Book List

<h2 style="text-align: center;">အခန်း (၃၈၇)</h2> <h2 style="text-align: center;">*</h2> <p> </p> <p style="text-align:justify">"ကိုယ့်ဂိုးကိုယ် သွင်းမိသွားတာလား..." </p> <p style="text-align:justify">နဗီးလ်က မယုံနိုင်စွာဖြင့် အော်ဟစ်လိုက်ပြီး အလွန်အမင်း စိတ်ပျက်သွားရသည်။ ထိပ်တန်း အစွန် နောက်ခံလူဟောင်း တစ်ဦး အနေဖြင့် ထိုအခြေအနေမျိုးတွင် လုခ်ရှော၌ လောင်းကြေးထပ်ရုံမှလွဲ၍ ရွေးချယ်စရာ မရှိတော့ကြောင်း သူ ကောင်းကောင်း နားလည်ပါသည်။ ဘောလုံးကို ကွင်းပြင်သို့ ကန်ထုတ်နိုင်မည် ဟူ၍ သူ လောင်းကြေးထပ်ခဲ့ခြင်းပင်။ </p> <p style="text-align:justify">သို့သော် လူတွေက လောင်းကြေးများကို ထပ်သည့်အခါ အမြဲတမ်း ကံမကောင်းတတ်ကြပေ။ အနည်းဆုံးတော့ လုခ်ရှော တစ်ယောက် သူ၏ ကံကြမ္မာက အလွန် ဆိုးရွားလွန်းသည်ဟု တွေးလိုက်မိသည်။ </p> <p style="text-align:justify">ဘောလုံးက လမ်းကြောင်း လွဲသွားပြီး ညာဘက်တိုင် အနားကို ထိကာ ဂိုးပေါက်အတွင်းသို့ ခုန်ဝင်သွားလေသည်။ အကယ်၍ ထောင့်အနည်းငယ်လေး လွဲသွားခဲ့လျှင်တောင် ရလဒ်က လုံးဝ ကွာခြားသွားနိုင်ပေသည်။ </p> <p style="text-align:justify">လုခ်ရှောက မျက်နှာကို မြက်ခင်းပြင်ထဲ အပ်ထားလိုက်သည်။ ထွက်ကျလာသည်က ချွေးလား၊ မျက်ရည်လား ဆိုသည်ကိုတော့ သူ မခွဲခြားနိုင်တော့ချေ။ </p> <p style="text-align:justify">သူ ခြေထောက်ကျိုးသွားစဉ်ကတောင် ယခုလောက် စိတ်ပျက်အားငယ်ခြင်း မဖြစ်ခဲ့ဖူးပေ။ အဘယ်ကြောင့်ဆိုသော် ထိုအရာက သူတစ်ယောက်တည်း၏ ပြဿနာသာ ဖြစ်သောကြောင့်တည်း။ </p> <p style="text-align:justify">ယခု ကိုယ့်ဂိုးကိုယ် သွင်းမိခြင်းကတော့ မန်ယူအသင်းသား အားလုံး၏ ကြိုးပမ်းအားထုတ်မှုများကို အဆုံးသတ်သွားစေခဲ့ပြီ ဖြစ်သည်။ ဒါက မန်ယူ၏ ပင်နယ်တီဧရိယာ အတွင်းတွင် ဖြစ်သည်။ </p> <p style="text-align:justify">တစ်ဖက်၏ ပျော်ရွှင်မှုက အခြားတစ်ဖက်၏ ဝမ်းနည်းကြေကွဲမှုကို ပိုမို ထင်ရှားစေပြီး လူသားတို့၏ စိတ်ခံစားချက် အစွန်းနှစ်ဖက်ကို အပြည့်အဝ ဖော်ပြနေလေသည်။</p> <p style="text-align:justify">"ကိစ္စမရှိပါဘူး..." </p> <p style="text-align:justify">ဒီဂီယာက အားပေးစကား ပြောချင်သော်လည်း စကားလုံးများကို ပြန်မျိုချလိုက်ရသည်။ </p> <p style="text-align:justify">ဘယ်လိုလုပ် ကိစ္စမရှိဘဲ နေမှာလဲ။ သူတို့ တစ်ရာသီလုံး စီးကျခဲ့သော ချွေးများ၊ ကြိုးစား အားထုတ်မှုများနှင့် မျှော်လင့်ချက်များ အားလုံးက ယခု အခိုက်အတန့်လေးအတွင်းမှာပင် ဖျက်ဆီးခံလိုက်ရပြီ မဟုတ်ပါလား…။ အကောင်းမြင်တတ်ဆုံး သူပင်လျှင် စိတ်ပျက်သွားရပေမည်။</p> <p style="text-align:justify">ချူဖုန်းလည်း ချွင်းချက် မဟုတ်ပေ။ သူ ခေတ္တမျှ တိတ်ဆိတ်သွားပြီးနောက် ဘယ်ဘက်သို့ ခေါင်းလှည့်ကြည့်လိုက်သည်။ </p> <p style="text-align:justify">LED မျက်နှာပြင်ကြီးပေါ်တွင် ပွဲချိန် ၈၅ မိနစ်၊ ၂၆ စက္ကန့်နှင့် မန်ယူ ၃-၃ မန်စီးတီး ဟု ပြသနေသည်။ </p> <p style="text-align:justify">ဂိုးသွင်းဖို့ အခွင့်အရေး ရှိသေးလား။ ရှိသေးတယ်။ ဒါပေမဲ့ သူတို့က ဦးဆောင်ဂိုးတွေ သွင်းပြီးတိုင်း သုံးကြိမ်ဆက်တိုက် ချေပခံခဲ့ရပြီး အခုလို အံ့သြစရာကောင်းတဲ့ နည်းလမ်းနဲ့ အဆုံးသတ်သွားတာလေ။</p> <p style="text-align:justify">သူ ယခင်က တစ်ခါမှ မကြုံဖူးလောက်အောင် ပင်ပန်းနွမ်းနယ်မှုကို ခံစားလိုက်ရပြီး သူ၏ ခေါင်းထဲတွင် အတွေးတစ်ခုပင် ဖြတ်ပြေးသွားသည်။ 'ဒီအတိုင်းပဲ အဆုံးသတ်လိုက်ဖို့ ကောင်းမယ်ထင်တယ်... ဘာပဲဖြစ်ဖြစ် ငါ ငယ်ပါသေးတယ်... အနာဂတ်မှာ အခွင့်အရေးတွေ အများကြီး ရှိဦးမှာပဲ... ဒါမှမဟုတ် ဘယ်သူသိမှာလဲ... မန်စီးတီးက နောက်ဆုံး လိဂ်ပွဲစဉ် ၃ ပွဲမှာ ခြေချော်ပြီး ချန်ပီယံဆုကို မန်ယူဆီ ပြန်ပေးချင် ပေးမှာပေါ့...' </p> <p style="text-align:justify">ထိုစဉ် သူ၏ အမြင်အာရုံထဲသို့ ပွဲကြည့်စင်ပေါ်ရှိ ကြေးရုပ်တုကြီးက ရုတ်တရက် ဝင်ရောက်လာသည်။ ခေတ္တမျှ တိတ်ဆိတ်သွားပြီးနောက် ချူဖုန်းက ဆံပင်များကို ဆွဲဖွလိုက်ပြီး သူ့ဘာသာ တီးတိုး ရေရွတ်လိုက်သည်။ </p> <p style="text-align:justify">"ဒီအထိ ရောက်လာမှတော့ အဆုံးထိ တောင့်ခံသွားတာပဲ ကောင်းပါတယ်လေ..." </p> <p style="text-align:justify">သူ့တွင် အလွန်အမင်း စိတ်ခံစားမှု ပြင်းထန်သော အတွေးမျိုးတွေ မရှိပေ။ သူက ကိုယ့်ကိုယ်ကိုယ် နောင်တရစရာတွေ ချန်မထားခဲ့ချင်ရုံသာ။ </p> <p style="text-align:justify">မည်သို့ပင်ဆိုစေ သူ အနားယူသွားပြီးနောက် တစ်နေ့နေ့တွင် ယနေ့နေ့ကို ပြန်ပြောင်းတွေးမိပါက သေချာပေါက် အတွေးတစ်ခု ဝင်လာမည် မဟုတ်ပါလား…။ </p> <p style="text-align:justify">အကယ်၍များ 'ငါသာ အဆုံးထိ ဇွဲမလျှော့ဘဲ ကြိုးစားခဲ့ရင် အခြေအနေတွေက ကောင်းတဲ့ဘက်ကို ပြောင်းလဲသွားနိုင်မလား...' </p> <p style="text-align:justify">လောကကြီးမှာ အကြောက်ရဆုံး စကားလုံးက 'အကယ်၍' ဆိုတာပင်…။ ထို့ကြောင့် ချူဖုန်းက လုခ်ရှောကို အတင်း ဆွဲထူလိုက်ပြီး သူ၏ နားထဲသို့ အသံကုန် အော်ဟစ်လိုက်သည်။ </p> <p style="text-align:justify">"ကိုယ့်ဂိုးကိုယ် သွင်းမိတာက ဘာများ ကြောက်စရာကောင်းလို့လဲကွာ... မင်းက ခြေထောက် ကျိုးတာကိုတောင် ရှင်သန်နိုင်ခဲ့သေးတာပဲ..."</p> <p style="text-align:justify">လုခ်ရှော၏ အနည်းငယ် နီရဲနေသော မျက်လုံးများကို မြင်သောအခါ ချူဖုန်းက မက်ဂွိုင်းယားဘက်သို့ လက်ညှိုးထိုးပြကာ "မင်း စိတ်ပျက်နေတုန်းပဲဆိုရင် ဟယ်ရီ့ကို ကြည့်လိုက်... သူ ကိုယ့်ဂိုးကိုယ် သွင်းမိတုန်းက မင်း သူ့ကို အပြစ်တင်ခဲ့လား..." ဟု မေးလိုက်သည်။</p> <p style="text-align:justify">"အင်း... နည်းနည်းတော့ အပြစ်တင်တယ်..." ဟု လုခ်ရှော၏ ဦးနှောက်က အနည်းငယ် ရှော့ခ်ဖြစ်သွားပုံဖြင့် ပြန်ဖြေလိုက်သည်။</p> <p style="text-align:justify">ခေါင်းကြီး (မက်ဂွိုင်းယား) : "???"</p> <p style="text-align:justify">ချူဖုန်း : "..." </p> <p style="text-align:justify">အိုကေ... ငါ ပြောခဲ့သမျှ စကားတွေ အကုန် အလကား ဖြစ်သွားပြီ။ သို့သော် ဤကဲ့သို့ အပြန်အလှန် စကားပြောမှုလေးကြောင့် မန်ယူကစားသမားများ၏ ရင်ထဲမှ အုံ့မှိုင်းနေမှုများ သိသိသာသာ လွင့်စင်သွားခဲ့သည်။</p> <p style="text-align:justify">ဒီဂီယာက ဂိုးပေါက်ထဲမှ ဘောလုံးကို ကောက်ယူလိုက်ပြီး ချူဖုန်း၏ ရင်ခွင်ထဲသို့ ထိုးထည့်လိုက်သည်။ "ချူ... ကွယ်ရာမှာ မင်းကို ငါတို့ ဘယ်လို ခေါ်ကြလဲ သိလား..."</p> <p style="text-align:justify">"အံ့ဖွယ်ကောင်လေးလေကွာ..." မက်ဂွိုင်းယားက မျက်နှာပြောင်တိုက်ကာ အလျင်စလို ဝင်ပြောလိုက်သည်။</p> <p style="text-align:justify">ချူဖုန်း တစ်ယောက် ထပ်ပြီး ဆွံ့အသွားပြန်သည်။ 'အံ့ဖွယ်ကောင်လေး' ဆိုတဲ့ နာမည်ပြောင်က သူ့အတွက် သိပ်မလိုက်ဖက်သလိုပဲဟု တွေးလိုက်မိသည်။</p> <p style="text-align:justify">"ဒါကြောင့် မင်း ပိုပြီး ကြိုးစားရမယ်..." ဟု ဒီဂီယာက ထပ်လောင်း ပြောလိုက်သည်။</p> <p style="text-align:justify">ချူဖုန်းက ဘောလုံးကို ယူကာ အားပေးစကား တစ်ခွန်းမှ ထပ်မပြောတော့ဘဲ ရှေ့သို့ လျှောက်သွားလိုက်သည်။ အဘယ်ကြောင့်ဆိုသော် သူ၏ အသင်းဖော်များလည်း အရှုံးမပေးသေးကြောင်း သူ သိနေသောကြောင့်ပင်။ </p> <p style="text-align:justify">ကန်တေ၏ မျက်လုံးပေါက်စလေး နှစ်လုံးက ဟိုဒီ ရွေ့လျားသွားပြီး နောက်ဆုံးတော့ သူ နေရာမှန်ကို ရောက်လာခဲ့ပြီဟု သဘောပေါက်သွားသည်။ မန်ယူအသင်းတွင်းက လေထုကို ကြည့်လိုက်ပါ။ အကယ်၍သာ ချယ်လ်ဆီးမှာဆိုလျှင် အခုချိန်လောက်ဆို တစ်ယောက်နဲ့တစ်ယောက် အပြစ်တင် ဆဲဆိုနေကြလောက်ပြီ။</p> <p style="text-align:justify">"မန်စီးတီးရဲ့ အစွန်ခံစစ် ကစားသမား နှစ်ယောက်လုံး သူတို့ရဲ့ အကန့်အသတ်ကို ရောက်နေပြီ... ငါတို့ တောင်ပံကနေပဲ သွားပြီး သူတို့ကို ထိုးဖောက်မယ်... အခွင့်အရေး ရတာနဲ့ ငါ့ခေါင်းပေါ်ကနေ ကျော်ပြီး ဖြတ်တင်ပေးလိုက်..." ချူဖုန်းက ပြတ်သားစွာ အမိန့်ပေးလိုက်သည်။</p> <p style="text-align:justify">တချို့သော အချိန်များတွင် အရိုးရှင်းဆုံးသော နည်းဗျူဟာများက အကောင်းဆုံး ရလဒ်များကို ရရှိစေတတ်သည်။ မန်စီးတီး၏ ဗဟိုနောက်ခံလူ နှစ်ဦးဖြစ်သော စတုန်းစ်နှင့် ကွန်ပနီတို့က မတူညီသော ရုပ်ပိုင်းဆိုင်ရာ အခြေအနေများတွင် ရှိနေကြသည်။ </p> <p style="text-align:justify">စတုန်းစ်က ရုပ်ပိုင်းဆိုင်ရာ ကြံ့ခိုင်မှု မကောင်းသလို ကွန်ပနီကလည်း သူ၏ ကစားသမားဘဝ အဆုံးသတ်ကာနီး အချိန်သို့ ရောက်နေပြီ ဖြစ်သည်။ ထို့ကြောင့် သူတို့၏ လေကြောင်းရန် ကာကွယ်မှုနှင့် ယှဉ်ပြိုင်နိုင်စွမ်းက ကန့်သတ်ချက် ရှိနေပေသည်။</p> <p style="text-align:justify">ချူဖုန်းက ဘောလုံးကို ကွင်းလယ်စက်ဝိုင်းပေါ်တွင် တင်လိုက်ပြီး ဒိုင်လူကြီး ခရာမှုတ်မည့် အချိန်ကို စောင့်ဆိုင်းနေလိုက်သည်။ ထိုစဉ် သူ စာကြောင်းတစ်ကြောင်းကို ရုတ်တရက် အမှတ်ရလာသည်။ </p> <p style="text-align:justify">'လူတစ်ယောက်ရဲ့ ဘဝမှာ အတောက်ပဆုံးနေ့ ဆိုတာ အောင်မြင်ကျော်ကြားမှုတွေ ရရှိတဲ့နေ့ မဟုတ်ဘူး... ဝမ်းနည်းကြေကွဲမှုနဲ့ မျှော်လင့်ချက် ကင်းမဲ့မှုတွေ ကြားထဲကနေ ဘဝရဲ့ စိန်ခေါ်မှုတွေကို ရင်ဆိုင်ချင်တဲ့ ဆန္ဒတွေ ပေါ်ပေါက်လာပြီး အဲဒီ စိန်ခေါ်မှုဆီကို ရဲရဲဝံ့ဝံ့ ခြေလှမ်းလှမ်းလိုက်တဲ့ နေ့ပဲ...' </p> <p style="text-align:justify">တီ… </p> <p style="text-align:justify">ဒိုင်လူကြီး၏ ခရာမှုတ်သံနှင့်အတူ ချူဖုန်းက ကွန်တေထံသို့ ဘောလုံး နောက်ပြန်ပေးလိုက်ပြီးနောက် လှည့်ကာ မန်စီးတီးကွင်း၏ အသည်းနှလုံး ဧရိယာထဲသို့ တန်းတန်းမတ်မတ် ပြေးဝင်သွားလေသည်။ </p> <p style="text-align:justify">"ခံစစ်... ခံစစ်... ခံစစ်..." </p> <p style="text-align:justify">ဂွါဒီယိုလာက ကွင်းဘေးမှနေ၍ လက်များကို ရူးသွပ်စွာ ဝှေ့ယမ်းပြီး မန်စီးတီး ကစားသမားများကို နောက်ဆုတ်ရန် ညွှန်ကြားလိုက်သည်။ သူက ဦးနှောက်မရှိသူ မဟုတ်ပေ။ အသေအလဲ တိုက်စစ် ဆင်ရန် အတင်းအကျပ် မလုပ်တော့ချေ။ </p> <p style="text-align:justify">သရေရလဒ်က မန်စီးတီးအတွက် အလွန် အကျိုးရှိနေပြီ ဖြစ်ရာ တိုက်စစ်ဆင်၍ ကြီးမားသော စွန့်စားမှု လုပ်မည့်အစား သူတို့၏ "အောင်ပွဲ" အသီးအပွင့်များကို ထိန်းသိမ်းထားခြင်းက ပိုကောင်းပေမည်။ ဂွါဒီယိုလာက ယနေ့ပွဲကို သရေ ကစားနိုင်လျှင် ကျန်ရှိနေသော လိဂ်ပွဲစဉ် သုံးပွဲလုံး အနိုင်ရမည်ဟု ယုံကြည်မှု အပြည့် ရှိနေသည်။ </p> <p style="text-align:justify">မော်ရင်ညိုကတော့ ထူးဆန်းစွာ တည်ငြိမ်နေပြီး လက်နှစ်ဖက်ကို အိတ်ကပ်ထဲ ထည့်ကာ အစိမ်းရောင် ကွင်းပြင်ကို အေးစက်စက် စိုက်ကြည့်နေသည်။ ချူဖုန်းက အကောင်းဆုံး ဆုံးဖြတ်ချက် ချနိုင်လိမ့်မည်ဟု သူ ယုံကြည်ထား၏။ </p> <p style="text-align:justify">မည်သို့ပင်ဆိုစေ ထိုကောင်လေးက သူ့ဘေးတွင် ရှိနေခဲ့ပြီး ပွဲစဉ်ပေါင်း မြောက်မြားစွာကို အတူတကွ သုံးသပ်လေ့လာခဲ့ဖူးသည် မဟုတ်ပါလား…။ နည်းဗျူဟာပိုင်းဆိုင်ရာ တွေးခေါ်နိုင်စွမ်း သက်သက်ကို ပြောရလျှင် လက်ရှိ ပရီးမီးယားလိဂ်ထဲတွင် ဘောလုံးသမားထဲ၌ ချူဖုန်းကို ယှဉ်နိုင်မည့်သူ မရှိပေ။ ၎င်းက ချူဖုန်းအပေါ် မော်ရင်ညို၏ အကဲဖြတ်မှုပင်။</p> <p style="text-align:justify">"မန်ယူတို့ အစွမ်းကုန် တိုက်စစ်ဆင်နေသလို မန်စီးတီးကလည်း အစွမ်းကုန် ခံစစ်ကစားနေတယ်ဗျာ..."</p> <p style="text-align:justify">"အသင်းနှစ်သင်းက နေရာတွေ ပြန်လည် ပြောင်းလဲသွားကြပြီလို့ ကျွန်တော် သံသယ ဝင်မိတယ်..."</p> <p style="text-align:justify">"လုခ်ရှောက ဒီဘရိုင်းရဲ့ ခံစစ်ကို ဖောက်ထွက်သွားခဲ့ပြီ... ခုနက အမှားကြောင့် သူ လုံးဝ ထိခိုက်မှု မရှိတဲ့ပုံပဲ..."</p> <p style="text-align:justify">"ရက်ရှ်ဖို့ဒ်ကို ထပ်ရှာပြန်ပြီ..."</p> <p style="text-align:justify">ဂိုးသွင်းပြီးနောက် ရက်ရှ်ဖို့ဒ် အလွန်အမင်း စိတ်လှုပ်ရှားနေပြီး ပရီးမီးယားလိဂ်၏ အမြန်ဆုံး အစွန် နောက်ခံလူ ဝေါ်ကာနှင့် ရင်ဆိုင်ရချိန်တွင် အရှိန်တင်ကာ အားပါပါ ပြေးထွက်ရန် ရွေးချယ်လိုက်သည်။</p> <p style="text-align:justify">ဘန်း... </p> <p style="text-align:justify">ပြင်းထန်သော ရုပ်ပိုင်းဆိုင်ရာ ယှဉ်ပြိုင်မှု အပြီးတွင် ရက်ရှ်ဖို့ဒ်က အတင်း တိုးထွက်သွားပြီး ဂိုးစည်းအနီးမှ နေ၍ ဖြတ်တင်ဘော တစ်ခု ပေးပို့လိုက်သည်။ ဘောလုံးက လည်ထွက်သွားပြီး ပင်နယ်တီဧရိယာထဲသို့ ကျဆင်းလာသည်။ ကွန်ပနီက ချူဖုန်း၏ နောက်သို့ ချက်ချင်း ရွေ့လျားသွားပြီး ချူဖုန်း ခုန်မတက်နိုင်စေရန် သူ၏ လက်ဖြင့် ဖိချထားလိုက်သည်။ </p> <p style="text-align:justify">"အဟွတ်..." </p> <p style="text-align:justify">သို့သော် ချူဖုန်းက နောက်သို့ မှီချလိုက်ပြီး ကွန်ပနီကို နောက်ဆုတ်သွားအောင် တွန်းထုတ်လိုက်သည်။ </p> <p style="text-align:justify">ဘယ်လ်ဂျီယံ ဝါရင့်နောက်ခံလူကြီး၏ ရင်တဒိတ်ဒိတ် ခုန်သွားရသည်။ 'မင်းက ဘောလုံးသမားလား၊ ဘတ်စကက်ဘောသမားလား... ဘယ်လိုလုပ် ဘတ်စကက်ဘော ကစားကွက်မျိုးကိုတောင် သုံးနေရတာလဲ...' </p> <p style="text-align:justify">ဟန်ချက်ကို ပြန်လည် ထိန်းပြီးနောက် ချူဖုန်းက လေထဲသို့ ခုန်တက်ကာ ဘောလုံးကို ညာဘက်သို့ ခေါင်းတိုက်ချလိုက်သည်။</p> <p style="text-align:justify"> </p> <p style="text-align: center;">***</p>


Save