Book List

<h2 style="text-align: center;">အခန်း ၃၁၄</h2> <h2 style="text-align: center;">ဆုလာဘ်များ လက်ဝယ်ရရှိခြင်း Creditများ နှစ်ဆတိုးခြင်း</h2> <h2 style="text-align: center;">*</h2> <p> </p> <p> </p> <p style="text-align:justify">"Sအဆင့် တိုက်ပွဲဝင်ဝတ်စုံ ၃၀ ကုဗမီတာ ဟင်းလင်းပြင်လက်စွပ် ပြီးတော့ ဆဋ္ဌမအဆင့် ကာကွယ်ရေးလက်ဖွဲ့ ဒါတွေအားလုံးက တကယ်ကို အဖိုးတန်တဲ့ အရာတွေပဲ"</p> <p style="text-align:justify">"ဘယ်သူက မဟုတ်ဘူးလို့ ပြောလို့လဲ.... ငါဆိုရင် စတုတ္ထအဆင့်မြင့်ကို ရောက်နေပြီ ဒါပေမဲ့ ငါ့ရဲ့ ဟင်းလင်းပြင်လက်စွပ်က တစ်ကုဗမီတာတောင် မပြည့်သေးဘူး"</p> <p style="text-align:justify">အစီအစဉ်မှူးက ဆုလာဘ်များကို ကြေညာပေးလိုက်ပြီးနောက် ပရိသတ်အများအပြားမှာ မနာလိုစိတ်ဖြင့် ကြည့်နေကြသည်။ သာမန်လူများအတွက်မူ ဒါက အဖိုးတန်ပစ္စည်းများဟု ထင်ရုံသာ ရှိသော်လည်း စွမ်းရည်ပိုင်ရှင်များအတွက်မူ အဓိပ္ပာယ်က လုံးဝ ခြားနားလှသည်။ ပထမဆုံးအနေဖြင့် Sအဆင့် တိုက်ပွဲဝင်ဝတ်စုံက သားရဲများ၏ တိုက်ခိုက်မှုကို များစွာ လျှော့ချပေးနိုင်သည်။ ထိုသို့သော ဝတ်စုံမျိုးရှိလျှင် တောနက်များထဲသို့ သွားသည့်အခါတွင်ပင် အသက်အန္တရာယ်ကို စိုးရိမ်ရန် မလိုတော့ပေ။</p> <p style="text-align:justify">ဟင်းလင်းပြင်လက်စွပ်မှာမူ စွမ်းရည်ပိုင်ရှင်များအတွက်ပင် ဇိမ်ခံပစ္စည်းတစ်ခု ဖြစ်သည်။ များသောအားဖြင့် ကျောပိုးအိတ်များဖြင့် ပစ္စည်းများကို သယ်ဆောင်နိုင်သဖြင့် ထိုမျှ အကုန်အကျခံ၍ ဝယ်ယူလေ့ မရှိကြပေ။ ထို့ကြောင့်လည်း စက်ကိရိယာ ဆိုင်များတွင် တစ်ကုဗမီတာ ဆံ့သော လက်စွပ်များမှာ အရောင်းရဆုံး ဖြစ်နေခြင်းပင်။ ၃၀ ကုဗမီတာ ဆံ့သော ဟင်းလင်းပြင်လက်စွပ်မျိုးကိုမူ စွမ်းရည်ပိုင်ရှင် အများအပြား ကြားပင် မကြားဖူးကြပေ။</p> <p style="text-align:justify">နောက်ဆုံး ချီးမြှင့်သော ဆဋ္ဌမအဆင့် ကာကွယ်ရေး လက်ဖွဲ့မှာမူ စွမ်းရည်ပိုင်ရှင်တိုင်း အိပ်မက်မက်ကြရသည့် အသက်ကယ် အဆောင်လက်ဖွဲ့ပင် ဖြစ်သည်။ ကာကွယ်ရေး လက်ဖွဲ့များမှာ ရှေးဟောင်းယဉ်ကျေးမှု အပျက်အစီးများမှသာ ထွက်ရှိခြင်း ဖြစ်သည်။ ထိုနေရာများသို့ သွားရောက်ရန်မှာ ဝင်ခွင့်လက်မှတ် လိုအပ်သလို၊ ရရှိလာသမျှမှာလည်း သိုင်းသင်တန်းကျောင်းများ၊ တပ်မတော်များနှင့် ဂိုဏ်းများ၏ လက်ထဲသို့သာ ရောက်ရှိသွားလေ့ ရှိသည်။ သာမန်စွမ်းရည်ပိုင်ရှင်များအဖို့ ထိုအပျက်အစီးများထဲသို့ ဝင်ရန်ပင် ခက်ခဲလှရာ၊ အထဲမှ ကာကွယ်ရေး လက်ဖွဲ့ကို ရှာတွေ့ရန်ဆိုသည်မှာ မဖြစ်နိုင်သလောက်ပင်။</p> <p style="text-align:justify">"မနာလိုလို့ မရဘူး... တကယ်ကို မနာလိုလို့ မရဘူး..." ပရိသတ်အများအပြားမှာ တိတ်တဆိတ် သက်ပြင်းချနေကြသည်။</p> <p style="text-align:justify">ဒါက မဟာနွေရာသီ တိုင်းပြည်၏ ထူးချွန်လှသော လူငယ်ပါရမီရှင်များ ဖြစ်သည်ကိုလည်း သူတို့ သိရှိကြသည်။ အထူးသဖြင့် ရှုကျင်းမင်ကဲ့သို့ ပါရမီရှင်မျိုးကို အမျိုးသား ပညာရေးဦးစီးဌာနက ဆုလာဘ်များ ရက်ရက်ရောရော ပေးအပ်ခြင်းမှာ သူတို့၏ ဖွံ့ဖြိုးတိုးတက်မှုကို အရှိန်မြှင့်တင်ရန်အတွက် ဖြစ်ရာ သဘာဝကျလှပေသည်။</p> <p style="text-align:justify">"အခုဆိုရင် ကျွန်တော်တို့ လိဂ်ပြိုင်ပွဲရဲ့ ချန်ပီယံ မဂျစ်စီးတီး စွမ်းရည်ပိုင်ရှင် တက္ကသိုလ် အဖွဲ့သားတွေကို ဆုလက်ခံဖို့ စင်မြင့်ပေါ် ဖိတ်ခေါ်လိုက်ပါတယ်"</p> <p style="text-align:justify">အစီအစဉ်မှူး၏ အားပါလှသော အသံနှင့်အတူ စင်မြင့်ပေါ်တွင် ဆုပေးပွဲစင်မြင့်တစ်ခု ဖြည်းညှင်းစွာ မြင့်တက်လာခဲ့သည်။ ထိုစင်မြင့်ပေါ်တွင် ၆၀ စင်တီမီတာကျော် မြင့်သော ဧရာမ ချန်ပီယံဆုဖလားကြီး တစ်လုံး ရှိနေသည်။</p> <p style="text-align:justify">“နိုင်ငံတော် တက္ကသိုလ်ပေါင်းစုံ လိဂ်ပြိုင်ပွဲ ချန်ပီယံဆုဖလား...”</p> <p style="text-align:justify">SSSအဆင့် သတ္တုစပ်ဖြင့် သွန်းလုပ်ထားသဖြင့် ဒီဂရီ စင်တီဂရိတ် သောင်းနှင့်ချီသော အပူချိန်တွင်ပင် အရည်မပျော်နိုင်ပေ။ ဤဆုဖလားကြီးကို ပြုလုပ်ရန်အတွက် မီးဓာတ်စွမ်းရည်ရှိသော အဋ္ဌမအဆင့် အထွတ်အထိပ် ဆရာကြီး တစ်ဦး၏ ပူးပေါင်းမှု လိုအပ်ခဲ့သည်။ ထို့ပြင် ဆုဖလား၏ မျက်နှာပြင်ပေါ်တွင် မဟာနွေရာသီ တိုင်းပြည်၏ မြေပုံကို အနုစိတ် ဖော်ပြထားပြီး မြေပုံပေါ်ရှိ အလင်းစက်လေးများမှာ နိုင်ငံတစ်ဝှမ်းရှိ စွမ်းရည်ပိုင်ရှင် အထက်တန်းကျောင်း ထောင်ပေါင်းများစွာကို ကိုယ်စားပြုထားခြင်း ဖြစ်သည်။</p> <p style="text-align:justify">ဤဆုဖလားကြီးသည် နိုင်ငံတော်က အဆင့်မြင့်ပညာရေးအပေါ် ပေးအပ်သော အမြင့်ဆုံး ချီးကျူးဂုဏ်ပြုမှု ဖြစ်ပြီး တက္ကသိုလ်အားလုံး ရရှိရန် မျှော်လင့်ကြသည့် အဆုံးစွန်သော ဂုဏ်ထူးဆောင်မှုပင် ဖြစ်သည်။ သောင်းနှင့်ချီသော လူထု၏ ကြည့်ရှုမှုနှင့် အားပေးသံများကြားတွင် ရှုကျင်းမင်က မဂျစ်စီးတီး အဖွဲ့ကို ဦးဆောင်ကာ စင်မြင့်ထက်သို့ တက်လှမ်း၍ ဆုဖလားကြီးကို မြှောက်မတင်လိုက်လေသည်။</p> <p style="text-align:justify">"ကဲ... ဒီဘက်ကို ကြည့်လိုက်ကြပါဦး..."</p> <p style="text-align:justify">ဆုလက်ခံသည့် ဖြစ်စဉ်တစ်ခုလုံးကို ဓာတ်ပုံဆရာများနှင့် ဗီဒီယိုရိုက်ကူးသူများက မှတ်တမ်းတင်နေကြသည်။ အဖွဲ့လိုက် ဓာတ်ပုံတွင် ရှုကျင်းမင်က အလယ်တွင် ရှိနေပြီး ခုန်းရှီနှင့် အခြားသူများက ဝန်းရံလျက် ဆုဖလားကြီးကို အတူတကွ ကိုင်မြှောက်ထားကာ အားလုံး၏ မျက်နှာတွင် အပြုံးများဖြင့် ပြည့်နှက်နေသည်။ ဒီဓာတ်ပုံက မကြာမီ သတင်းစာမျက်နှာဦးများတွင် ဖော်ပြခံရတော့မည် ဖြစ်သည်။</p> <p style="text-align:justify">ဆုဖလား လက်ခံပြီးနောက် မဂျစ်စီးတီး အဖွဲ့သားများက သူတို့၏ ကိုယ်ပိုင်ဆုလာဘ်များကိုလည်း ရရှိခဲ့ကြသည်။ Sအဆင့် တိုက်ပွဲဝင်ဝတ်စုံများကို အဖွဲ့သားတစ်ဦးချင်းစီ၏ အရပ်အမောင်း၊ ရင်ပတ်၊ ခါးနှင့် တင်ပါး အတိုင်းအတာများအတိုင်း စိတ်ကြိုက်ပုံစံဖြင့် ပြုလုပ်ပေးထားခြင်း ဖြစ်သည်။</p> <p style="text-align:justify">ရှုကျင်းမင်၏ တိုက်ပွဲဝင်ဝတ်စုံမှာ အနက်ရောင်ကို အဓိကထားပြီး ရင်ဘတ် ညာဘက်ခြမ်းတွင် ထူးခြားသော ရင်အုပ်အကာအကွယ်တစ်ခု ပါဝင်သည်။ လက်မောင်းများတွင် စမတ်လက်ပတ်နှင့် အခြားကိရိယာများ ဝတ်ဆင်ရန် နေရာများ သီးသန့်ပါရှိပြီး ကျောဘက်တွင်လည်း လက်နက်များကို ချိတ်ဆွဲရန် ချိတ်များ ပါရှိသည်။ ထိုဝတ်စုံကို အလွန် ရုန်းကန်နိုင်စွမ်းရှိသော ပစ္စည်းများဖြင့် ပြုလုပ်ထားသဖြင့် မိုးကြိုးအထွတ်အထိပ် အခြေအနေသို့ ရောက်ရှိသွားသည့်တိုင် ပျက်စီးသွားမည် မဟုတ်ပေ။</p> <p style="text-align:justify">ထို့အပြင် ရှုကျင်းမင်က ဟင်းလင်းပြင် လက်စွပ်တစ်ကွင်းနှင့် ဆဋ္ဌမအဆင့် ကာကွယ်ရေး လက်ဖွဲ့တစ်ခုကိုလည်း ရရှိခဲ့သည်။ ဟင်းလင်းပြင်လက်စွပ်မှာ သာမန်လက်စွပ်နှင့် မခြားနားသော်လည်း ကာကွယ်ရေးလက်ဖွဲ့မှာမူ တစ်ဖိတ်ဖိတ်တောက်နေသော ဆွဲကြိုးတစ်ကွင်းကဲ့သို့ အလွန် လက်ရာမြောက်လှသည်။</p> <p style="text-align:justify">"တိုက်ပွဲဝင်ဝတ်စုံနဲ့ ဟင်းလင်းပြင် လက်စွပ်ကတော့ အသုံးဝင်တယ်... ဒါပေမဲ့ ဆဋ္ဌမအဆင့် ကာကွယ်ရေး လက်ဖွဲ့ကတော့ ငါ့အတွက် သိပ်အသုံးမဝင်လှဘူး... လိဂ်ပြိုင်ပွဲပြီးရင် ဒါကို စီနီယာမလေးကိုပဲ ပေးလိုက်တော့မယ်"</p> <p style="text-align:justify">ရှုကျင်းမင်က ပွဲကြည့်စင်ဘက်သို့ တစ်ချက် ကြည့်လိုက်သောအခါ ဆံပင်ဖြူမလေး ကျန်းချူရွှမ်က ဆုန့်ချိုးယွန်း၏ ဘေးနားတွင် ထိုင်နေသည်ကို တွေ့လိုက်ရသည်။ ရှုကျင်းမင်နှင့် အခြားသူများ ဆုလက်ခံပြီး ဆင်းသွားပြီးနောက် ဆုပေးပွဲ အခမ်းအနားမှာ ဆက်လက် ကျင်းပနေခဲ့သည်။</p> <p style="text-align:justify">"ပွဲစဉ်သုံးခုစလုံးမှာ ပထမ လိဂ်ပြိုင်ပွဲရဲ့ အကြွင်းမဲ့ချန်ပီယံ ငါတို့တွေ လုပ်နိုင်ခဲ့ပြီ"</p> <p style="text-align:justify">မဂျစ်စီးတီး တက္ကသိုလ်၏ ပွဲကြည့်စင်တွင် ရှုကျင်းမင်ထံမှ ဆုဖလားကို လက်ခံရရှိလိုက်သော ရန်ကျန့်ထျန်း၏ မျက်နှာတွင် ပျော်ရွှင်သော အပြုံးများဖြင့် ပြည့်နှက်နေသည်။ ထို့နောက် သူက အားလုံးကို ကျေနပ်စွာ ကြည့်လျက် ပြောလိုက်သည်။</p> <p style="text-align:justify">"မင်းတို့အားလုံး ဒီပြိုင်ပွဲမှာ တကယ်ကို ကောင်းကောင်း စွမ်းဆောင်နိုင်ခဲ့ကြတယ်... ဒါကြောင့် ကျောင်းက မင်းတို့ရဲ့ ဆုလာဘ်တွေကို နှစ်ဆတိုးပေးဖို့ သဘောတူလိုက်ပြီ"</p> <p style="text-align:justify">"ပထမဆုံးအနေနဲ့ ရှုကျင်းမင်... မင်းဟာ အဖွဲ့ခေါင်းဆောင်တစ်ယောက်အနေနဲ့ အပြစ်ပြောစရာမရှိအောင် စွမ်းဆောင်နိုင်ခဲ့တယ်... မင်းသာမရှိရင် ငါတို့ ချန်ပီယံဖြစ်ဖို့ လုံးဝ မလွယ်ဘူး... ဒါကြောင့် ကျောင်းက မင်းကို Credit ၃၀,၀၀၀ ချီးမြှင့်ဖို့ ဆုံးဖြတ်လိုက်တယ်"</p> <p style="text-align:justify">ရှေ့ဆုံးတွင် မတ်မတ်ရပ်နေသော ရှုကျင်းမင်ကို ကြည့်ရင်း ရန်ကျန့်ထျန်း၏ မျက်နှာတွင် ဂုဏ်ယူမှုများ အထင်သား ပေါ်လွင်နေသည်။ သူ၏ ဘဝတွင် အမှန်ကန်ဆုံး ဆုံးဖြတ်ချက်မှာ ရှုကျင်းမင်ကို တပည့်အဖြစ် လက်ခံလိုက်ခြင်းပင် ဖြစ်တော့သည်။</p> <p style="text-align:justify">ထို့နောက် ခုန်းရှီက Credit ၁၂,၀၀၀၊ အခြားအဖွဲ့ဝင်များက ၁၀,၀၀၀ နှင့် အရန်လူများက ၈,၀၀၀ စီ အသီးသီး ရရှိခဲ့ကြသည်။ ရှုကျင်းမင်၏ ၃၀,၀၀၀ နှင့် ယှဉ်လျှင် နည်းပါးသည်ဟု ထင်ရသော်လည်း မည်သူမျှ မကျေမနပ် မဖြစ်ကြပေ။ အဘယ်ကြောင့်ဆိုသော် ရှုကျင်းမင်သာ မရှိခဲ့လျှင် အစွမ်းထက်လှသော ပေကျင်းတက္ကသိုလ်ကို အနိုင်ယူရန် လုံးဝ မဖြစ်နိုင်ကြောင်း သူတို့ သိရှိကြသောကြောင့် ဖြစ်သည်။ ရှုကျင်းမင် ထိုင်ခုံတွင် ထိုင်ရန် ပြင်လိုက်စဉ်မှာပင် ဒုတိယကျောင်းအုပ်ကြီး လင်းရွှမ်က သူ့ကို လှမ်းခေါ်လိုက်သည်။</p> <p style="text-align:justify">"ကျောင်းအုပ်ကြီး..." ရှုကျင်းမင်က လင်းရွှမ်၏ ဘေးသို့ သွားကာ ရိုသေစွာ နှုတ်ဆက်လိုက်သည်။</p> <p style="text-align:justify">ယနေ့တွင် လင်းရွှမ်က တက္ကသိုလ် နည်းပြဝတ်စုံကို ဝတ်ဆင်မထားဘဲ ပွပွချောင်ချောင် အနက်ရောင် ဟန်ဝတ်စုံကို ဝတ်ဆင်ထားသဖြင့် သူမ၏ သွယ်လျသော ကိုယ်ဟန်မှာ ဝတ်စုံအောက်တွင် ဖုံးကွယ်နေသည်။ သို့သော် ဝတ်စုံအောက်မှ သူမ၏ ဖြူစင်ချောမွေ့သော ခြေဖဝါးလေးများမှာမူ ပေါ်လွင်နေသည်။</p> <p style="text-align:justify">ထိုင်ခုံတွင် ထိုင်နေသော လင်းရွှမ်က ခေါင်းကို အနည်းငယ် မော့ကြည့်လိုက်သည်။ သူမ၏ လှပသော မျက်ဝန်းများက ရှုကျင်းမင်ကို စိုက်ကြည့်နေပြီး မျက်နှာတွင် အံ့သြမှုအချို့ ရှိနေသည်။ ရှုကျင်းမင်က အသက် ၁၉ နှစ်နှင့်မတူဘဲ အလွန်တည်ငြိမ်လွန်းသည်ဟု သူမ အမြဲ ခံစားခဲ့ရသည်။ ယခု ဆယ်ရက်နှင့် ဆယ်ညတိုင်တိုင် ပြင်းထန်သော တိုက်ပွဲများအပြီးတွင်မူ သူ၏ တည်ငြိမ်မှုထဲ၌ ထက်မြက်သော အရှိန်အဝါတစ်ခုပါ ကိန်းဝပ်လာခဲ့သည်။</p> <p style="text-align:justify">ထွက်ပြူစ နေမင်းကဲ့သို့ပင် သူ၏ အရှိန်အဝါမှာ တက်ကြွလန်းဆန်းနေသဖြင့် လူများကို စွဲဆောင်ထားနိုင်စွမ်း ရှိသည်။ သို့သော် အဋ္ဌမအဆင့် အထွတ်အထိပ် ဆရာကြီးတစ်ဦးဖြစ်သည့် လင်းရွှမ်မှာ သူမ၏ ခံစားချက်ကို ချက်ချင်း ထိန်းချုပ်လိုက်ပြီးနောက် ညင်သာစွာ ပြောလိုက်သည်။</p> <p style="text-align:justify">"ကျင်းမင်... ဒီပြိုင်ပွဲမှာ မင်း တကယ်ကို ကြိုးစားခဲ့ပါတယ်"</p> <p style="text-align:justify">"ဒါက ကျောင်းရဲ့ အကျိုးအတွက်ပဲလေ မပင်ပန်းပါဘူး ကျောင်းအုပ်ကြီး"</p> <p style="text-align:justify">ရှုကျင်းမင်က ပြုံးလျက် ပြန်ဖြေသည်။ ဒါက မြှောက်ပင့်ပြောဆိုခြင်း မဟုတ်ပေ။ ရှင်သန်ခြင်း ပြိုင်ပွဲအတွင်း ပင်ပန်းမှုအချို့ ရှိခဲ့သော်လည်း ဒါက အခြားသူများကြောင့် မဟုတ်ဘဲ စွမ်းရည်အမှတ်များ ပိုမို ရိတ်သိမ်းလိုသဖြင့် သူကိုယ်တိုင် ကြိုးစားခဲ့ခြင်းသာ ဖြစ်သည်။</p> <p style="text-align:justify"> </p> <p style="text-align:justify"> </p> <p style="text-align: center;">***</p>


Save