Book List

<h2 style="text-align: center;">အခန်း (၁၂၇)</h2> <h2 style="text-align: center;">မြေအောက် မိစ္ဆာဈေးတန်း၏ သခင်</h2> <h2 style="text-align: center;">*</h2> <p> </p> <p style="text-align:justify">အဘိုးအိုကို ကြည့်ရင်း ဖူရှောင်ကွမ်း၏ အကြည့်များထဲတွင် အံ့သြချီးကျူးမှုများ ပြည့်နှက်နေ၏။ ဤသူက လှေငယ်လေး တစ်စင်းမှ အသွင်ပြောင်းလာသော မဟာမိစ္ဆာ တစ်ကောင် ဖြစ်နေသည်။</p> <p style="text-align:justify">စိတ်ဝင်စားစရာပဲ...</p> <p style="text-align:justify">မိစ္ဆာသခင်မ ကျိုကွမ်းက စကားပြောဆိုရန် ရှေ့သို့ ထွက်သွားသည်ကို မြင်သောအခါ သူ၏ ကျောဘက်မှ အတောင်ပံများ ထွက်ပေါ်လာပြီး နွားစိမ်း၏ ကျောပေါ်မှ ထွက်ခွာကာ ကမ်းစပ်ဆီသို့ ပျံသန်းသွား၏။</p> <p style="text-align:justify">နွားစိမ်းမိစ္ဆာမှာ စိတ်ပျက်သွားသည့်ပုံ ပေါ်သည်။ မိစ္ဆာသခင် တစ်ပါးကို တင်ဆောင်ခွင့် ရခြင်းက ဂုဏ်ယူစရာ ဖြစ်သော်လည်း ထိုပျော်ရွှင်မှုက တိုတောင်းလွန်းလှသည်။</p> <p style="text-align:justify">"အိုး... မိစ္ဆာမိတ်ဆွေ ကျိုကွမ်းက ဒီတစ်ခါ မိစ္ဆာမိတ်ဆွေသစ် တစ်ယောက်ကို ခေါ်လာတာကိုး... မိစ္ဆာသခင် မီးလျှံနီကို မတွေ့ရတာ အံ့သြစရာ မဟုတ်တော့ဘူး"</p> <p style="text-align:justify">ပျံသန်းလာသော ငွေရောင်ဆံပင်နှင့် လူငယ်လေးကို မြင်လျှင် အဘိုးအိုကလည်း အလားတူ အံ့သြသွားပြီး ပြုံးဖြီးဖြီးဖြင့် ပြောလိုက်၏။</p> <p style="text-align:justify">"ဒီအဘိုးကြီး လှေသမားအိုက မိစ္ဆာမိတ်ဆွေကို နှုတ်ခွန်းဆက်ပါတယ်"</p> <p style="text-align:justify">မြေပြင်ပေါ်သို့ ဆင်းသက်လိုက်သည်နှင့် ဖူရှောင်ကွမ်းက ချက်ချင်း ပြန်လည် နှုတ်ခွန်းဆက်လိုက်သည်။</p> <p style="text-align:justify">"ရှောင်ကွမ်းက လှေသမားအိုကြီးကို နှုတ်ခွန်းဆက်ပါတယ်"</p> <p style="text-align:justify">"မိစ္ဆာမိတ်ဆွေ ရှောင်ကွမ်းက ယူနန် မိစ္ဆာဈေးတန်းကို ပထမဆုံးအကြိမ် ရောက်ဖူးတာဆိုတော့ သေချာ လေ့လာကြည့်ရှုသင့်တယ်... မင်း စိတ်ပျက်ရမှာ မဟုတ်ဘူးလို့ ငါ အာမခံတယ်"</p> <p style="text-align:justify">"ကျေးဇူးတင်ပါတယ် လှေသမားအိုကြီး... ရှောင်ကွမ်း သေချာ လေ့လာကြည့်ရှုပါ့မယ်"</p> <p style="text-align:justify">ဤနေရာက စကားပြောရန် သင့်တော်သော နေရာ မဟုတ်ပေ။ ရိုးရှင်းသော နှုတ်ခွန်းဆက်စကားများ အနည်းငယ် ပြောဆိုပြီးနောက် လှေသမားအိုကြီးက မိစ္ဆာများကို လှေပေါ်တက်ရန် ခေါ်လိုက်၏။</p> <p style="text-align:justify">ကျိုကွမ်းက သူမ၏ အလံများကို သိမ်းဆည်းလိုက်ပြီး ပထမဆုံး တက်သွားသည်။ လှေပေါ်သို့ ရောက်သည်နှင့် သူမက သုံးလက်မခန့်သာ မြင့်သော ပုံသဏ္ဌာန်သို့ ပြောင်းလဲသွား၏။ အခြားမိစ္ဆာများကလည်း နောက်မှ လိုက်ပါသွားကြပြီး အလားတူပင် သုံးလက်မအရွယ်သို့ ကျုံ့ဝင်သွားကြသည်။</p> <p style="text-align:justify">ပထမဆုံးအကြိမ် ရောက်ဖူးသော မိစ္ဆာများက ထိုမြင်ကွင်းကို ကြည့်ပြီး အံ့သြမှင်တက်နေကြ၏။</p> <p style="text-align:justify">ဖူရှောင်ကွမ်း၏ မျက်လုံးများလည်း ပွင့်ကျယ်သွားသည်။ ဤမျှ နက်နဲဆန်းကြယ်သော နည်းလမ်းများကို မြင်တွေ့ရသည်မှာ တန်လှပေသည်။</p> <p style="text-align:justify">ကုန်သည်ယာဉ်တန်းနှင့်အတူ တောင်တန်းမှ မထွက်ခွာမီက သူက သတင်းအချက်အလက်များကို မမေးမြန်းခဲ့ဘဲ ကြုံတွေ့လာနိုင်သည့် အန္တရာယ်များအတွက်သာ ပြင်ဆင်ခဲ့၏။ အံ့သြဖွယ်ရာက ဤနေရာတွင် ရှိနေသည်။ ကိုယ်တိုင်ကိုယ်ကျ ကြုံတွေ့ခံစားရမှသာလျှင် သိမ်မွေ့သော ဆွဲဆောင်မှုကို ခံစားသိရှိနိုင်မည် ဖြစ်သည်။</p> <p style="text-align:justify">မိစ္ဆာများအားလုံး လှေပေါ်သို့ တက်ပြီးသွားသောအခါ ဖူရှောင်ကွမ်းက နောက်ဆုံးမှ ဆင်းသွား၏။ လျှို့ဝှက်ဆန်းကြယ်သော စွမ်းအားတစ်ခုက သူ့ကို ရစ်ပတ်လွှမ်းခြုံသွားပြီး သူ၏ ခန္ဓာကိုယ်က ချက်ချင်းပင် သုံးလက်မအရွယ်သို့ ကျုံ့ဝင်သွားတော့သည်။</p> <p style="text-align:justify">ဤစွမ်းအားက ရေကဲ့သို့ နူးညံ့ပြီး သူ၏ မိစ္ဆာခန္ဓာကိုယ်ကို မထိခိုက်စေပေ။ သူက အလွယ်တကူ ရုန်းထွက်နိုင်ပြီး သူ၏ ပုံမှန် အရွယ်အစားသို့ ပြန်လည် ပြောင်းလဲနိုင်၏။ မိစ္ဆာသခင် တစ်ပါးအတွက်တော့ စိတ်ဆန္ဒတစ်ခုသာ ဖြစ်သည်။</p> <p style="text-align:justify">ဖူရှောင်ကွမ်းက ခုခံဆန့်ကျင်ခြင်း မပြုခဲ့ပေ။ သူက နားလည်မှုလွဲမှားခြင်း မရှိစေရန် ဒေသခံ စည်းမျဉ်းများကို လိုက်နာမည်သာ ဖြစ်၏။</p> <p style="text-align:justify">နေရာတကျ ဖြစ်သွားသောအခါ သူက လှေဦးပိုင်းအနီးတွင် ပန်းကန်လုံးအရွယ်ခန့်ရှိသော အပေါက်တစ်ခုကို သတိထားမိလိုက်သည်။ ပထမဆုံး ရောက်ဖူးသော အခြားသူများကလည်း ထိုအပေါက်ကို သတိထားမိသွားကြပြီး အားလုံး စိုးရိမ်ပူပန်လာကြ၏။</p> <p style="text-align:justify">လှေသမားအိုကြီးက ရယ်မောလိုက်သည်။</p> <p style="text-align:justify">"စိတ်မပူပါနဲ့ ဂုဏ်သရေရှိ ဧည့်သည်တော်တို့... ငါ့လှေမှာ အပေါက်တစ်ခု ရှိနေပေမဲ့ တကယ်တော့ သိပ်ကို ဘေးကင်းပြီး တည်ငြိမ်ပါတယ်... ဒီမြစ်ငယ်လေးကို ထားလိုက်ပါဦး… ယွီမြစ်ပေါ်မှာ အသွားအပြန် ခရီးသွားရင်တောင် ပြဿနာ မရှိပါဘူး... အနာဂတ်မှာ လေပြင်းနဲ့ လှိုင်းတံပိုးတွေကို ရင်ဆိုင်ပြီး ဒီလှေငယ်လေးကို သမုဒ္ဒရာကြီးဆီ ရွက်လွှင့်သွားဖို့ ငါ စီစဉ်ထားတယ်"</p> <p style="text-align:justify">သူတို့၏ အပေါင်းအပါများနှင့် မိစ္ဆာသခင် နှစ်ပါးက တည်ငြိမ်နေသည်ကို မြင်သောအခါ စိုးရိမ်နေကြသော မိစ္ဆာငယ်များက သူတို့၏ စိုးရိမ်ပူပန်မှုများကို ယာယီ ဘေးဖယ်ထားလိုက်ကြပြီး လှေသမားအိုကြီး၏ စကားများကြောင့် စိတ်သက်သာရာ ရသွားပုံပေါ်၏။</p> <p style="text-align:justify">လှေသမားအိုကြီးက တက်ကို လှော်လိုက်သည်နှင့် သူတို့ အနောက်ဘက်ရှိ သိပ်သည်းသော မြူခိုးများက ရှေ့သို့ အလုအယက် ပြေးသွားသကဲ့သို့ တဖြည်းဖြည်း ပျံ့လွင့်သွား၏။ မြူခိုးများက သိပ်သည်းလှပြီး တိမ်ပင်လယ်တစ်ခုကို ဖြတ်သန်းသွားရသကဲ့သို့ ဖြစ်နေသည်။ နောက်ပိုင်းတွင် ရေစီးသံကိုသာ ကြားရတော့ပြီး လှေအောက်ရှိ စမ်းချောင်းကို မမြင်ရတော့ဘဲ သူတို့က လေထဲတွင် တကယ်ပဲ ဝဲပျံနေသကဲ့သို့ ဖြစ်နေတော့၏။</p> <p style="text-align:justify">လူသားတစ်ပိုင်း အသွင်ပြောင်းထားသော တောဝက်မိစ္ဆာမလေး တစ်ကောင်က သူမ၏ အောက်ပိုင်းမှ စိုစွတ်မှုကို ခံစားလိုက်ရသည့် အချိန်အထိပင်။ သူမ၏ ခန္ဓာကိုယ်ထဲတွင် ကြက်သီးမွေးညင်း ထသွား၏။ သူမက မျက်တောင် ပုတ်ခတ်ပုတ်ခတ် လုပ်ပြီး သေချာ ကြည့်လိုက်ရာ ရုတ်တရက် သုံးပေခန့် အမြင့်သို့ ခုန်တက်သွားပြီး စူးရှသော အော်ဟစ်သံကြီးတစ်ခု ထွက်ပေါ်လာတော့သည်။</p> <p style="text-align:justify">"ရေယိုနေပြီ... ရေယိုနေပြီ"</p> <p style="text-align:justify">ပထမဆုံးအကြိမ် ရောက်ဖူးသော မိစ္ဆာအချို့မှာ ချက်ချင်းပင် အထိတ်တလန့် ဖြစ်သွားကြ၏။</p> <p style="text-align:justify">"တိတ်တိတ်နေစမ်း... အဲဒီလောက် ပြာယာခတ် မနေနဲ့"</p> <p style="text-align:justify">မိစ္ဆာသခင်မ ကျိုကွမ်းက ဆူပူလိုက်သည်။</p> <p style="text-align:justify">မိစ္ဆာသခင်မ ကျိုကွမ်း၏ ပြောဆိုမှုကြောင့် မိစ္ဆာများမှာ ငြိမ်ကျသွား၏။ သူတို့၏ အခြား အပေါင်းအပါများက သူတို့ကို ပြုံးစိစိဖြင့် ကြည့်နေပြီး သူတို့၏ မျက်လုံးများထဲတွင် သိနားလည်သည့် အရိပ်အယောင်များ ရှိနေသည်ကို မြင်သောအခါ ရေများက ပွက်ပွက်ဆူ၍ ဝင်လာနေသော်လည်း သူတို့၏ ခြေကျင်းဝတ်အထိသာ ရောက်ရှိကြောင်း သတိထားမိသွားကြသည်။</p> <p style="text-align:justify">သူတို့၏ မျက်နှာများမှာ နီရဲသွားပြီး ချက်ချင်းပင် တိတ်တဆိတ် ထိုင်ချလိုက်ကြ၏။</p> <p style="text-align:justify">အရှက်ကြီးသော မျောက်မိစ္ဆာ တစ်ကောင်ကတော့ သူ၏ ခေါင်းကို ရင်ခွင်ထဲ အတင်း ဝှက်ထားပြီး အလွန်အမင်း ရှက်ရွံ့နေပုံပေါ်ကာ သူ၏ နီရဲနေသော တင်ပါးများက ပို၍ပင် အာရုံစိုက်ခံနေရသည်ကို သတိမထားမိချေ။</p> <p style="text-align:justify">လှေသမားအိုကြီးက တက်လှော်ရင်း အားရပါးရ ရယ်မောလိုက်သည်။</p> <p style="text-align:justify">"အနှစ်သုံးရာအတွင်းမှာ ယွီတောင်တန်း ကုန်သည်ယာဉ်တန်းကို အကြိမ်ပေါင်းများစွာ ငါ ပို့ပေးခဲ့ဖူးတယ်... ဒီမြင်ကွင်းကို မကြာခဏ မြင်ရပေမဲ့ ငါ ဘယ်တော့မှ မငြီးငွေ့ဘူး... အမြဲတမ်း ရယ်စရာ အသစ်တွေကို တွေ့ရတယ်… တကယ့်ကို အံ့သြစရာ ကောင်းတယ်"</p> <p style="text-align:justify">လှေသမားအိုကြီးက ပို၍ပို၍ ပြောလာ၏။</p> <p style="text-align:justify">"ဒါက ယွီတောင်တန်း ကုန်သည်ယာဉ်တန်းရဲ့ အစဉ်အလာ တစ်ခု ဖြစ်နေတာ ကြာပါပြီ... ဒါကို ဖြတ်သန်းဖူးမှသာ ကုန်သည်ယာဉ်တန်းရဲ့ တကယ့် အဖွဲ့ဝင် တစ်ယောက် ဖြစ်လာနိုင်တာလေ... အဲဒီတုန်းက မိစ္ဆာမိတ်ဆွေ ကျိုကွမ်းက အတော်လေး ကြောက်လန့်သွားခဲ့တာ ငါ မှတ်မိသေးတယ်... သူမက ငါ့ဆီကို တန်းတန်းမတ်မတ် ပြေးလာပြီး ငါ့မုတ်ဆိတ်မွေး တစ်ပင်ကိုတောင် ဆွဲနှုတ်သွားသေးတယ်"</p> <p style="text-align:justify">လှေသမားအိုကြီး၏ နောက်ပြောင်မှုနှင့် သူမ၏ အတိတ်က အရှက်ကွဲခဲ့ရသည့် ကိစ္စကို ထည့်ပြောလိုက်မှုကြောင့် မိစ္ဆာသခင်မ ကျိုကွမ်း၏ မျက်နှာက နီရဲသွားတော့၏။ သူမဘေးတွင် ဖူရှောင်ကွမ်းက စိတ်ဝင်တစား နားထောင်နေသည်ကို သတိထားမိသွားသဖြင့် သူမက စကားလမ်းကြောင်းကို အလျင်အမြန် လွှဲလိုက်ပြီး တမင်တကာ အသံကျယ်ကျယ်ဖြင့် ပြောလိုက်သည်။</p> <p style="text-align:justify">"မိစ္ဆာမိတ်ဆွေ ရှောင်ကွမ်း... ရှင်လည်း ပထမဆုံးအကြိမ် ရောက်ဖူးတာပဲ... ရှင်က ဘာလို့ မကြောက်တာလဲ"</p> <p style="text-align:justify">ဤမေးခွန်းက အနည်းငယ် မိုက်မဲနေပြီး မိစ္ဆာသခင်မ ကျိုကွမ်း၏ ပုံမှန် စံနှုန်းနှင့် မကိုက်ညီပေ။</p> <p style="text-align:justify">ဖူရှောင်ကွမ်းက သူမကို တစ်ချက် ကြည့်လိုက်သော်လည်း သူမ၏ အတွေးများကို ဖော်ထုတ်မပြဘဲ လိုက်လျောညီထွေ ပြောလိုက်၏။</p> <p style="text-align:justify">"ခင်ဗျားက အရင်က ရောက်ဖူးပြီး ဒါကို ကြုံဖူးပြီးသားဆိုတော့ ကျွန်တော်က ခင်ဗျားကို ယုံကြည်လို့ပေါ့"</p> <p style="text-align:justify">ထိုစကားများ ကြားလိုက်ရချိန်တွင် မိစ္ဆာသခင်မ ကျိုကွမ်းက ပြုံးလိုက်ရာ ပါးချိုင့်နှစ်ခု ထွက်ပေါ်လာ၏။</p> <p style="text-align:justify">လှေသမားအိုကြီးကလည်း သူ၏ မုတ်ဆိတ်မွေးကို သပ်ရင်း ရယ်မောလိုက်သည်။</p> <p style="text-align:justify">"စကားပြော ကောင်းလိုက်တဲ့ မိစ္ဆာမိတ်ဆွေပါလား... မင်းရဲ့ ရုပ်ရည်နဲ့ ကျင့်ကြံမှုအပြင် ဒီလို စကားအရာ ကြွယ်ဝမှုနဲ့ဆိုရင် အနာဂတ်မှာ မိစ္ဆာမလေး ဘယ်နှကောင်ကိုများ ဖမ်းစားနိုင်မလဲ မသိဘူး"</p> <p style="text-align:justify">တစ်ခဏမျှ စဉ်းစားပြီးနောက် သူက ဆက်ပြော၏။</p> <p style="text-align:justify">"မင်းရဲ့ ပါရမီနဲ့ ရုပ်ရည်သွင်ပြင်အရဆိုရင် ငါတို့ မိစ္ဆာမျိုးနွယ်စုရဲ့ အကျိုးအတွက် မျိုးဆက်တွေ အများကြီး မွေးထုတ်ပေးသင့်တယ်"</p> <p style="text-align:justify">ထိုစကားကို ကြားသောအခါ ဖူရှောင်ကွမ်းက ဘာမှ မတုံ့ပြန်ရသေးပေ။</p> <p style="text-align:justify">မိစ္ဆာသခင်မ ကျိုကွမ်းက မျိုးဆက်ပွဲတော် မတိုင်မီ ဤမိစ္ဆာမိတ်ဆွေ လုပ်ခဲ့သော ရယ်စရာ ကိစ္စများကို တွေးမိပြီး တခစ်ခစ် မရယ်ဘဲ မနေနိုင်တော့ချေ။</p> <p style="text-align:justify">...</p> <p style="text-align:justify">သိပ်သည်းသော မြူခိုးများက လှိုင်းထနေ၏။</p> <p style="text-align:justify">ထိုမြူခိုးများကို တက်များက မွှေနှောက်လိုက်ခြင်းလား သို့မဟုတ် ရယ်မောသံများကြောင့်လား၊ ဒါမှမဟုတ် နှစ်ခုစလုံးကြောင့်လားဆိုတာကိုတော့ ရှင်းရှင်းလင်းလင်း မသိရပေ။</p> <p style="text-align:justify">တစ်ခဏအတွင်းမှာပင် မြူခိုးများ ကင်းစင်သွားပြီး လှေက ဧရာမ တိမ်ဖြူကြီး တစ်ခုထဲမှ ရွက်လွှင့်ထွက်လာသကဲ့သို့ ဖြစ်သွား၏။ ရှေ့မှ မြင်ကွင်းက ရုတ်တရက် ပွင့်လင်းသွားပြီး ရှုခင်းများက ကြည်လင်ပြတ်သားလာသည်။</p> <p style="text-align:justify">သူတို့က ရေဂူတစ်ခုထဲသို့ အမှန်တကယ် ဝင်ရောက်လာခဲ့ပြီ ဖြစ်၏။</p> <p style="text-align:justify">လှေသမားအိုကြီးက မိတ်ဆက်ပေးလိုက်သည်။</p> <p style="text-align:justify">"ယူနန် မြေအောက် မိစ္ဆာဈေးတန်းမှာ ဝင်ပေါက် နှစ်ခု ရှိတယ်… တစ်ခုက မြို့ထဲမှာ ရှိပြီး တစ်ခုက အပြင်မှာ ရှိတယ်... အတွင်းက တစ်ခုက ကုန်းလမ်း ဖြစ်ပြီး ငါ့ရဲ့ စီရင်ပိုင်ခွင့်အောက်မှာ မရှိဘူး... ငါက မြို့ပြင်က ဒီရေလမ်းအတွက် တာဝန်ယူရတာပါ... အားလုံးပဲ အဆင်သင့် ပြင်ထားကြပါ… ငါတို့ ရောက်တော့မယ်"</p> <p style="text-align:justify">ဂူက စိုစွတ်နေပြီး နံရံများမှ ရေများ မကြာခဏ ကျဆင်းနေ၏။ သူတို့ပတ်လည်တွင် နံရံဆေးရေးပန်းချီ အချို့ကို ထွင်းထုထားပြီး ရေးဆွဲထားသော မျဉ်းကြောင်းများက အနည်းငယ် ကြမ်းတမ်းနေသည်။</p> <p style="text-align:justify">ဖူရှောင်ကွမ်းက သေချာ ကြည့်လိုက်ရာ ထိုပန်းချီများက မြေအောက် မိစ္ဆာဈေးတန်း၏ သမိုင်းကြောင်းကို ပြောပြနေပုံရ၏။ ပုံများထဲတွင် စားပွဲများ၊ ကုလားထိုင်များအပါအဝင် ခုံတန်းလျားများနှင့် ဆင်တူသော ထူးဆန်းသည့် ပုံပန်းသဏ္ဌာန်ရှိသည့် မိစ္ဆာများစွာ ပါဝင်သည်။</p> <p style="text-align:justify">ပုံစံအများစုတွင် ရွှေရောင်အလင်းတန်းတစ်ခု ပါဝင်ပြီး အချို့က နက်ရှိုင်းကာ အချို့က ဖျော့တော့သည်။ အချို့က ထူထဲကာ အချို့က ပါးလွှာသည်။ အချို့က ကြီးမားကာ အချို့က သေးငယ်၏။</p> <p style="text-align:justify">ထိုရွှေရောင်အလင်းတန်းက ဘာလဲဆိုတာကို သူ သိသည်။</p> <p style="text-align:justify">ဖူရှောင်ကွမ်းက ယူနန် မြေအောက်မိစ္ဆာဈေးတန်းသို့ မလာမီ ကျောင်းအုပ်ကြီး ဂျီမိုနှင့် စကားပြောဆိုခဲ့ပြီး အများကြီး သိရှိခဲ့ရ၏။ နောက်ပိုင်းတွင် ကျိုကွမ်းထံမှလည်း အတည်ပြုချက် ရရှိခဲ့သည်။ ယွီတောင်တန်း တစ်လျှောက်ရှိ ခရိုင်သုံးခုရှိ မြေအောက် မိစ္ဆာဈေးတန်း၏ သခင်မှာ ဓမ္မနယ်ပယ်၏ ဆဋ္ဌမမြောက် ကောင်းကင်ဘုံအဆင့် ရွှေဖားပြုတ် တစ်ကောင် ဖြစ်သည်။</p> <p style="text-align:justify">သို့သော်လည်း ဤရွှေဖားပြုတ်က အခြားသော ရွှေဖားပြုတ်များနှင့် မတူပေ။</p> <p style="text-align:justify">ဤမဟာမိစ္ဆာက ကံကောင်းခြင်းများကို ဆွဲဆောင်ပေးသော ရွှေဖားပြုတ် အလှပြပစ္စည်းတစ်ခု ဖြစ်ပြီး တဖြည်းဖြည်း အသိဉာဏ် ပွင့်လင်းလာခဲ့သည်ဟု ဆိုကြ၏။ သူ၏ ဘဝတွင် အပြင်းပြဆုံး ဆန္ဒမှာ ငွေရှာရန် ဖြစ်ပြီး အကြီးမားဆုံး ဆန္ဒမှာ စစ်မှန်သော ခြေသုံးချောင်း ရွှေဖားပြုတ် တစ်ကောင် ဖြစ်လာရန် ဖြစ်သည်။</p> <p style="text-align:justify">လွန်ခဲ့သော နှစ်တစ်ရာက ဤမဟာမိစ္ဆာက ယွီတောင်တန်း၏ နက်ရှိုင်းသော နေရာသို့ သွားရောက်ကာ ဧကရီယွီလီထံ အထူးတလည် သွားရောက် ဂါရဝပြုခဲ့ပြီး မိစ္ဆာမျိုးနွယ်စု၏ ကျင့်ကြံခြင်း လမ်းကြောင်းနှင့် အသွင်ပြောင်းခြင်း နည်းလမ်းများကို လမ်းညွှန်မှု တောင်းခံခဲ့၏။</p> <p style="text-align:justify">တောင်တန်းမှ ထွက်ခွာပြီးနောက် သူက ယူနန် မြေအောက်မိစ္ဆာဈေးတန်းကို တည်ထောင်ခဲ့ပြီး ဧကရီယွီလီကလည်း ယွီတောင်တန်း မိစ္ဆာဈေးတန်းကို တည်ထောင်ကာ သူတို့အချင်းချင်း ကုန်ပစ္စည်းများ ဖလှယ်ခွင့် ပြုခဲ့သည်။</p> <p style="text-align:justify">ဘာမှမရှိရာမှ ဧရာမ စီးပွားရေး လုပ်ငန်းကြီး တစ်ခုကို တည်ဆောက်ခဲ့ခြင်းကြောင့်ရော၊ သက်မဲ့အရာဝတ္ထုတစ်ခု ဖြစ်ပါလျက်နှင့် အသိဉာဏ် ပွင့်လင်းလာခြင်းတို့ကြောင့် သူက သက်ရှိသတ္တဝါများထက် ကျင့်ကြံရာတွင် အများကြီး ပိုမို ခက်ခဲသည်။</p> <p style="text-align:justify">အမွေအနှစ် သို့မဟုတ် သွေးကြောဆက်ခံမှု မရှိဘဲ ဤမျှ အဆင့်မြင့်မားသော နေရာသို့ ရောက်ရှိလာခြင်းကြောင့် ဖူရှောင်ကွမ်းက ဤရွှေဖားပြုတ်မိစ္ဆာကို အလွန်အမင်း လေးစားအားကျမိ၏။ သူက တကယ့်ကို ချီးကျူးထိုက်ပေသည်။</p> <p style="text-align:justify">ဤအကြောင်းကို ကြားပြီးနောက် ဖူရှောင်ကွမ်း၏ ယုံကြည်မှုက ကြီးထွားလာခဲ့သည်။ သူက ရွှေဖားပြုတ်ကဲ့သို့ ဆဋ္ဌမမြောက် ကောင်းကင်ဘုံအဆင့်သို့ တက်လှမ်းနိုင်ရုံသာမက သူ့ကို ကျော်လွန်၍ သတ္တမမြောက် ကောင်းကင်ဘုံအဆင့် မိစ္ဆာဘုရင် တစ်ပါး ဖြစ်လာနိုင်မည်ဟု အခိုင်အမာ ယုံကြည်နေ၏။</p> <p style="text-align:justify">သူ၏ အတွေးများ မြင့်တက်လာစဉ် လှေက ရေဂူထဲမှ ရွက်လွှင့်ထွက်လာသည်။ ဖောက်ထွင်းမြင်ရသော ရေကန့်လန့်ကာ တစ်လွှာကို ဖြတ်သန်းသွားသောအခါ စည်ကားသိုက်မြိုက်သော အသံများက သူ၏ နားထဲသို့ ရောက်ရှိလာ၏။</p> <p style="text-align:justify">မြင်းဟီသံ၊ မြည်းအော်သံ၊ ခွေးဟောင်သံ၊ ကြက်တွန်သံ၊ နွားအော်သံနှင့် ဘဲအော်သံများ ဖြစ်ကြသည်။</p> <p style="text-align:justify">လူသားများ၏ စကားပြောသံများနှင့် တိရစ္ဆာန်မျိုးစုံ၏ အော်သံများလည်း ရှိနေ၏။</p> <p style="text-align:justify">သင်္ဘောများ ဆိုက်ကပ်သံနှင့် ကုန်ပစ္စည်းများ သယ်ယူပို့ဆောင်သံများလည်း ရှိသည်။</p> <p style="text-align:justify">အကွေ့တစ်ခုကို ကျော်လွန်သွားသောအခါ မြင်ကွင်းက ကျယ်ပြန့်သွားပြီး ဆိပ်ခံတံတားငယ်လေးတစ်ခုက မြင်ကွင်းထဲသို့ ဝင်ရောက်လာ၏။</p> <p style="text-align:justify">ခရီးသည်တင် သင်္ဘောများနှင့် ကုန်တင်သင်္ဘောများက ရှုပ်ယှက်ခတ်နေသည်။ ပုရွက်ဆိတ် အလုပ်သမားများက ကူးတို့ဆိပ်တွင် ကုန်ပစ္စည်းများကို အတင်အချ လုပ်ရင်း အလုပ်ရှုပ်နေကြ၏။ ဘဲမိစ္ဆာ တစ်ကောင်က ဆရာကြီးလုပ်ကာ အမိန့်များ ပေးနေပြီး ခွေးမိစ္ဆာ တစ်ကောင်က အလုပ်သမားများ တစ်ခုခု ဖွက်ထားခြင်း ရှိမရှိ သေချာစွာ စစ်ဆေးရင်း ဟိုဟိုဒီဒီ အနံ့ခံနေသည်။</p> <p style="text-align:justify">လက်ဖက်ရည်ကြက်ဥ ရောင်းနေသော ကြက်မိစ္ဆာ တစ်ကောင်၊ ယန်ချွန်းခေါက်ဆွဲ ရောင်းနေသော ဝက်မိစ္ဆာ တစ်ကောင်၊ တိုဟူးနှင့် ပေါက်စီကင် ရောင်းနေသော မြည်းမိစ္ဆာ တစ်ကောင်နှင့် လမ်းပြအဖြစ် ဧည့်သည်များကို ဆွဲဆောင်နေသော မြင်းမိစ္ဆာ တစ်ကောင်တို့လည်း ရှိနေ၏။ ၎င်းက နေ့စဉ်ဘဝ၏ လေထုနှင့် ပြည့်နှက်နေသော အလုပ်များပြီး စည်ကားသိုက်မြိုက်သည့် မြင်ကွင်းတစ်ခု ဖြစ်သည်။</p> <p style="text-align:justify">ယွီတောင်တန်း မိစ္ဆာဈေးတန်းနှင့် အနည်းငယ် ကွဲပြားသော ဤရှုခင်းက ဖူရှောင်ကွမ်းကို စူးစမ်းချင်စိတ် ဖြစ်ပေါ်စေပြီး အနည်းငယ်ပင် စိတ်သက်သာရာ ရသွားစေ၏။ ဖြစ်နိုင်သည်မှာ သူက စည်ကားသိုက်မြိုက်မှုကြောင့် ငြိမ်းချမ်းသွားခြင်း၊ သာမန်ဘဝလေးကြောင့် နှစ်သိမ့်မှု ရရှိသွားခြင်း သို့မဟုတ် ဒဏ္ဍာရီလာ မြေအောက် မိစ္ဆာဈေးတန်းကို နောက်ဆုံးတွင် သူ မြင်တွေ့ခွင့် ရသွားသောကြောင့် ဖြစ်နိုင်ပေသည်။</p> <p style="text-align:justify">ဖူရှောင်ကွမ်း အတွေးရေယာဉ်ကြောထဲ နစ်မျောနေသည်ကို မြင်သောအခါ လှေသမားအိုကြီးက ဂုဏ်ယူဝင့်ကြွားစွာ ပြောလိုက်၏။</p> <p style="text-align:justify">"ယွီတောင်တန်းက မဟာယုံ မင်းဆက်ရဲ့ အစိတ်အပိုင်း တစ်ခုကို မြောက်မှ တောင်သို့ ဖြတ်သန်းသွားတယ်... လမ်းတစ်လျှောက်မှာ ရှိတဲ့ ခရိုင်သုံးခုရဲ့ မြေအောက် မိစ္ဆာဈေးတန်းတွေက အဲဒီကနေ အကျိုးအမြတ် ရရှိကြတယ်... မြစ်ကို ဆက်သွယ်ရေး လမ်းကြောင်းအဖြစ် အသုံးပြုပြီး ဖားပြုတ်သခင်ကြီးရဲ့ စွမ်းအားနဲ့ ယွီတောင်တန်း ဧကရီရဲ့ အကာအကွယ်ကို မှီခိုပြီး ယူနန်၊ ယွီပေနဲ့ ယွီဖုန်း မိစ္ဆာဈေးတန်းတွေက အချင်းချင်း ချိတ်ဆက်နေပြီး မြောက်နဲ့ တောင်ကို ဆက်သွယ်ပေးထားတယ်"</p> <p style="text-align:justify">"ဒါကြောင့် ယူနန် မြေအောက်မိစ္ဆာဈေးတန်းက လမ်းတစ်လျှောက်မှာရှိတဲ့ ပြည်နယ်နှစ်ခုမှာ အတော်လေး နာမည်ကြီးတယ်... တောင်တန်းတွေ၊ မြစ်တွေနဲ့ ရေကန်တွေက မိစ္ဆာအများအပြား ဒီကို လာပြီး ကုန်သွယ်ကြတယ်"</p> <p style="text-align:justify">ဖူရှောင်ကွမ်းက နားထောင်ကောင်းသူ တစ်ယောက်အဖြစ် တုံ့ပြန်သည့်အနေဖြင့် ခေါင်းညိတ်လိုက်၏။ သူက အတွေ့အကြုံ မရှိ၍တော့ မဟုတ်ပေ။ သူ၏ ယခင်ဘဝတွင် ဤထက် ပို၍ ခမ်းနားသော မြင်ကွင်းများကို သူ မြင်တွေ့ခဲ့ဖူးသည်။</p> <p style="text-align:justify">သို့သော်လည်း မိစ္ဆာမျိုးနွယ်စုအတွင်း ဤမြင်ကွင်းကို မြင်တွေ့ရခြင်းက များစွာသော ဆွဲဆောင်မှုကို တိုးပွားစေ၏။ သေချာ စဉ်းစားကြည့်ပါက ပါဝင်နေသော သိမ်မွေ့သည့် သဘောတရား အချို့ ရှိပြီး မှေးမှိန်နေသော်လည်း သေချာပေါက် တည်ရှိနေပေသည်။</p> <p style="text-align:justify">ဖြန်း… ဖြန်း...</p> <p style="text-align:justify">လှေသမားအိုကြီးက ဆက်လက် လှော်ခတ်နေမှုကြောင့် ရေလှိုင်းသံများ ထွက်ပေါ်လာ၏။ လမ်းတစ်လျှောက်ရှိ ခရီးသည်တင် လှေများက မျက်စိဖြင့် မမြင်နိုင်သော စွမ်းအားတစ်ခုက သူတို့ကို တွန်းဖယ်လိုက်သကဲ့သို့၊ ဘုရင်တစ်ပါးကို အရိုအသေပေးရန် အလိုအလျောက် လမ်းဖယ်ပေးနေသကဲ့သို့ ဘေးသို့ ဖယ်ပေးကြသည်။</p> <p style="text-align:justify">လှေပေါ်ရှိ မိစ္ဆာငယ်များက သူတို့ကိုယ်သူတို့ အတော်လေး အဆင့်အတန်း ရှိသည်ဟု ခံစားရကာ ချက်ချင်းပင် ခေါင်းကို မော့ထားလိုက်ကြ၏။ လှေပေါ်တွင် အကြိမ်ကြိမ် လိုက်ပါဖူးသူများပင် ချွင်းချက် မဟုတ်ပေ။ လှေသမားအိုကြီးက မိစ္ဆာသခင်မ ကျိုကွမ်းနှင့် မိစ္ဆာသခင် ရှောင်ကွမ်းတို့အတွက် လုပ်ပေးနေခြင်း ဖြစ်ပြီး သူတို့က အချောင် လိုက်ပါလာခြင်းသာ ဖြစ်ကြောင်း သိထားသော်လည်း သူတို့က ဂုဏ်ယူနေကြဆဲ ဖြစ်သည်။</p> <p style="text-align:justify">ကုန်တင်သင်္ဘောများသာ ချွင်းချက် အနေဖြင့် လှေသမားအိုကြီး၏ လက်ဖြင့် တွန်းဖယ်ခြင်း ခံရ၏။ ပိုကြီးမားသော ကုန်တင်သင်္ဘော တစ်စီးကို ဖြတ်သန်းသွားစဉ် လှေသမားအိုကြီးက တမင်တကာ မိုးခြိမ်းသံကဲ့သို့ ရေလှိုင်းသံကြီးတစ်ခုကို ဖြစ်ပေါ်စေလိုက်သည်။</p> <p style="text-align:justify">ငွေရောင်ဆံပင်နှင့် အသက်ကြီးကြီး အမျိုးသမီး တစ်ဦးက ကုန်တင်သင်္ဘော၏ နောက်ပိုင်းတွင် ပေါ်လာပြီး သေသပ်သော လက်တိုအင်္ကျီကို ဝတ်ဆင်ထား၏။ သူမတွင် ရှည်လျားသော ခြေလက်များ ရှိပြီး အရပ် ကိုးပေ မြင့်ကာ စူးရှသော မျက်လုံးများ ရှိသည်။ သူမက လှေသမားအိုကြီးကို တံတွေးထွေးလိုက်၏။</p> <p style="text-align:justify">"ဒီအဘိုးကြီးစုတ်"</p> <p style="text-align:justify">လှေသမားအိုကြီးက ဒေါသမထွက်ဘဲ တခစ်ခစ် ရယ်မောလိုက်သည်။ သူက ငါးတစ်ကောင်ကိုပင် ခေါ်ယူ၍ သူမ၏ တံတွေးကို မျိုချခိုင်းလိုက်ရာ အဘွားကြီးမှာ ဒေါသထွက်လွန်း၍ ခုန်ပေါက်နေတော့၏။</p> <p style="text-align:justify">ဖူရှောင်ကွမ်းက ၎င်းကို အတော်လေး ရယ်စရာကောင်းသည်ဟု ထင်မိသည်။</p> <p style="text-align:justify">လှေဆိုက်ကပ်သွားပြီး မိစ္ဆာများက အဘိုးအိုကို နှုတ်ဆက်ကာ လှေပေါ်မှ ဆင်းလိုက်ကြ၏။ လှေထဲမှ ထွက်လာသည့် အခိုက်အတန့်မှာပင် သူတို့၏ ပုံသဏ္ဌာန်များက ပုံမှန်အတိုင်း ပြန်ဖြစ်သွားသည်။</p> <p style="text-align:justify">ကမ်းစပ်တွင်တော့ ယူနန် မိစ္ဆာဈေးတန်းမှ မိစ္ဆာများက အသင့် စောင့်ဆိုင်းနေကြပြီ ဖြစ်၏။</p> <p style="text-align:justify"> </p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save