Book List

<h2 style="text-align: center;">အခန်း ၄၁၀</h2> <h2 style="text-align: center;">ရည်ရွယ်ချက်ရှိရှိ လေ့ကျင့်ပေးခြင်း</h2> <h2 style="text-align: center;">*</h2> <p> </p> <p> </p> <p>ဖန်လုံတောင်ထိပ်တွင် လူတိုင်းက တိမ်ပင်လယ်အတွင်း ပျောက်ကွယ်သွားသော ထန်ယွင်ကို ငေးကြည့်နေကြသည်။</p> <p>“ဝှစ်...”</p> <p>တိမ်ပင်လယ်အတွင်း လေတိုးသံများ တဝေါဝေါ ကြားနေရစဉ် ထန်ယွင်က သူ့ကို ဆွဲခေါ်သွားသော ထန်ထိုင်ကျုံးတယ်ကို ကြည့်ကာ လေးစားစွာ မေးလိုက်၏။</p> <p>“ဂိုဏ်းချုပ်... တပည့်ကို ဘယ်ခေါ်သွားတာလဲ ခင်ဗျာ”</p> <p>စကားဆုံးသည်နှင့် ထန်ထိုင်ကျုံးတယ်က ထန်ယွင်ကို ပေ ၈၀၀ ခန့်ရှိသော ဟင်းလင်းပြင်ကို ဖြတ်ကျော်လျက် ဟောင်ဖူဈေး၏ အထက်သို့ ခေါ်ဆောင်သွားခဲ့ပြီ ဖြစ်သည်။</p> <p>ထန်ထိုင်ကျုံးတယ်၏ မည်သည့်လှုပ်ရှားမှုကိုမျှ မမြင်ရဘဲ ထန်ယွင်မှာ မမြင်ရသော စွမ်းအားတစ်ခု၏ အထောက်အပံ့ဖြင့် လေထဲတွင် ရပ်နေရ၏။</p> <p>ထန်ထိုင်ကျုံးတယ်က ညာလက်ကို ဝှေ့ယမ်းလိုက်ရာ ဝတ်စုံဖြူတစ်ထည် သူ့လက်ထဲတွင် ပေါ်လာပြီး ထန်ယွင်ထံ ပစ်ပေးလိုက်သည်။</p> <p>“မင်းရဲ့ အလုပ်သမားဝတ်စုံကို အရင်လဲပြီး ဒါကို ဝတ်လိုက်စမ်း... နောက်မှ ငါ အသေးစိတ် ပြောပြမယ်”</p> <p>“ဟုတ်ကဲ့ပါ ဂိုဏ်းချုပ်”</p> <p>ထန်ယွင်က အလုပ်သမားဝတ်စုံကို ချွတ်ကာ လက်ရာမြောက်လှသော ဝတ်စုံဖြူကို ဝတ်ဆင်လိုက်သည်။ ထန်ထိုင်ကျုံးတယ် ချီးကျူးလိုက်၏။</p> <p>“အင်း... တောင်းမှာအကွပ် လူမှာအဝတ် ဆိုသလိုပဲ မင်းက တကယ့်ကို ပါရမီရှင်တစ်ယောက်နဲ့ တူသွားပြီ”</p> <p>“ဂိုဏ်းချုပ်ရဲ့ ချီးကျူးမှုအတွက် ကျေးဇူးတင်ပါတယ် ခင်ဗျာ”</p> <p>ထန်ယွင်က မောက်မာခြင်းလည်း မရှိ၊ နှိမ့်ချလွန်းခြင်းလည်း မရှိဘဲ ပြန်လည် ဖြေကြားလိုက်သည်။</p> <p>ထန်ထိုင်ကျုံးတယ်က ပြုံး၍ ပြောလိုက်၏။</p> <p>“ဒီနေ့ ဂိုဏ်းချုပ်က မင်းကို ဟောင်ဖူဈေးကို ခေါ်လာတာက ပထမဆုံးအနေနဲ့ မင်းကို ဗဟုသုတတွေ ရစေချင်လို့ပဲ”</p> <p>“ဒုတိယအချက်ကတော့ မင်းမှာ စီမံခန့်ခွဲနိုင်စွမ်း ရှိ၊ မရှိ ငါ သိချင်လို့ပဲ... ဒီနေ့ ငါ့ကို မင်းရဲ့ စွမ်းဆောင်ရည်ကောင်းတွေ ပြပေးစမ်းပါ... ဘာအမှားအယွင်းမှ မရှိစေနဲ့နော်”</p> <p>ထန်ယွင်မှာ အနည်းငယ် ဇဝေဇဝါ ဖြစ်သွားသော်လည်း ချက်ချင်းပင် ပြန်လည် ဖြေကြားလိုက်၏။</p> <p>“တပည့် အမိန့်အတိုင်း ဆောင်ရွက်ပါ့မယ်... ဒါပေမဲ့ ဂိုဏ်းချုပ်က တပည့်ကို ဘာအတွက် စမ်းသပ်တာလဲဆိုတာ သိပါရစေ ခင်ဗျာ”</p> <p>ထန်ထိုင်ကျုံးတယ်က ထန်ယွင်ကို အားကျစွာ ကြည့်ကာ မေးလိုက်သည်။</p> <p>“ထာဝရနတ်ဘုရားဂိုဏ်းကနေ ပြန်လာတုန်းက မင်းပြောခဲ့တဲ့ စာလုံး ၄၈ လုံးပါတဲ့ နည်းဗျူဟာကို မင်း မှတ်မိသေးလား... မှတ်မိရင် ဒီဂိုဏ်းချုပ်ကို တစ်ခေါက်လောက် ပြန်ရွတ်ပြစမ်းပါဦး”</p> <p>“တပည့် မှတ်မိပါတယ် ခင်ဗျာ”</p> <p>ထန်ယွင်က တွေဝေခြင်းမရှိဘဲ ပြန်လည် ရွတ်ဆိုပြလိုက်သည်။</p> <p>“သည်းခံအောင့်အည်း ကိုယ့်ကိုယ်ကိုယ်နှိမ့်ချ အရင်းအမြစ်ခွဲဝေ ဂိုဏ်းကိုကြွယ်ဝစေ”</p> <p>“၉ သွယ်ပြုပြင် ဂိုဏ်းတော်စည်းလုံး အချင်းချင်းဆက်သွယ် ဝိညာဉ်ကျောက်များစုဆောင်း”</p> <p>“နတ်အစီအရင်တည်ဆောက် အင်အားတိုးမြှင့် ထာဝရကိုဖျက်ဆီး ဝိညာဉ်နန်းတော်ကိုချေမှုန်း”</p> <p>“ကောင်းကင်ပြစ်ဒဏ်ကိုစည်းလုံး သူရဲကောင်းတို့နှင့်ယှဉ်ပြိုင် လောကကိုအောင်နိုင် ငြိမ်းချမ်းရေးကို တည်ဆောက်”</p> <p>ထန်ထိုင်ကျုံးတယ်က ခေါင်းညိတ်လိုက်၏။</p> <p>“မှတ်မိနေရင် ပြီးတာပဲ”</p> <p>“အခု မင်းရဲ့ အဆိုပြုချက်အရ ဒီဂိုဏ်းချုပ်ဟာ ဒုက္ခကို အောင့်အည်း သည်းခံပြီး ကိုယ့်တန်ဖိုးကို နှိမ့်ချကာ ကောင်းကင်ပြစ်ဒဏ် တောင်တန်းတွေရဲ့ အလယ်ပိုင်းက တတိယတန်းစားကနေ ပထမတန်းစားအထိ ရှိတဲ့ ဂိုဏ်းချုပ်အားလုံးကို ဟောင်ဖူနေမင်းနန်းတော်ဆီ ဖိတ်ကြားထားတယ်”</p> <p>“နောက်ထပ် အသေးစိတ် ဆွေးနွေးမှုတွေကိုတော့ မင်းပဲ ကိုင်တွယ်ရမယ်... သေချာတာကတော့ စကားမှားမှာကို မစိုးရိမ်နဲ့... ဂိုဏ်းချုပ်က မင်းဘေးမှာ ရှိနေပေးမှာဆိုတော့ မင်း အမှားလုပ်မိရင် ငါက ကူညီပေးမှာပေါ့”</p> <p>ထန်ထိုင်ကျုံးတယ်၏ ဆိုလိုရင်းမှာ ရှင်းလင်းလှပေသည်။ သူသည် ထန်ယွင်ကို လေ့ကျင့်ပေးနေခြင်း ဖြစ်၏။</p> <p>ထန်ယွင်မှာလည်း လူအ မဟုတ်ပေ။ ဂိုဏ်း၏ အင်အား တောင့်တင်းမှသာ နောက်ပိုင်းတွင် သူ့ကျင့်ကြံခြင်းအတွက် အထောက်အပံ့များ ပိုမို ရရှိမည် မဟုတ်ပါလော။ ဤအခွင့်အရေးကို သူ လက်လွတ်ခံမည် မဟုတ်ပေ။</p> <p>“ဂိုဏ်းချုပ်ရဲ့ လေ့ကျင့်ပေးမှုအတွက် ကျေးဇူးတင်ပါတယ် ခင်ဗျာ”</p> <p>ထန်ယွင်က အလေးအနက် ဦးညွှတ်လိုက်၏။</p> <p>“တပည့်အနေနဲ့ ဒီဆွေးနွေးမှုကို အကောင်းဆုံး ဖြစ်အောင် ဆောင်ရွက်ပါ့မယ်”</p> <p>“အင်း”</p> <p>ထန်ထိုင်ကျုံးတယ်က ခေါင်းညိတ်ပြပြီးနောက် မှာကြားလိုက်သည်။</p> <p>“အခု မင်းရဲ့ အသက်ကို လိုချင်နေတဲ့သူတွေ အများကြီးပဲ... ငါက ဂိုဏ်းချုပ် ဖြစ်နေပေမဲ့လည်း မင်းကို အမြဲတမ်း အကာအကွယ် မပေးနိုင်ဘူး”</p> <p>“ဒါကြောင့် ဒီနေ့ ကိစ္စကို တခြားသူတွေ မနာလို မဖြစ်စေဖို့အတွက် ခဏလောက် လျှို့ဝှက်ထားပေးပါ... နားလည်လား”</p> <p>ထန်ယွင်က ဦးညွှတ်ကာ ဖြေကြားလိုက်သည်။</p> <p>“တပည့် နားလည်ပါတယ် ခင်ဗျာ”</p> <p>“ကောင်းပြီ... ဒါက မင်းရဲ့ နည်းဗျူဟာကို ကြားပြီးနောက်မှာ ပြင်ဆင်ထားတဲ့ ဆွေးနွေးမှုဆိုင်ရာ အချက်အလက်တွေ ပါတဲ့ ကျောက်စိမ်းပြားပဲ... ဒါကို သေချာ မှတ်သားထားလိုက်ဦး”</p> <p>ထန်ထိုင်ကျုံးတယ်က ကျောက်စိမ်းပြား တစ်ခုကို ထန်ယွင်ထံ ကမ်းပေးလိုက်၏။</p> <p>ထန်ယွင်က ကျောက်စိမ်းပြားကို လက်နှစ်ဖက်ဖြင့် လှမ်းယူလိုက်ပြီး ဝိညာဉ်အာရုံကို သွင်းလိုက်သည့်အခါ ကျောက်စိမ်းပြားအတွင်း၌ ဆွေးနွေးမှုဆိုင်ရာ အသေးစိတ် အချက်အလက်များနှင့် နည်းဗျူဟာများ စာလုံးပေါင်း သောင်းနှင့်ချီ၍ ရေးသားထားသည်ကို တွေ့လိုက်ရသည်။</p> <p>ထန်ယွင် အရာအားလုံးကို မှတ်သားပြီးနောက်တွင်မူ တစ်စုံတစ်ခုကို ပြောရန် တွေဝေနေဟန်ဖြင့် မျက်မှောင် အနည်းငယ် ကြုတ်လိုက်မိ၏။</p> <p>ထန်ထိုင်ကျုံးတယ်က ရယ်မောကာ မေးလိုက်သည်။</p> <p>“ဂိုဏ်းချုပ်ပေါင်း ထောင်နဲ့ချီတဲ့သူတွေကို ရင်ဆိုင်ရမှာဆိုတော့ မင်း နည်းနည်း ကြောက်နေတာလား”</p> <p>“ဒါက ကိစ္စမရှိပါဘူး... လောကကြီးရဲ့ အခင်းအကျင်းကြီးကို ပထမဆုံးအကြိမ် မြင်ရတဲ့သူအတွက် စိတ်လှုပ်ရှားတာက သဘာဝပါပဲ”</p> <p>ထန်ယွင်က လေးစားစွာ ပြောလိုက်၏။</p> <p>“ဂိုဏ်းချုပ်ကို တင်ပြပါတယ်... တပည့်မှာ ပြောစရာရှိပါတယ်... ဒါပေမဲ့ ပြောသင့်၊ မပြောသင့်တော့ မသေချာပါဘူး ခင်ဗျာ”</p> <p>“ပြောပါ... ကိစ္စမရှိပါဘူး” </p> <p>ထန်ထိုင်ကျုံးတယ်မှာ အနည်းငယ် ဇဝေဇဝါ ဖြစ်သွားရသည်။</p> <p>“ဂိုဏ်းချုပ်ရဲ့ အစီအစဉ်ကို ကြည့်ခြင်းအားဖြင့် ဂိုဏ်းချုပ်ဟာ အရည်အချင်းရှိပြီး ရည်မှန်းချက် ကြီးမားတာ သိသာပါတယ်... ဒါပေမဲ့...”</p> <p>ထန်ယွင်က အမှန်အတိုင်း ပြောလိုက်၏။</p> <p>“တပည့်မှာတော့ မတူညီတဲ့ အမြင်တချို့ ရှိနေပါတယ်... အဲ့ဒီအတိုင်းဆိုရင် ဆွေးနွေးတဲ့အခါ ပိုပြီးတော့ အကျိုးရှိလိမ့်မယ် ထင်လို့ပါ”</p> <p>ထိုအခါမှ ထန်ထိုင်ကျုံးတယ်သည် ထန်ယွင်က သူ့အဆိုပြုချက်တွင် အားနည်းချက် ရှိနေသည်ဟု ပြောဆိုနေခြင်းဖြစ်ကြောင်း နားလည်လိုက်သည်။</p> <p>ထန်ထိုင်ကျုံးတယ်က အများကြီး မပြောဘဲ မေးမြန်းလိုက်၏။</p> <p>“ဒါဆိုရင် မင်းရဲ့ အမြင်အရဆိုရင်... အဲ့ဒီ ဂိုဏ်းချုပ်တွေကို ကျုပ်တို့ဂိုဏ်းရဲ့ အစီအစဉ်နောက်ကို ကျေကျေနပ်နပ်နဲ့ လိုက်ပါလာအောင် မင်း ဘယ်လောက်အထိ စွမ်းဆောင်နိုင်မလဲ”</p> <p>“အမှားအယွင်း မရှိရင်တော့ ၁၀၀ ရာခိုင်နှုန်းပါပဲ” </p> <p>ထန်ယွင်က တွေဝေခြင်းမရှိဘဲ ပြောလိုက်သည်။</p> <p>“၁၀၀ ရာခိုင်နှုန်း ဟုတ်လား”</p> <p>ထန်ထိုင်ကျုံးတယ်မှာ တုန်လှုပ်သွားရ၏။ သူ့ကိုယ်ပိုင် အဆိုပြုချက်အတွက်ပင် အောင်မြင်နိုင်ခြေမှာ ၈၀ ရာခိုင်နှုန်းသာ ရှိမည်ဟု ခန့်မှန်းထားသော်လည်း ထန်ယွင်က ၁၀၀ ရာခိုင်နှုန်းဟု ပြောနေသည် မဟုတ်ပါလော။</p> <p>“ဒါဆိုရင်တော့ ငါ မျှော်လင့်နေမယ်နော်”</p> <p>ထန်ထိုင်ကျုံးတယ်က ပြုံး၍ ပြောလိုက်၏။</p> <p>“ထန်ယွင်... ဒီကိစ္စ မင်းကိုပဲ အပ်လိုက်ပြီ... ဂိုဏ်းချုပ်ကို စိတ်မပျက်စေနဲ့နော်”</p> <p>“တပည့်အနေနဲ့ ဂိုဏ်းချုပ်ရဲ့ အခက်အခဲတွေကို ဖြေရှင်းပေးဖို့ အစွမ်းကုန် ကြိုးစားပါ့မယ် ခင်ဗျာ”</p> <p>“ကောင်းပြီ... မှတ်ထားပါ... အခု မင်းက ဒီကိစ္စကို တာဝန်ယူရတဲ့ ငါ့ရဲ့ သံတမန်ပဲ”</p> <p>၎င်းနောက် ထန်ထိုင်ကျုံးတယ်က ထန်ယွင်ကို ခေါ်ဆောင်ကာ ဟောင်ဖူဈေးအတွင်းသို့ ဆင်းသက်လိုက်ပြီးနောက် ဟောင်ဖူနေမင်းနန်းတော်ဆီသို့ လျှပ်ခနဲ ရောက်ရှိသွားတော့သည်။</p> <p>ဟောင်ဖူနေမင်းနန်းတော်သည် ဟောင်ဖူဈေးတွင် အကြီးဆုံးသော လေလံခန်းမကြီးတစ်ခုဖြစ်ရာ ထန်ယွင်အတွက်မူ ဤနေရာက မစိမ်းလှပေ။</p> <p>ယခုအချိန်တွင် ပထမထပ် ခန်းမကြီးအတွင်း၌ ခုံတန်းပေါင်း ဒါဇင်နှင့်ချီကာ ရှိနေပြီး စားပွဲများပေါ်တွင် အကောင်းစား ဝိုင်များနှင့် မြိန်ရှက်ဖွယ် စားသောက်ဖွယ်ရာများဖြင့် ပြည့်နှက်နေ၏။</p> <p>မူလက လေလံစင်မြင့်ဖြစ်ခဲ့သော နေရာတွင် ယခုအခါ ထိုင်ခုံတစ်ခုကို ပြင်ဆင်ထားပြီး ထန်ထိုင်ချန်ယွမ်မှာ ထိုထိုင်ခုံအလွတ်၏ ဘေးတွင် ရပ်နေသည်။</p> <p>ထိုသူမှာ ဖန်လုံတောင်ထိပ်သို့ လာရောက်ကာ ထန်ထိုင်ကျုံးတယ်၏ ရှေ့တွင် မိမိကိုယ်ကိုယ် အစေခံအိုကြီးဟု ခေါ်ဆိုခဲ့သူပင်။</p> <p>ခန်းမအတွင်းရှိ ထိုင်ခုံများမှာ ပြည့်နှက်နေပြီ ဖြစ်၏။</p> <p>၎င်းတို့အနက် ပထမတန်းစား ဂိုဏ်းချုပ် ရာပေါင်းများစွာ၊ ဒုတိယတန်းစား ဂိုဏ်းချုပ် ၅၀၀ ကျော်နှင့် တတိယတန်းစား ဂိုဏ်းချုပ် ၆၀၀ ကျော်တို့ ပါဝင်ကြသည်။</p> <p>လှပသော အမျိုးသမီးငယ်များ၊ ခန့်ညားသော လူငယ်များ၊ ထွားကျိုင်းသော လူလတ်ပိုင်း အမျိုးသားများနှင့် အလှမပျက်သေးသော အမျိုးသမီးကြီးများလည်း ပါဝင်ကြ၏။</p> <p>သေချာသည်မှာ အသက် ၆၀ အရွယ် အဘိုးအိုများနှင့် စိတ်ဓာတ်တက်ကြွနေသော အဘွားအိုများလည်း ရှိနေကြသည်။</p> <p>ဤဂိုဏ်းများအနက် အချို့မှာ ဆေးပညာဖြင့် ဂိုဏ်းတည်ထောင်ထားကြပြီး အချို့မှာ လက်နက်၊ လက်နက်အစီအရင်၊ အစီအရင် ပညာရပ်များဖြင့်လည်းကောင်း၊ အချို့မှာ ရုပ်သေးပညာ၊ အလောင်းထိန်းချုပ်ခြင်း ပညာနှင့် အခြားသော ဘိုးဘေးစဉ်ဆက် ကျင့်စဉ်များဖြင့် ဂိုဏ်းတည်ထောင်ထားကြသူများ ဖြစ်ကြသည်။</p> <p>ဤအခိုက်အတန့်တွင် ဂိုဏ်းချုပ်ပေါင်း ထောင်နှင့်ချီမှာ စားပွဲပေါ်ရှိ ဝိုင်နှင့် အစားအသောက်များကို မြည်းစမ်းရန်ပင် စိတ်မပါဘဲ အမျိုးမျိုးသော အမူအရာများဖြင့် တိုးတိုးလေး ပြောဆိုနေကြတော့သည်။</p> <p>“အားလုံးပဲ... လွန်ခဲ့တဲ့ လဝက်လောက်က ကျုပ်တို့တွေ ဂိုဏ်းချုပ်ထန်ထိုင်ဆီကနေ ဖိတ်စာတွေ အကြောင်းမဲ့ ရခဲ့ကြတယ်... အဲ့ဒီမှာ စကားပြောဖို့ ဖိတ်တာကလွဲလို့ ဘာမှ မပါဘူး... သူ ဘာတွေ ကြံစည်နေတာလဲ”</p> <p>“ကျုပ်တို့ကို သိမ်းပိုက်ချင်နေတာလား”</p> <p>“ဖြစ်နိုင်ပါတယ်... ဒါပေမဲ့ ကျုပ်ကတော့ အသေခံပြီး ကန့်ကွက်မယ်... သူ့ရဲ့ ဟောင်ဖူနတ်ဘုရားဂိုဏ်းက ကျုပ်ရဲ့ ကောင်းကင်လျှို့ဝှက်ချက် ဂူဗိမာန်ကို လာပြီး မထိပါစေနဲ့”</p> <p>“မှန်တယ်... ကျုပ်လည်း ဟောင်ဖူနတ်ဘုရားဂိုဏ်းရဲ့ လက်အောက်ခံ ဂိုဏ်းငယ်လေးတစ်ခုအဖြစ် လုံးဝ အဖြစ်မခံနိုင်ဘူး”</p> <p>“အားလုံးပဲ... မကြောက်ကြပါနဲ့.. ကျုပ်တို့ ညီညွတ်နေသရွေ့တော့ သူ့ရဲ့ ဟောင်ဖူနတ်ဘုရားဂိုဏ်းက ကျုပ်တို့ကို ဘာမှ လုပ်နိုင်မှာ မဟုတ်ပါဘူး”</p> <p>“ဟုတ်တယ်... ဘယ်သူမဆို ကျုပ်တို့ဂိုဏ်းကို သိမ်းပိုက်ဖို့ ကြိုးစားရင်တော့ အဆုံးထိ တိုက်ခိုက်သွားမယ်... ဘယ်တော့မှ ခေါင်းငုံ့ပြီး အရှုံးပေးမှာ မဟုတ်ဘူး”</p> <p>“ဟုတ်တယ်... ကျုပ်တို့ ညီညွတ်မှသာ ကျုပ်တို့ရဲ့ ဂုဏ်သိက္ခာကို ကာကွယ်နိုင်မှာ”</p> <p>“...”</p> <p> </p> <p> </p> <p style="text-align: center;">အခန်း ၄၁၀ ပြီး</p> <p style="text-align: center;">***</p>


Save