Book List

<h2 style="text-align: center;">ရော်နယ်ဒိုလက်သစ် ကျွန်တော်</h2> <h2 style="text-align: center;">အခန်း (၃၈၁)</h2> <h2 style="text-align: center;">*</h2> <p style="text-align:justify"> </p> <p style="text-align:justify">"အက်ဖ်အေက သတင်းထွက်လာပြီဗျ... လာပေါ့တ် တစ်ယောက် အရွတ်စုတ်ပြဲဒဏ်ရာ ရသွားတဲ့အတွက် ဒီရာသီ တစ်ခုလုံး နားရတော့မှာ သေချာသလောက် ရှိသွားပါပြီ..."</p> <p style="text-align:justify">"ကျွန်တော်လည်း ကစားသမားဘဝမှာ ကွင်းထဲကနေ ဒဏ်ရာနဲ့ ထွက်သွားရတဲ့ ခံစားချက်ကို ကိုယ်ချင်းစာဖူးပါတယ်... သူ မြန်မြန် ပြန်ကောင်းလာဖို့ပဲ ဆုတောင်းပေးပါတယ်..."</p> <p style="text-align:justify">"ကဲ... ကျွန်တော်တို့ ပွဲဘက်ကို ပြန်လှည့်ကြရအောင်ဗျာ... ချူဖုန်းရဲ့ ပြောင်မြောက်လှတဲ့ သွင်းဂိုးနဲ့အတူ မန်ချက်စတာ ယူနိုက်တက်က မန်ချက်စတာစီးတီးကို (၂-၁) ဆိုတဲ့ ရလဒ်နဲ့ ယာယီ ဦးဆောင်ထားနိုင်ပါပြီ..."</p> <p style="text-align:justify">ဂယ်ရီနဗီးလ်က ပွဲအခြေအနေကို အတိုချုံး သုံးသပ်လိုက်လေသည်။</p> <p style="text-align:justify">သူသည်လည်း တစ်ချိန်က နည်းပြချုပ်အဖြစ် တာဝန်ယူခဲ့ဖူးသူဖြစ်ရာ အခြေခံ နည်းစနစ်ပိုင်း အမြင်တော့ ရှိပေသည်။ ပထမပိုင်းတွင် မန်ယူအသင်း၏ တရစပ် ဖိအားပေး ကစားဟန်သည် ထင်သလောက် ခရီးမရောက်ခဲ့ပါက ဒုတိယပိုင်းတွင် အသေအချာကို ရုန်းကန်ရတော့မည် ဆိုတာ သူ ကောင်းကောင်း သဘောပေါက်ထား၏။</p> <p style="text-align:justify">ကံကောင်းထောက်မစွာဖြင့် အခြေအနေများက ကောင်းမွန်သော လမ်းကြောင်းပေါ်တွင် ရှိနေဆဲပင်။</p> <p style="text-align:justify">ကွင်းအတွင်း၌မူ...</p> <p style="text-align:justify">ချူဖုန်း တစ်ယောက် ကွင်းဘေးသို့ လျှောက်လာရင်း အမောတကော အသက်ရှူနေရသည်။ သူ အတော်လေး ပင်ပန်းနွမ်းနယ်နေချေပြီ။</p> <p style="text-align:justify">မန်ယူအသင်း၏ ကစားကွက်ထဲတွင် သူသည် ကွင်းလယ် ဖန်တီးရှင်အဖြစ် တာဝန်ယူရုံသာမက အသင်းတစ်ခုလုံးတွင် ပြေးအားအများဆုံး ကစားသမားလည်း ဖြစ်နေသည် မဟုတ်ပါလား။</p> <p style="text-align:justify">ဒီလောက် ပြေးနေရမှတော့ ဘယ်လိုလုပ် မပင်ပန်းဘဲ နေမည်နည်း။</p> <p style="text-align:justify">သို့သော်လည်း ကွင်းထဲတွင် သူ၏ တိုးတက်မှုက မြန်ဆန်လှသည်။ ဖာမီနို၏ ကစားကွက် ဗီဒီယိုများကို အချိန်ကုန်ခံ ကြည့်ခဲ့ရကျိုး နပ်သည်ဟု ဆိုရမည်။</p> <p style="text-align:justify">"ဘော့စ်... မန်စီးတီးဘက်က ကစားကွက် ပြောင်းလာတာ သတိထားမိတယ်... ကွင်းလယ်ကနေ ဘယ်ညာ အဝေးဘောတွေ ဆက်တိုက် ပေးပြီး ကျွန်တော်တို့ရဲ့ ကွင်းလယ်ခံစစ်လူ သုံးယောက်ကို ဆွဲထုတ်နေတယ်... အဲဒီတော့ တောင်ပံတွေမှာ ဟာကွက်တွေ ပေါ်လာတော့တာပဲ..."</p> <p style="text-align:justify">ချူဖုန်းက မော်ရင်ညိုဘေးမှ ယှဉ်လျှောက်လာရင်း စိုးရိမ်တကြီး ပြောလိုက်သည်။</p> <p style="text-align:justify">မော်ရင်ညိုက ခေါင်းညိတ်ပြလိုက်သည်။ ဤအချက်ကို ချူဖုန်းထက်ပင် သူ အရင်သတိထားမိပြီးသား ဖြစ်၏။ "4-3-1-2 ကစားကွက်ရဲ့ မွေးရာပါ အားနည်းချက်ကို ပပ်က အသေအချာကို အသုံးချလာမှာပဲ... ဒါပေမဲ့ ဖြေရှင်းလို့ မရတဲ့ ပြဿနာတော့ မဟုတ်ပါဘူး..."</p> <p style="text-align:justify">အဝတ်လဲခန်းထဲသို့ ရောက်သည်နှင့် မော်ရင်ညိုက ပရိုဂျက်တာကို ဖွင့်လိုက်လေသည်။</p> <p style="text-align:justify">ထို့နောက် ကွင်းလယ်တိုက်စစ် နေရာကို လက်ညှိုးထိုးပြကာ ဆိုလိုက်၏။ "ငါတို့ ခံစစ်ကြောင်းကို တည်ဆောက်တဲ့အခါ တိုက်စစ်တန်းကနေ စတင်ရမယ်... ဒါပေမဲ့ အရေးအကြီးဆုံး အစိတ်အပိုင်းက တိုက်စစ်တန်း မဟုတ်ဘူး... ကွင်းလယ်ခံစစ် နေရာတွေလည်း မဟုတ်ဘူး... ကွင်းလယ်တိုက်စစ် နေရာပဲ"</p> <p style="text-align:justify">"ပေါလ်... မင်း နေရာယူပုံကို အမြဲတမ်း ပြောင်းလဲနေဖို့ လိုတယ်... အခြေအနေကို အကဲခတ်ပြီး မန်စီးတီးရဲ့ ပေးပို့မှု လမ်းကြောင်းတွေကို ကြားဖြတ် ဖြတ်တောက်ရမယ်..."</p> <p style="text-align:justify">ပေါ့ဘာ ဆိုသည်မှာ အပြေးအလွှား ကစားရသည်ကို မနှစ်သက်ဆုံး သူမှန်း လူတိုင်း သိကြသည်။</p> <p style="text-align:justify">ယခု ရာသီ ပရီးမီးယားလိဂ် ကွင်းလယ်လူ (၇၉) ယောက်ထဲတွင် ပေါ့ဘာ၏ ပြေးအားက အဆင့် (၁၆) နေရာ၌ ရှိနေသည်။</p> <p style="text-align:justify">ကိန်းဂဏန်း အချက်အလက်များအရ ကြည့်လျှင် မဆိုးလှဟု ထင်ရသော်လည်း အမှန်တကယ် အရေးကြီးသည်မှာ အရှိန်တင် ပြေးလွှားရသော အကွာအဝေးသာဖြစ်ပြီး သာမန် ခြေလှမ်းဖြင့် ပြေးသော အကွာအဝေး မဟုတ်ပေ။ ပေါ့ဘာ ပြေးခဲ့သော အကွာအဝေး၏ ၆၄ ရာခိုင်နှုန်းက သာမန်အရှိန်ဖြင့် ပြေးထားခြင်း ဖြစ်ရာ ဤအချက်က သူသည် ပြေးရခြင်းကို မနှစ်သက်သူ ဖြစ်ကြောင်း သိသာစေလေသည်။</p> <p style="text-align:justify">သို့သော် တစ်ဖက်၌ ယခုခေတ်တွင် ကစားသမားများသည် အချိန်ပြည့်နီးပါး အရှိန်တင်၍ ပြေးရတတ်၏။ ဤသည်ကပင် ခေတ်သစ် ဘောလုံးလောက၏ အနှစ်သာရ ဖြစ်ပေသည်။</p> <p style="text-align:justify">အသင်းတစ်သင်းလုံး တက်ညီလက်ညီ ကစားခြင်း…</p> <p style="text-align:justify">ကစားသမားတိုင်း စက်ရုပ်တစ်ရုပ်လို အမြဲတမ်း ပြေးလွှားလှုပ်ရှားနေရန် လိုအပ်သည်။ အထူးသဖြင့် မန်ယူအသင်း အသုံးပြုနေသော ဖိအားပေး ကစားကွက်တွင် ပို၍ပင် အရေးကြီးလှ၏။</p> <p style="text-align:justify">ကစားသမားအားလုံး စည်းလုံး ညီညွတ်စွာဖြင့် တစ်ပြိုင်နက်တည်း ဖိအားပေးရမည် ဖြစ်သည်။ နောက်ကွယ်တွင် ခိုကပ်နေ၍ လုံးဝ မရပေ။</p> <p style="text-align:justify">အဘယ်ကြောင့်ဆိုသော် ဖိအားပေး ကစားရာတွင် ကွင်းဆက် တစ်နေရာလေး လျော့ရဲသွားသည်နှင့် ပြိုင်ဘက်က ထိုဟာကွက်ကို အသုံးချပြီး ဖောက်ထွက်သွားနိုင်သောကြောင့်ပင်။</p> <p style="text-align:justify">"မင်းရဲ့ အရည်အချင်းနဲ့ဆိုရင် ဒါက ပြဿနာ မရှိပါဘူးလို့ ငါ ယုံကြည်တယ်... မကြာသေးခင်က မင်းရဲ့ ပြေးအား ဒေတာတွေလည်း တက်လာတာပဲ..."</p> <p style="text-align:justify">မော်ရင်ညိုက အပြစ်တင်မည့်အစား ချီးမွမ်းစကားကို အရင်ဆိုလိုက်သည်။</p> <p style="text-align:justify">ပေါ့ဘာတွင် ကလေးဆန်သော အကျင့်စရိုက် ရှိသည်ကို သူ ကောင်းကောင်းသိသည်။ အတင်းအကျပ် ဖိအားပေးလျှင် ဆန့်ကျင်ဘက် အကျိုးသက်ရောက်မှုသာ ဖြစ်လာမည် မဟုတ်ပါလား။</p> <p style="text-align:justify">ပေါ့ဘာက နည်းစနစ် သင်ပုန်းကို တစ်ချက် ကြည့်လိုက်ပြီး "ဘော့စ်... ဒုတိယပိုင်းကျရင် ကျွန်တော် သေချာ ဂရုစိုက်ပါ့မယ်..."</p> <p style="text-align:justify">မော်ရင်ညို မျက်နှာတွင် ကျေနပ်သော အပြုံးတစ်ခု ပေါ်လာ၏။ အရင်က ပေါ့ဘာကို ကွင်းလယ်တိုက်စစ် နေရာတွင် ထားကစားရန် သူ အတော်လေး စိုးရိမ်ခဲ့ဖူးသည်။</p> <p style="text-align:justify">အဘယ်ကြောင့်ဆိုသော် ထိုနေရာက အလွန် အရေးကြီးပြီး တိုက်စစ်ဆင်ရာတွင် ဘောလုံးကို ထိန်းထားနိုင်ရမည် ဖြစ်သလို ခံစစ်အတွက်လည်း မမောမပန်း ပြေးလွှားနိုင်သူ ဖြစ်ရန် လိုအပ်သောကြောင့်ပင်။</p> <p style="text-align:justify">ပေါ့ဘာကတော့ စိတ်ခံစားချက် နောက်ကို အလွန် လိုက်လွန်းသူ ဖြစ်နေသည်။ သေချာသည်မှာ ယခုအချိန်ထိ သူ စိတ်မချရသေးသော်လည်း အရင်ကလောက်တော့ မဆိုးတော့ပေ။</p> <p style="text-align:justify">"ဒုတိယပိုင်း စစချင်းမှာ မန်စီးတီးရဲ့ ဘောလုံးပေးပို့မှုနဲ့ ကစားကွက် အရှိန်ကို ဖျက်ဆီးပစ်ဖို့ ငါတို့ဘက်က ပြင်းပြင်းထန်ထန် ဖိအားပေးရမယ်... ဒါပေမဲ့ ပွဲချိန် မိနစ် (၆၀) ဝန်းကျင်လောက် ရောက်ရင် အန္တရာယ် အများဆုံး အချိန်ပဲ..."</p> <p style="text-align:justify">မော်ရင်ညို၏ လေသံက တည်ကြည်လေးနက်သွားသည်။ "ဘာဖြစ်လို့လဲဆိုတော့ မင်းတို့ရဲ့ ခန္ဓာကိုယ် ကြံ့ခိုင်မှုက အဲဒီအချိန်မှာ သိသိသာသာ ကျဆင်းသွားလိမ့်မယ်... မန်စီးတီးကလည်း ဒီအခွင့်အရေးကို လွတ်ခံမှာ မဟုတ်ဘူး... သူတို့ရဲ့ တိုက်စစ်ကို ဖြတ်တောက်ဖို့ ငါ လူစားလဲတာတွေ လုပ်မှာပါ... ဒါပေမဲ့ အဓိက သော့ချက်ကတော့ မင်းတို့ဆီမှာပဲ ရှိတယ်... ဘာပဲဖြစ်ဖြစ် အံကြိတ်ပြီး တောင့်ခံထားရမယ်..."</p> <p style="text-align:justify">ဘောလုံးပွဲ တစ်ပွဲတွင် အပင်ပန်းဆုံး အချိန်သည် နောက်ဆုံး လက်ကျန် မိနစ်ပိုင်းလေးများ မဟုတ်ဘဲ ပွဲချိန် မိနစ် ၆၀ မှ ၇၀ ကြား အချိန်ပင် ဖြစ်သည်။</p> <p style="text-align:justify">ယင်းကို ဘောလုံးပညာရပ်ပိုင်းအရ 'အင်အားကုန်ခန်းချိန်' ဟု ခေါ်ဝေါ်ကြ၏။</p> <p style="text-align:justify">ချူဖုန်း တစ်ယောက် အဝတ်လဲခန်းထဲမှ ဘီရိုကို မှီကာ ငှက်ပျောသီး တစ်လုံးကို နည်းနည်းချင်း ကိုက်စားနေသည်။</p> <p style="text-align:justify">စွမ်းအင်တွေကို ချက်ချင်း ပြန်လည်ပြည့်ဖြိုးစေမယ့် မှော်ဆေးရည်မျိုး စနစ်ထဲမှာ မရှိတာ တော်တော် နှမြောစရာကောင်းတာပဲ...။ </p> <p style="text-align:justify">အဲ့ဒါသာ ရှိနေရင် ငှက်ပျောသီးတွေ စားနေစရာ မလိုတော့ဘူးပေါ့...။</p> <p style="text-align:justify">'ဒါပေမဲ့ အဲဒီလိုဆိုရင်တော့ ပြိုင်ပွဲရဲ့ တရားမျှတမှုကို ထိခိုက်စေသလိုများ ဖြစ်သွားမလား...'</p> <p style="text-align:justify">သူ့ဘာသာ တီးတိုးရေရွတ်ရင်း နှုတ်ခမ်းကို တွန့်ကာ ပြုံးလိုက်မိသည်။</p> <p style="text-align:justify">တကယ်တမ်း အလေးအနက် တွေးကြည့်မည်ဆိုလျှင် သူ ယခု အသုံးပြုနေသော စနစ်ကြီးကရော တရားမျှတမှု ရှိပါရဲ့လား။</p> <p style="text-align:justify">"နောက်ပိုင်း ဘယ်သူမဆို မခံနိုင်တော့ဘူး ဆိုရင် ချက်ချင်းသာ အော်ပြောလိုက်... အသင်းဖော်တွေ အချိန်မီ ကူညီပေးနိုင်အောင်လို့... အားနာမနေနဲ့..."</p> <p style="text-align:justify">ချူဖုန်းက ပြောရင်း အက်ရှ်လေယန်းကို လှမ်းကြည့်လိုက်သည်။</p> <p style="text-align:justify">အက်ရှ်လေယန်း တစ်ယောက် ချက်ချင်း မျက်နှာထား တင်းသွားပြီး ခါးထောက်ကာ ဂုဏ်ယူ ဝင့်ကြွားစွာဖြင့် ဆိုလာ၏။ "ငါ့ကို လာမကြည့်နဲ့... ငါ ဒီနှစ် ၃၃ နှစ်ထဲ ရောက်နေပြီ ဆိုပေမဲ့ ၃၁ နှစ်အရွယ် မက်ဆီထက်တော့ အများကြီး ပိုပြေးနိုင်သေးတယ်ကွ..."</p> <p style="text-align:justify">"ခုနက ခင်ဗျား အမောဆို့ပြီး သေမလို ဖြစ်နေတာကို ကျွန်တော် သေချာ မြင်လိုက်ပါသေးတယ်ဗျာ..." ဝမ်-ဘစ်ဆာကာက တိုးတိုးလေး ဝင်ပြောလိုက်သည်။</p> <p style="text-align:justify">"အဲဒါတွေ ခဏဖယ်ထား... အနည်းဆုံးတော့ မိနစ် (၆၀) အထိ ငါ အေးဆေး တောင့်ခံနိုင်တယ်ကွ... မင်းတို့ဘာသာ မင်းတို့သာ ဂရုစိုက်ကြ..." </p> <p style="text-align:justify">အက်ရှ်လေယန်းက ဝမ်-ဘစ်ဆာကာကို လျစ်လျူရှုကာ ရင်ဘတ်ကို ပုတ်ပြီး အာမခံလိုက်သည်။</p> <p style="text-align:justify">ချူဖုန်းက သူ့လက်မောင်းမှ အသင်းခေါင်းဆောင် လက်ပတ်ကို တိတ်တဆိတ် တင်းကျပ်လိုက်လေသည်။</p> <p style="text-align:justify">ဘယ်အချိန်တည်းက စဖြစ်သွားမှန်း မသိသော်လည်း ကြီးမားသော ဖိအားများကို ခံစားရတိုင်း လက်ပတ်ကို တင်းကျပ်တတ်သည့် အကျင့်တစ်ခု သူ့တွင် ရနေချေပြီ။</p> <p style="text-align:justify">တာဝန်ယူမှု၊ တာဝန်ခံမှု ဆိုသည်မှာ စိတ်ကူးယဉ်ဆန်လွန်းသည်ဟု ထင်ရသော်လည်း ဤသည်က သူ၏ စစ်မှန်သော ခံစားချက်ပင် ဖြစ်သည်။</p> <p style="text-align:justify">ချူဖုန်းနှင့် အသင်းဖော်များ ကွင်းထဲသို့ ပြန်လည် ဝင်ရောက်လာချိန်တွင် မန်စီးတီး ကစားသမားများ၏ မျက်နှာပေါ်၌ အလွန် စိတ်လှုပ်ရှား တက်ကြွနေသည့် အရိပ်အယောင်များကို သတိထားမိလိုက်ကြသည်။</p> <p style="text-align:justify">'လာပေါ့တ်ရဲ့ ဒဏ်ရာရသွားတဲ့ ကိစ္စကို ဂွါဒီယိုလာက စိတ်ဓာတ်ခွန်အား ဖြစ်အောင် အသုံးချလိုက်တာ နေမှာ...'</p> <p style="text-align:justify">ချူဖုန်းက စိတ်ထဲမှ မှန်းဆလိုက်သည်။</p> <p style="text-align:justify">တိုက်ဆိုင်စွာပင် သူ ခန့်မှန်းချက် မှန်ကန်နေခဲ့၏။ လာပေါ့တ် တစ်ယောက် ဒဏ်ရာကြောင့် တစ်ရာသီလုံး နားရတော့မည်ဆိုပါက သူ၏ အသင်းဖော်များ မည်သို့ ခံစားရမည်နည်း။</p> <p style="text-align:justify">"အခုချိန်မှာ အေမရစ်ခ်ဟာ ဆေးရုံကုတင်ပေါ်မှာ ကျိန်ဆဲချင်စရာကောင်းတဲ့ နာကျင်မှုတွေကို ခံစားနေရပြီ... မင်းတို့ကရော... ကွင်းထဲမှာ မတ်မတ်ရပ်ပြီး ဘောလုံး ကစားခွင့် ရနေသေးတယ်... မင်းတို့ကိုယ် မင်းတို့ ကံကောင်းတယ်လို့ မှတ်ကြ”</p> <p style="text-align:justify">"ဒါပေမဲ့... ဒီပွဲကိုသာ မင်းတို့ မနိုင်ခဲ့ဘူးဆိုရင် အေမရစ်ခ်ရဲ့ ဒဏ်ရာရမှုက အလကား ဖြစ်သွားလိမ့်မယ်။ သေချာ မှတ်ထား... ဒီနေ့ ငါတို့က ကိုယ့်အတွက်ကိုယ် ကစားနေတာ မဟုတ်ဘူး... အေမရစ်ခ်ကို အနိုင်ရလဒ် လက်ဆောင်ပေးနိုင်ဖို့အတွက် ပိုပြီး တိုက်ပွဲဝင်ရမှာပဲ… ရှင်းလား…"</p> <p style="text-align:justify">နေ့စဥ်နှင့်အမျှ အတူတကွ အချိန်ဖြတ်သန်းခဲ့ကြသော အသင်းဖော်များ ဖြစ်ရာ သူတို့အကြား သံယောဇဉ်များက နက်ရှိုင်းနေခဲ့ပြီ ဖြစ်သည်။</p> <p style="text-align:justify">လာပေါ့တ်၏ ဒဏ်ရာရမှုကို အလကား မဖြစ်စေချင်သည်မှာ အမှန်ပင်။</p> <p style="text-align:justify">တစ်ခါတစ်ရံတွင် လူတစ်ယောက်၏ စိတ်ခံစားချက်များ ပေါက်ကွဲထွက်ရန်အတွက် မီးပွားလေး တစ်ခုသာ လိုအပ်ပြီး လာပေါ့တ်၏ ဒဏ်ရာရမှုက ထိုမီးပွားလေး ဖြစ်လာခဲ့လေပြီ။</p> <p style="text-align:justify">အကယ်၍ မန်စီးတီးသာ နောက်တစ်ဂိုး သွင်းယူနိုင်ခဲ့လျှင် သူတို့၏ စိတ်ဓာတ်ခွန်အားသည် အမြင့်ဆုံးသို့ ရောက်ရှိသွားပေလိမ့်မည်။</p> <p style="text-align:justify">"တချို့က ပြောကြတယ်... ဂွါဒီယိုလာက စိတ်ဓာတ်တက်ကြွစေမယ့် မိန့်ခွန်းတွေ မပြောတတ်ဘူးတဲ့... ငါ့အမြင်တော့ သူက တခြား ဘယ်နည်းပြထက်မဆို ပိုပြီး ကြမ်းတမ်း ပြင်းထန်တယ်ကွ"</p> <p style="text-align:justify">မက်ဂွိုင်းယားက အတင်းပြုံးကာ ပြောလိုက်သည်။</p> <p style="text-align:justify">မန်စီးတီးအသင်း၏ အလွန် ရူးသွပ် ကြမ်းတမ်းသော တိုက်စစ်အောက်တွင် အမှားအယွင်း အသေးအဖွဲလေးပင် လုပ်မိမည်ကို စိုးရိမ်သဖြင့် သူ၏ အာရုံကြောများ အစွမ်းကုန် တင်းမာနေခဲ့ရ၏။ ထိုသို့ တင်းမာနေရသည်မှာ တကယ်ကို ပင်ပန်းလှပေသည်။</p> <p style="text-align:justify">"သူတို့မှာ မရှုံးရမယ့် အကြောင်းပြချက် ရှိသလို ငါတို့မှာရော မရှိဘူးလား..."</p> <p style="text-align:justify">"မန်စီးတီးက တကယ်ကို အင်အားကြီးပါတယ်..."</p> <p style="text-align:justify">"သူတို့ရဲ့ အင်အားကို ငါတို့ သိထားပြီးသားပါ... ဒါပေမဲ့ ပထမပိုင်းမှာ ငါတို့ ဦးဆောင်နိုင်ခဲ့တယ်လေ... ဒုတိယပိုင်းမှာလည်း ပွဲကို ငါတို့ရဲ့ အရှိန်အောက်မှာပဲ ဆက်ရှိနေအောင် လုပ်ကြမယ်..."</p> <p style="text-align:justify">"ယုံကြည်ချက် အပြည့်နဲ့ တိုက်ပွဲဝင်မယ်... ခန္ဓာကိုယ် ကြံ့ခိုင်မှုကို အပြည့်အဝ သုံးပြီး တိုက်ပွဲဝင်မယ်... ဒါက ငါတို့ရဲ့ ကစားဟန်ပဲ..."</p> <p style="text-align:justify">"လာကြ... သွားကြစို့... ငါတို့ ဒီထက်ပိုကောင်းအောင် လုပ်နိုင်ပါတယ်"</p> <p style="text-align:justify">မန်ယူ ကစားသမားများ စက်ဝိုင်းပုံစံ ဝိုင်းဖွဲ့လိုက်ကြပြီး ချူဖုန်း၏ အက်ကွဲကွဲ အသံကြီး ထွက်ပေါ်လာလေသည်။</p> <p style="text-align:justify">ထို့နောက် သူက ညာဘက်လက်ကို ဆန့်ထုတ်လိုက်၏။</p> <p style="text-align:justify">လက်တစ်ဖက်ပြီး တစ်ဖက် ထပ်တင်လာကြရင်း မန်ယူ ကစားသမားများ၏ ဟိန်းဟောက်သံကြီးက တစ်ခဲနက် ထွက်ပေါ်လာတော့သည်။ "သွားကြစို့ဟေ့"</p> <p style="text-align:justify"> </p> <p style="text-align: center;">***</p>


Save