Book List

<h2 style="text-align: center;">အခန်း (၂၉၉)</h2> <h2 style="text-align: center;">ချန်ပီယံ နှစ်ဆုရှင်</h2> <h2 style="text-align: center;">*</h2> <p> </p> <p style="text-align:justify">"ပေကျင်း တက္ကသိုလ် အရှုံးပေးသွားပြီ"</p> <p style="text-align:justify">"အဓိပ္ပာယ် မရှိတာ... ကျောက်တုံးဘုရင် တစ်ယောက်တည်း ကျန်တော့တာလေ... သူက တစ်ယောက်တည်းနဲ့ ငါးယောက်ကို တကယ် ရင်ဆိုင်နိုင်မှာတဲ့လား"</p> <p style="text-align:justify">"ဒါလည်း ဟုတ်တာပဲ... စောစော အရှုံးပေးလိုက်တာက ခွန်အားကို ထိန်းသိမ်းထားဖို့ ပိုကောင်းပါတယ်"</p> <p style="text-align:justify">ပေကျင်း တက္ကသိုလ်အဖွဲ့က သူတို့ဘက်မှ စတင်၍ အရှုံးပေးလိုက်သည်ကို မြင်သောအခါ ပရိသတ်အများစုက မကျေမနပ် မဖြစ်ခဲ့ကြပေ။ တစ်ဖက်တွင်လည်း ဝမ်ချီက ဒဏ်ရာများနှင့် ယှဉ်ပြိုင်နေရခြင်း ဖြစ်ပြီး ရှေ့တွင် ရှင်သန်ခြင်း ပြိုင်ပွဲကလည်း ကျန်ရှိနေသေးသည်။ </p> <p style="text-align:justify">နောက်ထပ် အပြင်းအထန် ဒဏ်ရာရသွားမည့်အစား သူတို့ဘက်မှ စတင် အရှုံးပေးလိုက်ကာ ခွန်အားကို ထိန်းသိမ်းထားပြီး လာမည့် ရှင်သန်ခြင်း ပြိုင်ပွဲတွင် အစွမ်းကုန် ကြိုးစားခြင်းက ပို၍ ကောင်းမွန်ပေသည်။ အခြားတစ်ဖက်တွင်လည်း အားကောင်းလှသော မဂျစ်စီးတီး တက္ကသိုလ်ကို ရင်ဆိုင်ရာ၌ ဝမ်ချီ တစ်ယောက်တည်းနှင့် အခြေအနေကို ပြန်လည်ပြောင်းလဲနိုင်ရန် နည်းလမ်း မရှိတော့ပေ။</p> <p style="text-align:justify">"အကယ်၍ ကျောက်တုံးဘုရင် နေရာမှာ မိုးကြိုးဧကရာဇ်သာ ဆိုရင်တော့ အခွင့်အရေး အနည်းငယ် ရှိနိုင်သေးတယ်" </p> <p style="text-align:justify">လူတစ်ယောက်က နောက်ပြောင်သလို ပြောလိုက်သည်။ ဝမ်ချီတွင် လူငါးယောက်ကို တစ်ပြိုင်နက် ရင်ဆိုင်နိုင်စွမ်း မရှိသော်လည်း ရှုကျင်းမင်ကတော့ လုပ်နိုင်စွမ်း ရှိသည်။ ပွင့်ပွင့်လင်းလင်း ပြောရလျှင် စွမ်းအား ကွာဟချက်ကြောင့်သာ ယခုကဲ့သို့သော ရလဒ် ထွက်ပေါ်လာခြင်း ဖြစ်သည်။ အခြေခံအားဖြင့် ဝမ်ချီ၏ မြေဓာတ်စွမ်းရည်က ကာကွယ်ရေးအတွက်သာ သင့်တော်သည်။ </p> <p style="text-align:justify">သို့သော် ၎င်း၏ တိုက်ခိုက်ရေးစွမ်းအားက အားနည်းလွန်းသဖြင့် အခြေအနေကို ပြန်လည်ပြောင်းလဲပစ်ရန်အတွက်မူ မသင့်တော်ပေ။ ရှုကျင်းမင်၏ အားကောင်းပြီး အာဏာစက်ပြင်းလှသော မိုးကြိုးဓာတ် စွမ်းရည် တစ်ခုတည်းကသာ အသန်မာဆုံး တိုက်စစ်လမ်းကြောင်း ဖြစ်သည်။ အံ့ဖွယ်ရာများကို ဖန်တီးနိုင်စွမ်းရှိသော အကန့်အသတ်မဲ့ ဖြစ်နိုင်ခြေများကို ပိုင်ဆိုင်ထားသူပင်။</p> <p style="text-align:justify">"ကောင်းကင်မိုးကြိုး ကျင့်စဉ်။ ရှုကျင်းမင်ဆီမှာ Sအဆင့် တိုက်ခိုက်ရေးနည်းစနစ်တစ်ခု ရှိနေမယ်လို့ ငါ မမျှော်လင့်ထားခဲ့ဘူး"</p> <p style="text-align:justify">"ဒီကောင်လေးက တကယ်ပဲ အသက် ၁၉ နှစ်ပဲ ရှိသေးတာ သေချာရဲ့လား... တချို့ အသက် ၂၄ နှစ်အရွယ် စွမ်းရည်ပိုင်ရှင်တွေမှာတောင် သူ့လောက် တိုက်ခိုက်ရေးနည်းစနစ် အများကြီး မရှိဘူး မဟုတ်လား"</p> <p style="text-align:justify">"ပါရမီရှင်... တကယ့်ကို ပါရမီရှင်ပဲ"</p> <p style="text-align:justify">အတွင်းဘက် ပရိသတ်ခုံတန်းတွင် ဆရာများစွာမှာလည်း ချီးကျူးစကားများ ဆိုနေကြသည်။ ရှုကျင်းမင်က တိုက်ခိုက်ရေးနည်းစနစ် များလွန်းလှသည်။ အကယ်၍ သူက နောက်ထပ် Sအဆင့် တိုက်ခိုက်ရေးနည်းစနစ် တစ်ခုကို ထုတ်သုံးလာမည်ဆိုလျှင်တောင် သူတို့ အနည်းငယ်မျှ အံ့အားသင့်ကြတော့မည် မဟုတ်ပေ။ အမှန်တကယ်တွင် ရှုကျင်းမင်၌ လွန်ခဲ့သော ပြိုင်ပွဲရက်များအတွင်းက သူ အသုံးမပြုခဲ့သော Sအဆင့် ငရဲမိုးကြိုး သံချပ်ကာ ရှိနေသေးသည်။</p> <p style="text-align:justify">သူ အသုံးမပြုချင်၍ မဟုတ်ဘဲ အသုံးပြုရန် အခွင့်အရေး မရခဲ့ခြင်းသာ ဖြစ်သည်။  ငရဲမိုးကြိုး သံချပ်ကာက ကာကွယ်ရေးစွမ်းအားကို များစွာ မြှင့်တင်ပေးနိုင်သော်လည်း လွန်ခဲ့သော ရက်များက ပြိုင်ပွဲများတွင် ရှုကျင်းမင်က မည်သည့် သိသာထင်ရှားသော အသက်အန္တရာယ် ခြိမ်းခြောက်မှုကိုမျှ မခံစားခဲ့ရပေ။</p> <p style="text-align:justify">မူလက ဝမ်ချီ၏ နောက်ဆုံး Sအဆင့် ထိပ်တန်း နည်းစနစ်ဖြစ်သော တောင်ဖြိုမြေခွဲ ခုတ်ချက် က သူ၏ ဤနည်းစနစ်ကို ထုတ်သုံးလာစေရန် တွန်းအားပေးနိုင်မည့် အလားအလာ ရှိခဲ့သည်။ သို့သော် ရှုကျင်းမင်၏ မိုးကြိုးထိုးစစ် နတ်ဆိုးသုတ်သင်လှံက ပိုမို မြန်ဆန်ခဲ့ပြီး ဝမ်ချီ၏ နည်းစနစ် ထုတ်လွှတ်မှုကို တိုက်ရိုက်ပင် ဖြတ်တောက်လိုက်ခြင်း ဖြစ်သည်။</p> <p style="text-align:justify">"ဆက်တိုက် ကောင်းကင်မိုးကြိုးကျင့်စဉ်တွေလား... ရှုကျင်းမင်ရဲ့ အဝေးပစ် မန္တန်အမျိုးအစား တိုက်ခိုက်ရေးနည်းစနစ်တွေအပေါ် ပါရမီကလည်း ဒီလောက်တောင် မြင့်မားနေတာလား"</p> <p style="text-align:justify">မိုးကြိုးသိုင်းသင်တန်းကျောင်း၏ ပရိသတ်ခုံတန်းတွင် ကျောင်းအုပ်ကြီး တစ်ဦးအနေဖြင့် ဆုချင်းလီမှာ အတော်လေး ဝမ်းသာ အံ့ဩသွားမိသည်။ မိုးကြိုးသိုင်းသင်တန်းကျောင်း၏ အတွင်းပိုင်း တိုက်ခိုက်ရေးနည်းစနစ်များထဲတွင် Sအဆင့် ကောင်းကင်မိုးကြိုးကျင့်စဉ်က သဘာဝကျကျပင် ပါဝင်နေသည်။ </p> <p style="text-align:justify">၎င်း၏ အထက်ဆင့် နည်းစနစ်ဖြစ်သော SSSအဆင့် မိုးကြိုးထောင်ချောက်ကမ္ဘာ ခေါ်ဆောင်ခြင်း လည်း ရှိနေပေသည်။ နဝမအဆင့် မှော်သူတော်စင် တစ်ဦးအနေဖြင့် သူမက ၎င်းတို့ အားလုံးကို ကျွမ်းကျင်ပိုင်နိုင်ထားပြီး အသေးစိတ်ကအစ အတွင်းကျကျ သိရှိထားပြီး ဖြစ်သည်။</p> <p style="text-align:justify">ဆက်တိုက် ပစ်ချခြင်းကဲ့သို့သော အကျိုးသက်ရောက်မှုကို ရရှိရန် မိမိ၏ စိတ်ဝိညာဉ်စွမ်းအားနှင့် စွမ်းရည်အပေါ် ထိန်းချုပ်နိုင်စွမ်းက အလွန်တရာ တိကျသေချာရန် လိုအပ်ကြောင်း သူမ သိထားသည်။ ရှုကျင်းမင်က ဤအဆင့်အထိ လုပ်ဆောင်နိုင်ခဲ့သည်။ မဂျစ်စီးတီး တက္ကသိုလ်မှ ပံ့ပိုးမှု စွမ်းရည်ပိုင်ရှင်၏ ကူညီမှုက အကြောင်းရင်း တစ်ရပ် ဖြစ်ခဲ့သော်လည်း ယင်းက ရှုကျင်းမင်၏ ကိုယ်ပိုင်ပါရမီကို ပြသရန် လုံလောက်နေသည်။</p> <p style="text-align:justify">"ကြည့်ရတာ သူ့ကို စွမ်းအင်ပညာရှင် လမ်းကြောင်းကို ရွေးခိုင်းတာက သူ့ရဲ့ အနီးကပ် တိုက်ခိုက်ရေး ပါရမီကို မြေမြှုပ်ပစ်တာမျိုးတော့ မဟုတ်လောက်ဘူး" </p> <p style="text-align:justify">ဆုချင်းလီက သူမဘာသာ တွေးလိုက်သည်။ ထိုသို့သော ပါရမီမျိုးကို မြင်တွေ့လိုက်ရပြီးနောက် ရှုကျင်းမင်ကို သူမကိုယ်တိုင် သီးသန့် လမ်းညွှန်သင်ကြားပေးနိုင်ရန် မိုးကြိုးသိုင်းသင်တန်းကျောင်းသို့ ချက်ချင်း ဝင်ရောက်လာစေချင်စိတ်များ ပိုမို ပြင်းပြလာတော့သည်။ သို့သော် လောလွန်းလျှင် အမှားပိုများတတ်ကြောင်းကိုလည်း သူမ သိထားသည်။ </p> <p style="text-align:justify">မိုးကြိုးသိုင်းသင်တန်းကျောင်းက ပေးအပ်နိုင်သော ကမ်းလှမ်းချက်များ အားလုံးကို ချပြထားပြီးဖြစ်ရာ ဆုံးဖြတ်ချက်က ရှုကျင်းမင်အပေါ်တွင်သာ မူတည်နေသည်။ သူမ လုပ်နိုင်သည့် တစ်ခုတည်းသောအရာမှာ စောင့်ဆိုင်းရန်ပင်။</p> <p style="text-align:justify">"နေဦး... မဟုတ်သေးဘူး... လင်းရွှမ်က ရှုကျင်းမင်ရဲ့ ကျောင်းအုပ်ကြီးလေ... သူမကို အကူအညီတောင်းပြီး စကားကောင်းလေးတွေ ဝင်ပြောပေးခိုင်းရင် အသုံးဝင်လောက်တယ်... မဖြစ်ဘူး... ခဏနေ လင်းရွှမ်နဲ့ ထပ်သွားပြောမှ"</p> <p style="text-align:justify">ဆုချင်းလီ၏ မျက်လုံးများထဲတွင် မှိန်ဖျော့ဖျော့ တောက်ပသော အလင်းရောင်လေးတစ်ခု လက်ခနဲ ဖြစ်သွားသည်။ သူမ၏ မူလ အစီအစဉ်က ယနေ့ ပြိုင်ပွဲကို ကြည့်ရှုပြီးနောက် ဌာနချုပ်သို့ ပြန်ရန် ဖြစ်သည်။ သို့သော် ယခု ကြည့်ရသည်မှာ နောက်ထပ် ရက်အနည်းငယ် ဆက်နေရတော့မည့်ပုံပင်။</p> <p style="text-align:justify">"ပေကျင်း တက္ကသိုလ် ကိုယ်စားပြုအဖွဲ့က အရှုံးပေးလိုက်ပြီဖြစ်လို့ ဒီအဖွဲ့လိုက်ပြိုင်ပွဲစဉ်မှာ မဂျစ်စီးတီး စွမ်းရည်ပိုင်ရှင် တက္ကသိုလ်က အနိုင်ရရှိသွားပါပြီ"</p> <p style="text-align:justify">"ဒီတိုက်ပွဲ ပြီးဆုံးသွားတာနဲ့အတူ မဂျစ်စီးတီး စွမ်းရည်ပိုင်ရှင် တက္ကသိုလ်ရဲ့ အဖွဲ့လိုက်ပြိုင်ပွဲ မှတ်တမ်းက ၉ ပွဲနိုင် ၀ ပွဲရှုံး ဖြစ်သွားပါပြီ"</p> <p style="text-align:justify">"သူတို့ကို ဂုဏ်ပြုပေးကြပါ... အဖွဲ့လိုက်ပြိုင်ပွဲမှာ ချန်ပီယံဘွဲ့ကို အောင်မြင်စွာ ရယူနိုင်ခဲ့တဲ့ မဂျစ်စီးတီး စွမ်းရည်ပိုင်ရှင် တက္ကသိုလ်ကို ဂုဏ်ပြုပါတယ်"</p> <p style="text-align:justify">ပေကျင်း တက္ကသိုလ်ကိုယ်စား ဝမ်ချီက အရှုံးပေးလိုက်ပြီး အစီအစဉ်မှူးဖုန်းလဲ့ကလည်း ပွဲစဉ်ရလဒ်များကို ကြေညာလိုက်သည်။ ထို့နောက် ပရိသတ်များထံမှ အဆုံးမရှိသော အားပေးအော်ဟစ်သံများ ပေါက်ကွဲထွက်လာတော့သည်။</p> <p style="text-align:justify">"မဂျစ်စီးတီး တက္ကသိုလ်က ချန်ပီယံဟေ့... ငါတို့ နိုင်ပြီ"</p> <p style="text-align:justify">"ငါ သိသားပဲ... မဂျစ်စီးတီး တက္ကသိုလ်က ဒါကို ပြန်ယူနိုင်မယ်လို့"</p> <p style="text-align:justify">"မဂျစ်စီးတီး တက္ကသိုလ်က အမိုက်စားပဲ... မိုးကြိုးဧကရာဇ်က အမိုက်စားဟေ့"</p> <p style="text-align:justify">နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲတွင် စုစုပေါင်း ပြိုင်ပွဲအမျိုးအစား သုံးခု ပါဝင်သည်။ လက်ရှိတွင် မဂျစ်စီးတီး တက္ကသိုလ်က တစ်ဦးချင်းပြိုင်ပွဲနှင့် အဖွဲ့လိုက်ပြိုင်ပွဲ နှစ်ခုစလုံးတွင် ချန်ပီယံ နှစ်ဆုကို ဆွတ်ခူးထားပြီး ဖြစ်သည်။ သူတို့က ယခုနှစ် လိဂ်ပြိုင်ပွဲ၏ သရဖူမဲ့ဘုရင်များ ဖြစ်နေပြီဟု ဆို၍ရပေသည်။ လာမည့် ရှင်သန်ခြင်း ပြိုင်ပွဲတွင် သူတို့ ခြေချော်သွားလျှင်တောင် သူတို့က အလုံးစုံ ချန်ပီယံများ ဖြစ်နေဆဲပင်။ </p> <p style="text-align:justify">လိဂ်ပြိုင်ပွဲ ပြီးဆုံးသွားသည်နှင့် မဂျစ်စီးတီး တက္ကသိုလ်က မိမိ၏ ကိုယ်ပိုင် သရဖူကို ဆောင်းနိုင်မည် ဖြစ်သည်။ မဂျစ်စီးတီး တက္ကသိုလ်၏ ပရိသတ်များစွာမှာ ဤအတွက် မယုံနိုင်လောက်အောင် စိတ်လှုပ်ရှားနေကြသည်မှာ သဘာဝပင်။ ဤသည်မှာ သူတို့ ချစ်မြတ်နိုးရသော ထိပ်တန်း တက္ကသိုလ်ဖြစ်သည့် မဂျစ်စီးတီး တက္ကသိုလ်ပင် ဖြစ်သည်။</p> <p style="text-align:justify">ယခင် လိဂ်ပြိုင်ပွဲတွင် ပထမနေရာကို ဆုံးရှုံးခဲ့ရသော်လည်း ယခုအခါ သူတို့က ၎င်းကို ချက်ချင်း ပြန်လည် သိမ်းပိုက်နိုင်ခဲ့သည်။ သူတို့က ပရိသတ်များ၏ စံပြ အသန်မာဆုံး တက္ကသိုလ်ဆိုသည့် ဂုဏ်ပုဒ်နှင့် အမှန်တကယ်ပင် ထိုက်တန်လှသည်။ ပေကျင်း တက္ကသိုလ်နှင့် အခြား တက္ကသိုလ်များ၏ ပရိသတ်များမှာမူ သူတို့ ချန်ပီယံဆု မရရှိခဲ့ခြင်းအတွက် ယူကျုံးမရ ဖြစ်နေကြသော်လည်း မဂျစ်စီးတီး တက္ကသိုလ်အတွက် လက်ခုပ်သံများနှင့် အားပေးသံများကို ရက်ရက်ရောရော ပေးအပ်ခဲ့ကြသည်။</p> <p style="text-align:justify">"ငါတို့ နိုင်ပြီ"</p> <p style="text-align:justify">"အခုတော့ ငါတို့ သက်သောင့်သက်သာ အနားယူလို့ ရပြီ"</p> <p style="text-align:justify">မဂျစ်စီးတီး တက္ကသိုလ်၏ ပရိသတ်ခုံတန်းများတွင် ရန်ကျန့်ထျန်း အပါအဝင် ဆရာများစွာမှာလည်း သက်ပြင်းတစ်ချက် ချလိုက်နိုင်ကြသည်။ နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲ၏ ကာလရှည်ကြာ ချန်ပီယံ တစ်ဦးအနေဖြင့် ပြီးခဲ့သည့်နှစ်က တစ်ကြိမ် ရှုံးနိမ့်ခဲ့ရခြင်းကို ခွင့်လွှတ်ပေး၍ ရနိုင်သည်။ </p> <p style="text-align:justify">အကယ်၍ ဤနှစ်တွင်ပါ ထပ်မံ ရှုံးနိမ့်မည်ဆိုပါက လက်ရှိ ကျောင်းသားများက မကျေမနပ် ဖြစ်ကြမည်သာမက ကျောင်း၏ ဂုဏ်သိက္ခာ ကိုယ်တိုင်လည်း ထိခိုက်သွားမည် ဖြစ်သည်။ ထို့အပြင် သုံးလကျော်သာ လိုတော့သည့် အချိန်တွင် သိုင်းပညာ တက္ကသိုလ်ဝင်တန်း စာမေးပွဲ အသစ် ရောက်ရှိလာတော့မည် ဖြစ်သည်။ လိဂ်ပြိုင်ပွဲတွင် ရှုံးနိမ့်မှုက ကျောင်းသားသစ် လက်ခံရေးအပေါ် သက်ရောက်မှု ရှိသွားပါက နောက်ဆက်တွဲ ဆိုးကျိုးများက ကြီးမားလှပေမည်။</p> <p style="text-align:justify">"ဌာနမှူးရန်... ခင်ဗျားတို့ရဲ့ မဂျစ်စီးတီး တက္ကသိုလ်က တကယ်ကို အားကောင်းပါတယ်... ဒါပေမဲ့ ကျွန်တော်တို့ ရှုံးတာ ခင်ဗျားတို့ကို ရှုံးတာ မဟုတ်ဘူး... ရှုကျင်းမင်ကို ရှုံးတာ... အကယ်၍ ရှုကျင်းမင်သာ ကျွန်တော်တို့ဘက်မှာ ရှိနေရင် ပေကျင်း တက္ကသိုလ်က သေချာပေါက် အနိုင်ရမှာပဲ"</p> <p style="text-align:justify">ဤအချိန်သို့ ရောက်သောအခါ ယခင်က တည်ငြိမ်မှုကို ထိန်းသိမ်းထားနိုင်ခဲ့သော ပေကျင်း တက္ကသိုလ်မှ လေ့ကျင့်ရေးနည်းပြ လျူအန်းမှာ အနည်းငယ် ပေါက်ကွဲသွားသည်။ မူလက ဝမ်ချီ ရှိနေခြင်းကြောင့် ဤနိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲနှင့် ပတ်သက်၍ သူ လုံးဝ ယုံကြည်မှု ရှိခဲ့သည်။ သို့သော် ရှုကျင်းမင်ကြောင့်သာ သူ၏ အစီအစဉ် တစ်ခုလုံး ဖျက်ဆီးခံလိုက်ရခြင်း ဖြစ်သည်။</p> <p style="text-align:justify">"မဂျစ်စီးတီး တက္ကသိုလ်ကို ရှုံးတာ မဟုတ်ဘဲ ရှုကျင်းမင်ကို ရှုံးတယ်ဆိုတာက ဘာအဓိပ္ပာယ်လဲ... ရှုကျင်းမင်က ငါတို့ မဂျစ်စီးတီး တက္ကသိုလ်ရဲ့ ကျောင်းသား မဟုတ်လို့လား" </p> <p style="text-align:justify">ရန်ကျန့်ထျန်း၏ ယမမင်းရန်ဆိုသော နာမည်ပြောင်က အလကား ရလာခြင်း မဟုတ်ပေ။ သူက အေးစက်စွာ နှာမှုတ်လိုက်ပြီး ချက်ချင်း တန်ပြန်ချေပကာ နောက်ထပ် စကားတစ်ခွန်း ထပ်ပြောလိုက်သည်။ </p> <p style="text-align:justify">"ဒါ့အပြင် ခင်ဗျားက ရှုကျင်းမင်ကို တကယ် လိုချင်ခဲ့တယ်ဆိုရင် သိုင်းပညာ တက္ကသိုလ်ဝင်တန်း စာမေးပွဲ ပြီးကတည်းက သူ့ကို ခင်ဗျားတို့ရဲ့ ပေကျင်း တက္ကသိုလ်ကို ဘာလို့ မခေါ်ခဲ့တာလဲ"</p> <p style="text-align:justify">"ခင်ဗျား..." လျူအန်း၏ မျက်လုံးများက ပြူးကျယ်သွားသည်။ </p> <p style="text-align:justify">သို့သော် သူက ဘာမှမပြောနိုင်တော့ဘဲ ဒေါသတကြီးဖြင့် လက်စွပ်ကို ခါယမ်းကာ ထွက်သွားတော့သည်။</p> <p style="text-align:justify">"နှစ်ပေါင်းများစွာ ပြိုင်ဆိုင်လာခဲ့ပြီးမှ လျူအန်း ဒီလောက်တောင် အရှုံးမခံနိုင်ဖြစ်နေတာကို ငါ ပထမဆုံး မြင်ဖူးတာပဲ" </p> <p style="text-align:justify">ပုံမှန်အားဖြင့် တင်းမာခက်ထန်သော ရန်ကျန့်ထျန်းမှာ ယခုအခါ ပြုံးဖြီးနေလေပြီ။ ယခင် လိဂ်ပြိုင်ပွဲတွင် ဖိနှိပ်ခံခဲ့ရသော စိတ်ပျက်အားငယ်မှုများ အားလုံး လွင့်စင်သွားပြီး သူ၏ ခံစားချက်ကို စကားလုံး တစ်လုံးတည်းဖြင့်သာ ဖော်ပြနိုင်တော့သည်။ </p> <p style="text-align:justify">“ကျေနပ်တယ်ဟေ့...”</p> <p style="text-align:justify">"ဒါပေမဲ့ ပြန်တွေးကြည့်ရင် ရှုကျင်းမင်သာ မရှိခဲ့ရင်... ခုန်းရှီနဲ့ တခြားလူတွေကိုချည်းပဲ အားကိုးပြီး ဒီလိဂ်ပြိုင်ပွဲမှာ နိုင်နိုင်ပါ့မလားဆိုတာ တကယ်ကို မသေချာဘူး" </p> <p style="text-align:justify">ရန်ကျန့်ထျန်းက သူ့ဘာသာ တိတ်တဆိတ် သက်ပြင်းချလိုက်မိသည်။ ကျောင်းသို့ ပြန်ရောက်သည်နှင့် ရှုကျင်းမင်ကို မည်သူက ရွေးချယ်ခေါ်ယူခဲ့သနည်းဆိုတာကို သူ စုံစမ်းရမည်ဟု ဆုံးဖြတ်လိုက်သည်။ ဤမျှ တော်သော ဆရာတစ်ယောက်က သေးငယ်သော ဆုလာဘ်တစ်ခုထက် ပို၍ ထိုက်တန်ပေသည်။</p> <p style="text-align:justify"> </p> <p style="text-align:justify"> </p> <p style="text-align: center;">***</p>


Save