Book List

<h2 style="text-align: center;">အခန်း ၃၀၄</h2> <h2 style="text-align: center;">ပိုပြီး အစွမ်းထက်လာဖို့ အတွေ့အကြုံလား</h2> <h2 style="text-align: center;">*</h2> <p> </p> <p style="text-align:justify">“ကျင်းမင် ရောက်လာပြီပဲ... မင်းကို မိတ်ဆက်ပေးရဦးမယ်... ဒါက ယောင်ကွမ်း တပ်မတော်က...”</p> <p style="text-align:justify">အားကစားကွင်းသို့ ရောက်ရှိပြီးနောက် ရှုကျင်းမင်အား ဆရာရန်ကျန့်ထျန်းက အစည်းအဝေးခန်းမတစ်ခုအတွင်းသို့ ခေါ်ဆောင်သွားပြီး အင်အားစုအသီးသီးမှ ဒုတိယအကြီးအကဲများနှင့် မိတ်ဆက်ပေးခဲ့သည်။ ဤလူများအားလုံးမှာ အနည်းဆုံး အဋ္ဌမအဆင့် အထွတ်အထိပ် ဆရာကြီးများ ဖြစ်ကြသည်။ သူတို့၏ အကြည့်တစ်ချက်ကပင် စတုတ္ထအဆင့် စွမ်းရည်ပိုင်ရှင်တစ်ဦးကို တုန်ရင်သွားစေရန် လုံလောက်ပေသည်။</p> <p style="text-align:justify">သို့သော် ရှုကျင်းမင်မှာမူ ဒုတိယကျောင်းအုပ်ကြီး လင်းရွှမ်နှင့်အတူ နေထိုင်လာခဲ့သည်မှာ ကြာပြီဖြစ်သလို နဝမအဆင့် သိုင်းသူတော်စင်နှင့်ပင် နှစ်ကြိမ်တိုင်တိုင် တွေ့ဆုံဖူးသူ ဖြစ်သည်။ ထို့အပြင် ဆရာရန်ကလည်း သူနှင့်အတူ အနီးကပ် ရှိနေသဖြင့် ဤလူများ၏ ဖိအားပေးသော အရှိန်အဝါမှာ သူ၏အပေါ်တွင် မည်သည့်သက်ရောက်မှုမျှ မရှိပေ။</p> <p style="text-align:justify">အဋ္ဌမအဆင့် အထွတ်အထိပ် ဆရာကြီးတစ်ဦးကို ကိုယ်စားလှယ်အဖြစ် စေလွှတ်နိုင်သော အင်အားစုများမှာလည်း သာမန်အင်အားစုများ မဟုတ်ကြပေ။ သူတို့၏ အမည်နာမများကို မဟာနွေရာသီ တိုင်းပြည်၏ သတင်းစာမျက်နှာများတွင် ရှုကျင်းမင် အမြဲတမ်း မြင်တွေ့ကြားသိနေရသည်မှာ သေချာသည်။</p> <p style="text-align:justify">သူတို့ ကမ်းလှမ်းသော စည်းကမ်းချက်များမှာလည်း ငွေကြေး၊ အာဏာ၊ တိုက်ခိုက်ရေးနည်းစနစ်၊ လက်နက်ကိရိယာနှင့် မိန်းကလေးများအထိ အလွန်ပင် ရက်ရောလှပေသည်။ အချို့သော ကမ်းလှမ်းချက်များဆိုလျှင် သတ္တမအဆင့်မြင့် အထွတ်အထိပ် ဆရာကြီးဖြစ်သော ရန်ကျန့်ထျန်းပင်လျှင် အံ့သြတုန်လှုပ်သွားရသည်။</p> <p style="text-align:justify">သို့သော် ရှုကျင်းမင်က သူတို့တွင် SSအဆင့် ဝိညာဉ်သန့်စင်ရေး တိုက်ခိုက်ရေးနည်းစနစ်များ ရှိမရှိ မေးလိုက်သောအခါ မိမိတို့တွင် သူအလိုရှိသမျှ အရာအားလုံးရှိသည်ဟု ကြွားလုံးထုတ်နေခဲ့ကြသော တပ်မတော်များနှင့် ဂိုဏ်းများအားလုံးမှာ ချက်ချင်းပင် နှုတ်ဆိတ်သွားကြတော့သည်။</p> <p style="text-align:justify">Systemကို ပိုင်ဆိုင်ထားသော ရှုကျင်းမင်အတွက် အရင်းအမြစ်များဆိုသည်မှာ ပန်းကန်ပြားပေါ်က အလှဆင်ပန်းများကဲ့သို့သာ ဖြစ်ပြီး သိပ်ပြီး အရေးမပါလှပေ။ ကျင့်စဉ်ကျမ်းစာများသာလျှင် သူ၏ အခြေခံအုတ်မြစ် ဖြစ်သည်။ ထိုသို့သော အခြေအနေမျိုးတွင် ရှုကျင်းမင်က ကမ်းလှမ်းချက်အားလုံးကို ငြင်းပယ်ရန်သာ သဘာဝကျကျ ရွေးချယ်လိုက်တော့သည်။</p> <p style="text-align:justify">“နှမြောစရာကောင်းလိုက်တာ...”</p> <p style="text-align:justify">အစည်းအဝေးခန်းမအတွင်း၌ သူ၏ကမ်းလှမ်းမှုကို ငြင်းပယ်ခံလိုက်ရသော အမျိုးသား ပညာရေးဦးစီးဌာနမှ ဒုတိယညွှန်ကြားရေးမှူး ဝူယွမ်က သက်ပြင်းတစ်ချက်ချကာ ခေါင်းခါလိုက်သည်။ သူက ခဏတာ တုံ့ဆိုင်းနေပြီးနောက် မျှော်လင့်ချက်အပြည့်ဖြင့် မေးလိုက်သည်။</p> <p style="text-align:justify">“ဒါပေမဲ့ ရှုကျင်းမင်... မင်း ဘယ်လိုမျိုး ပိုပြီး အစွမ်းထက်လာသလဲဆိုတဲ့ အတွေ့အကြုံကို ဝေမျှပေးနိုင်မလား... အဲဒီအတွက် ငါတို့က SSSအဆင့် ကျင့်ကြံရေး အရင်းအမြစ်တွေနဲ့ သီးသန့် ဝယ်ယူဖို့ အဆင်သင့်ပါပဲ...”</p> <p style="text-align:justify">ထိပ်တန်း တက္ကသိုလ်အသီးသီးမှ ထူးချွန်သော ကျောင်းသားများက ထိပ်တန်းအဆင့် စွမ်းရည်ကျင့်စဉ်များကို အသုံးပြုကာ ကျင့်ကြံကြသည်မှာ အမှန်ပင်။ သို့သော် သူတို့မှာ များသောအားဖြင့် ဂျူနီယာတန်း (တတိယနှစ်) ဆိုလိုသည်မှာ အသက် ၂၁ နှစ်ခန့် ရောက်မှသာ တတိယအဆင့်မြင့်သို့ ရောက်ရှိလေ့ရှိကြသည်။ ဤကျင့်ကြံမှု အရှိန်မှာ အားလုံးနီးပါး ဆင်တူကြပြီး များသောအားဖြင့် အဆင့်ငယ် တစ်ဆင့်ခန့်သာ ကွာခြားလေ့ရှိသည်။</p> <p style="text-align:justify">သို့သော် ရှုကျင်းမင်မှာမူ လုံးဝ ကွဲပြားနေသည်။ အသက် ၁၉ နှစ်နှင့် တတိယအဆင့်မြင့်။ ထို့ပြင် သူ စတင်ကျောင်းဝင်ခွင့် ရရှိချိန်က သူက သာမန်နိုးထသူ အဆင့်သာ ရှိခဲ့သေးသည်။ တစ်နှစ်ခွဲအတွင်းမှာပင် သူက အဆင့်ကြီး သုံးခုကို အတင်းအဓမ္မ ဖြတ်ကျော်ခဲ့ခြင်း ဖြစ်သည်။ အကယ်၍ ဤကဲ့သို့ ကြောက်စရာကောင်းသော တိုးတက်မှု အရှိန်အဟုန်ကို ကျောင်းသားတိုင်းအကြားတွင် ပြန့်နှံ့သွားအောင် လုပ်နိုင်မည်ဆိုပါက တစ်ပြည်လုံးရှိ မဟာနွေရာသီ တိုင်းပြည်၏ အင်အားမှာ ပိုမို တောင့်တင်းလာပေလိမ့်မည်။</p> <p style="text-align:justify">“ပိုပြီး အစွမ်းထက်လာဖို့ အတွေ့အကြုံလား...”</p> <p style="text-align:justify">ရှုကျင်းမင်က အနည်းငယ် တုံ့ဆိုင်းသွားပြီးနောက် ပြုံးလျက် ပြန်ဖြေလိုက်သည်။ “ကျွန်တော့်ရဲ့ တိုးတက်မှု အရှိန်က ကိုယ်ပိုင်ပါရမီကြောင့်ပဲ ဖြစ်ပါလိမ့်မယ်... ဒါက လူတိုင်းအတွက် အတွေ့အကြုံမျိုး မဟုတ်ပါဘူး.. ညွှန်ကြားရေးမှူးဝူ... ခင်ဗျား အဲဒီအရင်းအမြစ်တွေကို အလဟဿ အကုန်ခံစရာ မလိုပါဘူး...”</p> <p style="text-align:justify">အမှန်စင်စစ် စနစ်၏ အမှတ်ခွဲဝေမှုမှာလည်း သူ၏ ပါရမီဟုပင် သတ်မှတ်၍ ရသည်မဟုတ်ပါလား။</p> <p style="text-align:justify">“ကိုယ်ပိုင်ပါရမီလား...”</p> <p style="text-align:justify">ဤကဲ့သို့ ဖြစ်နိုင်ခြေရှိသည်ဟု သူ ကြိုတင် တွေးထားခဲ့သော်လည်း ရှုကျင်းမင်၏ နှုတ်မှ ကိုယ်တိုင်ကြားလိုက်ရသောအခါ ဝူယွမ်မှာ အနည်းငယ် စိတ်ပျက်သွားမိသည်။</p> <p style="text-align:justify">“ဟုတ်ပါပြီလေ... တကယ်လို့သာ အဲဒီလို လူတိုင်းအတွက် ဖြစ်နိုင်တဲ့ အတွေ့အကြုံမျိုး ရှိခဲ့မယ်ဆိုရင်လည်း မူလစွမ်းအင်တွေ ပေါ်ပေါက်လာခဲ့တဲ့ နှစ်ပေါင်း နှစ်ရာကျော်အတွင်းမှာ ဘယ်သူမှ ရှာမတွေ့ခဲ့ဘူးဆိုတာ မဖြစ်နိုင်ပါဘူး...”</p> <p style="text-align:justify">ဝူယွမ်က ခေါင်းခါလျက် နေရာမှထကာ ထွက်ခွာရန် ပြင်လိုက်သည်။ “ဒါဆိုရင်တော့ ငါ အရင်သွားတော့မယ်... လာမယ့် ရှင်သန်ခြင်း ပြိုင်ပွဲမှာ မဂျစ်စီးတီး တက္ကသိုလ် အောင်မြင်မှုကောင်းတွေ ရပါစေလို့ ဆုတောင်းပေးပါတယ်... နောက်ပြီး ငါ ခုနက ပြောခဲ့တဲ့ အချက်တွေက အမြဲတမ်း အတည်ပါပဲ... ရှုကျင်းမင်အနေနဲ့ အမျိုးသား ပညာရေးဦးစီးဌာနကို ဝင်ဖို့ စိတ်ကူးရှိလာရင် အချိန်မရွေး ဆက်သွယ်နိုင်ပါတယ်...”</p> <p style="text-align:justify">သူ၏ ကိုယ်ပိုင် ဆက်သွယ်ရန် လိပ်စာကို ထားရစ်ခဲ့ပြီးနောက် ဝူယွမ်သည်လည်း အစည်းအဝေးခန်းမအတွင်းမှ ထွက်ခွာသွားတော့သည်။</p> <p style="text-align:justify">“ဒါဆို ကျွန်တော် ဒီမနက် တစ်မနက်လုံး ဘာမှမလုပ်ဘဲ ဖုန်းနံပါတ်တွေ သိမ်းနေတာနဲ့တင် အချိန်ကုန်သွားတာပေါ့...” ဝူယွမ် ထွက်သွားပြီးနောက် ရှုကျင်းမင်က ဖုန်းထဲတွင် အဆက်အသွယ်သစ်တစ်ခု ထပ်တိုးရင်း ညည်းတွားလိုက်သည်။</p> <p style="text-align:justify">“ဒီကလေးကတော့... ကံကောင်းနေတာကိုတောင် ညည်းနေသေးတယ်... သူတို့ရဲ့ ဆက်သွယ်ရန် လိပ်စာကို ရဖို့ ဘယ်လောက်တောင် ကြိုးစားနေကြရလဲဆိုတာ မင်း မသိဘူးလား...”</p> <p style="text-align:justify">ရန်ကျန့်ထျန်းက သူ၏ဘေးတွင် ထိုင်ရင်း ရယ်မောကာ ဆူပူလိုက်သော်လည်း သူ၏ စိတ်ထဲတွင်တော့ အနည်းငယ် ရင်ခုန်နေမိသည်။ သတ္တမအဆင့်မြင့် စွမ်းရည်ပိုင်ရှင်တစ်ဦးအနေဖြင့် သူက သူ၏ ဆယ်စုနှစ်များစွာသော သက်တမ်းတစ်လျှောက်တွင် ကိုယ်ပိုင် ဆက်ဆံရေး ကွန်ရက်တစ်ခုကို တည်ဆောက်ခဲ့သည်။ သို့သော် သူ ဆယ်စုနှစ်များစွာ တည်ဆောက်ခဲ့ရသော ထိုကွန်ရက်မှာ ရှုကျင်းမင် တစ်မနက်တည်းနှင့် ရရှိခဲ့သော ဆက်ဆံရေးများကိုပင် ယှဉ်နိုင်မည် မဟုတ်ကြောင်း သူ ခံစားနေရသည်။</p> <p style="text-align:justify">“ကျွန်တော်က ဒီအတိုင်း စတာပါ”</p> <p style="text-align:justify">ရှုကျင်းမင်က ရယ်မောလိုက်ပြီး သူ၏ဖုန်းမှ အချိန်ကို ကြည့်လိုက်ရာ မွန်းတည့် ၁၂ နာရီ တိတိ ရှိနေသည်။ သူက မမေးဘဲ မနေနိုင်တော့ပေ။ “ဆရာ... ကျွန်တော်တို့ ထပ်ပြီး တွေ့ရမယ့် အင်အားစုတွေ ရှိသေးလား...”</p> <p style="text-align:justify">“တွေ့ဖို့ ကျန်သေးတာက ဂိုဏ်းနှစ်ခုနဲ့ တပ်မတော် နှစ်ခု ရှိသေးတယ်... နေ့လယ်စာ စားပြီးရင် နေ့လယ် ၂ နာရီမှာ ဆက်တွေ့မယ်...”</p> <p style="text-align:justify">“နောက်ထပ် အင်အားစု လေးခုတောင် ကျန်သေးတာလား...”</p> <p style="text-align:justify">ရှုကျင်းမင်မှာ အနည်းငယ် စိတ်ပျက်သွားသော်လည်း သူတို့အားလုံးမှာ အဋ္ဌမအဆင့် အထွတ်အထိပ် ဆရာကြီးများ ဖြစ်ကြသည်ကို စဉ်းစားကာ ခေါင်းငြိမ့်လိုက်ရသည်။ “ဒါဆို ကျွန်တော် အရင်ဆုံး အိမ်ပြန်ပြီး နေ့လယ်စာ စားလိုက်ဦးမယ်... ပြီးမှ ပြန်လာခဲ့ပါ့မယ်...”</p> <p style="text-align:justify">“အားကစားကွင်းမှာပဲ မစားတော့ဘူးလား” ဟု ရန်ကျန့်ထျန်းက အံ့သြတုန်လှုပ်သွားသည်။ ဤကာလအတွင်း မဂျစ်စီးတီး ကိုယ်စားပြုအဖွဲ့ဝင်များက များသောအားဖြင့် အားကစားကွင်း၏ ကန်တင်းတွင်သာ စားလေ့ရှိကြသည်။</p> <p style="text-align:justify">“မစားတော့ပါဘူး... အိမ်ပြန်စားတာက ပိုကောင်းပါတယ်” ရှုကျင်းမင်က ခေါင်းခါပြလိုက်သည်။</p> <p style="text-align:justify">သူက ဆုန့်ချိုးယွန်းအတွက် မြေကမ္ဘာဝိညာဉ်စမ်းရေ တစ်ပုလင်း ထားခဲ့သော်လည်း သူမအတွက် ပထမဆုံးအကြိမ် ဖြစ်သဖြင့် သူမကို ပိုပြီး ဂရုစိုက်ပြသင့်သည် မဟုတ်ပါလား။ ရှုကျင်းမင် အားကစားကွင်းမှ ထွက်လာသည်နှင့်တစ်ပြိုင်နက် ကျင်းချန်း တက္ကသိုလ်၏ ဒုတိယကျောင်းအုပ်ကြီး ရှုဖျင်သည်လည်း ပူးပေါင်းဆောင်ရွက်ရန် သဘောတူညီချက်ကို ကျင်းချန်းဘက်မှ လက်ခံရရှိလိုက်သည်။ ထို့ကြောင့် သူက ပေကျင်း တက္ကသိုလ် ကိုယ်စားပြုအဖွဲ့ဝင် အားလုံးကို အမြန် စုစည်းလိုက်တော့သည်။</p> <p style="text-align:justify">“ကျင်းချန်း တက္ကသိုလ်က ပူးပေါင်းဖို့ သဘောတူလိုက်ပြီ... မနက်ဖြန် ရှင်သန်ခြင်း ပြိုင်ပွဲမှာ ကျောင်းနှစ်ကျောင်းက ပူးပေါင်းပြီး တစ်ဦးကိုတစ်ဦး ကူညီကြမယ်... မဂျစ်စီးတီး ကိုယ်စားပြုအဖွဲ့ဝင်တွေ အားလုံးကို အရင်ဆုံး သုတ်သင်ရှင်းလင်းပြီးမှ ငါတို့ ကျောင်းအချင်းချင်း ပြန်ပြီး ယှဉ်ပြိုင်ကြမယ်... အားလုံး နားလည်ကြလား...”</p> <p style="text-align:justify">ဗီလာ၏ ဧည့်ခန်းအတွင်းတွင် ဒုတိယကျောင်းအုပ်ကြီး ရှုဖျင်၏ တိုးညင်းသော အသံ ထွက်ပေါ်လာသည်။</p> <p style="text-align:justify">“နားလည်ပါပြီ...”</p> <p style="text-align:justify">ရှုဖျင်၏ ရှေ့တွင် အဖွဲ့ခေါင်းဆောင် ဝမ်ချီ အပါအဝင် ပေကျင်း တက္ကသိုလ် ကိုယ်စားပြုအဖွဲ့ဝင် ရှစ်ဦးလုံးက ခေါင်းငြိမ့်ပြလိုက်ကြသည်။</p> <p style="text-align:justify">“နားလည်ရင် ပြီးတာပဲ... လူစုခွဲလို့ ရပြီ...”</p> <p style="text-align:justify">ရှုဖျင်က ပြတ်သားစွာ လက်ဝှေ့ယမ်းလိုက်ပြီး ကိုယ်စားပြုအဖွဲ့ဝင်များသည်လည်း ဗီလာအတွင်းမှ ထွက်ခွာသွားကြတော့သည်။</p> <p style="text-align:justify">“ကျင်းချန်း တက္ကသိုလ်နဲ့ ပူးပေါင်းလိုက်ပြီဆိုမှတော့ ဒီတစ်ခါမှာ မဂျစ်စီးတီး ရှုံးဖို့က သေချာသလောက် ရှိသွားပြီ...”</p> <p style="text-align:justify">“ဟုတ်တယ်... ကျင်းချန်း အဖွဲ့ခေါင်းဆောင် ဟန်ရှန်းရဲ့ အသက်ဝိညာဉ် မျှဝေခြင်း စွမ်းရည်သာ ရှိရင် ရှုကျင်းမင်တောင် ငါတို့ကို အနိုင်တိုက်နိုင်မှာ မဟုတ်ဘူး...”</p> <p style="text-align:justify">“ဒါက နည်းနည်းတော့ မတရားတဲ့ အောင်ပွဲလို ဖြစ်နေပေမဲ့ ငါတို့မှာ ရွေးချယ်စရာ မရှိဘူးလေ။”</p> <p style="text-align:justify">ပေကျင်း တက္ကသိုလ် ကိုယ်စားပြုအဖွဲ့ဝင်များက ဗီလာအပြင်ဘက်သို့ လျှောက်လာရင်း တစ်ဦးနှင့်တစ်ဦး ဆွေးနွေးလာကြရာ သူတို့၏ စိတ်ထဲတွင် အနည်းငယ် ခံစားနေရသည်။ လိဂ်ပြိုင်ပွဲ မစတင်မီက သူတို့ကဲ့သို့ ထိပ်တန်း တက္ကသိုလ်တစ်ခုက အခြားကျောင်းတစ်ခုကို အနိုင်ယူရန်အတွက် သူတစ်ပါးနှင့် ပူးပေါင်းရလိမ့်မည်ဟု မည်သူကမှ ထင်မှတ်မထားခဲ့ကြပေ။</p> <p style="text-align:justify">သို့သော် ရှုကျင်းမင် ဆိုသည့် အမည်မှာ သူတို့အတွက် အိပ်မက်ဆိုးတစ်ခုကဲ့သို့ ဖြစ်နေပြီး သူတို့ကို အမြဲတမ်း ဖိနှိပ်ထားခဲ့သည်။ ဤကဲ့သို့ ပြုမူခြင်းမှာ သိုင်းပညာရှင် စိတ်ဓာတ် ကင်းမဲ့နေသည်ဟု အချို့က ခံစားရသော်လည်း ပေကျင်း တက္ကသိုလ်၏ အဖွဲ့ဝင်များအနေဖြင့် ယခုအခါ ဘွဲ့ရတော့မည့် အချိန်တွင် ကျောင်းအတွက် ဂုဏ်ပြုဆုများ ပိုမို ရယူပေးလိုကြသည်။ ထို့ကြောင့် ဒုတိယကျောင်းအုပ်ကြီး ရှုဖျင်က ဤအကြံဉာဏ်ကို တင်ပြလာသောအခါ မည်သူမှ ငြင်းဆိုခြင်း မပြုခဲ့ကြပေ။</p> <p style="text-align:justify">“ရှုကျင်းမင်... ဒီတစ်ခါတော့ ငါတို့က မတရားတဲ့ အောင်ပွဲကို ရယူရလိမ့်မယ်... နောင်တစ်ချိန် မင်း မဂျစ်စီးတီးကနေ ဘွဲ့ရလို့ ငါတို့ ပြန်ဆုံဖြစ်ခဲ့ရင်တော့ မင်းကို ငါ ကိုယ်တိုင် တောင်းပန်ပါ့မယ်...”</p> <p style="text-align:justify">ဝမ်ချီက သူ၏ စိတ်ထဲမှ တိုးတိုးလေး ပြောလိုက်သည်။ ရှုကျင်းမင် အနိုင်ရရှိမည့် ဖြစ်နိုင်ခြေကိုမူ သူ လုံးဝ ထည့်မစဉ်းစားတော့ပေ။ အဆုံးတွင်တော့ ကျင်းချန်း အဖွဲ့ခေါင်းဆောင် ဟန်ရှန်း၏ အသက်ဝိညာဉ် မျှဝေခြင်း စွမ်းရည်မှာ ပုံမှန်မဟုတ်လောက်အောင် အစွမ်းထက်လွန်းလှသည်။ လူဦးရေ များလေလေ တစ်ဦးချင်းစီ ခံစားရမည့် ထိခိုက်မှုမှာ ပိုမို နည်းပါးသွားလေလေပင်။</p> <p style="text-align:justify">တက္ကသိုလ်ကြီး နှစ်ခု၏ ခိုင်မာသော ပူးပေါင်းမှုက ရှုကျင်းမင်အနေဖြင့် မဂျစ်စီးတီးကို အောင်ပွဲဆီသို့ ဦးဆောင်နိုင်မည် မဟုတ်ကြောင်း ကြိုတင် သတ်မှတ်ထားပြီးသား ဖြစ်နေခဲ့သည်။</p> <p style="text-align:justify"> </p> <p style="text-align: center;">***</p>


Save