Book List

<h2 style="text-align: center;">အခန်း (၁၃၀၂)</h2> <h2 style="text-align: center;">နက္ခတ်တာရာ ပင်လယ်ပြင် (၁၀၇)</h2> <h2 style="text-align: center;">*</h2> <p> </p> <p> </p> <p>ဝုန်း...။</p> <p>နားစည်ကွဲလုမတတ် ဟည်းထွက်လာသော ပေါက်ကွဲသံကြီးနှင့်အတူ D01359 အခြေစိုက်စခန်းမှ မြေပြင်သို့ တက်ရာလမ်းမကြီးမှာ လုံးဝဥဿုံ ပျက်စီးသွားချေပြီ။</p> <p>ပြိုကျလာသော ကျောက်တုံးကြီးများက ထွက်ပေါက်ကို တစ်စေ့တစ်စပ်တည်း ပိတ်ဆို့သွားလေသည်။</p> <p>ထိုအခါမှသာ အခြေစိုက်စခန်းအတွင်းရှိ လူစုမှာ စိတ်အေးလက်အေး ရှိသွားကြတော့သည်။</p> <p>ထိုထက် ပို၍အရေးကြီးသည်မှာ အိုင်းရွန်းတိုက်ဂါးနှင့် ဘားပိုင်ရှင်တို့ လက်ဝါးကြီးအုပ်ထားသော ရိက္ခာထောက်ပံ့မှုများမှာ ပြည်သူတို့၏ လက်ဝယ်သို့ ပြန်လည်ရောက်ရှိလာခြင်းပင်။</p> <p>ရှေးလူတို့ ဆိုရိုးရှိသည်မဟုတ်လော... "လက်ထဲမှာ ဆန်အိုးရှိမှ စိတ်ထဲမှာ အေးမြနိုင်သည်" ဟူ၍။ ၎င်းမှာ အမှန်ကန်ဆုံးသော အချက်ပင် ဖြစ်ချေသည်။</p> <p>အလုပ်ရှုပ်နေကြသော အချိန်အတန်ကြာပြီးနောက်တွင် လုကွီသည် လူတစ်စုကို ဦးဆောင်ကာ ဝမ်ချန်ထံ တစ်ဖန်ရောက်ရှိလာပြီး "ဆရာ.. ကျွန်တော်တို့ကို ဒီနေရာကနေ ခေါ်ထုတ်သွားပေးနိုင်မလား" ဟု မျှော်လင့်တကြီး မေးမြန်းလေသည်။</p> <p>လူအုပ်ကြီးမှာလည်း ဝမ်ချန်ကို အားကိုးတကြီး ကြည့်နေကြပြီး စိုးရိမ်တကြီး တောင်းပန်တိုးလျှိုးနေကြ၏။</p> <p>ရိက္ခာများ ရှိနေသော်ငြားလည်း နက်သာမျိုးနွယ်စုများ မည်သည့်အချိန်တွင် တစ်ဖန်ပြန်၍ တိုက်ခိုက်လာမည်ကို မည်သူမျှ မခန့်မှန်းနိုင်ကြပေ။</p> <p> ဤ D01359 အခြေစိုက်စခန်းမှာ မည်သို့မျှ လုံခြုံမှုမရှိတော့ကြောင်း အားလုံးက ကောင်းစွာနားလည်ထားကြသည်။</p> <p>"လောလောဆယ်တော့ မဖြစ်နိုင်သေးဘူး"</p> <p>ဝမ်ချန်က တုံ့ဆိုင်းခြင်းမရှိဘဲ ပြန်လည်ဖြေကြားလိုက်သည်။ "ငါ့မှာ ကိုယ်ပိုင်တာဝန်ရှိသေးတယ်၊ ငါ့ရဲ့ ကယ်ဆယ်ရေးသင်္ဘောက နောက်ထပ်တစ်လကြာမှ ရောက်လာမှာ၊ ရောက်လာခဲ့ရင်တောင် ဒီလောက်များတဲ့ လူတွေကို တစ်ခါတည်း တင်ခေါ်သွားဖို့ မဖြစ်နိုင်ဘူး"</p> <p>လုကွီနှင့် အပေါင်းအပါများမှာ တစ်ဦးကိုတစ်ဦး ကြည့်လိုက်ကြပြီး စိတ်ပျက်အားလျော့သွားကြသည်။ သူတို့သည် ဤအခြေစိုက်စခန်းတွင် အင်ပါယာသို့ ပြန်ရနိုးနိုးဖြင့် သုံးနှစ်တိုင်တိုင် ရုန်းကန်ခဲ့ကြရသည်မဟုတ်လော။</p> <p> ယခုမှ မျှော်လင့်ချက် ရောင်ခြည်လေး မြင်ယောင်ခါရှိသေး၊ ထိုမျှော်လင့်ချက်မှာ ပြန်လည်ကွယ်ပျောက်သွားရချေပြီ။</p> <p>ဝမ်ချန်က ဆက်လက်၍ ရှင်းပြသည်မှာ "မင်းတို့ သိထားသင့်တာက တန်ပါစ်ဂြိုဟ်ရဲ့ အခြေအနေက အခုအချိန်မှာ အရမ်းကို ထူးခြားနေတယ်၊ အင်ပါယာအနေနဲ့ အခုလောလောဆယ် အကြီးအကျယ် လေကြောင်းကယ်ဆယ်ရေးတွေ မလုပ်နိုင်သေးဘူး၊ သေချာပြင်ဆင်မှုတွေ လုပ်ဖို့လိုသေးတယ်၊ ဒါကြောင့် မင်းတို့ ခေတ္တခဏလောက် သည်းခံပြီး စောင့်ဆိုင်းနေကြပါဦး" ဟူ၏</p> <p>"အင်ပါယာက တန်ပါစ်ဂြိုဟ်ကို ပစ်ပယ်မထားဘူးဆိုတာ ယုံကြည်ကြပါ၊ တန်ပါစ်ကြယ်စုတန်းကို ပြန်လည်သိမ်းပိုက်ဖို့အတွက် အင်ပါယာဟာ အရင်းအနှီးတွေ အများကြီး ပေးဆပ်ခဲ့ရတယ်၊ အဓိက အာကာသတပ်ဖွဲ့ရဲ့ တစ်ဝက်လောက်တောင် ဆုံးရှုံးခဲ့ရတာ"</p> <p>ဝမ်ချန်၏ စကားများကြောင့် လုကွီနှင့် လူစုမှာ မျှော်လင့်ချက်များ ပြန်လည်ရှင်သန်လာကြသည်။ လုကွီက "ဆရာ... ကျွန်တော်တို့ ဘယ်လောက်အထိ ထပ်စောင့်ရဦးမလဲ" ဟု မေးမြန်းလိုက်သည်။</p> <p>"မကြာတော့ပါဘူး"</p> <p>ဝမ်ချန်က ဆိုသည်မှာ "တန်ပါစ်ဂြိုဟ်က ထွက်နေတဲ့ ထူးခြားတဲ့ စွမ်းအင်ဓာတ်ရောင်ခြည်ကို ခုခံနိုင်မယ့်နည်းလမ်း ရှာတွေ့တာနဲ့... ခေတ္တခဏပဲ ဖြစ်ဖြစ်ပေါ့... အဲဒီကျရင် လူတိုင်းကို ခေါ်ထုတ်သွားဖို့ဆိုတာ ပြဿနာမဟုတ်တော့ဘူး၊ ငါပြန်ရောက်ရင်လည်း မင်းတို့ရဲ့ အခြေအနေကို အထက်လူကြီးတွေဆီ အစီရင်ခံပေးပါ့မယ်"</p> <p>စင်စစ်အားဖြင့်မူ ဝမ်ချန်သည် တန်ပါစ်ဂြိုဟ်ပေါ်ရှိ စွမ်းအင်ဓာတ်ရောင်ခြည် ဖြစ်ပေါ်ရသည့် အရင်းအမြစ်ကို ကိုယ်တိုင်ကိုယ်ကျ ရှာဖွေလိုစိတ် ရှိနေပေသည်။</p> <p> မူလစွမ်းအင်၏ တည်ရှိမှုကို မခံစားရသေးသော်လည်း၊ ယင်းအရင်းအမြစ်ကို ဖော်ထုတ်နိုင်ပါက ကြီးမားသော ဆုလာဘ်များ ရရှိလိမ့်မည်ဟု သူ၏ အာရုံက ညွှန်ပြနေသည်။</p> <p>ဤနေရာသို့ ရောက်ရှိနေပြီဖြစ်ရာ ဝမ်ချန်အနေဖြင့် စမ်းသပ်ကြည့်လိုသည်မှာ ဓမ္မတာပင်။ သို့သော် လုကွီတို့ လူစုကိုမူ ဤအကြောင်းများ ပြောပြနေရန် မလိုပေ။</p> <p>လုကွီက "ဆရာဘယ်အချိန်မှာ ထွက်ခွာမှာလဲ" ဟု ထပ်မံမေးမြန်းရာ ဝမ်ချန်က "မနက်ဖြန်မနက်ပဲ၊ ငါ B00785 အခြေစိုက်စခန်းကို သွားကြည့်ဖို့ လိုအပ်တယ်" ဟု ပြန်လည်မိန့်ကြားလေသည်။</p> <p>တန်ပါစ်ဂြိုဟ်၏ ထူးခြားသော ပတ်ဝန်းကျင်တွင် ရှုချန်ကျစ်သာ အသက်ရှင်နေသေးပါက အဝေးကြီးသို့ ရောက်သွားနိုင်စရာ အကြောင်းမရှိပေ။</p> <p>ကယ်ဆယ်ရေးဇုန်နှင့် အနီးဆုံးဖြစ်သော D01359 စခန်းတွင် မရှိလျှင် B00785 စခန်း၌ ရှိနေဖို့မှာ အလားအလာ အရှိဆုံးပင် ဖြစ်တန်ရာ၏။</p> <p>ယင်းက အကောင်းဆုံးသော ရလဒ်ဖြစ်သော်လည်း ဝမ်ချန်သည် အဆိုးဆုံးအတွက်လည်း ပြင်ဆင်ထားပြီး ဖြစ်ပေသည်။</p> <p>လုကွီက "လမ်းပြလိုအပ်လား" ဟု ကူညီလိုစိတ်ဖြင့် မေးမြန်းသော်လည်း ဝမ်ချန်က ပြုံးလျက် "မလိုပါဘူး၊ ငါ့မှာ ပတ်ဝန်းကျင်မြေပုံ ရှိပါတယ်၊ B00785 စခန်းကို ရှာရတာ မခက်ခဲပါဘူး၊ ကျေးဇူးတင်ပါတယ်" ဟု ငြင်းပယ်လိုက်သည်။</p> <p>D01359 စခန်းကို အမှတ်အသားအဖြစ် ထားရှိပါက B00785 စခန်းကို ရှာဖွေရန်မှာ လွန်စွာလွယ်ကူသော ကိစ္စပင် ဖြစ်ချေသည်။ လုကွီလည်း "ကောင်းပါပြီ" ဟုသာ ခေါင်းငြိမ့်လိုက်ရတော့သည်။</p> <p>သူသည် ဝမ်ချန်အတွက် တစ်ခုခု လုပ်ပေးလိုသော်လည်း ဝမ်ချန်သာ မရှိပါက တစ်စခန်းလုံး နက်သာမျိုးနွယ်စုများ၏ လက်ချက်ဖြင့် ပျက်စီးသွားပေလိမ့်မည်။</p> <p>ထိုညတွင် အခြေစိုက်စခန်း၌ပင် အနားယူပြီးနောက် နံနက်မိုးသောက်တွင် ဝမ်ချန်သည် နှုတ်ဆက်ကာ ထွက်ခွာခဲ့လေသည်။ လုကွီကိုယ်တိုင်က အရေးပေါ်ထွက်ပေါက်မှတစ်ဆင့် မြေပြင်ပေါ်သို့ လိုက်ပါပို့ဆောင်ပေးခဲ့၏။</p> <p>ထိုထွက်ပေါက်မှာ သစ်တောနှင့် အပင်များ ဖုံးလွှမ်းနေသော လျှို့ဝှက်သည့် နေရာတစ်ခုတွင် ရှိနေပြီး ပျက်စီးနေသော မြို့ပျက်ကြီးမှာ ကီလိုမီတာ အနည်းငယ်မျှသာ ဝေးကွာပေသည်။</p> <p>"ပြန်တော့လေ"</p> <p>ဝမ်ချန်က လုကွီကို လက်ကမ်းနှုတ်ဆက်ရင်း "နောက်တစ်ကြိမ် ပြန်ဆုံကြဦးမယ်လို့ မျှော်လင့်ပါတယ်" ဟု ဆိုလိုက်ရာ လုကွီကလည်း လက်ကို မြဲမြံစွာ ဆုပ်ကိုင်လျက် "နှုတ်ဆက်ပါတယ်" ဟု ပြန်လည်ဆိုလေသည်။</p> <p>ဝမ်ချန် ပြုံးလိုက်မိသည်။ လှည့်ထွက်သွားခါနီးတွင် ခေတ္တစဉ်းစားလိုက်ပြီး သူ၏ လက်စွပ်အတွင်းမှ အော်တိုရိုင်ဖယ်တစ်လက်နှင့် ကျည်အိမ်အချို့ကို ထုတ်ယူကာ လုကွီအား ပေးအပ်လိုက်သည်။</p> <p>"ဒီသေနတ်က မင်းအတွက်ပဲ၊ နက်သာမျိုးနွယ်တွေကိုတော့ မယှဉ်နိုင်ပေမဲ့... လူတွေအတွက်တော့ ထိရောက်ပါတယ်"</p> <p>လုကွီမှာ ဝမ်ချန်၏ ဆန်းကြယ်လှသော လက်လှည့်ပညာရပ်ကို မြင်တွေ့ရသဖြင့် မှင်သက်သွားရရှာသည်။</p> <p>သူသည် လူအလည်း မဟုတ်သဖြင့် ဝမ်ချန် ပေးလိုသော သတိပေးချက်ကို ကောင်းစွာ နားလည်လိုက်ပေသည်။</p> <p>ဝမ်ချန်သည် စခန်းအင်ဂျင်နီယာ၏ ပုခုံးကို ပုတ်ကာ အားပေးလိုက်ပြီးနောက် B00785 အခြေစိုက်စခန်းရှိရာ အရပ်သို့ ခြေလှမ်းကျဲကြီးများဖြင့် ထွက်ခွာသွားလေတော့သည်။</p> <p>လုကွီသည် ဝမ်ချန် ကွယ်ပျောက်သွားသည်အထိ သေနတ်ကို ကိုင်လျက် ငေးကြည့်ကျန်ရစ်ခဲ့သည်။ အတန်ကြာမှသာ လေဝင်ပေါက်အတွင်းသို့ ပြန်လည်ဝင်ရောက်သွားတော့သည်။</p> <p>ဝမ်ချန်သည် နေမဝင်မီ B00785 အခြေစိုက်စခန်းရှိရာ မြို့သို့ ရောက်ရှိနိုင်ရန် ခြေလှမ်းကို သွက်သွက်လှမ်းခဲ့သည်။ တန်ပါစ်ဂြိုဟ်ပေါ်ရှိ အင်ပါယာ၏ မြေအောက်စခန်းအများစုမှာ သက်ဆိုင်ရာ မြို့ကြီးများနှင့် တစ်ဆက်တည်း တည်ရှိနေခြင်း ဖြစ်ပေသည်။</p> <p>ဤသို့ဖြင့် ဘေးလွတ်ရာသို့ ရှောင်တိမ်းရန် လွယ်ကူစေသကဲ့သို့ မြို့ပျက်များအတွင်းမှလည်း အသက်ရှင်ကျန်ရစ်သူများအတွက် ရိက္ခာနှင့် အရင်းအမြစ်များစွာ ရရှိနိုင်ပေသည်။</p> <p>သို့သော် နက်သာမျိုးနွယ်စုများက တူးဖော်ဖျက်ဆီးထားခြင်း မရှိမှသာ ဖြစ်ချေမည်။</p> <p>တန်ပါစ်ဂြိုဟ်ပေါ်ရှိ နက်သာမျိုးနွယ်စု အဓိကတပ်ဖွဲ့များမှာ ဟိုးယခင်ကတည်းက ဆုတ်ခွာသွားခဲ့ကြပြီ ဖြစ်သလို အချို့မှာလည်း အင်ပါယာ အာကာသတပ်ဖွဲ့၏ ချေမှုန်းခြင်းကို ခံလိုက်ရပြီ ဖြစ်သည်။</p> <p>ယခုအခါ ဤဂြိုဟ်ပေါ်တွင် ကျန်ရစ်နေသူများမှာ D01359 စခန်းမှ လူများကဲ့သို့ပင် ဖြစ်ကြ၏။ နက်သာမျိုးနွယ်စုများသည် အမှောင်ထုကို နှစ်သက်ကြသဖြင့် ဝမ်ချန်၏ ခရီးစဉ်အတွင်း ထိုသူစိမ်းတပ်ဖွဲ့များနှင့် မဆုံတွေ့ခဲ့ပေ။</p> <p>သို့ရာတွင် မျိုးရိုးဗီဇပြောင်း သတ္တဝါများနှင့်မူ အကြိမ်ကြိမ် ဆုံတွေ့ခဲ့ရသည်။</p> <p>ဤဂြိုဟ်ပေါ်ရှိ အမည်မသိ စွမ်းအင်ဓာတ်ရောင်ခြည်များ၏ ဒဏ်ကြောင့် သက်ရှိအများစုမှာ ပုံသဏ္ဌာန် ပျက်ယွင်းကာ ပိုမိုကြောက်မက်ဖွယ်ကောင်းသော အဆင့်သို့ ပြောင်းလဲနေကြပြီ ဖြစ်သည်။</p> <p>ထိုသို့ ပြောင်းလဲခြင်းမှာလည်း အစဉ်တစိုက် ဖြစ်ပေါ်နေသဖြင့် နောက်ထပ် နှစ်အနည်းငယ်ကြာလျှင် ပို၍ပင် ဆိုးရွားလာဖွယ် ရှိချေသည်။</p> <p>သို့သော် ၎င်းတို့သည် မည်မျှပင် အစွမ်းထက်လာပါစေဦးတော့... ဝမ်ချန်၏ လက်နက်များအောက်တွင်မူ ကြာရှည်မခံနိုင်ကြပေ။ ဝမ်ချန်သည် သူ၏ စွမ်းအားကြီးသော လက်နက်များဖြင့် ထိုသတ္တဝါများကို အလွယ်တကူပင် ရှင်းလင်းနိုင်ခဲ့သည်။</p> <p>နေဝင်ရိုးရီ အချိန်တွင် ခန့်ညားထည်ဝါလှသော မြို့ကြီးတစ်မြို့မှာ ဝမ်ချန်၏ အမြင်အာရုံထဲသို့ ရောက်ရှိလာလေသည်။ ထိုမြို့ကို မြေပုံတွင် 'ဒဲလ်ရေး' ဟု အမည်တပ်ထားပေသည်။</p> <p>ဤမြို့သည် တစ်ချိန်က အလွန်တရာ စည်ကားခဲ့ဟန် တူပေသည်။ မိုးမျှော်တိုက်ကြီးများနှင့် ကြီးကျယ်ခမ်းနားသော အဆောက်အအုံများမှာ မြို့အနှံ့ နေရာယူထားကြသည်။</p> <p>ဝမ်းနည်းဖွယ်ကောင်းသည်မှာ ထိုအဆောက်အအုံ အများစုမှာ ပျက်စီးယိုယွင်းကာ နွယ်ပင်များ ဖုံးလွှမ်းနေပြီး တိုက်အကြွင်းအကျန် အချို့သာလျှင် အတိတ်က ကပ်ဘေးဆိုးကြီးကို သက်သေထူလျက် ငြိမ်သက်စွာ တည်ရှိနေကြတော့သည်။</p> <p>ဒဲလ်ရေးမြို့၏ အစွန်အဖျားတွင် ပျက်ကျနေသော လေယာဉ်ပျံများနှင့် အာကာသယာဉ် အကြွင်းအကျန်များကို ဝမ်ချန် တွေ့ရှိခဲ့ရသည်။ မြက်တောများအကြားတွင်လည်း အရိုးဖြူများ ပြန့်ကျဲနေသည်မှာ ထိုစဉ်က တိုက်ပွဲများ မည်မျှ ပြင်းထန်ခဲ့ကြောင်းကို ဖော်ပြနေပေသည်။</p> <p>ဝမ်ချန်သည် မြေပုံကိုထုတ်ကာ ပထဝီအနေအထားကို နှိုင်းယှဉ်ကြည့်လိုက်သည်။ B00785 အခြေစိုက်စခန်းမှာ ဒဲလ်ရေးမြို့ နယ်မြေအတွင်းတွင် ရှိနေသော်လည်း ဝင်ပေါက်ကိုမူ တိတိကျကျ မဖော်ပြထားပေ။</p> <p>ထို့ကြောင့် ဝမ်ချန်ကိုယ်တိုင်ပင် ရှာဖွေရဦးမည် ဖြစ်ချေသည်။</p> <p>သို့သော် D01359 စခန်းကို နမူနာထားကာ ဝမ်ချန်သည် အကြမ်းဖျင်း အစီအစဉ်တစ်ခု ဆွဲထားပြီး ဖြစ်သည်။</p> <p>မြို့အတွင်းသို့ ဝင်ရောက်လာသောအခါ မိလ္လာပေါက်တစ်ခုကို တွေ့ရှိခဲ့ပြီး ထိုမှတစ်ဆင့် မြေအောက်ဥမင်များအတွင်းသို့ ဆင်းသက်ကာ ရှာဖွေရေးကို စတင်လိုက်လေတော့သတည်း။</p> <p> </p> <p> </p> <p style="text-align: center;">***</p>


Save