Book List

<h2 style="text-align: center;">အခန်း (၅၉၂)</h2> <h2 style="text-align: center;">ဆရာတပည့် နှစ်ဦးလုံးကို သိမ်းပိုက်ခြင်း၊ အဆင့်တက်နိုင်ရန် မည်သည့်နည်းလမ်းကိုမဆို အသုံးပြုခဲ့သော ယဲ့ဖေးရို(၄)</h2> <h2 style="text-align: center;">*</h2> <p> </p> <p> </p> <p>"ဒီပင်လယ်ပြင်ဒေသက အကျယ်အဝန်း မိုင်သန်းရာချီ၊ သန်းထောင်ချီတောင် ရှိတယ်လို့ ငါ ကြားဖူးတယ်..."</p> <p>"ဒီလောက် ကျယ်ဝန်းတဲ့ ပင်လယ်ပြင်ဒေသကို ရွှမ်ဟွမ်ဂိုဏ်းက ဘယ်လို အုပ်ချုပ်တာလဲ..."</p> <p>ဝဝဖိုင့်ဖိုင့် ကျင့်ကြံသူက သိချင်စိတ်ဖြင့် မေးလိုက်သည်။</p> <p>အဘယ်ကြောင့်ဆိုသော် သူသည် သင်္ဘောစီးကာ သူ၏ဇာတိမှ ထွက်ခွာလာပြီး ဤပင်လယ်ပြင်ဒေသသို့ ရောက်ရှိရန်အတွက် နှစ်ပေါင်းများစွာ အချိန်ကုန်ဆုံးခဲ့ရသောကြောင့်ပင်။</p> <p>ပို၍ ဝေးကွာသော ပင်လယ်ပြင်ဒေသများဆိုလျှင် ဆယ်စုနှစ်ပေါင်းများစွာ၊ ရာစုနှစ်ပေါင်းများစွာ ကြာမြင့်အောင် ခရီးသွားရနိုင်ပေသည်။</p> <p>"မေးနေစရာ လိုသေးလို့လား... တည်နေရာရွှေ့ပြောင်းအစီအရင်ကို သုံးတာပေါ့..."</p> <p>"ငါတို့လို ဆင်းရဲတဲ့ တစ်ကိုယ်တော်ကျင့်ကြံသူတွေကသာ... ကိုယ့်ဆီမှာ ဝိညာဉ်ကျောက်တုံး သိပ်မရှိလို့ သင်္ဘောစီးလာရတာ..."</p> <p>"နည်းနည်း ချမ်းသာတဲ့ ကျင့်ကြံသူတွေဆိုရင် တည်နေရာရွှေ့ပြောင်းအစီအရင်ကို သုံးပြီး ရွှမ်ဟွမ်ကျွန်းကို တိုက်ရိုက် သွားကြတာချည်းပဲ..."</p> <p>"ငါတို့လို သင်္ဘောစီးပြီး အချိန်ဖြုန်းနေစရာ ဘယ်လိုလိမ့်မလဲကွာ..."</p> <p>"အင်း… ဒါကလည်း ဘာမှ မတတ်နိုင်ဘူးလေ... ငါတို့လို ဆင်းရဲသားတွေက အချိန်ကို ဝိညာဉ်ကျောက်တုံးနဲ့ လဲလှယ်ရုံပဲ ရှိတော့တာပေါ့..."</p> <p>တစ်ကိုယ်တော်ကျင့်ကြံသူ အများအပြားမှာ အလွန်ပင် မတတ်သာသည့်ဟန်ဖြင့် ပြောလိုက်ကြလေသည်။</p> <p>"ဟုတ်တယ် မဟုတ်လား... ရွှမ်ဟွမ်ကျွန်းမှာ ရှေးဟောင်း တည်နေရာရွှေ့ပြောင်းအစီအရင်တစ်ခု ရှိတယ်လို့ ကြားတယ်... အဲ့ဒါရဲ့ နေရာပြောင်းရွှေ့နိုင်တဲ့ အကွာအဝေးက အရမ်းဝေးကွာပြီး ချန်လန်ပင်လယ်ပြင်ဒေသ တစ်ခုလုံးကိုတောင် လွှမ်းခြုံနိုင်တယ်တဲ့... အဲ့ဒီ ရှေးဟောင်း တည်နေရာရွှေ့ပြောင်းအစီအရင်ကတစ်ဆင့် ချန်လန်ပင်လယ်ပြင်ဒေသရဲ့ ဘယ်နေရာကိုမဆို ရောက်နိုင်တယ်..."</p> <p>"အခြေခံအားဖြင့် ဒီပင်လယ်ပြင်ဒေသမှာရှိတဲ့ စတုတ္ထအဆင့်ကျွန်းတွေ၊ တတိယအဆင့်ကျွန်းတွေ အားလုံးက ရွှမ်ဟွမ်ကျွန်းဆီကို နေရာပြောင်းရွှေ့လို့ ရတယ်... ရွှမ်ဟွမ်ကျွန်းရဲ့ အလယ်အလတ် တည်နေရာရွှေ့ပြောင်းအစီအရင်ကို သုံးပြီး ပင်လယ်ပြင်ဒေသရဲ့ ဘယ်နေရာကိုမဆို နေရာပြောင်းရွှေ့လို့ ရတယ်..."</p> <p>"ပိုပြီး အားကျစရာကောင်းတာက ရွှမ်ဟွမ်ဂိုဏ်းရဲ့ တပည့်ဖြစ်လာရင် နေရာပြောင်းရွှေ့တဲ့အခါတိုင်း ကုန်ကျစရိတ်က ငါတို့ရဲ့ ဆယ်ပုံတစ်ပုံပဲတဲ့... ဒါက ရွှမ်ဟွမ်ဂိုဏ်း တပည့်တွေရဲ့ အကျိုးခံစားခွင့်လို့ ပြောလို့ရတယ်..."</p> <p>တစ်ကိုယ်တော်ကျင့်ကြံသူ တစ်ဦးက အားကျမနာလိုစွာဖြင့် ပြောလိုက်ပြန်သည်။</p> <p>သို့သော် ဤသည်မှာလည်း မတတ်သာချေ။ ရှေးဟောင်း တည်နေရာရွှေ့ပြောင်းအစီအရင်ကို ရွှမ်ဟွမ်ဂိုဏ်းက ထိန်းချုပ်ထားသည်ဖြစ်ရာ မိမိဂိုဏ်း၏ တပည့်များကို အကျိုးခံစားခွင့် အနည်းငယ်ပေးခြင်းမှာလည်း သဘာဝကျသော ကိစ္စရပ်ပင် ဖြစ်သည် မဟုတ်ပါလော။</p> <p>အမှန်တကယ်တမ်းတွင် ဤဆယ်နှစ်အတွင်း ကျိုးစွေ့သည် ရွှမ်ဟွမ်ကျွန်း၏ တည်နေရာရွှေ့ပြောင်းအစီအရင်ခွဲများကို အဆက်မပြတ် တိုးချဲ့တည်ဆောက်နေခဲ့သည်။</p> <p>သူ၏ကိုယ်ပွားက တည်နေရာရွှေ့ပြောင်းအစီအရင်ခွဲများကို တည်ဆောက်ပြီး အခြား အစီအရင်ပညာရှင်များကို အဓိကကျွန်းကြီးများဆီသို့ စေလွှတ်ကာ တပ်ဆင်စေခဲ့သည်။</p> <p>ယခုအချိန်တွင် ယခင် ကုယုံဂိုဏ်း၏ အထွတ်အထိပ်ကာလကဲ့သို့ မစည်ကားသေးသော်လည်း အနည်းဆုံးတော့ ဤပင်လယ်ပြင်ဒေသရှိ ကျွန်းကြီးများအားလုံးမှ ရွှမ်ဟွမ်ကျွန်းသို့ တိုက်ရိုက် နေရာပြောင်းရွှေ့နိုင်နေပြီ ဖြစ်သည်။</p> <p>ထို့အပြင် ဈေးနှုန်းမှာလည်း အများကြီး သက်သာသွားခဲ့သည်။</p> <p>ဤသည်မှာ ကျွန်းကြီးများအသီးသီးရှိ ကျင့်ကြံသူများ၏ ဆက်သွယ်ရေးကို လုံးဝ အဆင်ပြေချောမွေ့စေခဲ့ပေသည်။</p> <p>မိုင်သန်းရာချီ ဝေးကွာနေလျှင်ပင် တည်နေရာရွှေ့ပြောင်းအစီအရင်မှတစ်ဆင့် မျက်စိတစ်မှိတ်အတွင်း ရောက်ရှိနိုင်ပြီး လက်တစ်ကမ်းအကွာတွင် ရှိနေသကဲ့သို့ပင် ဖြစ်၏။</p> <p>တည်နေရာရွှေ့ပြောင်းအစီအရင်သည် ကျင့်ကြံခြင်းကမ္ဘာ၏ အမြန်ရထားဟု ဆိုနိုင်ပေသည်။</p> <p>ဤကဲ့သို့သော အခြေခံအဆောက်အအုံများ တပ်ဆင်ပြီးစီးသွားသည်နှင့် ဤပင်လယ်ပြင်ဒေသ၏ တိုးတက်မှုမှာ အလွန် သိသာထင်ရှားလှ၏။</p> <p>ဤဆယ်နှစ်အတွင်း ပင်လယ်ပြင်ဒေသ တစ်ခုလုံးမှာလည်း ပို၍ စည်ကားလာခဲ့ပေသည်။</p> <p>မရေမတွက်နိုင်သော ကျင့်ကြံခြင်း အရင်းအမြစ်များကိုလည်း ရွှမ်ဟွမ်ကျွန်းသို့ ပို့ဆောင်ပေးနေသည်။</p> <p>ဝုန်း…။</p> <p>ထိုအခိုက်အတန့်တွင် အဝေးရှိ ပင်လယ်ပြင်မှ ကြောက်မက်ဖွယ်ကောင်းသော မိစ္ဆာအရှိန်အဝါတစ်ခု ထွက်ပေါ်လာပြီး ကောင်းကင်နှင့် မြေကြီးကို ဖုံးလွှမ်းကာ ဤပင်လယ်ပြင်ကို ကျရောက်လာတော့သည်။</p> <p>ကြီးမားသော လိပ်မိစ္ဆာကြီးတစ်ကောင်က ရုတ်တရက် ပေါ်ထွက်လာပြီး ယင်း၏ ခန္ဓာကိုယ်မှာ ပေတစ်ရာကျော် ကြီးမားပေသည်။ လိပ်ခွံပေါ်တွင် သိပ်သည်းရှုပ်ထွေးသော ပုံစံများ ပေါ်လွင်နေပြီး မျက်လုံးများတွင် ရက်စက်ကြမ်းကြုတ်သော အမူအရာများ ပြည့်နှက်နေရာ ကြောက်မက်ဖွယ် ကောင်းလှချေသည်။</p> <p>"ဒုက္ခပဲ... ဒါ စတုတ္ထအဆင့် ကျောက်လိပ်မိစ္ဆာပဲ..."</p> <p>မျက်စိတစ်မှိတ်အတွင်း သင်္ဘောပေါ်ရှိ အခြေတည်အဆင့် ကျင့်ကြံသူတစ်ဦး၏ မျက်နှာသည် အရောင်ပြောင်းသွားရပြီး သေလူတစ်ယောက်ကဲ့သို့ ဖြစ်သွားကာ ဤလိပ်မိစ္ဆာမှာ နာမည်ကြီး ကျောက်လိပ်မိစ္ဆာ ဖြစ်ကြောင်း ချက်ချင်း မှတ်မိသွားတော့သည်။</p> <p>အဘယ်ကြောင့်ဆိုသော် ဤကျောက်လိပ်မိစ္ဆာသည် မကြာသေးမီက ဤပင်လယ်ပြင်တွင် သောင်းကျန်းနေပြီး လူသားများ၏ သင်္ဘောများကို သီးသန့် တိုက်ခိုက်နေသောကြောင့်ပင်။</p> <p>လူသားကျင့်ကြံသူ အမြောက်အများမှာ ၎င်းလက်ချက်ဖြင့် ရက်စက်စွာ သေဆုံးခဲ့ရသည်။ ယင်း၏ တည်ရှိနေမှုက လူတိုင်းကို ထိတ်လန့်တုန်လှုပ်စေသည်ဟု ဆိုနိုင်ပေသည်။</p> <p>သို့သော် မိမိ၏ ဤခရီးစဉ်သည် ဤမျှကံဆိုးပြီး စတုတ္ထအဆင့် ကျောက်လိပ်မိစ္ဆာနှင့် ကြုံတွေ့ရလိမ့်မည်ဟု သူ မထင်မှတ်ထားခဲ့ချေ။</p> <p>ဤသည်မှာ ဧကန်မုချ ပျက်စီးခြင်း ဘေးဒုက္ခကြီးပင် ဖြစ်တော့သည်။</p> <p>"သွားပြီ... ဒီတစ်ခါတော့ လုံးဝကို ကိစ္စပြတ်ပြီ..."</p> <p>ရှဲ့ဟွာအန်း၏ မျက်နှာမှာ ဖြူရော်သွားပြီး သေလူတစ်ယောက်ကဲ့သို့ ဖြစ်နေရရှာသည်။</p> <p>သူသည် အဆင့်နိမ့် ချီကျင့်ကြံခြင်းအဆင့် ကျင့်ကြံသူတစ်ဦးသာ ဖြစ်ရာ စတုတ္ထအဆင့် ကျောက်လိပ်မိစ္ဆာကို မည်သို့ တားဆီးနိုင်မည်နည်း။</p> <p>တစ်ဖက်သူ၏ ရက်စက်ကြမ်းကြုတ်မှုအရဆိုလျှင် တစ်ချက်တွေ့ဆုံရုံဖြင့် သင်္ဘောတစ်စင်းလုံးရှိ လူသားများအားလုံးကို တစ်လုတ်တည်းဖြင့် မျိုချပစ်မည်မှာ သေချာလှပေသည်။</p> <p>ထွက်ပြေးလျှင်ပင် အချည်းနှီးသာ ဖြစ်လေ၏။</p> <p>ဤကဲ့သို့သော စတုတ္ထအဆင့် မိစ္ဆာကျင့်ကြံသူ၏ စွမ်းအားမှာ ခဏချင်းအတွင်း မိုင်တစ်ထောင်အထိ လွှမ်းခြုံနိုင်ပေသည်။</p> <p>မည်ကဲ့သို့ ထွက်ပြေးလွတ်မြောက်နိုင်ပါမည်နည်း။</p> <p>သို့သော် ထွက်ပြေးရန် နည်းလမ်းပင် မစဉ်းစားရသေးမီ ကောင်းကင်ထက်တွင် စတုတ္ထအဆင့် ဝိညာဉ်သားရဲသုံးကောင်က ရုတ်တရက် ပေါ်လာခဲ့သည်။</p> <p>၎င်းတို့မှာ အတောင်လေးဖက်ကျား၊ ရွှေမီးတောက်မိစ္ဆာသိမ်းငှက်နှင့် ရေခဲမီးတောက်ကျားသစ်တို့ ဖြစ်ကြသည်။</p> <p>၎င်းတို့သည် ဤကျောက်လိပ်မိစ္ဆာ၏ အရှိန်အဝါကို ချက်ချင်း အသေပစ်မှတ်ထားလိုက်ကြတော့သည်။</p> <p>"မင်းတို့လား... ရွှမ်ဟွမ်ဂိုဏ်းက မိစ္ဆာသားရဲသစ္စာဖောက်တွေလား…"</p> <p>"လူသားတွေကို အညံ့ခံပြီး လက်အောက်ခံနေတာ... မင်းတို့က ငါတို့မိစ္ဆာသားရဲတွေရဲ့ အရှက်ရစရာတွေပဲ..."</p> <p>စတုတ္ထအဆင့် ကျောက်လိပ်မိစ္ဆာက အံ့အားသင့်ကာ ဒေါသထွက်သွားရသည်။</p> <p>၎င်းသည် မူလက ဤအားနည်းသော လူသားများကို စားသောက်ကာ ပါးစပ်အရသာခံရန် ရည်ရွယ်ထားခြင်း ဖြစ်သည်။</p> <p>သို့သော် ရွှမ်ဟွမ်ဂိုဏ်းမှ ဝိညာဉ်သားရဲများနှင့် ကြုံတွေ့ရလိမ့်မည်ဟု မည်သူက ထင်မှတ်ထားမည်နည်း။</p> <p>မိစ္ဆာကျင့်ကြံသူများ၏ မျက်လုံးထဲတွင် ဤဝိညာဉ်သားရဲများဆိုသည်မှာ မိစ္ဆာသားရဲမျိုးနွယ်စုကို သစ္စာဖောက်သူများ ဖြစ်ပြီး မိစ္ဆာသားရဲတိုင်းက သတ်ဖြတ်ချင်ကြမည့် အမျိုးအစားများ ဖြစ်ပေသည်။</p> <p>တွေ့ဆုံသည်နှင့် ရက်စက်စွာ သတ်ဖြတ်ပစ်ကြမည် ဖြစ်သည်။ သို့သော် ယခုအခါ ၎င်းသည် အဆုံးအစမဲ့သော ကြောက်ရွံ့မှုကို ခံစားနေရ၏။</p> <p>အဘယ်ကြောင့်ဆိုသော် ဤစတုတ္ထအဆင့် ဝိညာဉ်သားရဲများ၏ ဝန်းရံခြင်းကို ခံလိုက်ရသဖြင့် ယခုအခါ ၎င်းအတွက် အန္တရာယ်များနေခြင်းကြောင့်ပင်။</p> <p>"သခင် ပြောတဲ့အတိုင်းပဲ... ဒီကောင်က ရူးနေပြီ..."</p> <p>"ခေါင်းထဲမှာ သတ်ဖြတ်ဖို့ချည်းပဲ ပြည့်နေသလို… ရင်ထဲမှာလည်း သတ်ဖြတ်လိုစိတ်တွေချည်းပဲ..."</p> <p>"ဒါပေမဲ့ မင်း စိတ်ချပါ... မကြာခင်မှာ မင်းခန္ဓာကိုယ်ပေါ်က မိစ္ဆာအငွေ့အသက်တွေကို ငါ ဖယ်ရှားပေးပြီး မင်းကို ဝိညာဉ်သားရဲအဖြစ် ပြောင်းလဲပေးမယ်..."</p> <p>အတောင်လေးဖက်ကျားက ကြင်နာသော အပြုံးတစ်ခုကို ပြုံးပြလိုက်သည်။ ၎င်း၏ခန္ဓာကိုယ်ပေါ်တွင် မည်သည့် သတ်ဖြတ်လိုစိတ်မျှ မရှိဘဲ ကိုယ်တော်ကြီးတစ်ပါးကဲ့သို့ မေတ္တာကရုဏာ ကြီးမားလှပြီး သတ္တဝါများကို သနားကြင်နာသော မျက်နှာအမူအရာမှာ ပေါ်လွင်နေချေသည်။</p> <p>သို့သော် ဤမြင်ကွင်းကို မြင်လိုက်ရသောအခါ စတုတ္ထအဆင့် ကျောက်လိပ်မိစ္ဆာမှာ ကြက်သီးထသွားရတော့သည်။</p> <p>၎င်း၏ မျက်လုံးထဲတွင် ဤဝိညာဉ်သားရဲများမှာ ထိုရွှမ်ဟွမ်ဂိုဏ်းချုပ်၏ ဦးနှောက်ဆေးခြင်းကို ခံထားရပြီး အထူးနည်းလမ်းများဖြင့် ကယ်တင်ခြင်း ခံထားရသူများ ဖြစ်ကြောင်း ထင်ရှားနေပေသည်။</p> <p>ဤကဲ့သို့သော ကယ်တင်ခြင်းမှာ စိတ်နေသဘောထားကိုပင် ပြောင်းလဲသွားစေနိုင်သည်။ ကျွန်ဖြစ်ရသည်ထက်ပင် ပို၍ သနားစရာ ကောင်းသေး၏။</p> <p>ကိုယ်တိုင်က မိစ္ဆာသားရဲအဖြစ် မွေးဖွားလာခဲ့ပြီးမှ လူသားများ၏ ကျွန်အဖြစ် မည်ကဲ့သို့ ခံယူနိုင်မည်နည်း။</p> <p>"ထွက်သွားစမ်း..."</p> <p>“မင်းမေကြီးကို မိစ္ဆာအငွေ့အသက်ကို ရှင်းပါ့လား…”</p> <p>"ငါက မိစ္ဆာသားရဲကွ... ဘာဝိညာဉ်သားရဲမှ မဟုတ်ဘူး..."</p> <p>စတုတ္ထအဆင့် ကျောက်လိပ်မိစ္ဆာက ဟိန်းဟောက်လိုက်ပြီး နောက်သို့ပင် လှည့်မကြည့်တော့ဘဲ အလင်းတန်းတစ်ခုအဖြစ် ပြောင်းလဲကာ ဤပင်လယ်ပြင်ဒေသမှ ထွက်ပြေးရန် ချက်ချင်းပင် ကြိုးပမ်းလိုက်တော့သည်။</p> <p>ဘန်း… ဘန်း… ဘန်း…။</p> <p>သို့သော် ထိုအခိုက်အတန့်တွင် အတောင်လေးဖက်ကျား၊ ရွှေမီးတောက်မိစ္ဆာသိမ်းငှက်နှင့် ရေခဲမီးတောက်ကျားသစ် စသည့် စတုတ္ထအဆင့် ဝိညာဉ်သားရဲသုံးကောင်က တစ်ပြိုင်နက်တည်း တိုက်ခိုက်လိုက်ကြသည်။ ကြောက်မက်ဖွယ်ဖိအားများမှာ ပြိုဆင်းလာပြီး ကျောက်လိပ်မိစ္ဆာ၏ ခန္ဓာကိုယ်ပေါ်သို့ ကျရောက်သွားလေတော့သည်။</p> <p>ချက်ချင်းပင် ထိုကျောက်လိပ်မိစ္ဆာမှာ ရုန်းကန်ရန်ပင် အခွင့်အရေး မရလိုက်ဘဲ မျက်စိတစ်မှိတ်အတွင်း ဒဏ်ရာအပြင်းအထန် ရသွားကာ သွေးများ အန်ထုတ်လိုက်ရသည်။</p> <p>သို့သော် ဘာမှ မတတ်နိုင်ချေ။ နှစ်ဖက်စလုံး၏ စွမ်းအားကွာဟချက်မှာ ကြီးမားလွန်းလှပေသည်။</p> <p>"မင်းတို့..."</p> <p>ကျောက်လိပ်မိစ္ဆာမှာ ရုန်းကန်ချင်သေးသော်လည်း အတောင်လေးဖက်ကျားက ၎င်း၏ဘေးသို့ ချက်ချင်းပင် ရောက်လာတော့သည်။</p> <p>"စိတ်ချပါ... မင်းခန္ဓာကိုယ်ပေါ်က မိစ္ဆာအငွေ့အသက်တွေ မကြာခင် ရှင်းလင်းသွားမှာပါ..."</p> <p>"အဲ့ဒီအချိန်ကျရင် မင်းလည်း ဝိညာဉ်သားရဲအဖြစ် ပြောင်းလဲသွားပြီး ငါတို့ရဲ့ အဖွဲ့ဝင်တစ်ယောက် ဖြစ်လာလိမ့်မယ်..."</p> <p>အတောင်လေးဖက်ကျား၏ ကျားလက်သည်းက အသာအယာ လှုပ်ရှားသွားပြီး ခန္ဓာကိုယ်ပေါ်မှ လက်မအရွယ်အစားရှိ အနက်ရောင် အလင်းလုံးလေး တစ်လုံးကို ထုတ်ယူလိုက်ရာ ယင်းအပေါ်တွင် သိပ်သည်းရှုပ်ထွေးသော အိပ်မက်ဆိုးသင်္ကေတများ စီးဆင်းနေလေသည်။ ဤသည်မှာ အိပ်မက်ဆိုးမျိုးစေ့ပင် ဖြစ်ပေ၏။</p> <p>‘အိပ်မက်ဝိညာဉ်ကူ’ထံမှ လာသော သွေးမျိုးဆက် စွမ်းရည်တစ်ခုပင် ဖြစ်သည်။</p> <p>၎င်းသည် အိပ်မက်ဆိုးမျိုးစေ့များကို ဖန်တီးနိုင်ပြီး ဤစတုတ္ထအဆင့် ဝိညာဉ်သားရဲများထံသို့ ပေးအပ်ထားနိုင်ပေသည်။</p> <p>အခြား စတုတ္ထအဆင့် မိစ္ဆာသားရဲများနှင့် တွေ့ဆုံသည်နှင့် အိပ်မက်ဆိုးမျိုးစေ့၏ စွမ်းအားကို အသုံးပြုကာ တစ်ဖက်လူကို ကျွန်ပြုပြီး ဝိညာဉ်သားရဲအဖြစ် ပြောင်းလဲပစ်နိုင်ပေသည်။</p> <p>ဤကဲ့သို့သော နည်းလမ်းကို အသုံးပြုခြင်းဖြင့် ကျိုးစွေ့ကိုယ်တိုင် ဝင်ရောက်လုပ်ဆောင်ရန် လုံးဝ မလိုအပ်တော့ဘဲ ချန်လန်ပင်လယ်ပြင်ဒေသရှိ စတုတ္ထအဆင့် မိစ္ဆာသားရဲအများအပြားမှာ အလစ်တိုက်ခိုက်ခံရပြီး အိပ်မက်ဆိုးမျိုးစေ့များဖြင့် ပေါင်းစပ်ခံရကာ ဝိညာဉ်သားရဲများအဖြစ် ပြောင်းလဲသွားခဲ့ကြခြင်း ဖြစ်ချေသည်။</p> <p>ဝုန်း…။</p> <p>နောက်တစ်စက္ကန့်တွင် ထိုအိပ်မက်ဆိုးမျိုးစေ့သည် ကျောက်လိပ်မိစ္ဆာ၏ ခန္ဓာကိုယ်ထဲသို့ ချက်ချင်း ဝင်ရောက်သွားလေ၏။</p> <p>"အား…”</p> <p>ချက်ချင်းပင် ကျောက်လိပ်မိစ္ဆာသည် သနားစရာကောင်းအောင် အော်ဟစ်လိုက်ရပြီး၊ ၎င်း၏ ဝိညာဉ်မှာ နှိပ်စက်ခံနေရကြောင်း ခံစားလိုက်ရကာ ထူးဆန်းသော စွမ်းအားတစ်ခုက ဝိညာဉ်ထဲမှ မှတ်ဉာဏ်များကို ပြင်ဆင်နေပြီး လျှို့ဝှက်ဆန်းကြယ်သော မှတ်ဉာဏ်တံမြက်စည်း တစ်ချောင်းက အဆက်မပြတ် ဖျက်ပစ်နေသကဲ့သို့ပင် ဖြစ်နေတော့သည်။</p> <p>မူလမှတ်ဉာဏ်များကို ဖျက်ပစ်ပြီး မှတ်ဉာဏ်သစ်များကို ပြန်လည်ရေးသားနေခြင်းပင် ဖြစ်လေ၏။</p> <p>ဤသည်မှာ ‘အိပ်မက်ဝိညာဉ်ကူ’၏ နတ်ဘုရားစွမ်းရည်ဖြစ်သော ရန်သူကို မိတ်ဆွေအဖြစ် ပြောင်းလဲခြင်းပင် ဖြစ်ပေသည်။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save