BIT

Title

Show in VIP/Series

Status (Active / Inactive)

<h2 style="text-align: center;">အခန်း (၁၉၉) ဝူမိသားစု၏ ဒြပ်စင် ဝိညာဉ် ကန်</h2>

“ဝုန်း...”

ကျုံးယွမ် ဓားသိုင်း လည်ပတ်သွားသည်နှင့်အမျှ သုံးမီတာ ပတ်လည်အတွင်း၌ စွမ်းအင် နယ်ပယ်တစ်ခု ကျဆင်းလာပြီး မြေပြင်ပေါ်ရှိ မြက်ပင်များကို ပြင်းထန်စွာ ဖိနှိပ်လိုက်ရာ မြက်ပင်များမှာ အက်ကွဲကြေမွကုန်၏။

ချန်ဖေးသည် ဓားကို ကိုင်ဆွဲလျက် ကျုံးယွမ် ဓားသိုင်း၏ လည်ပတ်မှုကို အာရုံခံနေသည်။ ခေတ္တမျှ ကြာသောအခါ ချန်ဖေးကို ဝန်းရံထားသည့် စွမ်းအင် နယ်ပယ်မှာ ပျောက်ကွယ်သွားတော့သည်။

“ပြီးပြည့်စုံတဲ့ ကျုံးယွမ် ဓားသိုင်းက အရေးကြီးတဲ့ အချိန်ကျရင် သတ်ကွက်တစ်ခုအနေနဲ့ အသုံးဝင်နေပြီပဲ... ငါကိုယ်တိုင် တီထွင်ထားတဲ့ ဓားကိုးကွက်နဲ့ ပေါင်းစပ်လိုက်ရင် တစ်ခုနဲ့တစ်ခု အံဝင်ခွင်ကျ ဖြစ်သွားမှာပါ...” ချန်ဖေးသည် ထိုနေရာ၌ပင် ရပ်နေရင်း သူ၏ စိတ်ထဲမှ တွေးတောနေမိသည်။

ကျုံးယွမ် ဓားသိုင်း၏ ကျွမ်းကျင်မှု တိုးတက်နှုန်းမှာ မမြန်ဆန်သော်လည်း ၎င်း၏ မြင့်မားလာသော စွမ်းအားကတော့ ကျေနပ်စရာ ကောင်းလှ၏။ အချိန် အနည်းငယ် ထပ်ပေးပြီးလျှင် ၎င်းကို အပြီးသတ် ကျွမ်းကျင်သည့် အဆင့်သို့ မြှင့်တင်ရန် ချန်ဖေး စီစဉ်ထားသည်။

ထိုအခါမှသာ ကျုံးယွမ် ဓားသိုင်း ကျင့်ကြံမှုမှာ အဆုံးသတ်ပေလိမ့်မည်။

ထိုထက်မက တိုးတက်လိုပါက ဒွာရ သန့်စင်ခြင်း အဆင့်သို့ တက်လှမ်းနိုင်သည့် အချိန်အထိ စောင့်ဆိုင်းရမည် ဖြစ်ပြီး ထိုအခါမှသာ စစ်မှန်ပြီး ပြည့်စုံသော ကျုံးယွမ် ဓားသိုင်းကို ကျင့်ကြံနိုင်မည် ဖြစ်၏။

ဒွာရ ရှစ်ဆယ်၏ စွမ်းအားကို အသုံးပြုနိုင်မည့် အခိုက်အတန့်ကို တွေးကြည့်ရုံဖြင့်ပင် စိတ်လှုပ်ရှားစရာ ကောင်းလှပေသည်။

ကျုံးယွမ် ဓားသိုင်းကို စမ်းသပ်ပြီးနောက် ချန်ဖေးသည် သူ၏ လျှို့ဝှက်ခန်းမသို့ ပြန်လာခဲ့၏။ သူသည် တင်ပျဉ်ခွေ ထိုင်လိုက်ပြီး သူ၏ အိတ်ထဲမှ ရှင်းလင်းနှင်းခဲ ဆေးလုံး တစ်လုံးကို ထုတ်ယူလိုက်သည်။

ထို့နောက် ၎င်းကို ဝါးမျိုကာ ထိုနေ့အတွက် ကျင့်ကြံမှုကို စတင်လိုက်တော့သည်။

ရှင်းလင်းနှင်းခဲ ဆေးလုံးမှာ ယွမ်ချန် ဓားဂိုဏ်း၏ အထူးဖော်စပ်ထားသော ဆေးလုံးတစ်မျိုး ဖြစ်ပြီး သာမန် ဆေးဖက်ဝင် အပင်များဖြင့် ဖော်စပ်ထားခြင်း မဟုတ်ဘဲ ဝိညာဉ်ပစ္စည်းများ လိုအပ်ပေသည်။

ထို့ကြောင့် ရှင်းလင်းနှင်းခဲ ဆေးလုံး တစ်လုံး၏ ဈေးနှုန်းမှာလည်း အမှတ် ရှစ်ရာခန့် ရှိသဖြင့် အတော်လေးကို မြင့်မားလှ၏။

မကြာသေးမီက ချန်ဖေးသည် ထိုဆေးလုံးကို နေ့စဉ် တစ်လုံးစီ သောက်သုံးနေခဲ့ပြီး အားလုံးမှာ ရတနာသိုက်မှ လဲလှယ်ထားခြင်း ဖြစ်သည်။ ၎င်း၏ အကျိုးသက်ရောက်မှုမှာ သိသာထင်ရှားလှ၏။

ထိုဆေးလုံးများကို စတင် သောက်သုံးကတည်းက ဒွာရ သန့်စင်ခြင်း အဆင့်သို့ တက်လှမ်းရန် သူ၏ တိုးတက်မှုမှာ ဆယ်ရာခိုင်နှုန်းထက် ကျော်လွန်သွားခဲ့ပြီ ဖြစ်သည်။

ဆိုလိုသည်မှာ ချန်ဖေးအနေဖြင့် ရှင်းလင်းနှင်းခဲ ဆေးလုံးကို နေ့စဉ် ဆက်လက် သောက်သုံးနေမည် ဆိုပါက တစ်နှစ်အတွင်း အတွင်းကလီစာ သန့်စင်ခြင်း အဆင့် အထွတ်အထိပ်သို့ ရောက်ရှိနိုင်မည် ဖြစ်၏။

ထိုအချိန်ကျလျှင် သူသည် ဒွာရ သန့်စင်ခြင်း အဆင့်သို့ တက်လှမ်းရန်အတွက်ပင် ပြင်ဆင်နိုင်ပေလိမ့်မည်။

သို့သော်လည်း ချန်ဖေး လက်ရှိ ပိုင်ဆိုင်ထားသည့် အမှတ်များဖြင့်ဆိုလျှင် ဤကဲ့သို့သော သုံးစွဲမှုကို ရေရှည် ဆက်လက် လုပ်ဆောင်ရန် မဖြစ်နိုင်ကြောင်း သိသာလှပေသည်။

လန်ယွင်ဖုန်းနှင့် အခြားသူများ၏ စိန်ခေါ်မှုများကြောင့်သာ ချန်ဖေးထံသို့ အမှတ်ပေါင်း ကိုးသောင်းခန့် ရောက်ရှိလာခဲ့ခြင်း ဖြစ်ပြီး ထိုအမှတ်များကြောင့်သာ လပေါင်းများစွာ ဆက်တိုက် ရှင်းလင်းနှင်းခဲ ဆေးလုံးများကို သောက်သုံးနိုင်ခြင်း ဖြစ်၏။

မဟုတ်လျှင်တော့ အစစ်အမှန် တပည့်များ၏ အရင်းအမြစ် ခွဲဝေမှုအရ ချန်ဖေးကဲ့သို့ အောက်ဆုံး အဆင့်ရှိသူ တစ်ဦးသည် တစ်လလျှင် ရှင်းလင်းနှင်းခဲ ဆေးလုံး နှစ်လုံးသာ ရရှိမည် ဖြစ်သည်။ ထိုထက်မက လိုချင်ပါက သူ၏ အမှတ်များဖြင့်သာ ထပ်မံ လဲလှယ်ရပေလိမ့်မည်။

အစစ်အမှန် တပည့်များကို ဆယ်ဦးစီ အုပ်စုခွဲထားသဖြင့် အသစ်တက်လာသော တပည့်များမှာ တူညီသော အရင်းအမြစ်များကို ရရှိကြ၏။ ပိုမို ကောင်းမွန်ပြီး လျင်မြန်သော တိုးတက်မှု ရရှိရန်အတွက် အစစ်အမှန် တပည့်များအကြားတွင် အဆင့်တက်အောင် ကြိုးစားရမည် ဖြစ်သည်။

အကြမ်းဖျင်းအားဖြင့် ဆယ်ဆင့် တိုးတက်တိုင်း တစ်လလျှင် ရှင်းလင်းနှင်းခဲ ဆေးလုံး တစ်လုံးစီ ပိုမို ရရှိမည် ဖြစ်၏။ တစ်နည်းအားဖြင့်ဆိုသော် အကယ်၍ ချန်ဖေးသာ ထိပ်ဆုံး ၁၀ ဦး စာရင်းထဲ ဝင်နိုင်ပါက သူသည် လစဉ် ရှင်းလင်းနှင်းခဲ ဆေးလုံး ၁၀ လုံးကို အလကား ရရှိမည် ဖြစ်ပြီး ၎င်းမှာ အမှတ် ရှစ်ထောင်နှင့် ညီမျှပေသည်။

ဤအချက်ကို ကြည့်ခြင်းအားဖြင့် ဂိုဏ်းအနေဖြင့် အဆင့်မြင့် အစစ်အမှန် တပည့်များကို မည်မျှအထိ မျက်နှာသာ ပေးထားကြောင်း ထင်ရှားလှပေသည်။ အစစ်အမှန် တပည့်များကို ထားရှိရခြင်း၏ ရည်ရွယ်ချက်မှာလည်း သူတို့ကို ဒွာရ သန့်စင်ခြင်း အဆင့်သို့ တက်လှမ်းနိုင်အောင် လမ်းပြပေးရန်အတွက်သာ ဖြစ်၏။

အစစ်အမှန် တပည့်များထဲမှ တစ်ဦးဦးသာ အောင်မြင်စွာ တက်လှမ်းနိုင်ခဲ့လျှင် ဂိုဏ်း၏ အရင်းအမြစ် ခွဲဝေမှုမှာ အဓိပ္ပာယ် ရှိသွားပေလိမ့်မည်။ အဘယ်ကြောင့်ဆိုသော် ဒွာရ သန့်စင်ခြင်း အဆင့်သို့ ရောက်ရှိခြင်းက ဂိုဏ်းတစ်ခု၏ အုတ်မြစ် ဖြစ်သောကြောင့် ဖြစ်၏။

ဂိုဏ်း၏ အရင်းအမြစ် ခွဲဝေမှုမှာ ထိုမျှနှင့်တင် မပြီးသေးပေ။ နံပါတ် ၁၀ အဆင့်ရှိသော အစစ်အမှန် တပည့်သည် တစ်လလျှင် ရှင်းလင်းနှင်းခဲ ဆေးလုံး ၁၀ လုံး ရရှိသော်လည်း နံပါတ် ၉ အဆင့်ရှိသူမှာမူ ၁၁ လုံး ရရှိပြီး နံပါတ် ၈ အဆင့်ရှိသူမှာမူ ၁၂ လုံး ရရှိပေလိမ့်မည်။

ဤပုံစံအတိုင်းသာဆိုလျှင် အကယ်၍ သင်သည် နံပါတ် ၁ အဆင့်ရှိသော အစစ်အမှန် တပည့် ဖြစ်လာပါက တစ်လလျှင် ရှင်းလင်းနှင်းခဲ ဆေးလုံး ၁၉ လုံးအထိ ရရှိမည် ဖြစ်ပြီး ၎င်းကို အမှတ်များအဖြစ် ပြောင်းလဲလိုက်လျှင် တစ်သောင်းငါးထောင်ကျော်အထိ ရှိပေလိမ့်မည်။

၎င်းမှာ ဆေးလုံးများနှင့် ပတ်သက်သည့် ခွဲဝေမှုသာ ရှိသေး၏။ အစစ်အမှန်တပည့် တောင်ထိပ်များ၏ အမြင့် သို့မဟုတ် အနိမ့်နှင့် စုစည်းနေသော သဘာဝစွမ်းအင်များ၏ သိပ်သည်းဆတို့မှာလည်း အဆင့်သတ်မှတ်ချက်များပေါ်တွင် မူတည်နေပေသည်။

အရင်းအမြစ်များမှ ရရှိသည့် အကျိုးကျေးဇူးများမှာ သိသာထင်ရှားလှ၏။ အကယ်၍ သင်သည် ထိုအရာများကို လိုချင်ပါက အဆင့်တက်အောင် ကြိုးစားရပေလိမ့်မည်။ အကယ်၍ သင်သည် အောက်ဆုံး အဆင့်တွင်သာ ရှိနေဦးမည် ဆိုပါက အတွင်းတပည့်များ၏ စိန်ခေါ်မှုများကိုလည်း ပုံမှန် လက်ခံနေရပေဦးမည်။

ချန်ဖေးကဲ့သို့ ခွန်အားကြီးမားနေပါက အောက်ဆုံး အဆင့်တွင် ရှိနေခြင်းမှာ ပြဿနာ မဟုတ်သော်လည်း အကယ်၍ ခွန်အား နည်းပါးနေပါက အစစ်အမှန် တပည့် နေရာမှာလည်း တိုက်ရိုက် ဆုံးရှုံးသွားနိုင်ပေသည်။

ဂိုဏ်း၏ ရည်ရွယ်ချက်မှာ ရှင်းလင်းလှသည် - သန်ရာသူသာ အသက်ရှင်မြဲ ဖြစ်ပြီး သဘာဝအတိုင်း ရွေးချယ်မှုပင် ဖြစ်၏။ ပိုမို ခွန်အားကြီးသူ ဖြစ်လာရန်အတွက် ကျင့်ကြံမှု၌ ကြိုးစားရမည် ဖြစ်ပြီး ရှေ့တွင် ရှိနေသော အတားအဆီး အားလုံးကို ကျော်လွှားရမည် ဖြစ်သည်။

မကြာသေးမီက ချန်ဖေးသည် ရှင်းလင်းနှင်းခဲ ဆေးလုံးများကို ဆက်တိုက် သုံးစွဲနေခဲ့ပြီး သူ၏ အမှတ်များကိုလည်း လျင်မြန်စွာ အသုံးပြုနေသကဲ့သို့ ၎င်း၏ အကျိုးကျေးဇူးများကိုလည်း ခံစားနေရ၏။ ထို့ကြောင့် သူသည် ဤအတိုင်းပင် ဆက်လက် လုပ်ဆောင်လိုပေသည်။

အကယ်၍ သူသည် ထိပ်ဆုံး အစစ်အမှန် တပည့် ဖြစ်လာနိုင်ပါက ရှင်းလင်းနှင်းခဲ ဆေးလုံးများ လိုအပ်ချက်မှာ များစွာ ပြည့်စုံသွားပေလိမ့်မည်။ ကျန်ရှိနေသည့် လိုအပ်ချက်ကိုလည်း ဖေးလင်း ဆေးလုံး များဖြင့် ဖြည့်ဆည်းနိုင်မည် ဖြစ်ပြီး သူ၏ ကျင့်ကြံမှု တိုးတက်နှုန်းမှာလည်း အံ့သြစရာ ကောင်းနေဦးမည် ဖြစ်၏။

အမှန်စင်စစ် ချန်ဖေးအနေဖြင့် ရှင်းလင်းနှင်းခဲ ဆေးလုံးများကို မိမိကိုယ်တိုင် ဖော်စပ်နိုင်မလားဟုလည်း စဉ်းစားခဲ့ဖူးသည်။ သို့သော်လည်း ပထမဆုံးအနေဖြင့် ဆေးဖော်စပ်နည်းမှာ ပြဿနာ ဖြစ်နေပြီး ၎င်းကို လဲလှယ်ရန်အတွက် အမှတ်များစွာ လိုအပ်ပေလိမ့်မည်။ ထို့အပြင် ပိုမို ကြီးမားသော ပြဿနာမှာ ဆေးဖက်ဝင် အပင်များ ရရှိမည့် နေရာပင် ဖြစ်၏။

ရှင်းလင်းနှင်းခဲ ဆေးလုံး၏ ထူးခြားသော အကျိုးသက်ရောက်မှုမှာ ဖော်စပ်ရာတွင် ဝိညာဉ်ပစ္စည်းများ ပါဝင်သောကြောင့် ဖြစ်သည်။ ယွမ်ချန် ဓားဂိုဏ်းတွင် ကိုယ်ပိုင် ဝိညာဉ်ပစ္စည်း ထွက်ရှိရာ နေရာများ ရှိသော်လည်း ချန်ဖေးတွင်မူ မရှိပေ။

အမှတ်အသားပါသော ဖေးလင်း ဆေးလုံး ကဲ့သို့ပင် ချန်ဖေးအနေဖြင့် ဖော်စပ်နိုင်သော်လည်း သက်တမ်းရင့် ဆေးဖက်ဝင် အပင်များကို ရှာဖွေရန်မှာ စိန်ခေါ်မှုတစ်ခု ဖြစ်နေဆဲ ဖြစ်၏။ လဲလှယ်ရန်အတွက်ဆိုလျှင် ဂိုဏ်းထံမှ အမှတ်များဖြင့် ဝယ်ယူရမည် သို့မဟုတ် အဂ္ဂိရတ်ပညာရှင် မဟာမိတ်အဖွဲ့မှတစ်ဆင့် လဲလှယ်ရပေလိမ့်မည်။

အပြင်လောကတွင် ငွေပြားများဖြင့် ဝယ်ယူမည် ဆိုပါကလည်း အပင် အနည်းငယ်ကိုသာ ရံဖန်ရံခါ ရရှိနိုင်ပြီး အမြောက်အမြား ရရှိရန်မှာမူ အခက်အခဲ ရှိလှပေသည်။

ချန်ဖေးသည် ချီတာဖုန်းကို အပြင်လောကတွင် သက်တမ်းရင့် ဆေးဖက်ဝင် အပင်များကို ရှာဖွေခိုင်းရန် စဉ်းစားခဲ့သော်လည်း ရလဒ်မှာ မကျေနပ်စရာ ဖြစ်ခဲ့ရ၏။

ထိုအပင်များကို နတ်တိမ် မြို့ ရှိ ဆိုင်ကြီးများကသာ လက်ဝါးကြီးအုပ်ထားကြပြီး ရရှိနိုင်သော ပမာဏမှာ အလွန်ပင် ရှားပါးလှပေသည်။

ထို့ကြောင့် အဖက်ဖက်မှ စဉ်းစားပြီးနောက် အစစ်အမှန် တပည့် အဆင့်ကို မြှင့်တင်ခြင်းကသာ ရလဒ်ကို အမြန်ဆုံး မြင်တွေ့နိုင်မည့် နည်းလမ်း ဖြစ်ပေတော့သည်။

သို့သော်လည်း လက်ရှိတွင် အမှတ်များမှာ လုံလောက်နေသေးသဖြင့် ချန်ဖေးသည် အဆင့်တက်ရန် ချက်ချင်း မကြိုးစားသေးပေ။ သူသည် ကျုံးယွမ် ဓားသိုင်းကို အပြီးသတ် ကျွမ်းကျင်သည့် အဆင့်အထိ အရင်ဆုံး ကျင့်ကြံလို၏။

အစစ်အမှန် တပည့်များမှာ အတွင်းတပည့်များကဲ့သို့ မဟုတ်ဘဲ အထူးသဖြင့် အဆင့်မြင့်သူများမှာ အစစ်အမှန် တပည့် ကျင့်စဉ်များကို ကြာမြင့်စွာကတည်းက ကျင့်ကြံလာခဲ့ကြသူများ ဖြစ်သဖြင့် သူတို့၏ ခွန်အားမှာ ခန့်မှန်းရ ခက်လှပေသည်။

ချန်ဖေးအနေဖြင့် သူ၏ ခွန်အားကို အဆင့်တစ်ခုအထိ မြှင့်တင်ထားလို၏။

အခြားသူများကို စိန်ခေါ်သည့် အချိန်ကျလျှင် သူ၏ ဝှက်ဖဲ အားလုံးကို တစ်ပြိုင်နက်တည်း ထုတ်သုံးစရာ မလိုဘဲ အနိုင်ရရှိလိုခြင်း ဖြစ်သည်။

နှစ်နာရီခန့် ကြာပြီးနောက် ချန်ဖေးသည် မျက်လုံးများကို ဖွင့်လိုက်ပြီး လေပူတစ်ချက် မှုတ်ထုတ်လိုက်ရာ သူ၏ ကျင့်ကြံမှု တိုးတက်လာကြောင်း အာရုံခံမိလိုက်၏။ သူ၏ မျက်နှာတွင် အပြုံးတစ်ခု ပေါ်လာတော့သည်။

“ကျုံးယွမ် ဓားသိုင်း ကျင့်ကြံဖို့က အချိန် အနည်းငယ် ထပ်လိုသေးသလို ချန်ယွမ် ဓားကို ပြုစုပျိုးထောင်ဖို့ကလည်း အတူတူပဲ... ဒါပေမဲ့ ဝူမိသားစုရဲ့ ဒြပ်စင် ဝိညာဉ် ကန်ကို အရင်ဆုံး အသုံးပြုလို့ ရတာပဲ...”

ချန်ဖေး ထရပ်လိုက်ပြီး ယခင်က သူ အနိုင်ရရှိခဲ့သည့် ဒြပ်စင် ဝိညာဉ် ကန်အကြောင်းကို တွေးတောလိုက်မိသည်။

အတန်ကြာအောင် ချန်ဖေးသည် ထိုကန်ကို မည်သို့ အသုံးပြုရမည်ကို စဉ်းစားနေခဲ့ခြင်း ဖြစ်၏။ မကြာသေးမီက သူသည် နည်းလမ်းတစ်ခုကို စဉ်းစားမိခဲ့သော်လည်း ၎င်း၏ ထိရောက်မှုမှာမူ ဝူမိသားစု၏ ဒြပ်စင် ဝိညာဉ် ကန်သို့ အမှန်တကယ် ရောက်ရှိမှသာ သိရှိနိုင်ပေလိမ့်မည်။

နောက်တစ်နေ့ မနက်စောစောတွင် ချန်ဖေးသည် ဝူမိသားစု၏ ကြီးကျယ်ခမ်းနားလှသော အိမ်တော်ရှေ့သို့ ရောက်ရှိလာခဲ့ပြီး ၎င်း၏ ခန့်ညားထည်ဝါမှုကို ကြည့်နေမိ၏။

ဝူမိသားစု၏ ဘိုးဘေးမှာ တစ်ချိန်က ယွမ်ချန် ဓားဂိုဏ်းကို စတင် တည်ထောင်ခဲ့သည့် ဘိုးဘေး၏ ဘေးနားမှ အစေခံတစ်ဦး ဖြစ်ခဲ့ဖူးသည်။

သူသည် ဘိုးဘေး၏ ကျင့်ကြံမှု လမ်းစဉ်ကို လိုက်လျှောက်ခဲ့ပြီး နောက်ဆုံးတွင် သူကိုယ်တိုင်လည်း အင်အားကြီးမားသော ပုဂ္ဂိုလ်တစ်ဦး ဖြစ်လာခဲ့ခြင်း ဖြစ်၏။

ထို့ကြောင့် နှစ်ပေါင်းများစွာအတွင်း ဘိုးဘေး၏ အမွေအနှစ်များကို အခြေခံ၍ ဝူမိသားစုမှာ ယနေ့အထိ စည်ပင်ဝပြောနေဆဲ ဖြစ်သည်။

ချန်ဖေးသည် တံခါးဝသို့ ချဉ်းကပ်၍ သူ၏ သံမဏိပြားကို ထုတ်ပြကာ လာရင်းကိစ္စကို ရှင်းပြလိုက်ရာ ဝူမိသားစု၏ အစေခံက သူ့ကို ဧည့်ခန်းမဆောင်ဆီသို့ ခေါ်ဆောင်သွားတော့သည်။

“ညီလေးချန်... မင်းနဲ့ အခုလို တွေ့ရတာ ဝမ်းသာပါတယ်... ကျေးဇူးပြုပြီး ထိုင်ပါဦး...” ဝူဟုန်မင်က ချန်ဖေး ပေးအပ်သည့် သံမဏိပြားကို စစ်ဆေးပြီးနောက် နွေးထွေးစွာ နှုတ်ဆက်လိုက်၏။

ထိုသံမဏိပြားမှာ ဒြပ်စင် ဝိညာဉ် ကန်ကို အသုံးပြုနိုင်ခွင့် ပေးထားခြင်း ဖြစ်သည်။ ဝူဟုန်မင်သည် သူတို့၏ ဒြပ်စင် ဝိညာဉ် ကန်ကို အလောင်းအစားအဖြစ် အသုံးပြုခဲ့သည့် သတင်းကို ကြားသိထားသဖြင့် ထိုကိစ္စကို စုံစမ်းလေ့လာထားပြီး ဖြစ်၏။

ထို့ကြောင့် ချန်ဖေး၏ တစ်ဦးတည်းနှင့် ၉ ဦးကို စိန်ခေါ်ခဲ့သည့်အကြောင်းနှင့် စိန်ခေါ်သူများကို မည်သို့ အလွယ်တကူ အနိုင်ယူခဲ့ကြောင်းကို သူ သိရှိထားသည်။ ဝူဟုန်မင်သည် ချန်ဖေးမှာ ဒွာရ သန့်စင်ခြင်း အဆင့်သို့ အခုမှ အဆင့်တက်ထားသူ ဖြစ်သဖြင့် ကျင့်ကြံမှုကို တည်ငြိမ်စေရန်အတွက် ဒြပ်စင် ဝိညာဉ် ကန်သို့ မကြာမီ လာလိမ့်မည်ဟု ထင်မှတ်ထားခဲ့ခြင်း ဖြစ်၏။

သူသည် ချန်ဖေးမှာ သံမဏိပြားကို ကိုင်ဆောင်၍ ယနေ့မှ ရောက်ရှိလာလိမ့်မည်ဟု မထင်မှတ်ခဲ့ပေ။

“ဒီနေ့ ဒြပ်စင် ဝိညာဉ် ကန်ကို သုံးလို့ ရမလား...” ယဉ်ကျေးသော စကားအချို့ ပြောဆိုပြီးနောက် ချန်ဖေးက တိုက်ရိုက်ပင် မေးမြန်းလိုက်သည်။

“ညီလေးချန် ရောက်လာတဲ့ အချိန်က အတော်လေး ကံကောင်းတယ်လို့ ပြောရမယ်... ဒြပ်စင် ဝိညာဉ် ကန်ကို လွန်ခဲ့တဲ့ နှစ်ရက်ကမှ ပြန်ဖွင့်ထားတာ ဖြစ်သလို တခြား တပည့်တစ်ယောက်ကလည်း လာမယ့် ရက်တွေမှာ ကျင့်ကြံဖို့ စီစဉ်ထားတာ ရှိတယ်... ဒါပေမဲ့ ညီလေးချန် ရောက်လာပြီ ဆိုတော့လည်း အရင်ဆုံး အသုံးပြုခွင့် ပေးရမှာပေါ့...” ဝူဟုန်မင်က ပြုံးလျက် ပြန်ဖြေလိုက်၏။

သူသည် အပိုပြောနေခြင်း မဟုတ်ပေ၊ ဒြပ်စင် ဝိညာဉ် ကန် အသုံးပြုမှုကို အမြဲတမ်း တင်းကျပ်စွာ ထိန်းချုပ်ထားခြင်း ဖြစ်သည်။ အသုံးပြုပြီးတိုင်း စွမ်းအင်များ ပြန်လည် နာလန်ထူရန်အတွက် အချိန်အတန်ကြာ ပိတ်ထားရသောကြောင့် ဖြစ်၏။

ထို့ကြောင့် ဝူမိသားစု၏ မျိုးဆက်သစ်များသည် ကျင့်ကြံရန်အတွက် အလှည့်ကျ စောင့်ဆိုင်းနေကြရခြင်း ဖြစ်သည်။

ပြင်ပလူ တစ်ဦးဦးက သံမဏိပြားကို ယူဆောင်လာပါက သူတို့ကို အရင်ဆုံး အသုံးပြုခွင့် ပေးခြင်းမှာ သဘာဝကျလှပေသည်။ ဝူမိသားစုမှာ ဤကိစ္စတွင် အတော်လေး တရားမျှတမှု ရှိ၏။

အကယ်၍ ပြင်ပလူများက အလှည့်ကျ စောင့်ဆိုင်းနေရဦးမည် ဆိုပါက သံမဏိပြားများကို ထုတ်ဝေနေခြင်းက မည်သည့် အဓိပ္ပာယ် ရှိတော့မည်နည်း။

“ကျေးဇူးတင်ပါတယ် အကြီးအကဲဝူ...” ချန်ဖေးက ဦးညွှတ်၍ ကျေးဇူးတင်စကား ဆိုလိုက်သည်။

“အားနာစရာ မလိုပါဘူး...”

ဝူဟုန်မင်က လက်ဝှေ့ယမ်းပြလိုက်ပြီး ချန်ဖေးကို ကြည့်ကာ “ဒါဆိုရင် ညီလေးချန်... ခဏလောက် အနားယူဦးမလား ဒါမှမဟုတ် ဒြပ်စင် ဝိညာဉ် ကန်ထဲကို ချက်ချင်းပဲ သွားမလား...” ဟု မေးလိုက်၏။

“ချက်ချင်းပဲ သွားပါ့မယ်...” ချန်ဖေးက တိုးညှင်းသော လေသံဖြင့် ဖြေကြားလိုက်သည်။

“ကောင်းပြီလေ... ငါ့နောက်က လိုက်ခဲ့ပါ ညီလေးချန်...”

ဝူဟုန်မင်က ခေါင်းညိတ်၍ ချန်ဖေးကို ဒြပ်စင် ဝိညာဉ် ကန် တည်ရှိရာ နေရာသို့ ခေါ်ဆောင်သွားတော့သည်။

ဒြပ်စင် ဝိညာဉ် ကန်မှာ ဝူမိသားစု အိမ်တော်၏ ဗဟိုချက်တွင် တည်ရှိပြီး ၎င်းကို ပိုမို ထိရောက်စွာ ကာကွယ်နိုင်ရန်နှင့် ပျက်စီးမှုများ မဖြစ်ပေါ်စေရန်အတွက် ထိုနေရာတွင် ထားရှိခြင်း ဖြစ်၏။

ဝူမိသားစု၏ ဒွာရ သန့်စင်ခြင်း အဆင့်ရှိ ပညာရှင်များမှာ အဆက်မပြတ် ပေါ်ထွက်နေကြသည်။ ဒြပ်စင် ဝိညာဉ် ကန်မှာ ၎င်းအတွက် အဓိက အကြောင်းရင်း မဟုတ်စေဦးတော့၊ ကျင့်ကြံမှုကို မြှင့်တင်ရာတွင် အရေးပါသော အခန်းကဏ္ဍမှ ပါဝင်နေသဖြင့် ၎င်းကို ကာကွယ်ရန်မှာ အလွန်ပင် အရေးကြီးလှပေသည်။

အတွင်းကလီစာ သန့်စင်ခြင်း အဆင့်ရှိ ကျင့်ကြံသူများ၏ အရှိန်အဟုန်ဖြင့် သူတို့ နှစ်ဦးမှာ ခန်းမဆောင်ကြီးတစ်ခုဆီသို့ လျင်မြန်စွာ ရောက်ရှိလာခဲ့ကြ၏။ ထိုနေရာတွင် ဝူမိသားစုဝင် တပည့် ဒါဇင်ပေါင်းများစွာက အစောင့်အဖြစ် တာဝန်ယူနေကြသည်။ သူတို့သည် ဝူဟုန်မင်ကို မြင်သောအခါ ဦးညွှတ် နှုတ်ဆက်ကြသော်လည်း ချက်ချင်း ဝင်ခွင့် မပေးကြသေးပေ။

ဝူဟုန်မင်သည် သူ၏ ကျောက်စိမ်း ဆွဲပြားကို ပြသလိုက်ပြီးနောက် ချန်ဖေး ယူဆောင်လာသည့် သံမဏိပြားကို ပေးအပ်လိုက်၏။ ထိုအခါမှသာ သူတို့သည် ခန်းမအတွင်းသို့ ဝင်ရောက်ခွင့် ရရှိကြတော့သည်။

“အရင်တုန်းကတော့ ငါတို့ ဝူမိသားစုရဲ့ ဒြပ်စင် ဝိညာဉ် ကန်ကို ဖျက်ဆီးဖို့ ကြိုးစားခဲ့တဲ့ အရေးမပါတဲ့ သူတွေ ရှိခဲ့ဖူးတယ်... ဒါကြောင့် အခုလိုမျိုး တင်းကျပ်ထားရတာပါ... ညီလေးချန်အနေနဲ့ နားလည်ပေးပါလိမ့်မယ်လို့ မျှော်လင့်ပါတယ်...” ဝူဟုန်မင်က ချန်ဖေးကို ရှင်းပြလိုက်၏။

“စိုးရိမ်စရာ မလိုပါဘူး အကြီးအကဲဝူ...” ချန်ဖေးက အသာအယာ ဦးညွှတ်လျက် ပြန်ဖြေလိုက်သည်။

“ညီလေးချန်... ဒြပ်စင် ဝိညာဉ် ကန်ရဲ့ ပင်မ ကန်ကိုတော့ ပြင်ပလူတွေကို အသုံးမပြုခွင့် မပေးတာ ကြာလှပြီ... မင်းကို သီးသန့် အခန်းတစ်ခုဆီ ခေါ်သွားပေးမယ်... အဲဒီမှာ ကျင့်ကြံရတာက မင်းရဲ့ တိုးတက်မှုကို ထိခိုက်စေမှာ မဟုတ်ပါဘူး...” ဝူဟုန်မင်က ဆက်ပြောလိုက်၏။

ဝူဟုန်မင်သည် ချန်ဖေးကို အခန်းတစ်ခုအတွင်းသို့ ခေါ်ဆောင်သွားပြီး ရှင်းပြချက်များကို ဆက်လက် လုပ်ဆောင်သည်။ ဤကဲ့သို့ စီစဉ်ရခြင်းမှာ ပြင်ပလူများကြောင့် ဒြပ်စင် ဝိညာဉ် ကန် ပျက်စီးမည်ကို ကာကွယ်ရန်အတွက် ဖြစ်၏။ ပင်မ ကန်ကြီးသာ မထိခိုက်သရွေ့ အခြား နေရာများ ပျက်စီးခြင်းကိုမူ ကြီးကျယ်သော ပြဿနာအဖြစ် မသတ်မှတ်ပေ။

ချန်ဖေး ခေါင်းညိတ်လိုက်၏။ သူသည် အခြား နေရာများမှလည်း ဤအချက်ကို ကြားသိထားပြီး ဖြစ်သည်။ ဝူမိသားစု၏ ဤစည်းမျဉ်းမှာ ဆယ်စုနှစ်ပေါင်းများစွာ ရှိခဲ့ပြီ ဖြစ်၏။

“နက်ဖြန် ဒီအချိန်ကျရင် ငါ မင်းကို လာခေါ်ပါ့မယ် ညီလေးချန်...”

ဝူဟုန်မင်က ချန်ဖေးကို ကြည့်၍ ရိုသေစွာ လက်အုပ်ချီလိုက်သည်။

“အကယ်၍ အထဲမှာ ကျင့်ကြံနေရင်းနဲ့ တစ်ခုခု အခက်အခဲ ရှိလာရင် အခန်းထဲက တားမြစ်ချက်ကို ဖွင့်လိုက်ပါ... တစ်စုံတစ်ယောက်က လာပြီး ကူညီပေးပါလိမ့်မယ်...”

“ကျေးဇူးတင်ပါတယ်...”

ချန်ဖေး ခေါင်းညိတ်လိုက်ပြီး တစ်ခဏမျှ တုံ့ဆိုင်းနေကာမှ မေးလိုက်၏။

“အကြီးအကဲဝူ... အထဲမှာ ရှိနေတဲ့ အချိန်ကျရင် ကျွန်တော့်စိတ်ကြိုက် သဘာဝစွမ်းအင်တွေကို သန့်စင်ခွင့် ရှိပါသလား...”

“သဘာဝကျကျပဲ မင်း စိတ်ကြိုက် အသုံးချနိုင်ပါတယ်... ဒါပေမဲ့ ဘာလို့ မေးရတာလဲ...” ဝူဟုန်မင်မှာ အနည်းငယ် ဇဝေဇဝါ ဖြစ်သွားသော်လည်း ခေါင်းညိတ်၍ အတည်ပြုပေးလိုက်၏။

“ကောင်းပါပြီ...”

ဝူဟုန်မင်တွင် အခြား ညွှန်ကြားချက်များ မရှိတော့သည်ကို မြင်သောအခါ ချန်ဖေးသည် လှည့်၍ အခန်းအတွင်းသို့ လှမ်းဝင်လိုက်သည်။ သူ၏ နောက်ကွယ်မှ တံခါးမှာ အလိုအလျောက် ပိတ်သွားတော့၏။ နက်ဖြန် ဤအချိန်ကျမှသာ တံခါးမှာ အလိုအလျောက် ပြန်ပွင့်မည် ဖြစ်သည်။

အကယ်၍ ထိုအချိန်တွင် ချန်ဖေး ထွက်မလာပါက တစ်စုံတစ်ယောက်က လာရောက် သတိပေးပေလိမ့်မည်။

အခန်းအတွင်း၌ ကြီးမားလှသော ကျောက်စိမ်း ခုတင်ကြီးတစ်ခုကို သူ မြင်တွေ့လိုက်ရ၏။ ချန်ဖေးသည် အခန်း၏ အရပ်မျက်နှာ အသီးသီးမှ စွမ်းအင်များ ဟုန်းခနဲ ထွက်ပေါ်နေသည်ကိုလည်း ခံစားလိုက်ရသည်။

ထိုစွမ်းအင်များမှာ ဒြပ်စင် ဝိညာဉ် ကန်၏ ပင်မ ကန်မှ စီးဆင်းလာခြင်း ဖြစ်ပေလိမ့်မည်။

ချန်ဖေး၏ ခန္ဓာကိုယ်အတွင်းရှိ ကျုံးယွမ် ဓားသိုင်း မှာ အလိုအလျောက် လည်ပတ်နေ၏။ သူ၏ ကျင့်ကြံမှုမှာ တဖြည်းဖြည်း တိုးတက်လာနေကြောင်း သူ ခံစားလိုက်ရပေသည်။

***

Book List