Book List

<h2 style="text-align: center;">အခန်း (၅၈၇)</h2> <h2 style="text-align: center;">ဝိညာဉ်လောကသို့ ခိုးဝင်ခြင်း၊ ကမ္ဘာသုံးခု ပေါင်းစပ်ခြင်း၊ အင်မော်တယ်၏ ရုပ်အလောင်းနှင့်</h2> <h2 style="text-align: center;">လွန်ခဲ့သော နှစ်တစ်သန်းက ကျင့်ကြံခြင်းလောက(၄)</h2> <h2 style="text-align: center;">*</h2> <p> </p> <p> </p> <p> </p> <p>"စိတ်ဝင်စားစရာပဲ..."</p> <p>"မင်းပြောတာ ခြင်္သေ့စိမ်းနတ်ဆိုးက နတ်ဆိုးချုပ်တောင်ကြားကနေ တကယ် လွတ်မြောက်သွားတယ်ဆိုတာလား..."</p> <p>"ဒါပေမဲ့ ဟယ်ဟွမ်းဂိုဏ်းကတော့ အထိအခိုက် မရှိဘူးပေါ့..."</p> <p>"ဘာဖြစ်လို့လဲဆိုတော့ အဲ့ဒီနတ်ဘုရားအသွင်ပြောင်းအဆင့် ခြင်္သေ့စိမ်းနတ်ဆိုးကို ဟယ်ဟွမ်းဂိုဏ်းရဲ့ ဂိုဏ်းချုပ်က ကိုယ်တိုင် သတ်ဖြတ်လိုက်လို့လား..."</p> <p>"အဲ့ဒီထူးဆန်းတဲ့ ခွန်အားပိုင်ရှင် မိန်းမက ဘယ်အချိန်ကတည်းက နတ်ဘုရားအသွင်ပြောင်းအဆင့် နတ်ဆိုးကို သတ်နိုင်သွားတာလဲ..."</p> <p>"မကြာသေးခင်ကများ ကျင့်ကြံခြင်းအဆင့်တွေ အကြီးအကျယ် တိုးတက်သွားလို့လား..."</p> <p>လီရှန်းမိစ္ဆာနန်းတော်၏ နန်းတော်သခင် ချန်းကျွယ်မိစ္ဆာအရှင်က မျက်လုံးကို မှေးကျဉ်းလိုက်ပြီး အေးစက်သော အကြည့်တစ်ချက် ပေါ်ထွက်လာချေသည်။</p> <p>ဤသတင်းကို ကြားလိုက်ရသောအခါ ဟယ်ဟွမ်းဂိုဏ်းမှာ လုံးဝ ပျက်စီးသွားပြီဟု သူ ထင်မှတ်ခဲ့၏။</p> <p>နတ်ဘုရားအသွင်ပြောင်းအဆင့် နတ်ဆိုး လွတ်မြောက်သွားသည်နှင့် သက်ရှိသတ္တဝါများ ပျက်စီးဆင်းရဲရမည်မှာ သေချာလှသည်။</p> <p>နတ်ဘုရားအသွင်ပြောင်းအဆင့် အရှင်သခင်ကိုယ်တိုင် ဝင်ရောက်တိုက်ခိုက်လျှင်ပင် နတ်ဘုရားအသွင်ပြောင်းအဆင့် နတ်ဆိုးကို အနိုင်ရရန် မဖြစ်နိုင်ချေ။</p> <p>အဘယ်ကြောင့်ဆိုသော် နတ်ဘုရားအသွင်ပြောင်းအဆင့် နတ်ဆိုးများသည် မသေမျိုးခန္ဓာကိုယ်ကို ပိုင်ဆိုင်ထားသောကြောင့် သာမန် နတ်ဘုရားအသွင်ပြောင်းအဆင့် အရှင်သခင်များက မည်သို့လျှင် ပြိုင်ဘက် ဖြစ်နိုင်မည်နည်း။</p> <p>ရှေးဟောင်းခေတ်ကပင် နတ်ဘုရားအသွင်ပြောင်းအဆင့် အများအပြား ပူးပေါင်းကာ ကြီးမားသော တန်ကြေးတစ်ခု ပေးဆပ်ပြီးမှသာ တစ်ဖက်လူကို ချိပ်ပိတ်နိုင်ခဲ့ခြင်း ဖြစ်သည်။</p> <p>သို့သော် ယခုခေတ်တွင်မူ နတ်ဘုရားအသွင်ပြောင်းအဆင့် အရှင်သခင်များမှာ အလွန် နည်းပါးလှပြီး လက်ချိုးရေတွက်၍ပင် ရနိုင်ပေသည်။</p> <p>နတ်ဘုရားအသွင်ပြောင်းအဆင့် နတ်ဆိုးကို ရင်ဆိုင်ရန်ဆိုသည်မှာ အရူးအိပ်မက်တစ်ခုသာ ဖြစ်သည်။</p> <p>သို့သော်လည်း ထိုနတ်ဘုရားအသွင်ပြောင်းအဆင့် နတ်ဆိုးကို ချိုးရူယွီက သတ်ဖြတ်လိုက်လိမ့်မည်ဟု သူ အိပ်မက်ပင် မမက်ခဲ့ဖူးချေ။</p> <p>ယင်းမှာ စိတ်ကူးမယဉ်နိုင်လောက်အောင်ပင် ယုံကြည်ရခက်လှပေသည်။</p> <p>"ဟက်ဟက်... အဲ့ဒီမိန်းမ လုပ်တာတော့ သေချာပေါက် မဖြစ်နိုင်ဘူး..."</p> <p>"သူမရဲ့ စွမ်းရည်ကို ငါတို့ မသိတာကျလို့..."</p> <p>"သူမရဲ့ ပါရမီက တကယ်ကို အံ့မခန်းဖြစ်ပေမဲ့ နောက်ဆုံးတော့ နတ်ဘုရားအသွင်ပြောင်း အစောပိုင်းအဆင့်ပဲ ရှိသေးတာလေ..."</p> <p>"နတ်ဘုရားအသွင်ပြောင်း နှောင်းပိုင်းအဆင့် နတ်ဆိုးနဲ့ ယှဉ်ပြိုင်ဖို့ဆိုတာ အဝေးကြီး လိုသေးတယ်..."</p> <p>"ဒီမိန်းမရဲ့ နောက်ကွယ်မှာ သူမကို ကူညီပေးတဲ့ အကူတစ်ယောက်ယောက် သေချာပေါက် ရှိရမယ်..."</p> <p>ထိုက်ရွှီဂိုဏ်း၏ ဂိုဏ်းချုပ် တာအိုအရှင် ချင်ရွှမ်က လေးနက်သော လေသံဖြင့် ပြောလိုက်လေသည်။</p> <p>ချိုးရူယွီတွင် နတ်ဘုရားအသွင်ပြောင်းအဆင့် နတ်ဆိုးတစ်ကောင်ကို သတ်ဖြတ်နိုင်စွမ်း မရှိကြောင်း သူ ရာခိုင်နှုန်းပြည့် သေချာနေသည်။</p> <p>အကယ်၍ အမှန်တကယ်သာ ထိုမျှ အစွမ်းထက်နေပါက အရှေ့ဘက်ကုန်းမြေတိုက်ကြီးကို လက်ဝါးကြီးအုပ်ထားမည်မှာ ကြာလှပြီ ဖြစ်၏။</p> <p>အခြားဂိုဏ်းအားလုံးမှာလည်း အရှုံးပေးကာ လက်အောက်ခံရုံမှလွဲ၍ ပြိုင်ဘက်ကင်း ဖြစ်နေမည်သာ ဖြစ်သည်။</p> <p>"အိုး... ဒီလိုဆိုရင် အရှေ့ဘက်ကုန်းမြေတိုက်ကြီးမှာ တခြား မရင်းနှီးတဲ့ နတ်ဘုရားအသွင်ပြောင်းအဆင့်တစ်ယောက် ရှိနေတာပေါ့..."</p> <p>"ပြဿနာက ငါတို့ ဒီလောက် အသက်ရှည်ရှည် နေလာခဲ့တာတောင် တခြား နတ်ဘုရားအသွင်ပြောင်းအဆင့် ရှိတယ်ဆိုတာ တစ်ခါမှ မကြားဖူးဘူး..."</p> <p>ဟွမ့်ယွမ်ဂိုဏ်း၏ ဂိုဏ်းချုပ် တာအိုအရှင် တုအယ်က သူ၏ ဖြူဖွေးနေသော မုတ်ဆိတ်မွေးများကို ပွတ်သပ်လိုက်သည်။</p> <p>အရှေ့ဘက်ကုန်းမြေတိုက်ကြီးတွင် တစ်ခါမျှ မတွေ့ဖူးသော နတ်ဘုရားအသွင်ပြောင်းအဆင့်တစ်ဦး ပေါ်လာနိုင်ခြေမှာ အလွန်နည်းပါးသည်ဟု သူ ယူဆနေသည်။</p> <p>အဘယ်ကြောင့်ဆိုသော် နတ်ဘုရားအသွင်ပြောင်းအဆင့်သို့ တက်လှမ်းရန် သေချာပေါက် နတ်ဘုရားအသွင်ပြောင်း ကပ်ဘေးမိုးကြိုးကို ဖြတ်ကျော်ရမည် ဖြစ်သောကြောင့်ပင်။</p> <p>ဤမျှ ကြီးမားသော လှုပ်ရှားမှုကို ဖုံးကွယ်ထားရန် လုံးဝ မဖြစ်နိုင်ချေ။</p> <p>ထို့အပြင် နတ်ဘုရားအသွင်ပြောင်းအဆင့် ဖြစ်လာပြီးနောက်တွင်လည်း အရင်းအမြစ် အများအပြားကို သုံးစွဲရန် လိုအပ်ပေသည်။</p> <p>ဂိုဏ်း၏ ထောက်ပံ့မှုမရှိဘဲ ကိုယ့်အားကိုယ်ကိုးရုံဖြင့် ဤမျှများပြားသော အရင်းအမြစ်များကို ရယူရန်လည်း ခက်ခဲလှသည်။</p> <p>ထို့ကြောင့် အရှေ့ဘက်ကုန်းမြေတိုက်ကြီးရှိ နတ်ဘုရားအသွင်ပြောင်းအဆင့်တိုင်းမှာ တစ်ဦးနှင့်တစ်ဦး အလွန် ရင်းနှီးကျွမ်းဝင်ကြပြီး နှစ်ပေါင်းများစွာ ခင်မင်လာသော မိတ်ဆွေများကဲ့သို့ ဖြစ်နေကြသည်။</p> <p>အခြေခံအားဖြင့် မရင်းနှီးသော နတ်ဘုရားအသွင်ပြောင်းအဆင့် အရှင်သခင်ဟူ၍ မရှိနိုင်ပေ။</p> <p>"ငါတို့ အရှေ့ဘက်ကုန်းမြေတိုက်ကြီးက နတ်ဘုရားအသွင်ပြောင်းအဆင့် မဟုတ်ဘဲ တခြားတိုက်ကြီးတွေက လာတာလည်း ဖြစ်နိုင်တာပဲ..."</p> <p>"ရှေးဟောင်း တည်နေရာရွှေ့ပြောင်းခြင်း အစီအရင်တွေက အရမ်း ရှားပါးပေမဲ့ မရှိဘူးလို့တော့ ပြောလို့မရဘူး..."</p> <p>"တခြားတိုက်ကြီးတွေက နတ်ဘုရားအသွင်ပြောင်းအဆင့် အရှင်သခင်တွေက ရှေးဟောင်း တည်နေရာရွှေ့ပြောင်းခြင်း အစီအရင်တွေကို ပိုင်ဆိုင်ထားပြီး ငါတို့ အရှေ့ဘက်ကုန်းမြေတိုက်ကြီးကို ရောက်လာတာလည်း ဖြစ်နိုင်တာပဲ..."</p> <p>"မဖြစ်နိုင်တဲ့ ကိစ္စတော့ မဟုတ်ဘူး..."</p> <p>တာအိုအရှင် ချင်ရွှမ်က မျက်လုံးကို မှေးကျဉ်းလိုက်ပြီး ထိုမရင်းနှီးသော နတ်ဘုရားအသွင်ပြောင်းအဆင့်မှာ အခြား တိုက်ကြီးများမှ လာခြင်းဖြစ်နိုင်သည်ဟု ကောက်ချက်ချလိုက်လေသည်။</p> <p>အဘယ်ကြောင့်ဆိုသော် သူတို့သည် အရှေ့ဘက်ကုန်းမြေတိုက်ကြီးကို ထိန်းချုပ်နိုင်သော်လည်း အခြားနေရာများကိုမူ မထိန်းချုပ်နိုင်သောကြောင့် ဖြစ်သည်။</p> <p>အရှေ့ဘက်ကုန်းမြေတိုက်ကြီး၏ အခြားနေရာများတွင် မည်သို့သော အခြေအနေမျိုး ရှိနေသည်ကိုလည်း မသိရှိကြချေ။</p> <p>"ဘာမှ ခန့်မှန်းနေစရာ မလိုပါဘူး..."</p> <p>"အဲ့ဒီမိန်းမဆီကို တိုက်ရိုက်သွားမေးလိုက်ရင် ရပြီပဲ..."</p> <p>"အားလုံးက နှစ်ပေါင်းများစွာ ခင်မင်လာတဲ့ တာအိုရောင်းရင်းတွေဆိုတော့ တာအိုရောင်းရင်းချိုးကလည်း သေချာပေါက် ဘာမှ ဖုံးကွယ်ထားမှာ မဟုတ်ပါဘူး..."</p> <p>ချန်းကျွယ် မိစ္ဆာအရှင်က ပြုံးရွှင်စွာဖြင့် ပြောလိုက်၏။</p> <p>နတ်ဘုရားအသွင်ပြောင်းအဆင့် အရှင်သခင်ကြီး သုံးဦးလုံးတွင် တူညီသော အတွေးမျိုး ရှိနေကြပြီး ချိုးရူယွီက ထိုနတ်ဘုရားအသွင်ပြောင်းအဆင့် နတ်ဆိုးကို မည်သို့ သတ်ဖြတ်ခဲ့သည်၊ မည်သို့သော နည်းလမ်းများကို အသုံးပြုခဲ့သည်၊ သို့မဟုတ် တစ်စုံတစ်ဦးက တိတ်တဆိတ် ကူညီပေးခဲ့သည် ဆိုသည်ကို သိချင်နေကြသည်မှာ ထင်ရှားလှပေသည်။</p> <p>…………</p> <p>ထိုအချိန်တွင် ချန်လန်ပင်လယ်ပြင်ဒေသ…။</p> <p>ရွှမ်ဟွမ်ဂိုဏ်း၊ ရွှမ်ဟွမ်ကျွန်းရှိ လိုဏ်ဂူတစ်ခု‌၌…။</p> <p>"ရှေးဟောင်းခေတ်က အင်မော်တယ်ရဲ့ ရုပ်အလောင်း..."</p> <p>"ကျင့်ကြံခြင်းလောကရဲ့ လျှို့ဝှက်ချက်က ဒီလောက်တောင် အံ့မခန်းဖြစ်မယ်လို့ မထင်ထားမိဘူး..."</p> <p>"နတ်ဘုရားအသွင်ပြောင်းအဆင့် အရှင်သခင်လို ရှေးဟောင်းပုဂ္ဂိုလ်ကြီးတွေဆီကမှ ဒီလို လျှို့ဝှက်ချက်တွေကို သိနိုင်တာကိုး..."</p> <p>"အင်မော်တယ်တစ်ပါးရဲ့ ရုပ်အလောင်းဆိုတာ ဘယ်လောက်အထိ နက်နဲတဲ့ လျှို့ဝှက်ချက်တွေနဲ့ စွမ်းအားတွေ ပါဝင်နေမလဲ..."</p> <p>"အဲ့ဒီ အင်မော်တယ်ရုပ်အလောင်းရဲ့ ဘေးမှာ တခြား ရတနာတွေ၊ တခြား လက်ဆင့်ကမ်းပညာရပ်တွေ ရှိနေဦးမလား..."</p> <p>ကျိုးစွေ့သည် ဖျာပေါ်တွင် တင်ပျဉ်ခွေ ထိုင်နေ‌လေသည်။</p> <p>သူသည် သူ၏ကိုယ်ပွားမှတစ်ဆင့် ဟယ်ဟွမ်းဂိုဏ်းတွင် ဖြစ်ပျက်ခဲ့သော ကိစ္စရပ်များကို ခံစားသိရှိလိုက်ရသည်။</p> <p>ဟယ်ဟွမ်းဂိုဏ်း၏ ဂိုဏ်းချုပ် ချိုးရူယွီထံမှ အင်မော်တယ်ရုပ်အလောင်း၏ တည်ရှိမှုအကြောင်းကိုလည်း သူ ပထမဆုံးအကြိမ် သိရှိခဲ့ရသည်။</p> <p>ထိုနတ်ဆိုးများမှာ အလွယ်တကူ လက်လွှတ်နိုင်ခြင်း မရှိဘဲ အသေအလဲ လိုက်လံရှာဖွေနေကြသည်မှာ အံ့သြစရာ မဟုတ်တော့ချေ။</p> <p>အကယ်၍ အင်မော်တယ်ရုပ်အလောင်းကို အမှန်တကယ် ရှာတွေ့သွားပါက မည်မျှ ကြီးမားသော အကျိုးကျေးဇူးများ ရရှိမည်ကို စိတ်ကူးကြည့်၍ ရနိုင်ပေသည်။</p> <p>"ထင်တဲ့အတိုင်းပဲ ‘ပစ္စည်းရှာဖွေကူ’ရဲ့ စွမ်းအားက မလုံလောက်သေးဘူး... အင်မော်တယ်ရုပ်အလောင်း ရှိတဲ့နေရာကို လုံးဝ ရှာမတွေ့နိုင်ဘူး..."</p> <p>ကျိုးစွေ့သည်လည်း ‘ပစ္စည်းရှာဖွေကူ’၏ စွမ်းအားကို ချက်ချင်း အသုံးပြုကာ အင်မော်တယ်ရုပ်အလောင်း၏ နေရာအတိအကျကို ရှာဖွေချင်ခဲ့သည်။</p> <p>သို့သော်လည်း ရလဒ်မှာ သူမျှော်လင့်ထားသည့်အတိုင်းပင် ဖြစ်ပြီး၊ ‘ပစ္စည်းရှာဖွေကူ’ထံမှ ပြန်လည်ရောက်ရှိလာသော သတင်းစကားမှာ ဗလာနတ္ထိသာ ဖြစ်ပေသည်။</p> <p>စတုတ္ထအဆင့် အထွတ်အထိပ် ‘ပစ္စည်းရှာဖွေကူ’လေးဖြင့် အင်မော်တယ်ရုပ်အလောင်းကဲ့သို့ အဆင့်မြင့် ရတနာမျိုးကို ရှာဖွေနိုင်မည် မဟုတ်ချေ။</p> <p>သို့သော်ငြား သူ များစွာ စိတ်ပျက်မသွားခဲ့ပေ။</p> <p>ဤရတနာများနှင့် ပတ်သက်၍ သူ၏ သဘောထားမှာ ‘ရလျှင် ကံကောင်းခြင်း၊ မရလျှင် ကံကြမ္မာ’ဟုသာ သတ်မှတ်ထားခြင်း ဖြစ်သည်။</p> <p>အလွန်အကျွံ အတင်းအဓမ္မ မတောင်းဆိုခဲ့ချေ။</p> <p>"ဒါပေမဲ့ ပိုပြီး မထင်မှတ်ထားတာက အဲ့ဒီနတ်ဘုရားအသွင်ပြောင်းအဆင့် အရှင်သခင်တွေက ထွက်ပြေးဖို့ ကြံရွယ်နေကြပြီဆိုတာပဲ..."</p> <p>"မိစ္ဆာသားရဲမျိုးနွယ်စုနဲ့ နတ်ဆိုးမျိုးနွယ်စုတွေရဲ့ ကျူးကျော်မှုကို ခုခံဖို့ လုံးဝ ရည်ရွယ်မထားကြဘူး..."</p> <p>"ဒါပေမဲ့ ဒါကလည်း လူ့သဘာဝပါပဲ..."</p> <p>"ကျင့်ကြံခြင်းလောကရဲ့ စွမ်းအားက ရှေးဟောင်းမိစ္ဆာကမ္ဘာ၊ ရှေးဟောင်းနတ်ဆိုးကမ္ဘာတို့နဲ့ ယှဉ်လိုက်ရင် အများကြီး ကွာခြားလွန်းတယ်..."</p> <p>"တကယ်လို့ ခုခံမယ်ဆိုရင်တောင် ရှုံးနိမ့်နိုင်ခြေက ပိုများတယ်လေ..."</p> <p>"အသက်ရှင်ချင်တယ်ဆိုရင် ဝိညာဉ်လောကကို တက်လှမ်းတာ ဒါမှမဟုတ် ဝိညာဉ်လောကကို ခိုးဝင်တာပဲ ရှိတော့တယ်..."</p> <p>ကျိုးစွေ့က မျက်လုံးကို မှေးကျဉ်းလိုက်လေ၏။</p> <p>အမှန်အတိုင်း ပြောရလျှင် သူကိုယ်တိုင်လည်း ထိုနတ်ဘုရားအသွင်ပြောင်းအဆင့် အရှင်သခင်များ၏ အစီအစဉ်ကို အလွန် စိတ်ဝင်စားနေမိသည်။</p> <p>အဘယ်ကြောင့်ဆိုသော် သူသည်လည်း အနှေးနှင့်အမြန် နတ်ဘုရားအသွင်ပြောင်းအဆင့်သို့ တက်လှမ်းရမည် ဖြစ်သောကြောင့်ပင်။</p> <p>ထိုအချိန်ရောက်လျှင် ဝိညာဉ်လောကသို့ တက်လှမ်းမည့်ကိစ္စကိုလည်း စဉ်းစားရမည် ဖြစ်သည်။</p> <p>ကျင့်ကြံခြင်းလောက၏ အဆင့်အတန်းမှာ နိမ့်ကျလွန်းလှပြီး နတ်ဘုရားအသွင်ပြောင်းအဆင့်မှာ ကျင့်ကြံသူများ၏ အမြင့်ဆုံး ကန့်သတ်ချက် ဖြစ်ပေသည်။</p> <p>မည်မျှပင် ပါရမီထူးချွန်စေကာမူ ကမ္ဘာကြီး၏ အဆင့်ကို ကျော်လွန်နိုင်မည် မဟုတ်ချေ။</p> <p>ပိုမို မြင့်မားသော အဆင့်သို့ တက်လှမ်းချင်ပါက သေချာပေါက် ဝိညာဉ်လောကသို့ တက်လှမ်းရမည် ဖြစ်သည်။</p> <p>ဝမ်းနည်းစရာမှာ ရှေးဟောင်းခေတ်က စစ်ပွဲများကြောင့် ကောင်းကင်တက်လှမ်းရာစင်မြင့်မှာ လုံးဝ ပျက်စီးသွားခဲ့ပြီ ဖြစ်သည်။</p> <p>ကျင့်ကြံခြင်းလောကနှင့် ဝိညာဉ်လောကတို့၏ အဆက်အသွယ်လည်း လုံးဝ ပြတ်တောက်သွားခဲ့၏။</p> <p>ထို့ကြောင့် ကောင်းကင်တက်လှမ်းရာစင်မြင့်မှတစ်ဆင့် ဝိညာဉ်လောကသို့ တက်လှမ်းရန် ဆိုသည်မှာ အခြေခံအားဖြင့် မဖြစ်နိုင်သော ကိစ္စရပ်တစ်ခု ဖြစ်သွားခဲ့ချေပြီ။</p> <p>ဝိညာဉ်လောကသို့ တက်လှမ်းနိုင်သည့် တစ်ခုတည်းသော နည်းလမ်းမှာ အားနည်းသော ဟင်းလင်းပြင် အမှတ်အသားကို ရှာဖွေကာ ထိုအမှတ်အသားကို ဖျက်ဆီးပြီး၊ ဝိညာဉ်လောကနှင့် ချိတ်ဆက်ကာ ဟင်းလင်းပြင် လမ်းကြောင်းမှတစ်ဆင့် ဝိညာဉ်လောကသို့ ခိုးဝင်ရန် အခွင့်အရေး ရရှိခြင်းသာ ဖြစ်ပေသည်။</p> <p>ထို့ကြောင့် သူသည်လည်း ကြိုတင်ပြင်ဆင်မှုများ ပြုလုပ်ထားရန်နှင့် သင့်လျော်သော ဟင်းလင်းပြင် အမှတ်အသားကို ရှာဖွေထားရန် လိုအပ်ပေသည်။</p> <p>ဤသို့ဖြင့် သူသည် နတ်ဘုရားအသွင်ပြောင်းအဆင့်သို့ တက်လှမ်းသွားသည်နှင့် ဝိညာဉ်လောကသို့ ခိုးဝင်ရန် ကြိုးစားနိုင်မည် ဖြစ်သည်။</p> <p>ထို့အပြင် ဤသည်မှာ နောက်ဆုတ်ရန် လမ်းကြောင်းတစ်ခုလည်း ဖြစ်ပေသည်။</p> <p>အကယ်၍ မိစ္ဆာသားရဲမျိုးနွယ်စုနှင့် နတ်ဆိုးမျိုးနွယ်စုတို့ကို အမှန်တကယ် မယှဉ်နိုင်တော့ဘဲ ပြန်လည်ကုစား၍ မရနိုင်သော အခြေအနေသို့ ရောက်ရှိသွားပါက၊ ဤဟင်းလင်းပြင် အမှတ်အသားမှတစ်ဆင့် ဝိညာဉ်လောကသို့ တက်လှမ်းနိုင်မည် ဖြစ်သည်။</p> <p>……</p> <p>***</p> <p> </p>


Save