြစ်သည်။ အွန်လိုင်းတိုက်ရိုက်ထုတ်လွှင့်မှုများတွင်လည်း ကြည့်ရှုသူ ဆယ်သန်းကျော်အထိ စံချိန်သစ် တင်သွားခဲ့သည်။</p> <p style="text-align:justify">နံနက်ပိုင်းက နေရာလွတ်များ ရှိနေသေးသော အတွင်းပိုင်း ပွဲကြည့်ဧရိယာမှာ ယခုအခါ လုံးဝနီးပါး ပြည့်ကျပ်နေပြီ ဖြစ်သည်။</p> <p style="text-align:justify">"ဘုရားရေ ဟိုမှာ နိုင်ငံတော် ပညာရေးဦးစီးဌာနရဲ့ ဒုတိယညွှန်ကြားရေးမှူး ဝူယွမ် မဟုတ်လား သူ ကိုယ်တိုင် လာတာလား"</p> <p style="text-align:justify">"သူတင် မဟုတ်ဘူးဟ မီးတောက်နဂါး တပ်မတော်ရဲ့ ဒုတိယတပ်မှူးလည်း ရောက်နေတယ်"</p> <p style="text-align:justify">"မီးတောက်နဂါး တပ်မတော်ဆိုတာ နိုင်ငံတော်ရဲ့ တရားဝင် နောက်ခံရှိတဲ့ အဖွဲ့လေ... သူတို့ရဲ့ ဒုတိယတပ်မှူးတောင် လာတာလား"</p> <p style="text-align:justify">ပရိသတ်များစွာမှာ အတွင်းပိုင်း ပွဲကြည့်ဧရိယာရှိ မျက်နှာသစ်များစွာမှာ တီဗီသတင်းများတွင် မကြာခဏ မြင်တွေ့ရလေ့ရှိသော ရင်းနှီးသည့် ပုဂ္ဂိုလ်များဖြစ်နေသည်ကို အံ့ဩစွာ တွေ့ရှိလိုက်ကြသည်။</p> <p style="text-align:justify">မည်သူမည်ဝါမှန်း မသိနိုင်သော သူများပင်လျှင် အားကောင်းလှသော အရှိန်အဝါများကို ထုတ်လွှင့်နေကြသည်။ သူတို့တွင် ဒေါသထွက်စရာ မလိုဘဲ အာဏာစက်ရှိနေသည့် အသွင်အပြင်များ ရှိနေကာ အဆင့်မြင့် ရာထူးများတွင် အချိန်ကြာမြင့်စွာ တာဝန်ထမ်းဆောင်နေသူများဖြစ်ကြောင်း သိသာထင်ရှားနေသည်။</p> <p style="text-align:justify">"မနှစ်ကလည်း အရေးကြီးပုဂ္ဂိုလ်တွေ လာကြည့်ကြတာကို ငါ မှတ်မိတယ်... ဒါပေမဲ့ ဒီလောက်အထိ အဆင့်မြင့်ပုံ မရပါဘူး"</p> <p style="text-align:justify">"အရူးကောင် ဒီနှစ် ကျောင်းသားတွေရဲ့ အဆင့်ကိုလည်း ကြည့်ဦးလေ ဒီလောက်အထိ စွမ်းအားတွေ မြင့်တက်လာမှတော့ အရေးကြီးပုဂ္ဂိုလ်တွေ အများကြီးကို ဆွဲဆောင်နိုင်တာ မဆန်းပါဘူး"</p> <p style="text-align:justify">အမှန်ပင် ယမန်နှစ် နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲတွင် ပါဝင်ယှဉ်ပြိုင်သူများမှာ တတိယအဆင့် အထွတ်အထိပ်နှင့် စတုတ္ထအဆင့်နိမ့်မျှသာ ရှိကြသည်။ သို့သော် ယခုနှစ်တွင်မူ အဆင့်နိမ့် တက္ကသိုလ်အချို့မှ တတိယအဆင့် အထွတ်အထိပ် အနည်းငယ်ကလွဲလျှင် ထိပ်တန်း တက္ကသိုလ်ငါးခုမှ အဖွဲ့ဝင်များအားလုံးမှာ စတုတ္ထအဆင့်နိမ့် စွမ်းရည်ပိုင်ရှင်များ ဖြစ်ကြသည်။ စတုတ္ထအဆင့်လတ် စွမ်းရည်ပိုင်ရှင်များစွာ ပါဝင်ပြီး အမြင့်ဆုံးအဆင့်မှာ စတုတ္ထအဆင့်မြင့်အထိ ရောက်ရှိနေပြီ ဖြစ်သည်။ စွမ်းအားနှင့် လူစာရင်းအရ ယမန်နှစ် လိဂ်ပြိုင်ပွဲနှင့် လုံးဝ နှိုင်းယှဉ်၍မရပေ။</p> <p style="text-align:justify">"ဘုရားရေ နောက်ထပ် အရေးကြီးပုဂ္ဂိုလ်တစ်ယောက် ထပ်ရောက်လာပြန်ပြီ"</p> <p style="text-align:justify">"ဟင်... ငါ ဒီအရေးကြီးပုဂ္ဂိုလ်ကို မသိသလိုပဲ ဒါပေမဲ့ သူက တအားလှတာပဲ"</p> <p style="text-align:justify">"အမှန်ပဲ... ပန်းချီကားထဲက ထွက်လာသလိုပဲ..."</p> <p style="text-align:justify">ပွဲကြည့်စင်များထက်တွင် ဆူညံသံများ ထွက်ပေါ်လာပြီး အမျိုးသားများစွာမှာ အတွင်းပိုင်း ပွဲကြည့်ဧရိယာ၏ အထူးဝင်ပေါက်ဆီသို့ အားကျစွဲလန်းသော အကြည့်များဖြင့် လှမ်းကြည့်နေကြသည်။ ထိုနေရာမှ လူလေးယောက်ပါဝင်သော အဖွဲ့တစ်ဖွဲ့ ဝင်ရောက်လာသည်။</p> <p style="text-align:justify">ရှေ့ဆုံးမှ ဦးဆောင်လာသူမှာ အနက်ရောင်ဝတ်စုံနှင့် ကျော့ရှင်းလှပသော ကိုယ်လုံးကိုယ်ပေါက်ရှိသည့် အမျိုးသမီးတစ်ဦး ဖြစ်သည်။ ထိုအမျိုးသမီးမှာ အသက် ၂၇၊ ၂၈ နှစ်ခန့် ရှိပုံရပြီး သိုးဆီကျောက်စိမ်းကဲ့သို့ အပြစ်အနာအဆာကင်းစင်ကာ အလွန်လှပသည်။ သူမ၏ အမူအရာမှာ ဒဏ္ဍာရီလာ နတ်သမီးတစ်ပါးကဲ့သို့ မြင့်မြတ်ပြီး ခန့်ညားလှသဖြင့် မည်သူမျှ ရိုင်းစိုင်းသော အတွေးများကိုပင် မတွေးရဲအောင် ဖြစ်စေသည်။</p> <p style="text-align:justify">"ဆုချင်းလီ သူက ဘာလို့ ဒီကို ရောက်နေတာလဲ"</p> <p style="text-align:justify">"သူက မိုးကြိုးသိုင်းသင်တန်းကျောင်းရဲ့ ကမ္ဘာလုံးဆိုင်ရာ ဌာနချုပ်မှာ ရှိနေရမှာ မဟုတ်ဘူးလား"</p> <p style="text-align:justify">ထိုအမျိုးသမီးကို မြင်သောအခါ အတွင်းပိုင်း ပွဲကြည့်ဧရိယာမှ လူများစွာနှင့် အဆင့် ၈ အထွတ်အထိပ် ဆရာကြီးအချို့ပင်လျှင် အံ့အားသင့်သွားကြသည်။ သာမန်ပရိသတ်များက သူမ မည်သူမှန်း မသိနိုင်သော်လည်း သူတို့က မသိဘဲ နေမည်လား။ သူမက မဟာနွေရာသီ တိုင်းပြည်၏ ထိပ်တန်း သိုင်းသင်တန်းကျောင်းကြီးနှစ်ခုမှ တစ်ခုဖြစ်သော မိုးကြိုးသိုင်းသင်တန်းကျောင်း၏ လက်ရှိအကြီးအကဲပင် ဖြစ်သည်။</p> <p style="text-align:justify">“မိုးကြိုးဓာတ် Sအဆင့် စွမ်းရည် ကျောက်စိမ်းဝင်ရိုး မိုးကြိုးအစစ်ကို ပိုင်ဆိုင်ထားပြီး နဝမအဆင့် သိုင်းသူတော်စင်အဆင့်သို့ ရောက်ရှိနေသော ဆုချင်းလီ...”</p> <p style="text-align:justify">***</p>


Save