Book List

<h2 style="text-align: center;">အခန်း (၁၃၁၈)</h2> <h2 style="text-align: center;">နက္ခတ်တာရာပင်လယ်ပြင် (၁၂၃)</h2> <h2 style="text-align: center;">*</h2> <p> </p> <p> </p> <p>ထျန်းယွင် ၁၅၇ သယ်ယူပို့ဆောင်ရေးယာဉ်ပျံ၏ ကွပ်ကဲမှုခန်းမအတွင်း၌ ဖြစ်ချေသည်။</p> <p>ဝမ်ချန်သည် အာကာသယာဉ်၏ ကြီးမားလှသော ပြတင်းပေါက်မှတစ်ဆင့် အဝေးတစ်နေရာတွင် တည်ဆောက်ဆဲဖြစ်သော အာကာသခံတပ်ကြီးကို ငေးမောကြည့်ရှုနေမိ၏။</p> <p> ယင်းကား တန်ပါစ်ဂြိုဟ်၏ အာကာသခံတပ်အသစ်ပင် ဖြစ်တော့သည်။</p> <p>မူလက တန်ပါစ်ဂြိုဟ်၌ ကြီးမားသော အာကာသခံတပ်တစ်ခု ရှိခဲ့ဖူးသော်လည်း နက်သာမျိုးနွယ်စု၏ ဖျက်ဆီးခြင်းကို ခံခဲ့ရပေသည်။</p> <p>ယခုအခါ ထိုကြယ်စုတန်းကို ပြန်လည်သိမ်းပိုက်နိုင်ခဲ့ပြီဖြစ်ရာ ခံတပ်၏ ခုခံရေးစနစ်ကို ပြန်လည်တည်ဆောက်ရန် လုပ်ငန်းများကို အရှိန်အဟုန်ဖြင့် ဆောင်ရွက်နေကြပြီ ဖြစ်သည်။</p> <p>ဤမြင်ကွင်းသည် ဝမ်ချန် နောက်ဆုံးအကြိမ် ရောက်ရှိခဲ့စဉ်ကနှင့် များစွာ ကွာခြားလှပေရာ အင်ပါယာ၏ ဆုံးရှုံးသွားသော နယ်မြေများကို ပြန်လည်ကာကွယ်စောင့်ရှောက်လိုသည့် ပြင်းထန်သော စိတ်ပိုင်းဖြတ်မှုကို ခံတပ်အသစ်၏ ကြီးမားသော အတိုင်းအတာက သက်သေပြနေသကဲ့သို့ ရှိနေတော့သည်။</p> <p>ကီလိုမီတာ ရာနှင့်ချီ၍ ဝေးကွာသော နေရာမှပင် အာကာသခံတပ်သစ်မှ ထွက်ပေါ်နေသော မီးပွားများကို ဝမ်ချန် အထင်အရှား မြင်တွေ့နေရ၏။</p> <p> ခံတပ်၏ ပတ်ဝန်းကျင်၌လည်း အရွယ်အစားမျိုးစုံရှိသော အင်ဂျင်နီယာယာဉ်များနှင့် သယ်ယူပို့ဆောင်ရေးယာဉ် ပေါင်းရာချီ၍ အလုပ်ရှုပ်နေကြသဖြင့် ကြယ်တံခါးသို့ သွားရာလမ်းကြောင်းမှာ ပိတ်ဆို့လျက် ရှိနေပေသည်။</p> <p>ဝမ်ချန် လိုက်ပါလာသော သယ်ယူပို့ဆောင်ရေးယာဉ်သည် တန်ပါစ်ဂြိုဟ်၏ စည်းချက်ညီ ဂြိုဟ်ပတ်လမ်းကြောင်းသို့ မဝင်ရောက်မီ နှစ်နာရီခန့် စောင့်ဆိုင်းခဲ့ရလေသည်။</p> <p>“အရာရှိမင်း ... နောက်နာရီဝက်နေရင် ဂြိုဟ်ဆင်းယာဉ်တွေ ထွက်ခွာတော့မှာမို့ ပြင်ဆင်ထားပေးပါ”</p> <p>တပ်ကြပ်တစ်ဦးသည် ဝမ်ချန်ထံသို့ အပြေးအလွှား လာရောက်အစီရင်ခံ၏။</p> <p> ဝမ်ချန်သည် ခေါင်းငြိမ့်ပြကာ ထိုသူနောက်သို့ လိုက်ပါသွားပြီးလျှင် ဂြိုဟ်ဆင်းယာဉ်တစ်စီးပေါ်တွင် နေရာယူလိုက်တော့သည်။</p> <p>ထျန်းယွင် ၁၅၇ သယ်ယူပို့ဆောင်ရေးယာဉ်ပျံသည် တစ်ကြိမ်လျှင် ဂြိုဟ်ဆင်းယာဉ် အစီးငါးဆယ်အထိ တပြိုင်နက် သယ်ဆောင်နိုင်ရန် အထူးပြုပြင်ထားသော ယာဉ်ကြီးတစ်စီး ဖြစ်ပေသည်။</p> <p>ဤဂြိုဟ်ဆင်းယာဉ်များကို တန်ပါစ်ဂြိုဟ်၏ ထူးခြားသော အခြေအနေများအတွက် အထူးရည်ရွယ်၍ ဒီဇိုင်းထုတ်ထားခြင်း ဖြစ်၏။</p> <p> ဝမ်ချန်သည် စမ်းသပ်ယာဉ်ဖြင့် ပြန်လည်ရောက်ရှိလာပြီးနောက် အင်ပါယာသည် အဖိုးတန်သော အချက်အလက်များကို ရရှိခဲ့ရာ ဝမ်ချန် ပေးအပ်သော သတင်းအချက်အလက်များအပေါ် အခြေခံ၍ အထူးပြုလုပ်ထားသော ဂြိုဟ်ဆင်းယာဉ်သစ်များကို လျင်မြန်စွာ ထုတ်လုပ်နိုင်ခဲ့ခြင်း ဖြစ်ပေသည်။</p> <p>ဝမ်ချန် လိုက်ပါလာသော ဂြိုဟ်ဆင်းယာဉ်မှာ အကြိမ်ကြိမ် အဆင့်မြှင့်တင်ထားသော အမျိုးအစားဖြစ်ပြီး ပြင်ပခွံကို ပိုမိုခိုင်ခံ့အောင် ပြုလုပ်ထားသည့်အပြင် အတွင်းခန်းမှာလည်း ပိုမိုကျယ်ဝန်း၍ သက်သောင့်သက်သာ ရှိလှပေသည်။</p> <p>ဂြိုဟ်ဆင်းယာဉ်ပေါ်တွင် ဝမ်ချန်တစ်ဦးတည်း မဟုတ်ဘဲ အပြည့်အစုံ လက်နက်စွဲကိုင်ထားသော စစ်သည်တော် တစ်ရာကျော်လည်း လိုက်ပါလာကြသေး၏။</p> <p>သူတို့၏ ဝတ်စုံနှင့် ကိရိယာတန်ဆာပလာများမှာလည်း တန်ပါစ်ဂြိုဟ်၏ အခြေအနေနှင့် လိုက်လျောညီထွေရှိစေရန် ပြုလုပ်ထားခြင်း ဖြစ်ပေရာသည်။</p> <p>ဆယ်မိနစ်ခန့် ကြာသောအခါ ဂြိုဟ်ဆင်းယာဉ်များသည် ထျန်းယွင် ၁၅၇ မှ ခွဲထွက်၍ တန်ပါစ်ဂြိုဟ်ပေါ်သို့ ဆင်းသက်ရန် စတင်လိုက်ကြတော့သည်။ လုပ်ငန်းစဉ်တစ်ခုလုံးမှာ အလွန်ပင် ချောမွေ့လှပေသည်။</p> <p>ဂြိုဟ်မျက်နှာပြင်သို့ ရောက်ရှိ၍ ယာဉ်တံခါးများ ပွင့်သွားသည်နှင့် ဝမ်ချန်သည် ပြင်ပတွင် စောင့်ကြိုနေကြသော လူအုပ်ကြီးကို မြင်တွေ့လိုက်ရ၏။</p> <p>သူနှင့် စစ်သည်တော်များ ယာဉ်ပေါ်မှ ဆင်းလိုက်သည်နှင့် ခရီးသည်အသစ်များသည်လည်း ယာဉ်ပေါ်သို့ လျင်မြန်စွာ တက်ရောက်လာကြပြန်သည်။</p> <p>မိနစ်အနည်းငယ်အတွင်း၌ပင် ထိုဂြိုဟ်ဆင်းယာဉ်များသည် ကောင်းကင်ယံသို့ ပြန်လည်ပျံတက်သွားပြီး ခရီးသည် ထောင်နှင့်ချီ၍ အာကာသထဲသို့ ပို့ဆောင်ပေးနေတော့သည်။ ထိုသူတို့ထဲတွင် တန်ပါစ်ဂြိုဟ်မှ အသက်ရှင်ကျန်ရစ်သူများသာမက ဝန်ထမ်းအများအပြားလည်း ပါဝင်ပေသည်။</p> <p>တန်ပါစ်ဂြိုဟ်ပေါ်သို့ တစ်ဖန်ပြန်၍ ခြေချလိုက်မိသောအခါ မလှမ်းမကမ်းတွင် လူပေါင်းများစွာ အလုပ်ရှုပ်နေကြသည်ကို ဝမ်ချန် မြင်တွေ့ရ၏။</p> <p>သူတို့သည် စစ်ဘေးသင့် ပျက်စီးနေသော အပျက်အစီးများကြားမှ သူတို့၏ မြို့ပြကို ပြန်လည်တည်ဆောက်နေကြခြင်း ဖြစ်ပေသည်။</p> <p>တန်ပါစ်ဂြိုဟ်၏ အခြေအနေမှာ အလွန်ပင် ထူးခြားဆန်းပြားလှသော်လည်း အင်ပါယာသည် ဤဂြိုဟ်ကို စွန့်ပစ်ရန် ငြင်းဆန်ခဲ့သည့်အပြင် ပြန်လည်တည်ဆောက်ရေးအတွက် လူအင်အားနှင့် အရင်းအမြစ် အမြောက်အမြားကိုပါ ရင်းနှီးမြှုပ်နှံခဲ့ချေသည်။</p> <p>သို့ရာတွင် ဤကြီးမားလှသော ပြန်လည်တည်ဆောက်ရေး လုပ်ငန်းမှာ အလွန်ပင် ခက်ခဲ၍ အချိန်ကြာမြင့်ဖွယ် ရှိပေသည်။</p> <p>ဤနေရာရှိ လူများသည် ခေတ်မီစက်ကိရိယာများကို အသုံးမပြုနိုင်ကြသဖြင့် ရှေးကျသော နည်းလမ်းများဖြင့်သာ အိမ်ရာများကို ပြန်လည်တည်ဆောက်နေကြရရှာသည်။</p> <p>အင်ပါယာမှ လေထီးဖြင့် ပစ္စည်းများ ပံ့ပိုးပေးနေသော်ငြားလည်း များစွာသော ကြိုးပမ်းအားထုတ်မှုနှင့် စတေးမှုများ လိုအပ်နေဦးမည်သာ ဖြစ်ပေသည်။</p> <p>သံမဏိကင်းမျှော်စင်များ၊ သေနတ်များနှင့် အမြောက်များက ဤဂြိုဟ်ပေါ်တွင် ရှိနေသေးသော အန္တရာယ်များကို ပြသနေသကဲ့သို့ ရှိချေသည်။ ဝမ်ချန်သည် ရှေ့မှောက်မှ မြင်ကွင်းကို ကြည့်၍ အတွေးနယ်ချဲ့နေမိ၏။</p> <p>အကယ်၍ မမျှော်လင့်ထားသည်များ ဖြစ်မလာခဲ့ပါက တန်ပါစ်ဂြိုဟ်၏ ဤထူးခြားသော အခြေအနေသည် မသေမျိုးနန်းတော်၏ အစီအရင်များ လုံးဝပျက်စီးမသွားမချင်း နှစ်ပေါင်း ရာနှင့်ချီ၍ သို့မဟုတ် ထောင်နှင့်ချီ၍ ဆက်ရှိနေပေလိမ့်မည်။</p> <p>ထိုမျှလောက် ကြာမြင့်လှသော အချိန်ကာလအတွင်း ဤဂြိုဟ်ပေါ်မှ လူသားတို့သည် မည်သို့ရှင်သန်ကြမည်နည်း။ ရေနွေးငွေ့နည်းပညာ ခေတ်ဦးကဲ့သို့သော လောကတစ်ခု ဖြစ်လာလေမလား။ ယင်းကား စိတ်ဝင်စားဖွယ်ရာ အတွေးတစ်ခုပင် ဖြစ်ပေသည်။</p> <p>“မိတ်ဆွေ ... ‘စစ်သည်တော်ဟောင်း အရက်ဆိုင်’ ဒီနေ့ပဲ ဖွင့်တာဗျ၊ တစ်ခွက်လောက် ဝင်သောက်မလား”</p> <p>ဝမ်ချန် ငေးမောနေစဉ် တစ်စုံတစ်ဦးက ကျယ်လောင်စွာ လှမ်းခေါ်လိုက်ခြင်း ဖြစ်၏။</p> <p> “ဆိုင်ဖွင့်ပွဲ အထူးအစီအစဉ်အနေနဲ့ ၂၀ ရာခိုင်နှုန်း လျှော့ပေးနေတယ်နော်”</p> <p>ဝမ်ချန် လှည့်ကြည့်လိုက်သောအခါ ဆိုင်းဘုတ်မျိုးစုံ တပ်ထားသော ယာယီအဆောက်အအုံတန်းကြီးကို မြင်လိုက်ရသည်။</p> <p>ယင်းကား သူ၏ ယခင်ဘဝက ကွန်တိန်နာအိမ်များနှင့် ဆင်တူသော်လည်း ပို၍ အဆင့်မြင့်လှပေသည်။ ခဏမျှ စဉ်းစားပြီးနောက် ဝမ်ချန်သည် ထိုအရက်ဆိုင်သစ်ဆီသို့ လျှောက်လှမ်းသွားလိုက်တော့သည်။</p> <p>ဆိုင်ကို အပြင်ဘက်မှကြည့်လျှင် ထူးခြားမှုမရှိသော်လည်း အတွင်းဘက်တွင်မူ အလွန်ပင် ကျယ်ဝန်းလှသည့်အပြင် လူများဖြင့်လည်း စည်ကားနေပေသည်။ စားပွဲအများစုမှာ လူပြည့်နေ၏။</p> <p>အရက်ဆိုင် ဘေးရှိ စင်မြင့်ထက်တွင်လည်း တီးဝိုင်းတစ်ခုက အင်ပါယာ၏ နာမည်ကြီး တေးသီချင်းများကို တီးခတ်နေပြီး အဆိုတော်တစ်ဦးကလည်း သီဆိုနေပေသည်။</p> <p>ဤသို့သော မြင်ကွင်းမျိုးကို လွန်ခဲ့သော တစ်လခန့်က စိတ်ပင်မကူးခဲ့ဖူးချေ။</p> <p> ထိုစဉ်က တန်ပါစ်ဂြိုဟ်၏ မျက်နှာပြင်မှာ စစ်ဘေးကြောင့် ပျက်စီးနေသော အပျက်အစီးများသာ ရှိခဲ့ပြီး အသက်ရှင်ကျန်ရစ်သူတို့မှာလည်း မြေအောက်စခန်းများတွင် ပုန်းအောင်းကာ အပြင်သို့ မထွက်ရဲကြပေ။</p> <p>ဂြိုဟ်မျက်နှာပြင်မှာလည်း မျိုးရိုးဗီဇပြောင်း သတ္တဝါများနှင့် နက်သာမျိုးနွယ်စုများ၏ လက်အောက်သို့ ရောက်ရှိနေခဲ့သည် မဟုတ်လော။</p> <p>ယခုမူ တစ်လအတွင်းမှာပင် လူသားတို့သည် ဂြိုဟ်မျက်နှာပြင်ပေါ်၌ သူတို့၏ အိမ်ဂေဟာများကို ပြန်လည်တည်ဆောက်နေကြပြီ ဖြစ်သည်။ ဝမ်ချန်သည် လူအများ၏ မျက်နှာပေါ်တွင် မျှော်လင့်ချက်များနှင့် စစ်မှန်သော အပြုံးများကို မြင်တွေ့လိုက်ရ၏။</p> <p>သူသည် ဆိုင်တွင် နေရာတစ်ခုယူကာ အရက်တစ်ခွက် မှာယူရန် ပြင်လိုက်စဉ် စဉ်းစားစရာ မေးခွန်းတစ်ခု ပေါ်လာသဖြင့် - “ဆိုင်ရှင် ... ဒီမှာ ငွေပေးချေမှုကို ဘယ်လိုလုပ်ရလဲ” ဟု မေးလိုက်မိသည်။</p> <p>ကွန်ရက်မရှိသလို ကိုယ်ပိုင်အချက်အလက်စက်များကိုလည်း အသုံးမပြုနိုင်သဖြင့် အီလက်ထရောနစ်စနစ်ဖြင့် ငွေပေးချေရန်မှာ မဖြစ်နိုင်ပေ။</p> <p>အရက်စပ်နေသော ဆိုင်ရှင်က ပြုံး၍ - “ဒီမှာကတော့ လက်ငင်းငွေသားပဲ ပေးရပါတယ်၊ ဒါမှမဟုတ်လည်း အကြွေးလက်မှတ် ထိုးခဲ့လို့ ရပါတယ်ဗျ” ဟု ပြောလေသည်။</p> <p>အကြွေးလက်မှတ်မှာ ပမာဏ အနည်းငယ်သာ ခွင့်ပြုထားပြီး အင်ပါယာ၏ သက်ဆိုင်ရာဌာနများမှ ထုတ်ဝေပေးထားကာ လက်မှတ်နှင့် လက်ဗွေနှိပ်ရန် လိုအပ်ပေသည်။ ဆိုင်ရှင်၏ အပြောအရ ထိုအကြွေးလက်မှတ်များကို အာကာသယာဉ်ပေါ်သို့ ပြန်လည်ပေးပို့၍ စာရင်းရှင်းရခြင်း ဖြစ်သည်ဟု ဆို၏။</p> <p>ယင်းကား ယာယီဖြေရှင်းချက် တစ်ခုသာ ဖြစ်ပေလိမ့်မည်။</p> <p>ဝမ်ချန်က ခေါင်းငြိမ့်ကာ “နားလည်ပြီ ... မင်းတို့ဆိုင်ရဲ့ အထူးအရက်တစ်ခွက် ပေးပါဦး” ဟု ပြောရင်း ‘ကြယ်တာရာသုံးငွေ’ တစ်ရွက်ကို ကောင်တာပေါ်သို့ တင်လိုက်လေသည်။</p> <p>ဝမ်ချန်တွင် ငွေသားမရှိသော်လည်း သူ၏ ‘နက္ခတ်တာရာလက်စွပ်’ ထဲ၌ သိမ်းဆည်းထားသော ငွေသားအမြောက်အမြား ရှိနေပေသည်။ ထိုငွေများကား မှောင်ခိုဈေးကွက်မှ သိမ်းဆည်းရမိထားသော ငွေများသာ ဖြစ်ပေသည်။</p> <p>သူသည် အရက်ကို မြိန်ရှက်စွာ သောက်နေရင်း ဆိုင်အတွင်းမှ ပြောဆိုသံများကို နားစွင့်နေမိ၏။ ဆိုင်ရှိ လူအချို့မှာ တန်ပါစ်ဂြိုဟ်မှ အသက်ရှင်ကျန်ရစ်သူများ ဖြစ်ကြပြီး အချို့မှာ အပြင်မှ လာရောက်အလုပ်လုပ်ကိုင်သူများ ဖြစ်ကာ စစ်ဘက်ဆိုင်ရာ ပုဂ္ဂိုလ်အချို့လည်း ပါဝင်နေပေသည်။</p> <p>အင်ပါယာက အာကာသခရီးစဉ်များကို စီစဉ်ပေးနေသဖြင့် ဂြိုဟ်ပေါ်မှ ထွက်ခွာလိုသူများ ထွက်ခွာနိုင်သော်လည်း အများစုမှာမူ သူတို့၏ ဇာတိမြေကို မခွဲနိုင်ကြဘဲ ပြန်လည်တည်ဆောက်ရေး လုပ်ငန်းများတွင် ပါဝင်ရန် ဆုံးဖြတ်ခဲ့ကြခြင်း ဖြစ်ပေသည်။</p> <p>အပြင်မှ ရောက်ရှိလာသူများမှာမူ လစာကောင်းကောင်းပေးသော အလုပ်အကိုင်များကြောင့် လာရောက်ကြခြင်း ဖြစ်၏။</p> <p>အင်ပါယာသည်လည်း အိမ်ရာသစ်များကို ကာကွယ်ရန်နှင့် မျိုးရိုးဗီဇပြောင်း သတ္တဝါများနှင့် နက်သာမျိုးနွယ်စုများ၏ ရန်မှ ကာကွယ်ရန် စစ်သည်တော် အမြောက်အမြား ချထားပေးထားပေသည်။</p> <p>ဤပြန်လည်တည်ဆောက်ရေး နယ်မြေမှာ ယခုအခါ အလွန်ပင် လုံခြုံလှပြီး နက်သာမျိုးနွယ်စုဝင်များကိုလည်း မတွေ့ရတော့ပေ။ သူတို့သည် ဝေးရာသို့ မောင်းထုတ်ခြင်း ခံလိုက်ရပုံ ရပေသည်။</p> <p>ဝမ်ချန်သည် ဆိုင်ထဲတွင် နာရီဝက်ခန့် ထိုင်နေပြီးနောက် တိတ်တဆိတ် ထွက်ခွာလာခဲ့တော့သည်။ သူသည် ဤဂြိုဟ်ပေါ်တွင် ပုန်းအောင်းနေသေးသော ဂြိုဟ်ပြင်ပ သတ္တဝါဆန်းများကို ရှာဖွေရန် ခရီးစဉ်သစ်တစ်ခုကို တစ်ဦးတည်း စတင်လိုက်လေသည်။</p> <p>‘နတ်ဆိုးသတ်ကွန်ရက်’ ၏ စိတ်အာရုံစွမ်းအား လိုအပ်ချက်ကို ပြည့်မီစေရန်အတွက် ‘နက်သာမျက်လုံး’ကဲ့သို့သော အဆင့်မြင့်သားကောင်များကို ဝမ်ချန် ရှာဖွေအမဲလိုက်ရန် လိုအပ်နေပေသတည်း။</p> <p> </p> <p> </p> <p style="text-align: center;">***</p>


Save