Book List

<h2 style="text-align: center;">အခန်း (၁)</h2> <h2 style="text-align: center;">ထူးကဲသာလွန်သော နတ်ဘုရားစိုက်ပျိုးရေးစနစ် နိုးထလာခြင်း</h2> <h2 style="text-align: center;">*</h2> <p> </p> <p> </p> <p> </p> <p> </p> <p>“အသုံးမကျတဲ့ကောင်ဆိုတာ အမြဲတမ်း အနင်းအနယ် ခံနေရမှာပဲ။ တစ်နေ့ကျမှ စာကလေးဘဝကနေ ဟင်္သာမင်းအဖြစ် အသွင်မပြောင်းနိုင်သရွေ့တော့ ဒီအတိုင်းပဲ နေပေဦးတော့ပေါ့”</p> <p>... “ဒါ ဘယ်နေရာလဲ။ ငါ ဘယ်လိုလုပ်ပြီး ဒီကို ရောက်နေတာလဲ”</p> <p>ချင်ယွမ်ဖုန်းသည် တွေဝေငေးမောစွာဖြင့် မျက်လုံးတို့ကို ဖြည်းညှင်းစွာ ဖွင့်ကြည့်လိုက်မိသည်။</p> <p>မိမိရောက်ရှိနေသည်မှာ ဟောင်းနွမ်းစုတ်ပြတ်လှသော သက်ကယ်တဲအိုလေးတစ်လုံးအတွင်း ဖြစ်နေသည်ကို တွေ့ရ၏။</p> <p> တစ်တဲလုံးမှာ ယိုင်နဲ့နဲ့ ဖြစ်နေရုံမျှမက အသုံးအဆောင် ပရိဘောဂဟူ၍လည်း မယ်မယ်ရရ မရှိချေ။</p> <p>သူ လဲလျောင်းနေသော ပျဉ်ထောင်ခုတင်အစုတ်လေးမှအပ၊ အခန်းတွင်း၌ ထိုင်ခုံနှစ်လုံးနှင့် စိုက်ပျိုးရေးသုံး ပေါက်တူးအနည်းငယ်သာ ရှိလေသည်။</p> <p>“မနေ့ညက ငါ KTV မှာ မွေးနေ့ပွဲလုပ်နေတာ မဟုတ်လား။ ဘယ်လိုဖြစ်ပြီး ဒီလို ဘုရားသခင် စွန့်ပစ်ထားတဲ့နေရာကို ရောက်လာရတာလဲ”</p> <p>ချင်ယွမ်ဖုန်းသည် ခုတင်ပေါ်တွင် မတ်မတ်ထိုင်ရင်း ရေရွတ်မိ၏။</p> <p>“တောင်.... ထူးကဲသာလွန်သော စိုက်ပျိုးရေးစနစ်ကို စတင် ထည့်သွင်းနေပါသည်”</p> <p>“တောင်......ထူးကဲသာလွန်သော စိုက်ပျိုးရေးစနစ် ထည့်သွင်းခြင်း ပြီးဆုံးပါပြီ”</p> <p>ရုတ်တရက်ဆိုသလို နားထဲသို့ ချိုသာသော မိန်းကလေးအသံတစ်သံ ပျံ့လွင့်ဝင်ရောက်လာရာ ချင်ယွမ်ဖုန်းမှာ လန့်ဖျပ်သွားရသည်။</p> <p>သူသည် ပတ်ဝန်းကျင်ကို သတိကြီးစွာဖြင့် ဝေ့ဝဲကြည့်ရှုရင်း အော်ဟစ်မေးမြန်းလိုက်၏။ “ဘယ်သူလဲ၊ ဘယ်သူ စကားပြောနေတာလဲ”</p> <p>သို့ရာတွင် ပတ်ဝန်းကျင်တစ်ခုလုံးမှာ တိတ်ဆိတ်ငြိမ်သက်လျက်သာ ရှိနေပေရာ လူရိပ်လူခြေ ဝေးစွ၊ တစ္ဆေတစ်ကောင်တစ်မြီးမျှပင် ရှိဟန်မတူချေ။</p> <p>“အရှင်သခင်... စိုးရိမ်ထိတ်လန့်ခြင်း မဖြစ်ပါနဲ့။ ကျွန်မကတော့ အရှင်သခင့်ကို အလုပ်အကျွေးပြုမယ့် စနစ်ဖြစ်တဲ့ ‘ရှောင်လင်’ ပဲ ဖြစ်ပါတယ်။ အရှင်သခင့်ကို အလုပ်အကျွေးပြုရတာ ဂုဏ်ယူမိပါတယ်ရှင်။ ဒီနေရာကတော့ ရှန်းဝူ စကြဝဠာ တိုက်ကြီးပဲ ဖြစ်ပါတယ်...”</p> <p>“စနစ် ၊  ရှန်းဝူ စကြဝဠာ တိုက်ကြီး ဟုတ်လား”</p> <p>ချင်ယွမ်ဖုန်း၏ မျက်လုံးများ ပြူးကျယ်သွားရုံမျှမက၊ ကြီးမားလှသော သတင်းအချက်အလက် အစုအဝေးကြီးမှာ ဦးနှောက်အတွင်းသို့ အလုံးအရင်းနှင့် စီးဝင်လာပေရာ ပြင်းထန်သော ဝေဒနာကို ခံစားလိုက်ရလေသည်။</p> <p>စက္ကန့်အနည်းငယ်ခန့် ကြာပြီးနောက်တွင်မူ ချင်ယွမ်ဖုန်း တစ်ယောက် အခြေအနေအရပ်ရပ်ကို သဘောပေါက်သွားတော့သည်။ မနေ့ညက KTV တွင် အပျော်ကျူးကာ အိပ်ရေးပျက်ခဲ့သဖြင့် နှလုံးရပ်ပြီး ရုတ်တရက် သေဆုံးသွားခဲ့ခြင်း ဖြစ်ပေသည်။</p> <p> ထို့နောက် ယခု ရှန်းဝူ စကြဝဠာ တိုက်ကြီးသို့ ဝိညာဉ်ကူးပြောင်းလာကာ အမည်တူသည့် လူငယ်တစ်ဦး၏ ခန္ဓာကိုယ်ထဲသို့ ဝင်ရောက်ပူးကပ်ခဲ့ခြင်းပင်။</p> <p>သို့သော် ချင်ယွမ်ဖုန်းအား စိတ်မသက်မသာ ဖြစ်စေသည့်အချက်မှာ အခြားသော ဝိညာဉ်ကူးပြောင်းသူများမှာ မင်းသား သို့မဟုတ် တန်ခိုးကြီးသော ဧကရာဇ်များ ဖြစ်ကြသော်လည်း၊ သူကမူ ဂုဏ်ငယ်လှသော ‘အသုံးမကျသူ’ တစ်ဦး၏ ခန္ဓာကိုယ်၌သာ လာရောက် သန္ဓေတည်ရခြင်းပင် ဖြစ်ချေသည်။</p> <p>မှန်ပေသည်။ သူကား အသုံးမကျသူ တစ်ယောက်သာပင်။</p> <p>သူ သတိမလည်တပ်မီကပင် ထိုစကားစုမှာ ဦးနှောက်ထဲ၌ တဝဲလည်လည် ဖြစ်နေခဲ့၏။</p> <p>“အသုံးမကျတဲ့ကောင်ဆိုတာ အမြဲတမ်း အနင်းအနယ် ခံနေရမှာပဲ။ တစ်နေ့ကျမှ စာကလေးဘဝကနေ ဟင်္သာမင်းအဖြစ် အသွင်မပြောင်းနိုင်သရွေ့တော့ ဒီအတိုင်းပဲ နေပေဦးတော့ပေါ့”</p> <p>သူ ဝင်ရောက်ပူးကပ်လိုက်သော ခန္ဓာကိုယ်မှာ ထျန်းတူး ပြည်နယ်မြို့တော်ရှိ ချင်မိသားစုမှ တပည့်တစ်ဦး၏ ကိုယ်ခန္ဓာ ဖြစ်ပေသည်။</p> <p>ချင်မိသားစုဟူသည်မှာလည်း အဆင့်အတန်းအားဖြင့် ဒုတိယတန်းစားသာ ဖြစ်သော်လည်း မိသားစုအရှိန်အဝါ မကျဆင်းစေရန် မျိုးဆက်သစ်တပည့်တိုင်းကို စစ်ဆေးမှုများ ပြုလုပ်လေ့ရှိသည်။</p> <p>ပါရမီ ထူးချွန်သူများကိုမူ ‘ဆေးနတ်ဘုရားဂိုဏ်း’ သို့ ‘တရားဝင်တပည့်’ အဖြစ် စေလွှတ်လေ့ကျင့်ပေးသော်လည်း ပါရမီနုံ့သူများကိုမူ မိသားစုအတွင်း၌သာ ထားရှိကာ ဝေယျာဝစ္စများကိုသာ စီမံစေ၏။</p> <p>မူလက ချင်ယွမ်ဖုန်းမှာ ပါရမီထူးချွန်သူတစ်ဦး ဖြစ်ခဲ့ဖူးပြီး ချင်မိသားစု၏ အချစ်တော်လည်း ဖြစ်ခဲ့ပေသည်။</p> <p>သို့ရာတွင် ဆေးနတ်ဘုရားဂိုဏ်း၏ စစ်ဆေးမှု ခံယူရန် ရွေးချယ်ခံရသည့်အချိန်မှာပင် သူ၏ ပါရမီများမှာ နာလန်မထူနိုင်အောင် ပျက်စီးသွားခဲ့ရသည်။</p> <p> ထိုအခါ ပါရမီရှင် လူငယ်လေးဘဝမှ အသုံးမကျသော လူငယ်လေးဘဝသို့ တစ်ညအတွင်း ကူးပြောင်းသွားခဲ့ရလေတော့သည်။</p> <p>မိသားစု၏ အလားအလာအရှိဆုံး ကြယ်ပွင့်လေးမှာ တစ်ခဏချင်းအတွင်း လူတကာ၏ လှောင်ပြောင်စရာ အရာဝတ္ထု ဖြစ်သွားခဲ့ရပေရာ ယင်းကပင် သူ၏ ကံကြမ္မာ အချိုးအကွေ့ ဖြစ်တန်ရာသည်။</p> <p>ဆေးနတ်ဘုရားဂိုဏ်း၏ စစ်ဆေးမှု ပြီးဆုံးသောအခါတွင်လည်း ‘တရားဝင်တပည့်’ ဟူသော ဘွဲ့ထူးကို မရရှိသည့်အပြင် ဂိုဏ်းအတွင်း အနိမ့်ကျဆုံး ဖြစ်သည့် ‘ဝေယျာဝစ္စတပည့်’ ဘွဲ့ကိုသာ ချီးမြှင့်ခြင်း ခံခဲ့ရလေသည်။</p> <p>ဝေယျာဝစ္စတပည့်ဟူသည်မှာ ဂိုဏ်းအတွင်း၌ အထွေထွေ အလုပ်ကြမ်းများကို လုပ်ကိုင်ရသူများ ဖြစ်ကြသည်။ ယင်းကပင် မဆိုးလှသေးဟု ဆိုရပေမည်။</p> <p>သူအား တာဝန်ချပေးသည့် နေရာမှာ ငှက်ပင် လာ၍ မစွန့်ပစ်ဝံ့သော၊ မြက်ပင်ပင် ပေါက်ရန် ခဲယဉ်းလှသော ‘မြေနက်မြေ’ ဖြစ်နေခြင်းကသာ ပို၍ ဆိုးရွားလှပေသည်။</p> <p>ထိုသို့သော အခြေအနေအောက်တွင် တစ်ချိန်က ပါရမီရှင်ဟု ကျော်ကြားခဲ့သော ချင်ယွမ်ဖုန်းသည် မည်သို့လျှင် အလုပ်သမားဘဝဖြင့် တင်းတိမ်နိုင်ပါအံ့နည်း။</p> <p>သို့ဖြစ်၍ မိသားစုထံ ပြန်ရန် ကြိုးစားခဲ့သော်လည်း ဂိုဏ်းမှ ပယ်ထုတ်ခြင်းခံရသော တပည့်တစ်ဦးအား မည်သူက အရေးတယူ ရှိပါတော့မည်နည်း။</p> <p>မိသားစုက သူ့အပေါ် ကောင်းခဲ့ခြင်းမှာလည်း သူ၏ ပါရမီကြောင့်သာ ဖြစ်ပေရာ၊ ယခုကဲ့သို့ အသုံးမကျသူ ဖြစ်သွားချိန်တွင်မူ မည်သူကမျှ အဖတ်လုပ်ခြင်း မရှိကြတော့ချေ။</p> <p>မိသားစုထံ ပြန်ရောက်သည့် ပထမဆုံးနေ့မှာပင် တစ်ချိန်က သူ၏ပါရမီကို မနာလိုဖြစ်ခဲ့သူများ၏ ရိုက်နှက်ကန်ကျောက်ခြင်းကို ခံခဲ့ရသည်။</p> <p>နောက်ဆုံးတွင် မျှော်လင့်ချက်မဲ့စွာဖြင့် မိမိအား ချပေးထားသော မြေနက်မြေသို့ ပြန်လာခဲ့ရပြီး၊ မူလ ချင်ယွမ်ဖုန်းမှာလည်း ဝမ်းနည်းကြေကွဲမှုဖြင့် အသက်ပျောက်ခဲ့ရပေတော့သည်။</p> <p>“ငါ့ဘဝက အဆင်မပြေဘူး ထင်နေတာ၊ မင်းက ငါ့ထက်တောင် သနားဖို့ကောင်းနေပါလား ညီလေးရာ။ တစ်ချိန်က တောက်ပခဲ့ဖူးပြီးမှ အခုလို အနိမ့်ဆုံးအဆင့်ကို ထိုးကျသွားတာ တကယ်ကို ဝမ်းနည်းစရာပဲ” ဟု ချင်ယွမ်ဖုန်းက သက်ပြင်းချရင်း ဆိုလိုက်မိသည်။</p> <p>“ဒါနဲ့ ရှောင်လင်... မင်းက ငါ့ရဲ့ စနစ်ဆိုတော့၊ ငါ့အတွက် ‘အသစ်ဝင်လက်ဆောင်’ လေးဘာလေး မရှိဘူးလား” ဟု သတိဝင်လာသော ချင်ယွမ်ဖုန်းက အမြန်မေးလိုက်၏။</p> <p>အွန်လိုင်းဝတ္ထုများစွာ ဖတ်ဖူးသူပီပီ၊ စနစ်တစ်ခုပါလာလျှင် အစွမ်းထက်သည့် အကူအညီများ ရှိရမည်ကို သူ ကောင်းကောင်း သိနေပေသည်။</p> <p>“ဟုတ်ကဲ့ပါ အရှင်သခင်၊ အသစ်ဝင်လက်ဆောင် ရှိပါတယ်ရှင်။ အခုပဲ ယူမလားရှင်”</p> <p>“ယူမယ်၊ အခုချက်ချင်း ယူမယ်”</p> <p>ဤမျှ ဆိုးရွားလှသော ဘဝထဲသို့ ရောက်နေမှတော့ အခြေအနေ တိုးတက်လာအောင် မလုပ်နိုင်လျှင် ဝိညာဉ်ကူးပြောင်းလာရသည်မှာ ဘာမျှ အဓိပ္ပာယ်ရှိတော့မည် မဟုတ်ပေ။</p> <p>“တောင်.... ဂုဏ်ယူပါတယ် အရှင်သခင်၊ သဘာဝ နတ်စမ်းရေ ဆယ်ပုလင်း ရရှိပါတယ်”</p> <p>“တောင်.... ဂုဏ်ယူပါတယ် အရှင်သခင်၊ စွမ်းအင်စုပ်ယူခြင်း မဟာပညာရပ်ကို ရရှိပါတယ်”</p> <p>“တောင်.... ဂုဏ်ယူပါတယ် အရှင်သခင်၊ အသစ်တစ်ဖန် ပြန်လည်မွေးဖွားခြင်း ဆေးလုံးကို ရရှိပါတယ်”</p> <p>“အရှင်သခင်... အရှင်သခင့်ရဲ့ ကိုယ်ပိုင်အချက်အလက်တွေကို ကြည့်ချင်ပါသလားရှင်”</p> <p>လက်ဆောင်များကို ချက်ချင်းရရှိလိုက်သဖြင့် ချင်ယွမ်ဖုန်းမှာ အံ့အားသင့်လျက် ခေါင်းညိတ်ပြလိုက်မိသည်။</p> <p> “ကြည့်မယ်”</p> <p>> အရှင်သခင်: ချင်ယွမ်ဖုန်း</p> <p>> အသက်: ၁၈ နှစ်</p> <p>> ကျင့်စဉ်အဆင့်: အားအင်ချိနဲ့သူ</p> <p>> စစ်ပညာ: မရှိသေးပါ</p> <p>> ကျင့်စဉ်ပညာ: စွမ်းအင်စုပ်ယူခြင်း မဟာပညာရပ်</p> <p>> ယုံကြည်မှုတန်ဖိုး: ၁၅၀</p> <p>မိမိ၏ အချက်အလက်များကို ဖတ်ပြီးနောက် ချင်ယွမ်ဖုန်းမှာ ဆွံ့အသွားရသည်။ အထူးသဖြင့် ‘အားအင်ချိနဲ့သူ’ ဆိုသည့် ကျင့်စဉ်အဆင့်မှာ အတော်ပင် အားနည်းလွန်းနေသည် မဟုတ်လော။</p> <p>“ရှောင်လင်... ငါ့ကို ဒီလက်ဆောင်တွေနဲ့ အချက်အလက်တွေအကြောင်း ရှင်းပြစမ်းပါဦး”</p> <p>သဘာဝ နတ်စမ်းရေ: မျိုးစေ့များ ဖွံ့ဖြိုးကြီးထွားမှုကို မြန်ဆန်စေရုံမျှမက အပင်များ၏ အစွမ်းသတ္တိကိုပါ မြှင့်တင်ပေးနိုင်သည်ပေ။</p> <p>စွမ်းအင်စုပ်ယူခြင်း မဟာပညာရပ်: ရန်သူ၏ ခွန်အားများကို မိမိကိုယ်တိုင် အသုံးပြုနိုင်ရန် စုပ်ယူနိုင်သော ကျင့်စဉ်ဖြစ်ပေသည်။</p> <p>အသစ်တစ်ဖန် ပြန်လည်မွေးဖွားခြင်း ဆေးလုံး: အရှင်သခင် စားသုံးလိုက်သည်နှင့် ခန္ဓာကိုယ်၏ အခြေအနေကို အသစ်တစ်ဖန် ပြန်လည်မွေးဖွားလာသကဲ့သို့ ပြောင်းလဲပေးနိုင်သည့် အစွမ်းရှိသည်။</p> <p>ရှောင်လင်၏ ရှင်းပြချက်ကြောင့် ချင်ယွမ်ဖုန်းမှာ အတော်အသင့် သဘောပေါက်သွားရလေသည်။ သဘာဝ နတ်စမ်းရေဟူသည်မှာ အပင်ကြီးထွားနှုန်းကို မြှင့်တင်ပေးသည့် အစွမ်းထက်ဆေးတစ်မျိုးနှင့် တူလှပေသည်။</p> <p>ဥပမာအားဖြင့် ‘ဖေယွမ်ဆေးမြက်’ သည် ရင့်မှည့်ရန် ဆယ်နှစ်ကြာတတ်သော်လည်း နတ်စမ်းရေကို သုံးစွဲလျှင် တစ်ရက်တည်းဖြင့် ရင့်မှည့်နိုင်သည့်အပြင်၊ အာနိသင်မှာလည်း သာမန်အပင်များထက် နှစ်ဆ၊ သုံးဆမက ပိုမိုထက်မြက်မည် ဖြစ်ပေသည်။</p> <p>စွမ်းအင်စုပ်ယူခြင်း မဟာပညာရပ်မှာမူ ပို၍ပင် အံ့ဩစရာ ကောင်းလှ၏။ မိမိထက် အားနည်းသော ပြိုင်ဘက်ကို ချုပ်ကိုင်ထားနိုင်သရွေ့ ထိုသူ၏ ကျင့်စဉ်အားလုံးကို စုပ်ယူနိုင်မည် ဖြစ်ပေရာ ယင်းကပင် ‘ဝိညာဉ်စုပ်ယူခြင်း’ အတတ်နှင့် တူလှသည်။</p> <p>“ဒါနဲ့... ယုံကြည်မှုတန်ဖိုး  ဆိုတာ ဘာကို ပြောတာလဲ”</p> <p>ရှောင်လင်က ပြန်လည်ရှင်းပြ၏။</p> <p>“ယုံကြည်မှုတန်ဖိုးဆိုတာကတော့ အရှင်သခင့်အပေါ် ထားရှိတဲ့ ကြောက်ရွံ့မှု၊ ကြည်ညိုမှု၊ ကိုးကွယ်မှု၊ မနာလိုမှု စတဲ့ ခံစားချက်တွေပဲ ဖြစ်ပါတယ်ရှင်။ အရှင်သခင့်ရဲ့ စွမ်းဆောင်မှုတွေကနေတစ်ဆင့် အဲဒီတန်ဖိုးတွေကို ရရှိနိုင်ပြီး စနစ်ရဲ့ အရောင်းဆိုင်  မှာ လိုအပ်တဲ့ ပညာရပ်တွေနဲ့ ပစ္စည်းတွေကို ဝယ်ယူနိုင်ပါတယ်”</p> <p>“အရောင်းဆိုင်ကို ဖွင့်ပြစမ်း”</p> <p>ချင်ယွမ်ဖုန်းတစ်ယောက် အရောင်းဆိုင်ကို ကြည့်လိုက်မိသောအခါ မျက်နှာမှာ အေးခဲသွားရသည်။</p> <p>“ဒီဆိုင်က ပစ္စည်းတွေက ဈေးကြီးလွန်းလှချေလား”</p> <p>မိမိတွင်ရှိသော ၁၅၀ သော ယုံကြည်မှုတန်ဖိုးမှာ အတော်ပင် မပြောပလောက်ကြောင်း သိလိုက်ရသည်။</p> <p>ဆိုင်အတွင်းရှိ ပစ္စည်းအများစုမှာ တန်ဖိုး သန်းနှင့်ချီ၍ ရှိနေပေရာ မည်မျှကြာအောင် ကြိုးစားရမည်နည်း။</p> <p>“ထားလိုက်ပါတော့လေ။ အခုလောလောဆယ် ယုံကြည်မှုတန်ဖိုးကို ထည့်မစဉ်းစားတော့ဘူး။ အေးအေးဆေးဆေးပဲ စိုက်ပျိုးရေးလုပ်မယ်၊ ပန်းလေးတွေစိုက်၊ အိမ်မွေးတိရစ္ဆာန်လေးတွေမွေးပြီးပဲ အေးအေးချမ်းချမ်း နေတော့မယ်”</p> <p>ချင်ယွမ်ဖုန်းတွင် ကြီးကျယ်သော ရည်မှန်းချက်ကြီးများ မရှိလှချေ။ ဤမြေနက်မြေမှာ ပတ်ဝန်းကျင် ဆိုးရွားလှသော်လည်း စနစ်ရှိနေပြီဖြစ်ရာ ကောင်းမွန်အောင် ပြုပြင်ပြောင်းလဲနိုင်လိမ့်မည်ဟု သူ ယုံကြည်နေမိတော့သည်။</p> <p> </p> <p> </p> <p> </p> <p> </p> <p style="text-align: center;">***</p>


Save