Book List

<h2 style="text-align: center;">အခန်း (၇၃၈)</h2> <h2 style="text-align: center;">မဟာမိတ် ဖွဲ့မလား (အပိုင်း ၂)</h2> <h2 style="text-align: center;">*</h2> <p> </p> <p> </p> <p>~သူတို့နှစ်ဦး အောက်ဘက် မြေပြင်ပေါ်သို့ ဆင်းသက်သွားကြပြီးနောက်၊ နင်ချီက သူ၏ သိုလှောင် နေရာလပ် ထဲမှ တရားထိုင် (ဖျာ) နှစ်ချပ်ကို ထုတ်ယူလိုက်ကာ မျက်နှာချင်းဆိုင် နေရာယူ ထိုင်လိုက်ကြ၏။</p> <p>"ကျောက်စိမ်းအလင်း အင်မော်တယ်ဂိုဏ်း က စီနီယာအစ်မကြီး ချီ ကို နင်ချီ က ဂါရဝပြုပါတယ် ခင်ဗျာ"</p> <p>နင်ချီက လက်နှစ်ဖက်ကို ယှက်ကာ ယဉ်ကျေးစွာဖြင့် နှုတ်ဆက်လိုက်သည်။</p> <p>"ရှင့်ကို အကန့်အသတ်မဲ့ ဓားဂိုဏ်း ရဲ့ ဂိုဏ်းချုပ် လို့ ခေါ်ရမလား၊ ဒါမှမဟုတ် နက်ရှိုင်းသော သစ္စာတရား နယ်မြေ ရဲ့ နယ်မြေအရှင်သခင် လို့ပဲ ခေါ်ရမလား" ချီခယ်ချင်း က မေးလိုက်၏။</p> <p>ထိုအခါ၊ နင်ချီ ၏ နှုတ်ခမ်းထောင့်များ ကွေးသွားကာ ခပ်ပြုံးပြုံး ဖြင့် ပြန်ဖြေလိုက်သည်။</p> <p>"ဒီနေရာမှာ အကန့်အသတ်မဲ့ ဓားဂိုဏ်း ရဲ့ ဂိုဏ်းချုပ် လည်း မရှိပါဘူး... နက်ရှိုင်းသော သစ္စာတရား နယ်မြေ ရဲ့ နယ်မြေအရှင်သခင် လည်း မရှိပါဘူး... နက်ရှိုင်းသော သစ္စာတရား နယ်မြေ က လူတွေရဲ့ ယုံကြည်ကိုးစားမှုကို ရထားတဲ့ မဟာမိတ် ခေါင်းဆောင်ကြီး ပဲ ရှိပါတယ်ဗျ"</p> <p>ချီခယ်ချင်း ၏ မျက်လုံးများ အနည်းငယ် ကျဉ်းမြောင်းသွား၏။ "မဟာမိတ် ခေါင်းဆောင်ကြီးလား"</p> <p>နင်ချီ ၏ ဦးဆောင်မှုအောက်တွင် နက်ရှိုင်းသော သစ္စာတရား နယ်မြေ ၏ တပ်ဖွဲ့ကြီးသည် ကျယ်ပြန့်သော ကမ္ဘာ မှ ကျင့်ကြံသူများနှင့် နယ်မြေများ ပင်လယ် မှ ကြမ်းကြုတ်သားရဲများကို မျိုးတုံး သတ်ဖြတ်ခဲ့သည့် မြင်ကွင်းကို သူမ ပြန်လည် မြင်ယောင်လာမိသည်။</p> <p>နင်ချီ သည် သူ၏ တပ်ဖွဲ့ကြီးကို နတ်ဘုရား တစ်ပါးအလား လုံးဝ အပြည့်အဝ ခြယ်လှယ် ကွပ်ကဲနေခဲ့သည်။ ဤကဲ့သို့သော အဆင့်အတန်း တစ်ခုသို့ ရောက်ရှိရန်မှာ နက်ရှိုင်းသော သစ္စာတရား နယ်မြေ အတွင်းရှိ ဂိုဏ်းအသီးသီး၏ အကြွင်းမဲ့ ယုံကြည်မှုကို ရရှိထားမှသာ ဖြစ်နိုင်ပေမည်။</p> <p>သူမကလည်း နင်ချီ ကို လက်ယှက်ကာ ပြန်လည် ဂါရဝပြုလိုက်၏။</p> <p>"မဟာမိတ် ခေါင်းဆောင်ကြီး နင်... အချိန်က တန်ဖိုးရှိလွန်းလှတဲ့အတွက် ကျွန်မ ပွင့်ပွင့်လင်းလင်းပဲ ပြောပါရစေ ရှင်"</p> <p>"ပြောပါဗျာ"</p> <p>ချီခယ်ချင်း က ဆက်ပြောလိုက်သည်။</p> <p>"ကျွန်မတို့ နှစ်ယောက်စလုံးရဲ့ လက်အောက်မှာ အစွမ်းထက်တဲ့ တပ်ဖွဲ့တွေ ကိုယ်စီ ရှိနေကြတာပဲ။ ဒီ စစ်မြေပြင်နယ်မြေ ထဲမှာ ကျွန်မတို့ရဲ့ အင်အားတွေကို စုစည်းပြီး မဟာမိတ် အဖြစ် ပူးပေါင်းလိုက်ရင် မကောင်းဘူးလား ရှင်"</p> <p>ချီခယ်ချင်း ၏ မူလ ရည်ရွယ်ချက်မှာ ဤဆုံမှတ်ကို လုယူရန် ဖြစ်သော်ငြားလည်း၊ နင်ချီ နှင့် သူ၏ တပ်ဖွဲ့ကြီးကို မြင်တွေ့လိုက်ရပြီးနောက် သူ၏ ခွန်အားကို အကဲစမ်းပြီးချိန်တွင်တော့ သူမ၏ စိတ်ကူးကို မပြောင်းလဲဘဲ မနေနိုင်တော့ချေ။</p> <p>ဝိညာဉ်ကမ္ဘာ စစ်ပွဲ စတင်လာပြီ ဖြစ်ရာ အဓိက အရေးကြီးဆုံး အချက်မှာ စစ်မြေပြင်နယ်မြေ အတွင်းရှိ ဆုံမှတ်များကို သိမ်းပိုက်ရန်ပင် ဖြစ်ပေသည်။</p> <p>ထိုဆုံမှတ်များကို သိမ်းပိုက်နိုင်ရန်မှာ လူအင်အား များများ စေလွှတ်ရုံဖြင့် ပိုကောင်းမည်ဟု မဆိုနိုင်ပေ။</p> <p>ဤနေရာသည် သေခြင်းတရားများ ပြည့်နှက်နေသော စစ်မြေပြင် တစ်ခု ဖြစ်၏။ လူအရေအတွက် နည်းပါးလေလေ၊ ပိုမို အထီးကျန်ဆန်လေလေ ဖြစ်ပြီး အသက်ရှင် ကျန်ရစ်ရန် အခွင့်အရေးမှာလည်း ပို၍ နည်းပါးသွားလေလေ ဖြစ်သည်။</p> <p>ထို့ကြောင့် အချိန်ကြာလာသည်နှင့်အမျှ ဂိုဏ်းအသီးသီး ဖြစ်စေ၊ ဝိညာဉ်နယ်မြေ အသီးသီး ဖြစ်စေ... အားလုံး စည်းလုံး ညီညွတ်ရမည် ဟူသော အချက်တစ်ချက်ကို အသေအချာ သဘောပေါက်လာကြပေလိမ့်မည်။</p> <p>မိမိကိုယ်ကိုယ် အစွမ်းထက်လှပြီဟု ထင်မှတ်ထားလျှင်တောင်မှ၊ အချင်းချင်း စည်းလုံးခြင်း မရှိဘဲ စည်းလုံးနေသော အခြား အစွမ်းထက်သည့် အုပ်စုများနှင့် တွေ့ဆုံလာရသောအခါ မည်သူက အနိုင်ရမည်ကို မေးနေစရာပင် လိုမည် မဟုတ်ချေ။</p> <p>ယခင်က နင်ချီ တွေ့ဆုံခဲ့ရသော ဗျိုင်းဖြူ အင်မော်တယ်ဂိုဏ်း နှင့် မီးလျှံငှက် အင်မော်တယ်ဂိုဏ်း တို့လိုပင် ဖြစ်၏။ သူတို့က ကိုယ့်ကိုယ်ကိုယ် အစွမ်းထက်လှပြီဟု ထင်မှတ်ထားကြသဖြင့် တပ်ဖွဲ့ငယ်များ ခွဲကာ စစ်မြေပြင်နယ်မြေ ကို တိုက်ခိုက်မည့် နည်းလမ်းကို ရွေးချယ်ခဲ့ကြပြီး နောက်ဆုံးတွင်တော့ နင်ချီ ၏ မျိုးတုံး သတ်ဖြတ်ခြင်းကို ခံလိုက်ကြရ၏။</p> <p>အကယ်၍ သူတို့သာ တပ်ဖွဲ့ငယ်များ မခွဲဘဲ အစကတည်းက စည်းလုံးညီညွတ်စွာ ရှေ့သို့ ချီတက်လာခဲ့ကြမည် ဆိုပါက နင်ချီ အနေဖြင့် သူတို့ကို အလွယ်တကူ အနိုင်ယူနိုင်ခဲ့မည် မဟုတ်ပေ။</p> <p>ထို့ကြောင့် ချီခယ်ချင်း က နင်ချီ ကို မဟာမိတ် ဖွဲ့ရန် ဖိတ်ခေါ်လိုက်ခြင်းမှာ စစ်မြေပြင်နယ်မြေ အတွင်း အနာဂတ်တွင် ဖြစ်ပေါ်လာမည့် အခြေအနေများကို ကြိုတင် အကဲခတ်မိပြီး ကြိုတင် ပြင်ဆင်မှုများ လုပ်ဆောင်နေခြင်းပင် ဖြစ်ချေသည်။</p> <p>ချီခယ်ချင်း ၏ အကြံပြုချက်နှင့် ပတ်သက်၍ နင်ချီ ၏ မျက်နှာသွင်ပြင်မှာ လုံးဝ ပြောင်းလဲသွားခြင်း မရှိဘဲ ပြတ်သားစွာပင် ပယ်ချလိုက်၏။</p> <p>"ကျွန်တော် ငြင်းပါတယ်"</p> <p>ဤမျှ ပြတ်သား ရှင်းလင်းလှသော တုံ့ပြန်မှုကြောင့် ချီခယ်ချင်း တစ်ယောက် သဘာဝကျကျပင် အံ့အားသင့်သွားတော့သည်။</p> <p>သူမက နင်ချီ ကို စိမ်းစိမ်းကြည့်ကာ ပြောလိုက်သည်။</p> <p>"ရှင်နဲ့ ကျွန်မ နှစ်ယောက်စလုံးက တပ်ဖွဲ့ ခေါင်းဆောင်တွေချည်းပဲ။ စစ်မြေပြင်နယ်မြေ ထဲက တပ်ဖွဲ့တွေရဲ့ အနာဂတ် လမ်းကြောင်းက သေချာပေါက် စည်းလုံး ညီညွတ်ရေးဘက်ကို ဦးတည်သွားမယ် ဆိုတာ ကျွန်မတို့ သိထားသင့်တယ်လေ။ ကျွန်မရဲ့ ဖူယောင် နယ်မြေ တပ်ဖွဲ့ကြီးက ရှင့်ရဲ့ နက်ရှိုင်းသော သစ္စာတရား နယ်မြေ တပ်ဖွဲ့ထက် လုံးဝ မညံ့ပါဘူး... ဘာလို့ သဘောမတူရတာလဲ"</p> <p>နင်ချီ က ယုံကြည်မှု အပြည့်ဖြင့် တည်ကြည်လေးနက် စွာ ဆိုလိုက်၏။</p> <p>"တောင်တစ်တောင်မှာ ကျားနှစ်ကောင် နေလို့ မရဘူးလေဗျာ... အကယ်လို့ ခင်ဗျားသာ ကွပ်ကဲမှု အာဏာကို စွန့်လွှတ်ပြီး ဖူယောင် နယ်မြေ တပ်ဖွဲ့ကြီး တစ်ခုလုံးကို ကျွန်တော့်ကို အပြည့်အဝ ဦးဆောင်ခွင့် ပေးမယ် ဆိုရင်တော့ ပူးပေါင်းဖို့ ဖြစ်နိုင်ချေ ရှိပါတယ်"</p> <p>ထိုစကားကို ကြားလိုက်ရသောအခါ ချီခယ်ချင်း ၏ မျက်ခုံးများ ထိစပ်လုမတတ် တွန့်ချိုးသွားတော့သည်။</p> <p>နင်ချီ က အင်အားစု နှစ်ခုကို ပူးပေါင်းရန် ဆန္ဒ မရှိခြင်း မဟုတ်ပေ။ သို့သော် သူမ အနေဖြင့် ကွပ်ကဲမှု အာဏာကို လုံးဝ စွန့်လွှတ်နိုင်မည် မဟုတ်ကြောင်းကို သူ ကောင်းကောင်း သိထား၏။</p> <p>နင်ချီ သည် အမှန်တကယ်ပင် အစွမ်းထက်ကြောင်းကို သူမ အသိအမှတ်ပြုထားသော်ငြားလည်း၊ ကွပ်ကဲမှု အာဏာကို စွန့်လွှတ်ကာ ဖူယောင် နယ်မြေ တပ်ဖွဲ့ကြီးကို နင်ချီ ၏ လက်အောက်သို့ လွှဲပြောင်းပေးရမည် ဆိုသည်ကိုမူ ချီခယ်ချင်း လုံးဝ လက်ခံနိုင်စရာ အကြောင်းမရှိပေ။ သူမတွင်လည်း သူမ၏ ကိုယ်ပိုင် ဂုဏ်သိက္ခာ ရှိ၏။</p> <p>အနည်းဆုံးတော့ သူမသည် တပ်ဖွဲ့ကြီး တစ်ခုကို ကွပ်ကဲနိုင်သော သူမ၏ ကိုယ်ပိုင် စွမ်းရည်ကို ယုံကြည်ထားပြီး၊ ဤကိစ္စတွင် သူမက နင်ချီ ထက် လုံးဝ မနိမ့်ကျကြောင်း ယုံကြည်ထားပေသည်။</p> <p>ထို့အပြင် စစ်မြေပြင်နယ်မြေ ၏ အခြေအနေများ တည်ငြိမ်သွားပြီး တသားတည်းဖြစ်ခြင်း နယ်ပယ် ဘိုးဘေးကြီး များ ဝင်ရောက်လာနိုင်မည့် အချိန်ရောက်လာသောအခါ၊ သူတို့ကလည်း ဤစစ်ပွဲတွင် ပါဝင်လာကြမည် ဖြစ်၏။</p> <p>ချီခယ်ချင်း သည် သူမ ကိုယ်တိုင်အတွက်သာမက ကျောက်စိမ်းအလင်း အင်မော်တယ်ဂိုဏ်း တစ်ခုလုံးကိုပါ ကိုယ်စားပြုနေသူ ဖြစ်သည်။</p> <p>အနာဂတ်တွင် သူမသည် ဖူယောင် နယ်မြေ တပ်ဖွဲ့ကြီးကို သူမ ဂိုဏ်းအတွင်းရှိ တသားတည်းဖြစ်ခြင်း နယ်ပယ် ဘိုးဘေးကြီး ထံသို့ ဆက်လက် လွှဲပြောင်းပေးရဦးမည် ဖြစ်ရာ ယခုအချိန်တွင် နင်ချီ ထံသို့ မည်သို့လုပ်၍ လွှဲပြောင်းပေးနိုင်ပါမည်နည်း။</p> <p>နင်ချီ အနေဖြင့်လည်း ချီခယ်ချင်း ၏ ဦးဆောင်မှုအောက်တွင် လုံးဝ နေမည် မဟုတ်ချေ။</p> <p>သူ၏ ကွပ်ကဲမှုအောက်ရှိ နက်ရှိုင်းသော သစ္စာတရား နယ်မြေ တပ်ဖွဲ့ကြီးကို ယနေ့ကဲ့သို့ စည်းလုံး ညီညွတ်သော အင်အားစု တစ်ခု ဖြစ်လာစေရန်အတွက် နင်ချီ က ဆယ်စုနှစ်များစွာ အချိန်ယူကာ သွေးစွန်းသော လေ့ကျင့်မှုများဖြင့် ပုံသွင်းထားခဲ့ရခြင်း ဖြစ်၏။</p> <p>ယေဘုယျအားဖြင့် ပြောရလျှင် နင်ချီ ဦးဆောင်သော နက်ရှိုင်းသော သစ္စာတရား နယ်မြေ တပ်ဖွဲ့ကြီးသည် အတွင်းရေး ပဋိပက္ခများ လုံးဝ ကင်းစင်နေသော ဂိုဏ်းကြီး တစ်ခုနှင့်ပင် ဆင်တူနေပြီး၊ အစစ်အမှန်သိုင်း ကမ္ဘာ အတွင်းရှိ သက်ရှိများအပေါ် သူ၏ ထိန်းချုပ်နိုင်စွမ်းထက်ပင် သာလွန်နေသေးသည်။</p> <p>ထို့ကြောင့် အကယ်၍ သူ၏ အင်အားစုများက ချီခယ်ချင်း ၏ တပ်ဖွဲ့နှင့် ပူးပေါင်းလိုက်ရပြီး တစ်ဖက် တပ်ဖွဲ့ကို သူက မကွပ်ကဲနိုင်ခဲ့လျှင် သူ၏ ကိုယ်ပိုင် စည်းချက်များ အားလုံး ပျက်ယွင်းသွားပေလိမ့်မည်။</p> <p> </p> <p>ဘာကြောင့် ဤသို့ အချိန်ဖြုန်းနေရမည်နည်း။ သူသည် အခြားသူများကို အလျှော့ပေးလိုက်လျောမည် မဟုတ်သလို၊ ဖြုန်းတီးပစ်စရာ အချိန်လည်း မရှိချေ။</p> <p>သေချာသည်မှာ... သူ့တွင် တစ်ဖက် တပ်ဖွဲ့ကို ထိန်းချုပ်လိုသော ရည်မှန်းချက် မရှိဘူးဟု ပြောမည် ဆိုလျှင်တော့ ထိုအရာက လုံးဝ မဖြစ်နိုင်သော ကိစ္စပင်။</p> <p>သို့သော် ယခုအချိန်တွင်မူ ချီခယ်ချင်း သည် မာနခံနေဆဲ။ နင်ချီ၏ တောင်းဆိုချက်များကို သဘောတူလိမ့်မည် မဟုတ်ပေ။ ကျယ်ပြန့်သော ကမ္ဘာ မှ ကျင့်ကြံသူများ၏ သည်းကြီးမည်းကြီးတိုက်ခိုက် ခြင်းကို ခံရပြီး အထိနာသွားချိန်၊ သူမ ကိုယ်တိုင် လိုလိုလားလား ရှိလာမည့် အချိန်ကို စောင့်ဆိုင်းပြီးမှ ပြန်လည် စဉ်းစားလျှင်လည်း နောက်ကျမည် မဟုတ်ချေ။</p> <p>ထိုစဉ်၊ ချီခယ်ချင်း က မတ်တတ်ထရပ်လိုက်ပြီး ပြောလိုက်၏။</p> <p>"လောလောဆယ်တော့ ကျွန်မတို့ သဘောတူညီမှု တစ်ခုကို ရနိုင်ဦးမှာ မဟုတ်သေးဘူး ထင်တယ်။ ဒါဆိုလည်း ကျွန်မ အချိန်မဖြုန်းတော့ဘူး... ပြန်ခွင့်ပြုပါဦး ရှင်"</p> <p>နင်ချီ က အနည်းငယ် ခေါင်းညိတ်ပြလိုက်သည်။</p> <p>သူ၏ ဝိညာဉ်အာရုံက နက်ရှိုင်းသော သစ္စာတရား နယ်မြေ တပ်ဖွဲ့ကြီးကို တောင်နှင့် ပင်လယ် ကမ္ဘာ့ဆန္ဒတော် ကို ဆက်လက် ဆင့်ခေါ်ရန် အမိန့်ပေးထားပြီး ဖြစ်၏။</p> <p>ယခုအချိန်တွင် ကောင်းကင်ကြယ် မှာ အပြည့်အဝ ဖွဲ့စည်းပြီးစီးသွားပြီ ဖြစ်ပြီး တောင်နှင့် ပင်လယ် ကမ္ဘာ့ဆန္ဒတော် ၏ တည်ရှိမှု အစိတ်အပိုင်း အချို့လည်း ရောက်ရှိနေပြီ ဖြစ်ရာ၊ တစ်ဖက်လူက ဆုံမှတ် ကို ဝင်လုမည်ကို နင်ချီ လုံးဝ စိုးရိမ်မနေတော့ချေ။</p> <p>အကယ်၍ တစ်ဖက်လူက အခြေအနေကို ရှင်းရှင်းလင်းလင်း နားမလည်ဘဲ ဝင်လုရန် ကြိုးစားလာမည် ဆိုလျှင်ပင်၊ တောင်နှင့် ပင်လယ် ကမ္ဘာ့ဆန္ဒတော် က ၎င်းဘာသာ ဝင်ရောက် စွက်ဖက် ရှင်းလင်းပေးလိမ့်မည်သာ ဖြစ်၏။</p> <p>ထို့အပြင် ဤ ဆုံမှတ် တွင် တပ်ဖွဲ့ကြီး နှစ်ခုစလုံး ရှိနေပြီ ဖြစ်ရာ၊ အနီးအနားတွင် ကျယ်ပြန့်သော ကမ္ဘာ မှ ကျင့်ကြံသူများ ရှိနေလျှင်ပင် အနီးသို့ ချဉ်းကပ်ရဲကြမည် မဟုတ်ပေ။</p> <p>ချီခယ်ချင်း က သူမ၏ တပ်ဖွဲ့များရှိရာသို့ ပြန်လည် ပျံသန်းသွား၏။</p> <p>စစ်ခုန်လန် က ချော့မော့ပြောဆို လိုက်၏။</p> <p>"စီနီယာအစ်မကြီး ချီ... နင်ချီ နဲ့ ဆွေးနွေးတာ အဆင်မပြေခဲ့ဘူးလားဗျ"</p> <p>ချီခယ်ချင်း က သူ့ကို တစ်ချက် အကြည့်ပို့လွှတ်လိုက်ပြီး</p> <p>"ငါတို့ ဘာတွေ ပြောခဲ့ကြလဲ ဆိုတာ မင်း သိလို့လား"</p> <p>စစ်ခုန်လန် က ဟားတိုက်လိုက်ပြီး</p> <p>"စီနီယာအစ်မကြီး ချီ က ကျွန်တော်တို့ကို အထင်သေးလွန်းနေပါပြီ... ကျွန်တော်တို့က ခန့်မှန်းကြည့်ရုံနဲ့တင် အစ်မကြီးရဲ့ အတွေးတွေကို သိနိုင်ပါတယ်ဗျာ... ဟုတ်တယ် မဟုတ်လား ကျင့်ကြံသူ မိတ်ဆွေတို့"</p> <p>လူအုပ်ကြီးထဲမှ ထောက်ခံသံများ ပြိုင်တူ ထွက်ပေါ်လာကြသည်။ ထိုသူများ အားလုံးနီးပါးမှာ သူ၏ လက်အောက်ခံဟောင်းများသာ ဖြစ်ကြ၏။</p> <p>သို့သော် ချီခယ်ချင်း ၏ တပ်ဖွဲ့များထဲမှမူ စစ်ခုန်လန် ကို တုံ့ပြန်သူ အလွန် နည်းပါးလှပေသည်။</p> <p>ထိုအခြေအနေကို မြင်လိုက်ရသောအခါ စစ်ခုန်လန် ၏ မျက်နှာသွင်ပြင်မှာ ပြောင်းလဲမသွားသော်ငြားလည်း၊ သူ၏ ရင်တွင်း၌ အနည်းငယ် တွက်ချက်မှုများ စတင် ပြုလုပ်နေပြီ ဖြစ်၏။</p> <p>ချီခယ်ချင်း ၏ လက်အောက်ခံ တစ်ဦးက မေးလိုက်သည်။</p> <p>"စီနီယာအစ်မကြီး ချီ... အစ်မကြီးက နင်ချီ ကို မဟာမိတ် ဖွဲ့ဖို့ ကမ်းလှမ်းခဲ့တာ ဖြစ်ရမယ်... ဒါပေမယ့် တစ်ဖက်လူက ငြင်းလိုက်တာ မဟုတ်လား"</p> <p>ချီခယ်ချင်း က အနည်းငယ် ခေါင်းညိတ်ပြလိုက်ပြီး၊</p> <p>"သူက သဘောတူညီမှုအတွက် အပေးအယူ အနေနဲ့ ကွပ်ကဲမှု အာဏာကို သူ့ဆီ လွှဲပေးရမယ်လို့ တောင်းဆိုနေတယ်လေ"</p> <p>"ဘယ်လို..."</p> <p>ထိုစကားကို ကြားလိုက်ရသောအခါ လူတိုင်း၏ ဒေါသမီးများ ဟုန်းခနဲ တောက်လောင်သွားကြတော့သည်။</p> <p>"ဒီကောင်က တကယ်ကို အခြေအနေမှန်ကို နားမလည်တဲ့ ကောင်ပဲ"</p> <p>"ကျွန်တော်တို့ ဖူယောင် နယ်မြေ တပ်ဖွဲ့က သူတို့ထက် လူအင်အားရော စွမ်းအားရော သာတယ်လေ။ တပ်ဖွဲ့ နှစ်ခုသာ ပူးပေါင်းလိုက်ရင် သူတို့ နက်ရှိုင်းသော သစ္စာတရား နယ်မြေ အတွက် အများကြီး အကျိုးရှိသွားမှာကို... နင်ချီ က ကျေးဇူးမတင်တဲ့အပြင် ကွပ်ကဲမှု အာဏာကိုတောင် အပိုင်စီးချင်သေးတယ် ဟုတ်လား”</p> <p> </p> <p> </p> <p style="text-align: center;">***</p>


Save