Book List

<h2 style="text-align: center;">အခန်း ၄၀၉</h2> <h2 style="text-align: center;">ဆေးဝါးအုပ်စု၏ ဂုဏ်သိက္ခာ</h2> <h2 style="text-align: center;">*</h2> <p> </p> <p> </p> <p>“ဟင်...”</p> <p>ထန်ယွင်မှာ ဆွံ့အသွားပြီးနောက် လွှတ်ခနဲ ပြောလိုက်မိသည်။</p> <p>“ဟေး... ဟေး... ဟေး... မင်းတို့က တကယ်ကြီး တိုက်ကြမလို့လား”</p> <p>မိန်းကလေး ၂ ဦးလုံး၏ ကျင့်စဉ်များကို ထန်ယွင် ကိုယ်တိုင် ပေးထားခြင်းဖြစ်ရာ သူတို့၏ ခွန်အားကို သူ ကောင်းစွာ သိထားသည်။ အကယ်၍ သူတို့ ၂ ဦးလုံးသာ အစွမ်းကုန် ထုတ်သုံးပြီး တိုက်ခိုက်ကြမည်ဆိုပါက နှစ်ဦးလုံး ပြင်းထန်စွာ ဒဏ်ရာရသွားနိုင်ခြေ ရှိသည် မဟုတ်ပါလော။</p> <p>ထန်ယွင်ကတော့ ထိုရလဒ်မျိုးကို လုံးဝ လက်မခံနိုင်ပေ။</p> <p>“ထန်ယွင်... ဒါက ငါနဲ့ ဇီယန်ကြားက ကိစ္စပါ၊ ရှင် ဝင်မပါနဲ့”</p> <p>“ခဲအို... ရှင် ဝင်မရှုပ်ပါနဲ့၊ ဒါက ကျွန်မနဲ့ အစ်မကြားက ထိပ်တိုက်ရင်ဆိုင်ပွဲပဲ”</p> <p>မုမုန့်ဂျီနှင့် ရွှယ်ဇီယန်တို့က တစ်ပြိုင်နက် ပြောလိုက်ကြသည်။ အမျိုးသမီး ၂ ဦးလုံး၏ မျက်လုံးများမှာ ပြတ်သားနေပြီး ရလဒ်က မည်သို့ပင်ဖြစ်စေ အရှုံးပေးမည့်ပုံ မပေါ်ပေ။</p> <p>ဤမြင်ကွင်းကို မြင်လိုက်ရသည့်အခါ ဝိညာဉ်ငါးပါးအုပ်စုမှ တပည့်များက အော်ဟစ် အားပေးလိုက်ကြသည်။</p> <p>“ဂျူနီယာညီမလေးရွှယ်ကတော့ ငါတို့ ဝိညာဉ်ငါးပါးအုပ်စုရဲ့ ဂုဏ်သိက္ခာအတွက် သူ့အစ်မကိုတောင် ပြန်တိုက်ဖို့ ဝန်မလေးဘူးပဲ... စီနီယာအစ်မရွှယ်က တကယ့် လူတော်တစ်ယောက်ပဲ မဟုတ်လား... ကျုပ်တို့ အားလုံး အတုယူသင့်တဲ့ စံပြပုဂ္ဂိုလ်ပဲဟေ့”</p> <p>“မှန်တာပေါ့... ဂျူနီယာညီမလေးရွှယ်က ငါတို့ ဝိညာဉ်ငါးပါးအုပ်စုရဲ့ ဂုဏ်ဆောင်ပဲ”</p> <p>“ဂျူနီယာညီမလေးရွှယ် သေချာပေါက် နိုင်ရမယ်”</p> <p>“သေချာတာပေါ့”</p> <p>“...”</p> <p>ထိုစကားများကို ကြားရသည့်အခါ ဝိညာဉ်ငါးပါးပိုင်ရှင်မှာ ပါးစပ်ပင် မစေ့နိုင်အောင် ပြုံးပျော်နေပြီး သူ၏ နီမြန်းနေသော မျက်နှာပေါ်တွင် ဂုဏ်ယူမှုများ ပြည့်နှက်နေတော့သည်။</p> <p>ရွှယ်ဇီယန် ကျင့်ကြံထားသော ကျင့်စဉ်ကို သူ့မြေးဖြစ်သူ ဝူလင် ကျင့်ကြံနိုင်ရန်အတွက် ရွှယ်ဇီယန်ထံမှ တောင်းယူရန် အခွင့်အရေး ရှာဖွေမည်ဟု စိတ်ထဲမှ ဆုံးဖြတ်လိုက်၏။</p> <p>သူ့အမြင်တွင် ဝူလင်နှင့် ရွှယ်ဇီယန်တို့မှာ ရွှေ၊ သစ်သား၊ ရေ၊ မီး၊ မြေ ဆိုသည့် တူညီသော ဝိညာဉ်သန္ဓေ ၅မျိုးကို ပိုင်ဆိုင်ထားကြသူများ ဖြစ်သည်။ ရွှယ်ဇီယန် ကျင့်ကြံနိုင်လျှင် သူ့မြေးလည်း သေချာပေါက် ကျင့်ကြံနိုင်လိမ့်မည်ဟု ယူဆထားခြင်း ဖြစ်၏။</p> <p>‘ဟဲဟဲ... အခုတော့ ငါ့မြေးက ထန်ယွင်ရဲ့ ပြိုင်ဘက် မဟုတ်သေးဘူးဆိုပေမဲ့ နောက်ဆို ဇီယန်ရဲ့ ကျင့်စဉ်ကို ကျင့်ပြီးရင်တော့ ထန်ယွင်ကို သတ်ဖို့က လွယ်လွယ်လေး ဖြစ်သွားမှာပါ’</p> <p>ဝိညာဉ်ငါးပါးပိုင်ရှင်မှာ အရှက်မရှိ တွေးတောနေရင်း ကျောက်စိမ်းအဆောက်အဦအောက်ရှိ ဝိညာဉ်ငါးပါးအုပ်စုမှ တပည့်များကို လက်ယပ်ပြကာ ပြောလိုက်သည်။</p> <p>“တိတ်ကြစမ်း... ဇီယန်ရဲ့ တိုက်ပွဲကို အနှောင့်အယှက် မပေးကြနဲ့”</p> <p>“အမိန့်အတိုင်း ဆောင်ရွက်ပါ့မယ်”</p> <p>ဝိညာဉ်ငါးပါးအုပ်စုမှ တပည့်ပေါင်း သိန်းချီမှာ ချက်ချင်းပင် တိတ်ဆိတ်သွားကြတော့သည်။</p> <p>လူတိုင်းက အစွမ်းထက်သူ ၂ ဦး၏ ထိပ်တိုက်ရင်ဆိုင်ပွဲကို မြင်တွေ့ရန် အသင့်ပြင်လိုက်ကြပြီ ဖြစ်၏။</p> <p>မုမုန့်ဂျီနှင့် ရွှယ်ဇီယန်တို့အနက် မည်သူက ပို၍ သန်မာသည်ကို မသိကြသော်လည်း ထိုအမျိုးသမီး ၂ဦးလုံးမှာ ပါရမီရှင်များ ဖြစ်ကြသဖြင့် နောက်ထပ် တိုက်ပွဲမှာ အလွန်ပင် ပြင်းထန်လိမ့်မည်ဟု လူတိုင်း ယူဆထားကြသည်။</p> <p>ဘာပဲဖြစ်ဖြစ် ထိုမိန်းကလေး ၂ ဦးမှာ အစွမ်းကုန် ထိုက်ခိုက်ရန် ရွေးချယ်ထားကြသည် မဟုတ်ပါလော။</p> <p>လူတိုင်းက အသက်ရှူဖို့ရာ မေ့လျော့နေစဉ်မှာပင် နောက်ထပ် ဖြစ်ပေါ်လာသော မြင်ကွင်းက အားလုံးကို ဆွံ့အသွားစေခဲ့သည်။</p> <p>ထန်ယွင်နှင့် အခြားသော တပည့်အများစုမှာ ဝါးလုံးကွဲမတတ် ရယ်မောလိုက်ကြရ၏။</p> <p>မြင်လိုက်ရသည်မှာ ရွှယ်ဇီယန်က သူမ၏ ညာလက်ကို အနောက်သို့ ပစ်ထားပြီး ထိုသို့ပင် လက်နှစ်ဖက်ကို အနောက်တွင် ထားလျက် ရပ်နေသော မုမုန့်ဂျီကို ကြည့်ကာ လေးနက်စွာ ပြောလိုက်ခြင်းပင်။</p> <p>“အစ်မမု... အဆင်သင့် ဖြစ်ပြီလား”</p> <p>“အဆင်သင့်ပဲ”</p> <p>မုမုန့်ဂျီက ပြတ်သားစွာ ပြန်ပြောလိုက်သည်။</p> <p>“စိတ်မပူပါနဲ့... ငါ နင့်ကို လုံးဝ ညှာမှာ မဟုတ်ဘူး”</p> <p>“ကောင်းပြီလေ... ဒါဆိုရင် ငါ ၃ အထိ ရေတွက်မယ်နော်”</p> <p>ရွှယ်ဇီယန်က မုမုန့်ဂျီကို စိုက်ကြည့်ကာ ကျယ်လောင်စွာ အော်ပြောလိုက်သည်။</p> <p>“၁”</p> <p>“၂”</p> <p>“၃”</p> <p>“ကျောက်တုံး၊ စက္ကူ၊ ကတ်ကြေး”</p> <p>“ဟိဟိ... အစ်မမုက စက္ကူ၊ ကျွန်မက ကတ်ကြေး... ကျွန်မ နိုင်ပြီ”</p> <p>ရွှယ်ဇီယန်က အလွန်ပင် ဝမ်းသာသွားပြီး သူမ၏ ညာဘက်လက်မှ လက်ညှိုးနှင့် လက်ခလယ်လေးကို မြှောက်ကာ အောင်ပွဲခံနေတော့သည်။ သူမ၏ ငွေခေါင်းလောင်းသံလေးအလား သာယာသော ရယ်သံလေးမှာ ဖန်လုံတောင်ထိပ်ကြီးတွင် အချိန်အတော်ကြာ ပျံ့လွင့်နေတော့၏။</p> <p>အခြားတစ်ဖက်တွင်မူ မုမုန့်ဂျီက မကျေမနပ်ဖြင့် ရေရွတ်လိုက်သည်။</p> <p>“အရင်က ပြင်ပစည်းမှာတုန်းကလည်း ဒီကောင်မလေး ဇီယန်က ငါနဲ့ ဒါမျိုး ကစားခဲ့တာပဲ... အဲ့ဒီတုန်းက သူ အမြဲတမ်း ရှုံးခဲ့တာကို ဒီနေ့ကျမှ ငါ့ကို ဘယ်လိုဖြစ်ပြီး နိုင်သွားတာလဲ”</p> <p>“ငါ့နှယ်... မရီးနဲ့ စီနီယာအစ်မရွှယ်တို့ တိုက်ကြပုံကတော့ တကယ်ကို လန်းတယ်ဗျာ”</p> <p>တာနျူမှာ ဆွံ့အသွားရ၏။</p> <p>တပည့်ပေါင်းများစွာမှာလည်း ကြောင်အမ်းအမ်း ဖြစ်သွားကြရသည်။</p> <p>၎င်းနောက် တောင်ထိပ်တစ်ခုလုံး ရယ်သံများဖြင့် ပြည့်နှက်သွားပြီး တင်းမာနေသော ပြိုင်ပွဲကြီးမှာ ရုတ်တရက် ပျော်စရာ ကောင်းသွားတော့သည်။</p> <p>ထန်ထိုင်ကျုံးတယ်လည်း ရယ်မောမိသွား၏။ ဤတိုက်ပွဲမှာ ပြက်လုံးတစ်ခုနှင့် တူနေသော်လည်း အမှန်တကယ်ပင် စိတ်ဝင်စားစရာ ကောင်းလှပေသည်။</p> <p>“အာ...”</p> <p>ဝိညာဉ်ငါးပါးပိုင်ရှင်၏ နှုတ်ခမ်းထောင့်မှာ ပြင်းထန်စွာ တုန်ယင်နေတော့သည်။ သူ့တပည့်မှာ ချန်လုံစာရင်း၏ ထိပ်တန်း ၂ နေရာထဲသို့ ဤသို့သော နည်းလမ်းဖြင့် ဝင်ရောက်သွားခဲ့သည် မဟုတ်ပါလော။</p> <p>“ဟားဟားဟား”</p> <p>ဝိညာဉ်ငါးပါးပိုင်ရှင်က ကျယ်လောင်စွာ ရယ်မောလိုက်ပြီးနောက် -</p> <p>“ဇီယန်... ဆက်ပြီးတော့ နိုင်အောင် ကြိုးစားစမ်း... ဆရာ့အတွက် နံပါတ် ၁ နေရာကို ယူပေးစမ်းပါဦး”</p> <p>ထန်ယွင်က ပြုံးလိုက်၏။ ခင်ဗျားက အိုကြီးအိုမနဲ့ ကျုပ်ကို နောက်နေတာလား။</p> <p>“ခဲအို... လာလေ... ကျွန်မတို့လည်း တစ်ပွဲလောက် ကစားကြရအောင်”</p> <p>ရွှယ်ဇီယန်က နံပါတ် ၁ ချန်လုံစင်မြင့်ပေါ်ရှိ ထန်ယွင်ကို လှမ်း၍ လက်ယပ်ခေါ်လိုက်သည်။</p> <p>ရှန်စုပင်းမှာမူ စိတ်ပူနေရပြီ ဖြစ်၏။ ချန်လုံစာရင်း၏ ထိပ်ဆုံးနေရာဆိုသည်မှာ အဆင့်သတ်မှတ်ချက် တစ်ခုတည်း မဟုတ်ဘဲ အလွန်ပင် အဓိပ္ပာယ် ကြီးမားလှသည် မဟုတ်ပါလော။</p> <p>ယခုအခါ အုပ်စု၉ ခုကြားမှ အားပြိုင်မှုမှာ ပို၍ ပြင်းထန်လာခဲ့ပြီ ဖြစ်သည်။ အကြီးအကဲများစွာက ချန်လုံစာရင်းတွင် မည်သည့်အဖွဲ့မှ တပည့်က အဆင့် ၁ ရသနည်းဆိုသည့်အပေါ် မူတည်ပြီး မည်သည့်အဖွဲ့က အသန်မာဆုံးဖြစ်ကြောင်း ဆုံးဖြတ်လေ့ ရှိကြသည်။</p> <p>အထူးသဖြင့် ရှန်စုပင်းသည် ဂိုဏ်းတည်ထောင်သူ ဘိုးဘေးများ လက်ထက်ကတည်းက အတွင်းစည်း ဆေးဝါးအုပ်စုမှ မည်သူမျှ ချန်လုံစာရင်း၏ ထိပ်ဆုံးနေရာကို မရရှိခဲ့ဖူးကြောင်း တွေးမိလိုက်၏။</p> <p>အခုတော့ ထိုအတားအဆီးကို ချိုးဖျက်ပြီး ဆေးဝါးအုပ်စု၏ ဂုဏ်သိက္ခာကို မြှင့်တင်နိုင်မည့် အခွင့်အရေးမှာ သူမ၏ ရှေ့မှောက်သို့ ရောက်ရှိနေပြီဖြစ်ရာ သူမ ဘယ်လိုလုပ်ပြီး စိတ်မလှုပ်ရှားဘဲ နေနိုင်ပါမည်နည်း။</p> <p>ထန်ယွင်က ရှန်စုပင်း၏ အမူအရာကို ကြည့်ကာ သူ့ဆရာမှာ မျှော်လင့်ချက် ကြီးမားနေကြောင်း သိလိုက်သည်။ သူမ အုပ်ချုပ်သော ဆေးဝါးအုပ်စုမှ တစ်ဦးဦးသည် ချန်လုံစာရင်း၏ ထိပ်ဆုံးနေရာကို ရယူနိုင်ရန် သူမ အိမ်မက် မက်နေခဲ့သည်မှာ သေချာလှပေ၏။ ထို့ကြောင့် ထန်ယွင်က သူ့ဆရာ၏ ဆန္ဒကို သေချာပေါက် ဖြည့်ဆည်းပေးရမည် မဟုတ်ပါလော။</p> <p>ရှန်စုပင်း စကားမပြောမီမှာပင် ထန်ယွင်က ရွှယ်ဇီယန်ကို ကြည့်ကာ နှုတ်ခမ်းဆူပြလိုက်၏။</p> <p>“ငါ့ကို အဲ့ဒီနည်းနဲ့ လာမလုပ်နဲ့... ဒီတစ်ခါ ချန်လုံစာရင်းရဲ့ နံပါတ် ၁ နေရာက ငါတို့ ဆေးဝါးအုပ်စုအတွက်ပဲ”</p> <p>ရှန်စုပင်း သက်ပြင်းချနိုင်သွားပြီး ထန်ယွင်ကို မျှော်လင့်ချက်အပြည့်ဖြင့် ကြည့်နေတော့သည်။</p> <p>“ဝှစ်”</p> <p>ထန်ယွင်၏ အရိပ်မှာ လျှပ်ခနဲ လှုပ်ရှားသွားပြီး နံပါတ် ၂ ချန်လုံစင်မြင့်ပေါ်၌ ပေါ်လာသည်။ ထို့နောက် အပြုံးကို သိမ်းဆည်းကာ လေးနက်စွာ ပြောလိုက်၏။</p> <p>“ဓားထုတ်စမ်း”</p> <p>ရွှယ်ဇီယန်က ရယ်မောလိုက်သည်။</p> <p>“ခဲအိုနဲ့ တိုက်မနေတော့ပါဘူး... ကျွန်မ သိပါတယ်... ကျွန်မ ဘယ်လောက်ပဲ တော်နေပါစေ ခဲအို့ရဲ့ ပြိုင်ဘက် မဟုတ်ဘူးဆိုတာကိုလေ... ကျွန်မ အရှုံးပေးပါတယ်”</p> <p>ရွှယ်ဇီယန်က အပြုံးကို သိမ်းဆည်းလိုက်ပြီး ထန်ယွင်ကို မျက်စောင်းထိုးကာ ပြောလိုက်၏။</p> <p>“ပျင်းစရာကြီး”</p> <p>၎င်းနောက် သူမသည် ချန်လုံစင်မြင့်ပေါ်မှ ဆင်းသက်လိုက်ပြီး မုမုန့်ဂျီ၏ ဘေးတွင် ရပ်နေလိုက်တော့သည်။</p> <p>အခြေအနေများ ငြိမ်သက်သွားသည်ကို မြင်ရသည့်အခါ ရှန်စုပင်းမှာ အိပ်မက်တစ်ခုအလား အလွန်ပင် ဝမ်းသာသွားရ၏။ ရုတ်တရက် သူမ၏ လှပသော မျက်လုံးများတွင် နူးညံ့မှုနှင့် တမ်းတမှု အရိပ်အယောင်လေးများ ပေါ်လာပြီး ဤအခိုက်အတန့်မှ ပျော်ရွှင်မှုများကို သူမ၏ဆရာနှင့် မျှဝေခံစားချင်နေမိတော့သည်။</p> <p>ကျောက်စိမ်းအဆောက်အဦပေါ်ရှိ ထန်ထိုင်ကျုံးတယ်မှာ ထရပ်လိုက်ပြီး ထန်ယွင်ကို ကြည့်ကာ ပြုံးလိုက်၏။ ထန်ယွင်ကို ကြည့်လေလေ ပို၍ သဘောကျလေလေ ဖြစ်နေတော့သည်။ ကျယ်လောင်သော သူ့အသံမှာ ကောင်းကင်တစ်ခုလုံး ပဲ့တင်ထပ်သွားတော့၏။</p> <p>“ဒီဂိုဏ်းချုပ် ကြေညာတာကတော့... ချန်လုံစာရင်းရဲ့ တိုက်ပွဲမှာ နံပါတ် ၁ နေရာကို ဆေးဝါးအုပ်စုက ထန်ယွင် ရရှိသွားပါပြီ”</p> <p>“နံပါတ် ၂ ကတော့ ဝိညာဉ်ငါးပါးအုပ်စုက ရွှယ်ဇီယန်”</p> <p>“နံပါတ် ၃ ကတော့ ဆေးဝါးအုပ်စုက မုမုန့်ဂျီ ဖြစ်ပါတယ်”</p> <p>စကားဆုံးသည်နှင့် တောင်ထိပ်ပေါ်ရှိ ဆေးဝါးအုပ်စု တပည့်များနှင့် ဝိညာဉ်ငါးပါးအုပ်စုမှ တပည့်များထံမှ အော်ဟစ် အားပေးသံများ ဒီရေအလား ထွက်ပေါ်လာတော့သည်။</p> <p>လူတိုင်း၏ မျက်နှာတွင် စိတ်လှုပ်ရှားမှုများ ပြည့်နှက်နေတော့၏။</p> <p>အထူးသဖြင့် ဆေးဝါးအုပ်စု တပည့် ထန်ယွင် အဆင့် ၁ ရရှိခြင်းမှာ အတွင်းစည်း ဆေးဝါးအုပ်စုအတွက် အမြင့်မြတ်ဆုံးသော ဂုဏ်သိက္ခာပင် ဖြစ်၏။</p> <p>အခြားတစ်ဖက်တွင်မူ နှစ်ပေါင်း ရာနှင့်ချီ၍ ချန်လုံစာရင်း၏ ထိပ်ဆုံးနေရာကို ရယူထားနိုင်ခဲ့သော သန့်စင်သောဝိညာဉ်အုပ်စုမှ တပည့်များမှာမူ များစွာ စိတ်ပျက်နေကြတော့သည်။</p> <p>ထန်ထိုင်ကျုံးတယ်က လူတိုင်းကို တိတ်ဆိတ်ရန် အချက်ပြလိုက်ပြီးနောက် ဆက်ပြော၏။</p> <p>“ချန်လုံစာရင်းရဲ့ နံပါတ် ၄ ကတော့ ခယ်ရှင်းယီ ဖြစ်ပါတယ်”</p> <p>“နောက်ထပ် ပြိုင်ပွဲ စည်းမျဉ်းများအရ စတုတ္ထအဆင့်ကို မတက်လှမ်းနိုင်ခဲ့တဲ့ တပည့်တွေက ချန်လုံစာရင်း၏ နံပါတ် ၅ မှ နံပါတ် ၈ နေရာအထိ ဆက်လက် ယှဉ်ပြိုင်ကြရမှာ ဖြစ်ပါတယ်”</p> <p>“ချန်လုံစာရင်းရဲ့ ထိပ်တန်း ၈ နေရာလုံး ထွက်ပေါ်လာပြီးတဲ့အခါမှာ အုပ်စုအသီးသီးက ခေါင်းဆောင်တွေဟာ သတ်မှတ်ထားတဲ့ လူဦးရေအတိုင်း ထာဝရနယ်မြေထဲကို ဝင်ရောက် စမ်းသပ်မယ့် တပည့်တွေကို ရွေးချယ်ကြရမှာ ဖြစ်ပါတယ်”</p> <p>“အဲ့ဒီ ရွေးချယ်မှုကို ၆ ရက်အတွင်း အပြီးသတ်ရမှာ ဖြစ်ပြီး ၇ ရက်မြောက်နေ့မှာ ဂိုဏ်းချုပ်ကိုယ်တိုင် ဆုလာဘ်တွေ ပေးအပ်ပါ့မယ်... ၈ ရက်မြောက်နေ့မှာတော့ ကျုပ်တို့ ထာဝရနတ်ဘုရားဂိုဏ်းကို စတင် ထွက်ခွာကြမှာ ဖြစ်ပါတယ်”</p> <p>ထိုစကားကို ကြားရသည့်အခါ အောက်ရှိ ခေါင်းဆောင် ၉ ဦးလုံးမှာ အလေးအနက် ဦးညွှတ်လိုက်ကြ၏။</p> <p>“အမိန့်အတိုင်း ဆောင်ရွက်ပါ့မယ် ဂိုဏ်းချုပ်”</p> <p>“အင်း”</p> <p>ထန်ထိုင်ကျုံးတယ် ခေါင်းညိတ်ပြလိုက်စဉ်မှာပင် ကောင်းကင်ယံမှ ဆံပင်ဖြူနှင့် အဘိုးအိုတစ်ဦး ဟင်းလင်းပြင်ကို နင်းလျှောက်လျက် ရောက်ရှိလာသည်။</p> <p>မျက်တောင်တစ်ခတ်အတွင်းမှာပင် ထိုအဘိုးအိုက ကျောက်စိမ်းအဆောက်အဦပေါ်သို့ ဆင်းသက်လိုက်ပြီး ထန်ထိုင်ကျုံးတယ်ကို ဦးညွှတ်လိုက်၏။ ချက်ချင်းပင် ထန်ထိုင်ကျုံးတယ်၏ စိတ်ထဲ၌ လေးစားသမှုရှိသော အသံတစ်ခု ထွက်ပေါ်လာတော့သည်။</p> <p>“ဂိုဏ်းချုပ်... ကျွန်တော်မျိုးကို ခိုင်းထားတဲ့ ကိစ္စတွေကို အားလုံး စီစဉ်ပြီးပါပြီ... အခု ကောင်းကင်ပြစ်ဒဏ် တောင်တန်းတွေရဲ့ အလယ်ပိုင်းက ဂိုဏ်းချုပ်ပေါင်း ၁,၂၆၃ ဦးဟာ ဟောင်ဖူနေမင်းနန်းတော်မှာ စောင့်ဆိုင်းနေကြပါပြီ”</p> <p>ထန်ထိုင်ကျုံးတယ် ခေါင်းညိတ်လိုက်၏။</p> <p>“ငါ သိပြီ... မင်း သူတို့ကို အရင် သွားပြီး ဧည့်ခံထားလိုက်ပါ... ငါ ခဏနေရင် လာခဲ့မယ်”</p> <p>“ကျွန်တော်မျိုးကို သွားခွင့်ပြုပါဦး”</p> <p>ဆံပင်ဖြူ အဘိုးအိုမှာ ထိုသို့ ပြောပြီးနောက် လေထဲတွင် ပျောက်ကွယ်သွားတော့သည်။</p> <p>ထန်ထိုင်ကျုံးတယ်က အမိန့်ပေးလိုက်၏။</p> <p>“ရှန်စုပင်း... နောက်ပိုင်း တောင်စဉ် ၉ခု ပြိုင်ပွဲတွေကိုတော့ မင်းပဲ အပြည့်အဝ တာဝန်ယူလိုက်တော့”</p> <p>“အမိန့်အတိုင်း ဆောင်ရွက်ပါ့မယ် ဂိုဏ်းချုပ်” </p> <p>ရှန်စုပင်းက လေးစားစွာ ပြန်ပြောလိုက်၏။</p> <p>“အင်း”</p> <p>ထန်ထိုင်ကျုံးတယ်က ပြန်လည် ဖြေကြားပြီးနောက် ထန်ယွင်အား လက်ယပ်ခေါ်လိုက်သည်။ ထန်ယွင်မှာ ထိတ်လန့်သွားပြီး သူ့ခန္ဓာကိုယ်မှာ မထိန်းချုပ်နိုင်ဘဲ လေထဲသို့ ပျံတက်သွားကာ ကျောက်စိမ်းအဆောက်အဦပေါ်သို့ ရောက်ရှိသွားတော့သည်။</p> <p>“ဂိုဏ်းချုပ်... ခင်ဗျား...”</p> <p>ထန်ယွင်၏ စကားပင် မဆုံးသေးမီမှာပင် ထန်ထိုင်ကျုံးတယ်က ပြောလိုက်၏။</p> <p>“ဒီဂိုဏ်းချုပ်မှာ မင်းကို ခိုင်းစရာ ကိစ္စတစ်ခု ရှိတယ်... ငါနဲ့အတူ လိုက်ခဲ့စမ်း”</p> <p>ထိုသို့ ပြောပြီးနောက် ထန်ထိုင်ကျုံးတယ်က ထန်ယွင်၏ လက်ကောက်ဝတ်ကို ဆုပ်ကိုင်လျက် တိမ်တိုက်များအတွင်းသို့ ပျံတက်သွားပြီး ကျယ်ပြောလှသော တိမ်ပင်လယ်ကြီးအတွင်း၌ ပျောက်ကွယ်သွားတော့လေသည်။</p> <p> </p> <p style="text-align: center;">အခန်း ၄၀၉ ပြီး</p> <p style="text-align: center;">***</p>


Save