Book List

<h2 style="text-align: center;">အခန်း (၇၂၂) - အလကားနေရင်း ကျည်ဆန်မှန်ခြင်း</h2> <h2 style="text-align: center;">*</h2> <p style="text-align:justify">ယဲ့ပုဖန်က "အဲဒီနောက်တော့ရော..." ဟု ဆက်မေးလိုက်သည်။</p> <p style="text-align:justify">"အဲဒီနောက်တော့ သခင်ကြီးစီတုက ဝမ်းသာအားရ ဖြစ်သွားတာပေါ့။ သူ့မှာ သားသမီးတွေ ရှိလာလိမ့်မယ်လို့ တစ်ခါမှ မမျှော်လင့်ထားခဲ့ဘူးလေ။ သားတစ်ယောက် ရလာရုံတင်မကဘဲ လှပပြီး ချစ်စရာကောင်းတဲ့ မြေးမလေးတစ်ယောက်ပါ ရလိုက်တာ"</p> <p style="text-align:justify">ထိုအချိန်မှစ၍ စီတုတျန့်မော့သည် သခင်ကြီးစီတု၏ အသည်းကျော် ဖြစ်လာခဲ့သည်။ သူမက ကြယ်ကို လိုချင်သည်ဆိုလျှင်ပင် သခင်ကြီးက လကိုပါ ပေးမည့်သူမျိုး ဖြစ်ပေသည်။</p> <p style="text-align:justify">သိုင်းလောကတွင် အသက်တစ်ဆယ်အရွယ်မှ စတင်သင်ယူခြင်းက နောက်ကျသည်ဟု ဆိုနိုင်သော်ငြား စီတုတျန့်မော့မှာ သိုင်းပညာ၌ ထူးကဲသော ပါရမီရှိသူ ဖြစ်သည်။ သခင်ကြီးစီတု၏ သင်ကြားပြသမှု အောက်တွင် သူမသည် အသက် တစ်ဆယ့်ရှစ်နှစ်အရွယ်၌ပင် ကောင်းကင်အဆင့် အထွတ်အထိပ်သို့ ရောက်ရှိခဲ့လေသည်။</p> <p style="text-align:justify">ယဲ့ပုဖန်က "ဒါပေမဲ့ အဲဒီကောင်မလေးက ငါ့ကို ဘာလို့ ပြဿနာရှာချင်နေရတာလဲ။ ငါ သူ့ကို ဘာမှ မလုပ်ဖူးပါဘူး... ငါ သူ့အဘိုးရဲ့ မျိုးပွားအင်္ဂါကို ကန်ခဲ့တာကို သူ သိသွားလို့လား" ဟု မေးလိုက်သည်။</p> <p style="text-align:justify">"ဘာတွေ လျှောက်ပြောနေတာလဲ... သခင်ကြီးစီတုက အဲဒီကိစ္စကို ဘယ်သူ့ကိုမှ ပြောမှာ မဟုတ်ဘူး။ သူ့မြေးမလေးကိုဆို ပိုတောင် မပြောမှာပေါ့"</p> <p style="text-align:justify">စီမာဝေက "စီတုတျန့်မော့က သိုင်းပါရမီ ထူးကဲလွန်းတော့ အမြဲတမ်း မာနကြီးတယ်။ တခြားသူတွေကိုလည်း သိပ်ဂရုစိုက်လေ့ မရှိဘူး" ဟု ဆိုကာ...</p> <p style="text-align:justify">"အခု နင်က သူ့ရဲ့ အသင်းခေါင်းဆောင် ဖြစ်လာတာလေ။ ပြီးတော့ သခင်ကြီးစီတုကလည်း နင့်ကို အမြဲတမ်း ချီးကျူးနေတော့ အဲဒီကောင်မလေးက မနာလိုဖြစ်ပြီး နင့်ကို ယှဉ်ပြိုင်ဖို့ စိန်ခေါ်ချင်နေတာပေါ့"</p> <p style="text-align:justify">ယဲ့ပုဖန်က ထိုကောင်မလေးကို အလေးမထားဟန်ဖြင့် "ဒါနဲ့ နောက်တစ်ယောက်က ဘယ်သူလဲ" ဟု မေးလိုက်သည်။</p> <p style="text-align:justify">"ချင်လုံအသင်းရဲ့ ခေါင်းဆောင် မူရုန်ဖိန်ပဲ။ သူက မြို့တော်က မူရုန်မိသားစုရဲ့ သခင်လေး ဖြစ်တယ်။ စီတုတျန့်မော့က နင့်ကို ပြဿနာအသေးအမွှားလေးတွေပဲ ရှာမှာဆိုရင်... မူရုန်ဖိန်ကတော့ နင့်ကို ဒုက္ခအကြီးအကျယ် ပေးမယ့်သူပဲ"</p> <p style="text-align:justify">ယဲ့ပုဖန် အံ့အားသင့်သွားပြီး "ဘာလို့လဲ... ငါ သူ့ကို ဘာလုပ်မိလို့လဲ။ သူ့ကို မြင်တောင် မမြင်ဖူးဘူး။ သူ့မိန်းမကိုလည်း ငါ မခိုးယူဖူးပါဘူး... အဲဒီလောက်ထိ လုပ်ဖို့ လိုလို့လား"</p> <p style="text-align:justify">စီမာဝေက အဓိပ္ပာယ်ပါပါ ပြုံးလိုက်ရင်း "နင် ခိုးယူခဲ့တာပေါ့... နင့်လက်ထဲမှာ သူ့မိန်းမ ပါနေပြီလေ"</p> <p style="text-align:justify">"ဘာတွေ လျှောက်ပြောနေတာလဲ... ငါ ဘယ်တုန်းက..." </p> <p style="text-align:justify">ယဲ့ပုဖန် စကားပြောရင်း တစ်စုံတစ်ခုကို ရုတ်တရက် သတိပြုမိသွားကာ "မင်း ပြောချင်တာက... မူရုန်ဖိန်က မင်းကို ကြိုက်နေတာလား"</p> <p style="text-align:justify">"တော်လိုက်တာ... ဒါကတော့ နင့်အတွက် ဆုလာဘ်ပေါ့"</p> <p style="text-align:justify">စီမာဝေက ယဲ့ပုဖန်၏ ပါးကို ရွှတ်ခနဲ နမ်းလိုက်ပြီးနောက် "မြို့တော်က အထက်တန်းလွှာတွေကြားမှာ မူရုန်ဖိန်က ငါ့နောက်ကို လိုက်နေတယ်ဆိုတာ အားလုံး သိကြတယ်။ အခု သူက ငါနဲ့ နင်နဲ့ တွဲနေတယ်ဆိုတာ သိသွားတော့ နင့်ကို မုန်းနေတာပေါ့" ဟု ရှင်းပြလေသည်။</p> <p style="text-align:justify">ယဲ့ပုဖန်က လက်နှစ်ဖက်ကို ဘေးသို့ ဖြန့်လိုက်ကာ အားကိုးရာမဲ့သည့် အမူအရာဖြင့် "ဒါဆို ငါက မတော်တဆ ကြားညှပ်ပြီး ခံရတာပေါ့ ဟုတ်လား"</p> <p style="text-align:justify">စီမာဝေက တခိခိ ရယ်မောလိုက်ပြီး "အဲဒါကို လှဲနေရင်း ကျည်ဆန်မှန်တယ် လို့ ခေါ်တာပေါ့။ ငါ့ဘေးနားမှာ နင် ရှိနေတော့ သူတပါးရဲ့ အမုန်းတွေကို အလကားနေရင်း ဆွဲဆောင်လိုက်သလို ဖြစ်သွားတာလေ"</p> <p style="text-align:justify">ခဏမျှ နောက်ပြောင်ပြီးနောက် သူမက လေးနက်သောလေသံဖြင့် "ဘာပဲဖြစ်ဖြစ်... ဒီဒုနည်းပြတွေအားလုံးက ရွှမ်ယွမ်စံအိမ်ရဲ့ ထိပ်သီး သိုင်းသမားတွေချည်းပဲ။ ရှင်ကသာ..."</p> <p style="text-align:justify">သူမက စကားကို ခေတ္တရပ်ကာ "ရှင်ကသာ အစွမ်းအစအစစ်အမှန်ကို မပြနိုင်ဘူးဆိုရင် သူတို့ကို ထိန်းချုပ်နိုင်ဖို့ မလွယ်ဘူးနော်"</p> <p style="text-align:justify">ယဲ့ပုဖန်က အေးအေးဆေးဆေးပင် "စိတ်မပူပါနဲ့... ငါ့ကို လာစိန်ခေါ်ဖို့ဆိုရင် သူတို့တွေက အဆင့်နိမ့်လွန်းပါသေးတယ်" ဟု ပြန်ပြောလိုက်သည်။</p> <p style="text-align:justify">"ဒါကတော့ အထက်က ချမှတ်ထားတဲ့ အသေးစိတ် လေ့ကျင့်ရေး အစီအစဉ်ပဲ။ တစ်ချက်လောက် ကြည့်လိုက်ဦး"</p> <p style="text-align:justify">စီမာဝေက စာရွက်စာတမ်း အထပ်လိုက်ကို ကမ်းပေးလိုက်ရာ ယဲ့ပုဖန်က ယူ၍ ဖတ်ကြည့်လိုက်သည်။ ထိုအခါမှ လေ့ကျင့်ရေး စီမံကိန်း၏ အနှစ်သာရကို သူ နားလည်သွားတော့၏။</p> <p style="text-align:justify">ရွှမ်ယွမ်စံအိမ်သည် လူသစ် ၁၀၀ ကို အဖွဲ့လေးဖွဲ့ ခွဲထားသည်။ ချင်လုံအသင်းက ရှေးဟောင်း နည်းစနစ်များကို အသုံးပြု၍ အဖွဲ့ဝင်များကို လေ့ကျင့်ပေးမည်ဖြစ်ပြီး ပိုင်ဟုအသင်းကမူ ခေတ်မီနည်းပညာဖြင့် ထုတ်လုပ်ထားသော ဇီဝဓာတုဆေးဝါးများကို အသုံးပြုကာ လူသားတို့၏ အလားအလာကို လှုံ့ဆော်ပေးမည် ဖြစ်သည်။</p> <p style="text-align:justify">ရွှမ်ဝူအသင်းကမူ အမေရိကန်၏ X-တပ်ဖွဲ့ကဲ့သို့ပင် ခေတ်မီနည်းပညာသုံး စက်ကိရိယာများဖြင့် ခန္ဓာကိုယ် လုပ်ဆောင်ချက်များကို ပြုပြင်ပြောင်းလဲကာ တိုက်ခိုက်ရေးစွမ်းအား မြှင့်တင်မည် ဖြစ်သည်။</p> <p style="text-align:justify">နောက်ဆုံးတွင် ကျူးချွဲအသင်းမှာမူ တရုတ်တိုင်းရင်းဆေးပညာကို အသုံးပြုကာ အဖွဲ့ဝင်များ၏ ကျင့်ကြံမှုကို မြှင့်တင်ပေးရမည် ဖြစ်သည်။</p> <p style="text-align:justify">တစ်ပတ်အကြာတွင် ထိုအဖွဲ့လေးဖွဲ့ကို ပြိုင်ပွဲဝင်စေမည်ဖြစ်ပြီး မည်သည့်အဖွဲ့က အလျင်မြန်ဆုံးနှင့် အထိရောက်ဆုံး တိုးတက်လာသည်ကို အကဲဖြတ်မည် ဖြစ်သည်။ ရွှမ်ယွမ်စံအိမ်သည် ဤလေ့ကျင့်ရေးမှတစ်ဆင့် တရုတ်နိုင်ငံနှင့် အကိုက်ညီဆုံးသော နည်းလမ်းကို ရှာဖွေလိုခြင်း ဖြစ်ပေသည်။</p> <p style="text-align:justify">အချက်အလက်များကို ဖတ်ပြီးနောက် ယဲ့ပုဖန်က မျက်မှောင်ကြုတ်ကာ "ကျန်တဲ့အဖွဲ့တွေက ပြဿနာမရှိပါဘူး... ဒါပေမဲ့ ရွှမ်ဝူအသင်းက စက်ပစ္စည်းတွေနဲ့ လူသားခန္ဓာကိုယ်ကို ပြုပြင် ပြောင်းလဲတာက သင့်တော်ရဲ့လား" ဟု မေးလိုက်သည်။</p> <p style="text-align:justify">"စိတ်မပူပါနဲ့... ငါတို့ တရုတ်လူမျိုးတွေက သဘာဝနဲ့ လူသားဆန်မှုကို ဆန့်ကျင်တဲ့အလုပ်တွေကို မလုပ်ပါဘူး"</p> <p style="text-align:justify">စီမာဝေက "နင်က ရွှမ်ဝူအသင်းရဲ့ အခြေအနေကို သိပ်မသိသေးလို့ပါ။ အဲဒီအသင်းက လူသစ်တွေ အားလုံးက တရုတ်နိုင်ငံအတွက် တိုက်ပွဲဝင်ရင်း ဒဏ်ရာရခဲ့ကြတဲ့ စစ်သည်တော်တွေချည်းပဲ။ သူတို့အားလုံးက ခန္ဓာကိုယ်မှာ မသန်စွမ်းမှု တစ်မျိုးမျိုး ရှိနေကြတဲ့သူတွေလေ"</p> <p style="text-align:justify">"သူတို့အတွက် စက်ပိုင်းဆိုင်ရာ ပြုပြင်မှုတွေ လုပ်ပေးတာက အကျိုးပဲ ရှိစေမှာပါ။ ပြီးတော့ အားလုံးကလည်း တရုတ်နိုင်ငံအတွက် ဆက်လက် အလုပ်အကျွေးပြုချင်တယ်လို့ ကိုယ့်သဘောနဲ့ကိုယ် ဆန္ဒပြုထားကြတာ"</p> <p style="text-align:justify">ယဲ့ပုဖန်က ခေါင်းညိတ်လိုက်ကာ "ဒါဆိုရင်တော့ ပြဿနာ မရှိပါဘူး" ဟု ဆိုလိုက်သည်။</p> <p style="text-align:justify">ဆိုင်းငံ့တောင်တန်း လေ့ကျင့်ရေးစခန်းမှာ တောင်တန်းများစွာဖြင့် ဝိုင်းရံထားသဖြင့် အပြင်ဘက်မှ ကြည့်လျှင် အုံ့ဆိုင်းနေသော်ငြား အလယ်ဗဟို၌ ၁၀ စတုရန်းကီလိုမီတာခန့် ကျယ်ဝန်းသော မြေကွက်လပ်ကြီး ရှိသဖြင့် လေ့ကျင့်ရေးအတွက် အလွန်ပင် သင့်တော်လှပေသည်။</p> <p style="text-align:justify">လေ့ကျင့်ရေးကွင်းပြင်တွင် ကောင်းကင်စစ်သည်တော် စီမံကိန်း၏ လူသစ် ၁၀၀ သည် ချင်လုံ၊ ပိုင်ဟု၊ ကျူးချွဲနှင့် ရွှမ်ဝူ ဟူ၍ အတန်းလေးတန်း စီတန်းကာ နည်းပြချုပ်၏ အလာကို စောင့်ဆိုင်းနေကြသည်။</p> <p style="text-align:justify">လူစုလူဝေး၏ အလယ်ဗဟိုတွင် အသင်းများကို ဦးဆောင်ရမည့် ဒုနည်းပြချုပ်များ စုဝေးနေကြ၏။ ကျူးချွဲအသင်း၏ နည်းပြချုပ် မရောက်သေးသဖြင့် စီတုတျန့်မော့က ယာယီ တာဝန်ယူထားသည်။</p> <p style="text-align:justify">"နည်းပြချုပ်ကြီး လာနေပြီတဲ့... သူက ဘယ်လို သိုင်းပညာရှင်မျိုးလဲ။ ရုပ်ရည်ကရော ဘယ်လိုရှိမလဲ မသိဘူးနော်"</p> <p style="text-align:justify">စကားပြောသူမှာ အရပ် ၁.၉ မီတာကျော် မြင့်မားကာ ကြွက်သားအမြောင်းမြောင်းဖြင့် ကြမ်းတမ်းသော ရုပ်ရည်ရှိသည့် လူသန်ကြီးတစ်ဦး ဖြစ်သည်။ သူက တရုတ်ရိုးရာ သိုင်းဆရာကြီး၏သား လိုင်ဖော်ကျွင်းပင် ဖြစ်၏။</p> <p style="text-align:justify">သူ၏ အမူအရာမှာ သူ၏ ရုပ်ရည်ကဲ့သို့ပင် အလွန်ပင် ခက်ထန်ကြမ်းတမ်းလှသည်။ သူ စကားပြောလိုက်တိုင်းတွင် အသံမှာ ဟိန်းထွက်နေသဖြင့် အသံချဲ့စက် မပါဘဲနှင့်ပင် ကွင်းပြင် တစ်ခုလုံးရှိ လူတိုင်းက ရှင်းလင်းစွာ ကြားနေရသည်။</p> <p style="text-align:justify">သူ့တစ်ဖက်တွင် ရှိနေသူမှာ ချင်လုံအသင်းခေါင်းဆောင် မူရုန်ဖိန် ဖြစ်သည်။ သူက အသားဖြူဖြူဖြင့် ပညာတတ် တစ်ဦးနှင့် တူသော်လည်း သူ့ထံမှ ထွက်ပေါ်နေသော စွမ်းအားအရှိန်အဝါမှာမူ လျှော့တွက်၍ မရနိုင်ပေ။</p> <p style="text-align:justify">"ညီအစ်ကိုလိုင်... ခင်ဗျား မှားနေပြီ။ ကျုပ် သိထားသလောက်ဆိုရင် လာမယ့်သူက ဘယ်ဂိုဏ်း၊ ဘယ်အဖွဲ့ကမှ မဟုတ်ဘူး။ သာမန် ဆရာဝန်လေးတစ်ယောက်ပဲ"</p> <p style="text-align:justify">သူသည် စီမာဝေကို လိုက်နေသူဖြစ်သဖြင့် သူမ၏ သတင်းများကို အမြဲစုံစမ်းနေလေ့ရှိရာ ယဲ့ပုဖန် အကြောင်းကိုလည်း သိရှိထားခြင်း ဖြစ်သည်။</p> <p style="text-align:justify">"ဆရာဝန်... ဒါ ဘယ်လိုဖြစ်နိုင်မှာလဲ"</p> <p style="text-align:justify">လိုင်ဖော်ကျွင်း၏ မျက်လုံးများမှာ ပြူးကျယ်သွားတော့သည်။ သူက "ဆရာဝန်တစ်ယောက်က ငါတို့ကို ဘယ်လို ဦးဆောင်မှာလဲ... ငါတို့က ကောင်းကင်စစ်သည်တော် စီမံကိန်းရဲ့ အဖွဲ့ဝင်တွေလေ။ ဒါက နောက်ပြောင်နေတာလား"</p> <p style="text-align:justify">ထို့နောက် သူက ဘေးရှိ အမျိုးသမီးကို ကြည့်ကာ "ညီမလေး... နည်းပြချုပ်က ဓားသူတော်စင်ကြီး ကိုယ်တိုင် ထောက်ခံထားတဲ့သူလို့ ကြားတယ်။ သူက ဘယ်လိုလူလဲဆိုတာ ငါတို့ကို ပြောပြပါဦး" ဟု မေးလိုက်သည်။</p> <p style="text-align:justify">ထိုစကားကြောင့် လူတိုင်း၏ အကြည့်မှာ ဘေးရှိ အမျိုးသမီးထံသို့ ရောက်သွားကြတော့၏။</p> <p style="text-align:justify">စီတုတျန့်မော့သည် အလွန်ပင် လှပသူဖြစ်ကြောင်း ငြင်းပယ်၍ မရပေ။ သူမ၏ ရုပ်ရည်မှာ ထင်ပေါ် လှပရုံတင်မကဘဲ ခန္ဓာကိုယ်အချိုးအစားမှာလည်း အလွန်ပင် ဆွဲဆောင်မှု ရှိလှသည်။ ပွပွယောင်းယောင်း စစ်ဝတ်စုံကို ဝတ်ထားသော်လည်း သူမ၏ လှပသော ကိုယ်လုံးကိုယ်ပေါက်ကို ဖုံးအုပ်ထားနိုင်ခြင်း မရှိပေ။</p> <p style="text-align:justify">သို့သော် သူမထံတွင် မိန်းကလေးဆန်သော နူးညံ့မှုမျိုး မရှိဘဲ နားရွက်အထိ တိုနေအောင် ညှပ်ထားသော ဆံပင်တိုလေးကြောင့် ပို၍ပင် တက်ကြွလန်းဆန်းသော အသွင်ကို ဆောင်နေသည်။</p> <p style="text-align:justify">သူမက "အစ်ကိုမူရုန် ပြောတာ မှန်ပါတယ်။ ကျွန်မတို့ရဲ့ နည်းပြချုပ်က ယဲ့ပုဖန်တဲ့... သူက တကယ်ပဲ ဆရာဝန်တစ်ယောက်ဖြစ်ပြီး အသက်က ၂၁ နှစ်ပဲ ရှိသေးတယ်" ဟု ပြောလိုက်၏။</p> <p style="text-align:justify">သူမ ပြောလိုက်သော လေသံတွင် မကျေနပ်မှုအချို့ ပါဝင်နေပေသည်။</p> <p style="text-align:justify">အိမ်တွင် ရှိစဉ်က သူမ၏အဘိုးဖြစ်သူသည် ယဲ့ပုဖန်က မည်မျှထူးချွန်ကြောင်း၊ သူမအနေဖြင့် မာန မကြီးဘဲ သူ့ထံမှ သင်ယူသင့်ကြောင်း နေ့စဉ်နှင့်အမျှ ပြောဆိုနေခဲ့သဖြင့် သူမအနေဖြင့် ပို၍ပင် စိတ်တိုနေခဲ့ခြင်း ဖြစ်သည်။</p> <p style="text-align:justify">သူမသည် အသက်တစ်ဆယ်အရွယ်မှ သိုင်းပညာကို စတင်သင်ယူခဲ့သည်ဆိုသော်လည်း ဓားသူတော်စင်၏ မြေးမလေးဖြစ်သဖြင့် အဘိုးဖြစ်သူထံမှ ထူးကဲသော သိုင်းပါရမီကို အမွေရရှိထားသည်။</p> <p style="text-align:justify">ဆယ်နှစ်အတွင်းမှာပင် သူမသည် ကောင်းကင်အဆင့် အထွတ်အထိပ်သို့ ရောက်ရှိခဲ့ပြီး မြေကမ္ဘာ အဆင့်သို့ ရောက်ရှိရန် လက်တစ်ကမ်းအကွာ၌သာ ရှိတော့သည်။ ထိုသို့သော ပါရမီမျိုးမှာ မည်သည့်နေရာတွင်မဆို မနာလိုစရာကောင်းလှသဖြင့် သူမ မာနကြီးနေသည်မှာလည်း အံ့သြစရာ မဟုတ်ပေ။</p> <p style="text-align:justify">"ဘာတွေ ဖြစ်ကုန်တာလဲ... သူတို့က ၂၁ နှစ်အရွယ် ကလေးတစ်ယောက်ကို ငါတို့ရဲ့ နည်းပြချုပ်အဖြစ် ခန့်လိုက်တယ်ပေါ့။ ပြီးတော့ သူက ဆရာဝန် တစ်ယောက်ပဲ ရှိသေးတယ် ဟုတ်လား။ ဓားသူတော်စင်ကြီးများ စိတ်ဖောက်ပြန်သွားတာလား"</p> <p style="text-align:justify">လိုင်ဖော်ကျွင်းမှာ ပွင့်လင်းလွန်းသူဖြစ်သဖြင့် ပြောပြီးမှ သူ မှားသွားကြောင်း သတိရသွားကာ စီတုတျန့်မော့ကို ကြည့်၍ "ညီမလေး... ငါက အဲဒီဆရာဝန်လေးကိုပဲ ပြောတာပါ။ ဒါကို ဓားသူတော်စင်ကြီးကို သွားမပြောပါနဲ့ဦး" ဟု အမြန်ပင် တောင်းပန်လိုက်တော့သည်။</p> <p style="text-align: center;">***</p>


Save