Book List

<h2 style="text-align: center;">အခန်း (၁၂၀)</h2> <h2 style="text-align: center;">လျန်ရှန့်ရွှီ၏ သံသယနှင့် စူးစမ်းမှု</h2> <h2 style="text-align: center;">*</h2> <p> </p> <p>မုဖေးဝမ်က ခေါင်းခါယမ်းလျက်</p> <p>"ဒါတင်မကသေးဘူး၊ ဝေ့ယီဂဲက VIP စားသောက်ခွင့် ကတ်တွေကို အရေအတွက် အကန့်အသတ်နဲ့ပဲ ထုတ်ပေးထားတာ အဲဒီကတ်ရှိရင် တစ်လကိုတစ်ကြိမ် ဦးစားပေး ဘိုကင်ရပိုင်ခွင့်ရှိတယ် ဘေကျင်းရဲ့ အထက်တန်းလွှာ အသိုင်းအဝိုင်းမှာ ဝေ့ယီဂဲVIP ကတ် မရှိတဲ့သူဆိုရင် ကိုယ့်ကိုယ်ကိုယ် ဂုဏ်သရေရှိ မိသားစုဝင် တစ်ယောက်လို့ ခေါ်ဖို့တောင် ရှက်စရာကောင်းတဲ့အထိပဲ"</p> <p>"ဒါကို ဘယ်သူမှ ကန့်ကွက်တာမျိုး မရှိဘူးလား" </p> <p>ကော်ချီနန်က အံ့သြတကြီး မေးလိုက်သည်။ ဘေကျင်းမှာ ချမ်းသာပြီး ဩဇာရှိသူတွေမှ အများကြီးရှိသည်။ သူတို့လိုလူမျိုးတွေကိုမှ ရှားပါးဈေးကွက် ရှာဖွေရေးနှင့် ကစားနေတာကို ဘယ်သူမှ ဘာမှမပြောကြပါ။ သူတို့ရဲ့နောက်ခံက ဘယ်လောက်တောင် တောင့်တင်းနေလို့လဲ။</p> <p>"ရှိတာပေါ့၊ ဒါပေမဲ့ အဲဒါက ဝေ့ယီဂဲရဲ့ လျှို့ဝှက်ချက်ပဲ ဘယ်သူက နောက်ကွယ်က ရှိနေတာလဲ၊ ဘယ်လောက် အင်အားကြီးလဲဆိုတာ ဘယ်သူမှ မသိကြဘူး ငါသိသလောက်တော့ ဝေ့ယီဂဲကို အောင်အောင်မြင်မြင်နဲ့ နာမည်ဖျက်နိုင်ခဲ့တဲ့သူ တစ်ယောက်မှ မရှိသေးဘူး မဟုတ်ရင် ငါတို့တွေ အခု ဒီမှာရှိနေမှာ မဟုတ်ဘူး" </p> <p>မုဖေးဝမ်၏ မျက်လုံးများမှာ အနည်းငယ် မှေးစပြုလာသည်။ အကယ်၍သာ ဝေ့ယီဂဲနောက်ကွယ်က အင်အားစုရဲ့ အကူအညီကို သူရခဲ့လျှင် သူဖြစ်ချင်သည့် ပန်းတိုင်ကို အလွယ်တကူ ရောက်နိုင်ပေလိမ့်မည်။</p> <p>ဝေ့ယီဂဲ၏ ထူးခြားချက်များကို ရှင်းပြပြီးနောက်တွင် ရွမ်ဝေကိုယ်တိုင် ဝန်ထမ်းများကို ခေါ်ဆောင်ကာ ဟင်းလျာများ လာရောက် တည်ခင်းပေးတော့သည်။</p> <p>"အားလုံးပဲ အဆင်မပြေတာရှိရင် ခွင့်လွှတ်ပေးကြပါ ဒီနေ့ မိတ်ဆွေတွေ အများကြီး ရောက်နေလို့ပါ"</p> <p>မုဖေးဝမ်သည် အနည်းငယ် ဂုဏ်ယူမိသွားသော်လည်း သူဌေးသားပီပီ တည်ငြိမ်မှုကို ချက်ချင်း ပြန်ထိန်းလိုက်ပြီး ယဉ်ကျေးစွာ ခေါင်းညိတ်ပြလျက်</p> <p>"မန်နေဂျာရွမ်ကလည်း အားနာစရာကြီးပါ ကျွန်တော်တို့တွေဘက်က ဝေ့ယီဂဲကို လာရောက်ပြီး စားဖိုမှူးကြီးရဲ့ လက်ရာတွေကို မြည်းစမ်းခွင့် ရတာကိုက ဂုဏ်ယူစရာပါပဲ" </p> <p>ဟု ပြန်ပြောလိုက်သည်။</p> <p>ရွမ်ဝေက ပြုံးလျက် တုံ့ပြန်သည်။</p> <p>"ရှင်တို့ထဲမှာ ဘယ်သူက မစ္စတာလျန်ရှန့်ရွှီပါလဲရှင့်"</p> <p>လျန်ရှန့်ရွှီမှာ ထိုစကားကို ကြားသောအခါ အနည်းငယ် အံ့အားသင့်သွားရသည်။</p> <p>"မင်္ဂလာပါ မန်နေဂျာရွမ် ကျွန်တော်က လျန်ရှန့်ရွှီပါ"</p> <p>"ဒါက ကျွန်မတို့ရဲ့ သခင်မလေးက ပေးခိုင်းလိုက်တာပါ မစ္စတာလျန် နောက်တစ်ခါ လာဖြစ်မယ်ဆိုရင် ကျွန်မကို ကြိုတင်ဆက်သွယ်နိုင်ဖို့ ဒါက ကျွန်မရဲ့ လိပ်စာကတ်ပါ ပြီးတော့ သခင်မလေးက ဒီနေ့အတွက် ကျသင့်ငွေကို ရှင်းပေးထားပါတယ်၊ အားလုံးပဲ စိတ်ကြိုက် သုံးဆောင်ကြပါ တစ်ခုခု လိုအပ်ရင်တော့ ဝန်ဆောင်မှုခေါ်တဲ့ ခေါင်းလောင်းလေးကို နှိပ်ပေးပါရှင်" </p> <p>ရွမ်ဝေသည် လျန်ရှန့်ရွှီထံသို့ ဝေ့ယီဂဲ VIP ကတ်နှင့် သူမ၏ လိပ်စာကတ်ကို ကမ်းပေးလိုက်ပြီးနောက် ခေါင်းညိတ်နှုတ်ဆက်ကာ အခန်းထဲမှ ထွက်ခွာသွားတော့သည်။</p> <p>ရွမ်ဝေ ထွက်သွားသည်နှင့် ကော်ချီနန်သည် ချက်ချင်းထလာပြီး လျန်ရှန့်ရွှီ၏ ပခုံးကို ဖက်လိုက်သည်။</p> <p>"ဝါး... အာရှု၊ မင်းကတော့ တစ်ခုခုကို ဖုံးထားတာပဲ ဝေ့ယီဂဲရဲ့ သခင်မလေးနဲ့ မင်းဘယ်တုန်းက တွေ့လိုက်တာလဲ ဝေ့ယီဂဲဆိုတာ ဘယ်လိုမျိုး မိသားစုလဲ ငါတကယ် သိချင်နေပြီ"</p> <p>လျန်ရှန့်ရွှီမှာ အတော်ကြာအောင် စဉ်းစားနေမိသည်။ ယနေ့တွင် သူသည် တန်ယန်နှင့်သာ တွေ့ခဲ့ရပြီး အခြားဘယ်သူနှင့်မှ မတွေ့ခဲ့ပေ။ သို့ဆိုလျှင် ဝေ့ယီဂဲသည် တန်ယန်၏ မိသားစုပိုင် လုပ်ငန်းတစ်ခု ဖြစ်နေမည်ဟု သူတွေးလိုက်သည်။</p> <p>"အာရှု" </p> <p>ကော်ချီနန်က ထပ်မံခေါ်ယူကာ အဖြေကို အတင်းတောင်းနေတော့သည်။</p> <p>"အဟမ်း... မဟုတ်ပါဘူး၊ ငါသူမကို မသိပါဘူး" </p> <p>လျန်ရှန့်ရွှီ ခေတ္တမျှ စဉ်းစားပြီး သူ၏အတွေးကို ပြန်လည်ထိန်းချုပ်လိုက်သည်။ </p> <p>"ငါထင်တာတော့ ရှုရှင်းယန်ရဲ့ အတန်းဖော်က မန်နေဂျာရွမ်ပြောတဲ့ အဲဒီသခင်မလေးကို သိနေတာများလား"</p> <p>မုဖေးဝမ်က သူ့ကို စူးစမ်းသော အကြည့်ဖြင့် ကြည့်လိုက်သည်။ ရိုးရိုးခင်မင်ရုံ သက်သက်ပဲလား။ VIP ကတ်ကို ဒီအတိုင်း အလကား ပေးနိုင်တယ်ဆိုတာ အလွန်ရင်းနှီးတဲ့သူ ဖြစ်ရမယ်၊ ဒါမှမဟုတ်ရင်လည်း လျန်ရှန့်ရွှီရဲ့ ဝမ်းကွဲရဲ့ အတန်းဖော်ကိုယ်တိုင်က အဲဒီသခင်မလေးပဲ ဖြစ်နေမလား။</p> <p>*</p> <p>'ယီယွီယဉ်ကျေးမှု' သည် မကြာသေးမီကပင် ဝတ္ထုအများအပြား၏ မူပိုင်ခွင့်များကို သိမ်းကျုံး ဝယ်ယူခဲ့သည်။ ၎င်းတို့ထဲတွင် စာအုပ်အဖြစ် ထွက်ရှိပြီးသား ဝတ္ထုများ ပါဝင်သလို အဆုံးမသတ်သေးသော အွန်လိုင်းဝတ္ထုများလည်း ပါဝင်သည်။ ဤကဲ့သို့ ကြီးမားသော လှုပ်ရှားမှုကြောင့် အနုပညာ လောကအတွင်းရှိ လူအများက စိတ်ဝင်တစား စောင့်ကြည့်လာကြသည်။ အကဲခတ်ကောင်းသော ရင်းနှီးမြှုပ်နှံသူ အချို့မှာလည်း ယီယွီဘက်မှ လက်လှမ်းမမီသေးသော သို့မဟုတ် မကြည့်ရသေးသော ဝတ္ထုမူပိုင်ခွင့်များကို လိုက်လံဝယ်ယူရင်း ခြေရာခံလာကြတော့သည်။</p> <p>ကျိုးချီမှာမူ လက်ရှိတွင် အိမ်၌ပင် ကျန်းမာရေးအရ အနားယူနေရဆဲ ဖြစ်သည်။ </p> <p>‘အရိုးကျိုးလျှင် ရက်ပေါင်းတစ်ရာ အနားယူရသည်’ ဟု ဆိုရိုးရှိသော်လည်း ဤမျှပြင်းထန်သော ဒဏ်ရာမျိုးမှာ ရက်ပေါင်းတစ်ရာဖြင့် လုံးဝဥဿုံ ပြန်လည်ကောင်းမွန်ရန် မလွယ်ကူပေ။ သို့သော်ငြားလည်း သူသည် အလုပ်ကို လုံးဝပစ်ထားခြင်းမျိုးမဟုတ်ဘဲ အိမ်ရှိ စာကြည့်ခန်းထဲတွင်သာ အလုပ်လုပ်နေခဲ့သည်။</p> <p>ယခုနှစ်အတွင်း ယီယွီလက်အောက်ရှိ အနုပညာရှင်များမှာ သိသိသာသာ တိုးတက်လာခဲ့သည်။ ကုမ္ပဏီတွင် ဆက်လက် ကျန်ရှိနေသူများမှာ ယခင်အလုပ်ရှင်များ၏ လျစ်လျူရှုခြင်းကို ခံခဲ့ရသော်လည်း တကယ့်အရည်အချင်း ရှိသူများသာ ဖြစ်ကြသည်။ ယခုအခါ ကုမ္ပဏီတွင် ရင်းနှီးမြှုပ်နှံမှုနှင့် အရင်းအမြစ်များ ကြွယ်ဝလာသည့်အပြင် အခွင့်အလမ်းများကိုလည်း မျှတစွာ ခွဲဝေပေးထားသည်။ အကယ်၍ ဖျော်ဖြေရေး လောကအတွင်း မည်သည့် အနုပညာရှင်များက ပျော်ရွှင်မှု အရှိဆုံးလဲဟု မေးလာပါက ယီယွီမှ အနုပညာရှင်များဟုသာ ညွှန်းဆိုရပေလိမ့်မည်။</p> <p>ကျင်းရှန်းသည် ယခင်က ဖက်ရှင်အပတ် အခွင့်အလမ်းများကို ငြင်းပယ်ခဲ့ပြီး သူမ၏ ဒရာမာအသစ်ဖြစ်သော "ယွမ်ချင်းဒဏ္ဍာရီ" ရိုက်ကူးရေး အပေါ်တွင်သာ အာရုံစိုက်ခဲ့သည်။ မကြာသေးမီကမှ သူမသည် ဇာတ်လမ်းမြှင့်တင်ရေးအတွက် အဖွဲ့သားများနှင့်အတူ လှည့်လည် သွားလာနေခဲ့ခြင်း ဖြစ်သည်။</p> <p>ယခင်က ဖြစ်ပွားခဲ့သော 'ယွီမုန်းမုန်း' ဖြစ်ရပ်ကြောင့် ယီယွီအနုပညာ လုပ်ငန်း၏ မိမိအနုပညာရှင်အပေါ် အစွမ်းကုန် ကာကွယ်ပေးတတ်သည့် ပုံစံမှာ အွန်လိုင်းအသုံးပြုသူများအကြား ရေပန်းစားသွားခဲ့ပြီး ဤဒရာမာသစ်ကိုပါ စိတ်ဝင်စားမှု မြင့်တက်လာစေခဲ့သည်။ ထုတ်လုပ်ရေးအဖွဲ့မှ ပိုစတာများ ထုတ်ပြန်လိုက်သည့် အခါတွင်လည်း ပရိသတ်များမှာ ဇာတ်လမ်းစတင်ပြသမည့်ရက်ကို တိတ်တဆိတ် စောင့်မျှော်နေကြပြီ ဖြစ်သည်။</p> <p>ဤဇာတ်လမ်း၏ မင်းသားမှာ ပရိသတ် အခြေခိုင်မာမှု မရှိသေးသော လူသစ်တစ်ဦးဖြစ်ပြီး ကျင်းရှန်းမှာလည်း နာမည်သိပ်မကြီးသေးသော မင်းသမီးတစ်ဦးသာ ဖြစ်သည်။</p> <p>တန်ယန်သည် ယိတျန်တျန်ကို အသုံးပြု၍ သူမ၏ အဓိကအကောင့်မှ ကျင်းရှန်း၏ပို့စ်ကို ပြန်လည် မျှဝေလိုက်သည်။ တန်ယန်၏ ပရိသတ်များ မတုံ့ပြန်နိုင်ခင်မှာပင် တန်ယန်၏ Weibo အကောင့်ကို အမြဲစောင့်ကြည့်နေသော ယွမ်ရှီးက တန်ယန်၏ပို့စ်ကို ချက်ချင်း ထပ်ဆင့် မျှဝေပေးလိုက်တော့သည်။</p> <p>ယခုအခါ ပရိသတ်များသာမက ယွမ်ရှီး၏ ပရိသတ်များပါ ဇဝေဇဝါ ဖြစ်သွားကြရသည်။ သူတို့၏ အိုင်ဒေါသည် ဘာကြောင့် တန်ယန်တင်သမျှ ပို့စ်တိုင်းကို အရင်ဆုံးလိုက်ပြီး မျှဝေနေရသနည်း။ သူသည် သူမ၏ Weibo ပေါ်မှာပဲ အိမ်ဆောက်ပြီး နေနေသလားဟု ထင်ရသည်။</p> <p>【ဝေဖန်ချက် ၁: 】 သိချင်လို့မေးတာပါ၊ ဘာလို့ ယွမ်ရှီးက တန်ယန်ပို့စ်တင်တိုင်း ချက်ချင်း လိုက်ခ်ပေးတာ ဒါမှမဟုတ် ပြန်မျှဝေတာတွေ လုပ်နေရတာလဲ။ တကယ်ကို နားမလည်နိုင်ဘူး။ သူတို့အတူတူ အလုပ်လုပ်ဖူးတယ် ဆိုဦးတော့ ဒါက နည်းနည်းတော့ လွန်မနေဘူးလား။ ယွမ်ရှီးက အနုပညာရှင်တွေ အများကြီးနဲ့ အလုပ်လုပ်ဖူးတာပဲ၊ တခြားသူတွေကိုကျ ဒီလောက်အထိ မျက်နှာချိုသွေးတာမျိုး မတွေ့ဖူးပါဘူး။ (အပြစ်ကင်းစင်သောရုပ်ပုံ)</p> <p>【ဝေဖန်ချက် ၂: 】 အပေါ်ကလူက ထမင်းတွေ အများကြီး စားထားလို့ အားယားနေတာလား ငါတို့ရဲ့ ရှီးလေးက တခြားသူကို ကူညီတတ်ရုံလေးပါ၊ အဲဒါ ဘာဖြစ်လို့လဲ။</p> <p>【ဝေဖန်ချက် ၃: 】 ချူယန်တော့ ပြာယာခတ်နေပြီ။ တို့တွေက ဘာမှမပြောရသေးဘူးနော်၊ နင့်အရှင်သခင်က လုပ်ရဲတာကို တို့က မပြောရဘူးလား။ (ပြုံးစိစိအီမိုဂျီ)</p> <p>【ဝေဖန်ချက် ၄:】 ရှီးလေးက အရည်အချင်းရှိတဲ့ ဂီတပညာရှင်တွေကို အမြဲတမ်း လေးစားအားကျတတ်သူပါ။ အရင်က တီဗီအစီအစဉ်တွေမှာလည်း ကိုယ်ပိုင် ဖန်တီးသူတွေကို အကြိမ်ကြိမ် ချီးကျူးအားပေး ခဲ့ဖူးပါတယ်။ မစ္စတန်ယန်က ခေတ်သစ်တရုတ်နိုင်ငံမှာ 'ရှိုပင် အထူးဆု' ကို ရရှိခဲ့တဲ့ တစ်ဦးတည်းသော စန္ဒရားပညာရှင်လေ။ ရှီးလေးက သူမကို ပိုပြီး သတိထားမိနေတာ ဘာဆန်းလို့လဲ။ နောက်ပြီး မစ္စတန်ယန်က ရှီးလေးနဲ့အတူ စင်ဂယ်သီချင်းတစ်ပုဒ် ဖန်တီးခဲ့ဖူးတယ်၊ အဲဒီသီချင်းက ဇယားတွေရဲ့ ထိပ်ဆုံးမှာ ၃ လတောင် ရပ်တည်ခဲ့တာ။ အခုလို Weibo ပေါ်မှာ ကူညီပြီး ကြော်ငြာပေးတာက သဘာဝကျပါတယ်နော်။ (အပြုံးမျက်နှာ)</p> <p>【ဝေဖန်ချက် ၅: 】 အပေါ်က ပြောသွားတာကို ထောက်ခံတယ်၊ တို့တွေ ပရိသတ်တွေကတောင် ဘာမှမပြောရသေးဘူး၊ ဘယ်ကလာတဲ့ အမုန်းပွားသူတွေက အာရုံလာစိုက်နေတာလဲ။ တော်တဲ့သူအချင်းချင်းက အမြဲတမ်း အပြန်အလှန် လေးစားကြစမြဲပဲ၊ မနာလိုတဲ့သူတွေ အဝေးကို သွားလိုက်ကြစမ်း။</p> <p>【ဝေဖန်ချက် ၆: 】 ဝါး... ငါအခုမှ သတိထားမိတာ၊ ငါတို့ရဲ့တန်တန်နဲ့ "ယွမ်ချင်းဒဏ္ဍာရီ" က မင်းသမီးကျင်းရှန်းတို့က အပြန်အလှန် ဖော်လိုလုပ်ထားကြတာပဲ၊ လှပတဲ့ အမျိုးသမီးနှစ်ယောက် အတူတူ ပုံလေးတွေ တင်တာကို မြင်ချင်လှပြီ။</p> <p>...</p> <p>ယွမ်ရှီး၏ ပရိသတ်များနှင့် တန်ယန်၏ ပရိသတ်များသည် "ယွမ်ချင်းဒဏ္ဍာရီ" ၏ တရားဝင် Weibo အကောင့်သို့ အလုံးအရင်းနှင့် ဝင်ရောက် မှတ်ချက်ပေးကြတော့သည်။ "ယွမ်ချင်းဒဏ္ဍာရီ" ၏ ပထမဆုံး ပြသမည့်ရက်ကို ကြော်ငြာထားသည့်ပို့စ်မှာ မှတ်ချက်ပေါင်း ရာဂဏန်းမှသည် စက္ကန့်ပိုင်းအတွင်း သောင်းဂဏန်းအထိ တိုးတက်သွားခဲ့ပြီး ဆက်လက်၍လည်း မြင့်တက်နေဆဲ ဖြစ်၏။</p> <p>တရားဝင် Weibo အကောင့်ကို တာဝန်ယူထားသော အဖွဲ့သားများသည် ထိုသို့ဒေတာများ ရုတ်တရက် မြင့်တက်လာသည်ကို သတိပြုမိသွားပြီး ဒါရိုက်တာထံ အစီရင်ခံလိုက်ကြသည်။ ဒါရိုက်တာရွှီကျိရှန်းမှာ မျက်ခုံးအနည်းငယ် ပင့်သွားရသည်။ ဤမင်းသမီးလေးမှာ ဤမျှအထိ အဆက်အသွယ်ကောင်းများ ရှိနေခဲ့သည်လား၊ ဤမျှ အဆက်အသွယ် ရှိပါလျက်နှင့် အဘယ်ကြောင့် ယနေ့အထိ နာမည်မကြီးသေးရသနည်း။</p> <p>"ဒေတာတွေအတွက် စိတ်မပူနဲ့၊ ဒီညပဲ ကြော်ငြာဗီဒီယိုကို ထုတ်လိုက်တော့"</p> <p>*<br /> 【အရှင်... ယွမ်ရှီးက အရှင်မအပေါ် စိတ်ဝင်စားနေတာ (ခံစားချက် ရှိနေတာ) လားဟင်】</p> <p>တန်ယန်သည် ရေသောက်နေစဉ် ယိတျန်တျန်၏ မေးခွန်းကြောင့် ရေပင် သီးသွားတော့မတတ် ဖြစ်သွားရသည်။</p> <p>"နင်က 'စိတ်ဝင်စားတယ်' ဆိုတဲ့ အဓိပ္ပာယ်ကို သိလို့လား"</p> <p>【သိတာပေါ့】</p> <p>ယိတျန်တျန်က မာန်လေးဝင့်ကာ ခေါင်းကိုမော့လိုက်သည်။ </p> <p>【သူက အရှင့်ကို တစ်ဖက်သတ် ကြိုက်နေတာ၊ ဒါပေမဲ့ အရှင်က သူ့ကို ပြန်လည်း မတုံ့ပြန်သလို ငြင်းလည်း မငြင်းဘူးလေ အရှင်၊ အရှင်က လူတကာကို ကစားတတ်တဲ့ မိန်းကလေးလား】</p> <p>တန်ယန်သည် ခွေးတစ်ကောင်၏ မျက်လုံးထဲတွင် 'တုန်လှုပ်သွားသော အမူအရာ' ကို မြင်လိုက်ရသည်။ ဤအကြောင်းကို တစ်ယောက်ယောက်အား ပြန်ပြောပြလျှင် မည်သူက ယုံပါမည်နည်း။</p> <p>သူမသည် ယိတျန်တျန်၏ခေါင်းကို အသာအယာ ပုတ်လိုက်ပြီး ခြိမ်းခြောက်လိုက်သည်။</p> <p>"【ဒီနေ့အတွက် နင့်ရဲ့ နွားနို့သား စတိတ်ကို မစားချင်တော့ဘူး ထင်တယ်၊ ဟုတ်လား】"</p> <p>【အရှင်...အပြစ်ရှိသလို ခံစားနေရပြီမလား】</p> <p>တန်ယန်: "...ငါကဘာလို့ အပြစ်ရှိသလို ခံစားရမှာလဲဟ ဒါနဲ့ ငါနဲ့ယွမ်ရှီးလား၊ ဒါက ဘယ်လိုမျိုး ထူးဆန်းတဲ့ အတွဲကြီးလဲ တို့တွေက အဲဒီလောက်တောင် ရင်းနှီးတာမှ မဟုတ်တာ၊ ဟုတ်တယ်မလား ဒါပေမဲ့ ယွမ်ရှီးကလည်း တကယ်ကို တက်ကြွလွန်းနေတာပဲ၊ မဟုတ်ဘူးလား ဒါနဲ့ဆို ဒါက ဒုတိယအကြိမ်ရှိပြီ"</p> <p>ဤသို့ တွေးမိပြီးနောက် တန်ယန်သည် သူမ၏ နောက်ကျောဘက်မှ ဖုန်းကိုထုတ်လိုက်ကာ ယွမ်ရှီး၏ လိုင်းမက်ဆေ့ ပေးပို့သည့်နေရာကို ရှာလိုက်သည်။</p> <p>တန်ယန်: "ကြော်ငြာပေးတာ ကူညီပေးတဲ့အတွက် ကျေးဇူးတင်ပါတယ်နော်【ချစ်စရာကြောင်ပုံလေး】ဒါပေမဲ့ နောက်တစ်ခါကျရင် ဒီလောက်အထိ အပင်ပန်းခံဖို့ မလိုပါဘူး အမြဲတမ်း အားနာစရာကြီး ဖြစ်နေလို့ပါ အစ်ကို S မြို့တော်ကို လာဖြစ်တဲ့အခါကျရင် ညီမလေး ထမင်းကျွေးပါ့မယ်"</p> <p>ယွမ်ရှီး: "မပင်ပန်းပါဘူး၊ ရပါတယ် ဘယ်တော့လဲ ဘယ်မှာစားကြမလဲ"</p> <p> </p> <p style="text-align: center;">***</p>


Save