Book List

<h2 style="text-align: center;">​အပိုင်း (၅၄၇)</h2> <h2 style="text-align: center;">ပုန်ကန်မှု (၁)</h2> <h2 style="text-align: center;">*</h2> <p> </p> <p> </p> <p> </p> <p>​အဲဒီနောက် တပ်သားတွေက ပြန်ရောက်လာတဲ့ လွတ်လပ်သူ  နဲ့ ကျွန်တွေကို ဒိုင်းတွေ၊ လှံတွေ ပေးလိုက်တယ်။ ပြီးတော့ တပ်သား တစ်ယောက်က ၁၀ ယောက် ပါတဲ့ အဖွဲ့ငယ် တစ်ခုကို ဦးဆောင်ပြီး သီအိုနီယာ စခန်းဆီ ပြန်သွားကြတယ်။ တိုက်ဖို့ ငြင်းရင် ဖြစ်ဖြစ်၊ ထွက်ပြေးရင် ဖြစ်ဖြစ် တပ်သားတွေက ဖမ်းပြီး အဆုံးစီရင်ပစ်လိုက်တယ်။ ဒါမှ တခြားသူတွေ မလုပ်ရဲမှာလေ။</p> <p>​ဒီယာယီ အဖွဲ့တွေရဲ့ ရှေ့မှာတော့ ဆီရာကျု  တပ်သား ၂၀,၀၀၀ နီးပါးနဲ့ ဝိုင်းရံတိုက်ပွဲသုံး ပစ္စည်းတွေ ရှိတယ်။ တပ်သားတွေက အရမ်း ကျဲပါးတဲ့ ပုံစံနဲ့ စီထားပြီး၊ ၁၀ မီတာလောက် ရှည်တဲ့ လှေကားတွေ ထမ်းကာ လွတ်လပ်သူတွေ၊ ကျွန်တွေ ပြုပြင်ပေးထားတဲ့ ရွှံ့လမ်းပေါ်မှာ လျှောက်လာကြတယ်။ သူတို့နဲ့ အတူ ကြီးမားတဲ့ ဝိုင်းရံတိုက်ပွဲသုံး ပစ္စည်းတွေလည်း ပါလာတယ်။ အရင် တိုက်ပွဲမှာ အများစုက သံချပ်ကာတွေ၊ ဒိုင်းတွေ ဆုံးရှုံးခဲ့ရလို့၊ လက်ရှိ အားလုံးရဲ့ ကိရိယာတွေက ရိုးရှင်းပြီး နောက်တန်းက လွတ်လပ်သူတွေနဲ့ သိပ်မကွာဘူး။ ဒါကြောင့် အရင်က မမှုခဲ့တဲ့ မြှားတွေက အခုတော့ အတော် ဒုက္ခပေးတဲ့ လက်နက်တွေ ဖြစ်လာတယ်။ ကံကောင်းလို့ ရွေ့လျား မျှော်စင်တွေ၊ မြှားကာ လှည်းတွေ၊ ဝိုင်းရံတိုက်ပွဲသုံး လှည်းတွေက မြှားအများစုကို ကာပေးထားတယ်။</p> <p>​တစ်ခါတလေ ကြောက်စရာ ကောင်းတဲ့ ကျောက်တုံးကြီးတွေ မြေကြီးထဲ စိုက်ဝင်သွားတာ မြင်နေရပေမယ့်၊ ဆီရာကျု တပ်သားတွေက လွတ်လပ်သူတွေလောက် မလန့်ကြဘူး။ ဒီလို မြင်ကွင်းမျိုး ခဏခဏ မြင်ဖူးနေပြီကိုး။ ဒါပေမဲ့ "အိုး... အပိုလို ဘုရားသခင်... ကျောက်တုံး ထိတဲ့ ကံဆိုးသူ မဖြစ်ပါစေနဲ့" လို့တော့ အားလုံး ဆုတောင်းနေကြတယ်။</p> <p>​"ဝုန်း!"</p> <p>​ကျောက်တုံး တစ်လုံးက မြှားကာ လှည်း တစ်စီးကို ထိမှန်ပြီး ကျိုးပဲ့သွားစေတယ်။ သစ်စတွေ လွင့်စင်ပြီး လှည်း တွန်းနေတဲ့ ကျွန်တချို့ ဒဏ်ရာရကုန်တယ်။ ဝိုင်းရံတိုက်ပွဲသုံး ပစ္စည်းတွေ နောက်က တပ်သားတွေ လန့်သွားကြတယ်။ ဒီအရာကြီးတွေက ဘယ်လစ်စတာ  ရဲ့ အဓိက ပစ်မှတ် ဖြစ်နေတာကိုး!</p> <p>​. . . . . . . . . . . . .</p> <p>​တစ်ဖက်မှာတော့ သီအိုနီယာ အပေါ့စား ခြေလျင်တပ်တွေ သစ်သား တံတိုင်း ရှေ့ကနေ တဒုန်းဒုန်း မြည်သံတွေ တဖြည်းဖြည်း ကျယ်လာတာ ကြားနေရတယ်။ မိုးခြိမ်းသံကြီးက လျှပ်စီးပစ်တော့မလိုပဲ။ စိတ်လှုပ်ရှားစွာနဲ့ မြှားပစ်နှုန်း မြှင့်တင်လိုက်ကြပြီး၊ အော်သံ တစ်ချက် ကြားရတိုင်း စိတ်သက်သာရာ ရသွားကြတယ်။</p> <p>​မကြာခင် အဖြူရောင် မြူထုထဲမှာ ဝါးတားတား လူရိပ်တွေ အများကြီး တွေ့လာရတယ်။ ပြီးတော့ စခန်း မြို့ရိုးထက် မြင့်တဲ့ ဝိုင်းရံတိုက်ပွဲသုံး မျှော်စင် ဒါဇင်ကျော် မြူထုထဲကနေ ကတုတ်မြောင်း ရှေ့ ထွက်ပေါ်လာတော့၊ သီအိုနီယာ တပ်သားတွေ ဒီဘီလူးကြီးတွေကို ကြည့်ပြီး စိတ်လှုပ်ရှားလာကြတယ်။</p> <p>​"ကာကွယ်ကြ!"</p> <p>​လေးလံ လက်နက်ကိုင် တပ်သားတွေ ဒိုင်းရှည်တွေကို ခေါင်းပေါ် တင်ပြီး ဒိုင်းကာ ပုံစံ အမြန် ယူလိုက်ကြတယ်။</p> <p>​မျှော်စင်ပေါ်ကနေ ပစ်ချလိုက်တဲ့ လှံတိုတွေက ဒိုင်းရှည် အလယ်က သတ္တုပြားနဲ့ ထိပြီး "ဒေါင်... ဒေါင်" မြည်သံတွေ ထွက်ပေါ်လာတယ်။ အနည်းငယ်လောက်ပဲ ဖောက်ထွက်ပြီး လီဂျင် တပ်သားတွေကို ဒဏ်ရာရစေတယ်။ ဆီရာကျုတွေက လေးသမားတွေက သီအိုနီယာ လေးလံ လက်နက်ကိုင် တပ်သားတွေကို မခြိမ်းခြောက်နိုင်မှန်း သိလို့၊ မျှော်စင်ပေါ်က အပေါ့စား ခြေလျင်တပ် အားလုံးကို လှံတို ပစ်သူတွေ (Peltast) နဲ့ နေရာယူခိုင်းထားတာ။</p> <p>​သီအိုနီယာ လေးလံ လက်နက်ကိုင် တပ်သားတွေ နောက်က ပုန်းနေတဲ့ အပေါ့စား ခြေလျင်တပ်တွေက သစ်သား တံတိုင်းနဲ့ ၈-၉ မီတာ အကွာက မျှော်စင်ကို မြှားတွေ၊ လှံတိုတွေနဲ့ ပြန်ပစ်ကြတယ်။</p> <p>​ဆီရာကျုတွေကတော့ မျှော်စင်ရဲ့ သစ်သား အကာအကွယ်ကို အားကိုးကြတယ်။ တစ်ယောက်ယောက် ထိမှန်ပြီး ပြုတ်ကျသွားရင်၊ နောက်တစ်ယောက်က မျှော်စင် နောက်က အပေါက်ကနေ ဝင်၊ လှေကားနဲ့ တက်ပြီး နေရာဝင်ယူတယ်။</p> <p>​မျှော်စင်က တိုက်ခိုက်မှုတွေနဲ့ ဖိနှိပ်ထားတာကို အားကိုးပြီး၊ အောက်က ဆီရာကျု တပ်သားတွေက မြှားမိုး၊ လှံမိုးတွေကို ကြံ့ကြံ့ခံကာ ကတုတ်မြောင်းဆီ ပြေးလာပြီး ၁၀ မီတာ ရှည်တဲ့ ဝိုင်းရံတိုက်ပွဲသုံး လှေကားကို သစ်သား တံတိုင်းပေါ် တင်လိုက်ကြတယ်။</p> <p>​သီအိုနီယာ တပ်သားတွေ စခန်း တည်ဆောက်တုန်းက ၄ မီတာ ကျယ်၊ ၃ မီတာ နက်တဲ့ ကတုတ်မြောင်း တူးပြီး အထဲမှာ သစ်သား ချွန်တွေ စိုက်ထားတယ်။ စခန်းဘက်ခြမ်းမှာ မြေကတုတ် လုပ်ပြီး အပေါ်မှာ သစ်သား တံတိုင်း တည်ဆောက်ထားတယ်။ ပေါင်းလိုက်ရင် မြေကတုတ် နဲ့ သစ်သား တံတိုင်း အမြင့်က ၅ မီတာလောက် ရှိတယ်။ ဒါကြောင့် ဆီရာကျု တပ်သားတွေ သစ်သား တံတိုင်းအောက်မှာ မရပ်နိုင်ဘဲ ကတုတ်မြောင်း တစ်ဖက်ကမ်းကနေပဲ လှေကားရှည်ကြီးနဲ့ တိုက်ရတာ။</p> <p>​လှေကားရှည်ကြီးက သစ်သား တံတိုင်းကို မှီလိုက်တဲ့ အခါ လျှောစောက် နည်းသွားရုံတင် မကဘူး၊ တိုက်ခိုက်မယ့် တပ်သားတွေရဲ့ ခန္ဓာကိုယ်ကို ရန်သူ့ တိုက်ခိုက်မှုအောက် ပိုရောက်စေတယ်။ ပြီးတော့ လှေကားတွေက ယိမ်းထိုးလွယ်လို့ သတိမထားရင် ကတုတ်မြောင်းထဲ ပြုတ်ကျပြီး သစ်သားချွန်တွေနဲ့ စိုက်မိနိုင်တယ်။ ဒါပေမဲ့ ဆီရာကျုတွေက မကြောက်မရွံ့ လှေကားတွေ တင်ပြီး တစ်ယောက်ပြီး တစ်ယောက် တက်လာကြတယ်။</p> <p>​မျှော်စင်တွေ၊ လှေကားတွေက သီအိုနီယာ ခံစစ်သမားတွေရဲ့ အာရုံကို ဆွဲဆောင်ထားချိန်မှာ၊ လွတ်လပ်သူ ရာပေါင်းများစွာက မြေကြီး အိတ်တွေ ထမ်းပြီး စခန်း တံခါးဝ ရှေ့က ကတုတ်မြောင်းဆီ အမြန် ပြေးလာကြတယ်။ တချို့ မြှားထိပြီး လဲကျသွားပေမယ့်၊ ပိုများတဲ့ လူတွေက အိတ်တွေကို ကတုတ်မြောင်းထဲ ပစ်ချနိုင်ခဲ့ကြတယ်။</p> <p>​သီအိုနီယာ စခန်းမှာ ကျန်နေတဲ့ တပ်သားတွေက စတုတ္ထ နဲ့ သတ္တမ လီဂျင် က စုစုပေါင်း ၁၁,၀၀၀ ဖြစ်ပြီး၊ အားလုံး အရှေ့ဘက် တံတိုင်းဆီ အပြေးအလွှား လာကာကွယ်ကြတယ်။ ဒါပေမဲ့ တံတိုင်း လမ်းလျှောက်လမ်းက မကျယ်တော့၊ လေးသမားတွေက တံတိုင်း နောက် ဒါမှမဟုတ် ကင်းမျှော်စင်ပေါ် ဆုတ်ပြီး စခန်းအပြင်က မျှော်စင်တွေနဲ့ ပြေးလာတဲ့ ဆီရာကျု တပ်သားတွေကို ဆက်ပစ်ကြရတယ်။</p> <p>​သစ်သား တံတိုင်းပေါ်မှာတော့ လေးလံ လက်နက်ကိုင် နဲ့ အပေါ့စား ခြေလျင်တပ် ရောနှောထားတယ်။ ကတုတ်မြောင်း ရှေ့ ဒါမှမဟုတ် လှေကားပေါ်က ရန်သူကို လှံတိုနဲ့ ပစ်၊ တက်လာတဲ့ ရန်သူကို ဒိုင်း၊ လှံ နဲ့ တွန်းချ၊ ရန်သူ့ လှံတိုတွေကို ဒိုင်းနဲ့ ကာကွယ်... စသဖြင့်ပေါ့။</p> <p>​မြူထု တဖြည်းဖြည်း ကွဲပြီး နေရောင် ထွက်လာတာနဲ့ အမျှ၊ သီအိုနီယာ အလယ်စခန်း တိုက်ပွဲက ပိုပြင်းထန်လာတယ်။</p> <p>​. . . . . . . . . . . . .</p> <p>​သီအိုနီယာ စခန်း တိုက်ပွဲ ဖြစ်နေချိန်မှာပဲ၊ ဆီရာကျု မြို့မကြီး ကို သွားတဲ့ အောတီဂျီယာ (Ortygia) ကျွန်း တံခါး ပွင့်လာပြီး ဟစ်ပါရီးနပ်စ် (Hipparinus) စီးလာတဲ့ မြင်းရထားနဲ့ အခြွေအရံတွေ တန်းစီ ထွက်လာကြတယ်။</p> <p>​အောတီဂျီယာ ကျွန်းက ဂျီလွန် (Gelon) အာဏာရှင် မဖြစ်ခင် အထိ ဆီရာကျုတွေရဲ့ မူလ အခြေချ နေရာ ဖြစ်ခဲ့တယ်။ နောက်ပိုင်း အနီးနား မြို့တွေက လူတွေကို ဆီရာကျု ဆီ အများအပြား ရွှေ့ပြောင်းလာပြီး၊ အောတီဂျီယာ နဲ့ ဆက်စပ်နေတဲ့ ကုန်းတွင်းပိုင်းကို မြေပြုပြင်ကာ ပင်လယ်ရေကြောင်း ကုန်သွယ်ရေး ဖွံ့ဖြိုးအောင် လုပ်ခဲ့တယ်။ အဲဒီက စပြီး ဆီရာကျု က စစ္စလီ မှာ အင်အားအကြီးဆုံး ဂရိ မြို့ပြနိုင်ငံ ဖြစ်လာတယ်။</p> <p>​ဒါပေမဲ့ ဒိုင်ယွန်နီးစီးယပ်စ် (Dionysius) အာဏာရှင် ဖြစ်လာပြီးနောက်၊ ဂရိတွေ ပိုရွှေ့ပြောင်းလာရုံတင် မကဘူး၊ သူ့အုပ်ချုပ်မှုကို ဖြုတ်ချပြီး အသက်အန္တရာယ် ပေးလုနီးပါး ဖြစ်ခဲ့တဲ့ ပုန်ကန်မှု ၂ ကြိမ် ကြုံပြီးနောက်၊ သူ့အသက် လုံခြုံရေး အတွက် အောတီဂျီယာ မူလ နေထိုင်သူတွေကို အတင်းအကျပ် ဖယ်ရှားပစ်လိုက်တယ်။ ကျွန်းကို သူ့မိသားစု၊ ထောက်ခံသူတွေနဲ့ သစ္စာရှိ ကြေးစားတပ်သားတွေ အတွက် နေအိမ်နဲ့ ခံတပ် အဖြစ် ပြောင်းလဲလိုက်တယ်။ ဆီရာကျုတွေက အောတီဂျီယာ ကျွန်းကို 'ဒိုင်ယွန်နီးစီးယပ်စ် ရဲ့ အခရိုပိုလစ် (Acropolis)' လို့ နောက်ပြောင် ခေါ်ကြတယ်။</p> <p>​ဒိုင်ယွန်နီးစီးယပ်စ် ရဲ့ သစ္စာရှိ လက်အောက်ငယ်သားတွေ ဖြစ်တဲ့ ဖီလစ်တပ်စ် (Philistus) နဲ့ ဟစ်ပါရီးနပ်စ် တို့လည်း အောတီဂျီယာ ကျွန်းပေါ်မှာ နေကြတယ်။ ဒါပေမဲ့ ဆီရာကျု မြို့တော်ခန်းမက ကျွန်းပြင်ပ၊ အပိုလို (Apollo) ဘုရားကျောင်း တောင်ဘက် ရင်ပြင်နားမှာ ရှိတယ်။ ဒါကြောင့် ထူးခြားတဲ့ အခြေအနေ မရှိရင် ဖီလစ်တပ်စ် က မနက်စောစော မြို့တော်ခန်းမ သွား၊ အစိုးရ ကိစ္စတွေ လုပ်၊ မွန်းလွဲပိုင်းကျမှ အောတီဂျီယာ နန်းတော် ပြန်ပြီး ဒိုင်ယွန်နီးစီးယပ်စ် ကို သတင်းပို့လေ့ရှိတယ်။</p> <p>​ထောက်လှမ်းရေး အရာရှိချုပ် ဟစ်ပါရီးနပ်စ် လည်း မြို့တော်ခန်းမမှာ ရာထူး ရှိတယ်။ ဒါပေမဲ့ သူ့အလုပ်က လျှို့ဝှက်ချက် လိုအပ်တော့ အောတီဂျီယာ ပေါ်က နေအိမ်မှာပဲ အလုပ်လုပ်လေ့ရှိတယ်။ ဒိုင်ယွန်နီးစီးယပ်စ် ဆီရာကျု က ထွက်သွားမှသာ မြို့တော်ခန်းမကို နေ့တိုင်း သွားပြီး မြို့အခြေအနေ နားလည်အောင် လုပ်ရင်း အနီးနားက အရာရှိတွေကို စောင့်ကြည့်တာ။</p> <p>​အောတီဂျီယာ ကျွန်းနဲ့ ဆီရာကျု မြို့ကြားမှာ ၅၀၀ မီတာ ရှည်ပြီး ၃၀၀ မီတာ ကျယ်တဲ့ ရေလက်ကြား ကျွန်းဆွယ် (Isthmus) ရှိတယ်။ အလယ်မှာ ခံတပ်ငယ် တစ်ခု ရှိပြီး ကြေးစား ရာပေါင်းများစွာ စောင့်ကြပ်နေတယ်။ အောတီဂျီယာ ကျွန်းကို ပိုင်းခြားထားတဲ့ တံတိုင်း တစ်ခုလည်း ရှိတယ်။ ဒိုင်ယွန်နီးစီးယပ်စ် က သူ့မိသားစု လုံခြုံရေး အတွက် လုပ်နိုင်သမျှ လုပ်ထားပေမယ့်၊ ဒီခံတပ်က ကျဉ်းမြောင်းနေတဲ့ လမ်းကို ပိုကျဉ်းသွားစေတယ်။</p> <p>​ရုတ်တရက် ဟစ်ပါရီးနပ်စ် ရဲ့ မြင်းရထားက ကျွန်းဆွယ် ထွက်ပေါက်မှာ ရပ်သွားတယ်။ အပြင်က ဆူညံသံတွေ ကြားလို့ ခေါင်းပြူကြည့်လိုက်တယ်။ ထွက်ပေါက်မှာ လူဒါဇင်ပေါင်းများစွာ ရန်ဖြစ်၊ ရိုက်နှက်နေတာ တွေ့လိုက်ရတယ်။ ဘေးမှာ အားပေးနေတဲ့ လူအုပ်ကြီးက လမ်းကို ပိတ်ဆို့ထားတယ်။</p> <p>​"သွားကြည့်စမ်း... ဘာဖြစ်တာလဲ!"</p> <p>​ဟစ်ပါရီးနပ်စ် အလောတကြီး ပြောလိုက်တယ်။</p> <p>​မကြာခင် သူ့လူ ပြန်ရောက်လာပြီး သတင်းပို့တယ်။</p> <p>​"သခင်ကြီး... ဒီနေ့ မက်ဂနာ ဂရိ ကို စစ်ကူသွားဖို့ ရင်ပြင်မှာ တပ်သား စုဆောင်းမယ် ဆိုတာ ကြားလို့ တချို့ နိုင်ငံသားတွေက သွားမလို့ လုပ်ကြတယ်။ တချို့ကျတော့ ဒါက စစ်ပွဲကို အဆုံးမရှိ ဖြစ်စေမယ် ဆိုပြီး တားကြတယ်။ အဲဒါကြောင့် နှစ်ဖက်..."</p> <p>​ဟစ်ပါရီးနပ်စ် ရှေ့က ဖုန်ထနေတာကို စိတ်ပျက်စွာ ကြည့်လိုက်တယ်။ ပြီးတော့ ဆဲလိုက်တယ်။</p> <p>​"ဖီလစ်တပ်စ် ဘာလုပ်နေတာလဲ?! ကင်းလှည့်တပ်တွေ လွှတ်ပြီး မောင်းမထုတ်ဘူးလား?!!"</p> <p>​. . . . . . . . . . . . .</p> <p>​ဖီလစ်တပ်စ် ပုံမှန် စောစော သွားပေမယ့်၊ ဒီနေ့ ပိုစောတယ်။ တပ်သား စုဆောင်းပြီး တပ်ဖွဲ့တာက မြို့ပြနိုင်ငံ တစ်ခု အတွက် အရေးကြီး ကိစ္စ။ အထူးသဖြင့် ဆီရာကျု အခြေအနေမှာပေါ့။ ဒါကြောင့် မြို့ထဲမှာ ငြိမ်သက်မှု ရှိဖို့နဲ့ ချောချောမွေ့မွေ့ ပြီးဆုံးဖို့ လိုတယ်။ နိုင်ငံသားတွေ ရင်ပြင် မရောက်ခင် ကြိုရောက်ပြီး အမှားအယွင်း မရှိအောင် ပြင်ဆင်မှုတွေ စစ်ဆေးချင်လို့။</p> <p>​ဝမ်းသာစရာ ကောင်းတာက မြို့တော်ခန်းမ သွားတဲ့ လမ်းမှာ နိုင်ငံသား အများအပြား ရင်ပြင်ဘက် သွားနေတာ တွေ့လိုက်ရတယ်။</p> <p>​'ဟီရိုလစ် (Herolis) ရဲ့ ကြိုးစားမှု အရာထင်ပုံပဲ။ အရှင် ဒိုင်ယွန်နီးစီးယပ်စ် တောင်းဆိုတာကို ဖြည့်ဆည်းပေးနိုင်လောက်တယ်!'</p> <p>​ဒါပေမဲ့ ဟီရိုလစ် ကို ကျေးဇူးတင်နေတုန်း မြို့တော်ခန်းမ ရောက်တော့ သတင်းဆိုး ကြားလိုက်ရတယ်။</p> <p>​"ဘာပြောလိုက်တယ်?! ဟီရိုလစ် မြို့တော်ခန်းမ လာတုန်း အရိုက်ခံလိုက်ရတယ် ဟုတ်လား?!!"</p> <p>​"ဟုတ်ပါတယ် သခင်။ စစ်ထဲ မဝင်ချင်တဲ့ နိုင်ငံသား တချို့က ဟီရိုလစ် စစ်စည်းရုံးတာကို မကျေနပ်လို့ ကိုယ်ထိလက်ရောက် ကျူးလွန်ကြတာပါ"</p> <p>​"သူ အခု ဘယ်မှာလဲ? ဒဏ်ရာ ဘယ်လိုလဲ?!"</p> <p>​"ခေါင်းရိုက်ခံရပြီး သတိလစ်သွားတယ် ကြားတယ်။ သူ့ဆွေမျိုးတွေ အိမ်ပြန်သယ်သွားကြပြီ။ ကင်းလှည့်တပ်တွေက တရားခံတွေကို လိုက်ဖမ်းနေပါတယ်"</p> <p>​ဒါကြားတော့ ဖီလစ်တပ်စ် ထိုင်မနေနိုင်တော့ဘူး။ ဟီရိုလစ် ဒဏ်ရာရတာ သူ့တာဝန် လို့ ခံစားမိတယ်။ သူသာ ဒီခက်ခဲတဲ့ အလုပ်ကို အတင်းအကျပ် မခိုင်းခဲ့ရင်၊ မကျေနပ်တဲ့ နိုင်ငံသားတွေ ဟီရိုလစ် ကို မုန်းမှာ မဟုတ်ဘူး။ ပြီးတော့ ဒီနေ့ ရင်ပြင်မှာ တပ်ဖွဲ့ရမယ့် အလုပ်က အရေးကြီးပြီး အန္တရာယ် များတယ်။ ဟီရိုလစ် သာ ဘေးမှာ ရှိရင် ပိုအဆင်ပြေမှာ။</p> <p>​ဒါကြောင့် အများကိစ္စ၊ ပုဂ္ဂိုလ်ရေး ကိစ္စ နှစ်ခုလုံး အတွက် သွားကြည့်မှ ဖြစ်မယ်။</p> <p>​စောနေသေးတော့ သူ့လူတွေကို ရိုးရှင်းတဲ့ ကိစ္စတချို့ မှာခဲ့ပြီး၊ ကိုယ်ရံတော် ၂၀ ခေါ်ကာ ဟီရိုလစ် အိမ်ဆီ အမြန် သွားလိုက်တယ်။</p> <p>​</p> <p> </p> <p style="text-align: center;">အပိုင်း (၅၄၇) ပြီးဆုံး</p> <p style="text-align: center;">***</p>


Save