Book List

<h2 style="text-align:center">အခန်း (၃၅၄)</h2> <h2 style="text-align:center">*</h2> <p> </p> <p style="text-align:justify">“လှပလိုက်လေခြင်း... မန်ချက်စတာ ယူနိုက်တက်တို့ ဒီပွဲကို အနိုင်ရရှိသွားခဲ့ပြီ ၃ ဂိုး ၁ ဂိုး... ဘယ်လောက်တောင် ကောင်းလိုက်တဲ့ ရလဒ်လဲဗျာ”</p> <p style="text-align:justify">“လီဗာပူးက အရင် ဦးဆောင်ခဲ့ပေမဲ့ မန်ယူကတော့ ပွဲပြီးခါနီးမှာပဲ အံ့အားသင့်စရာ ကောင်းတဲ့ အလှည့်အပြောင်းနဲ့ ဂိုးတွေ တရစပ် သွင်းယူသွားခဲ့တာပါ”</p> <p style="text-align:justify">“ဒီတပတ်ဟာ မန်ယူပရိသတ်တွေအတွက်တော့ တစ်နှစ်တာရဲ့ အကောင်းဆုံး တပတ်လို့တောင် ပြောလို့ရမယ်ထင်တယ်”</p> <p style="text-align:justify">နဗီးလ်က စိတ်လှုပ်ရှားစွာ အော်ဟစ်လိုက်ပြီးနောက် သူ၏ လက်ထဲမှ အချက်အလက်များကို ငုံ့ကြည့်လိုက်သည်။</p> <p style="text-align:justify">“ဒါဟာ မန်ယူနဲ့ လီဗာပူးတို့ရဲ့ (၂၀၂) ကြိမ်မြောက် ထိပ်တိုက်တွေ့ဆုံမှုပါ။ စိတ်ဝင်စားဖို့ကောင်းတဲ့ စာရင်းဇယားတချို့ကို ကျွန်တော် ပြောပြချင်ပါတယ်...”</p> <p style="text-align:justify">“ချူဖုန်းဟာ အိမ်ကွင်း ၆ ပွဲဆက်တိုက် ဂိုးသွင်းယူနိုင်ခဲ့ပြီး ဒတ်ခ်ျတိုက်စစ်မှူး ဗန်ပါစီရဲ့ မှတ်တမ်းကို ကျော်ဖြတ်နိုင်ခဲ့ပြီ။ အခုဆို သူဟာ ပရီးမီးယားလိဂ် ဂိုး ၆၀ ပြည့်ဖို့ ၁ ဂိုးပဲ လိုတော့တာပါ”</p> <p style="text-align:justify">“ဆာလာကတော့ မန်ယူနဲ့ပွဲမှာ ဂိုးမသွင်းနိုင်တဲ့ အရှက်ရစရာ မှတ်တမ်းဆိုးကြီးကို ဆက်လက် ဆုပ်ကိုင်ထားတုန်းပဲ။ စကားမစပ်... ဒီဂီယာကတော့ ပရီးမီးယားလိဂ်မှာ အကြိမ် (၁၀၀) မြောက် ဂိုးမပေးရတဲ့ပွဲ ရဖို့ လွဲချော်သွားခဲ့ရတယ်။ သူ အခုချိန်မှာ မက်ဂွိုင်းယားကို ကျိန်ဆဲနေလောက်ပြီဗျ... ဒီလူကောင်ကြီးကြောင့် သူ့ရဲ့ ဂိုးမပေးရတဲ့ အပိုဆုကြေးကြီး ဆုံးရှုံးသွားရတာကိုး”</p> <p style="text-align:justify">“ဟားဟား... နောက်ဆုံးတစ်ချက်ကတော့ နောက်တာပါဗျာ”</p> <p style="text-align:justify">နဗီးလ်၏ အသံက ရုတ်တရက် တည်ငြိမ်သွားသည်။ “ကျွန်တော်တို့ ချစ်မြတ်နိုးရတဲ့ မစ္စတာ အဲရစ် ဟာရစ်ဆင်ဟာ မန်ယူလူငယ်အကယ်ဒမီမှာ ၂၇ နှစ်ကြာ အမှုထမ်းခဲ့ပြီး မာ့ခ်ဟုချ်၊ ဒေးဗစ်ပလက်နဲ့ နာမည်ကျော် ‘Class of 92’ ကို မွေးထုတ်ပေးခဲ့သူပါ”</p> <p style="text-align:justify">“ဝမ်းနည်းစရာကောင်းတာက မစ္စတာ အဲရစ်ဟာ ၂၀၁၉ ခုနှစ် ဖေဖော်ဝါရီ ၁၃ ရက်နေ့မှာ ကွယ်လွန်သွားခဲ့တာပါပဲ။ ကျွန်တော်တို့အားလုံး သူ့အတွက် လေးစားမှု ပေးလိုက်ကြရအောင်ဗျာ”</p> <p style="text-align:justify">အိုးထရက်ဖို့ဒ် ကွင်းကြီးအတွင်းရှိ စခရင်ကြီးပေါ်တွင် အဲရစ်၏ ဘဝမှတ်တမ်းများကို ပြသနေချိန်၌ တစ်ကွင်းလုံး ငြိမ်သက်သွားသည်။ လီဗာပူးပရိသတ်များပင် ဆူညံခြင်းမပြုဘဲ ငြိမ်သက်စွာ ထိုင်နေကြသည်။ ၎င်းသည် သေဆုံးသူ အပေါ် ပေးအပ်သည့် လေးစားမှုပင်။</p> <p style="text-align:justify">ဘောလုံးကွင်းထဲတွင် ချူဖုန်းနှင့် အသင်းဖော်များကလည်း ခေါင်းငုံ့ကာ ငြိမ်သက်စွာ ဂါရဝ ပြုနေကြသည်။ အနိုင်ရခြင်း၏ ပျော်ရွှင်မှုများသည် ထိုအခိုက်အတန့်၏ လေးနက်မှုအောက်တွင် မှေးမှိန်သွားရလေသည်။</p> <p style="text-align:justify">---</p> <p style="text-align:justify">“ဒီနေ့ပွဲပြီးတော့ ငါတို့နဲ့ လီဗာပူးကြားက အမှတ်ကွာဟချက်က ၆ မှတ် ပြန်ဖြစ်သွားပြီ”</p> <p style="text-align:justify">“ဒါပေမဲ့ ဆက်ကြိုးစားဖို့တော့ လိုသေးတယ်။ မန်စီးတီးကလည်း မနေ့ကပွဲမှာ ဝက်ဖို့ဒ်ကို ၃ ဂိုး ၁ ဂိုးနဲ့ နိုင်ထားပြီး ဇယားထိပ်မှာ ဦးဆောင်နေတုန်းပဲ” မော်ရင်ညိုက အသံခပ်အုပ်အုပ်ဖြင့် ပြောလိုက်သည်။</p> <p style="text-align:justify">ပရီးမီးယားလိဂ်ပြိုင်ပွဲ ပြီးခါနီးလာသည်နှင့်အမျှ မန်စီးတီး၏ တရစပ် အနိုင်ရမှုက သူ့ကို ဖိအားပေးနေခြင်း ဖြစ်သည်။</p> <p style="text-align:justify">“ဆရာ... အဲ့ဒါတွေကို အများကြီး တွေးမနေပါနဲ့။ ကျွန်တော်တို့ လုပ်ရမှာက” </p> <p style="text-align:justify">ချူဖုန်းက ပြုံးလျက် မတ်တပ်ရပ်လိုက်သည်။ “ပွဲတိုင်းကို အနိုင်ကန်ဖို့ပဲ။ တကယ်လို့ နောက်ဆုံးမှာ ချန်ပီယံ မဖြစ်ခဲ့ရင်တောင် အနည်းဆုံးတော့ ကျွန်တော်တို့ နောင်တရမှာ မဟုတ်ဘူးလေ။ ဟုတ်တယ် မဟုတ်လား...”</p> <p style="text-align:justify">မော်ရင်ညိုက ခေါင်းညိတ်ပြလိုက်သည်။ “ဟုတ်တယ်... ချူဖုန်းပြောတာ မှန်တယ်။ အများကြီး တွေးမနေနဲ့တော့။ တကယ်လို့ မင်းတို့ အရမ်း စိတ်လှုပ်ရှားနေရင်...”</p> <p style="text-align:justify">သူက နောက်ပြောင်သလိုဖြင့် ဆက်ပြောလိုက်သည်။ “မနက်ဖြန် မနားနဲ့တော့။ လေ့ကျင့်ရေးကွင်းကို လာပြီး လေ့ကျင့်ခန်းတွေပဲ လုပ်ကြတော့။ ဒါဆိုရင် စိုးရိမ်တာတွေ အကုန်မေ့သွားလိမ့်မယ်...”</p> <p style="text-align:justify">“ဒါတော့ မဖြစ်ဘူးလေ ဆရာ့ရဲ့။ ပေးစရာရှိတဲ့ အားလပ်ရက်တော့ ပေးရမှာပေါ့” ရက်ရှ်ဖို့ဒ်က အလန့်တကြား ဝင်တားတော့သည်။</p> <p style="text-align:justify">“ကဲ... အိမ်ပြန်ကြတော့” မော်ရင်ညိုက ပြုံးလျက် လက်ဝှေ့ယမ်းပြလိုက်ပြီးနောက် ချူဖုန်းကို ကြည့်ကာ... “၁၅ ရက်နေ့မှာ ချန်ပီယံလိဂ် မဲခွဲပွဲ ရှိတယ်။ မင်း ငါနဲ့အတူ ဆွစ်ဇာလန်ကို လိုက်ခဲ့ရမယ်”</p> <p style="text-align:justify">“ဟုတ်ကဲ့ပါ ဆရာ”</p> <p style="text-align:justify">ချူဖုန်းသည် အမြဲတစေ မဲခွဲပွဲများကို စိတ်ဝင်တစား ရှိလေသည်။ သူ၏ အမှတ်ရမှုများအရဆိုလျှင် မန်ယူသည် ဘာစီလိုနာနှင့် တွေ့ရမည် ဖြစ်သည်။ သို့သော် လိပ်ပြာတောင်ပံ ခတ်ခတ်မှု အကျိုးသက်ရောက်မှုကြောင့် တစ်စုံတစ်ရာ အပြောင်းအလဲများ ရှိလာနိုင်မည်လား။</p> <p style="text-align:justify">---</p> <p style="text-align:justify">မတ်လ ၁၃ ရက်။</p> <p style="text-align:justify">ဟေးလ်အရပ်ရှိ ဗီလာတစ်ခုအတွင်း၌ ချူဖုန်းသည် ဆိုဖာပေါ်တွင် လှဲလျောင်းရင်း မာရီယာ ဖျော်ပေးထားသော ကော်ဖီကို သောက်နေသည်။ တီဗီထဲတွင် မန်စီးတီးက ရှော်ကေးကို ၇ ဂိုး ၀ ဂိုးဖြင့် အပြတ်အသတ် နိုင်နေသည်ကို တွေ့လိုက်ရသည်။</p> <p style="text-align:justify">“မာရီယာ... မင်းအဖေက (ဂွာဒီယိုလာ) အခုတလော စိတ်တိုနေတာလား” ချူဖုန်းက မေးလိုက်သည်။</p> <p style="text-align:justify">“သူက လိဂ်ဖလားပွဲမှာ ရှင့်ကို ရှုံးပြီးကတည်းက ညတိုင်း ၂ နာရီအထိ မအိပ်ဘဲ ရှင့်ကို ဘယ်လို ပြန်အနိုင်ယူရမလဲ ဆိုတာပဲ တွေးနေတာလေ...” မာရီယာက ရယ်မောကာ ပြန်ပြောလိုက်သည်။</p> <p style="text-align:justify">ချူဖုန်းက တစ်ချက်တွေးလိုက်မိသည်။ သူ့ယောက္ခမလောင်းက ဒီလောက်တောင် အငြိုးကြီးလိမ့်မည်ဟု မထင်ထားခဲ့ပေ။ </p> <p style="text-align:justify">ဂွာဒီယိုလာ၏ မန်စီးတီးသည် ၂၀၁၉ ခုနှစ်ကစပြီး ပွဲတိုင်းကို အနိုင်ရထားကာ ဂိုးပေါင်း ၆၁ ဂိုးအထိ သွင်းယူထားသည်။ ၎င်းသည် မန်စီးတီး မည်မျှ အင်အား တောင့်တင်းနေကြောင်း ပြသနေခြင်းပင်။</p> <p style="text-align:justify">ထို့နောက် အခြားပွဲစဉ်တစ်ပွဲ၏ ရလဒ်ကို သူ တွေ့လိုက်ရသည်။</p> <p style="text-align:justify">ဂျူဗင်တပ်စ်နှင့် ပီအက်စ်ဂျီ ပွဲစဉ်။ ရော်နယ်ဒို၏ အံ့မခန်း ခေါင်းတိုက်ဂိုးဖြင့် ဂျူဗင်တပ်စ်က နောက်တစ်ဆင့် တက်သွားခဲ့သည်။ ထိုပွဲ၌ အမ်ဘာပေက ခြေစွမ်းပြခဲ့သော်လည်း နေမာကတော့ ခြေပျောက်နေခဲ့သည်။</p> <p style="text-align:justify">ချန်ပီယံလိဂ် ကွာတားဖိုင်နယ် အဆင့်သို့ တက်ရောက်လာသည့် အသင်းများမှာ - မန်စီးတီး၊ မန်ယူ၊ ဂျူဗင်တပ်စ်၊ တော့တင်ဟမ်၊ ဘာစီလိုနာ၊ ပေါ်တို၊ လီဗာပူးနှင့် အေဂျက်စ်တို့ပင် ဖြစ်ကြသည်။</p> <p style="text-align:justify">---</p> <p style="text-align:justify">ဆွစ်ဇာလန်နိုင်ငံ၊ ယူအီးအက်ဖ်အေဌာနချုပ်</p> <p style="text-align:justify">ချူဖုန်းသည် ပထမတန်းတွင် နေရာယူထားသည်။ ထူးခြားသည်မှာ သူ၏ ထိုင်ခုံသည် မက်ဆီ နှင့် ရော်နယ်ဒိုတို့၏ ကြားထဲတွင် ရောက်နေခြင်းပင်။ သူသည် ထိုဂန္ထဝင် နှစ်ယောက်ကို ခေါင်းညိတ်နှုတ်ဆက်လိုက်သော်လည်း ရော်နယ်ဒိုကတော့ အနည်းငယ် အေးစက်နေသည်။ အကြောင်းမှာ ချူဖုန်းကြောင့် သူ၏ ချန်ပီယံလိဂ် သုံးကြိမ်ဆက် ချန်ပီယံ အိပ်မက် ပျက်စီးခဲ့ရဖူးသောကြောင့် ဖြစ်ပေမည်။</p> <p style="text-align:justify">မကြာမီ မဲခွဲပွဲ စတင်လေသည်။ အင်တာမီလန် ဂိုးသမားဟောင်း ဂျူလီယို ဆီဇာက ကွင်းထဲသို့ ရောက်လာသည်။</p> <p style="text-align:justify">သူ၏ ခပ်ပြည့်ပြည့် လက်ချောင်းလေးများက ဖန်အိုးထဲရှိ ဘောလုံးလေးများကို အကြိမ်ကြိမ် မွှေနှောက်နေသည်။ ပရိသတ်များ ငြီးငွေ့လာချိန်မှသာ ဘောလုံးလေးများကို ထုတ်ယူကာ ကင်မရာသို့ ပြသလိုက်သည်။</p> <p style="text-align:justify">ဂျူဗင်တပ်စ်နှင့် အေဂျက်စ်</p> <p style="text-align:justify">အေဂျက်စ်နည်းပြ တန်ဟက်ဂ်၏ အပြုံးများ ချက်ချင်း ပျောက်ကွယ်သွားသည်။ ရော်နယ်ဒိုကို ဘယ်လို ထိန်းချုပ်ရမလဲဆိုတာ သူ အခုကတည်းက ခေါင်းစားနေရလေပြီ။</p> <p style="text-align:justify">မိနစ်အနည်းငယ်အကြာတွင်...</p> <p style="text-align:justify">တော့တင်ဟမ်နှင့် မန်စီးတီး</p> <p style="text-align:justify">ပိုချက်တီနို၏ မျက်နှာက မည်းမှောင်သွားသည်။ ဂွာဒီယိုလာကတော့ အပြင်ပန်း တည်ငြိမ်နေသော်ငြား အတွင်းစိတ်ထဲတွင် သက်ပြင်းချလိုက်မိသည်။ မန်ယူနှင့် စောစောစီးစီး မတွေ့ရသည့်အတွက် သူ ကျေနပ်နေခြင်းပင်။</p> <p style="text-align:justify">မဲခွဲပွဲ၏ တင်းမာမှုက အထွတ်အထိပ်သို့ ရောက်လာသည်။ ဆီဇာက မန်ယူအတွက် အကောင်းဆုံး မဲနှိုက်ပေးမည်ဟု မော်ရင်ညိုကို ကတိပေးထားသော်လည်း...</p> <p style="text-align:justify">လီဗာပူးနှင့် ပေါ်တို</p> <p style="text-align:justify">တစ်ခန်းလုံး ငြိမ်သက်သွားသည်။ နောက်ဆုံးအတွဲက ဘယ်သူတွေဖြစ်မလဲဆိုတာ လူတိုင်း သိသွားကြပြီ။</p> <p style="text-align:justify">မန်ချက်စတာ ယူနိုက်တက်နှင့် ဘာစီလိုနာ</p> <p style="text-align:justify"> </p> <p style="text-align:center">***</p>


Save