Book List

<h2 style="text-align: center;">အခန်း (၅၆၃)</h2> <h2 style="text-align: center;">ဝက်ဝံရိုင်း မြေပြင်ကို တုန်ဟိန်းစေခြင်း။ လူသားတို့နယ်ပယ် ၁၀ နိုင်ငံ။ (၂)</h2> <h2 style="text-align: center;">*</h2> <p> </p> <p> </p> <p> </p> <p> </p> <p> </p> <p>“ဒီလူက... တကယ်ကို ထူးခြားတာပဲ။ မူလဓာတ်ငါးပါး သိုင်းပညာရှင်များလား။”</p> <p> </p> <p>စူးချန်ခုန်း၏ မျက်လုံးအစုံတွင် လေးနက်သော အရိပ်အယောင်တစ်ခု ဖြတ်ပြေးသွားသည်။ စူးချန်ခုန်း၏ ဝိညာဉ်စွမ်းအင်အပေါ် အာရုံခံနိုင်စွမ်းမှာ အလွန်ပင် ထက်မြက်သော်လည်း ထိုလူ စကားမပြောမီအထိ သူ၏ တည်ရှိမှုကို စူးချန်ခုန်း မသိခဲ့ပေ။ ထိုသူ၏ ခန္ဓာကိုယ်မှ အရှိန်အဝါ အနည်းငယ်မျှပင် ယိုစိမ့်ထွက်ပေါ်ခြင်း မရှိဘဲ စွမ်းအင်အားလုံးမှာ စိတ်ဝိညာဉ်ပင်လယ်အတွင်းသို့ ပြန်လည် စုစည်းနေပုံရရာ အနှီလူမှာ မူလဓာတ်ငါးပါး သိုင်းပညာရှင်တစ်ဦ ဖြစ်နိုင်ခြေ များသည်။</p> <p> </p> <p>စူးချန်ခုန်းသည် ထိုသူ၏ မည်သူမည်ဝါဖြစ်ကြောင်းကိုလည်း ယခုအချိန်တွင် ခန့်မှန်းမိသွားပြီ ဖြစ်သည်။ ထိုသူသည်လည်း လိပ်အသက်ရှူနည်းပညာဖြင့် အရှိန်အဝါကို ဖုံးကွယ်ထားသော စူးချန်ခုန်းကို အကဲခတ်နေပြီး စူးချန်ခုန်း၏ ကျင့်ကြံခြင်း အဆင့်အတန်းကို အတိအကျ မသိနိုင်ပေ။ သို့သော် သူရရှိထားသော သတင်းအချက်အလက်များအရ 'တာ့ဝူဖုန်း' သည် မူလဓာတ်ငါးပါး သိုင်းပညာရှင်တစ်ဦးကိုပင် သတ်နိုင်သော ထိပ်တန်း တိုက်ခိုက်ရေးသမားတစ်ဦး ဖြစ်ကြောင်း သူ သိထားသည်။</p> <p> </p> <p>“ညီလေးတာ့၊ ထိုင်ပါဦး။ အဲဒီ သစ္စာဖောက်ကို သတ်နိုင်ခဲ့တဲ့သူပီပီ မင်းက တကယ်ကို ရှားပါးတဲ့ ပါရမီရှင်တစ်ယောက်ပဲ။”</p> <p> </p> <p>ထိုသူသည် စူးချန်ခုန်းကို အားတက်သရော ထိုင်ရန် ဖိတ်ခေါ်လိုက်သည်။</p> <p> </p> <p>“အစ်ကို့နာမည်က လျန်ထျန်းလုပါ။ မိစ္ဆာနှိမ်နင်းရေးဌာနရဲ့ ဒုတိယအကြီးအကဲပါ”</p> <p> </p> <p>စူးချန်ခုန်း ထိုင်လိုက်သည်နှင့် ထိုသူသည် သူ့ကိုယ်သူ မိတ်ဆက်ပြီး သူ၏ ရာထူးကို ထုတ်ဖော် ပြောကြားလိုက်သည်။</p> <p> </p> <p>“ဒါဆို ခင်ဗျားက မိစ္ဆာနှိမ်နင်းရေးဌာနကပေါ့...”</p> <p> </p> <p>စူးချန်ခုန်းမှာ အလွန်အမင်း အံ့အားသင့်ခြင်း မရှိပေ။ မိစ္ဆာနှိမ်နင်းရေးဌာန၏ တတိယအဆင့် အရာရှိဖြစ်သူ ချီကန်းသည် မဟာမီးလျှံအင်ပါယာကို သစ္စာဖောက်ကာ အသက်ခြွေအဖွဲ့ချုပ်သို့ ဝင်ရောက်ရန် ကြိုးပမ်းခဲ့သော်လည်း တာ့ဝူဖုန်း အမည်ရှိ ကျွမ်းကျင်သူတစ်ဦး၏ လက်ချက်ဖြင့် နေရာတင် အသတ်ခံခဲ့ရသည်။ ဤကိစ္စမှာ မိစ္ဆာနှိမ်နင်းရေးဌာနအတွက် သေချာပေါက် အရေးကြီးလှပြီး ၎င်း၏ အကြီးအကဲနှင့် ဒုတိယအကြီးအကဲတို့အတွက် အလွန်ပင် စိုးရိမ်ဖွယ်ရာ ဖြစ်ခဲ့သည်။</p> <p> </p> <p>စုံစမ်းစစ်ဆေးမှုများ ပြုလုပ်ပြီးနောက် မိစ္ဆာနှိမ်နင်းရေးဌာနသည် ထိုအဖြစ်အပျက်၏ အသေးစိတ် အချက်အလက်များကို သိရှိခဲ့သည်။ သစ္စာဖောက် ချီကန်း၏ လုပ်ရပ်များကြောင့် ဒေါသထွက်ခဲ့ရသလို သူ့ကို သတ်ဖြတ်ခဲ့သော တာ့ဝူဖုန်း၏ စွမ်းဆောင်ရည်မှာလည်း သူတို့၏ အာရုံစိုက်မှုကို ခံခဲ့ရသည်။ ယခင်က မကြားဖူးခဲ့သော မူလဓာတ်ငါးပါး သိုင်းပညာရှင်တစ်ဦးသည် ချီကန်းကို တစ်ကိုယ်တော် သတ်ဖြတ်ခဲ့ပြီး အသက်ခြွေအဖွဲ့ချုပ်၏ ဌာနခွဲတစ်ခုကို ဖျက်ဆီးခဲ့ရာ နှိမ်နင်းရေးဌာနသည် 'တာ့ဝူဖုန်း' ဟု အမည်ခံထားသော ဤပုဂ္ဂိုလ်ကို အလွန်ပင် စိတ်ဝင်စားနေတော့သည်။</p> <p> </p> <p>ဒုတိယအကြီးအကဲ လျန်ထျန်းလု ကိုယ်တိုင်ပင် ဤကိစ္စကို တာဝန်ယူခဲ့ပြီး စုံစမ်းမှုများ ပြုလုပ်ခဲ့သော်လည်း တာ့ဝူဖုန်းနှင့် ပတ်သက်သည့် အချက်အလက်များမှာ အလွန်ပင် နည်းပါးလှသည်။ သူသည် ဖေးယွမ်မြို့ရှိ ချင်းယွမ်ဆောင်သို့ တစ်ခါတစ်ရံ လာရောက်လေ့ရှိသည်ဟူသော အချက်ကိုသာ သိရှိရသည်။ ထို့ကြောင့် လျန်ထျန်းလုသည် လွန်ခဲ့သော တစ်လကပင် ဖေးယွမ်မြို့သို့ ရောက်ရှိလာခဲ့ပြီး စူးချန်ခုန်း ပေါ်လာမည့်အချိန်ကို ကြိုတင် စောင့်ဆိုင်းနေခဲ့ခြင်း ဖြစ်သည်။</p> <p> </p> <p>“ဒါဆို ခင်ဗျားက ဒုတိယအကြီးအကဲလျန်ပေါ့။ ကျွန်တော့်ဆီက ဘာများ လိုချင်လို့လဲ။”</p> <p> </p> <p>စူးချန်ခုန်းသည် သူ၏ မျက်နှာတွင် မည်သည့် ခံစားချက်မျှ မပြဘဲ အသာအယာ ခေါင်းညိတ်ပြလိုက်သည်။</p> <p> </p> <p>“အစ်ကိုတို့ မိစ္ဆာနှိမ်နင်းရေးဌာနက သစ္စာဖောက် ချီကန်းကို သတ်ပေးခဲ့တဲ့အတွက် ညီလေးတောက်ကို ကျေးဇူးတင်ချင်လို့ပါ။ တကယ်လို့ သူသာ အသက်ခြွေအဖွဲ့ချုပ်ထဲကို အောင်အောင်မြင်မြင် ဝင်သွားနိုင်ခဲ့ရင် အစ်ကိုတို့ မိစ္ဆာနှိမ်နင်းရေးဌာနက မျက်နှာပျက်ရရုံတင်မကဘဲ လျှို့ဝှက်ချက်တွေ အများကြီးလည်း ပေါက်ကြားသွားမှာပါ။ ညီလေးရဲ့ တရားမျှတတဲ့ ကြားဝင်ဆောင်ရွက်မှုအတွက် ကျေးဇူးတင်ပါတယ်။ ညီလေး လိုချင်တာ တစ်ခုခုရှိရင် အားမနာဘဲ ပြောနိုင်ပါတယ်။”</p> <p> </p> <p>လျန်ထျန်းလုက သူ၏ ကျေးဇူးတင်စကားကို ရိုးသားစွာ ပြောကြားခဲ့သည်။ ချီကန်း၏ သစ္စာဖောက်မှုကြောင့် မိစ္ဆာနှိမ်နင်းရေးဌာနသည် တော်ဝင်မိသားစု၏ ပြင်းထန်သော ဝေဖန်မှုများကို ရင်ဆိုင်ခဲ့ရသည်။ တစ်ခုတည်းသော သတင်းကောင်းမှာ ချီကန်း၏ အစီအစဉ်မှာ မအောင်မြင်ခဲ့ဘဲ 'တာ့ဝူဖုန်း' ၏ လက်ချက်ဖြင့် နေရာတင် အသတ်ခံခဲ့ရခြင်းပင် ဖြစ်သည်။</p> <p> </p> <p>စူးချန်ခုန်းကို ကိုယ်တိုင်ကိုယ်ကျ လာရောက် ရှာဖွေရခြင်းမှာ ကျေးဇူးတင်စကား ပြောရန်သာမက သူ့ကို သူတို့ဘက်ပါအောင် စည်းရုံးလိုသောကြောင့်လည်း ဖြစ်သည်။ ဤမျှ စွမ်းအားကြီးသော ကျွမ်းကျင်သူတစ်ဦးနှင့် ရင်းနှီးသော ဆက်ဆံရေး ရှိထားခြင်းမှာ အကျိုးရှိပေလိမ့်မည်။ ထို့ကြောင့် လျန်ထျန်းလုက စူးချန်ခုန်း လိုချင်သမျှကို မိစ္ဆာနှိမ်နင်းရေးဌာနက အစွမ်းကုန် ဖြည့်ဆည်းပေးမည်ဟု ကတိပေးခဲ့ခြင်း ဖြစ်သည်။</p> <p> </p> <p>ဤစကားကို ကြားသောအခါ စူးချန်ခုန်းမှာ စိတ်လှုပ်ရှားသွားလေ၏။ “ငါက ပိုင်ရှင်းကျစ် ဆွဲခဲ့တဲ့ သားရဲအစစ်အမှန် ပန်းချီကားတွေကို စုဆောင်းချင်တာ။ တကယ်လို့ မိစ္ဆာနှိမ်နင်းရေးဌာနကသာ ကူညီပေးမယ်ဆိုရင် ဒါက အများကြီး ပိုလွယ်သွားမှာပဲ။”</p> <p> </p> <p>မိစ္ဆာနှိမ်နင်းရေးဌာနမှာ မဟာမီးလျှံ တော်ဝင်မိသားစုက ကျောထောက်နောက်ခံ ပေးထားသော အင်ပါယာအတွင်းရှိ အထူးဌာနချုပ်တစ်ခု ဖြစ်သည်။ ၎င်း၏ သတင်းစနစ်မှာ မည်သည့်ဂိုဏ်းများနှင့်မဆို ယှဉ်လျှင် များစွာ သာလွန်လှသည်။ ချင်းယွင်ဂိုဏ်း ဖြစ်စေ၊ ဝိညာဉ်လမ်းစဉ်ဂိုဏ်း ဖြစ်စေ မိစ္ဆာနှိမ်နင်းရေးဌာနနှင့် ယှဉ်လျှင် အလှမ်းဝေးလှပေသည်။ ပိုင်ရှင်းကျစ် ချန်ထားခဲ့သော ပန်းချီကားများမှာ မည်သည့်နေရာတွင် ရှိနေသည်ကို မသိရသော်လည်း ၎င်းတို့မှာ မဟာမီးလျှံအင်ပါယာအတွင်း၌သာ ရှိနေမည်ဆိုလျှင် မိစ္ဆာနှိမ်နင်းရေးဌာန၏ စွမ်းဆောင်ရည်ဖြင့် ရှာဖွေရန် သို့မဟုတ် စုဆောင်းရန်မှာ မဖြစ်နိုင်သောအရာ မဟုတ်ပေ။</p> <p> </p> <p>လျန်ထျန်းလုက သူ့ကို ကျေးဇူးဆပ်လိုပြီး စည်းရုံးလိုနေသဖြင့် စူးချန်ခုန်းသည်လည်း အားမနာတော့ဘဲ သူ၏ တောင်းဆိုချက်ကို တင်ပြရန် ဆုံးဖြတ်လိုက်သည်။ ထိုသို့ တွေးတောရင်း စူးချန်ခုန်းသည် တစ်စုံတစ်ခုကို စဉ်းစားနေသည့်အလား ခေတ္တ တိတ်ဆိတ်သွားပြီးနောက် လျန်ထျန်းလုကို မော့ကြည့်လိုက်သည်။ “ဒုတိယအကြီးအကဲလျန်၊ ကျွန်တော်မှာ တကယ်ပဲ တောင်းဆိုချင်တာ တစ်ခု ရှိပါတယ်။”</p> <p> </p> <p>“အားမနာတမ်း ပြောပါ ညီလေးတာ့” ဤစကားကို ကြားသောအခါ လျန်ထျန်းလု၏ မျက်လုံးများ အရောင်တောက်သွားပြီး ချက်ချင်း ပြန်ပြောလိုက်သည်။</p> <p> </p> <p>လျန်ထျန်းလုသည် ဤလျှို့ဝှက်ဆန်းကြယ်သော သိုင်းပညာရှင်နှင့် မိတ်ဆွေဖွဲ့ရန်နှင့် စည်းရုံးရန် ရည်ရွယ်ချက်ဖြင့် ကိုယ်တိုင် လာရောက်ခဲ့ခြင်း ဖြစ်ရာ မည်သည့် တောင်းဆိုချက်ကိုမဆို သူ မကြောက်ပေ။ တစ်ဖက်လူတွင် မည်သည့် အလိုဆန္ဒမျှ မရှိမည်ကိုသာ သူ စိုးရိမ်ခြင်း ဖြစ်သည်။ ချီကန်းကို သတ်နိုင်ခဲ့ပြီး ခိုထော့နှင့် အသက်ခြွေအဖွဲ့ချုပ်၏ တမန်တော်များကို တွန်းလှန်ကာ ဌာနခွဲတစ်ခုလုံးကို သုတ်သင်နိုင်ခဲ့သော ကျွမ်းကျင်သူမှာ သေချာပေါက် မိတ်ဆွေဖွဲ့ထိုက်ပေသည်။ နောင်တစ်ချိန်တွင် သူသည် အသုံးဝင်လာနိုင်သည် မဟုတ်ပါလား။</p> <p> </p> <p>စူးချန်ခုန်းသည်လည်း ရှက်ရွံ့မနေဘဲ တည့်တိုးပင် ပြောလိုက်သည်။ “ကျွန်တော်က ဘဝတစ်လျှောက်လုံး ကဗျာနဲ့ ပန်းချီကို အရူးအမူး ဝါသနာပါခဲ့သူပါ။ အရင်က ပန်းချီနတ်ဘုရား ပိုင်ရှင်းကျစ်ရဲ့ 'မျောက်ဝံနတ်ဆိုး ကြယ်ခြွေ ပန်းချီကား' ကို ကံကောင်းထောက်မစွာနဲ့ တွေ့ခဲ့တယ်။ သေချာ လေ့လာကြည့်ပြီးတဲ့နောက်မှာ အဲဒါက တကယ်ကို ဆွဲဆောင်မှုရှိပြီး ထူးခြားလှတာကို ကျွန်တော် တွေ့ခဲ့ရတယ်။ ပိုင်ရှင်းကျစ်က တခြား ပန်းချီကားတွေကိုလည်း ချန်ထားခဲ့တယ်လို့ ကြားဖူးပါတယ်။ ဒါကြောင့် အားလပ်တဲ့အချိန်မှာ ကြည့်ရှုခံစားနိုင်ဖို့ အဲဒါတွေကို စုဆောင်းချင်တာပါ...”</p> <p> </p> <p>စူးချန်ခုန်းသည် သူ၏ တောင်းဆိုချက်ကို တင်ပြလိုက်ပြီး ပိုင်ရှင်းကျစ် ချန်ထားခဲ့သော ပန်းချီကားများကို ရရှိရန် လျန်ထျန်းလု၏ အကူအညီကို တောင်းခံလိုက်သည်။ များများရလေ ပိုကောင်းလေ ဖြစ်သည်။ အကယ်၍ ၎င်းတို့မှာ သားရဲ ၅ မျိုးထဲတွင် မပါဝင်ခဲ့လျှင်ပင် လေ့လာရန်အတွက် အကျိုးရှိပေလိမ့်မည်။</p> <p> </p> <p>“ပန်းချီနတ်ဘုရား ပိုင်ရှင်းကျစ် ဟုတ်လား”</p> <p> </p> <p>ဤစကားကို ကြားသောအခါ လျန်ထျန်းလုမှာ စဉ်းစားခန်း ဝင်သွားတော့သည်။ လျန်ထျန်းလုသည် မိစ္ဆာနှိမ်နင်းရေးဌာန၏ ဒုတိယအကြီးအကဲ တစ်ဦးဖြစ်ရာ ဗဟုသုတ ကြွယ်ဝပြီး အတွေ့အကြုံများသူပီပီ ပိုင်ရှင်းကျစ်၏ အမည်ကို ထုံးစံအတိုင်း ရင်းနှီးပြီးသား ဖြစ်သည်။ ပိုင်ရှင်းကျစ်မှာ သမိုင်းတွင် မှတ်တမ်းတင်ခံထားရသော သိုင်းဝိဇ္ဇာသူတော်စင် တစ်ဦးဖြစ်ပြီး အခြားသော သိုင်းဝိဇ္ဇာသူတော်စင် များကြားတွင်ပင် အတော်ပင် ကျော်ကြားလှသည်။</p> <p> </p> <p>“ပိုင်ရှင်းကျစ်ရဲ့ ခေတ်က အရမ်းကို ဝေးကွာလွန်းတယ်။ သူ့မှာ မျိုးဆက်တွေ ကျန်ရစ်ခဲ့တယ်လို့လည်း မှတ်တမ်း မရှိပါဘူး။ သူရဲ့ ပန်းချီကားအချို့က မဟာမီးလျှံအင်ပါယာ အတွင်းမှာတောင် ရှိချင်မှ ရှိမှာပါ... ဒါပေမဲ့ ညီလေးတာ့က ဒီပန်းချီကားတွေကို စိတ်ဝင်စားတယ်ဆိုမှတော့ အစ်ကို မင်းအတွက် သေချာပေါက် ရှာပေးပါ့မယ်”</p> <p> </p> <p>လျန်ထျန်းလုမှာ အချိန်အကြာကြီး တွန့်ဆုတ်မနေဘဲ အလွယ်တကူပင် သဘောတူလိုက်သည်။</p> <p> </p> <p>“ဒါဆိုရင် ကျေးဇူးတင်ပါတယ်။ ဒုတိယအကြီးအကဲ လျန်” စူးချန်ခုန်းက ကျေးဇူးတင်စကား ပြောလိုက်သည်။</p> <p> </p> <p>မိစ္ဆာနှိမ်နင်းရေးဌာနအတွက် ပိုင်ရှင်းကျစ်၏ ပန်းချီကားများကို စုဆောင်းရန်မှာ ပြဿနာ ကြီးကြီးမားမား မဟုတ်ပေ။ အကြောင်းမှာ ဤပန်းချီကားများသည် အဖိုးတန်လှသော်လည်း အခြားသူများကို မဝေမျှနိုင်သော တားမြစ်ထားသည့် နတ်ဘုရား အတတ်ပညာ လျှို့ဝှက်ချက်များ မဟုတ်သောကြောင့်ပင်။ အနည်းငယ် ကြိုးစားအားထုတ်ရုံဖြင့် ၎င်းတို့ကို ရရှိနိုင်မည် ဖြစ်သည်။</p> <p>***</p> <p> </p>


Save