Book List

<h2 style="text-align: center;">အပိုင်း (၁၀၄၁)</h2> <h2 style="text-align: center;">ရှေးဟောင်းနတ်ဆိုး ဆင်းသက်လာခြင်း၊ သူတော်စင်အား၏ နောင်တ (၅)</h2> <h2 style="text-align: center;">*</h2> <p> </p> <p>အခြားသူတော်စင်များမှာမူ ကြက်သေသေနေဆဲဖြစ်သည်။ သူတို့၏ နတ်အာရုံများမှာ ဖိနှိပ်ခံထားရသဖြင့် အဝေးသို့ ရှင်းလင်းစွာ မမြင်နိုင်ကြသေးပေ။ သို့သော် အရင်းအမြစ် ဘိုးဘေး၏ စကားများထဲရှိ အလျင်စလိုဖြစ်နေခြင်းမှာ လူတိုင်း၏ စိတ်ကို လေးလံသွားစေခဲ့သည်။</p> <p>သူတို့သည် လီဟောင်၏ သတိပေးချက်များကို လျစ်လျူရှုကာ မိမိတို့မျက်စိဖြင့် ကိုယ်တိုင်မြင်တွေ့ရန် ဤနေရာသို့ လာခဲ့ကြခြင်း ဖြစ်သည်။ သို့သော် ယခုအခါတွင်မူ အခြေအနေမှာ အကြီးအကျယ် မှားယွင်းနေပြီဖြစ်ကြောင်း သူတို့ ခံစားလိုက်ရသည်။</p> <p>မကြာမီမှာတွင် လေထုကို ဖြတ်သန်းလာသော အသံများ ထွက်ပေါ်လာခဲ့သည်။ ရှေးဟောင်းနတ်ဆိုးများ၏ အရှိန်မှာ အလွန်လျင်မြန်သည့်အတွက် တစ်ခဏအတွင်း ရှေးဟောင်းနတ်ဆိုး တစ်ဒါဇင်ကျော်မှာ ချောက်ကမ်းပါးကို ကျော်ဖြတ်ကာ ဤနေရာသို့ ဦးတည်လာကြသည်။</p> <p>အခြားမျိုးနွယ်စုများ၏ အရှိန်အဝါကို အာရုံခံရာတွင် ၎င်းတို့မှာ အလွန်စူးရှသည်။ အထူးသဖြင့် သူတော်စင်များစွာ စုဝေးနေခြင်းမှာ မှောင်မိုက်သော ညတွင် တောက်ပနေသည့် ပိုးစုန်းကြူးများကဲ့သို့ ထင်ရှားလွန်းနေသည်။</p> <p>ဤအချိန်တွင် အရင်းအမြစ် ဘိုးဘေးသည် ဤရှေးဟောင်းနတ်ဆိုးများကို လီဟောင်က ဆင့်ခေါ်ထားခြင်း မဟုတ်ကြောင်းနှင့် အင်မော်တယ်တံခါး၌ လီဟောင် ပြောခဲ့သမျှမှာ အမှန်တရားများသာ ဖြစ်ကြောင်းကို ကောင်းစွာ သဘောပေါက်သွားခဲ့သည်။</p> <p>ဤအင်မော်တယ် နတ်ဘုရားနယ်မြေသည် အမှန်တကယ်ပင် ရှေးဟောင်းနတ်ဆိုးများဖြင့် ပြည့်နှက်နေခဲ့သည်လား။ ၎င်းပြင် ထိုနတ်ဆိုးများမှာ အလွန်ပင် ကြောက်မက်ဖွယ်ကောင်းသည်။</p> <p>“ပြေးကြ”</p> <p>အရင်းအမြစ် ဘိုးဘေးနှင့် နတ်ဘုရားဘုရင်တို့မှာ ပထမဆုံး လှည့်ထွက်ကာ ထွက်ပြေးကြသူများ ဖြစ်သည်။</p> <p>သူတို့သည် လျှို့ဝှက်ဆန်းကြယ်တံခါးဆီသို့ လှည့်ပြန်ရန် ပြင်စဉ်တွင် နတ်ဘုရားဘုရင်၏ အနက်ရောင်မီးလျှံများဖြင့် လောင်ကျွမ်းခြင်း ခံထားရပြီး အပြင်းအထန် ဒဏ်ရာရနေသော လီဟောင်၏ ကိုယ်ပွားမှာ ရှေးဟောင်းနတ်ဆိုး အုပ်စုထံသို့ ဦးတည်ကာ ပြေးဝင်သွားသည်ကို မြင်လိုက်ရသည်။</p> <p>ဤမြင်ကွင်းက အရင်းအမြစ် ဘိုးဘေးနှင့် နတ်ဘုရားဘုရင်ကို မှင်တက်သွားစေခဲ့သည်။ သူတို့၏ ရင်ထဲတွင် တုန်လှုပ်မှုများ ဖြစ်ပေါ်လာပြီး မျက်နှာများမှာလည်း ပို၍ ပျက်သွားကြသည်။</p> <p>အရင်းအမြစ် ဘိုးဘေးသည် သူ၏လက်ထဲ၌ ကိုင်ထားသော ဓားကျိုးမှာ ပထမဆုံးအကြိမ်အဖြစ် လေးလံ၍ ပူလောင်နေသည်ဟု ခံစားလိုက်ရသည်။ သူ၏ မျက်နှာမှာ ရှက်စိတ်ကြောင့် နီရဲလာခဲ့သည်။ အခြားသော သူတော်စင်များ ကြောင်တောင်တောင် ဖြစ်နေသည်ကို မြင်သောအခါ သူက အရေးတကြီး အော်ဟစ်လိုက်သည်။ “မြန်မြန်... မြန်မြန် ပြန်လာကြ”</p> <p>အခြားသူတော်စင်များသည်လည်း သူတို့၏ မြင်ကွင်းထဲသို့ ရှေးဟောင်းနတ်ဆိုး တစ်ဒါဇင်ကျော် ဝင်ရောက်လာသည်ကို မြင်သောအခါ ထိတ်လန့်တုန်လှုပ်သွားကြပြီး အရင်းအမြစ် ဘိုးဘေး၏ အော်သံကြောင့် သူ့အနီးသို့ အလျင်အမြန် စုစည်းလိုက်ကြသည်။</p> <p>“ဒါ... ဒီရှေးဟောင်းနတ်ဆိုးတွေက တကယ်ကြီးပဲ” သူတော်စင်တစ်ပါးက ဝေဝါးနေသော မျက်လုံးများဖြင့် ရေရွတ်လိုက်သည်။</p> <p>“ကြည့်ဦး... ဟောင်ထျန်းရဲ့ ကိုယ်ပွားက အဲဒီနတ်ဆိုးတွေဆီကို တကယ် ပြေးဝင်သွားတာပဲ”</p> <p>“သူ သေတော့မှာပဲ”</p> <p>သူတော်စင်များသည် ဟောင်ထျန်း၏ ကိုယ်ပွားက ရှေးဟောင်းနတ်ဆိုး တစ်ဒါဇင်ကျော်ထံသို့ ကြောက်ရွံ့ခြင်းမရှိဘဲ တိုးဝင်သွားသည်ကို မြင်တွေ့လိုက်ရသည်။ သို့သော် ထိုကိုယ်ပွား၏ လက်ထဲ၌ မည်သည့်လက်နက်မျှ မရှိတော့ဘဲ သူ ဖန်တီးလိုက်သော ဓားစွမ်းအင်ကိုသာ အားကိုးနေရသည်။ ထိုဓားစွမ်းအင်မှာ ရှေးဟောင်းနတ်ဆိုးများကို ခုတ်ပိုင်းနိုင်သော်လည်း ၎င်းတို့၏ အရှိန်ကို လျှော့ချရုံသာ တတ်နိုင်ပြီး သတ်ဖြတ်နိုင်စွမ်း မရှိပေ။</p> <p>မကြာမီမှာပင် ကိုယ်ပွားမှာ ရှေးဟောင်းနတ်ဆိုးများ၏ ဝိုင်းရံခြင်းကို ခံလိုက်ရသည်။</p> <p>သူတော်စင်များသည် ဤမြင်ကွင်းကို ကြည့်ကာ အလွန် ထိတ်လန့်သွားကြသည်။ အခြေအနေမှာ ဤသို့ဖြစ်နေသည့်တိုင် တစ်ဖက်လူ၏ ကိုယ်ပွားမှာ တိုက်ပွဲဝင်ရန် ပြတ်သားနေဆဲဖြစ်သည်ကို သူတို့ မမျှော်လင့်ထားခဲ့ပေ။ ထိုကိုယ်ပွားနှင့် နှိုင်းယှဉ်ပါက သူတို့မှာ ဖော်ပြ၍မရနိုင်သော အရှက်တရားနှင့် ဂုဏ်ငယ်မှုကို ခံစားလိုက်ရသည်။</p> <p>“သွားကြစို့” အရင်းအမြစ် ဘိုးဘေးက သန့်စင်သော ကလေးငယ်ကို တိုက်တွန်းလိုက်သည်။</p> <p>သန့်စင်သော ကလေးငယ်မှာလည်း အလွန်ထိတ်လန့်နေပြီး  မိုးမြေဟင်းလင်းပြင်ကို လျင်မြန်စွာ ဖွင့်လိုက်သောအခါ အရင်းအမြစ် ဘိုးဘေးနှင့် နတ်ဘုရားဘုရင်တို့မှာ ပထမဆုံး ပြေးဝင်သွားကြသည်။ အခြားသူတော်စင်များမှာလည်း အခြေအနေကို သဘောပေါက်သွားကြပြီး ၎င်းအတွင်းသို့ အလုအယက် တိုးဝင်လိုက်ကြသည်။</p> <p>မကြာမီ သန့်စင်သော ကလေးငယ်သည် နတ်ဝိဇ္ဇာအဖြစ် ပြောင်းလဲခြင်းကို ထုတ်ဖော်ကာ တံခါးအက်ကွဲကြောင်းမှတစ်ဆင့် ပြန်ဝင်ရောက်သွားခဲ့သည်။</p> <p>သန့်စင်သော ကလေးငယ်၏ ဟင်းလင်းပြင်အတွင်း ရောက်ရှိနေစဉ် သူတော်စင်များသည် ပြင်ပမြင်ကွင်းကို မြင်တွေ့နေရဆဲ ဖြစ်သည်။ သူတို့ နောက်ဆုံး မြင်တွေ့လိုက်ရသည်မှာ လီဟောင်၏ ကိုယ်ပွားမှာ ရှေးဟောင်းနတ်ဆိုးများ၏ သတ်ဖြတ်ခြင်းခံလိုက်ရပြီး ရှေးဟောင်းနတ်ဆိုးများမှာ သူတို့နောက်သို့ ချက်ချင်း လိုက်လာကြသည်ကိုပင် ဖြစ်သည်။</p> <p>ရွှစ်...</p> <p>မှောင်မိုက်သော လမ်းကြောင်းကို ဖြတ်သန်းပြီးနောက် ခဏအကြာတွင် သူတို့သည် အက်ကြောင်းမှတစ်ဆင့် ကြယ်တာရာ ကောင်းကင်သို့ ပြန်ရောက်လာခဲ့သည်။</p> <p>သူတို့ရှေ့တွင် နှစ်ပေါင်းမရေတွက်နိုင်အောင် တည်ရှိနေသော ရှေးဟောင်းတံခါးကြီး ရှိနေသည်။</p> <p>သန့်စင်သော ကလေးငယ်၏ မျက်နှာမှာ ဖြူဖျော့နေပြီး နတ်ဝိဇ္ဇာအဖြစ် ပြောင်းလဲထားခြင်းကြောင့် သူ၏ တစ်ကိုယ်လုံးမှာ ဒဏ်ရာများမှ သွေးများ စီးကျနေခဲ့ရာ သူ၏ သက်တမ်းမှာလည်း များစွာ လျော့နည်းသွားခဲ့သည်။</p> <p>သူတော်စင်များသည် သူ၏ ဟင်းလင်းပြင်အတွင်းမှ အလုအယက် ထွက်လာကြပြီး ကြယ်တာရာ ကောင်းကင်သို့ ဆင်းသက်လိုက်ကြသည်။ ဤရင်းနှီးပြီးသား ကြယ်တာရာ ကောင်းကင်ကို မြင်တွေ့ရသော်လည်း သူတော်စင်များမှာမူ ထိတ်လန့်မှုများ ကျန်ရှိနေဆဲ ဖြစ်သည်။</p> <p>ထိုရှေးဟောင်းနတ်ဆိုးများ၏ ကြမ်းကြုတ်ရက်စက်သော ပုံသဏ္ဌာန်မှာ လီဟောင် ပြသခဲ့သည့်အတိုင်းပင် ဖြစ်သည်။ အစောပိုင်းက ရှေးဟောင်းနတ်ဆိုး တစ်ကောင်တည်းကိုပင် သတ်ရန် အလွန်ခက်ခဲခဲ့ရာ ယခုအခါ တစ်ဒါဇင်ကျော် စုဝေးလာလျှင် သူတို့သာ ဝိုင်းရံခံရပါက သေချာပေါက် သေဆုံးသွားနိုင်သည်။</p> <p>“ဒါ... ဒါ ဘယ်လိုဖြစ်ရတာလဲ”</p> <p>“အဲဒီ အင်မော်တယ် နတ်ဘုရားကမ္ဘာမှာ တကယ်ကြီး အဲဒီလိုအရာတွေ ရှိနေတာပဲ၊ သူ လိမ်ပြောနေတာ မဟုတ်ဘူး”</p> <p>“ဟောင်ထျန်းပြောတာတွေက တကယ် အမှန်တွေပဲ၊ သူ အဲဒီမှာ ကိုယ်ပွား ထားခဲ့တာက အင်မော်တယ် လမ်းစဉ်ကို ပိတ်ဆို့ဖို့ မဟုတ်ဘဲ အစောင့်အရှောက် လုပ်နေတာပဲ”</p> <p>“မဆန်းပါဘူး... ငါတို့ ဟိုဘက်ရောက်သွားတော့ ကျောက်တုံးတွေ စုပုံထားပြီး အင်မော်တယ်တံခါးကို ဖုံးကွယ်ထားတာ၊ သူက ငါတို့ကို ကာကွယ်ပေးနေပြီး အင်မော်တယ်တံခါးကို ဝှက်ထားပေးတာပဲ။ သူပြောတာတွေ အကုန်လုံးက အမှန်တွေပဲ”</p> <p>သူတော်စင်များ၏ မျက်လုံးများထဲတွင် ကြောက်ရွံ့မှုများ ပြည့်နှက်နေသည်။ လီဟောင်၏ ကိုယ်ပွားသည် ရှေးဟောင်းနတ်ဆိုးများကို ကြောက်ရွံ့ခြင်းမရှိဘဲ တိုက်ခိုက်ရင်း အသတ်ခံလိုက်ရသည့် နောက်ဆုံး မြင်ကွင်းကို ပြန်လည် အမှတ်ရမိသောအခါ သူတို့၏ မျက်နှာကို ရိုက်နှက်ခံလိုက်ရသကဲ့သို့ ပူစပ်ပူလောင် ခံစားလိုက်ရသည်။</p> <p>“ငါတို့... ငါတို့တော့ ကပ်ဘေးကြီးကို ဖိတ်ခေါ်လိုက်ပြီ”</p> <p>မိုမိသားစု၏ မဟာသူတော်စင်၏ မျက်နှာမှာ ပျက်ယွင်းနေသည်။ အစောပိုင်းက သူသည် ထိုလူငယ်အပေါ် အနည်းငယ် စိတ်ပျက်ခဲ့သော်လည်း ယခုအခါတွင်မူ ထိုလူငယ်ကသာ သူ့အပေါ် ပို၍ စိတ်ပျက်နေမည်မှာ သေချာသည်။</p> <p>ထို့ပြင် ၎င်းထက် ပိုမိုပြင်းထန်သော ပြဿနာမှာ သူတို့၏ အရှိန်အဝါများ ပေါက်ကြားသွားပြီး ထိုရှေးဟောင်းနတ်ဆိုးများကို ဆွဲဆောင်မိသွားခြင်း ဖြစ်သည်။ ဤသည်မှာ လီဟောင်သည် သူတို့ကို အပြင်းအထန် တားဆီးခဲ့ရသည့် အကြောင်းရင်းပင် ဖြစ်သည်။</p> <p>၎င်းမှာ အမှန်တကယ်ပင် ကပ်ဘေးဒုက္ခကို ဖိတ်ခေါ်မိခြင်းဖြစ်သည်။</p> <p>မိုမိသားစု မဟာသူတော်စင်မှာ သူ၏ ရင်ထဲတွင် ခါးသီးမှုကို ခံစားလိုက်ရပြီး အရင်းအမြစ် ဘိုးဘေးကို ကြည့်လိုက်သည်။</p> <p>အရင်းအမြစ် ဘိုးဘေးနှင့် နတ်ဘုရားဘုရင်တို့၏ မျက်နှာများမှာ အလွန် ညှိုးငယ်နေခဲ့သည်။ သူတို့အားလုံးသည် ထိုအခိုက်အတန့်တွင် ပြဿနာ၏ လေးနက်မှုကို သဘောပေါက်သွားကြပြီ ဖြစ်သည်။</p> <p>ရှေးဟောင်းနတ်ဆိုးများ ရှိနေခြင်းမှာ အမှန်တရား ဖြစ်ခဲ့ပါက ကပ်ဘေးသည်လည်း အမှန်တရားပင် ဖြစ်သည်။ လီဟောင် ပြောခဲ့သကဲ့သို့ ရှေးဟောင်းနတ်ဆိုးများ အနှောင့်အယှက် ခံလိုက်ရပြီး ၎င်းတို့ အလုံးအရင်းနှင့် ရောက်လာကာ ဤဘက်ရှိ အင်မော်တယ်တံခါးသာ ပျက်စီးသွားခဲ့လျှင်... ကောင်းကင်ဘုံအသီးသီး၏ လောကတစ်ခုလုံးမှာ နတ်ဆိုးများ၏ ကျူးကျော်မှုကို ခံရနိုင်သည်။</p> <p>“ရှင်တို့...”</p> <p>သူတော်စင်များ မျက်နှာပျက်နေစဉ် အင်မော်တယ်ဂိတ်တံခါးအနီးတွင် စောင့်ဆိုင်းနေသော ဆေးသူတော်စင်သည် သူတို့ ပြန်လာသည်ကို မြင်သောအခါ မှင်တက်သွားခဲ့သည်။ သူတို့၏ အမူအရာများကို မြင်လိုက်ရသည်နှင့် ဆေးသူတော်စင်မှာ ထိတ်လန့်သွားပြီး ကြီးမားသော တစ်ခုခု ဖြစ်ပျက်ခဲ့ပြီ ဖြစ်ကြောင်း ချက်ချင်း သိလိုက်ရသည်။</p> <p>သူတော်စင်များသည် ဆေးသူတော်စင်နှင့် မျက်နှာချင်းဆိုင်လိုက်ရသောအခါ အစောပိုင်းက သူ(မ)ကို ပြောခဲ့သည့် စကားများကို ပြန်လည် အမှတ်ရမိပြီး မျက်နှာများ ပူလောင်လာခဲ့သည်။ သို့သော် ဤအခိုက်အတန့်တွင် အရှက်ရနေရန် အချိန်မရှိတော့ပေ။ ရောက်ရှိလာတော့မည့် ကပ်ဘေးကြီးကို တွေးမိရင်း သူတို့၏ ရင်ထဲတွင် အတိုင်းအဆမရှိသော နောင်တများသာ လွှမ်းမိုးနေတော့သည်။</p> <p>“သူပြောတာတွေက အမှန်တွေလား။ ဒါဆိုရင် အခု...” ဆေးသူတော်စင်သည် အရင်းအမြစ် ဘိုးဘေးထံသို့ ချက်ချင်း ပြေးသွားကာ သူ့ကို စိုက်ကြည့်လိုက်သည်။</p> <p>အရင်းအမြစ် ဘိုးဘေးသည် သူ(မ)၏ အကြည့်ကို မသိမသာ ရှောင်လွှဲလိုက်ပြီး “ဟိုဘက်မှာ ရှေးဟောင်းနတ်ဆိုးတွေပဲ ရှိတယ်... အင်မော်တယ် နတ်ဘုရားလောကဆိုတာ... ငါတို့ရဲ့ စိတ်ကူးယဉ်မှုသက်သက်ပဲ။ အခု ရှေးဟောင်းနတ်ဆိုးတွေက ဒီအင်မော်တယ်တံခါးကို သတိထားမိသွားပြီ၊ အင်မော်တယ်တံခါးက သူတို့ကို တားဆီးနိုင်မလားဆိုတာ မသေချာတော့ဘူး” ဟု ပြောလိုက်သည်။</p> <p>***</p> <p> </p>


Save