Book List

<h2 style="text-align: center;">အခန်း (၂၄၆)</h2> <h2 style="text-align: center;">ချီရွှယ်ဖေး တစ်ခုခုဖြစ်နေတာလား</h2> <h2 style="text-align: center;">*</h2> <p> </p> <p>လီယာကျွင်းကို နှုတ်ဆက်ပြီးနောက် သူတို့နှစ်ဦး မြောက်ဘက်သို့ ဆက်လက်ထွက်ခွာလာခဲ့ကြ၏။</p> <p>ယခု သူတို့ရောက်နေသော နေရာမှာ ချီရွှယ်ဖေး၏ သစ်ပင်အိမ်နှင့် အလွန်နီးကပ်နေပြီ ဖြစ်သည်။</p> <p>အမှန်တော့ ချီရွှယ်ဖေး၏ သစ်ပင်အိမ်မှာ လီယာကျွင်းအိမ်၏ မြောက်ဘက်နှင့် အရှေ့ဘက်ကြား တွင် ရှိနေခြင်းဖြစ်သည်။</p> <p>အရှေ့မြောက်ဘက်သို့ လှမ်းကြည့်လိုက်လျှင် စိမ်းလန်းစိုပြည်နေသော နယ်မြေတစ်ခုကို လှမ်းမြင်နေရပြီ ဖြစ်၏။</p> <p>သို့သော် သစ်ပင်အိမ်နှစ်ခုမှာ ထောင့်ဖြတ်အနေအထား ရှိနေသဖြင့် အကွာအဝေးမှာ ၁၂ ကီလိုမီတာထက်မက ပိုဝေးနေပြီး သူတို့၏ အကာအကွယ်နယ်မြေများမှာ ချိတ်ဆက်မိရန် လုံးဝမဖြစ်နိုင်ပေ။</p> <p>ထို့ကြောင့် ရွှီရှင်းတို့အနေဖြင့် ကြားကနေ တည့်တည့်ဖြတ်သွား၍ မရဘဲ မြောက်ဘက် သို့မဟုတ် အရှေ့ဘက်ကနေ ပတ်သွားကြရမည် ဖြစ်သည်။</p> <p>သူတို့တွင် ရွေးချယ်စရာ လမ်းကြောင်းနှစ်ခု ရှိသည်။</p> <p>ပထမတစ်ခုမှာ မြောက်ဘက်သို့ အရင်သွားပြီး မြောက်ဘက်ရှိ သစ်ပင်အိမ်၏ အကာအကွယ်နယ်မြေထဲသို့ ဝင်ကာ၊ ထိုမှတစ်ဆင့် အရှေ့ဘက်ရှိ ချီရွှယ်ဖေး၏ နယ်မြေထဲသို့ သွားရန်ဖြစ်သည်။</p> <p>ဒုတိယတစ်ခုမှာ အရှေ့ဘက်သို့ အရင်သွားပြီး အရှေ့ဘက်ရှိ သစ်ပင်အိမ်မှတစ်ဆင့် မြောက်ဘက်သို့ တက်ရန်ဖြစ်သည်။</p> <p>သို့သော် လက်ရှိတွင် အရှေ့ဘက်ရှိ သစ်ပင်အိမ်မှာ လီဝမ်ရှီးအိမ်၏ မြောက်ဘက်တည့်တည့်တွင် ရှိနေပြီး ၎င်းမှာ သေဆုံးသွားပြီဖြစ်သော အိမ်ဖြစ်သည်။</p> <p>ထိုအိမ်၏ ဟန်ပြအကာအကွယ်နယ်မြေမှာ လီဝမ်ရှီး၏ နယ်မြေနှင့်ပင် မချိတ်ဆက်နိုင်သဖြင့် ချီရွှယ်ဖေး၏ နယ်မြေနှင့်လည်း ချိတ်ဆက်နိုင်ခြေ မရှိပေ။</p> <p>ထို့ကြောင့် သူတို့သည် မြောက်ဘက်အတိုင်း တောက်လျှောက်သွားရန်သာ ရွေးချယ်လိုက်ကြ၏။</p> <p>မြောက်ဘက်ရှိ သစ်ပင်အိမ်မှာ ချီရွှယ်ဖေးအိမ်၏ အနောက်ဘက်တွင် ရှိနေခြင်းဖြစ်ပြီး ၎င်းမှာ နယ်မြေ ၁၈၇ မှ ရှင်ကျန်သူတစ်ဦး၏ အိမ်ဖြစ်သည်။</p> <p>ထိုအိမ်မှာ ရွှီရှင်း လာရောက်ရှင်းလင်းပေးရန် လိုအပ်နေသော အိမ်များထဲမှ တစ်လုံးလည်း ဖြစ်သဖြင့် သူလာရသည့် အကြောင်းရင်းများထဲမှ တစ်ခုလည်း ပါဝင်နေ၏။</p> <p>ကံကောင်းထောက်မစွာဖြင့် စောစောက လီယာကျွင်း၏ အိမ်ပေါ်မှ အကဲခတ်ကြည့်ရာ ထိုသစ်ပင်အိမ်မှာ အဆင့် နိမ့်သည်ကို သူ ရှင်းရှင်းလင်းလင်း မြင်ခဲ့ရသည်။</p> <p>၎င်းမှာ နှစ်ထပ်သစ်ပင်အိမ်မျှသာ ဖြစ်သဖြင့် အိမ်ရှင်မှာ မာဟုန်ဝေကဲ့သို့ ထိပ်သီးပညာရှင် ဖြစ်နိုင်ခြေ မရှိဘဲ ရှင်းလင်းရသည်မှာလည်း သိပ်ပြီး အားစိုက်စရာ လိုမည်မဟုတ်ပေ။</p> <p>လမ်းကြုံဝင်ရှင်းလိုက်ပြီး ထိုလူကိုပါ ဖမ်းဆီးကာ ချီရွှယ်ဖေး၏ သစ်ပင်အိမ်တွင် အလုပ်သမားအဖြစ် ခိုင်းစေရန်သာ သူ စဉ်းစားထားတော့၏။</p> <p>"ဒါနဲ့ ရွှီရှင်း... ငါတို့ ပြန်သွားတဲ့အခါကျရင် ဘယ်လိုလုပ်ကြမလဲ"</p> <p>လီဝမ်ရှီးက ရုတ်တရက် ရွှီရှင်းကို လှည့်ကြည့်ကာ မေးလိုက်သည်။</p> <p>"ဟင် ဘာကို ဘယ်လိုလုပ်မှာလဲ"</p> <p>ရွှီရှင်းက လီဝမ်ရှီး ဘာကို ဆိုလိုမှန်းမသိဘဲ ဇဝေဇဝါဖြင့် ပြန်မေးလိုက်သည်။</p> <p>"လီယာကျွင်းအကြောင်းကို ပြောတာလား။ အပြန်ကျရင် ဒီလမ်းကနေပဲ ပြန်လာပြီး သူမကို တစ်ပါတည်း ခေါ်သွားမှာပေါ့"</p> <p>"ဒါဆို ရှင့်ဆိုလိုရင်းက... ကျွန်မတို့အားလုံးကို အိမ်ကို အရင်ပြန်ပို့ပြီးမှ ရှင်က ရှင့်အိမ်ကို ပြန်မှာလား"</p> <p>"... မင်းက ငါ့အိမ်ကို ပတ်သွားချင်နေတာ မဟုတ်လား"</p> <p>ရွှီရှင်း သဘောပေါက်သွား၏။</p> <p>လီယာကျွင်းပါလာလျှင် သူ့အိမ်ကို လိုက်မကြည့်ရတော့မှာကို သူမ စိုးရိမ်နေခြင်း ဖြစ်သည်။</p> <p>"အင်းလေ... နောက်တစ်ခါ ဘယ်တော့မှ ပြန်ဆုံဦးမလဲ မသိဘူးဟာ..."</p> <p>လီဝမ်ရှီးက သူ့ရင်ခွင်ထဲ မှီလိုက်ရင်း  "ရှင့်အိမ်ကို မြင်ဖူးချင်တယ်..."</p> <p>"နောက်တစ်ခါ ဘယ်တော့မှ ဆုံမလဲ ဟုတ်လား"</p> <p>ရွှီရှင်း ခဏမျှ ကြောင်သွားပြီးမှ ရယ်မောလိုက်သည်။</p> <p>"ငါ မင်းကို ပြောဖို့ မေ့သွားတာ၊ ဒီည ငါတို့အိမ်တွေကို ချိတ်ဆက်ဖို့ တည်နေရာကူးပြောင်းစက်ကို ငါ လုပ်ဖို့ စီစဉ်ထားတယ်။ ဒါကြောင့် ဒီညကစပြီး ငါတို့က အိမ်နီးချင်းတွေလို ဖြစ်သွားမှာပါ"</p> <p>"... တကယ်လား"</p> <p>လီဝမ်ရှီးက ရုတ်တရက် သူ့ကို လှည့်ကြည့်လာရာ သူမ၏ လှပသော မျက်နှာလေးမှာ အံ့သြဝမ်းသာမှုများဖြင့် ပြည့်နှက်နေတော့သည်။</p> <p>"တကယ်ပေါ့။ မနက်ဖြန် မင်းအိမ်ရဲ့ တောင်ဘက်က လူကို ရှင်းဖို့ဆိုရင် တည်နေရာကူးပြောင်းစက်က မရှိမဖြစ် လိုအပ်တာလေ။ အဲဒါကြောင့် ဒီညကို အပြီးလုပ်ရမှာပေါ့"</p> <p>ရွှီရှင်းသည် မာဟုန်ဝေကို သူ ဘယ်လိုလှည့်စားခဲ့သလဲဆိုသည့် အကြောင်းနှင့် မနက်ဖြန် ဘာတွေလုပ်မည်ဆိုသည့် သူ၏ အစီအစဉ်ကို လီဝမ်ရှီးအား ပြောပြလိုက်၏။</p> <p>"ဝါး... ရှင်ကတော့... တကယ်ကို ပါးနပ်တာပဲ"</p> <p>လီဝမ်ရှီးက မျက်လုံးလေး အဝိုင်းသားဖြင့် သူ့ကို ကြည့်နေမိသည်။</p> <p>သူမ၏ ဖြူစင်သော နှလုံးသားမှာ နောက်ထပ်တစ်ကြိမ် ထိခိုက်သွားရပြန်ပြီ။</p> <p>"ရှင်... ရှင်... ရှင်က လိမ်ရတာကို တကယ်ကျွမ်းကျင်တာပဲနော်။ ကျွန်မတောင် မသိလိုက်ဘူး"</p> <p>"အီး"</p> <p>သူမရင်ခွင်ထဲက ခဲခဲကလည်း ထောက်ခံသည့်အနေဖြင့် ခေါင်းကို အားရပါးရ ညိတ်ပြနေ၏။</p> <p>"ငါ မင်းကိုတော့ တစ်ခါမှ မလိမ်ဖူးပါဘူး"</p> <p>ရွှီရှင်းက ပြုံးလျက် ပြောလိုက်သည်။</p> <p>"ဟွန်း... ဘယ်သူသိမှာလဲ။ အခုတော့ ရှင့်အိမ်မှာရှိတဲ့ လုဖေးအာ ဆိုတဲ့ မိန်းကလေးကို ကျွန်မ တကယ်တွေ့ချင်သွားပြီ။ ဒါတွေအားလုံးကို သူမက ရှင့်ကို သင်ပေးတာ မဟုတ်လား"</p> <p>"သူမက ငါ့ကို ဘာသင်ပေးရမှာလဲ။ ငါက ပင်ကိုယ်ပါရမီ ရှိတာပါ၊ ငါ့ဘာသာငါ တတ်မြောက်လာတာနော် သိလား"</p> <p>ရွှီရှင်းက ချက်ချင်း ငြင်းဆိုလိုက်၏။</p> <p>"အော်... ဒါဆို ရှင်က ပင်ကိုယ် လိမ်ရတာကို ကျွမ်းကျင်တာပေါ့"</p> <p>လီဝမ်ရှီးက သူ့ကို မျက်စောင်းထိုး ကြည့်လိုက်သည်။</p> <p>"ငါ အဲဒီလို မပြောပါဘူး"</p> <p>ရွှီရှင်း သက်ပြင်းချလိုက်မိ၏။</p> <p>ဘုရားရေ... ဘာပြောပြော အမှားဖြစ်နေတော့တာပဲ..။</p> <p>"ဟွန်း... ဒါဆို ဒီည ဘယ်လိုလုပ်ကြမလဲ။ ရှင့်အိမ်ကို လိုက်ကြည့်လို့ ရသေးလား"</p> <p>လီဝမ်ရှီးက ဆက်ပြီး မရစ်တော့ဘဲ ရွှီရှင်း၏ ရင်ခွင်ထဲ ပြန်မှီလိုက်ကာ မေးလိုက်သည်။</p> <p>"အင်း... မင်း ငါ့အိမ်ကို အရင်လိုက်ခဲ့လို့ ရပါတယ်။ ငါ တည်နေရာကူးပြောင်းစက် လုပ်တာကို စောင့်ပြီးမှ မင်းကို ငါကိုယ်တိုင် ပြန်လိုက်ပို့ပေးမယ်။ တကယ်တော့ ဒါက အကောင်းဆုံး နည်းလမ်းပဲ"</p> <p>အခု တည်နေရာကူးပြောင်းစက်ကို မလုပ်ရသေးတာကြောင့် ကုန်သွယ်မှု ကဏ္ဍကနေတစ်ဆင့် ပို့လို့ရမလားဆိုတာ ရွှီရှင်း မသေချာသေးပေ။</p> <p>တကယ်လို့ ကုန်သွယ်လို့ရပြီး တစ်ဖက်လူက အသုံးပြုနိုင်မယ်ဆိုရင်တော့ ပိုပြီး အဆင်ပြေမှာပင်။</p> <p>သူ တိုက်ရိုက် ပို့ပေးလိုက်ပြီး တစ်ဖက်လူက နေရာချလိုက်ရင် သူက တိုက်ရိုက် ကူးပြောင်းသွားရုံပဲ မဟုတ်လား...။</p> <p>ဒါပေမဲ့ ရွှီရှင်းက တည်နေရာကူးပြောင်းစက်ရဲ့ ဖော်ပြချက်ကို ပြန်စဉ်းစားမိလိုက်၏။</p> <p>[တည်နေရာကူးပြောင်းစက် (အပြာရောင်အဆင့်): ညီညာသော မည်သည့် မျက်နှာပြင်ပေါ်တွင်မဆို ထားရှိနိုင်သည်။ မဟာမိတ် သို့မဟုတ် ကြားနေအဆင့်အတန်းရှိသူ မည်သူမဆို ဖန်တီးသူ၏ ခွင့်ပြုချက်ဖြင့် ကူးပြောင်းစက်များအကြား ကူးပြောင်းသွားလာနိုင်သည်။]</p> <p>ဖော်ပြချက်မှာ နေရာချသူ လို့ မသုံးဘဲ ဖန်တီးသူ လို့ သုံးထားတာကြောင့်၊ ဒီကူးပြောင်းစက်ကို နေရာချဖို့နဲ့ ချိန်ညှိဖို့အတွက် ဖန်တီးသူဖြစ်တဲ့ သူကိုယ်တိုင်ပဲ လုပ်ဆောင်နိုင်မှာ ဖြစ်ပေလိမ့်မည်။</p> <p>ပြီးမှပဲ ကုန်သွယ်လို့ရမရ စစ်ကြည့်ရတော့မည်။</p> <p>တကယ်လို့ မရဘူးဆိုရင်တော့ သူကိုယ်တိုင် လိုက်ပြီး နေရာချပေးရပေလိမ့်မည်။</p> <p>သို့သော် ဤကဲ့သို့သော ပစ္စည်းမျိုးမှာ ကုန်သွယ်၍ ရနိုင်ခြေ မရှိပေ။</p> <p>ဘာပဲဖြစ်ဖြစ် ဒါက အပြာရောင်အဆင့် အရင်းအမြစ် တစ်ခုမျှသာ ဖြစ်သော်လည်း ကုန်ကျစရိတ်မှာ အလွန်ကြီးမားလှသည်။</p> <p>တကယ်လို့ ဒါကို ကုန်သွယ်ပြီး နေရာချလို့ရမယ်ဆိုရင် သူသွားချင်တဲ့ နေရာတိုင်းကို တည်နေရာကူးပြောင်းစက် တစ်ခု ပို့လိုက်ရုံနဲ့ ရနေမှာ ဖြစ်ရာ ဒါက အဆမတန် အားကောင်းလွန်းနေပေလိမ့်မည်။</p> <p>ဒါကြောင့် သူတို့ကို သူ့အိမ်မှာ ခဏစောင့်ခိုင်းပြီး အလှဆင်မှုအဆင့်ကို မြှင့်ကာ တည်နေရာကူးပြောင်းစက်ကို အရင်လုပ်လိုက်တာက ပိုကောင်းပါလိမ့်မည်။</p> <p>မဟုတ်လျှင် သူတို့ကို အရင်ပြန်ပို့၊ ပြီးမှ သူ့အိမ်ပြန်ပြီး ကူးပြောင်းစက်လုပ်၊ ပြီးသွားရင် သူတို့ဆီ ကူးပြောင်းစက် သွားပို့ဆိုရင် သူ နှစ်ခေါက် သွားနေရမှာ မဟုတ်ပါလား။</p> <p>---</p> <p>အခန်း ၂၄၆ ပြီး</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save