Book List

<h2 style="text-align: center;">အခန်း (၂၄၃)</h2> <h2 style="text-align: center;">ဘယ်သူက ဘယ်သူ့ကို အနိုင်ကျင့်နေတာလဲ</h2> <h2 style="text-align: center;">*</h2> <p> </p> <p> </p> <p> </p> <p> </p> <p> </p> <p style="text-align:justify"> </p> <p style="text-align:justify">သက်လတ်ပိုင်းအမျိုးသား၏ အကြည့်က နာမည်ကြီးစားသောက်ဆိုင်များအားလုံးကို ဝေ့ကြည့်သွားပြီးနောက် နောက်ဆုံးတွင် လုချန်ကို သတိပြုမိသွားသည်။</p> <p style="text-align:justify"> </p> <p style="text-align:justify">လုချန်၏ လှုပ်ရှားမှုများကို သူ မြင်လိုက်ရသောအခါ ထပ်တလဲလဲ ထွက်ပေါ်နေသော ရိုက်ချသံများက သူ၏ ရင်ထဲတွင် ထူးခြားသော စည်းချက်တစ်ခုဖြင့် တီးခတ်နေသည့် ဗုံသံများနှင့် တူနေသည်။ ထိုအခိုက်အတန့်တွင် လုချန် ရိုက်ချလိုက်သည့် အချက်တိုင်းနှင့်အတူ သူ၏ နှလုံးခုန်သံက တစ်သားတည်း ဖြစ်နေသည်ဟု သူ ခံစားလိုက်ရသည်။</p> <p style="text-align:justify"> </p> <p style="text-align:justify">‘အရမ်းကို စည်းချက်ကျလွန်းတယ်... ငါ့ရဲ့ နှလုံးခုန်သံကိုတောင် သူက ထိန်းချုပ်ထားသလိုပဲ... ဘုရားရေ... သူ ဘာလုပ်နေတာလဲ’</p> <p style="text-align:justify"> </p> <p style="text-align:justify">ဤလူက စစ်မှန်သော အစားအသောက်မက်သူတစ်ဦး ဖြစ်သည်။ စားရသည်ကို နှစ်သက်ပြီး စားနိုင်ရုံသာမက မည်သို့စားရမည်ကိုပါ သိရှိသူဖြစ်သည်။ သူ့တွင် အစားအသောက်များကို သုံးသပ်နိုင်သော ပညာဉာဏ်မျက်စိ ရှိသည်။ ပါဝင်ပစ္စည်းများ ပြင်ဆင်နေပုံကို ကြည့်ရုံဖြင့် လုချန်က သာမန်မဟုတ်ကြောင်း သူ သိနိုင်လေသည်။</p> <p style="text-align:justify"> </p> <p style="text-align:justify">ထို့နောက် ပါဝင်ပစ္စည်း ပြင်ဆင်သည့်အဆင့် ပြီးဆုံးသွားပြီး မီးစတင် မွှေးကြတော့သည်။ ပါဝင်ပစ္စည်း ပြင်ဆင်ခြင်းက အဓိကအပိုင်းဖြစ်ပြီး မီးမွှေးလိုက်ပြီဆိုသည်နှင့် မကြာခင် ပြီးဆုံးတော့မည်ဟု ဆိုနိုင်သည်။ ဟင်းပွဲက ဒယ်အိုးထဲတွင် အချိန်ဘယ်လောက်ကြာကြာ နေနိုင်မှာမို့လို့လဲ။</p> <p style="text-align:justify"> </p> <p style="text-align:justify">မီးတောက်အမျိုးမျိုး ထတောက်လာပြီး ပြိုင်ပွဲကွင်းအတွင်းမှ ပြင်းထန်သော ရနံ့များ ချက်ချင်း ထွက်ပေါ်လာသည်။</p> <p style="text-align:justify"> </p> <p style="text-align:justify">အကဲဖြတ်ဒိုင်ခုံတန်းမှ အမျိုးသမီးဒိုင်နှစ်ဦးက ရောထွေးနေသော အနံ့များကြောင့် သူတို့ကို အနှောင့်အယှက်ဖြစ်မည်စိုး၍ လက်ကိုင်ပဝါများဖြင့် နှာခေါင်းကို အုပ်ထားကြသည်ကို မြင်တွေ့နိုင်သည်။ အခြား အမျိုးသားဒိုင်သုံးဦးကမူ လေထုထဲမှ ပြင်းထန်သော ရနံ့များက သူတို့၏ စိတ်ဝင်စားမှုကို အနည်းငယ်မျှ ဆွဲဆောင်နိုင်ခြင်း မရှိသည့်အလား မလှုပ်မယှက် ငြိမ်သက်စွာ ထိုင်နေကြဆဲပင်။</p> <p style="text-align:justify"> </p> <p style="text-align:justify">ပွဲခင်းအပြင်ဘက်တွင်တော့ လူများက ထိုရနံ့များကြောင့် စိတ်လှုပ်ရှား တက်ကြွနေကြပြီ ဖြစ်သည်။ ဤနေရာတွင် ရှိနေသူတိုင်းက ဟင်းချက်အနုပညာနယ်ပယ်မှ ထင်ရှားကျော်ကြားသူများဖြစ်ပြီး ဟင်းပွဲတိုင်းက သူတို့၏ အကောင်းဆုံး လက်ရာများ ဖြစ်ကြသည်။ ယခု ထိုအရာများအားလုံး ပေါင်းစပ်သွားသောအခါ လူတိုင်း၏ အတွင်းစိတ်ထဲမှ လောဘကြီးသော အစားအသောက်မက်သူကို နိုးထလာစေရန် လုံလောက်နေပြီ ဖြစ်သည်။</p> <p style="text-align:justify"> </p> <p style="text-align:justify">သက်လတ်ပိုင်းအမျိုးသားက တံတွေးများကို ဆက်တိုက် မျိုချနေပြီး သူ၏ဘေးမှ အမျိုးသမီးငယ်လေးပင် သူ့ကိုယ်စား မျက်နှာပူလာရသည်။</p> <p style="text-align:justify"> </p> <p style="text-align:justify">လုချန်မှလွဲ၍ လူတိုင်းက သူတို့၏ မီးဖိုများကို မီးညှိလိုက်ကြပြီ ဖြစ်သည်။ လုချန်က အချိန်ကို တစ်ချက် ကြည့်လိုက်သည်။ အဆုံးသတ်ရန် အချိန်အနည်းငယ် လိုသေးသည်။</p> <p style="text-align:justify"> </p> <p style="text-align:justify">‘နည်းနည်းလောက် ထပ်ထုလိုက်ဦးမယ်’</p> <p style="text-align:justify"> </p> <p style="text-align:justify">အင်မော်တယ်အရသာနန်းဆောင် သူဌေးက လုချန်၏ လှုပ်ရှားမှုများကို ကြည့်ကာ ခနဲ့တဲ့တဲ့ ဆက်တိုက် ရယ်မောနေသည်။ ဤတစ်ကြိမ်တွင် လုချန်အတွက် မီးဖိုချရန် နေရာချန်ပေးထားရခြင်းတွင် နောက်ထပ် ရည်ရွယ်ချက်တစ်ခု ရှိနေသေးသည်။</p> <p style="text-align:justify"> </p> <p style="text-align:justify">ပြိုင်ပွဲမစတင်မီကပင် သူက သူ၏ အဆက်အသွယ်များကို အသုံးပြုကာ ယနေ့အတွက် လေတိုက်မည့် လမ်းကြောင်းကို ကြိုတင်စုံစမ်းထားခဲ့သည်။ ယခု မီးများညှိလိုက်ပြီး မီးခိုးငွေ့များ ထွက်ပေါ်လာချိန်တွင် လုချန်၏ နေရာက လေထွက်ပေါက် ဖြစ်သွားပြီး ချက်ပြုတ်ရာမှ ထွက်လာသော မီးခိုးငွေ့အမျိုးမျိုးက ထိုနေရာသို့ စုပုံသွားတော့သည်။</p> <p style="text-align:justify"> </p> <p style="text-align:justify">အစပိုင်းတွင် လုချန်၏ လှုပ်ရှားမှုများကို မြင်တွေ့ရဆဲ ဖြစ်သော်လည်း ဟင်းပွဲများမှ မီးခိုးများ စတင်ထွက်ပေါ်လာချိန်တွင် မီးခိုးတန်း ဆယ်ခုကျော်က လုချန်ကို လုံးဝ ဖုံးကွယ်သွားတော့သည်။</p> <p style="text-align:justify"> </p> <p style="text-align:justify">မကြာမီမှာပင် ဟင်းချက်မီးခိုးငွေ့များထဲမှ ပြေးထွက်လာရင်း ဆက်တိုက် ချောင်းဆိုးနေသော လုချန်၏ အသံကို ကြားလိုက်ရသည်။ ဤအခြေအနေမျိုးတွင် ဟင်းချက်ရန် နေနေသာသာ ထိုနေရာတွင် ဆက်နေရန်ပင် ခက်ခဲလှသည်။</p> <p style="text-align:justify"> </p> <p style="text-align:justify">လုချန်၏ မျက်လုံးများက မီးခိုးမွှန်မှုကြောင့် မျက်ရည်များ ကျလာပြီး ထိုလူများကို သူ၏ စိတ်ထဲမှ ကျိန်ဆဲလိုက်သည်။</p> <p style="text-align:justify"> </p> <p style="text-align:justify">ပထမအဆင့် ဂိုဏ်းချုပ်ကြီးများက ဝင်ရောက်ကူညီရန် ဟန်ပြင်လိုက်ကြသော်လည်း ခွင့်ပြုချက်မရှိသူများ ဝင်ရောက်နှောင့်ယှက်ခွင့်မရှိကြောင်း၊ သို့မဟုတ်ပါက ပြိုင်ပွဲဝင်ကို အရည်အချင်းပြည့်မီမှုမှ ပယ်ဖျက်မည်ဖြစ်ကြောင်း ပွဲခင်းဝန်ထမ်းများက အသိပေးလာသည်။</p> <p style="text-align:justify"> </p> <p style="text-align:justify">“ဘယ်သူက ခွင့်ပြုချက်မရှိသူလို့ ပြောတာလဲ”</p> <p style="text-align:justify">မြို့တော်အပြင်ဘက်မှ အဘိုးကြီးလျို၏ မီတာတစ်ရာမြင့်သော ကိုယ်ပွားပုံရိပ်ကြီး ပျောက်ကွယ်သွားပြီး သူက လေထဲမှတစ်ဆင့် ရောက်ရှိလာသည်။</p> <p style="text-align:justify">“ငါ့ရဲ့ ဆရာဦးလေးငယ်ကို ကူညီပေးခွင့် မရှိဘူးလား”</p> <p style="text-align:justify"> </p> <p style="text-align:justify">သူ့ရှေ့ရှိ ကပ်ဘေးကျော်ဖြတ်ခြင်းအဆင့် ပညာရှင်၏ အရှိန်အဝါကို ခံစားလိုက်ရသောအခါ စောစောက စကားပြောခဲ့သော ဝန်ထမ်းခမျာ ခြေထောက်များပင် ပျော့ခွေသွားသလို ခံစားလိုက်ရသည်။ သို့သော် အင်မော်တယ်အရသာနန်းဆောင် သူဌေးထံမှ သူရထားသော ငွေကြေးမည်မျှများပြားကြောင်းကို ပြန်သတိရသွားပြီးနောက် သူက အံတင်းတင်းကြိတ်ကာ အဘိုးကြီးလျိုကို ခွင့်မပြုနိုင်ကြောင်း ပြောလိုက်သည်။</p> <p style="text-align:justify"> </p> <p style="text-align:justify">“ဘာလို့လဲ... သူတို့အားလုံးဆီမှာ လူတွေ အများကြီး ရှိနေတာကို ငါ့ရဲ့ ဆရာဦးလေးငယ်က ဘာလို့ တစ်ယောက်တည်း ပြိုင်ပွဲဝင်ရမှာလဲ... ငါ့ရဲ့ ဆရာဦးလေးငယ်က အနိုင်ကျင့်ရ လွယ်တယ်လို့ မင်း ထင်နေတာလား”</p> <p style="text-align:justify"> </p> <p style="text-align:justify">“အဲဒါက...”</p> <p style="text-align:justify">ဝန်ထမ်းခမျာ ဘယ်လိုဖြေရမည်မသိဖြစ်ကာ ဤအခက်အခဲမှ တစ်စုံတစ်ယောက် လာရောက်ကယ်တင်ပေးမည့်သူ ရှိမလားဟု မျှော်လင့်ချက်ဖြင့် ဟိုဟိုဒီဒီ ကြည့်လိုက်သည်။</p> <p style="text-align:justify"> </p> <p style="text-align:justify">သို့သော် ဤအခြေအနေမျိုးတွင် ဘယ်သူက သူ့ကို လာကူညီရဲမည်နည်း။ ဟိုလူက ကပ်ဘေးကျော်ဖြတ်ခြင်းအဆင့် ပညာရှင်ကြီးလေ။ ထို့အပြင် စည်းမျဉ်းအရ ပြိုင်ပွဲဝင်တစ်ဦးလျှင် အကူလေးဦး ခေါ်ဆောင်ခွင့် ရှိသည်။ မင်းက အင်မော်တယ်အရသာနန်းဆောင် သူဌေးဆီက ပိုက်ဆံယူထားတာကို ငါတို့ မသိဘူးများ ထင်နေသလား။ မင်းကသာ ထွက်ရှင်းရဲရင် ရှင်းလေ၊ ငါတို့ကတော့ အဲဒီလောက် မမိုက်မဲဘူး။</p> <p style="text-align:justify"> </p> <p style="text-align:justify">ချွေးစေးများ ပြန်လာပြီး ဝန်ထမ်း၏ နှလုံးသားမှာ ပြိုလဲလုမတတ် ဖြစ်နေသည်။ ကပ်ဘေးကျော်ဖြတ်ခြင်းအဆင့် ပညာရှင်တစ်ဦး၏ အရှိန်အဝါက အလွန်ကြမ်းတမ်းလှသည်။ အကြည့်ခံလိုက်ရုံဖြင့်ပင် သူ့ကို ဒူးထောက်ချသွားချင်စိတ် ပေါက်လာစေသည်။</p> <p style="text-align:justify"> </p> <p style="text-align:justify">သို့သော် တစ်ဖက်တွင်လည်း အင်မော်တယ်အရသာနန်းဆောင် သူဌေးက သူ့ကို အလယ်အလတ်အဆင့် စိတ်ဝိညာဉ်ကျောက်တုံး ငါးဆယ်တိတိ ပေးထားသည်။ တစ်သက်လုံး စားမကုန်အောင်ပင်။ ထိုစိတ်ဝိညာဉ်ကျောက်တုံးများဖြင့် သူ အိမ်ကြီးအိမ်ကောင်းနှင့် နေနိုင်မည်၊ ကိုယ်လုပ်တော် ခုနစ်ယောက် ရှစ်ယောက်လောက် ထားနိုင်မည်၊ ပြီးလျှင် ဘယ်တော့မှ အလုပ်လုပ်စရာ မလိုတော့ပေ။</p> <p style="text-align:justify"> </p> <p style="text-align:justify">“မရပါဘူး”</p> <p style="text-align:justify">သူက လည်ပင်းကို မတ်ထားကာ သတ္တိမွေးပြီး ပြောလိုက်သည်။</p> <p style="text-align:justify"> </p> <p style="text-align:justify">“ငါက မင်းကို ဘာလို့လဲလို့ မေးနေတယ်လေ”</p> <p style="text-align:justify"> </p> <p style="text-align:justify">“ဟို... အဲဒါက... မရဘူးဆို မရတာပါပဲ”</p> <p style="text-align:justify"> </p> <p style="text-align:justify">“ကောင်းပြီလေ... ငါ သဘောပေါက်ပြီ... မင်းတို့က ငါတို့ကို အနိုင်ကျင့်ရလွယ်တယ်လို့ ထင်နေတာမလား... တခြားသူတွေဆီမှာ လူတွေ အများကြီး ရှိနေပေမယ့် ငါ့ရဲ့ ဆရာဦးလေးငယ်ကျတော့ တစ်ယောက်တည်း ဖြစ်နေတယ်... ဒီလောက်တောင် မတရားမှတော့ ဒီအစားအသောက်ပြိုင်ပွဲကို ဆက်လုပ်နေစရာ မလိုတော့ဘူး... အခုကစပြီး ငါပဲ ဦးစီးတော့မယ်”</p> <p style="text-align:justify">အဘိုးကြီးလျိုက ဒေါသထွက်လုဆဲဆဲ အမူအရာဖြင့် ပြောလိုက်သည်။</p> <p style="text-align:justify"> </p> <p style="text-align:justify">အဘိုးကြီးလျို၏ ဒေါသထွက်နေသော မျက်နှာကို မြင်လိုက်ရသောအခါ ဝန်ထမ်းထံမှ ခပ်စူးစူးအနံ့တစ်ခု ချက်ချင်း ထွက်ပေါ်လာသည်။ သူ ကြောက်လွန်း၍ သေးပါထွက်ကျသွားခြင်းပင်။</p> <p style="text-align:justify"> </p> <p style="text-align:justify">ဤအစားအသောက်ပြိုင်ပွဲအတွက် တာဝန်ရှိသူ အထက်လူကြီးများက အလျင်အမြန် ထွက်လာကာ ကြားဝင်ဖြန်ဖြေပေးကြသည်။ အဘိုးကြီးလျိုကို ဒေါသမထွက်ရန် တောင်းပန်ရင်း ဤကိစ္စကို ခွင့်ပြုနိုင်ကြောင်း ပြောကာ သူ့ကို ပွဲခင်းအတွင်းသို့ ဖိတ်ခေါ်လိုက်ကြသည်။</p> <p style="text-align:justify"> </p> <p style="text-align:justify">“ဒါမှပေါ့”</p> <p style="text-align:justify">အဘိုးကြီးလျိုက သူ ခုနလေးတင် စုစည်းထားသော ချီစွမ်းအင်များကို လူစုခွဲလိုက်ပြီး လက်တစ်ချက် ဝှေ့ယမ်းကာ ကပ်ဘေးကျော်ဖြတ်ခြင်းအဆင့် ပညာရှင်များဖြစ်ကြသော သူငယ်ချင်းသုံးဦးကို လှမ်းခေါ်လိုက်သည်။ ထို့နောက် သူတို့အားလုံး ပွဲခင်းအတွင်းသို့ ဝင်ရောက်လာကြသည်။</p> <p style="text-align:justify"> </p> <p style="text-align:justify">သူတို့ ဝင်ရောက်လာသည်နှင့် လုချန်ဆီသို့ လွင့်ပျံလာသော ဟင်းချက်မီးခိုးငွေ့များက ချက်ချင်း ပျောက်ကွယ်သွားသည်။ ထို့အစား စားသောက်ဆိုင်အသီးသီးမှ ထွက်လာသော မီးခိုးငွေ့များက သူတို့၏ ကိုယ်ပိုင်အမိုးများအထက်တွင် စုပုံသွားလေသည်။ စဉ်းစားနေစရာပင် မလိုဘဲ ဤသည်မှာ အဘိုးကြီးလျိုနှင့် သူ၏ သူငယ်ချင်းများ၏ လက်ချက်မှန်း သိသာလှသည်။</p> <p style="text-align:justify"> </p> <p style="text-align:justify">ကပ်ဘေးကျော်ဖြတ်ခြင်းအဆင့် ပညာရှင်များအနေဖြင့် လေတိုက်ရာလမ်းကြောင်းကို ထိန်းချုပ်ရန်ဆိုသည်မှာ အလွန်လွယ်ကူသော ကိစ္စဖြစ်သည်။</p> <p style="text-align:justify"> </p> <p style="text-align:justify">တက်ကြွစွာ ယောက်မကိုင်ပြီး ဟင်းကြော်နေကြသော အခြားစားဖိုမှူးများမှာ ရုတ်တရက် သူတို့၏ ခေါင်းပေါ်တွင် ဟင်းချက်မီးခိုးငွေ့များ ရစ်ဝဲနေသည်ကို ခံစားလိုက်ကြရသည်။ အနံ့အသက်ဆိုးများကို အနည်းငယ်မျှ ရှူရှိုက်မိလိုက်ရုံဖြင့် သူတို့ကို အဆက်မပြတ် ချောင်းဆိုးသွားစေပြီး ယောက်မကိုပင် ဆက်မကိုင်နိုင်တော့ချေ။</p> <p style="text-align:justify"> </p> <p style="text-align:justify">စားဖိုမှူးများအနေဖြင့် သူတို့က ဤအပိုင်းနှင့် ပတ်သက်၍ လေ့ကျင့်မှုများ ရရှိထားပြီး ဖြစ်သည်။ ဥပမာအားဖြင့် လေဝင်လေထွက် မကောင်းလျှင်တောင် ဆက်လက်ချက်ပြုတ်နိုင်ခြင်းမျိုးပင်။</p> <p style="text-align:justify"> </p> <p style="text-align:justify">သို့သော် ယခုအခြေအနေက ကွာခြားနေသည်။ လေဝင်လေထွက် မကောင်းလျှင်တောင် ကျယ်ဝန်းသော မီးဖိုချောင်က ဟင်းချက်မီးခိုးငွေ့များကို ပျံ့နှံ့သွားအောင် ကူညီပေးနိုင်သည်။ ယခုတော့ ဟင်းချက်မီးခိုးငွေ့များက သူတို့၏ ခေါင်းပေါ်တွင် တိုက်ရိုက် စုပုံနေသည်။ တခြားသူများက ကြည့်လိုက်လျှင် မီးခိုးငွေ့များက အစစ်အမှန်အရာဝတ္ထုတစ်ခုကဲ့သို့ သူတို့၏ ခေါင်းတစ်ခုလုံးကို ဝန်းရံထားသော ဦးထုပ်များအလား ဖြစ်နေသည်။</p> <p style="text-align:justify"> </p> <p style="text-align:justify">ဤသည်မှာ စောစောက လုချန် ကြုံတွေ့ခဲ့ရသော အခြေအနေပင်။ ယခုတော့ သူတို့ဆီ အပြည့်အဝ ပြန်လည်ရောက်ရှိသွားလေပြီ။</p> <p style="text-align:justify"> </p> <p style="text-align:justify">စောစောက လုချန် မီးခိုးမွှန်ပြီး ပြေးထွက်လာသည်ကို မြင်ခဲ့ရစဉ်က တုကူးဖူကွေ့မှာ အလွန် ဒေါသထွက်ခဲ့ရသည်။ ယခု ဤမြင်ကွင်းကို မြင်လိုက်ရချိန်တွင်တော့ သူက ချက်ချင်း ပျော်ရွှင်သွားပြီး အဆက်မပြတ် အော်ဟစ်အားပေးနေတော့သည်။</p> <p style="text-align:justify"> </p> <p style="text-align:justify">အင်မော်တယ်အရသာနန်းဆောင် သူဌေး၏ ကျေနပ်ဂုဏ်ယူနေသော အမူအရာက ချက်ချင်းပင် အကျည်းတန်သွားသည်။ သူ၏ ကိုယ်ပိုင်စားဖိုမှူးကလည်း လွတ်မြောက်နိုင်ခြင်း မရှိဘဲ ဆက်မချက်ပြုတ်နိုင်လောက်အောင် မီးခိုးမွှန်နေသဖြင့် အရင်ဆုံး မီးပိတ်ထားလိုက်ရသည်။</p> <p style="text-align:justify"> </p> <p style="text-align:justify">သို့သော် ဟင်းချက်ပြိုင်ပွဲများတွင် တစ်ဆက်တည်း ချက်ပြုတ်ရန် လိုအပ်သည်။ ဟင်းတစ်ပွဲကို တစ်ဝက်တစ်ပျက် ကြော်ထားပြီးမှ မီးပိတ်လိုက်ပြီး နောက်မှ ပြန်ကြော်မည်ဆိုလျှင် လုံးဝ ကွာခြားသွားမည် ဖြစ်သည်။ အရသာက လုံးဝမတူညီသော အဆင့်နှစ်ခုတွင် ရှိနေလိမ့်မည်။</p> <p style="text-align:justify"> </p> <p style="text-align:justify">သူက ပြိုင်ပွဲစီစဉ်သူများထံ အလျင်အမြန် တိုင်ကြားလိုက်သည်။ လုချန်က လိမ်လည်လှည့်စားနေပြီး သူ၏ အင်အားကို အသုံးပြုကာ တခြားသူများကို အနိုင်ကျင့်နေသည်ဟု ဆိုလေသည်။</p> <p style="text-align:justify"> </p> <p style="text-align:justify">အစားအသောက်ပြိုင်ပွဲ စီစဉ်သူများက လုချန်တို့အဖွဲ့နှင့် စေ့စပ်ညှိနှိုင်းရန် ဝန်ထမ်းများကို စေလွှတ်လိုက်သောအခါ ကပ်ဘေးကျော်ဖြတ်ခြင်းအဆင့် ပညာရှင်လေးဦးက ဘယ်ကရလာမှန်းမသိသော အာလူးတစ်လုံးစီကို ကိုင်ကာ လေးနက်သော အမူအရာများဖြင့် ဂရုတစိုက် အခွံနွှာနေကြသည်ကို မြင်လိုက်ရသည်။ စုပုံနေသော ဟင်းချက်မီးခိုးငွေ့များက သူတို့နှင့် လုံးဝ မသက်ဆိုင်သည့်အလားပင်။</p> <p style="text-align:justify"> </p> <p style="text-align:justify">ဤသည်ကို မြင်သောအခါ ရောက်လာသော ဝန်ထမ်းခမျာ လုချန်ထံသို့သာ အကြည့်လွှဲလိုက်ရတော့သည်။ ပွဲခင်းထဲဝင်လာကတည်းက လုချန်က အလျှော့ပေးသည့်ပုံစံ ရှိနေခဲ့သဖြင့် သူ့ကို စကားပြောရ ပိုလွယ်ကူမည်ဟု ထင်နေပုံရသည်။</p> <p style="text-align:justify"> </p> <p style="text-align:justify">ကံမကောင်းစွာဖြင့် သူက လုချန်၏ စရိုက်ကို တကယ် နားမလည်ခဲ့ပေ။ သူက ဤပညာရှင်ကြီးများ၏ စွမ်းအားကိုသာ မြင်တွေ့ခဲ့ရသော်လည်း သူတို့က လုချန်ကို ဘာကြောင့် ဤမျှအထိ ကူညီပေးနေကြသလဲဆိုသည်ကို မသိခဲ့ပေ။ ထို့အပြင် လုချန်က ဒေါသထွက်သွားလျှင် မဟာရှအင်ပါယာတစ်ခုလုံးကို ဖျက်ဆီးပစ်နိုင်စွမ်းရှိသည်ကိုလည်း သူ မသိခဲ့ပေ။</p> <p style="text-align:justify"> </p> <p style="text-align:justify">ဤအချက်များအားလုံးကို ထည့်သွင်းစဉ်းစားကြည့်လျှင် လုချန်က သေချာပေါက် ရန်စ၍ရသောသူတစ်ဦး မဟုတ်ပေ။</p> <p style="text-align:justify"> </p> <p style="text-align: center;">***</p>


Save