Book List

<h2 style="text-align: center;">အခန်း (၁၉၂)</h2> <h2 style="text-align: center;">ဒုတိယအကြီးအကဲ သွေးမိစ္ဆာ တပည့်လက်ခံလိုက်တယ်လို့ ကြားတယ်</h2> <h2 style="text-align: center;">*</h2> <p> </p> <p>အနန္တတာအိုဂိုဏ်းသို့ ရောက်ရှိပြီးနောက် ဒုတိယမြောက်နေ့တွင် ဖြစ်သည်။</p> <p>အရုဏ်တက်ချိန်တွင် ရှောင်မိုက အိပ်ရာမှ ထလာခဲ့လေသည်။</p> <p>ထိုနေ့တွင် သွေးမိစ္ဆာက ရှောင်မိုထံသို့ သစ်သားဓားတစ်လက် ပစ်ပေးလိုက်လေသည်။</p> <p> </p> <p>"ဒီနေ့ကစပြီး မင်း ဒီသစ်သားဓားနဲ့ လေ့ကျင့်ရမယ်"</p> <p>တောင်ထိပ်ပေါ်တွင် သွေးမိစ္ဆာက ရှောင်မိုအား ပျင်းရိပျင်းတွဲ ပြောလိုက်လေသည်။</p> <p> </p> <p>"ငါ မင်းကို သင်ပေးမယ့် ဓားသိုင်းက သွေးမိစ္ဆာဓားသိုင်းလို့ ခေါ်တယ်။ အဲဒါကို ကျင့်ကြံနေချိန်မှာ သွေးချီတွေက မင်းရဲ့ အရိုးတွေနဲ့ နှလုံးသားထဲကို နာကျင်စွာနဲ့ ဖောက်ဝင်သွားလိမ့်မယ်။</p> <p>မင်း သည်းမခံနိုင်ရင်တော့ သွေးအိုင်တစ်အိုင်အဖြစ် အရည်ပျော်သွားလိမ့်မယ်။</p> <p>မင်း သည်းခံနိုင်ရင်တော့ မင်းရဲ့ ကျင့်ကြံခြင်းအမြန်နှုန်းက တူညီတဲ့ ပါရမီရှိတဲ့ တခြားကျင့်ကြံသူတွေထက် အများကြီး သာလွန်သွားလိမ့်မယ်။</p> <p>ရှောင်မို၊ မင်းရဲ့ အရိုးတည်ဆောက်ပုံက ကောင်းပါတယ်။ ဒါပေမယ့် သွေးမိစ္ဆာဓားသိုင်းအတွက်တော့ အရိုးကောင်းရုံနဲ့ မလုံလောက်ဘူး။</p> <p>ဒါက အလွန်ကြမ်းတမ်းတဲ့ ကျင့်စဉ်တစ်ခုပဲ၊ မင်းက သတ္တိနည်းပြီး စိတ်ဓာတ်ပျော့ညံ့နေမယ်ဆိုရင် ပိုကျင့်လေလေ ကျင့်စဉ်သွေဖည်ခြင်း ဖြစ်ဖို့ ပိုလွယ်လေလေပဲ။</p> <p>အဲဒီလို ဖြစ်လာရင်လည်း ငါ မင်းကို သတ်ပစ်မှာပဲ"</p> <p>"ဒါ့အပြင် မင်း သွေးမိစ္ဆာဓားသိုင်းကို ကျင့်ကြံပြီးတဲ့အခါ မင်းရဲ့ မိစ္ဆာစွမ်းအင် ကြီးမားလေလေ ဓားသိုင်းရဲ့ စွမ်းအားက ပိုကြီးမားလေလေပဲ။"</p> <p>"ပြီးတော့ လူသတ်ခြင်းက မိစ္ဆာစွမ်းအင်ကို တိုးပွားစေဖို့ အကောင်းဆုံးနည်းလမ်းပဲ။"</p> <p>ထိုစကားများကို ကြားသောအခါ ရှောင်မို၏ မျက်ခုံးများ တွန့်ချိုးသွားလေသည်။</p> <p>သွေးမိစ္ဆာ၏ နှုတ်ခမ်းများက အနည်းငယ် ကွေးညွတ်သွားသည်၊ "မင်း ဘယ်သူ့ကို သတ်သတ်၊ ဘယ်နှယောက်ကို သတ်သတ် အဲဒါက မင်းရဲ့ အပိုင်းပဲ။ ငါ့စံနှုန်းတွေကို ပြည့်မီဖို့ပဲ လိုတယ်။ အမြဲတမ်းလိုလိုပါပဲ၊ မင်းရဲ့ အဆင့်က ငါ မျှော်မှန်းထားသလောက် မဖြစ်လာဘူးဆိုရင် မင်းကို ငါ သတ်မယ်။ အပို အားစိုက်ထုတ်ပြီး အချိန်ဖြုန်းနေမှာ မဟုတ်ဘူး။ တခြား မေးစရာ ရှိသေးလား"</p> <p>"ကျွန်တော့်မတိုင်ခင် ဘယ်နှယောက် သေခဲ့ပြီးပြီလဲ" ဟု ရှောင်မိုက မေးလိုက်သည်။</p> <p>"တပည့်လက်ခံရတာက ဒုက္ခများတယ်" ဟု သွေးမိစ္ဆာက ရိုးသားစွာ ဖြေလိုက်သည်၊ "ငါ တစ်ယောက်မှ လက်မခံဖူးဘူး၊ ဒါကြောင့် မင်းက ငါ့ရဲ့ ပထမဆုံးပဲ။ တခြား ရှိသေးလား"</p> <p>"မရှိပါဘူး"</p> <p>"ဒါဆို စမယ်။ သွေးမိစ္ဆာဓားသိုင်းရဲ့ ပထမဆုံးဟန်ပန်၊ သေချာကြည့်ထား ကောင်လေး။ ငါ တစ်ခါပဲ ပြမယ်"</p> <p>ထိုသို့ပြောပြီးနောက် သွေးမိစ္ဆာကလည်း သစ်သားဓားတစ်လက်ကို ကောက်ကိုင်လိုက်လေသည်။</p> <p>နောက်ပိုင်း နေ့ရက်တိုင်း၏ နံနက်ခင်းများတွင် သွေးမိစ္ဆာကိုယ်တိုင် ရှောင်မိုအား သွေးမိစ္ဆာဓားသိုင်းကို လေ့ကျင့်သင်ကြားပေးလေသည်။</p> <p>လေ့ကျင့်ခြင်းအပြင် သွေးမိစ္ဆာက ရှောင်မိုအတွက် နေ့စဉ် ဆေးစိမ်ရေချိုးကန်ကိုပါ ပြင်ဆင်ပေးလေသည်။</p> <p>အစပိုင်း လေ့ကျင့်ချိန်များတွင် သွေးချီက ရှောင်မိုအား နဂါးအဆီအနှစ် သောက်သုံးရသည်ထက်ပင် ပိုမိုဆိုးရွားသော ညှဉ်းပန်းနှိပ်စက်မှုမျိုးကို အမှန်တကယ် ခံစားရစေခဲ့သည်။</p> <p>သို့တိုင် ခပ်လှမ်းလှမ်းတွင် ရပ်နေသော ကျန်းရှင်းကို မြင်ရတိုင်း သူက သွားကြိတ်ကာ သည်းခံခဲ့လေသည်။</p> <p>လေ့ကျင့်မှု ပြီးဆုံးတိုင်း ကျန်းရှင်းက ပဝါတစ်ထည်ဖြင့် ပြေးလာကာ သူ၏ ချွေးများကို သုတ်ပေးပြီး ပခုံးများနှင့် ကျောပြင်ကို နှိပ်နယ်ပေးတတ်လေသည်။</p> <p>သူမက တခြား ဘာမှ သိပ်မလုပ်ပေးနိုင်ကြောင်း သိထားသဖြင့် သူ၏ နေ့စဉ်ဘဝ အသေးစိတ်ကိစ္စလေးများကိုသာ ဂရုစိုက်ပေးနိုင်ခဲ့လေသည်။</p> <p>နှစ်လအကြာတွင် ရှောင်မိုသည် ချီသန့်စင်ခြင်းအဆင့်၏ နဝမအဆင့်သို့ တက်လှမ်းသွားနိုင်ခဲ့လေသည်။</p> <p>သူ၏ အဆင့်ချိုးဖျက်နိုင်မှု အမြန်နှုန်းက ရှောင်မိုကိုယ်တိုင်ပင် မှင်တက်သွားစေခဲ့သည်။</p> <p>ယင်းမှာ သွေးမိစ္ဆာဓားသိုင်းကို ကျင့်ကြံခြင်းကြောင့်လား သို့မဟုတ် ဤဘဝတွင် သူ၏ မွေးရာပါ ပါရမီက အဓိပ္ပာယ်မရှိလောက်အောင် မြင့်မားနေသောကြောင့်လားဆိုသည်ကို သူ မဝေခွဲတတ်တော့ချေ။</p> <p>နှစ်လအတွင်း နဝမအဆင့်သို့ ရောက်ရှိလာပြီး နောက်ထပ် အဆင့်ချိုးဖျက်ရန် နီးကပ်နေခြင်းမှာ ရိုးရိုးရှင်းရှင်းပင် ယုံကြည်နိုင်စရာ မရှိလောက်အောင် ဖြစ်နေလေသည်။</p> <p>သို့သော် အကြောင်းရင်းက မည်သို့ပင်ဖြစ်စေ သူက ရှေ့သို့ ဆက်လက်ချီတက်ရန်သာ တတ်နိုင်လေသည်။</p> <p>သွေးမိစ္ဆာက သူ့အတွက် ပန်းတိုင်များ သတ်မှတ်ပေးထားလေသည်။</p> <p>လေ့ကျင့်မှု အပိုင်းအခြားတစ်ခုစီ ပြီးဆုံးပြီးနောက် ရှောင်မိုက သတ်မှတ်ထားသော အဆင့်တစ်ခုနှင့် သွေးမိစ္ဆာဓားသိုင်း၏ အဆင့်တစ်ခုသို့ ရောက်ရှိရမည်ဖြစ်ပြီး၊ သို့မဟုတ်ပါက သူ အသတ်ခံရမည် ဖြစ်သည်။</p> <p>ကံကောင်းထောက်မစွာဖြင့် သူ၏ ပါရမီက သွေးမိစ္ဆာ၏ တောင်းဆိုချက်များကို ပြည့်မီရန် လုံလောက်နေခဲ့လေသည်။</p> <p>တစ်ခါတစ်ရံ သွေးမိစ္ဆာကိုယ်တိုင်ပင် နားလည်ရန် ခက်ခဲနေခဲ့လေသည်။</p> <p>ဆယ်နှစ်အရွယ် ကလေးတစ်ယောက်က ဘယ်လိုလုပ်ပြီး ဒီလောက်တောင် ခိုင်မာပြတ်သားတဲ့ စိတ်ဓာတ်မျိုးကို ပိုင်ဆိုင်ထားနိုင်ရတာလဲ။</p> <p>သို့တိုင် ဓားသိုင်း၏ လွှမ်းမိုးမှုအောက်တွင် ကျင့်ကြံသော နေ့ရက်များ များပြားလာသည်နှင့်အမျှ ရှောင်မိုက သူ၏ ကိုယ်ပိုင် သတ်ဖြတ်လိုစိတ်များ ကြီးထွားလာသည်ကို ခံစားလာရလေသည်။</p> <p>လေ့ကျင့်မှု ပြီးဆုံးတိုင်း သူက တစ်ခုခုကို ခုတ်ထစ်ချင်စိတ်များ ယားယံလာပြီး သွေးကို မြင်တွေ့ချင်သော တပ်မက်မှုများ ဖြစ်ပေါ်လာလေသည်။</p> <p>သို့သော် သူက အစွမ်းကုန် ကြိုးစားဖိနှိပ်ထားခဲ့လေသည်။</p> <p>ကျင့်ကြံခြင်း၏ ခုနစ်ဆယ့်ငါးရက်မြောက်နေ့တွင် ရှောင်မိုက အုတ်မြစ်ချခြင်း ဆေးလုံးကို မြိုချကာ မိုးကြိုးဘေးဒဏ်ကို ကြံ့ကြံ့ခံရင်း အုတ်မြစ်ချခြင်းအဆင့်သို့ အောင်မြင်စွာ ရောက်ရှိသွားခဲ့လေသည်။</p> <p>ကျင့်ကြံသူ အများစု ဘယ်သောအခါမှ မဖြတ်ကျော်နိုင်သော ချောက်ကမ်းပါးကြီးတစ်ခုကို သူက သုံးလမပြည့်မီ အချိန်အတွင်း ခုန်ပျံကျော်လွှားသွားခဲ့ခြင်းပင်။</p> <p>သူ အောင်မြင်သွားသောနေ့တွင်။</p> <p>သွေးမိစ္ဆာက သူ၏ထံသို့ ထန်ဟန်ဓား တစ်လက်ကို ပစ်ပေးလိုက်လေသည်။</p> <p>၎င်းမှာ နာလင်ဓားဟု အမည်ရသော အဆင့်လေး မှော်လက်နက်တစ်ခု ဖြစ်သည်။</p> <p>ရှောင်မို ထိုဓားဖြင့် လေ့ကျင့်သောအခါ ဓားက သူ၏ ခန္ဓာကိုယ်ထဲရှိ ဝိညာဉ်စွမ်းအင်များကို အဆက်မပြတ် စုပ်ယူနေလေသည်။</p> <p>သူ ကြာကြာကိုင်ထားလေလေ ဓားက ပိုလေးလာလေလေ ဖြစ်သည်ကို ခံစားရလေသည်။</p> <p>"ဒီနေ့ကစပြီး မင်းက အုတ်မြစ်ချခြင်းအဆင့် ကျင့်ကြံသူဖြစ်သွားပြီ၊ အနန္တတာအိုဂိုဏ်းထဲမှာ မင်း သွားလာလှုပ်ရှားလို့ ရပြီ။ အနန္တတာအိုမြို့လေးကို သွားပြီး ငါ့အတွက် သေရည်တစ်အိုး သွားဝယ်ချေ၊ မြောက်ဘက်မြို့က မျက်မမြင်အဘိုးကြီးဆိုင်က စန်းလော့သေရည်ကို ဝယ်ခဲ့"</p> <p>စကားပြောပြီးနောက် သွေးမိစ္ဆာက သူ၏ထံသို့ ဝိညာဉ်ကျောက်တုံးများပါသော အိတ်တစ်အိတ်နှင့် ဘူးသီးခြောက်တစ်လုံးကို ပစ်ပေးလိုက်ပြီးနောက် သမ်းဝေကာ ခြံဝန်းထဲသို့ လမ်းလျှောက်ဝင်သွားလေသည်။</p> <p>ကျန်းရှင်းက သူ့ကို လိုက်ပါသွားချင်ခဲ့လေသည်။</p> <p>သို့သော် ရှောင်မိုက ငြင်းပယ်လိုက်လေသည်။</p> <p>မည်သို့ပင်ဆိုစေ အနန္တတာအိုဂိုဏ်းမှာ မိစ္ဆာဂိုဏ်းတစ်ခုဖြစ်ရာ သူက အပြင်ဘက် ပတ်ဝန်းကျင်ကို အရင် စူးစမ်းလေ့လာမည်ဖြစ်ပြီး အရာအားလုံး အဆင်ပြေနေပုံရပါက ကျန်းရှင်းကို နောက်မှ လမ်းလျှောက်ထွက်ရန် ခေါ်သွားမည်ဖြစ်သည်။</p> <p>တောင်အောက်သို့ ဆင်းလာပြီးနောက် ရှောင်မိုက ဂိုဏ်းအတွင်းရှိ အနန္တတာအိုမြို့လေးဆီသို့ ပျံသန်းသွားလေသည်။</p> <p>အနန္တတာအိုမြို့လေးသည် ဂိုဏ်းအတွင်းရှိ လွင်ပြင်ငယ်လေးတစ်ခုပေါ်တွင် တည်ဆောက်ထားခြင်း ဖြစ်သည်။</p> <p>မြို့လေးမှာ အလွန်ကြီးမားလှပြီး သာမန်မင်းဆက်တစ်ခု၏ မြို့တော်ထက်ပင် နှစ်ဆခန့် ပိုမိုကျယ်ဝန်းလေသည်။</p> <p>သေရည်ဆိုင်များ၊ တည်းခိုခန်းများ၊ လောင်းကစားရုံများ၊ ပြည့်တန်ဆာအိမ်များအစရှိသည့် လိုချင်သမျှ အရာအားလုံးရှိနေပြီး သာမန် လူ့လောကနှင့် ဘာမျှမကွာခြားလှချေ။</p> <p>သို့တိုင် အနန္တတာအိုမြို့လေးရှိ "ပန်းတစ်သောင်းအိမ်တော်" မှ မိန်းကလေးများမှာ လောကီမှ ပြည့်တန်ဆာများထက် အဆပေါင်းများစွာ ပိုမိုလှပကြလေသည်။</p> <p>၎င်းတို့က ရွှင်လန်းသောပေါင်းဖက်ခြင်းဂိုဏ်းမှ ကျင့်ကြံသူများနှင့် အလွန်ဆင်တူကြပြီး နှစ်ကိုယ်ကြားကျင့်ကြံခြင်းမှတစ်ဆင့် တာအိုကို လိုက်စားကြခြင်း ဖြစ်သည်။</p> <p>လမ်းမပေါ်တွင် လျှောက်သွားနေစဉ် ရှောင်မိုကို လူအများက ဘေးတိုက် အကဲခတ်ကြည့်ရှုနေကြလေသည်။</p> <p>အများစု၏ အကြည့်များက သူ၏ ခါးတွင် ချိတ်ဆွဲထားသော ရဲ့ရွှယ်တောင်ထွတ် သစ်သားပြားလေးပေါ်သို့ ကျရောက်နေလေသည်။</p> <p>သူက ကျန်းရှင်း၏ အရွယ်အစားနှင့် ကိုက်ညီမည့် အဝတ်အစား အစုံအချို့၊ သကြားလုံးများနှင့် သကြားရည်သုတ်(ထန်ဟူလု) များကိုပါ ဝယ်ယူခဲ့လေသည်။</p> <p>မည်သို့ပင်ဖြစ်စေ သူမက အစာရှောင်ဆေးလုံးများကို အချိန်အကြာကြီး စားသုံးနေခဲ့ရသဖြင့် သူမ၏ ပါးစပ်မှာ လုံးဝ အရသာပျက်နေလောက်ပြီ ဖြစ်သည်။</p> <p>နောက်ဆုံးတွင် သူက မြောက်ဘက်မြို့ရှိ "မျက်မမြင်အဘိုးကြီး၏ သေရည်ဆိုင်" သို့ ရောက်ရှိသွားပြီး စားပွဲထိုးကို သူ၏ ဘူးသီးခြောက်ထဲသို့ စန်းလော့သေရည်များ ဖြည့်ခိုင်းကာ ထိုင်ခုံတစ်လုံးကို ဆွဲယူထိုင်လိုက်လေသည်။</p> <p>ထိုအချိန်မှာပင် ဘေးစားပွဲမှ အမျိုးသားနှစ်ဦး၏ စကားသံများက သူ၏ နားထဲသို့ ဝင်ရောက်လာလေသည်။</p> <p>"ဒုတိယအကြီးအကဲ သွေးမိစ္ဆာ တပည့်လက်ခံလိုက်တယ်လို့ ကြားတယ်" ဟု ဝမ်ဝေ့ကျွင်းအမည်ရသည့် သန့်ပြန့်သော ဓားကျင့်ကြံသူတစ်ဦးက မေးလိုက်လေသည်။</p> <p>"တကယ်ပဲ" လီချန်အမည်ရသည့် ကျင့်ကြံသူက ခေါင်းညိတ်လိုက်သည်၊ "ငါကိုယ်တိုင်တောင် တော်တော်လေး အံ့ဩသွားတာ။ အဲဒီလောက် မောက်မာတဲ့ အကြီးအကဲ သွေးမိစ္ဆာက တပည့်လက်ခံလိမ့်မယ်လို့ ဘယ်သူက ထင်မှာလဲ"</p> <p>"ဟက်" ဝမ်ဝေ့ကျွင်းက အေးစက်စွာ ရယ်မောလိုက်သည်၊ "မောက်မာတယ်ဟုတ်လား။ ငါ့ဆရာနဲ့ ယှဉ်လိုက်ရင် သွေးမိစ္ဆာက ဘာမှမဟုတ်ပါဘူးကွာ"</p> <p>"ဟားဟား၊ မဟာအကြီးအကဲနဲ့ ယှဉ်လိုက်ရင် ဒုတိယအကြီးအကဲ သွေးမိစ္ဆာက တကယ်ကို လိုအပ်ချက်ရှိနေသေးတာပေါ့။ ဒါပေမယ့် ညီအစ်ကိုဝမ်ရာ... သွေးမိစ္ဆာရဲ့ ကိုယ်လုံးကိုယ်ပေါက်နဲ့ ရုပ်ရည်ကတော့... အင်း..." လီချန်က ယောက်ျားအချင်းချင်း နားလည်သော အပြုံးမျိုးဖြင့် ပြုံးလိုက်လေသည်။</p> <p>"စောင့်ကြည့်နေလိုက် ညီအစ်ကိုဝမ်၊ ငါ့ဆရာသာ ကောင်းကင်ဘုံတက်လှမ်းခြင်းအဆင့်ကို ချိုးဖျက်ပြီး နောက်ထပ် ဂိုဏ်းချုပ် ဖြစ်လာတာနဲ့ သူမကို သူရဲ့ ကိုယ်ပိုင် အိမ်မွေးတိရစ္ဆာန်လေးအဖြစ် သိမ်းပိုက်လိုက်မှာပဲ။ သူ့ရဲ့ ထိပ်တန်းတပည့်ဖြစ်တဲ့ ငါတောင်မှ တစ်ခါတလေကျရင်—"</p> <p>စကားတစ်ဝက်မှာပင် လူနှစ်ယောက်စလုံး၏ နှလုံးသားများ တင်းကျပ်သွားပြီး ထိုင်ခုံများမှ ခုန်ထလိုက်ကြလေသည်။</p> <p>"ဝုန်း"</p> <p>သွေးရောင် ဓားချီတစ်ချက်က စားပွဲများနှင့် ကုလားထိုင်များကို အပိုင်းပိုင်းအစစ ရိုက်ချိုးဖျက်ဆီးပစ်လိုက်လေသည်။</p> <p> </p> <p style="text-align: center;">***</p> <p> </p>


Save