BIT

Title

Show in VIP/Series

Status (Active / Inactive)

ဖောက်... ဖောက်... ဖောက်...။

ပြင်းထန်သော အဟုန်နှင့်အတူ ပစ်လွှတ်လိုက်သော ကျည်ဆံသုံးတောင့်သည် နက်သာမုဆိုး၏ ခန္ဓာကိုယ်ပေါ်သို့ တိုက်ရိုက်ကျရောက်သွားပြီး ခရမ်းနုရောင် "သွေးစက်ဝန်းများ" အဖြစ်သို့ တခဏချင်း ပြောင်းလဲသွားချေသည်။

နက်သာမျိုးနွယ်စုဝင်များ၏ ရုပ်သွင်မှာ သဏ္ဌာန်ပြောင်းလဲနေသော ကုန်းနေဘီလူး ရေဘဝဲကြီးနှင့် ဆင်တူလှပေရာ ယင်း၌ ခြေလက်အင်္ဂါသဖွယ် လက်တံရှစ်ခုနှင့် ရှေ့နောက်မျက်စိ လေးလုံး ပါရှိလေသည်။

တစ်ကိုယ်လုံးတွင် မည်းနက်သော ခရမ်းရောင် အကြေးခွံများ ဖုံးလွှမ်းလျက် အမြင့်မှာလည်း လေးမီတာခန့် ရှိပေသည်။

ထိုထူးဆန်းသော သတ္တဝါတို့သည် အလွန်အမင်း ခိုင်မာသော ကိုယ်ထည် ခုခံနိုင်စွမ်းရှိကြကုန်၏။

ဝမ်ချန် အသုံးပြုလိုက်သော ပြောင်းဝကျယ် ရိုင်ဖယ်သေနတ်မှာ စွမ်းအင်မြင့် ယမ်းမှုန်များကို အသုံးပြုထားခြင်း ဖြစ်သည်။

ယင်းသေနတ်၏ တစ်ချက်ပစ်ခတ်မှုသည် လူတစ်ယောက်ကို နှစ်ပိုင်းပြတ်သွားစေနိုင်သော်လည်း ယခုအခါ၌မူ နက်သာမုဆိုး၏ အရေပြားကိုသာ အနည်းငယ် ဒဏ်ရာရစေခဲ့ချေသည်။

နက်သာမျိုးနွယ်စုဝင်များသည် ကာဗွန်အခြေပြု သက်ရှိများ မဟုတ်ကြသော်လည်း သူတို့၏ ခန္ဓာကိုယ်အတွင်း၌ "သွေး" များ ရှိနေဆဲပင်။ ဝမ်ချန်၏ ပစ်ခတ်မှု သုံးချက်သည် အခြေစိုက်စခန်းအတွင်းသို့ ရုတ်ခြည်း ကျူးကျော်ဝင်ရောက်လာသော နက်သာမုဆိုးအား အတန်ငယ် ထိခိုက်စေခဲ့သည်။

သို့ရာတွင် ထိုသတ္တဝါသည် အလွန်အမင်း ဒေါသထွက်သွားခဲ့ပြီး လက်တံရှစ်ခုလုံးကို တစ်ပြိုင်နက် မြှောက်ကာ လျှပ်စီးကဲ့သို့သော အရှိန်အဟုန်ဖြင့် ဝမ်ချန်ရှိရာသို့ ထိုးနှက်လာခဲ့တော့သည်။

ထိုလက်တံရှစ်ခုမှာ နက်သာမျိုးနွယ်စုတို့၏ အစွမ်းထက်ဆုံး လက်နက်များ ဖြစ်ကြကုန်၏။ ယင်းတို့သည် အလွန်ထူထဲသော သတ္တုစပ်ပြားများကို ထိုးဖောက်နိုင်ရုံသာမက တိုက်ခိုက်ရေး မက်ကာများ၏ သံချပ်ကာပြားများကိုပင် ဆွဲဖြဲပစ်နိုင်စွမ်း ရှိပေသည်။

ထို့အပြင် နက်သာမျိုးနွယ်စုတို့သည် ပတ်ဝန်းကျင် တစ်ခွင်လုံးကို ၃၆၀ ဒီဂရီ မြင်ကွင်းဖြင့် ကြည့်ရှုနိုင်စွမ်း ရှိကြရာ ဘေးဘက် သို့မဟုတ် နောက်ဘက်မှ ချောင်းမြောင်းတိုက်ခိုက်ရန် မည်သို့မျှ မဖြစ်နိုင်ပေ။

၎င်းတို့၏ မျက်လုံးလေးလုံးအနက် သုံးလုံး ပျက်စီးသွားလျှင်ပင် တိုက်ခိုက်ရေး စွမ်းရည်အပေါ် များစွာ သက်ရောက်မှု မရှိချေ။

ယင်းတို့သည် သက်ရှိတိုက်ခိုက်ရေး လက်နက်များပင် ဖြစ်တော့သည်။

သာမန်အားဖြင့်မူ အလတ်စား တိုက်ခိုက်ရေး မက်ကာများ သို့မဟုတ် တာဝေးပစ် အမြောက်တပ်ဖွဲ့များဖြင့်သာ နက်သာမျိုးနွယ်စုကို ရင်ဆိုင်နိုင်ပေမည်။

နက်သာမုဆိုး တစ်ကောင်တည်းနှင့်ပင် D01359 အခြေစိုက်စခန်းရှိ လူအားလုံးကို လွယ်ကူစွာ သတ်ဖြတ်ပစ်နိုင်ပေသည်။

သို့ရာတွင် ကံဆိုးစွာပင် ယင်းသတ္တဝါသည် ဝမ်ချန်နှင့် လာရောက် ထိပ်တိုက်တွေ့ခဲ့ချေပြီ။

ဝမ်ချန်သည် လျှပ်စီးအဟုန်ဖြင့် ပြေးဝင်လာသော လက်တံများကို မြင်သော်လည်း နောက်သို့ ဆုတ်ခြင်း သို့မဟုတ် ရှောင်တိမ်းခြင်း မပြုဘဲ ရှေ့သို့ အဟုန်ပြင်းစွာ ခုန်ဝင်လိုက်လေရာ နက်သာမုဆိုး၏ ရင်ခွင်ထဲသို့ မိမိဘာသာ တိုးဝင်သွားသကဲ့သို့ ဖြစ်နေသည်။

သတ္တဝါကြီး၏ လက်တံများ မစေ့နိုင်မီမှာပင် တောက်ပသော ဓားအလင်းတန်းတစ်ခုသည် ၎င်း၏ ခန္ဓာကိုယ်ကို အောက်မှ အထက်သို့ ပိုင်းဖြတ်သွားခဲ့ချေပြီ။

နက်သာမုဆိုးသည် တုန်ခါသွားပြီးနောက် ပြာလဲ့လဲ့ တောက်ပနေသော မျက်လုံးနှစ်လုံးမှာ ပိုမိုတောက်ပလာကာ ခန္ဓာကိုယ်မှာ ရုတ်ခြည်းပင် နှစ်ပိုင်း ကွဲထွက်သွားတော့သည်။

နောက်တစ်ခဏတွင် နက်သာမုဆိုးသည် အသံမထွက်ဘဲ ပေါက်ကွဲသွားကာ အလင်းမှုန်များအဖြစ် လွင့်စင်သွားပြီး မြေပြင်ပေါ်သို့ ကျရောက်သွားချေသည်။

ထိုနေရာ၌ ခရမ်းရောင်ရှိသော တောက်ပသည့် အလင်းအမြူတေလေးတစ်ခုသာ ကျန်ရစ်တော့သည်။

ဝမ်ချန်သည် လက်ဝါးခန့်ရှိသော ထိုအလင်းအမြူတေကို ဖမ်းယူလိုက်၏။

ယင်းမှာ "နက်သာအမြူတေ" ပင် ဖြစ်သည်။

ဤစွမ်းအင်အမြူတေသည် နက်သာမျိုးနွယ်စုဝင်များ သေဆုံးပြီးနောက် ဖြစ်ပေါ်လာခြင်းဖြစ်ပြီး အင်ပါယာရှိ သိပ္ပံပညာရှင်များက များစွာသော ကိစ္စရပ်များအတွက် သုတေသနပြု အသုံးပြုနေကြသော အရာတစ်ခု ဖြစ်သည်။

သို့သော် နက်သာအမြူတေ ဖြစ်ပေါ်လာရန်မှာ အလွန်ခက်ခဲလှပေသည်။ အကယ်၍ နက်သာမျိုးနွယ်စုကို အစွမ်းထက် အိုင်းယွန်းအမြောက် ကဲ့သို့သော လက်နက်ဖြင့် သတ်ဖြတ်ပါက အမြူတေ ရရှိရန်မှာ မဖြစ်နိုင်သလောက်ပင်။

တိုက်ခိုက်ရေး မက်ကာများ၏ ဓားလက်နက်များဖြင့် သတ်ဖြတ်မှသာ အမြူတေ ကျန်ရစ်နိုင်ခြေ ပိုများပေသည်။

ယနေ့အခါတွင် နက်သာအမြူတေများကို အင်ပါယာနှင့် မဟာမိတ် နှစ်ဖက်လုံး၌ မဟာဗျူဟာမြောက် အရင်းအမြစ်များအဖြစ် သတ်မှတ်ထားကြပြီး အဆင့်မြင့် မက်ကာများအတွက် စွမ်းအင်အဖြစ် အသုံးပြုကြရာ သာမန် စွမ်းအင်ကျောက်တုံးများထက် ပိုမိုစွမ်းအားကြီးမားလှသည်။

ယခု ဝမ်ချန် ရရှိလိုက်သော နက်သာအမြူတေကို အင်ပါယာ၏ သက်ဆိုင်ရာ ဌာနများတွင် လဲလှယ်ပါက ကြယ်တာရာသုံးငွေ တစ်သန်းကျော် သို့မဟုတ် ထိုမျှ တန်ဖိုးရှိသော ပစ္စည်းများနှင့် လဲလှယ်နိုင်ပေသည်။

သို့ရာတွင် ဝမ်ချန်မှာမူ ငွေကြေး လိုအပ်နေသူ မဟုတ်သဖြင့် ထိုသို့ ရရှိခြင်းအပေါ် များစွာ ဝမ်းသာပီတိ ဖြစ်မနေပေ။

သူ၏ အကြည့်တို့သည် လှေကားဘက်သို့ ရောက်ရှိသွားရာ ဒုတိယမြောက် နက်သာမုဆိုး တစ်ကောင်ကို မြင်လိုက်ရပြန်သည်။

ဝမ်ချန်သည် မဆိုင်းမတွပင် ရှေ့သို့ တိုးဝင်သွားလေတော့သည်။

နက်သာမုဆိုးသည် စင်္ကြံလမ်းပေါ်သို့ ဆင်းသက်လာသည်နှင့် ဝမ်ချန်ကို မြင်သော် လက်တံရှစ်ခုလုံးကို မြှောက်လိုက်ရာ လက်တံထိပ်ဖျားများသည် ပန်းပွင့်ချပ်များကဲ့သို့ ပွင့်ဟသွားပြီး စူးရှသော သွားများ ပြည့်နှက်နေသည့် ခရမ်းနီရောင် ပါးစပ်များကို တွေ့လိုက်ရသည်။

နောက်တစ်စက္ကန့်တွင် မမြင်ရသော အာထရာဆောနစ် အသံလှိုင်းရှစ်ခုသည် ဝမ်ချန်ရှိရာသို့ တပြိုင်နက်တည်း ပစ်လွှတ်လိုက်ချေပြီ။

ဤသည်မှာ နက်သာမုဆိုးတို့၏ သေစေနိုင်သော လက်နက်ပင် ဖြစ်သည်။ ယင်းလှိုင်းများသည် စွမ်းအင်ဒိုင်းများကို ဖျက်ဆီးနိုင်ရုံမျှမက သံချပ်ကာများ၏ နောက်ကွယ်ရှိ သက်ရှိများကိုပါ ထိခိုက်စေနိုင်စွမ်း ရှိပေသည်။

အင်ပါယာနှင့် နက်သာမျိုးနွယ်စုတို့၏ စစ်ပွဲများအတွင်း၌ သတ္တိပြောင်မြောက်သော မက်ကာ စစ်သည်တော် အမြောက်အမြားသည် ဤလက်နက်ကြောင့် အသက်ဆုံးရှုံးခဲ့ကြရသည်။

နောက်ပိုင်းတွင် အင်ပါယာမှ ခုခံနိုင်သော နည်းပညာများကို တီထွင်နိုင်ခဲ့မှသာ သေဆုံးမှုများ လျော့ကျသွားခဲ့ခြင်း ဖြစ်သည်။

သို့သော် ပေါ့ပါးသော မက်ကာများသည် ဤစွမ်းအားကို မခုခံနိုင်သကဲ့သို့ တစ်ဦးချင်း စစ်သည်တော်များမှာလည်း နက်သာမုဆိုးနှင့် အနီးကပ် တွေ့ဆုံပါက အလွယ်တကူပင် ချေမှုန်းခံရနိုင်ပေသည်။

ဝမ်ချန်မှာမူ မည်သည့် အကာအကွယ် ချပ်ဝတ်ကိုမျှ ဝတ်ဆင်ထားခြင်း မရှိသော်လည်း ထိုအသံလှိုင်းများ ကျရောက်လာချိန်၌ မမြင်ရသော အတားအဆီးတစ်ခုကြောင့် လွင့်စင်သွားခဲ့ရသည်။

သို့သော် သူ၏ ပြေးဝင်နှုန်းမှာမူ မည်သို့မျှ ထိခိုက်မှု မရှိချေ။

ယင်းမှာ "ချီဝိညာဉ်ဒိုင်းကာ" ပင် ဖြစ်တော့သည်။

ဤသည်မှာ နက်သာမုဆိုး မမျှော်လင့်ထားသော ကိစ္စဖြစ်ရာ ထိုသတ္တဝါမှာ တခဏမျှ ဆွံ့အသွားချေသည်။

ဝမ်ချန်သည် ပြန်လည် တုံ့ပြန်ရန် အခွင့်အရေး မပေးဘဲ လက်နှစ်ဖက်ဖြင့် ကိုင်ထားသော ဓားရှည်ကြီးကို ရှေ့သို့ လွှဲယမ်းကာ ပိုင်းဖြတ်လိုက်လေသည်။

ဝမ်ချန် အသုံးပြုသော ဓားရှည်မှာ ကြယ်တာရာအမြူတေနှင့် မူလစွမ်းအင်တို့ကို ပေါင်းစပ်ပြုလုပ်ထားခြင်း ဖြစ်ပေရာ ယင်းသည် အလွန်အမင်း ထက်မြက်လှပေသည်။

ဤအပိုင်းအဖြတ်သည် ဝမ်ချန်၏ ပြင်းထန်သော စိတ်အာရုံစွမ်းအားနှင့် ပေါင်းစပ်သွားရာ ဟင်းလင်းပြင်ကိုပင် ပိုင်းဖြတ်လိုက်သကဲ့သို့ ရှိချေသည်။

နက်သာမုဆိုးမှာမူ ရှောင်တိမ်းရန် မတတ်နိုင်ဘဲ ခန္ဓာကိုယ် နှစ်ပိုင်းပြတ်သွားသည်ကိုသာ ကြည့်နေရတော့သည်။

ထိုသတ္တဝါသည်လည်း နက်သာအမြူတေအဖြစ်သို့ ပြောင်းလဲသွားပြန်သည်။

ဝမ်ချန်သည် ဓားကို ကိုင်ထားရင်း ထိုအမြူတေကို ချက်ချင်း မကောက်ယူသေးဘဲ သူ၏ စိတ်အာရုံစွမ်းအားကို ဖြန့်ကျက်ကာ လှေကားအထက်ပိုင်းကို စစ်ဆေးလိုက်သည်။

ခေတ္တအကြာတွင် သူ၏ စိတ်အာရုံစွမ်းအားကို ပြန်လည် ရုပ်သိမ်းလိုက်၏။

ရန်သူသစ်များ ထပ်မံ မရှိတော့ချေ။

ဝမ်ချန်သည် မြေပြင်ပေါ်မှ နက်သာအမြူတေကို ကောက်ယူကာ ဓားရှည်ကို လက်စွပ် အတွင်းသို့ ပြန်ထည့်လိုက်ပြီး အခြေစိုက်စခန်းအတွင်းသို့ ပြန်ဝင်ခဲ့လေသည်။

ပျက်စီးနေသော တံခါးဝသို့ ရောက်သောအခါ လက်နက်အမျိုးမျိုးကို ကိုင်ဆောင်ထားကြသော လူကွီနှင့် အခြားသူများကို တွေ့လိုက်ရသည်။

သူတို့သည် ဝမ်ချန်ကို ကူညီရန် လာကြခြင်း ဖြစ်သော်လည်း တိုက်ပွဲမှာ ဤမျှ မြန်ဆန်စွာ ပြီးဆုံးသွားလိမ့်မည်ဟု မထင်မှတ်ထားကြချေ။

လူကွီက အံ့အားသင့်စွာဖြင့် "ဆရာ... နက်သာမျိုးနွယ်စုတွေ ထွက်ပြေးသွားကြတာလား" ဟု မေးလိုက်သည်။

"မဟုတ်ဘူး။"

ဝမ်ချန်က လက်ထဲမှ နက်သာအမြူတေကို ပြရင်း "ငါ အကုန်လုံးကို သတ်ပစ်လိုက်ပြီ" ဟု အေးဆေးစွာ ပြောလိုက်ချေသည်။

ထိုလူစုသည် အံ့အားသင့်စွာဖြင့် အသက်ရှူပင် မှားသွားကြပြီး သူတို့ နားကြားမှားလေသလားဟုပင် ထင်မှတ်သွားကြသည်။

ဤသည်မှာ နက်သာမုဆိုး မဟုတ်လော။

တိုက်ခိုက်ရေး မက်ကာ သို့မဟုတ် အကြီးစား လက်နက်များ မပါဘဲ နက်သာမျိုးနွယ်စုကို သတ်ဖြတ်ရန်မှာ မဖြစ်နိုင်ဟုသာ အားလုံးက ယူဆထားကြသည်။

တန်ပါစ်ဂြိုဟ်ပေါ်တွင် ကျန်ရစ်နေသူများအတွက် နက်သာမုဆိုးသည် ထိတ်လန့်ဖွယ် အိပ်မက်ဆိုးတစ်ခုကဲ့သို့ပင်။

သူတို့မှာ ပုန်းအောင်းခြင်း၊ ထွက်ပြေးခြင်း သို့မဟုတ် အသည်းအသန် ခုခံခြင်းတို့ကိုသာ ပြုလုပ်နိုင်ခဲ့ကြသည်။ ထိုသတ္တဝါများကို သတ်ဖြတ်နိုင်လိမ့်မည်ဟု မည်သူမျှ မတွေးရဲခဲ့ကြချေ။

သို့ရာတွင် ဝမ်ချန်မှာမူ ယင်းသို့ပြုလုပ်ရသည်မှာ စားသောက်ရသည့်အလား ရိုးရှင်းလှသည်ဟု ဆိုနေပြန်သည်။

ဝမ်ချန်၏ လက်ထဲရှိ နက်သာအမြူတေမှာ ခိုင်လုံသော သက်သေဖြစ်နေသဖြင့် မည်သူမျှ မယုံကြည်ဟု မပြောရဲကြချေ။

ဝမ်ချန်ကမူ "ဒီမှာ တခြား ထွက်ပေါက်တွေ ရှိသေးလား" ဟု တိုက်ရိုက်ပင် မေးမြန်းလိုက်သည်။

လူကွီသည် သတိပြန်ဝင်လာပြီး "ရှိပါတယ်... ဒါပေမဲ့ ပုံမှန် မသုံးပါဘူး၊ အရေးပေါ် အခြေအနေမှာပဲ သုံးတဲ့ ထွက်ပေါက်တွေပါ" ဟု ကပျာကယာ ဖြေကြားလိုက်သည်။

"ဒါဆို ရပြီ။"

ဝမ်ချန်က နောက်ကွယ်ရှိ စင်္ကြံလမ်းကို ညွှန်ပြကာ "ဒီနေရာကို လုံးဝ ပိတ်ပစ်လိုက်၊ လိုအပ်ရင် ဖောက်ခွဲပစ်လိုက်ပါ... နက်သာမျိုးနွယ်စုတွေ ထပ်ဝင်မလာနိုင်အောင်လို့ပဲ" ဟု မှာကြားလိုက်သည်။

ရှုချန်ကျစ်သည် D01359 အခြေစိုက်စခန်းတွင် မရှိတော့သဖြင့် ဝမ်ချန်အနေနှင့်လည်း ဤနေရာ၌ နက်သာမျိုးနွယ်စု၏ တိုက်ခိုက်မှုများကို ခုခံရန် အမြဲတစေ နေထိုင်နေ၍ မရချေ။

ထို့ကြောင့် ပွင့်ဟနေသော ဤစင်္ကြံလမ်းကို ပိတ်ဆို့ပစ်ခြင်းမှာ အကောင်းဆုံး နည်းလမ်းပင် ဖြစ်တော့သည်။

***

Book List