Book List

<h2 style="text-align: center;">အခန်း(၁၀၂)</h2> <h2 style="text-align: center;">*</h2> <p> </p> <p>“ ဝှီး ”</p> <p>သီရှီထျန်က မသေမျိုးကျင့်ကြံသူငါးယောက်၏ အလောင်းများကို သူ၏ ဝမ်းဗိုက်ထဲသို့ ဝါးမျိုလိုက်သည်နှင့်ချက်ချင်း သူ၏ မိစ္ဆာစံအိမ်ထဲမှာ တိတ်တဆိတ် လှည့်ပတ်နေသော မိစ္ဆာသန့်စင်ခြင်းမီးဖိုက ရုတ်တရက် ပြင်းထန်စွာ တုန်ယင်လာသည်။ ကျောက်စိမ်းဆေးမီးဖိုသည် အဖြူရောင်ကျောက်စိမ်းအလင်းကို ထုတ်လွှတ်လိုက်သည်။ တစ်ချိန်တည်းမှာ အလွန်အားကောင်းသော ဆွဲငင်အားက ဆေးမီးဖိုထံမှ ထွက်ပေါ်လာသည်။</p> <p>ထိုဆွဲငင်အားသည် မိစ္ဆာစံအိမ်ထဲမှ ချက်ချင်း ထွက်သွားပြီး စက်ကရာ၏ ခန္ဓာကိုယ်ထဲသို့ ဝင်ရောက်သွားသည်။ လျှပ်တစ်ပြက်အတွင်းမှာ ယင်းက အစောနက စက်ကရာ ဝါးမျိုလိုက်သော အလောင်းငါးလောင်းကို ရစ်ပတ်လိုက်ပြီး အလောင်းများကို မိစ္ဆာစံအိမ်ထဲသို့ တိုက်ရိုက် ဆွဲခေါ်သွားသည်။ ဆွဲငင်အား၏ ခေါ်ဆောင်မှုကြောင့် အလောင်းများက မိစ္ဆာစံအိမ်ထဲသို့ အလွယ်တကူ ဝင်ရောက်သွားကြသည်။ ထိုအခိုက်အတန့်မှာ မိစ္ဆာသန့်စင်ခြင်းမီးဖိုက ပိုပြီးသက်ဝင်လှုပ်ရှားလာသည်။ ဤသည်မှာ ယင်းက အလွန်စိတ်လှုပ်ရှားနေသည့်အလားပင်။ ဆေးမီးဖိုမှ ထုတ်လွှတ်နေသော အဖြူရောင်ကျောက်စိမ်းအလင်းက အဖြူရောင်ကြိုးများအဖြစ် ပြောင်းလဲသွားပြီး မိစ္ဆာစံအိမ်ထဲမှာ ရွေ့လျားကခုန်နေကြသည်။</p> <p>“ ခရက် ”</p> <p>အသံတချို့ ထွက်ပေါ်လာသည်။</p> <p>အလောင်းငါးလောင်းသည် အဖြူရောင်ကြိုးများဖြင့် ရစ်ပတ်ခံလိုက်ရပြီး မိစ္ဆာသန့်စင်ခြင်းမီးဖိုထဲသို့ တိုက်ရိုက် ဆွဲခေါ်ခံသွားရသည်။</p> <p>ထူးဆန်းစွာပင် အလောင်းငါးလောင်းသည် မိစ္ဆာသန့်စင်ခြင်းမီးဖိုနားသို့ ရောက်သွားသည်နှင့်ချက်ချင်း မြန်ဆန်စွာ စတင်ကျုံ့သွားကြသည်။ မျက်စိတစ်မှိတ်အတွင်းမှာ သူတို့က လက်မအရွယ်အစားအထိ ကျုံ့သွားကြသည်။ ထို့နောက် မိစ္ဆာသန့်စင်ခြင်းမီးဖိုက သူတို့အားလုံးကို ချက်ချင်း ဝါးမျိုလိုက်သည်။</p> <p>“ ဒန် ”</p> <p>မိစ္ဆာစံအိမ်ထဲတွင် ထွန်းလင်းတောက်ပသော ဆေးမီးဖိုအဖုံးက မည်သည့်နေရာကမှန်းမသိ ရုတ်တရက် ထွက်ပေါ်လာပြီး ဆေးမီးဖိုပေါ်သို့ ပြုတ်ကျသွားသည်။ နောက်အခိုက်အတန့်မှာ ဆေးမီးဖိုက ထွန်းလင်းတောက်ပလာသည်။</p> <p>ဆေးမီးဖို၏ လှည့်ပတ်မှုအလျင်သည်လည်း ရုတ်တရက် ပိုမြန်ဆန်သွားသည်။ ယင်းက တစ်ပတ်ပြီးတစ်ပတ် မြန်ဆန်စွာ လှည့်ပတ်သွားသည်။ ဆေးမီးဖိုက အမြန်လှည့်ပတ်နေစဉ် ထွန်းလင်းတောက်ပသော အဖြူရောင်ကျောက်စိမ်းအလင်းက မိစ္ဆာစံအိမ်ထဲမှာ ပျံ့နှံ့သွားသည်။ ဤသည်မှာ နဂါးငွေ့တန်းတစ်ခုက မိစ္ဆာသန့်စင်ခြင်းမီးဖို၏ ဘေးပတ်ဝန်းကျင်မှာ စီးဆင်းနေသည့်အလားပင်။ ယင်းက အလွန်ထူးခြားဆန်းကြယ်သည်။</p> <p> “ ဒီတော့… မိစ္ဆာသန့်စင်ခြင်းမီးဖိုမှာ ဒီလိုစွမ်းရည်လည်း ရှိတယ်ပေါ့… အဲ့ဒါက မိုးမြေကြားက ဝိညာဉ်စွမ်းအားနဲ့ နေနဲ့လရဲ့ အနှစ်သာရကို သန့်စင်ပေးနိုင်ရုံတင်မဟုတ်ဘဲ သက်ရှိခန္ဓာကိုယ်ထဲက စွမ်းအင်အနှစ်သာရကိုလည်း မိစ္ဆာချီအဖြစ် သန့်စင်ပေးနိုင်တယ်… တကယ်အံ့ဩစရာပဲ… ကောင်းကင်ဘုံအဆင့် မိစ္ဆာစံအိမ်လို့ တကယ်ပဲ ခေါ်ထိုက်ပါပေတယ်… ရှေးခေတ်ကာလတုန်းက မိစ္ဆာမျိုးနွယ်စုရဲ့ အထွတ်အထိပ်အခြေအနေမှာတောင် ကောင်းကင်ဘုံအဆင့် မိစ္ဆာစံအိမ်ကို ဖွင့်လှစ်နိုင်တဲ့ မိစ္ဆာသားရဲတွေက အနည်းစုပဲရှိတာ မထူးဆန်းတော့ပါဘူး ”</p> <p>သီရှီထျန်သည် သူ၏ မိစ္ဆာအာရုံကို မိစ္ဆာစံအိမ်ထဲသို့ စေလွှတ်၍ ဖြစ်စဉ်အားလုံးကို အသေးစိတ် ဂရုတစိုက် စောင့်ကြည့်နေခဲ့သည်။ သူ၏ မိစ္ဆာသန့်စင်ခြင်းမီးဖိုက မသေမျိုးကျင့်ကြံသူများ၏ အလောင်းများကို ဝါးမျိုလိုက်ကြောင်း သီရှီထျန် မြင်သွားသောအခါ သူက မအံ့ဩသွားပေ။ ယင်းအစား သူက ဝမ်းသာပျော်ရွှင်သွားသည်။</p> <p>မိစ္ဆာသန့်စင်ခြင်းမီးဖိုက အလောင်းများကို အဆက်မပြတ် သန့်စင်ပေးနေကြောင်း ရှင်းလင်းစွာ သူအာရုံခံမိသည်။ ကျောက်စိမ်းဆေးမီးဖိုသည် အလောင်းများ၏ အသွေးအသားများနှင့် အရိုးများကို သန့်စင်သော စွမ်းအင်အနှစ်သာရအဖြစ် သန့်စင်ချင်သည်။</p> <p>အကယ်၍ သီရှီထျန်က ပုံမှန်နည်းလမ်းကို အသုံးပြု၍ ထိုအလောင်းများအား သန့်စင်မည်ဆိုလျှင် သူက အလောင်းများထံမှ စွမ်းအင်အနှစ်သာရကို ခြောက်ဆယ် သို့မဟုတ် ခုနစ်ဆယ်ရာခိုင်နှုန်းခန့်သာ စုပ်ယူနိုင်လိမ့်မည်။</p> <p>သို့သော်လည်း မိစ္ဆာသန့်စင်ခြင်းမီးဖိုက အလောင်းများထဲမှ စွမ်းအင်အားလုံးကို သန့်စင်ပေးနေသည်။ ယင်းက တစ်ရာရာခိုင်နှုန်း ပြီးပြည့်စုံစွာ သန့်စင်ပေးခြင်း ဖြစ်သည်။ ထို့ပြင် မိစ္ဆာသန့်စင်ခြင်းမီးဖိုက သန့်စင်လိုက်သော စွမ်းအင်အနှစ်သာရက ပိုပြီးသန့်စင်သည်။</p> <p>ထိုရှာဖွေတွေ့ရှိမှုက သူ၏ အနာဂတ် ကျင့်ကြံခြင်းကို အချိန်အများကြီး သက်သာစေလိမ့်မည်။</p> <p>အချိန်တစ်ခဏကြာ စစ်ဆေးလေ့လာပြီးနောက် သူက မိစ္ဆာအာရုံကို ပြန်ရုပ်လိုက်သည်။ မိစ္ဆာသန့်စင်ခြင်းမီးဖိုသည် သူ့ဘာသာ အလုပ်လုပ်နိုင်သည်။</p> <p>သီရှီထျန်သည် မျက်လုံးပြန်ဖွင့်လိုက်ပြီးနောက် သူ၏ ခန္ဓာကိုယ်ကို လှုပ်ခါလိုက်သည်။ သူ၏ ဧရာမကျားခန္ဓာကိုယ်က သာမန်ကျားတစ်ကောင်၏ အရွယ်အစားသို့ ပြန်ကျုံ့သွားသည်။</p> <p>အစောနက ဤနေရာမှာ ဖြစ်ပွားခဲ့သော ဆူပူအုံကြွမှုက အတော်လေး ကြီးမားသည်။ ထို့ကြောင့် သီရှီထျန်သည် ဤနေရာမှာ အချိန်ကြာကြာ မနေဝံ့ချေ။ သူက အနောက်လှည့်လိုက်ပြီး မိစ္ဆာအသင်္ချေချိုင့်ဝှမ်းဆီသို့ ပြန်သွားသည်။ ဤတစ်ကြိမ်တွင် သူက သတင်းအချက်အလက်တချို့ ရရှိသွားသည်။ ချိုင့်ဝှမ်းဆီသို့ သူပြန်သွားပြီး ယင်းကို သေချာဂရုတစိုက် သုံးသပ်ရမည်။</p> <p>အမှန်တကယ်ပင် ဤတစ်ကြိမ် ရိတ်သိမ်းမှုက အတော်လေး ကြီးမားသည်။ ပထမဆုံးအကျိုးအမြတ်မှာ ဝိညာဉ်သံလိုက်အိမ်မြှောင်၏ အသုံးဝင်ပုံကို မသေမျိုးကျင့်ကြံသူငါးယောက်ထံမှ သူကြားသိခဲ့ရသည်။ ထို့ပြင် တောင်ပိုင်းမြေရိုင်းဒေသထဲမှ လတ်တလောအပြောင်းအလဲများ၊ သူ၏ နဖူးပေါ်မှ ခရမ်းရောင်ဘုရင်စာလုံး၏ တမူထူးခြားချက်နှင့် မိစ္ဆာစံအိမ်ထဲမှ မိစ္ဆာသန့်စင်ခြင်းမီးဖို၏ နောက်ထပ် စွမ်းရည်တစ်မျိုးကိုလည်း သူရှာတွေ့သွားသည်။</p> <p>ယင်းတို့အားလုံးက သူနှင့်သက်ဆိုင်နေသည်။ ထို့ကြောင့် သူက ယင်းတို့ကို လျစ်လျူမရှုနိုင်ပေ။</p> <p>ထို့ပြင် အစောနက သူသည် မသေမျိုးကျင့်ကြံသူငါးယောက်ထံမှ သိုလှောင်အိတ်များကို လုယက်ခဲ့သည်။ ထိုကျင့်ကြံသူများသည် ချီသန့်စင်ခြင်းနယ်ပယ် အလယ်အလတ်အဆင့် ကျင့်ကြံသူများသာဖြစ်သော်လည်း သူတို့၏ သိုလှောင်အိတ်များထဲမှာ ပစ္စည်းကောင်းတချို့ ရှိနေနိုင်သည်။</p> <p>သီရှီထျန်သည် မိစ္ဆာသားရဲတစ်ကောင်ဖြစ်သည်။ ထို့ကြောင့် သူ့ဆီမှာ မသေမျိုးကျင့်ကြံခြင်းလောကနှင့်သက်ဆိုင်သော မည်သည့်ပစ္စည်းကောင်းမှ မရှိပေ။ ထို့ကြောင့် သူက ကျင့်ကြံသူများနှင့်ပတ်သက်သော ပစ္စည်းများကို အလွန်စိတ်ဝင်စားသည်။</p> <p>အတိတ်၌ ကျားရဲတောင်တန်းဒေသထဲမှာ သူနေထိုင်ခဲ့စဉ်က မန္တန်များအကြောင်း ရေးသားထားသော ရှေးဟောင်းစာအုပ်တစ်အုပ်ကို သူရရှိခဲ့သည်။ မန္တန်အားလုံးက အဆင့်နိမ့်မန္တန်များသာ ဖြစ်သော်လည်း အကယ်၍ သူသာ မန္တန်အားလုံးကို တတ်ကျွမ်းသွားမည်ဆိုလျှင် သူ၏ စွမ်းအားက သိသိသာသာ မြင့်တတ်သွားလိမ့်မည်။ ထို့ကြောင့် သူက မသေမျိုးကျင့်ကြံခြင်းလောကမှ ပစ္စည်းများကို အရေးကြီးသော ပစ်မှတ်အဖြစ် သဘောထားသည်။</p> <p>မည်သို့ဖြစ်ပါစေ ယခု သူက အလွန်ဆင်းရဲမွဲတေနေသည် မဟုတ်ပါလော။ ထို့ကြောင့် အဆင့်နိမ့်သော ပစ္စည်းများသည်ပင် သူ့အတွက် အလွန်တန်ဖိုးကြီးမားသည်။</p> <p>သီရှီထျန်သည် တောအုပ်ထဲမှာ ရွေ့လျားနေရင်း မိစ္ဆာအသင်္ချေချိုင့်ဝှမ်းဆီသို့ မြန်ဆန်စွာ ပြန်သွားသည်။</p> <p>… … …</p> <p>“ ကျွီ… ကျွီ ”</p> <p>မြေအောက်ထဲတွင် ကြွက်ဘုရင်၏ ညာလက်ရုံးတစ်ဆူဖြစ်သော ဧရာမကြွက်သည် မြေအောက်ဥမင်လှိုဏ်ခေါင်းထဲမှာ အမြန်ပြေးနေသည်။ သူက လမ်းတစ်လျှောက်တွင် မရပ်နားဘဲ အမြန်ပြေးနေသည်။ မကြာမီ သူက အရွယ်အစားကြီးမားသော လှိုဏ်ဂူတစ်ခုထဲသို့ ခုန်ဝင်သွားသည်။ လှိုဏ်ဂူထဲတွင် ကြွက်ဘုရင်သည် သူ၏ ပလ္လင်ပေါ်မှာ လဲလျောင်းနေသည်။ သူက နှစ်ချိုက်စွာ အိပ်မောကျနေသည်။ ရံဖန်ရံခါ သံမဏိကဲ့သို့ မာကျောသော သူ၏ နှုတ်ခမ်းမွှေးများက တုန်ယင်သွားသည်။</p> <p>“ အရှင်မင်းကြီး… သတင်းကောင်း… သတင်းကောင်း… ”</p> <p>ဧရာမကြွက်သည် ကြွက်ဘုရင်၏ ပလ္လင်အရှေ့သို့ ရောက်သွားသည်နှင့်ချက်ချင်း ကျယ်လောင်စွာ အော်လိုက်သည်။ အလွန်ကျယ်ပြောသော လှိုဏ်ဂူထဲတွင် သူ၏ အော်သံက လွန်စွာ စူးရှကျယ်လောင်၏။</p> <p>“ ကျွီ ”</p> <p>ကြွက်ဘုရင်သည် အော်သံကြောင့် နိုးလာသည်။ ရှင်းလင်းစွာပင် သူက စိတ်အခြေအနေမကောင်းနေပေ။ သူမျက်လုံးဖွင့်လိုက်သည့်အခိုက် ရောင်ခြည်တန်းနှစ်ခုက ပျံသန်းထွက်သွားသည်။ ရောင်ခြည်တန်းနှစ်ခုသည် ဧရာမကြွက်ဆီသို့ ရောက်ရန် တစ်လက်မခန့်သာ ဝေးကွာတော့သည့်အချိန် ရပ်တန့်သွားပြီး အနောက်ပြန်ဆုတ်သွားကာ ကြွက်ဘုရင်၏ မျက်လုံးထဲသို့ ပြန်ဝင်သွားသည်။</p> <p>သို့တိုင် ဧရာမကြွက်သည် သေးထွက်ကျလုနီးပါး ကြောက်လန့်သွားပြီး နေရာမှာတင် ကျောက်ရုပ်ဖြစ်သွားသည်။ သူ၏ မျက်လုံးထဲမှာ ချောက်ချားမှုဖြင့် ပြည့်နှက်နေသည်။</p> <p>“ ဟွန့်… နောက်တစ်ခါ ငါအိပ်ပျော်နေတဲ့အချိန် မင်းငါ့ကို လာနှိုးရင် ငါမင်းကို သတ်ပစ်မယ် ”</p> <p>ကြွက်ဘုရင်သည် သူ့အရှေ့မှ ဧရာမကြွက်ကို ကြည့်လိုက်သည်။ စိတ်မပျော်ရွှင်သော အမူအရာက သူ၏ မျက်နှာပေါ်မှာ ထွက်ပေါ်လာပြီးလျှင် သူက ပြောသည်။</p> <p>“ ပြောစမ်း… သတင်းကောင်းက ဘာလဲ ”</p> <p>လတ်တလောတွင် ကြွက်ဘုရင်သည် စိတ်အခြေအနေမကောင်းနေပေ။ အစတွင် သူသည် မိစ္ဆာအသင်္ချေချိုင့်ဝှမ်းဆီသို့ စိတ်လှုပ်ရှားစွာ သွားရောက်ခဲ့သည်။ သူက သီရှီထျန်ကို တစ်ကြိမ်တည်းဖြင့် ဝါးမျိုချင်ပြီး မိစ္ဆာသားရဲအဖြစ် ဆင့်ကဲပြောင်းလဲချင်သည်။ နတ်ဘုရားအလင်း၏ ကာကွယ်ပေးမှုအောက်မှာ သီရှီထျန်ကို သူအနိုင်ယူနိုင်မည်ဟု ထင်မှတ်ခဲ့သည်။ သို့သော်လည်း ရလဒ်က သူ၏ မျှော်လင့်ထားမှုနှင့် လုံးဝ ခြားနားနေသည်။ သူက သီရှီထျန်ကို မဝါးမျိုနိုင်ခဲ့သည့်အပြင် သူ၏ ကြွက်စစ်သည်တော်တစ်သန်းက ချိုင့်ဝှမ်းထဲမှာ အသတ်ခံလိုက်ကြရသည်။ ယင်းက သူပျိုးထောင်ထားသော ကြွက်မျိုးနွယ်စု၏ အင်အားကို ကြီးကြီးမားမား အထိနာစေသည်။</p> <p>ကြွက်များသည် သဘာဝအားဖြင့် ကြောက်စိတ်ကြီးကြသည်။ ကြွက်ဘုရင်သည် သီရှီထျန်၏ လက်ထဲမှာ အသက်ဆုံးရှုံးလုနီးပါး ဖြစ်ခဲ့သည်။ မြေကြီးထဲမှာ တွင်းတူးနိုင်သော သူ၏ စွမ်းရည်ကြောင့်မဟုတ်လျှင် ထိုနေ့မှာ သူအသက်ဆုံးရှုံးသွားနိုင်သည်။ ထိုအဖြစ်အပျက်က သူ့အပေါ်မှာ နက်ရှိုင်းသောအမြင် ကျန်ရစ်စေသည်။ ထို့ကြောင့် သူသည် အကြွင်းမဲ့ခွန်အားကို မပိုင်ဆိုင်ထားလျှင် သို့မဟုတ် မိစ္ဆာသားရဲအဖြစ် ဆင့်ကဲမပြောင်းလဲရသေးလျှင် သီရှီထျန်ဆီသို့ နောက်တစ်ကြိမ် သူသွားဝံ့လိမ့်မည် မဟုတ်ချေ။</p> <p>ဤအတောအတွင်းမှာ ကြွက်ဘုရင်သည် သီရှီထျန်၏ လက်စားပြန်ချေမှုကို စိုးရိမ်သောကြောင့် မြေအောက်လှိုဏ်ဂူထဲမှ အပြင်မထွက်ဝံ့ချေ။ ထို့ကြောင့် သူက ဤရက်များမှာ အစာစားခြင်း၊ အိပ်စက်ခြင်းနှင့် နတ်ဘုရားအလင်းအောက်မှာ နှစ်ခြင်းမင်္ဂလာခံယူခြင်းကို နေ့စဉ် လုပ်ဆောင်ခဲ့သည်။</p> <p>“ အရှင်မင်းကြီး… အဲ့ဒါက တကယ့် သတင်းကောင်းပါ ”</p> <p>ဧရာမကြွက်သည် စိတ်ပြန်ငြိမ်သွားပြီးနောက် စိတ်လှုပ်ရှားသော အမူအရာကို ထုတ်ဖော်လိုက်ပြီး အလျင်စလို ပြောသည်။</p> <p>“ အရှင်မင်းကြီး… အရှင် ဒီထက်ပိုပြီး သန်မာချင်တယ်လို့ မပြောခဲ့ဘူးလား… အဲ့ဒီလို ပိုပြီးသန်မာလာဖို့အတွက် အရှင်နဲ့ အဆင့်တူညီတဲ့ ဝိညာဉ်သားရဲတစ်ကောင်ကို စားရမယ်… ဒါမှမဟုတ်ရင် ခြေနှစ်ချောင်းနဲ့ လမ်းလျှောက်နိုင်ပြီး စကားပြောနိုင်တဲ့ မွန်းစတားကို စားရမယ်… အဲ့ဒီခြေနှစ်ချောင်းမွန်းစတားကို စားလိုက်ရင် အရှင့်ရဲ့ စွမ်းအားက အများကြီး တိုးတတ်သွားလိမ့်မယ် ”</p> <p>“ ဘာခြေနှစ်ချောင်းမွန်းစတားလဲ… အဲ့ဒီကောင်ကို လူသားလို့ ခေါ်တယ် ”</p> <p>ယင်းကို ကြွက်ဘုရင်ကြားသောအခါ သူက ဧရာမကြွက်ကို မျက်လုံးလှန်ကြည့်လိုက်သည်။ သူက ပြောသည်။</p> <p>“ ဘာလို့ မင်းက လူသားတွေအကြောင်း ပြောနေတာလဲ… သူတို့က ရင်ဆိုင်ရမလွယ်ကူဘူး… သူတို့က မီးဘောလုံးတွေကို ထုတ်လွှတ်နိုင်ပြီး မိုးကြိုးတွေကို ဆင့်ခေါ်နိုင်ကြတယ်… အခုကတည်းက ငါမင်းကို သတိပေးထားမယ်… လူသားတွေကို သွားပြီး ရန်မပြုမိစေနဲ့ ”</p> <p>တခြားကြွက်များက ထိုအကြောင်းကို မသိထားနိုင်သော်လည်း ကြွက်ဘုရင်က လူသားများအကြောင်း မည်သို့မသိဘဲနေမည်နည်း။ အထူးသဖြင့် တောင်တန်းဒေသထဲမှ မိစ္ဆာသားရဲများက ခေါ်ဆိုကြသော မသေမျိုးကျင့်ကြံသူများ ဖြစ်ကြသည်။ သူတို့တစ်ယောက်စီသည် အံ့ဖွယ်ကောင်းသော မှော်စွမ်းရည်များကို ပိုင်ဆိုင်ထားကြသည်။ မသေမျိုးကျင့်ကြံသူတစ်ယောက်က ပြဿနာမဟုတ်သော်လည်း မသေမျိုးကျင့်ကြံသူလေးငါးယောက်က အုပ်စုဖွဲ့လိုက်သည့်အခါ မိစ္ဆာသားရဲများသည်ပင် သူတို့၏ လက်ထဲမှာ အသက်အန္တရာယ်ကြုံရနိုင်သည်။ ထို့ကြောင့် ကြွက်ဘုရင်သည် မသေမျိုးကျင့်ကြံသူများကို ဝေးဝေးမှ ရှောင်ရှားခဲ့သည်။</p> <p>“ အရှင်မင်းကြီး… ဒီငယ်သားက ကြွက်ညီအကိုတွေကို ခေါ်ပြီး အနီးနားဝန်းကျင်မှာ ကင်းထောက်ခဲ့ပါတယ်… ကျုပ်တို့တွေ ကင်းထောက်နေရင်း အရှင်မင်းကြီးပြောတဲ့ လူသားကို အမှတ်မထင် ရှာတွေ့ခဲ့ကြပါတယ်… အဲ့ဒီခန္ဓာကိုယ်က အရှင်မင်းကြီးအတွက် အသုံးဝင်လောက်မယ်လို့ ကျုပ်ထင်လို့ သူ့ကို မြေအောက်ဆီ ဆွဲခေါ်လာဖို့ ကြွက်ညီအကိုတွေကို မှာကြားခဲ့ပါတယ် ”</p> <p>ဧရာမကြွက်က စိတ်လှုပ်ရှားစွာ ပြောသည်။</p> <p>သူက မကြာသေးမီတွင် မြေအောက်ထဲမှာ လှည့်ပတ်စစ်ဆေးကြည့်ခဲ့သည်။ ထို့နောက် သူက ခါတိုင်းကဲ့သို့ အပြင်လောကမှ အခြေအနေကို စူးစမ်းရန် အပြင်သို့ ခေါင်းထုတ်၍ ကြည့်လိုက်သည်။ ကံအကြောင်းတိုက်ဆိုင်စွာပင် အပြင်သို့ သူကြည့်လိုက်သည့်အခိုက် မသေမျိုးကျင့်ကြံသူတစ်ယောက်၏ ခန္ဓာကိုယ်ကို သူရှာတွေ့သွားသည်။ ထိုခန္ဓာကိုယ်ကို သူရှာတွေ့သွားသည့်အချိန် တစ်ဖက်လူဆီမှာ အသက်မရှိတော့ပေ။ ထို့နောက် သူက ကြွက်ဘုရင်ပြောခဲ့ဖူးသော ခြေနှစ်ချောင်းမွန်းစတားအကြောင်း ပြန်သတိရသွားသည်။ ထိုခန္ဓာကိုယ်ကို ကြွက်ဘုရင်ဆီသို့ သူဆက်သလျှင် ဆုလာဘ်များရရှိနိုင်ကြောင်း ရုတ်တရက် တွေးမိသောကြောင့် မသေမျိုးကျင့်ကြံသူအလောင်းကို မြေအောက်ဆီသို့ သူခေါ်ဆောင်လာသည်။</p> <p>“ ဘာပြောတယ် ”</p> <p>ကြွက်ဘုရင်၏ မျက်လုံးထဲမှာ ဝမ်းသာပျော်ရွှင်သော အရိပ်အယောင် ထွက်ပေါ်လာသည်။ မသေမျိုးကျင့်ကြံသူများ၏ အသွေးအသားကို စားသောက်လျှင် စွမ်းအားကြီးကြီးမားမား တိုးမြှင့်သွားနိုင်ကြောင်း ဤတောင်တန်းဒေသ၏ မိစ္ဆာသားရဲများထံမှ သူကြားဖူးသည်။ ယင်းက ဝိညာဉ်သားရဲများကို စားသောက်ခြင်းထက် လုံးဝ မလျော့ပေ။</p> <p>“ ကောင်းတယ်… ဧရာမကြွက်… ဒီတစ်ကြိမ် မင်းလုပ်တာ ကောင်းတယ်… ဒီဘုရင်က မင်းကို ဆုလာဘ်ချီးမြှင့်မယ်… မင်း နတ်ဘုရားအလင်းအောက်မှာ ရက်သုံးဆယ်ကြာအောင် နှစ်ခြင်းမင်္ဂလာခံယူခွင့်ရရှိမယ် ”</p> <p>ကြွက်ဘုရင်သည် အစက စိတ်ဓာတ်ကျနေရာမှ ပြန်လည်စိတ်ဓာတ်တတ်ကြွသွားသည်။ သူက စိတ်လှုပ်ရှားစွာ ပြောသည်။</p> <p>“ မသေမျိုးကျင့်ကြံသူရဲ့ အသွေးအသားကို စားပြီး နတ်ဘုရားအလင်းအောက်မှာ နှစ်ခြင်းမင်္ဂလာခံယူမယ်ဆိုရင် ဒီဘုရင်က သေချာပေါက် မိစ္ဆာသားရဲတစ်ကောင် ဖြစ်လာလိမ့်မယ်… ငါ မိစ္ဆာသားရဲဖြစ်လာတဲ့အခါ အဲ့ဒီကျားနက်ကို ပြန်လက်စားချေမယ် ”</p> <p>ကြွက်ဘုရင်သည် အဆင့်ချိုးဖြတ်ရန် မျှော်လင့်ချက်အလင်းရောင်ကို ပြန်ရှာတွေ့သွားသောကြောင့် အလွန်စိတ်လှုပ်ရှားသွားသည်။</p> <p>… … …</p> <p> </p> <p style="text-align: center;">***</p>


Save