BIT

Title

Show in VIP/Series

Status (Active / Inactive)

<h2 style="text-align: center;">အချုပ်ထောင်၏ သခင်သစ်</h2>

လေပြင်းက ကြည်လင်နေသော တိမ်တိုက်များကို တံမြက်လှည်းသကဲ့သို့ ရှင်းလင်းသွားစေပြီး နှင်းခဲများ အခဲလိုက် ကျဆင်းလာကာ ကျောက်စိမ်းကမ္ဘာကြီးက အေးစက်သွား၏။

နွေဦးနှင့် ဆောင်းဦး ဂူသင်္ချိုင်း…

ပြတင်းပေါက်ကို ဖွင့်ထားသဖြင့် အခန်းက လင်းထိန်နေပြီး လေဝင်လေထွက် ကောင်းမွန်နေသည်။

ငွေရောင်ဆံပင်များ လွင့်ဝဲနေသော ဖူရှောင်ကွမ်းက စာရေးစားပွဲတစ်ခုရှေ့တွင် ထိုင်ကာ အတွေးရေယာဉ်ကြောထဲ နစ်မျောနေရင်း ဆောင်းဦးလေပြေကို ခံစားနေ၏။ တစ်ခါတစ်ရံတွင် သူက ဓားငယ်လေးကို ကိုင်၍ ဝါးစာလိပ်တစ်ခုပေါ်တွင် စာလုံးများ ထွင်းထုလိုက်ရာ တရှပ်ရှပ် အသံနှင့်အတူ သေးငယ်သော ဝါးလွှာလေးများက လေထဲတွင် လွင့်ပျံသွားသည်။

ဖျက်လိုက် ထည့်လိုက်၊ ပြင်ဆင်လိုက် မွမ်းမံလိုက်နှင့် အမွှေးတိုင်တစ်တိုင်စာ အချိန်ကုန်လွန်သွားပြီးနောက် သူက လက်အင်္ကျီစကို တစ်ချက် ခါယမ်းလိုက်၏။ လေပြင်းတစ်ချက် တိုက်ခတ်လာပြီး ကြမ်းပြင်ပေါ်ရှိ ဝါးလွှာများကို ဂူအပြင်ဘက်သို့ လွှင့်ထုတ်သွားရာ ဖြတ်သွားသော အမှိုက်လှည်း တစ်စီးပေါ်သို့ အတိအကျ ကျရောက်သွားသည်။ ထိုအမှိုက်လှည်းက မိစ္ဆာဈေးတန်းတွင်သာ တွေ့ရလေ့ရှိသော သန့်ရှင်းရေးယာဉ် တစ်မျိုး ဖြစ်၏။

အမှိုက်ကောက်သူများအဖြစ် တာဝန်ထမ်းဆောင်နေသော ချေးပိုးထိုး မိစ္ဆာအချို့က နွေဦးနှင့် ဆောင်းဦး ဂူသင်္ချိုင်းဘက်သို့ လှည့်၍ နှုတ်ဆက်သည့်အနေဖြင့် သူတို့၏ အတောင်ပံများကို ခတ်လိုက်ကြသည်။ သူတို့က စပျစ်သီးအရွယ်ခန့်ရှိသော ချေးလုံးများကို ထွေးထုတ်လိုက်ပြီး ရိုသေလေးစားစွာ ဆက်သလိုက်ကြ၏။ ဤသည်က သူတို့မျိုးနွယ်စု၏ အမြင့်မားဆုံးသော အရိုအသေပေးမှုမျိုး ဖြစ်သည်။

ဖူရှောင်ကွမ်းက အသာအယာ ငြင်းပယ်လိုက်ပြီးနောက် သူတို့က ချေးလုံးများကို ပြန်မျိုချလိုက်ပြီး သူတို့၏ လှည်းများကို ဆက်တွန်းသွားကြ၏။ တစ်ခါတစ်ရံတွင် ဂူတံခါးတစ်ခု ပွင့်လာပြီး မိစ္ဆာတစ်ကောင် ထွက်လာကာ အမှိုက်လာသွန်တတ်သော်လည်း သူတို့က ဖူရှောင်ကွမ်းကဲ့သို့ ကောင်းမွန်သော ဆက်ဆံမှုမျိုး မရရှိကြချေ။

လူသားတစ်ပိုင်း အသွင်ပြောင်းထားသော ဂူသခင်တစ်ဦးနှင့် တွေ့သည့်အခါ ချေးပိုးထိုး မိစ္ဆာများက အတောင်ပံကိုသာ ခတ်ပြကြပြီး ဒုတိယမြောက် ကောင်းကင်ဘုံအဆင့် မိစ္ဆာတစ်ကောင်နှင့် တွေ့လျှင်တော့ ကြည့်ရုံသာ ကြည့်နေကြ၏။

ချေးပိုးထိုး မိစ္ဆာများ၏ မျက်နှာလိုက်မှုကို ဖူရှောင်ကွမ်းက ဂရုမစိုက်ပေ။ သူက ဝါးစာလိပ်ကို ကောက်ကိုင်၍ သေချာ ဖတ်ရှုလိုက်ပြီး ကျေနပ်သွား၏။ ၎င်းက သူ၏ အနာဂတ် ကျင့်ကြံခြင်း အစီအစဉ်များနှင့် ရည်မှန်းချက်များကို ရှင်းလင်းပြတ်သားစွာ မှတ်တမ်းတင်ထားခြင်း ဖြစ်သည်။

ကျင့်စဉ်များနှင့် ပတ်သက်၍ သာမန် အသက်ရှူနည်းစနစ်များက သူ၏ လိုအပ်ချက်များကို မဖြည့်ဆည်းပေးနိုင်တော့ချေ။ သွေးကြောဆက်ခံမှုက ဘိုးဘေးများဆီသို့ နောက်ပြန်ရောက်သွားပြီး အမွေအနှစ် အသက်ရှူနည်းစနစ်များကို ပိုင်ဆိုင်ထားကြသော မီးလျှံနီ၊ ကျိုကွမ်းနှင့် ကျောင်းအုပ်ကြီး ဂျီမိုတို့နှင့် မတူဘဲ သူက ကိုယ့်ကိုယ်ကိုယ်သာ အားကိုးရမည် ဖြစ်၏။

ကံကောင်းထောက်မစွာဖြင့် သူ၏ နားလည်သဘောပေါက်နိုင်စွမ်းက အတော်လေး ကောင်းမွန်သည်။ ယခင်က ရာသီလေးခုကို တရားထိုင် ဆင်ခြင်ခဲ့ပြီး သူ၏ အသက်ရှူနည်းစနစ်က ပြောင်းလဲမှုအချို့ ဖြစ်ပေါ်ခဲ့၏။

ယခုအခါ သူက အချိန်တာအို လမ်းစဉ်တွင် ပိုမို ခရီးပေါက်လာပြီး ပိုမို နက်ရှိုင်းစွာ မြင်တွေ့လာရပြီ ဖြစ်ရာ ရာသီဥတုများကို ဆက်လက် တရားထိုင် ဆင်ခြင်ခြင်းဖြင့် သေချာစွာ ပြုပြင်မွမ်းမံပြီး ပိုမို ပြီးပြည့်စုံအောင် လုပ်ဆောင်ကာ သင့်လျော်သော အသက်ရှူနည်းစနစ်တစ်ခုကို ဖန်တီးနိုင်ရန်မှာ အချိန်တစ်ခုသာ ဖြစ်သည်။

သက်တမ်း ရှည်ကြာရေးနှင့် ပတ်သက်၍ ဖူရှောင်ကွမ်းက လက်ရှိတွင် နှစ်တစ်ရာ နေနိုင်သော်လည်း ကျင့်ကြံခြင်းက အခြားအရာများထက် အချိန်ကို ပို၍ ကုန်ဆုံးစေ၏။ တစ်ယောက်၏ ကျင့်ကြံမှုအဆင့် ပိုမြင့်လေလေ အချိန်က တန်ဖိုးနည်းလာလေလေ ဖြစ်သည်။

တံခါးပိတ် ကျင့်ကြံခြင်း တစ်ကြိမ်က ဆယ်စုနှစ်များစွာ သို့မဟုတ် ရာစုနှစ်တစ်ခုအထိပင် ကြာမြင့်နိုင်၏။ 'တောင်တန်းများပေါ်တွင် အရက်မူးနေစဉ် ကမ္ဘာကြီးက ပြောင်းလဲသွားပြီ' ဆိုသော စကားက တကယ့် လက်တွေ့ပင် ဖြစ်သည်။

သူ၏ သက်တမ်းကို တိုးမြှင့်မည့် ကိစ္စက ရပ်တန့်ထား၍ မရပေ။

သို့သော်လည်း ယခင်ကလောက် အလျင်စလို ဖြစ်နေစရာ မလိုတော့ချေ။ သူက အတော်လေး ပေါ့ပေါ့ပါးပါးဖြင့် ဘဝကို ခံစားနိုင်ပြီး ကောင်းကင်နှင့် မြေကြီးအကြောင်းကို အတွင်းမှ အပြင်သို့ တည်ငြိမ်စွာ တရားထိုင် ဆင်ခြင်နိုင်၏။ သူ သင်ယူလေ့လာခဲ့သည်များကို စနစ်တကျ စုစည်းရန်၊ ဝန်ကျဉ်းကျဉ်းဖြင့် ခရီးသွားနိုင်ရန်အတွက် မလိုအပ်သည်များကို သင့်လျော်သလို စွန့်လွှတ်ရန်နှင့် မှန်မှန်ကန်ကန် ကျင့်ကြံရန်အတွက်လည်း အချိန်ပိုရလာသည်။

နည်းစနစ်များနှင့် ပတ်သက်၍ ဓမ္မနယ်ပယ် ကျင့်ကြံခြင်းက နည်းစနစ်နယ်ပယ်နှင့် ဆင်တူမှုများ ရှိ၏။ နောက်ထပ် ကောင်းကင်ဘုံတစ်ခု၏ တံခါးကို ခေါက်နိုင်ရန် ဥပဒေသတစ်ခုကို နားလည်သဘောပေါက်ရန် လိုအပ်သည်။ ကျင့်ကြံခြင်း၏ ပြီးပြည့်စုံခြင်းအဆင့်သို့ ရောက်ရန်အတွက် ဥပဒေသသုံးခုကို နားလည်သဘောပေါက်ရမည် ဖြစ်ပြီး တစ်ခုစီတွင် နည်းစနစ်သုံးခုစီ ပါဝင်၏။ သူက ခွဲခြမ်းစိတ်ဖြာကြည့်လိုက်သောအခါ အတော်လေး ရှုပ်ထွေးသွားသည်။

သဘောတရားများ၊ ဓမ္မအနှစ်သာရနှင့် ဓမ္မစွမ်းအားများ မည်သည့်အရာမှ လစ်ဟင်းနေ၍ မရပေ။ အတိုချုပ်ပြောရလျှင် ၎င်းက နက်နဲသော သုံးခုပေါင်းတစ်ခု အယူအဆပင် ဖြစ်၏။

ဖူရှောင်ကွမ်းက ရေဓာတ်နှင့် မြေဓာတ် နှစ်မျိုးစလုံးကို ပိုင်ဆိုင်ထားသည်။ ယခင်က ၎င်းတို့ကို နက်နက်နဲနဲ လေ့လာခဲ့ခြင်း မရှိဘဲ ထိုနေရာမှ စတင်ရန် စီစဉ်ထား၏။

ဥပမာအားဖြင့် ရေမြှားနည်းစနစ်က ရေခဲမြှားနည်းစနစ်အဖြစ်သို့ ပြောင်းလဲသွားခဲ့ပြီး ၎င်းကို သူ တစ်စိတ်တစ်ပိုင်း ကိုယ်တိုင် ဖန်တီးခဲ့သော နည်းစနစ်တစ်ခုဟု ယူဆနိုင်သည်။ ၎င်းကို သူ၏ ဓမ္မအနှစ်သာရထဲသို့ ထည့်သွင်းမှတ်သားရန် ကြိုးစားနိုင်ပြီး သူ၏ မွေးရာပါ မိစ္ဆာနည်းစနစ်အဖြစ် ပြောင်းလဲပစ်နိုင်၏။

ထို့နောက် အထောက်အကူပြု မိစ္ဆာနည်းစနစ် နှစ်ခုကို ဖန်တီးရန် ပိုမို နက်ရှိုင်းစွာ တူးဆွပြီး ၎င်းတို့ကို ပေါင်းစပ်ခြင်းဖြင့် တစ်ခုတည်းအဖြစ် ဖန်တီးကာ အချိန်မြှား အမျိုးအစား ဓမ္မစွမ်းအားတစ်ခုကို ဖန်တီးနိုင်ကောင်း ဖန်တီးနိုင်မည် ဖြစ်ပြီး ၎င်းကို အချိန်ရေစီးကြောင်း ဓမ္မစွမ်းအားနှင့် တွဲဖက်၍လည်း အသုံးပြုနိုင်ပေသည်။

ထို့အပြင် သူက သူ၏ အားသာချက်များကို ဆက်လက် အသုံးချပြီး အားနည်းချက်များကို ရှောင်ရှားရန် လိုအပ်သည့်အပြင် ဝိညာဉ်အာရုံနယ်ပယ်တွင် သူ၏ အားသာချက်ကို အမြင့်ဆုံးရောက်အောင် မြှင့်တင်ရန်အတွက် ဝိညာဉ်အာရုံ ကျင့်ကြံမည့် နည်းလမ်းတစ်ခုကို ဖန်တီးရန် သို့မဟုတ် ရှာဖွေရန် လိုအပ်၏။

သူ၏ မိစ္ဆာခန္ဓာကိုယ်ကို သန့်စင်ခြင်း ကိစ္စကလည်း ရပ်တန့်ထား၍ မရပေ။ သူ့တွင် ချီနှင့် ဓမ္မစွမ်းအား လုံလောက်စွာ ရှိနေမည်ဆိုလျှင် အနာဂတ် လှုပ်ရှားမှုများအတွက် ပိုမို ယုံကြည်မှု ရှိလာမည် ဖြစ်သည်။

ဤဝါးစာလိပ်ကို ရေးသားနေစဉ် ဖူရှောင်ကွမ်းက သူ၏ ရှေ့ဆက်ရမည့် လမ်းကြောင်းကို ရှင်းလင်းသွားစေခဲ့ပြီး လာမည့် ကာလများအတွက် မည်သို့ ရှေ့ဆက်ရမည်ကို သိရှိသွားခဲ့ပြီ ဖြစ်သည်။

...

ယနေ့တွင် လေလည်းမတိုက်သလို မိုးလည်းမရွာချေ။ ဆောင်းဦးရေပြင်က မိုးကုတ်စက်ဝိုင်းအထိ ဆန့်တန်းနေပြီး ဘဲတစ်ကောင်က ဆည်းဆာတိမ်တိုက်များကို ဖြတ်၍ ပျံသန်းသွား၏။ နေဝင်ဆည်းဆာ၏ ရွှေရောင်အရိပ်များကြားတွင် အဝါရောင်ပန်းများနှင့် အနီရောင် သစ်ပင်များ ပေါက်ရောက်နေသည်။

ထင်းရှူးပင်အိုကြီး၏ အကိုင်းအခက်ပေါ်တွင် သူက လက်ပိုက်၍ ရပ်လျက် ဆောင်းဦးနှောင်းပိုင်း ဆည်းဆာအလှကို ခံစားလိုက်ပြီးမှ နွေဦးနှင့် ဆောင်းဦး ဂူသင်္ချိုင်းမှ ထွက်ခွာလာခဲ့၏။

မိစ္ဆာငယ်လေးများ၏ စိတ်အားထက်သန်စွာ နှုတ်ဆက်ခြင်းကို ရှောင်ရှားရန်အတွက် သူက အချိန်ရေစီးကြောင်း ဓမ္မစွမ်းအားကို အသက်သွင်း၍ သူ၏ ပုံသဏ္ဌာန်ကို ဖုံးကွယ်ကာ ခြေရာဖျောက်လိုက်သည်။ ထိုအခါ သူက မိစ္ဆာဈေးတန်းတစ်လျှောက် ပေါ်ပေါ်ထင်ထင် လျှောက်သွားနေသော်လည်း မိစ္ဆာအမျိုးမျိုး၏ မျက်စိရှေ့မှ ဖြတ်သွားသည့်တိုင်အောင် မည်သူမျှ သတိမထားမိကြချေ။

သူ ဖြတ်လျှောက်သွားသည့်တိုင် ငှက်များနှင့် အင်းဆက်များစွာက သူ့အတွက် အလိုအလျောက် လမ်းဖယ်ပေးကြသော်လည်း သူတို့က သတိမထားမိကြဘဲ ထိုအချိန်တွင် သူတို့ လှည့်ရမည်၊ ရွှေ့ရမည် သို့မဟုတ် ရပ်ရမည်ဟုသာ ထင်မှတ်နေကြ၏။ အရာအားလုံးက သဘာဝအတိုင်း ဖြစ်ပေါ်နေသည်။

မိစ္ဆာအကယ်ဒမီ၊ စာကြည့်ခန်း…

ဂျီမိုနှင့် ဖူရှောင်ကွမ်းတို့က အိမ်ရှင်နှင့် ဧည့်သည်အဖြစ် ထိုင်လိုက်ကြ၏။

ရိုးရှင်းသော နှုတ်ခွန်းဆက်စကားများ ပြောဆိုပြီးနောက် သူက အလုပ်ကိစ္စကို စတင် ဆွေးနွေးတော့မည့်အချိန်မှာပင် ဂျီမိုက သူ့ထက် အရင် စကားစလိုက်သည်။ လက်ဖက်ရည်ပန်းကန်လုံးကို ချထားလိုက်ပြီး သူမက ပြောလိုက်၏။

"မိစ္ဆာမိတ်ဆွေ တံခါးပိတ် ကျင့်ကြံတာကနေ ထွက်လာပြီလို့ မနေ့က ကျွန်မ ကြားလိုက်တယ်... ဒီည ရှင့်ဆီ လာလည်မလို့ပဲ… ဒါပေမဲ့ ရှင် ရောက်လာတော့လည်း အတော်ပဲပေါ့"

"ကျောင်းအုပ်ကြီးက မိစ္ဆာသခင်ရဲ့ တာဝန်တွေနဲ့ ပတ်သက်တဲ့ ကိစ္စအတွက် လာမလို့လား"

"ရှင်နဲ့ စကားပြောရတာ အမြဲတမ်း သိပ်ကို လွယ်ကူတာပဲ မိစ္ဆာမိတ်ဆွေ"

သူမ၏ အကြည့်များက ပြတင်းပေါက်ကို ဖြတ်သန်းသွားပြီး ကြိုးကြိုးစားစား စာသင်နေကြသော မိစ္ဆာငယ်လေးများအပေါ် ကျရောက်သွား၏။ တစ်ခဏမျှ ကြည့်ရှုပြီးနောက် ဂျီမိုက ပြောလိုက်သည်။

"ရှင့်ရဲ့ လက်ရှိ အဆင့်အတန်းအရဆိုရင် မိစ္ဆာမိတ်ဆွေက မိစ္ဆာအကယ်ဒမီမှာ နည်းပြအဖြစ် တာဝန်ထမ်းဆောင်ဖို့ မသင့်တော်တော့ဘူးလေ"

"ရိုးရိုးသားသား ပြောရရင် ကျွန်တော် အဲဒီကိစ္စအတွက် လာခဲ့တာပါ... ကျောင်းအုပ်ကြီးရဲ့ အမြဲတမ်း စောင့်ရှောက်မှုအတွက် အများကြီး ကျေးဇူးတင်ပါတယ်... ရှောင်ကွမ်း တကယ်ကို ကျေးဇူးတင်ပါတယ်"

ဖူရှောင်ကွမ်းက မတ်တတ်ရပ်၍ အရိုအသေပေးလိုက်၏။

ကျောင်းအုပ်ကြီး ဂျီမိုကလည်း ချက်ချင်း ပြန်လည် အရိုအသေပေးလိုက်သည်။

ထို့နောက် ဖူရှောင်ကွမ်းက ပြန်ထိုင်လိုက်ပြီး ဆက်ပြော၏။

"ဒါပေမဲ့ ကျွန်တော့်ရဲ့ နှလုံးသားက စာသင်ပြတဲ့နေရာမှာ မရှိဘူး ဖြစ်နေတယ်... ရာထူးစလက်ခံကတည်းက ကိစ္စအမျိုးမျိုးကြောင့် အတန်းတွေကို မကြာခဏ ပျက်ကွက်ခဲ့တယ်လေ... ကျောင်းအုပ်ကြီးက ကျွန်တော့်ကို အပြစ်မတင်ပေမဲ့ ကျွန်တော်က ဒီလောက် ကျေးဇူးကန်းလို့ မရဘူးလေ"

"အခု ကံကောင်းထောက်မစွာနဲ့ မိစ္ဆာသခင် တစ်ပါး ဖြစ်လာပြီဆိုတော့ ဒီအခွင့်အရေးကို အသုံးချပြီး နည်းပြရာထူးကနေ နုတ်ထွက်ခွင့်ပြုဖို့ တောင်းဆိုချင်ပါတယ်... ကျောင်းအုပ်ကြီး ခွင့်ပြုပေးလိမ့်မယ်လို့ မျှော်လင့်ပါတယ်"

ဖူရှောင်ကွမ်းက ပွင့်ပွင့်လင်းလင်း ပြောလိုက်၏။ စာသင်ပြခြင်းအပေါ် သူ စိတ်မဝင်စားကြောင်းကို မဖုံးကွယ်ခဲ့ပေ။

သူ၏ သဘောထားက ရိုးသားပြီး စကားလုံးများကို သေချာ ရွေးချယ်ထားကာ ကျောင်းအုပ်ကြီးအတွက် အလွယ်တကူ လက်ခံနိုင်မည့် အကြောင်းပြချက်ကို ပေးခဲ့၏။ ဂျီမိုက မည်သည့် မကျေနပ်မှုမျှ မခံစားရဘဲ ထိုအစား ဖူရှောင်ကွမ်းကို ပို၍ပင် လေးစားသွားသည်။

ယခုအခါ မိစ္ဆာနှစ်ကောင်က တန်းတူ အဆင့်အတန်းတွင် ရှိနေပြီ ဖြစ်၏။

မိစ္ဆာသခင် ရှောင်ကွမ်းက စာမသင်ချင်လျှင် စကားတစ်ခွန်း ပြောလိုက်ရုံသာ ဖြစ်သည်။ သို့သော်လည်း သူက ကိုယ်တိုင်ကိုယ်ကျ အထူးတလည် လာရောက်ခဲ့ပြီး သူမအတွက် မျက်နှာပန်းလှမည့် အကြောင်းပြချက်များကို ပေးခဲ့၏။ ဤမျှ ယဉ်ကျေးပြီး ရိုးသားသော မိစ္ဆာတစ်ကောင်ကို သူမ ဘယ်လိုလုပ် သဘောမကျဘဲ နေနိုင်မည်နည်း။

ဂျီမိုမှာ ပျော်ရွှင်သွားသဖြင့် သူမက သဘောထား ပိုကြီးလာ၏။ သူမက ပြောလိုက်သည်။

"ရေတိမ်က နဂါးတစ်ကောင်ကို ထိန်းသိမ်းမထားနိုင်ပါဘူး... ကျွန်မ ရှင့်ကို ဆက်ထားဖို့ မကြိုးစားတော့ပါဘူး... ဧကရီ သတ်မှတ်ထားတဲ့ စည်းမျဉ်းတွေအရ မိစ္ဆာသခင် တစ်ပါးက နယ်မြေတစ်ခုရဲ့ တာဝန်ခံ ဖြစ်နိုင်တယ်"

"ရှင်က အချုပ်ထောင်ရဲ့ ကိစ္စရပ်တွေကို ရင်းနှီးကျွမ်းဝင်ပြီးသားဆိုတော့ ပြောင်းရွှေ့ရတဲ့ အလုပ်ရှုပ်သက်သာအောင်နဲ့ အသားကျအောင် အချိန်ယူရတာ သက်သာအောင် အဲဒီမှာပဲ ဆက်နေသင့်တယ်... ဒီနေ့ကစပြီး ရှင်က အချုပ်ထောင်ရဲ့ သခင် ဖြစ်လာပြီ...”

“ဧကရီ တံခါးပိတ် ကျင့်ကြံတာကနေ မထွက်လာခင် ရှင့်သဘောအတိုင်း လုပ်ဆောင်နိုင်တယ်... ကြီးမားတဲ့ ပြဿနာတွေ ကြုံလာရင်တော့ ကျွန်မတို့ အချင်းချင်း တိုင်ပင်နိုင်ပါတယ်... ဧကရီ ထွက်လာရင်တော့ တိကျတဲ့ ကိစ္စတွေကို သူမဆီ တိုက်ရိုက် တင်ပြနိုင်ပါတယ်"

ဖူရှောင်ကွမ်းမှာ အလွန် ဝမ်းသာသွား၏။

အချုပ်ထောင်က အကျိုးအမြတ် အတော်များများ ပေးစွမ်းနိုင်သည်။ တာဝန်ထမ်းဆောင်ခဲ့သည့် တစ်နှစ်တာကာလအတွင်း ကျင့်ဝတ်စည်းကမ်းများနှင့်အညီ လုပ်ဆောင်ခဲ့သည့်တိုင် သူ အတော်လေး ရရှိခဲ့၏။

ဟင်ထူနှင့် ငန်းမိစ္ဆာတို့က နောက်ထပ် ဌာနမှူးရာထူးအတွက် အပြိုင်အဆိုင် ဖြစ်နေကြပြီး ဉာဏ်နီဉာဏ်နက် အမျိုးမျိုး သုံးနေကြကာ အချင်းချင်း လည်ပင်းညှစ်လုမတတ် ဖြစ်နေကြသည်။

အပင်များအတွက် မိစ္ဆာဖြစ်လာရန် မလွယ်ကူသလို ကျင့်ကြံရန်မှာလည်း ပို၍ပင် ခက်ခဲလှသည်။ အနည်းဆုံးတော့ အင်းဆက်များထက် ပိုခက်ခဲပေ၏။ သို့သော်လည်း ထိုဆူးပင် ဌာနမှူးက နှစ်တစ်ရာ့ငါးဆယ်မျှသာ ကျင့်ကြံခဲ့ရသေးသော်လည်း မဟာမိစ္ဆာ တစ်ကောင် ဖြစ်လာမည့် လက္ခဏာများ ပြသနေပြီ ဖြစ်သည်။

သူမ၏ စကားနည်းသော သဘာဝနှင့် မနားမနေ ကြိုးစားအားထုတ်မှုအပြင် အချုပ်ထောင်မှ ရရှိသော အရင်းအမြစ်များကလည်း အရေးပါသော အခန်းကဏ္ဍမှ ပါဝင်နေ၏။ သူမက အပိုဆောင်း အကျိုးအမြတ်များကို တက်တက်ကြွကြွ မရှာဖွေလျှင်တောင် လက်အောက်ငယ်သားများထံမှ ဆက်သမှုများနှင့် အစဉ်အလာအရ ရရှိသော အကျိုးအမြတ် အမျိုးမျိုးက သူမကို ကောင်းစွာ ထောက်ပံ့ပေးထားရန် လုံလောက်ပေသည်။

အချုပ်ထောင်ကို အပြည့်အဝ ထိန်းချုပ်ခွင့် ရမည့်ကိစ္စကိုတော့ ဆိုဖွယ်ရာ မရှိတော့ပေ။

ဖူရှောင်ကွမ်းက ကျေးဇူးတင်စကားပြောရန် ချက်ချင်း အရိုအသေပေးလိုက်၏။

"ကျောင်းအုပ်ကြီးရဲ့ မျက်နှာသာပေးမှုအတွက် ကျေးဇူးတင်ပါတယ်... ရှောင်ကွမ်း စိတ်ပျက်အောင် မလုပ်ပါဘူး"

ဂျီမိုက ခေါင်းညိတ်လိုက်ပြီး တစ်ခဏမျှ စဉ်းစားကာ ဆက်ပြောသည်။

"အင်းဆက်မျိုးနွယ်စုနဲ့ ပတ်သက်ပြီးတော့... ယုတ္တိတန်တန် တွေးကြည့်ရင် သူတို့က ရှင့်ရဲ့ ကွပ်ကဲမှုအောက်မှာ ရှိသင့်တယ်... ဒါပေမဲ့ ဧကရီ ကိုယ်တိုင်က မိစ္ဆာမိတ်ဆွေ ကျိုကွမ်းက ငှက်တွေကို ဦးဆောင်ဖို့နဲ့ မိစ္ဆာမိတ်ဆွေ မီးလျှံနီက သားရဲတွေကို ဦးဆောင်ဖို့ အမိန့်ချမှတ်ထားခဲ့တာလေ... ကျွန်မက အဲဒါကို ရမ်းသန်းပြီး ပြောင်းလဲလို့ မရဘူး... ဧကရီ ထွက်လာပြီး ဆုံးဖြတ်ချက်ချတဲ့အထိ စိတ်ရှည်ရှည်နဲ့ စောင့်ပေးဖို့ပဲ ကျွန်မ တောင်းဆိုနိုင်တယ်"

"ဒါပေမဲ့ ရှင် အရင်က ဖွဲ့စည်းခဲ့တဲ့ တောင်ရွှေ့တပ်ဖွဲ့ကတော့ ရှင့်ရဲ့ ကွပ်ကဲမှုအောက်မှာပဲ ဆက်ရှိနေမှာပါ… ပြီးတော့ သူတို့ မျိုးနွယ်စုရဲ့ ကိစ္စတွေကို ရှင် ယာယီ ကိုင်တွယ်ပေးရမယ်"

"ဒီအစီအစဉ်က တကယ့်ကို သင့်တော်ပါတယ်... ကျောင်းအုပ်ကြီးကို ရှောင်ကွမ်း ကျေးဇူးတင်ပါတယ်"

ထို့နောက် မိစ္ဆာနှစ်ကောင်က မိစ္ဆာသခင် တစ်ပါး၏ ခံစားခွင့်များအကြောင်း ဆွေးနွေးခဲ့ကြ၏။ ဂျီမိုက အများဆုံး ပြောဆိုခဲ့ပြီး ကိုယ်ပိုင်ဂူ တိုးချဲ့ခြင်း၊ ဝိညာဉ်လယ်ယာ ခွဲဝေပေးခြင်းနှင့် လစဉ် ရရှိမည့် အရင်းအမြစ်များကဲ့သို့သော ကိစ္စရပ်များကို ပြောပြခဲ့သည်။

မိစ္ဆာသခင် တစ်ပါးက ယွီတောင်တန်းအတွက် ရှေ့တန်းမှ ဦးဆောင်ရန်နှင့် မိစ္ဆာများကို ကာကွယ်ပေးရန် မျှော်လင့်ထားခြင်း ခံရ၏။ သူတို့၏ အဆင့်အတန်းက လေးစားဖွယ် ကောင်းပြီး သူတို့၏ ခံစားခွင့်များကလည်း သဘာဝကျကျ ရက်ရောပေသည်။

ဖူရှောင်ကွမ်းက အလွန်ပင် ကျေနပ်နေ၏။ အလုပ်ကိစ္စ ပြီးဆုံးသွားသဖြင့် သူက နှုတ်ဆက်ထွက်ခွာရန် မတ်တတ်ရပ်လိုက်သည်။ မထွက်ခွာမီ တစ်ခုခုကို သတိရသွားပြီး သူက မေးလိုက်၏။

"ကျောင်းအုပ်ကြီး... ကျွန်တော်တို့ ယွီတောင်တန်းမှာ ဓမ္မနယ်ပယ် မဟာမိစ္ဆာ တစ်ကောင်ရဲ့ သက်တမ်းကို တိုးမြှင့်ပေးနိုင်တဲ့ နည်းလမ်းတွေများ ရှိလား"

ဂျီမိုမှာ အနည်းငယ် မှင်တက်သွားသော်လည်း ထူးဆန်းသည်ဟု မထင်မိပေ။ သူမက အသားကျနေပြီ ဖြစ်သလို နားလည်နိုင်သည်ဟုလည်း ယူဆ၏။ သေချာ စဉ်းစားပြီးနောက် သူမက ခေါင်းခါယမ်းလိုက်သည်။

"ဓမ္မနယ်ပယ်မှာရှိတဲ့ သတ္တဝါတစ်ကောင်ရဲ့ သက်တမ်းကို တိုးမြှင့်ဖို့ နည်းလမ်းတွေက တန်ဖိုးကြီးပြီး ရှားပါးတယ်... ကျွန်မက လွန်ခဲ့တဲ့ နှစ်နှစ်ကမှ မိစ္ဆာသခင် ဖြစ်လာတာဆိုတော့ အဲဒီလို နည်းစနစ်မျိုးတွေကို မသိဘူး... ဧကရီကတော့ သိကောင်း သိနိုင်တယ်... သူမ ထွက်လာရင် ရှင် မေးကြည့်လို့ ရပါတယ်"

ထိုစဉ် သူမက တစ်ခုခုကို ရုတ်တရက် သတိရသွားပြီး ဆက်ပြောလိုက်၏။

"ကျွန်မတို့ မိစ္ဆာမျိုးနွယ်စုမှာ မြေခွေးမျိုးနွယ်စုက ရှည်လျားတဲ့ အမွေအနှစ်နဲ့ နက်ရှိုင်းတဲ့ အခြေခံအုတ်မြစ် ရှိတဲ့ မျိုးနွယ်စုကြီး တစ်ခုပဲ... လဝက်နေရင် ကျိုကွမ်းက ကုန်သည်ယာဉ်တန်းကို ဦးဆောင်ပြီး တောင်တန်းအပြင်ဘက်ကို ထွက်လိမ့်မယ်... မိစ္ဆာမိတ်ဆွေမှာ အားလပ်ချိန် ရှိရင် လိုက်သွားကြည့်ပါလား... အဲဒီမှာ မြေခွေးမျိုးနွယ်စုရဲ့ စခန်းတစ်ခု ရှိတယ်… ရှင် ကံစမ်းကြည့်လို့ ရနိုင်တယ်"

"သတိပေးတဲ့အတွက် ကျေးဇူးတင်ပါတယ် ကျောင်းအုပ်ကြီး... ရှောင်ကွမ်း မှတ်ထားပါ့မယ်"

သူက ကျေးဇူးတင်စကားဆိုရန် အရိုအသေပေးလိုက်ပြီး ကျောင်းအုပ်ကြီး၏ လိုက်ပို့မည့် အစီအစဉ်ကို ငြင်းပယ်လိုက်၏။ ဖူရှောင်ကွမ်းက မိစ္ဆာအုပ်ချုပ်ရေးရုံးတစ်လျှောက် တစ်ယောက်တည်း လျှောက်သွားခဲ့ပြီး သူ၏ ပုံရိပ်က တဖြည်းဖြည်း မှုန်ဝါးသွားသည်။ နည်းပြများ၏ နေထိုင်ရာ အဆောင်များကို ဖြတ်သွားစဉ် ဆူညံနေသော အသံများက သူ၏ နားထဲသို့ ဝင်ရောက်လာ၏။

"မလုနဲ့... မလုနဲ့... ဒါက မိစ္ဆာသခင် ရှောင်ကွမ်းရဲ့ ကိုယ်ပိုင် လက်ရေးဟ"

"အို... ကောင်းပါပြီဗျာ... မင်းတို့ မိစ္ဆာသောက်ကောင်လေး နှစ်ကောင် သတိထားနော်... မင်းတို့ အဲဒါကို ဖျက်ဆီးမိရင် ဒီအဘိုးကြီးက မင်းတို့ကို အလွတ်ပေးမှာ မဟုတ်ဘူး"

"ငါတို့က ကြည့်ရုံတင် ကြည့်မှာပါ… ခိုးမှာမှ မဟုတ်တာ... ခင်ဗျား ကြည့်ရတာ ကြွားနေတာနဲ့ တူတယ်"

ဆိတ်အိုကြီး၏ အသံက အထူးတလည် ကျယ်လောင်နေပြီး ကြွားလုံးထုတ်ချင်သည့် လေသံ အနည်းငယ် ပါဝင်နေ၏။ ဖူရှောင်ကွမ်းက တစ်ချက် လှမ်းကြည့်လိုက်သည်။ ၎င်းက မနေ့ညက ဆန်းဝေ့စာအုပ်ဆိုင်တွင် ဆိတ်မိစ္ဆာအိုကြီးက သူ့ကို တောင်းဆိုခဲ့သော လက်ရေးစာမူ ဖြစ်၏။

မိစ္ဆာတစ်ကောင်က သူ့ကို လက်ရေးစာမူ တောင်းဆိုခြင်းမှာ ရှားပါးလှသဖြင့် ဖူရှောင်ကွမ်းက ရုတ်တရက် စိတ်ဝင်စားသွားခဲ့သည်။ ကုန်းရန်ယန်အတွက် သူက ကဗျာတိုလေး တစ်ပုဒ်ကိုပင် ကူးရေးပေးခဲ့သေး၏။

အဖြူရောင်အမွေးများက ခန္ဓာကိုယ်ကို နွေးထွေးစွာ ဖုံးအုပ်ထားပြီး

ဦးချိုနှစ်ချောင်းက ကွေးကောက်ကာ ရှည်လျားသည်။

စိမ်းလန်းသော စားကျက်များတွင် အေးအေးလူလူ လှည့်လည်ရင်း

ဆိတ်မြည်သံများက အမိုးတန်းများတစ်လျှောက် ပဲ့တင်ထပ်နေ၏။

"မိစ္ဆာသခင် ရှောင်ကွမ်းရဲ့ လက်ရေးပီသပါပေတယ်... ဒီစာလုံးလေးတွေကို ကြည့်လိုက်စမ်းပါ... တကယ့်ကို ထူးခြားဆန်းကြယ်ပြီး တုနှိုင်းမဲ့ပဲ"

"ဒါက ငါတို့ မိစ္ဆာငယ်လေးတွေ နားမလည်နိုင်တဲ့ အလှတရား တစ်မျိုး တကယ် ရှိနေတာပဲ... ကြည့်စမ်း… ဒီအလျားလိုက်မျဉ်းက အလျားလိုက်မျဉ်းပဲ… ဒီဒေါင်လိုက်မျဉ်းက ဒေါင်လိုက်မျဉ်းပဲ… ဘယ်ဘက်ယိမ်းတာက ဘယ်ဘက်ယိမ်းတာပဲ… ညာဘက်ယိမ်းတာက ညာဘက်ယိမ်းတာပဲ… ပြီးတော့ အစက်က အစက်ပဲ... အားလုံးက အံဝင်ခွင်ကျ ဖြစ်နေတယ်… ဒါပေမဲ့ ပေါင်းစပ်လိုက်တဲ့အခါကျတော့ ငါတို့ လုံးဝ အတုခိုးလို့မရတဲ့ အရသာ တစ်မျိုး ရှိနေတယ်"

"အဲဒါနဲ့ ပတ်သက်လို့ ပြောရရင် ကျောင်းအုပ်ကြီးက အမြော်အမြင်နဲ့ ဉာဏ်ပညာမျက်စိ ရှိလို့ မိစ္ဆာသခင် ရှောင်ကွမ်းမှာ မဟာမိစ္ဆာ တစ်ကောင်ရဲ့ အလားအလာ ရှိတာကို မြင်ခဲ့တာပဲ... သူမက မိစ္ဆာသခင် ရှောင်ကွမ်းရဲ့ လက်ရေးစာမူတွေကို ကြိုတင်ပြီး အတော်များများ စုဆောင်းခဲ့တာ... တကယ့်ကို အားကျစရာပဲ"

ဤနေရာသို့ ရောက်လာခဲ့သော ကျောင်းအုပ်ကြီး ဂျီမိုက တစ်ခုခုကို သတိရသွားပြီး သူမ၏ နှုတ်ခမ်းထောင့်များ တွန့်ချိတ်သွား၏။ သူမ ကူးယူပြီးနောက် မီးရှို့ပစ်ခဲ့သော လက်ရေးစာမူများကို တွေးမိပြီး သူမမှာ ဆွံ့အသွားကာ ထူးဆန်းစွာပင် နောင်တရမှုနှင့် နှမြောတသမှု အနည်းငယ်ကို ခံစားလိုက်ရသည်။

တကယ့်ကို ငရဲကိုးထပ် နတ်ဘုရားများကို မြင်တွေ့လိုက်ရသလိုပင်။

ဖူရှောင်ကွမ်းလည်း အလားတူပင် ဆွံ့အသွား၏။

သူ့ကိုယ်ပိုင် လက်ရေး ဘယ်လိုပုံစံ ရှိသလဲဆိုတာ သူ ဘယ်လိုလုပ် မသိဘဲ နေမည်နည်း။

သူ့ကို အရှက်အကြောက်ကင်းမဲ့စွာ မြှောက်ပင့်နေကြသော ဤနည်းပြများက ရှက်ရွံ့ခြင်း မရှိကြသလို သူကလည်း သူတို့အတွက် ပျော်ရွှင်နေမိသည်။ သူတို့တွင် ဤမျှလောက် အမြင်ရှိပြီး ဤမျှလောက် ထိုးထွင်းသိမြင်နိုင်စွမ်း ရှိကြပေသည်။

သာယာသော စိတ်အခြေအနေဖြင့် ဖူရှောင်ကွမ်းက အဝေးသို့ ပျံသန်းသွား၏။ ကျောင်းအုပ်ကြီး ဂျီမိုအနီးမှ ဖြတ်သွားစဉ် သူမ၏ မျက်လုံးများက သံသယဖြစ်ဖွယ် အမူအရာ ပြသနေပြီး ပတ်ဝန်းကျင်ကို သေချာစွာ လိုက်ကြည့်နေသည်။ အခြားမည်သည့်အရာမှ မတွေ့ရသဖြင့် သူမက အခန်းထဲသို့ ဝင်သွားတော့သည်။

***

Book List