Book List

<h2 style="text-align:center">အခန်း ၂၂၄</h2> <h2 style="text-align:center">အက်စ်မိုးဒီအက်စ် (၄)</h2> <h2 style="text-align:center">*</h2> <p> </p> <p> </p> <p>"ဒီလူက တကယ်ပဲ ဘာတွေတွေးနေတာလဲ..."</p> <p>အိုင်လင်းသည် ပိုက်ကို ဆွဲထုတ်လိုက်ပြီး လဲလျောင်းနေသော ကင်ဒေါ့ဂျာကို ကြည့်ကာ ရေရွတ်လိုက်သည်။ ပတ်တီးများကြားမှ ဇာတ်လမ်း၏ အပိုင်းအစများမှာ စိမ့်ထွက်နေ၏။</p> <p>–လောလောဆယ်တော့ ဒါက တစ်ခုတည်းသော နည်းလမ်းပဲ။ ငါ ဒီနည်းကို အသုံးမပြုချင်ခဲ့ပေမဲ့ပေါ့လေ</p> <p>အိုင်လင်းသည် သတ္တိအမြန်မွေးပြီး ထိုအပိုင်းအစများကို သိမ်းဆည်းကာ ကင်ဒေါ့ဂျာ၏ အခြားတစ်ဖက်သော လက်ကောက်ဝတ်မှ သွေးခုန်နှုန်းကို စမ်းသပ်လိုက်သည်။ ကင်ဒေါ့ဂျာ၏ မျက်နှာမှာ ဖြူလျော်နေပြီး မည်သည့် နွေးထွေးမှုကိုမျှ မခံစားရပေ။</p> <p>"ဇာတ်လမ်းအထုပ်တွေ ထပ်ယူခဲ့ဦး။ မြန်မြန်လုပ်"</p> <p>အိုင်လင်း၏ အော်ပြောသံကြောင့် ကြည့်ရှုနေကြသူများမှာ ဆေးကုသဆောင်အတွင်းမှ အလုအယက် ပြေးထွက်သွားကြသည်။ အိုင်လင်းသည် သေအံ့ဆဲဆဲ ဖြစ်နေသော ကင်ဒေါ့ဂျာ၏ မျက်နှာကို ကြည့်ရင်း သူ၏ နောက်ဆုံးစကားများကို ပြန်လည်အမှတ်ရနေမိသည်။</p> <p>–ငါ့ကို တစ်နာရီလောက်ပဲ သေခွင့်ပေးပါ။</p> <p>–တကယ်သေတာမျိုးတော့ မဟုတ်ပါဘူး။ သေခါနီး ဆဲဆဲ အခြေအနေလောက်တင် သေခွင့်ပေးပါ။</p> <p>–တကယ်လို့ ငါသာ ဒီအချိန်မှာ တကယ်သေသွားခဲ့ရင် ကင်နမ်ဝန်ကို သွားတွေ့ရတော့မှာပဲ။</p> <p>–ငါ နင့်ကို ယုံကြည်ပါတယ်နော်။ နားလည်တယ်မလား။</p> <p>တီ― တီ―</p> <p>လူနာ၏ အခြေအနေကို ပြသနေသည့် စက်ပေါ်တွင် ဇာတ်လမ်းတည်ငြိမ်မှုမှာ သိသိသာသာ ထိုးဆင်းသွားတော့သည်။ အိုင်လင်းသည် မည်သို့သော ခံစားချက်ဖြစ်သည်ကို ဖော်ပြ၍မရသော မျက်နှာထားဖြင့် အိပ်မောကျနေသည့် ကင်ဒေါ့ဂျာကို ကြည့်ကာ သူ၏ သွေးကြောများအတွင်းသို့ ဇာတ်လမ်းအသစ်တစ်ခုကို ထိုးသွင်းပေးလိုက်၏။</p> <div> </div> <p>ကံကောင်းထောက်မစွာပင် ‘အနှိုင်းမဲ့စာဖတ်သူ၏ရှုထောင့်’ အဆင့် ၃ မှာ ကောင်းမွန်စွာ ချိတ်ဆက်မိသွားသည်။ အိုင်လင်းသည် သူ၏အလုပ်ကို သေသေချာချာ လုပ်ဆောင်ပေးခဲ့ခြင်းပင်။ ဒါနဲ့...</p> <p>ကျနော့်ရှေ့တွင် အက်စ်မိုးဒီအက်စ်၏ စွမ်းအင်များမှာ တောက်လောင်နေသည်။ အစောပိုင်းက ကြုံးဝါးခဲ့သည့် စကားများနှင့်မတူဘဲ ကျနော်သည် အလွန်အမင်း တင်းမာနေမိသည်။ ပြိုင်ဘက်မှာ ‘အက်စ်မိုးဒီအက်စ်’ပင်။ အစပိုင်းတွင် အထင်ကြီးစရာကောင်းသော စကားလုံးများကို အသုံးပြုခဲ့မိသည့် အတွက် အနည်းငယ် နောင်တရမိသော်လည်း ယခုအချိန်တွင် နောင်တရနေရန်မှာ နောက်ကျသွားပြီ ဖြစ်သည်။</p> <p>နောက်ဆုံးတွင် အက်စ်မိုးဒီအက်စ်က စတင်၍ စကားပြောလာသည်။</p> <p>[ကယ်တင်ခြင်း၏ မိစ္ဆာဘုရင်လား]</p> <p>ယူဂျွန်ဟော့၏ ဦးခေါင်းဖြင့်ပင် ကျနော်ခေါင်းညိတ်ပြလိုက်သည်။ ယူဂျွန်ဟော့၏ ဝိညာဉ်မှာ စိတ်အာရုံ၏ ထောင့်တစ်နေရာတွင် ရုန်းကန်နေသည်ကို ခံစားရသော်လည်း သူ့ကို အတင်းအကျပ် အိပ်မောကျခိုင်းထားလိုက်၏။ ဤအချိန်တွင် ယူဂျွန်ဟော့ ထွက်ပေါ်လာ၍ မဖြစ်ပေ။</p> <p>[ငါက ကယ်တင်ခြင်း၏ မိစ္ဆာဘုရင်ပဲ]</p> <p>ကျနော့်၏ အသံအစစ်ကို အသုံးပြုခြင်းက ဖြစ်နိုင်စွမ်းပမာဏကို အလွန်အမင်း ကုန်ဆုံးစေသော်လည်း ကျနော်သည် တည်ငြိမ်နေသယောင် ဟန်ဆောင်လိုက်သည်။ သူ၏ အရှိန်အဝါကြောင့် နောက်တွန့်မသွားစေရန် ကျနော်သည် အသံအစစ်ကို တမင်တကာ အသုံးပြုလိုက်ခြင်း ဖြစ်၏။ အသံအစစ်ကို ဆက်လက်ထိန်းသိမ်းထားခြင်းက ကျနော့်ကို အင်အားကြီးသူတစ်ဦးအဖြစ် ထင်မှတ်စေသည့် အပိုဆုတစ်ခုလည်း ဖြစ်ပေသည်။</p> <p>အက်စ်မိုးဒီအက်စ်သည် အံ့အားသင့်သော မျက်လုံးများဖြင့် ကျနော့်ကို တစ်ချက်ကြည့်ကာ ထပ်မံမေးမြန်းလိုက်သည်။</p> <p>[…သူက တကယ်ပဲ မင်းရဲ့ ကိုယ်စားလှယ်လား]</p> <p>[မှန်တယ်]</p> <p>အကယ်၍ သတိမေ့နေသော ယူဂျွန်ဟော့သာ ဤအကြောင်းကို သိသွားပါက ဒေါသပေါက်ကွဲပေလိမ့်မည်။ သို့သော် ကျနော်သည် ဘာမှထပ်မစဉ်းစားတော့ဘဲ ပြောချင်ရာကိုသာ ပြောလိုက်တော့သည်။ လက်ရှိ အခြေအနေတွင် ဤအရာထက် ပိုမိုကောင်းမွန်သော အဖြေ မရှိတော့ပေ။ အနည်းဆုံးတော့ ကျနော် ထိုသို့သာ ထင်မြင်မိလေသည်။</p> <p>[မင်းမှာ ဒီလို ကိုယ်စားလှယ်တစ်ယောက် ရှိနေတယ်ဆိုတာ ငါ မကြားမိပါဘူး]</p> <p>[မင်းရဲ့ သတင်းကွန်ရက်က ငါထင်ထားတာထက် ပိုပြီး နှေးကွေးနေပုံရတယ်။ ဒီလူက ငါ့ရဲ့ ကိုယ်စားလှယ်ပဲ]</p> <p>အက်စ်မိုးဒီအက်စ်သည် ကျနော်နှင့် ‘စကားပြော’ ရန်အတွက် သေချာပေါက် ရောက်ရှိလာခြင်း ဖြစ်သည်။ သူ၏ စကားများကို မည်မျှအထိ ယုံကြည်ရမည်ဆိုသည်ကို အတပ်မပြောနိုင်သော်လည်း ကျနော်ယခုလုပ်ဆောင်နေသောနည်းလမ်းသည်သာ ယူဂျွန်ဟော့ အသက်ရှင်နိုင်မည့် တစ်ခုတည်းသော နည်းလမ်း ဖြစ်၏။ အကယ်၍ သူသည် တကယ်ပင် ‘စကားပြော’ ရန် ရောက်လာခြင်း ဖြစ်ပါက ကျနော့်၏ ကိုယ်စားလှယ်ကို ထိပါးခြင်းကဲ့သို့သော မလိုအပ်သည့် အရာမျိုးကို လုပ်ဆောင်လိမ့်မည် မဟုတ်ပေ။</p> <p>[ဟ...]</p> <p>အက်စ်မိုးဒီအက်စ်သည် ကျနော့်၏ စကားကို လက်ခံပုံမရဘဲ သူ၏ စွမ်းအင်များမှာ တဖြည်းဖြည်း ပိုမိုအားကောင်းလာသည်။ ကျနော်သည် မိမိသိထားသော အက်စ်မိုးဒီအက်စ်နှင့် ပတ်သက်သည့် အချက်အလက်များကို အသည်းအသန် ပြန်လည်စဉ်းစားနေမိသည်။</p> <p>「 အလိုလိုက်ခံထားရသော အရူးတစ်ယောက်။ 」</p> <p>「 စားကောင်းသောက်ဖွယ် အသင်းအဖွဲ့၏ အဖွဲ့ဝင်တစ်ဦး။ 」</p> <p>「 သူသည် အိုလံပတ်စ်ရှိ ငရဲပြည်နှင့် အနည်းငယ် ရင်းနှီးကျွမ်းဝင်မှု ရှိသည်။ 」</p> <p>「 သူသည် လွဲမှားနေသော ရာဂစိတ်ရှိသူဖြစ်သည်။ 」</p> <p>အထောက်အကူ ဖြစ်စေနိုင်မည့် အချက်အချို့ ရှိနေသော်လည်း ယခုအချိန်တွင် အသုံးပြုနိုင်မည့် အရာတစ်ခုမျှ မရှိပေ။ မည်သို့ပင်ဖြစ်စေ ဤထိပ်တိုက်တွေ့ဆုံမှုကို တတ်နိုင်သမျှ ချောမွေ့စွာ ဖြေရှင်းနိုင်ရန်မှာ အကောင်းဆုံး ဖြစ်ပေလိမ့်မည်။ ကျနော်သည် ကျနော့်၏ အာရုံများကို တတ်နိုင်သမျှ မြှင့်တင်လိုက်ပြီး မိမိကို ကူညီနိုင်မည့် အရာများကို ပတ်ဝန်းကျင်၌ ရှာဖွေလိုက်သည်။ သိသိသာသာ ထင်ရှားနေသည်မှာ ကျနော့်၏ ပုခုံးပေါ်တွင် တွဲလောင်းဖြစ်နေသည့် ဂွမ်းဖြည့်ထားသော အရုပ်ကလေးတစ်ခုပင်။</p> <p>...ဒါက ဘာပါလိမ့်။</p> <p>ထိုငတုံး ယူဂျွန်ဟော့သည် တကယ်ပင် ဤကဲ့သို့သော အရာများကို စုဆောင်းတတ်သည်လား။ ထိုအချိန်မှာပင် အရုပ်ကလေးက ကျနော့်ကို ရုတ်တရက် လှမ်းကြည့်လိုက်သည်။</p> <p>[‘မိစ္ဆာကဲ့သို့ မီးလျှံတရားစီရင်သူ’ နက္ခတ်သည် အလွန်အမင်း စိတ်လှုပ်ရှားသွားသဖြင့် နှာခေါင်းသွေးများ ထွက်နေပါသည်။]</p> <p>...ခဏလေး။ သေချာပေါက် ဒီအရုပ်ကလေးက...</p> <p>[‘မိစ္ဆာကဲ့သို့ မီးလျှံတရားစီရင်သူ’ နက္ခတ်သည် သူ၏ ပါးပြင်ကို သင်နှင့် ပွတ်သပ်နေပါသည်။]</p> <p>အရုပ်ကလေးသည် ယူဂျွန်ဟော့၏ ပါးပြင်ကို ညင်သာစွာ ထိတွေ့လိုက်ပြီး ယူဂျွန်ဟော့၏ ခန္ဓာကိုယ်မှတစ်ဆင့် ကျနော် ခံစားလိုက်ရသည်။ ကျနော် ထိတ်လန့်သွားမိသည်။</p> <p>ယူရီအယ်က ဘာလို့ ဒီမှာ ရောက်နေရတာလဲ။</p> <p>အက်စ်မိုးဒီအက်စ်က စကားပြောလာသည်။</p> <p>[ငါ့ရဲ့ ‘အရှိန်အဝါ’ ရှေ့မှာ မင်း နောက်မဆုတ်သွားတာကို ကြည့်ရင် ကောလဟာလတွေက မှန်ကန်ပုံရတယ်။ မင်းက ဒသမမြောက် ဇာတ်ဝင်ခန်းမှာတင် ဒဏ္ဍာရီလာအဆင့် ဖြစ်လာခဲ့တာပဲ… အဲဒါ တကယ်ဖြစ်နိုင်တယ်လို့ ငါ မယုံနိုင်သေးဘူး]</p> <p>[မပြောတတ်ဘူးလေ။ ကောလဟာလတွေထက် ပိုရင်လည်း ပိုမှာပေါ့]</p> <p>ကျနော်သည် ယူရီအယ်အရုပ်ကို ဆွဲယူကာ ကျနော့်၏ ရင်ခွင်ထဲသို့ အမြန် ဖုံးကွယ်လိုက်သည်။ အခြေအနေမှာ ထူးဆန်းနေသော်လည်း ယူရီအယ် တစ်ခုခု လုပ်ဆောင်လိုက်မည်ဆိုပါက ခက်ခဲသွားပေလိမ့်မည်။ အက်စ်မိုးဒီအက်စ်သည် သူ၏ နှုတ်ခမ်းကို လျှာဖြင့် သပ်လိုက်သည်။</p> <p>[ဟားဟား…. မင်းရဲ့ လျှာစွမ်းက ကောလဟာလတွေအတိုင်း မှန်ပုံရတယ်။ ငါ့ရဲ့ အကြိုက်နဲ့ ကွက်တိပဲ။ ဒါနဲ့… မင်းက ဘယ်လိုလုပ်ပြီး အသက်ရှင်နေတာလဲ။ မင်း သေသွားပြီလို့ နက္ခတ်တွေဆီက ငါ ကြားထားတာ]</p> <p>[ငါ ကံကောင်းလို့ပါ]</p> <p>[…မင်းက လျှို့ဝှက်ချက်တွေ ထားရတာကိုလည်း သဘောကျတာပဲ]</p> <p>[ငါ့ဆီကနေ လျှို့ဝှက်ချက်တွေကို အတင်းအကျပ် စုံစမ်းဖို့ ကြိုးစားတဲ့ လူတွေကို ငါ မကြိုက်ဘူး]</p> <p>[ဒီလူက မင်းရဲ့ ကိုယ်စားလှယ်အသစ်လား။ ကလေးတွေကို မင်းက သဘောကျတယ်လို့ ငါ ကြားတာပါ]</p> <p>[အတော်ကိုအဓိပ္ပာယ်မရှိတဲ့ စကားတွေပြောနေတာပဲ]</p> <p>[ဒါဆို ငါ ဒီအရာကို ပြင်ဆင်ဖို့ အားထုတ်ခဲ့တာတွေက အကျိုးမရှိတော့ဘူးပေါ့]</p> <p>အက်စ်မိုးဒီအက်စ်သည် သူ၏ ကလေးငယ် ကိုယ်စားလှယ် ခန္ဓာကိုယ်ကို ငုံ့ကြည့်ရင်း ကျနော့်ကို ဆွဲဆောင်မှုရှိသော ပုံစံဖြင့် ပြုံးပြလိုက်သည်။ သူသည် ချစ်စရာကောင်းသော ကလေးငယ်တစ်ဦး၏ ရုပ်သွင်ကို ပိုင်ဆိုင်ထားသည်။ ဟန်မြုံအို ပြောသည်မှာ မှန်ကန်ပါက ဤကလေးမှာ ဟန်မြုံအို၏ သမီး ဖြစ်ရပေလိမ့်မည်။ ကံကောင်းထောက်မစွာပင် ထိုကလေးမသည် ဟန်မြုံအိုနှင့် လုံးဝ မတူပေ။</p> <p>[တစ်ခုခုတော့ နားလည်မှုလွဲနေပုံရတယ်… မှားယွင်းတဲ့ ကောလဟာလတွေ အများကြီး ပျံ့နှံ့နေတာပဲ]</p> <p>ရှင်ယူဆောင်းကို ကျနော့်၏ ကိုယ်စားလှယ်အဖြစ် ခေါ်ယူခဲ့ခြင်းအပေါ် ကောလဟာလများ ပျံ့နှံ့ခဲ့ခြင်း ဖြစ်သည်။ သူသည် ကျနော် ဆိုလိုသည်ကို နားလည်သွားပြီး ယူဂျွန်ဟော့၏ မျက်နှာကို ကြည့်ကာ ပြုံးလိုက်သည်။</p> <p>[တကယ်ပါပဲ၊ ဒီလောက်လှပတဲ့ ခန္ဓာကိုယ်မျိုးသာဆိုရင် ငါ့ရဲ့ အကြိုက်ကို ပြောင်းလဲပေးနိုင်ပါတယ်]</p> <p>ဤအခြေအနေတွင် ပုံမှန် စကားပြောဆိုရန်မှာ မဖြစ်နိုင်ကြောင်း ထင်ရှားနေသည်။ ကျနော်သည် ခပ်ကြမ်းကြမ်းပင် ပြောဆိုလိုက်သည်။</p> <p>"မင်းရဲ့ အသံအစစ်နဲ့ စကားပြောတာကို ရပ်လိုက်တော့။ ငါ့ရဲ့ ပတ်ဝန်းကျင်မှာ ဘယ်ကိုယ်စားလှယ်မှ ကျန်တော့မှာ မဟုတ်ဘူး"</p> <p>[ဘာဖြစ်လို့လဲ]</p> <p>"အခု ဒါက ငါ့ရဲ့ စက်မှုဇုန် ဖြစ်နေပြီ။ ငါ့ရဲ့ ပြည်သူတွေကို မင်း ဆက်မသတ်ဖို့ ငါ အလိုရှိတယ်"</p> <p>တရားဝင်အားဖြင့် ဂီလိုဘတ်သည် ‘ကင်ဒေါ့ဂျာ’ ကြောင့် သေဆုံးခဲ့ရပြီး ဤနေရာသည် ကျနော့်၏ စက်မှုဇုန် ဖြစ်လာခဲ့သည်။</p> <p>[သင်သည် စက်မှုဇုန်၏ အရှင်သခင်အသစ် ဖြစ်ပါသည်။]</p> <p>အမှန်တကယ်ပင် ဤမက်ဆေ့ချ်များမှာ ပေါ်ထွက်လာနေသည်။ ကျနော့်အနေဖြင့် အက်စ်မိုးဒီအက်စ်ဘက်မှ အသံအစစ်ကို အသုံးမပြုတော့ရန် ခိုင်လုံသော အကြောင်းပြချက်တစ်ခု အမှန်တကယ် လိုအပ်နေခြင်း ဖြစ်သည်။ အက်စ်မိုးဒီအက်စ်က ပြုံးစစဖြင့် ပြောသည်။</p> <p>"ဟင်းဟင်း… ဟုတ်ပါပြီ။ ငါ တောင်းပန်ပါတယ်"</p> <p>အက်စ်မိုးဒီအက်စ်သည် စိတ်မပါ့တပါဖြင့် လုပ်ဆောင်ခဲ့ခြင်း ဖြစ်သော်လည်း သူ၏ ရည်မှန်းချက် အောင်မြင်ရန်အတွက်မူ သူသည် ယဉ်ကျေးပျူငှာတတ်ပေသည်။ အနည်းဆုံးတော့ သူ၏ ရည်မှန်းချက် မပြည့်မီမချင်းပေါ့။</p> <p>"ဒါနဲ့ မင်းက ဘာလို့ ငါ့ဆီကို လာတာလဲ"</p> <p>"မင်း အဲဒါကို သိပြီးသားလို့ ငါ ထင်တာပဲ။ ဟုတ်တယ်မလား"</p> <p>"…ငါက ဘယ်လိုလုပ် သိမှာလဲ။ ငါက ပရောဟိတ်မှ မဟုတ်တာ"</p> <p>"အက်စ်ဂတ်ရဲ့ ပရောဟိတ်နဲ့ ဆင်တူတဲ့ စွမ်းအားမျိုး မင်းမှာ ရှိတယ်ဆိုတာ ငါ သိတယ်"</p> <p>သူသည် အန်နာ ခရော့ဖ်အကြောင်းကို ပြောနေခြင်း ဖြစ်ပေလိမ့်မည်။ ကျနော့်၏ ဇာတ်လမ်းမှာ မည်မျှအထိ ပျံ့နှံ့နေပြီး လွဲချော်နေသည်ကို ကျနော် မသိပေ။ ကောလဟာလများက မည်သို့ပင်ရှိစေကာမူ ယခုအချိန်သည် ဤဘက်ခြမ်းတွင် အခြေခံအုတ်မြစ် ချရမည့် အချိန်ဖြစ်ကြောင်းမှာ ထင်ရှားနေသည်။</p> <p>"‘မိစ္ဆာဘုရင် ရွေးချယ်ပွဲ’ ကြောင့် ဖြစ်မယ်ထင်တယ်"</p> <p>အက်စ်မိုးဒီအက်စ်သည် ထိုအဖြေကို ကြားသောအခါ ပြုံးလိုက်သည်။ ခန့်မှန်းရန် မခက်ခဲလှပေ။ အဘယ်ကြောင့်ဆိုသော် စက်မှုဇုန်ကြီး ကျဆုံးသွားပြီး မကြာမီမှာပင် အောက်ပါမက်ဆေ့ချ်ကို ကြားလိုက်ရသောကြောင့် ဖြစ်သည်။</p> <p>[သင်သည် လက်ရှိတွင် ၇၃ ခုမြောက် မိစ္ဆာနယ်မြေ၏ ‘မိစ္ဆာဘုရင် လောင်းလျာ’ တစ်ဦး ဖြစ်လာပါသည်။]</p> <p>[ဇာတ်ဝင်ခန်းသစ်တစ်ခုမှာ ဆိုင်းငံ့နေပါသည်။]</p> <p>"မင်းက ရာဇပလ္လင်အသစ်ကို ရည်မှန်းနေတာလား"</p> <p>"ဟမ်... ငါ့မှာ ၃၂ ခုမြောက် မိစ္ဆာနယ်မြေ ရှိပြီးသားပဲ။ အဆင့်နိမ့်တဲ့ နယ်မြေတစ်ခုကို ထပ်ယူဖို့ ကြိုးစားတာက အဓိပ္ပာယ်မရှိဘူးလေ"</p> <p>"ဒါဆို ဘာလုပ်ချင်လို့လဲ"</p> <p>"ငါက မင်းကို မိစ္ဆာဘုရင်အသစ် ဖြစ်လာအောင် ကူညီပေးချင်တာပါ"</p> <p>မျှော်လင့်ထားသည့်အတိုင်းပင် သူသည် ထိုသို့ပြောလာခဲ့သည်။ ဟန်မြုံအိုကလည်း ကျနော့်ကို အလားတူပင် ပြောခဲ့ဖူးသည်။ ‘၇၃ ခုမြောက် မိစ္ဆာဘုရင်’ ကို ကျနော့်လက်ဖြင့် ဖန်တီးရန် သူက တိုက်တွန်းခဲ့ခြင်း ဖြစ်သည်။</p> <p>ကျနော် ခေတ္တမျှ စဉ်းစားပြီးမှ ခေါင်းခါပြလိုက်သည်။</p> <p>"စိတ်မကောင်းပါဘူး၊ ဒါပေမဲ့ ငါ အကူအညီ မလိုဘူး။ လက်ရှိမှာ ငါက ဒီပြိုင်ပွဲမှာ ပါဝင်ယှဉ်ပြိုင်ဖို့ ဆန္ဒမရှိဘူး"</p> <p>"မင်းမှာ ငြင်းပယ်ခွင့် ရှိတယ်လို့ ငါမထင်ဘူးနော်။ မင်းက စော်ဘွားတစ်ယောက် ဖြစ်လာတာနဲ့ ဒီရွေးချယ်ပွဲမှာ မဖြစ်မနေ ပါဝင်ရတော့မှာ"</p> <p>"ငါ့ရဲ့ ကိုယ်ပိုင်အစွမ်းနဲ့ ငါ ရှင်သန်နိုင်ပါတယ်"</p> <p>"ကောင်းပြီလေ၊ မင်း အခုထိတော့ ကံကောင်းခဲ့တာ ဖြစ်နိုင်တယ်။ ဒါပေမဲ့ ရှေ့လျှောက်ရော အဲဒီလိုပဲ ဆက်ဖြစ်နေမှာတဲ့လား"</p> <p>"..."</p> <p>"စော်ဘွား မဲလ်လီဒွန်နဲ့ ဘာကန်တို့ကလည်း မင်းလိုမျိုးပဲ တွေးနေကြလိမ့်မယ်လို့ မင်း ထင်နေတာလား"</p> <p>သူတို့၏ နောက်ကွယ်တွင် နက်ဗျူလာများ ရှိနေကြပြီဖြစ်ကြောင်း ကျနော် သိထားပြီးသား ဖြစ်သည်။ ထိုနက်ဗျူလာများမှာလည်း ကျနော့်အပေါ် ရန်လိုသူများသာ ဖြစ်ကြသည်။ အက်စ်မိုးဒီအက်စ်က ရယ်မောလိုက်သည်။</p> <p>"မင်း ငါ့ရဲ့ အကူအညီကို လိုအပ်တယ်။ တကယ်လို့ မင်းဟာ ငြင်းပယ်မယ်ဆိုရင် မင်း သေရလိမ့်မယ်"</p> <p>မည်သူက ကျနော့်ကို သတ်မည်နည်းဟု မသိရသော်လည်း သူကမူ ကျနော် သေမည်မှာ သေချာသည်ဟု ယူဆထားပုံရသည်။</p> <p>ချီး... သကောင့်မသားက ငါ့ကို ဒုက္ခပေးဖို့သက်သက် ဒီအထိ လာခဲ့တာလား။</p> <p>[နက္ခတ်အနည်းငယ်သည် သင်၏ ရွေးချယ်မှုကို စောင့်ကြည့်နေပါသည်။]</p> <p>[‘ရွှေခေါင်းကွင်း၏အကျဉ်းသား’ နက္ခတ်သည် သင်၏ ရွေးချယ်မှုကို စောင့်ကြည့်နေပါသည်။]</p> <p>[လိင်ပြောင်းလဲရခြင်းကို နှစ်သက်သော နက္ခတ်သည် သင်၏ ရွေးချယ်မှုကို စောင့်ကြည့်နေပါသည်။]</p> <p>ကျနော် ဤနေရာသို့ ရောက်လာပြီးနောက် ဘီယူကို ရုပ်သံလိုင်း ချဲ့ထွင်ခိုင်းလိုက်သဖြင့် နက္ခတ်များမှာ ကျနော့်၏ ရွေးချယ်မှုကို စောင့်ကြည့်နေကြခြင်း ဖြစ်သည်။ နက္ခတ်အများစုမှာ မိစ္ဆာဘုရင်များအပေါ် အမြင်မကြည်စိတ် ရှိကြသည်။ ကျနော့်၏ အနာဂတ်ဇာတ်လမ်းမှာ ဤနေရာတွင် ကျနော် ပြုလုပ်မည့် ရွေးချယ်မှုအပေါ်၌ မူတည်နေပေသည်။</p> <p>ကျနော်သည် စိတ်ကို အေးအေးထားကာ အသက်ကို ပြင်းပြင်းရှူလိုက်ပြီး မေးမြန်းလိုက်သည်။</p> <p>"မင်းရဲ့ ရည်ရွယ်ချက်က မဟာဇာတ်လမ်းကြီး အတွက်လား"</p> <p>ကျနော့် စကားကြောင့် အက်စ်မိုးဒီအက်စ်၏ မျက်ဝန်းများမှာ လှုပ်ခတ်သွားသည်။</p> <p>"...မင်းက ဒီလို အရာမျိုးကို သိနေတာကို ငါ အံ့သြမိတယ်"</p> <p>"ဒါက မင်းလို လူစားမျိုးတွေ မျက်တောင်တစ်ခတ်အတွင်းမှာ ကိုယ့်နှာခေါင်းကိုယ် ပြန်ဖြတ်ဝံ့တဲ့ တစ်ခုတည်းသော အကြောင်းပြချက်ပဲ မဟုတ်လား"</p> <p>ကျနော်က ခါးခါးသီးသီးပင် ပြုံးလိုက်သည်။</p> <p>မဟာဇာတ်လမ်းကြီး။ ကျနော် ယခုအချိန်အထိ စုဆောင်းလာခဲ့သော ဇာတ်လမ်းများမှာ သာမန်ဇာတ်လမ်းများသာ ဖြစ်သော်လည်း ကြယ်တာရာ ရုပ်သံထုတ်လွှင့်မှုထဲ၌ ‘မဟာဇာတ်လမ်းကြီး’ ဟု ခေါ်ဆိုသည့် နယ်ပယ်အသစ်တစ်ခု ရှိနေသည်။ ဥပမာအားဖြင့် အိုလံပတ်စ်၏ ဂိုင်ဂန်တိုမာခီယာနှင့် အက်စ်ဂတ်၏ လွနာရော့ခ် ကဲ့သို့သော အရာမျိုးပင် ဖြစ်သည်။</p> <p>ထိုကဲ့သို့သော ဇာတ်လမ်းကြီးများတွင် ဝေစုအနည်းငယ် ရရှိရုံမျှဖြင့် နက္ခတ်များမှာ ကြီးမားသော စွမ်းအားနှင့် ဖြစ်နိုင်စွမ်းများကို ရရှိနိုင်ကြသည်။ အကယ်၍ ထိုဝေစု အများအပြားကိုသာ ပိုင်ဆိုင်ခွင့်ရလျှင် သူတို့သည် အင်အားအကြီးဆုံး အဖွဲ့အစည်းများ ဖြစ်လာကြပေလိမ့်မည်။ ထို့ကြောင့်ပင် ကမ္ဘာပျက်ကပ် ဇာတ်ဝင်ခန်းများ ပေါ်ပေါက်လာတိုင်း နက္ခတ်များမှာ အသည်းအသန် လုယှက်နေကြခြင်း ဖြစ်၏။</p> <p>မိစ္ဆာနယ်မြေ၏ ‘မိစ္ဆာဘုရင် ရွေးချယ်ပွဲ’ မှာလည်း ထိုကဲ့သို့သော မဟာဇာတ်လမ်းကြီး တစ်ခုပင် ဖြစ်သည်။ မိစ္ဆာဘုရင်ရွှေးချယ်ပွဲမှာ ဂိုင်ဂန်တိုမာခီယာနှင့် မယှဉ်နိုင်သော်လည်း သာမန်ဇာတ်လမ်းများနှင့် ယှဉ်လျှင်မူ အလွန်ကြီးမားလှပေသည်။</p> <p>အက်စ်မိုးဒီအက်စ်က ခေါင်းညိတ်လိုက်သည်။</p> <p>"မင်းပြောတာ မှန်တယ်။ ငါက မဟာဇာတ်လမ်းကြီး ရဲ့ ဝေစုတွေကို လိုအပ်တယ်"</p> <p>အက်စ်မိုးဒီအက်စ်မှာ မိစ္ဆာဘုရင်တစ်ပါး ဖြစ်ပြီးသားဖြစ်ကာ အဆင့်မြင့် ဇာတ်ဝင်ခန်းများတွင် ပါဝင်နေသူ ဖြစ်သဖြင့် ဤရွေးချယ်ပွဲ၌ တိုက်ရိုက် ပါဝင်ယှဉ်ပြိုင်၍ မရပေ။ သို့သော် သူသည် ကျနော့်ကို ကူညီပေးခြင်းဖြင့် ဇာတ်လမ်း၏ ‘ဝေစု’ ကို အလဲအလှယ် လုပ်နိုင်ပေသည်။</p> <p>မူလကဆိုလျှင် ကျနော် ဤကမ်းလှမ်းချက်ကို ငြင်းပယ်မိလိမ့်မည်။ မိစ္ဆာဘုရင် ရွေးချယ်ပွဲမှတစ်ဆင့် ရရှိလာမည့် မဟာဇာတ်လမ်းကြီးမှာ ကျနော့်အနေဖြင့် နက်ဗျူလာများကို ပြန်လည် တိုက်ခိုက်ရန်အတွက် အနာဂတ်တွင် အလွန်အရေးကြီးသော အခြေခံအုတ်မြစ် ဖြစ်လာမည် ဖြစ်သည်။ အကယ်၍ ကျနော်သာ ထိုဝေစုကို လူမှား၍ ပေးမိပါက ကျနော့်အတွက် ဘာမှ ကျန်တော့မည် မဟုတ်ပေ။</p> <p>သို့သော်လည်း ၁၂ ကြိမ်မြောက် နောက်ပြန်ဆုတ်ခြင်းမှ ယူဂျွန်ဟော့က ရေရွတ်ခဲ့သည်။</p> <p>「 'အဲ့ဒီအချိန်တုန်းက ငါတို့တွေဟာ မိစ္ဆာဘုရင် အက်စ်မိုးဒီအက်စ်ကို ထောက်ခံသလိုမျိုး ဟန်မဆောင်ခဲ့သင့်ဘူး' 」</p> <p>၁၂ ကြိမ်မြောက်မှ ယူဂျွန်ဟော့၏ ရင်ဘတ်ကို ဆွဲကိုင်ပြီး သူ ဘာကို ဆိုလိုခဲ့သည်လဲဟု ကျနော် မေးမြန်းချင်မိသည်။ သို့သော် ယခု ကျနော့်ရှေ့မှ လူမှာ တတိယအကြိမ်မြောက် ယူဂျွန်ဟော့သာ ဖြစ်ပေသည်။</p> <p>နောက်ဆုံးတွင် ကျနော် ရွေးချယ်မှုတစ်ခု ပြုလုပ်ရတော့ပေမည်။ မိစ္ဆာဘုရင်၏ လက်ကို ဆွဲကိုင်ရမည်လော၊ သို့မဟုတ် ငြင်းပယ်ရမည်လော။</p> <p>ကျနော်သည် နှုတ်ကို ဖြည်းညင်းစွာ ဖွင့်ဟလိုက်တော့သည်။</p> <p> </p> <p> </p> <p style="text-align:center">***</p>


Save