Book List

<h2 style="text-align: center;">အခန်း (၃၅၆)</h2> <h2 style="text-align: center;">*</h2> <p> </p> <p style="text-align:justify">ပွဲပြန်လည် စတင်ပြီးနောက် မန်ချက်စတာ ယူနိုက်တက်တို့က ပွဲ၏ အရှိန်အဟုန်ကို ဆက်လက် ထိန်းချုပ်ထားပြီး ဝုလ်ဗ် အသင်းကို တန်ပြန် တိုက်စစ် ဆင်ရန် အခွင့်အရေး လုံးဝ မပေးတော့ပေ။</p> <p style="text-align:justify">လက်ရှိ ပရီးမီးယားလိဂ်တွင် မန်ချက်စတာ စီးတီး၊ မန်ချက်စတာ ယူနိုက်တက်နှင့် လီဗာပူးလ်တို့က ဦးဆောင်နေကြသည်။ ဝုလ်ဗ်က အမှတ်ပေးဇယား အဆင့် (၇) တွင် ရှိနေသော်လည်း မန်ချက်စတာ ယူနိုက်တက်ကို အနိုင်ယူရန်မှာ ယူနိုက်တက်အနေဖြင့် အရန်ကစားသမား အများအပြား ပါဝင်သော လူစာရင်းကို ထုတ်သုံးမှသာ ဖြစ်နိုင်ပေလိမ့်မည်။</p> <p style="text-align:justify">ပွဲကစားချိန် (၄၁) မိနစ်။</p> <p style="text-align:justify">လုခ်ရှောက ဘောလုံးကို ဂိုးစည်း အဆုံးအထိ ဆွဲပြေးသွားချိန်တွင် ချူဖုန်းနှင့် မာရက်ဇ်တို့က ပင်နယ်တီ ဧရိယာ အတွင်းသို့ ပြေးဝင်သွားကြသဖြင့် ဝုလ်ဗ် ခံစစ် ကစားသမား အများစု၏ အာရုံစိုက်မှုကို ဆွဲဆောင်သွားနိုင်ခဲ့သည်။</p> <p style="text-align:justify">ထိုအချိန်၌…</p> <p style="text-align:justify">လုခ်ရှောက ဘောလုံးကို ပင်နယ်တီ ဧရိယာ အစွန်းသို့ နောက်ပြန် ခုတ်တင်ပေးလိုက်ရာ ပေါ့ဘာက ပြေးဝင်လာပြီး ကန်သွင်းလိုက်ရာ ပိုက်ကွန်ထဲသို့ တန်းတန်းမတ်မတ် ဝင်သွားတော့သည်။</p> <p style="text-align:justify">(၀-၂)</p> <p style="text-align:justify">သို့သော်လည်း ဝုလ်ဗ်တို့က မျှော်လင့်ထားသလို တိုက်ခိုက်လိုစိတ်များ ပျောက်ဆုံးမသွားခဲ့ပေ။ သူတို့က နောက်တန်းရှိ ချူဖုန်းကို လျစ်လျူရှုကာ တိုက်စစ်ဆင်ရန်အတွက် အင်အား အများအပြားကို အသုံးပြုလာကြသည်။</p> <p style="text-align:justify">‘ဘယ်လိုပဲ ဖြစ်ဖြစ် သေရမှာပဲဟာ။ အစွမ်းကုန် စွန့်စားကြည့်လိုက်တာပဲ ကောင်းပါတယ်’</p> <p style="text-align:justify">‘မျှော်လင့်ချက် ရောင်ခြည်လေး တစ်ချက်လောက်တော့ မြင်ရနိုင်ကောင်းပါရဲ့’</p> <p style="text-align:justify">နှစ်ဂိုး အသာစီး ရပြီးနောက် မန်ချက်စတာ ယူနိုက်တက်၏ ကစားသမားများက အနည်းငယ် စိတ်အေးသွားပုံ ရပြီး တစ်သင်းလုံးနီးပါး ကိုယ့်ကွင်းဘက်သို့ တွန်းပို့ခံရချိန်မှသာ သူတို့၏ ဖိအားပေးမှုကို အရှိန်မြှင့်တင်လာကြသည်။</p> <p style="text-align:justify">သို့သော် ရူဘင် နီဗက်စ်က အဝေးဘော တစ်လုံးကို စတင် ပေးပို့လိုက်ပြီ ဖြစ်ပြီး ပစ်မှတ်က မက်ဂွိုင်းယား၏ အနောက်တွင် ရှင်းလင်းစွာ ရှိနေသည်။</p> <p style="text-align:justify">ဝုလ်ဗ် တိုက်စစ်မှူးက ဘောလုံးကို တားရန် ခြေထောက်ကို နောက်သို့ ဆန့်ထုတ်လိုက်သော်လည်း အားက အနည်းငယ် များသွား၏။ </p> <p style="text-align:justify">သို့သော်…</p> <p style="text-align:justify">ဘယ်သူက ထင်မှာလဲ... ဘောလုံးက ခေါင်းကြီး၏ လက်ကို သွားထိလိမ့်မည်ဟု...။</p> <p style="text-align:justify">ဒိုင်လူကြီးက အစပိုင်းတွင် ပွဲဆက်ကစားရန် အချက်ပြခဲ့သော်လည်း ချက်ချင်းပင် နားကြပ်ကို နားထောင်နေသည့်ဟန်ဖြင့် ကိုင်လိုက်ပြီးနောက် ကွင်းဘေးသို့ ပြေးသွားကာ တီဗီ ဖန်သားပြင်ငယ်ကို သွားရောက် ကြည့်ရှုလေသည်။</p> <p style="text-align:justify">“ဒိုင်လူကြီး ဗီဒီယိုအကူဒိုင်ကို သွားကြည့်တာ မြင်ရတိုင်း ငါ့မှာ နိမိတ်မကောင်းသလို ခံစားရတယ်” ဟု ချူဖုန်းက ခါးထောက်လျက် လက်မှိုင်ချစွာ ပြောလိုက်၏။</p> <p style="text-align:justify">“ငါ့လက်က ခန္ဓာကိုယ်နဲ့ ကပ်နေတာပါကွာ။ ဒါ ပင်နယ်တီ မဖြစ်နိုင်ပါဘူး။ စိတ်အေးအေး ထားစမ်းပါ”</p> <p style="text-align:justify">မက်ဂွိုင်းယား တစ်ယောက် စကားပင် ဆုံးအောင် မပြောနိုင်သေးခင် နေရာမှာတင် အေးခဲသွားတော့သည်။</p> <p style="text-align:justify">ဒိုင်လူကြီးက လေထဲတွင် တီဗီ ပုံစံမျိုး လက်ဟန်ပြလိုက်ပြီးနောက် ဝီစီကို မှုတ်ကာ လက်တစ်ဖက်ဖြင့် ပင်နယ်တီ အမှတ်သို့ ညွှန်ပြလိုက်ပြီး မက်ဂွိုင်းယားကိုလည်း အဝါကတ် ပြလိုက်လေသည်။</p> <p style="text-align:justify">“ဟူး ရိုမဲရိုးကတော့ မင်းကို သတ်ချင်နေလောက်ပြီ” ချူဖုန်းက သက်ပြင်းချရင်း ပြောလိုက်သည်။</p> <p style="text-align:justify">ခေါင်းကြီး မက်ဂွိုင်းယား တစ်ယောက် ဘာဖြစ်နေလဲ သူ နားမလည်နိုင်တော့ပေ။ ရိုမဲရိုး အရန်ခုံမှ ထလာတိုင်း သူက ပင်နယ်တီ ပေးရလျှင် ပေးရ၊ သို့မဟုတ် ဘောလုံး အလုခံရလျှင် ခံရ ဖြစ်တတ်သည်။ ထို့ကြောင့် ရိုမဲရိုးခမျာ ပေးဂိုးမရှိပွဲ အတော်များများကို လက်လွှတ်ခဲ့ရလေသည်။</p> <p style="text-align:justify">မက်ဂွိုင်းယားက ရိုမဲရိုး၏ မကျေမချမ်း ဖြစ်နေသော အကြည့်ကို သတိပြုမိသွားပြီး ကပျာကယာ ပြောလိုက်၏။</p> <p style="text-align:justify">“ချူ... မင်း ငါ့အတွက် စကားနည်းနည်းလောက် ကူပြောပေးပါဦးကွာ။ ပြီးခဲ့တဲ့ တစ်ခေါက်တုန်းက ငါ တမင်လုပ်တာ မဟုတ်ပါဘူး။ အဲဒါကြောင့် ဒီတစ်ခါလည်း ငါ့ကို အပြစ်မတင်ပါနဲ့လို့”</p> <p style="text-align:justify">“ဒေးဗစ်က သူနဲ့ ရင်းနှီးတယ်လေ။ ဘာလို့ မင်း အနောက်ကို ပြန်သွားပြီး သူနဲ့ စကားမပြောတာလဲ”</p> <p style="text-align:justify">ချူဖုန်းက "ကံကောင်းပါစေ" ဟူသော မျက်နှာထားဖြင့် ပြန်ပြောလိုက်သည်။</p> <p style="text-align:justify">‘တီ…’</p> <p style="text-align:justify">ရိုမဲရိုးက အသက်ပြင်းပြင်း တစ်ချက် ရှူလိုက်ပြီး ပင်နယ်တီ ကန်မည့် အိုဂိုရိုတာကို ကြည့်ကာ သူ၏ ဘယ်ဘက်သို့ ခုန်ပစ်လိုက်သည်။</p> <p style="text-align:justify">သို့သော် ဘောလုံးက ညာဘက်သို့ ပျံသန်းသွားလေသည်။</p> <p style="text-align:justify">(၁-၂)</p> <p style="text-align:justify">ပွဲတစ်ပိုင်း နားချိန် မတိုင်မီ ဝုလ်ဗ်တို့က ချေပဂိုး တစ်ဂိုး ပြန်လည် သွင်းယူနိုင်ခဲ့ပြီး ပွဲကြည့်စင်ပေါ်ရှိ ဝုလ်ဗ် ပရိသတ်များက အားပေးသံများ ဆူညံစွာ အော်ဟစ်လိုက်ကြသည်။</p> <p style="text-align:justify">ဘယ်သူသိနိုင်မည်နည်း...။</p> <p style="text-align:justify">သူတို့က မန်ချက်စတာ ယူနိုက်တက်ကို အံ့အားသင့်ဖွယ် အနိုင်ယူပြီး အက်ဖ်အေဖလား ဆီမီးဖိုင်နယ်သို့ တက်ရောက်သွားနိုင်ကောင်း တက်ရောက်သွားနိုင်ပေလိမ့်မည်။</p> <p style="text-align:justify">ပွဲတစ်ပိုင်း နားချိန် အတွင်း။</p> <p style="text-align:justify">မျှော်လင့်ထားသည့်အတိုင်းပင် မော်ရင်ညိုက ပေါက်ကွဲသွားတော့သည်။ သို့သော် မက်ဂွိုင်းယားကို မဟုတ်ပေ။ မည်သို့ပင်ဆိုစေ သူက ဤကိစ္စတွင် အမှန်တကယ် အပြစ်ကင်းသူ ဖြစ်နေသည် မဟုတ်ပါလား။</p> <p style="text-align:justify">“ဂိုးသွင်းပြီးတာနဲ့ မင်းတို့တွေ ဘာလို့ စိတ်လျော့လိုက်ရတာလဲ။ လီဗာပူးလ်ကို အနိုင်ရလိုက်လို့ အရမ်း ဝမ်းသာသွားပြီး အဆင့် (၇) နေရာက အသင်းကို အလွယ်လေး အနိုင်ရနိုင်တယ်လို့ ထင်နေကြတာလား”</p> <p style="text-align:justify">“မင်းတို့မှာ ဒီလို စိတ်ဓာတ်မျိုး ရှိနေမယ်ဆိုရင် ဘယ်လိုလုပ် မန်ချက်စတာ စီးတီးနဲ့ ချန်ပီယံဆုကို လုနိုင်မှာလဲ။ ဘာစီလိုနာကိုရော ဘယ်လို ကစားမှာလဲ”</p> <p style="text-align:justify">“အနိုင်ရသွားတာနဲ့ ခေါင်းထဲ အထိ မရောက်စေနဲ့။ စိမ်းလန်းတဲ့ မြက်ခင်းပြင်ပေါ်မှာ ရှိနေသရွေ့ ကိုယ့်တာဝန်ကို အမြဲတမ်း မှတ်ထားကြစမ်း”</p> <p style="text-align:justify">“ဒုတိယပိုင်းမှာ ဒီလိုမျိုး ထပ်ဖြစ်တာကို ငါ မမြင်ချင်ဘူးနော်”</p> <p style="text-align:justify">“...”</p> <p style="text-align:justify">အားလုံးက ခေါင်းပင် မဖော်ရဲလောက်အောင် အဆူခံလိုက်ရသဖြင့် ဒုတိယပိုင်းတွင် ဘောလုံး ပေးပို့မှုတိုင်းနှင့် ပြေးလွှားမှုတိုင်းကို အလွန် အလေးအနက် ထားကာ ကစားလာကြတော့သည်။</p> <p style="text-align:justify">ပွဲကစားချိန် (၇၄) မိနစ်…</p> <p style="text-align:justify">ဝုလ်ဗ်၏ နောက်တန်းမှ အဝေးပေးပို့မှုကို မာတစ်က ကြားဖြတ် လုယူနိုင်ခဲ့ပြီးနောက် ဆန့်ကျင်ဘက် အရပ်သို့ အရည်အသွေးမြင့် အဝေးဘော တစ်လုံးကို ပေးပို့လိုက်သည်။ ချူဖုန်းက ဝုလ်ဗ် ဗဟိုနောက်ခံလူ ကိုအာဒီထက် ခြေနှစ်လှမ်းခန့် နောက်ကျနေသော်လည်း ဘောလုံးဆီသို့ အရောက် သွားနိုင်ခဲ့သည်။</p> <p style="text-align:justify">ယင်းက တစ်ဦးချင်း အနေအထားသို့ တိုက်ရိုက် ရောက်ရှိသွားစေခဲ့သည်</p> <p style="text-align:justify">ဂန္ထဝင်မြောက် သေမင်းတမန် ချိန်သီး လူလိမ်ခေါက်ကွက်က တစ်ဖန် ပြန်လည် ရောက်ရှိလာပြီး ဝုလ်ဗ်ဂိုးသမား ဟန်ချက် ပျက်သွားသည့် အခိုက်အတန့်တွင် ဘောလုံးကို ညာဘက်သို့ ပို၍ မြန်ဆန်သော အရှိန်ဖြင့် ခေါက်ထုတ်သွားလေသည်။</p> <p style="text-align:justify">နောက်ထပ် လွတ်နေသော ဂိုးပေါက်ထဲသို့ ကန်သွင်းလိုက်ပြန်ရာ... ဂိုးလေပြီ။</p> <p style="text-align:justify">(၁-၃)</p> <p style="text-align:justify">ဝုလ်ဗ်တို့သည် သူတို့၏ တိုက်စစ်ဆင်မှုများအတွက် တန်ဖိုးပေးဆပ်လိုက်ရပြီး မန်ချက်စတာ ယူနိုက်တက်ကတော့ သူတို့၏ အထိရောက်ဆုံးသော တန်ပြန် တိုက်စစ် ကစားဟန်ကို အသုံးပြုကာ ဦးဆောင်ဂိုးကို ထပ်မံ ချဲ့ထွင်နိုင်ခဲ့လေသည်။</p> <p style="text-align:justify">နောက်ဆုံးတွင် ပွဲပြီးဆုံးချိန်၌ ရလဒ်က ပြောင်းလဲခြင်း မရှိတော့ပေ။</p> <p style="text-align:justify">ယခုအခါ အက်ဖ်အေဖလား ဆီမီးဖိုင်နယ်သို့ တက်ရောက်မည့် အသင်းများကို အတည်ပြုနိုင်ပြီ ဖြစ်သည်။</p> <p style="text-align:justify">မန်ချက်စတာ စီးတီး၊ မန်ချက်စတာ ယူနိုက်တက်၊ ဘရိုက်တန်နှင့် ဝက်ဖို့ဒ်တို့ ဆီမီးဖိုင်နယ်အဆင့်သို့ တက်နိုင်ခဲ့လေသည်။ မဲခွဲပွဲ ရလဒ်များက သုံးရက်အကြာတွင် ထွက်ပေါ်လာမည် ဖြစ်သည်။</p> <p style="text-align:justify">ဘယ်သူနဲ့ ဘယ်သူ တွေ့ကြမလဲ…။</p> <p style="text-align:justify">ယင်းက အင်္ဂလိပ် ဘောလုံးလောကတွင် ရေပန်းစားသော အကြောင်းအရာ တစ်ခု ဖြစ်လာခဲ့သည်။</p> <p style="text-align:justify">အင်္ဂလန် ဘောလုံးအဖွဲ့ချုပ်၏ ပုံမှန် လုပ်ထုံးလုပ်နည်းများအရ သူတို့က မန်ချက်စတာ ယူနိုက်တက်နှင့် မန်ချက်စတာ စီးတီးတို့ကို သေချာပေါက် ခွဲထားပေလိမ့်မည်။ မဟုတ်ပါက ပွဲကြည့်ရှုနှုန်းကို မည်သို့ မြှင့်တင်နိုင်မည်နည်း။</p> <p style="text-align:justify">အကယ်၍ ပရိသတ်များ ခန့်မှန်းထားသည့်အတိုင်း မန်ချက်စတာ ယူနိုက်တက်နှင့် မန်ချက်စတာ စီးတီးတို့သာ ဗိုလ်လုပွဲတွင် တွေ့ဆုံခဲ့မည် ဆိုပါက ဤရာသီတွင် နှစ်သင်း ထိပ်တိုက် တွေ့ဆုံမှုမှာ တတိယအကြိမ်မြောက် ဖြစ်လာပေလိမ့်မည်။</p> <p style="text-align:justify">ပြီးခဲ့သည့် လိဂ်ဖလား ဗိုလ်လုပွဲတွင် မန်ချက်စတာ စီးတီးတို့က မန်ချက်စတာ ယူနိုက်တက်ကို ပင်နယ်တီ အဆုံးအဖြတ်တွင် ကပ်၍ ရှုံးနိမ့်ခဲ့ရသဖြင့် စီးတီး ပရိသတ်များမှာ အတော်ကြာသည်အထိ ဝမ်းနည်းခဲ့ရသည်။</p> <p style="text-align:justify">ယခုအခါ မန်ချက်စတာ ယူနိုက်တက်အပေါ် ရှုံးကြွေး ပြန်ဆပ်ရန် အခွင့်အရေး ရရှိလာပြီ ဖြစ်သော်လည်း သူတို့က အနည်းငယ်တော့ စိုးရိမ်နေဆဲ ဖြစ်သည်။ အဓိက အကြောင်းရင်းမှာ ပြီးခဲ့သည့် ရာသီ နှစ်ခုအတွင်း အရိုက်ခံရလွန်း၍ သူတို့ ကြောက်ရွံ့နေကြခြင်း ဖြစ်သည်။</p> <p style="text-align:justify">ချူဖုန်း တစ်ယောက်တည်းတင် သူတို့အသင်းကို (၆) ဂိုး သွင်းယူထားပြီး မာနေး၏ စံချိန်ကို မှီရန် (၁) ဂိုးသာ လိုတော့သည်။</p> <p style="text-align:justify">သို့သော် သတိပြုရမည်မှာ မန်ချက်စတာ စီးတီးအပေါ် မာနေး၏ ဂိုးသွင်းမှတ်တမ်းက (၂၀၁၄-၁၅) ရာသီကတည်းက စတင်ခဲ့ခြင်း ဖြစ်ပြီး ချူဖုန်းကတော့ (၂) ရာသီပင် မပြည့်သေးသည့် အချိန်အတွင်း ဤစံချိန်ကို ရရှိခဲ့ခြင်း ဖြစ်သည်။</p> <p style="text-align:justify">ချူဖုန်းကတော့ ဤကိစ္စနှင့် ပတ်သက်၍ သိပ်ပြီး တွေးတောနေခြင်း မရှိပေ။</p> <p style="text-align:justify">သို့သော် ဖြစ်နိုင်ခြေ တစ်ခုကိုတော့ သူ တွေးမိလိုက်သည်။ အကယ်၍ သူက မန်ချက်စတာ စီးတီးကို ထပ်ပြီး အနိုင်ယူလိုက်မည် ဆိုပါက မာရီယာ၏ အိမ်ထဲသို့ ဝင်ခွင့်ရရန် လွယ်ကူတော့မည် မဟုတ်ချေ။</p> <p style="text-align:justify">သို့ရာ၌ သေချာသည်ကတော့ မန်ချက်စတာ စီးတီးကို အနိုင်ယူရန် ဆိုသည်မှာ လွယ်ကူသည့် ကိစ္စတော့ မဟုတ်ပေ။</p> <p style="text-align:justify">ပြီးခဲ့သည့် အကြိမ်က နှစ်သင်းစလုံး ပင်နယ်တီ အဆုံးအဖြတ် အထိ ရောက်ခဲ့ရသည်။ ဒီတစ်ခါရော ဘယ်လို ဖြစ်လာမလဲ…။</p> <p style="text-align:justify">---</p> <p style="text-align:justify">အက်ဖ်အေဖလားပွဲ ပြီးဆုံးပြီးနောက် နိုင်ငံတကာ သီတင်းပတ်သို့ ရောက်ရှိလာခဲ့သည်။ ချူဖုန်းက လုပ်စရာ သိပ်မရှိသဖြင့် သူ၏ မိဘများကို အင်္ဂလန်သို့ လာရောက် လည်ပတ်ရန် ဖိတ်ခေါ်ကာ လိုက်လံ ပြသပေးခဲ့သည်။</p> <p style="text-align:justify">လန်ဒန်မြို့ရှိ ဘစ်ဘန် နာရီစင်ကြီး ရှေ့တွင်…</p> <p style="text-align:justify">“သား… မာရီယာနဲ့ ပတ်သက်ပြီး ရှေ့ဆက် ဘာတွေ စီစဉ်ထားလဲ” ဟု ယန်လန်ရှက စပ်စုချင်သော လေသံဖြင့် မေးလိုက်၏။</p> <p style="text-align:justify">“စောပါသေးတယ်ဗျာ” </p> <p style="text-align:justify">ချူဖုန်းက ခေါင်းယမ်းလိုက်သည်။ “အနည်းဆုံးတော့ တက္ကသိုလ် ဘွဲ့ရတဲ့ အထိ စောင့်ကြည့်ကြတာပေါ့”</p> <p style="text-align:justify">ဘောလုံးသမား အများစုက အိမ်ထောင်စောစော ကျပြီး ကလေးယူတတ်ကြသည် ဆိုသော်ငြား…</p> <p style="text-align:justify">ချူဖုန်းကတော့ သူ၏ ကစားသမား ဘဝကို ဦးစားပေးသင့်ပြီး ငယ်ရွယ်စဉ် အချိန်အတွင်း ချန်ပီယံဆုများ ပိုမို ဆွတ်ခူးသင့်သည်ဟု ခံစားရသည်။</p> <p style="text-align:justify">“အေးပါ။ အမေတို့က မင်းကို အလျင်စလို မတိုက်တွန်းပါဘူး။ မင်းဘာသာမင်း စဉ်းစားပေါ့”</p> <p style="text-align:justify">ယန်လန်ရှက ဘာမှ ထပ်မပြောတော့ပေ။</p> <p style="text-align:justify">မွန်းလွဲပိုင်းတွင် ချူဖုန်းက မိဘနှစ်ပါးကို ကိန်းဘရစ်ချ် တက္ကသိုလ်သို့ ထပ်မံ ခေါ်ဆောင်သွားခဲ့သည်။ အကြောင်းမှာ ချူချန်းကျိက ရှုကျစ်မို၏ ပရိသတ် အစစ်အမှန် တစ်ဦး ဖြစ်နေသောကြောင့်ပင်။</p> <p style="text-align:justify">သို့သော် ကိန်းမြစ်ပေါ်တွင် တိုင်ထောက်လှေဖြင့် အပျော်စီးနေစဉ် ကိန်းမြစ်၏ နာမည်ကျော် အီးတုံးများက မြစ်တွင်းဝယ် မျောပါလာလေတော့သည်။ ထိုဖြစ်ရပ်ကြောင့် ချူချန်းကျိ တစ်ယောက် အန်လုနီးပါး ဖြစ်သွားခဲ့ရ၏။ </p> <p style="text-align:justify">ကိန်းဘရစ်ချ်နှင့် ပတ်သက်၍ သူ၏ လှပသော စိတ်ကူးပုံရိပ်လေးများက ‘ကိန်းဘရစ်ချ်ကို ထပ်မံ နှုတ်ဆက်ခြင်း’ ဟူသော ကဗျာလေးထဲကလိုပင် အစအန မကျန်အောင် ပျောက်ကွယ်သွားတော့သည်။</p> <p style="text-align:justify"> </p> <p style="text-align: center;">***</p>


Save