Book List

<h2 style="text-align: center;">Chapter 63</h2> <h2 style="text-align: center;">အနက်ရောင်ကြေးခွံဖွတ်အုပ်စုကို သုတ်သင်ခြင်း</h2> <h2 style="text-align: center;">*</h2> <p> </p> <p> </p> <p> </p> <p> </p> <p> </p> <p>ယခုအခါ သူတို့မှာ ကျိုးယွင်မြို့မှ လူများ၏ လက်စားချေခြင်းကို ခံလိုက်ရပြီဖြစ်သည်။</p> <p>“ချင်းယွီမြို့မှ လူတွေက အရှေ့တည့်တည့်မှာပဲရှိတယ်။ ငါတို့က ဒီအနက်ရောင်ကြေးခွံဖွတ်အုပ်ကြီးကို သူတို့ဆီ ဆွဲခေါ်သွားပြီးမှ ဆုတ်ခွာကြတာပေါ့” ကျိုးယွင်မြို့မှ ပါရမီရှင်တစ်ဦးက ပြောလိုက်သည်။</p> <p>“ကောင်းပြီလေ...”</p> <p>ထို့ကြောင့် သူတို့ ခြောက်ဦးမှာ ချင်းယွီမြို့မှလူများ ရှိရာဘက်သို့ အရှိန်မြှင့် ပြေးဝင်လာကြတော့သည်။</p> <p>ကျန်းချန်းတို့နှင့် မီတာအနည်းငယ်အကွာသို့ ရောက်ရှိချိန်တွင် ထက်မြက်သော မြှားတစ်စင်း ပျံသန်းထွက်ပေါ်လာပြီး သိုင်းစစ်သည်နယ်ပယ် အဆင့်ကိုးရှိသော ပါရမီရှင်တစ်ဦးကို ထိမှန်သွားခဲ့သည်။</p> <p>“အား...”</p> <p>“ရှီ…ရှီကျိုး... ဘာဖြစ်တာလဲ” သိုင်းဆရာသခင်နယ်ပယ် အဆင့်တစ်ရှိသော ပါရမီရှင်မှာ ထိတ်လန့်သွားရသည်။ ယခုအချိန်တွင် တစ်စုံတစ်ယောက်က ချောင်းမြောင်း တိုက်ခိုက်လိမ့်မည်ဟု သူ လုံးဝ ထင်မထားခဲ့ပေ။</p> <p>ထိုမြှားကို ပစ်လိုက်သူမှာ ကျန်းချန်းပင်ဖြစ်သည်။ သူက ယခုလို သစ္စာဖောက်ခံရမှုကို မည်သို့ ခွင့်ပြုပါမည်နည်း။</p> <p>အကယ်၍ တစ်ဖက်လူက သူ့ကို ဒုက္ခပေးရန် ကြိုးစားလာလျှင် သူတို့အနေဖြင့် တန်ဖိုးတစ်ခုကို ပြန်လည် ပေးဆပ်ရပေလိမ့်မည်။</p> <p>“မင်းတို့ အရင်ဆုတ်ကြ၊ ငါ သူတို့ကို ကိုင်တွယ်လိုက်မယ်” ကျန်းချန်းက သူ၏နောက်မှ ကျန်းတုန်းနှင့် အခြားသူများကို ပြောလိုက်သည်။</p> <p>အနက်ရောင်ကြေးခွံဖွတ်များက ကိုင်တွယ်ရ မလွယ်ကူသလို မြေအောက်နန်းတော်အတွင်း၌လည်း အခြားသော အန္တရာယ်များ ရှိနေနိုင်သဖြင့် ကျန်းတုန်းတို့အဖွဲ့ ဒဏ်ရာရသွားမည်ကို ကျန်းချန်းက စိုးရိမ်နေခြင်းဖြစ်သည်။</p> <p>“ကျန်းချန်း... ငါတို့လည်း ခွန်အားရှိပါတယ်၊ မင်းကို ကူညီပေးနိုင်ပါတယ်” ကျန်းတုန်းက အမြန် ပြောလိုက်သည်။</p> <p>“ဟုတ်တယ်... ငါတို့ ကူညီနိုင်ပါတယ်” အခြားသူများကလည်း ဝင်ပြောကြသည်။</p> <p>ယခင်က မီးလျှံသံချပ်ကာမြွေနှင့် တွေ့စဉ်ကလည်း ကျန်းချန်းက သူတို့ကို ကာကွယ်ပေးခဲ့သဖြင့် အားလုံးက သူ့အပေါ် ကျေးဇူးတင်နေကြခြင်းပင်။ ယခု အနက်ရောင်ကြေးခွံဖွတ်အုပ်စုနှင့် ထပ်မံတွေ့ဆုံချိန်တွင် ကျန်းချန်းကို တစ်ဦးတည်း မည်သို့ စွန့်ခွာသွားနိုင်ပါမည်နည်း။</p> <p>“ဒါက အရမ်းအန္တရာယ်များတယ်၊ ငါနဲ့ပဲ နေကြစမ်း။ ငါက အသန်မာဆုံးပဲဆိုတော့ မင်းတို့ကို ကာကွယ်ပေးဖို့ တာဝန်ရှိတယ်။ မင်းတို့ အရင်ဆုတ်ကြ၊ မင်းတို့ တစ်ခုခုဖြစ်သွားရင် ငါ အဘိုးကို ဘယ်လို ရှင်းပြရမလဲ” ကျန်းချန်းက ဆိုလိုက်သည်။</p> <p>ကျန်းထျန်းက ကျန်းချန်းအပေါ် ကောင်းမွန်စွာ ဆက်ဆံခဲ့သလို မဝင်ခင်မှာလည်း ကျန်းမိသားစု တပည့်များကို တတ်နိုင်သမျှ ကာကွယ်ပေးရန် မှာကြားခဲ့ခြင်းပင်။ သူတို့မှာ ကျန်းမိသားစု၏ အနာဂတ်များ မဟုတ်ပါလော။ ကျန်းချန်းကလည်း သဘောတူထားခဲ့သဖြင့် သူ ရှိနေသရွေ့ ကျန်းမိသားစု တပည့်များ ဒုက္ခရောက်ရန် ခွင့်ပြုမည် မဟုတ်ပေ။</p> <p>အခြားအင်အားစုများမှ ပါရမီရှင်များကို ကာကွယ်ပေးခြင်းမှာမူ ကျန်းချန်းအတွက် အကျိုးအမြတ်တစ်ခုမျှသာ ဖြစ်သည်။ ကျန်းချန်းက ကျန်းမိသားစုမှာ အချိန်အကြာကြီး နေနိုင်မည် မဟုတ်သဖြင့် မိသားစု၏ အနာဂတ်မှာ ကျန်းတုန်းတို့အပေါ်တွင်သာ မူတည်ပေသည်။</p> <p>“သွားကြတော့…. တကယ်လို့ မြေအောက်နန်းတော်ထဲမှာ ပြန်မဆုံဖြစ်ရင် ကျောက်တံခါးအပြင်ဘက်မှာ ဆုံကြတာပေါ့။ ပြီးတော့ ကျိုးယွင်မြို့က လူတွေကိုလည်း ငါကိုယ်တိုင် သတ်ပစ်မယ်။ အကယ်၍ မင်းတို့ သူတို့ကို မယှဉ်နိုင်ရင် သူတို့နဲ့ တတ်နိုင်သမျှ ဝေးဝေးမှာ နေကြပါ” ကျန်းချန်းက ပြောလိုက်သည်။</p> <p>“ဒါဆိုရင်တော့ ငါတို့ အရင်ဆုတ်လိုက်မယ်” အခြားနည်းလမ်း မရှိသဖြင့် ကျန်းတုန်းက လူစုကို ခေါ်ဆောင်ကာ ထွက်ခွာသွားခဲ့ပြီး ကျန်းချန်းတစ်ဦးတည်းသာ အနက်ရောင်ကြေးခွံဖွတ်အုပ်စုကို တားဆီးရန် ကျန်ရစ်ခဲ့သည်။</p> <p>ကျန်းချန်းအနေဖြင့် အနက်ရောင်ကြေးခွံဖွတ်အုပ်စုကို ကိုင်တွယ်ရန် ယုံကြည်မှု ရှိနေပေသည်။ ၎င်းတို့တွင် အနက်ရောင်ကြေးခွံဖွတ်အကောင်ရေ ကိုးဆယ်ခန့်ရှိပြီး သုံးကောင်မှာ တတိယအဆင့်တွင် ရှိနေကြသော်လည်း ကျန်းချန်းအတွက်မူ ခြိမ်းခြောက်မှု တစ်ခုမဟုတ်ပေ။ ကြီးမားသော ခွန်အားရှေ့တွင် အရေအတွက် သာလွန်မှုမှာ အရာမရောက်ပေ။</p> <p>ထိုအချိန်တွင် ကျိုးယွင်မြို့မှ သိုင်းဆရာသခင်နယ်ပယ် အဆင့်တစ် ကျွမ်းကျင်သူက သူ၏ အဖော်ကို ဆွဲခေါ်ရန် ကြိုးစားလိုက်သည်။</p> <p>သို့သော်လည်း နောက်ထပ် မြှားတစ်စင်း ရောက်ရှိလာခဲ့ပြီး ဒဏ်ရာရနေသော သိုင်းစစ်သည်နယ်ပယ် အဆင့်ကိုး ပါရမီရှင်၏ လည်ပင်းကို တိုက်ရိုက် ထိမှန်သွားကာ သွေးများ ပန်းထွက်လာတော့သည်။ ပါရမီရှင်မှာ မျက်လုံးအပြူးသားဖြင့် သေဆုံးသွားခဲ့ရသည်။ ကျန်းချန်း၏ မြှားပစ်စွမ်းရည်မှာ အလွန်ပင် တိကျလှပေသည်။</p> <p>“ဒါက...” သိုင်းဆရာသခင်နယ်ပယ် အဆင့်တစ် ကျွမ်းကျင်သူမှာ သူ၏အဖော် မျက်စိရှေ့တွင် သေဆုံးသွားသည်ကို မြင်လိုက်ရသဖြင့် ကြောင်အမ်းသွားခဲ့ရသည်။</p> <p>ထိုစဉ်မှာပင် နောက်ထပ် မြှားတစ်စင်း ရောက်ရှိလာပြန်သည်။ အခြား သိုင်းဆရာသခင်တစ်ဦးက ထိုမြှားကို ဓားဖြင့် ခုတ်ချလိုက်ကာ “မင်း ဘာကြောင်နေတာလဲ၊ ပြေးစမ်း။ အနက်ရောင်ကြေးခွံဖွတ်တွေ လာနေပြီ၊ ချင်းယွီမြို့ကလူတွေကလည်း မြှားတွေနဲ့ ပစ်နေကြပြီ” အော်ဟစ်လိုက်သည်။</p> <p>ထိုအခါမှသာ ထိုလူမှာ သတိဝင်လာပြီး သူ့ထံသို့ မြှားတစ်စင်း ကျရောက်လုနီးပါး ဖြစ်ခဲ့သည်ကို သိရှိသွားတော့သည်။ ဤအချိန်တွင် ဒဏ်ရာရသွားခြင်းမှာ အလွန် အန္တရာယ်များလှပေသည်။</p> <p>“ချင်းယွီမြို့ကလူတွေ... ငါ မင်းတို့ကို အလွတ်မပေးဘူး...” ဒေါသတကြီး အော်ဟစ်လိုက်သော်လည်း နောက်ဆုံးတွင် သူတို့ ဆုတ်ခွာသွားကြတော့သည်။</p> <p>ကျိုးယွင်မြို့မှ လူခြောက်ဦးတွင် သိုင်းစစ်သည် အဆင့်ကိုး ပါရမီရှင်တစ်ဦးမှာ ကျန်းချန်း၏ အသတ်ခံလိုက်ရခြင်းပင်။ သူတို့၏ အကြံအစည်မှာ အောင်မြင်လိမ့်မည်ဟု ထင်ထားခဲ့သော်လည်း ကျန်းချန်း၏ မြှားပစ်စွမ်းရည်ကြောင့် သူတို့ထဲမှ တစ်ဦး အသက်ဆုံးရှုံးသွားခဲ့ရသည်။</p> <p>“သူတို့ လွတ်သွားတာပဲ။ ထားလိုက်ပါတော့၊ အနက်ရောင်ကြေးခွံဖွတ်တွေ လာနေပြီဆိုတော့ ဒါကို အရင် ရှင်းရမယ်” ကျန်းချန်းက မျက်မှောင်ကြုတ်လိုက်သည်။ အချိန်က အလွန် တိုတောင်းလှသဖြင့် ထိုလူများကို လိုက်သတ်ရန် ကျန်းချန်းမှာ အင်အား မရှိတော့ပေ။ အကယ်၍ သူသာ အနက်ရောင်ကြေးခွံဖွတ်များကို မတားဆီးနိုင်ပါက ကျန်းတုန်းတို့အဖွဲ့မှာ သူတို့၏ ပစ်မှတ် ဖြစ်သွားပေလိမ့်မည်။</p> <p>“ဧကရာဇ်ဓားသိုင်း” ကျန်းချန်းက ငွေရောင်ဓားကို ကိုင်စွဲကာ အနက်ရောင်ကြေးခွံဖွတ်အုပ်စုအတွင်းသို့ ပြေးဝင်လိုက်သည်။</p> <p>ဓားအလင်းတန်းနှင့်အတူ ပြင်းထန်လှသော ဓားစွမ်းအင်များ ထွက်ပေါ်လာခဲ့သည်။ ဓားချက်က ဒုတိယအဆင့် အနက်ရောင်ကြေးခွံဖွတ်တစ်ကောင်ကို ထိမှန်သွားကာ သွေးများ ချက်ချင်း စီးကျလာတော့သည်။ အနက်ရောင်ကြေးခွံဖွတ်မှာ နာကျင်စွာ အော်ဟစ်လိုက်ရသည်။</p> <p>သွေးညှီနံ့များကြောင့် ကျန်ရှိသော အနက်ရောင်ကြေးခွံဖွတ်များမှာ ပိုမို ကြမ်းတမ်းလာကြပြီး ကျန်းချန်းထံသို့ အတင်း ခုန်အုပ်လိုက်ကြသည်။ ကျန်းချန်းကလည်း သူ၏ ငွေရောင်ဓားကို ဆက်တိုက် ဝေ့ယမ်းနေခဲ့သည်။</p> <p>သို့သော်လည်း ဓားချက်က တတိယအဆင့် အနက်ရောင်ကြေးခွံဖွတ်၏ ကိုယ်ပေါ်သို့ ကျရောက်သွားချိန်တွင် အမှတ်အသားတစ်ခုသာ ကျန်ရစ်ခဲ့ပြီး အရေပြားကို ဖောက်ထွက်နိုင်ခြင်း မရှိသည်ကို တွေ့လိုက်ရသဖြင့် ကျန်းချန်း အနည်းငယ် အံ့ဩသွားရသည်။</p> <p>အနက်ရောင်ကြေးခွံဖွတ်များတွင် ထူထဲလှသော သံချပ်ကာကဲ့သို့ ကြေးခွံများ ရှိနေသောကြောင့်ပင်။ ငွေရောင်ဓားက ဒုတိယအဆင့်များကို သတ်နိုင်သော်လည်း တတိယအဆင့်များအတွက်မူ အစွမ်းမပြနိုင်ပေ။ ကြေးခွံကို ဖောက်ထွက်ရန်အတွက် တစ်နေရာတည်းကို အနည်းဆုံး သုံးချက်ခန့် ခုတ်ရန် လိုအပ်သော်လည်း ပြင်းထန်သော တိုက်ပွဲအတွင်း ထိုသို့ပြုလုပ်ရန်မှာ မလွယ်ကူလှပေ။</p> <p>ကျန်းချန်းက သူ၏ ကြေးခွံကို မဖောက်နိုင်သည်ကို မြင်သောအခါ တတိယအဆင့် အနက်ရောင်ကြေးခွံဖွတ်က သူ၏ အမြီးဖြင့် ကျန်းချန်းကို ဝှေ့ယမ်း တိုက်ခိုက်လိုက်ရာ ဆယ်မီတာကျော် လွင့်ထွက်သွားခဲ့ရသည်။ ကျန်းချန်းက သူ ထိမှန်သွားသော နေရာကို အမြန် ကြည့်လိုက်သည်။ ကံကောင်းထောက်မစွာဖြင့် ကျန်းချန်း၏ ခန္ဓာကိုယ်မှာ သန်မာသဖြင့် ပြင်းထန်သော ဒဏ်ရာ မရရှိခဲ့ပေ။</p> <p>“ဒီကောင်တွေက ကိုင်တွယ်ရ နည်းနည်း ခက်သားပဲ။ ငွေရောင်ဓားက မင်းတို့အတွက် အစွမ်းမပြဘူးဆိုတော့ မိစ္ဆာဝိညာဉ်ဓားကိုပဲ သုံးရတော့မှာပေါ့” ကျန်းချန်းက ငွေရောင်ဓားကို ပြန်သိမ်းလိုက်ပြီး မိစ္ဆာဝိညာဉ်ဓားကို ထုတ်ယူလိုက်တော့သည်။</p> <p>မိစ္ဆာဝိညာဉ်ဓားကို ကိုင်စွဲလိုက်သည်နှင့် ကျန်းချန်းမှာ မိစ္ဆာကျင့်ကြံသူတစ်ဦးအဖြစ် ချက်ချင်း ပြောင်းလဲသွားခဲ့ပြီး မိစ္ဆာအရှိန်အဝါများ ပေါက်ကွဲထွက်ပေါ်လာကာ သူ၏ တိုက်ခိုက်ရေးစွမ်းရည်မှာလည်း နှစ်ဆခန့် မြင့်တက်လာခဲ့သည်။</p> <p>အနက်ရောင်ကြေးခွံဖွတ်များက ကျန်းချန်းထံသို့ အတင်း ပြေးဝင်လာကြပြန်သည်။</p> <p>“ဧကရာဇ်ဓားသိုင်း... ဓားကွက်တစ်ဆယ်” ကျန်းချန်းက ဧကရာဇ်ဓားသိုင်း၏ ဓားကွက် တစ်ဆယ်စလုံးကို လျင်မြန်စွာ အသုံးပြုလိုက်သည်။</p> <p>မိစ္ဆာဝိညာဉ်ဓား၏ စွမ်းအားက အလွန်ပင် ကြီးမားလှပေသည်။ ဒုတိယအဆင့် အနက်ရောင်ကြေးခွံဖွတ်များမှာ ဟင်းသီးဟင်းရွက် လှီးဖြတ်သလိုပင် အပိုင်းပိုင်း ပြတ်ကုန်ကြတော့သည်။ တတိယအဆင့် အနက်ရောင်ကြေးခွံဖွတ်များမှာလည်း သူတို့၏ ကြေးခွံများ ဖောက်ထွက်ခံလိုက်ရပြီး သွေးများ ပန်းထွက်ကာ သေဆုံးသွားကြရသည်။</p> <p>ခြေရာမဲ့ခြေလှမ်း၏ အကူအညီဖြင့် ကျန်းချန်းမှာ လျှပ်စီးလက်သကဲ့သို့ လျင်မြန်စွာ လှုပ်ရှားလျက် သူ့ရှေ့မှ အနက်ရောင်ကြေးခွံဖွတ်များကို အပြတ်ရှင်းလိုက်တော့သည်။ ခဏအကြာတွင် မြေပြင်ပေါ်၌ အနက်ရောင်ကြေးခွံဖွတ် ကိုးဆယ်ကျော်လုံး သေဆုံးသွားခဲ့ပြီဖြစ်သည်။</p> <p>ကျန်းချန်းမှာလည်း အနည်းငယ် မောဟိုက်နေရသည်။ အချိန်တိုအတွင်း များပြားသော ရန်သူများကို သတ်ဖြတ်ရခြင်းက သူ့အတွက် အတော်လေး ပင်ပန်းစေခဲ့သည်။</p> <p>ကျန်းချန်းက ပတ်ဝန်းကျင်ကို ကြည့်လိုက်ရာ ကျိုးယွင်မြို့မှလူများမှာ ထွက်ပြေးသွားကြပြီဖြစ်ကြောင်း တွေ့လိုက်ရသည်။</p> <p>‘သူတို့ ကံကောင်းပြီး လွတ်သွားတာပဲ။ နောက်တစ်ခါ ကျိုးယွင်မြို့ကလူတွေနဲ့ တွေ့ရင်တော့ ငါ သူတို့ကို အသေသက်ညှာမှာ မဟုတ်ဘူး’ ကျန်းချန်းက သူ့ဘာသာ တွေးတောလိုက်သည်။</p> <p>ကျိုးယွင်မြို့မှ လူများမှာ ပြဿနာကို ချင်းယွီမြို့ဘက်သို့ လွှဲချခဲ့ခြင်းပင်။ အကယ်၍ ကျန်းချန်းသာ အစွမ်းမထက်ခဲ့ပါက ကျန်းတုန်းတို့အဖွဲ့မှာ သေချာပေါက် ဒုက္ခရောက်သွားပေလိမ့်မည်။</p> <p> </p> <p> </p> <p> </p> <p style="text-align: center;">***</p>


Save