Book List

<h2 style="text-align: center;">အပိုင်း (၁၀၅၉)</h2> <h2 style="text-align: center;">သူတော်စင်များ ဆင်းသက်လာခြင်း၊ သူသည် ပြိုင်ဘက်ကင်း (၆)</h2> <h2 style="text-align: center;">*</h2> <p> </p> <p>အရင်းအမြစ် ဘိုးဘေး၏ စကားကို ကြားလိုက်ရသောအခါ အိမ်တော်အတွင်းရှိ လူတိုင်းမှာ နောက်တစ်ကြိမ် မှင်သက်သွားကြပြီး မည်သည့်စကားမျှ မပြောနိုင်ဘဲ ဖြစ်နေကြသည်။</p> <p>သူတို့သည် သူတို့၏ နားနှင့် မျက်စိကိုပင် မယုံကြည်နိုင် ဖြစ်နေကြသည်။</p> <p>"ဒါက ဘယ်လို ကပ်ဘေးမျိုးမို့လို့လဲ။ သူကလွဲရင် ကောင်းကင်ဘုံအသီးသီးမှာ ဒီကိစ္စကို ဖြေရှင်းပေးနိုင်မယ့်သူ တကယ်ပဲ မရှိတော့တာလား"</p> <p>လီထျန်းကန်က မနေနိုင်ဘဲ မေးလိုက်သည်။</p> <p>သူသည် သူ၏ ယခင်က အသိဉာဏ်များ မှားယွင်းနေသလားဟုပင် သံသယ ဝင်လာမိသည်။ သူတော်စင်များမှာ ကောင်းကင်ဘုံအသီးသီး၏ အမြင့်ဆုံး အဆင့်အတန်း မဟုတ်ဘဲ သူတို့ထက် ပိုမို အစွမ်းထက်သော တည်ရှိမှုများ ရှိနေသေးသလားဟု တွေးမိသည်။</p> <p>သူ၏ မေးခွန်းကို ကြားသောအခါ အရင်းအမြစ် ဘိုးဘေးသည် သူတော်စင်များကို တစ်ချက် ကြည့်လိုက်ပြီးနောက် သက်ပြင်းတစ်ချက်ကို ညင်သာစွာ ချရင်း ပြောလိုက်သည်။</p> <p>"မှန်ပါတယ်။ သူကလွဲရင် ဒါကို ဖြေရှင်းပေးနိုင်မယ့်သူ မရှိပါဘူး။ ငါတို့ဟာ ကောင်းကင်ဘုံအသီးသီးမှာ အသန်မာဆုံး အင်အားစုတွေ ဖြစ်ကြပေမယ့် အသက်စွန့်ပြီး ခုခံတိုက်ခိုက်ရင်တောင် ဒါဟာ အချည်းနှီးပဲ ဖြစ်လိမ့်မယ်။ သူကိုယ်တိုင် ပါဝင် ပတ်သက်မှသာ လုံလောက်လိမ့်မယ်"</p> <p>အိမ်တော်တစ်ခုလုံး တိတ်ဆိတ်သွားခဲ့သည်။</p> <p>အိမ်တော်၏ အပြင်ဘက်တွင် ရပ်နေသော ရန်ချန်ချန်မှာလည်း ဤစကားကို ကြားရသောအခါ အံ့အားသင့်ကာ မှင်သက်နေမိသော်လည်း သူ(မ)၏ ရင်ခုန်သံများမှာ မြန်လာခဲ့သည်။ စိတ်လှုပ်ရှားမှုနှင့်အတူ ရင်းနှီးသော ဂုဏ်ယူမှုတစ်ခုကိုလည်း ခံစားလိုက်ရသည်။</p> <p>သူ(မ) လိုက်လံ ရှာဖွေနေသော ထိုသူသည် အမှန်တကယ်ပင် အမြဲတမ်း တောက်ပနေဆဲ ဖြစ်ပြီး အကြိမ်တိုင်းတွင် သူ(မ) ထင်မှတ်ထားသည်ထက် ပိုမို တောက်ပပြနေဆဲပင်။</p> <p>သို့သော် ဤသည်မှာပင် သူ(မ)အတွက် အရင်းနှီးဆုံးသော ခံစားချက် ဖြစ်နေခဲ့သည်။</p> <p>လီဖျင်အန်းမှာမူ မှင်သက်နေပြီး သူ၏ ဦးနှောက်အတွင်း၌ ရှုပ်ထွေးနေသော အတွေးများမှာ ဗလာဖြစ်သွားခဲ့သည်။</p> <p>သူသည် တစ်ဖက်လူ၏ စကားကို နားလည်အောင် ကြိုးစားနေသော်လည်း ထိုစကားများ၏ အဓိပ္ပာယ်မှာ အချက်တစ်ချက်တည်းကိုသာ ညွှန်ပြနေသည်။</p> <p>သူ့ရှေ့မှ လျှောက်လှမ်းသွားခဲ့သော ထိုပုံရိပ်သည် ကောင်းကင်ဘုံအသီးသီးတွငလည်း အစွမ်းအထက်ဆုံး ပုဂ္ဂိုလ် ဖြစ်နေသည်လား။</p> <p>"ဒါ... ဒါက..."</p> <p>လီထျန်းကန်သည် ပါးစပ် အနည်းငယ် ပွင့်ဟသွားပြီး စကားလုံးများ ပျောက်ဆုံးနေခဲ့သည်။</p> <p>အရင်းအမြစ် ဘိုးဘေးသည် အလွန်စိတ်ရှည်စွာဖြင့် အခြေအနေအရပ်ရပ်ကို အသေးစိတ် ရှင်းပြပေးလိုက်ရာ လူတိုင်းမှာ တဖြည်းဖြည်းနှင့် နားလည်လာကြပြီး သတိပြန်ဝင်လာကြသည်။ ထို့နောက် သူက လူတိုင်းကို ကောင်းကင်ဘုံအသီးသီးသို့ ခေါ်ဆောင်သွားရန် အဆိုပြုလိုက်သည်။</p> <p>သူ၏ အဆိုပြုချက်ကို လီထျန်းကန်နှင့် အခြားသူများမှာ မငြင်းပယ်ဝံ့ကြပေ။</p> <p>လီမူရှို့နှင့် လီချင်ကျန်းတို့မှာ မျက်ခုံးများ တွန့်ကာ တစ်ဦးကိုတစ်ဦး ကြည့်လိုက်ကြပြီး ထိုကိစ္စ၏ ရှုပ်ထွေးမှုကို ခပ်ဝါးဝါး အာရုံခံမိလိုက်ကြသည်။</p> <p>သူတို့သည် ထိုကလေး၏ အကြောင်းကို ကောင်းကောင်း သိထားကြသည်။ အကယ်၍ ကောင်းကင်ဘုံအသီးသီးတွင် ကပ်ဘေးနှင့် ကြုံတွေ့နေရပါက သူသည် ဘယ်သောအခါမှ လက်ပိုက်ကြည့်နေမည် မဟုတ်ပေ။</p> <p>သူသည် ကောင်းကင်နယ်စပ်ဂိတ်တံခါးကို တစ်ဦးတည်း စောင့်ကြပ်ခဲ့ဖူးသည်။ လျန်ကျိုးနယ်မြေ အန္တရာယ်နှင့် ကြုံတွေ့ရစဉ်ကလည်း မိုင်ပေါင်း သောင်းချီ၍ နတ်ဆိုးများကို သတ်ဖြတ်ခဲ့ပြီး နောက်ဆုံးတွင် သူ၏အသက်ကို ပဓာနမထားဘဲ နတ်ဆိုးများကို မိုမြစ် အတွင်းသို့ ဆွဲခေါ်သွားကာ သေလုနီးပါး ဖြစ်ခဲ့ဖူးသည်။</p> <p>ထိုကလေး၏ သွေးသည် အမြဲတမ်း ပူလောင်နေခဲ့ပြီး ဘယ်သောအခါမှ အေးစက်ခဲ့သူ မဟုတ်ပေ။</p> <p>လီထျန်းကန်အနေဖြင့် အဆိုပြုချက်ကို ငြင်းပယ်ရန် အကြောင်းမရှိသဖြင့် လီမူရှို့နှင့် လီချင်ကျန်းတို့ကလည်း အတူတူ လိုက်ပါရန် ပြောဆိုလိုက်ကြသည်။</p> <p>အရင်းအမြစ် ဘိုးဘေးမှာ သဘာဝကျစွာပင် ဝမ်းမြောက်စွာ လက်ခံလိုက်ပြီး အစေခံများနှင့် အလုပ်သမားများ အပါအဝင် စစ်သူကြီးအိမ်တော်ရှိ လူတိုင်းကို ခေါ်ဆောင်သွားခဲ့သည်။</p> <p>ဘိုးဘေးခန်းမအတွင်းရှိ လီမိသားစု ဘိုးဘေးများ၏ ဝိညာဉ်များကိုမူ သူ၏ သူတော်စင်နယ်မြေအတွင်းသို့ တစ်ခုလုံး ရွှေ့ပြောင်း ထည့်သွင်းပေးလိုက်သည်။</p> <p>စစ်သူကြီးအိမ်တော် တစ်ခုလုံးကို ရွှေ့ပြောင်းပြီးနောက် အရင်းအမြစ် ဘိုးဘေးသည် ထိုကိစ္စ ပြီးဆုံးသွားပါက လီမိသားစုအနေဖြင့် ကောင်းကင်ဘုံနှင့် သေမျိုးလောကအကြား လွတ်လပ်စွာ ကူးသန်းသွားလာနိုင်စေရမည်ဟု ကတိပေးလိုက်သည်။</p> <p>မထွက်ခွာမီတွင် အရင်းအမြစ် ဘိုးဘေးက ထိုက်ဆွေနတ်ဘုရားကို မဟာယုနယ်မြေအား စောင့်ရှောက်ရန် ညွှန်ကြားလိုက်သဖြင့် လီမိသားစု၏ စိုးရိမ်ပူပန်မှုများ လုံးဝ ပျောက်ကွယ်သွားခဲ့သည်။</p> <p>ထိုညွှန်ကြားချက်ကို ကြားသောအခါ လူငယ် ထိုက်ဆွေနတ်ဘုရားမှာ မကျေမနပ် ဖြစ်သွားပြီး "ကျွန်တော်လည်း လိုက်ချင်တယ်" ဟု အော်ပြောလိုက်သည်။</p> <p>"အခုလောလောဆယ်တော့ မင်းကို ငါတို့ မတားပါဘူး။ ဒီကိစ္စ ပြီးသွားတာနဲ့ မင်း သွားနိုင်ပါလိမ့်မယ်" ဟု အရင်းအမြစ် ဘိုးဘေးက သူ့ကို ပြောလိုက်သည်။</p> <p>သူ၏ အာမခံချက်နှင့်အတူ ဥပဒေမဟာသူတော်စင်ကပါ ခေါင်းညိတ်ပြလိုက်သဖြင့် လူငယ် ထိုက်ဆွေနတ်ဘုရား၏ မျက်လုံးများအတွင်းရှိ ပြတ်သားမှုများ လျော့ကျသွားပြီး သဘောတူညီသည့်အနေဖြင့် ခေါင်းညိတ်လိုက်သည်။</p> <p>ယခုအခါ ပထမ သန့်စင်သော ကလေးငယ်ကို ကောင်းကင်ဘုံသို့ မသွားရန် တားဆီးနေခြင်းမှာ အဓိပ္ပာယ် မရှိတော့ပေ။ ယခင်က သူတို့သည် သူ့ကို သေမျိုးလောကတွင် ခြောက်ခုမြောက် အကန့်အသတ်အဆင့်အထိ ရောက်ရှိစေလိုခဲ့သော်လည်း ယခုအခါ ၎င်းကို ရရှိခဲ့သော ဒုတိယ သန့်စင်သော ကလေးငယ်မှာ ကောင်းကင်ဘုံသို့ ကြီးမားသော ဘေးဒုက္ခကို ယူဆောင်လာခဲ့ပြီ ဖြစ်သည်။</p> <p>ထိုက်ဆွေနတ်ဘုရားပင်လျှင် သူတော်စင်များ၏ ရှေ့တွင် အလျှော့ပေးလိုက်ရသည်ကို မြင်လိုက်ရသောအခါ လီဖျင်အန်း၏ ခံစားချက်မှာ ပိုမို ရှုပ်ထွေးလာခဲ့သည်။</p> <p>"နောက်ထပ် လူတွေ ရှိသေးတယ်... သူတော်စင် ကျန်း ၊ မင်းရဲ့ မျိုးဆက်ကို လိုက်ခွင့်ပြုလိုက်ပါ" ဟု အရင်းအမြစ် ဘိုးဘေးက သူတော်စင်တစ်ပါး၏ ကိုယ်ပွားကို ညွှန်ကြားလိုက်သည်။</p> <p>ထိုသူတော်စင်သည် ချင်းကျိုးမြို့နှင့် သေမျိုးလောကကို အချိန်ကာလများစွာ ဖြတ်သန်းခဲ့သည့် အတွေ့အကြုံများ ပြည့်နှက်နေသော မျက်လုံးများဖြင့် ကြည့်လိုက်သည်။ အရင်းအမြစ် ဘိုးဘေး၏ စကားကို ကြားသောအခါ သူက တိတ်ဆိတ်စွာ ခေါင်းညိတ်ပြပြီး ထိုနေရာမှ ပျောက်ကွယ်သွားခဲ့သည်။</p> <p>တစ်ချိန်တည်းမှာပင် မဟာယုနတ်ဘုရား မင်းဆက်၏ နန်းမြို့တော် အနောက်ဘက်ဥယျာဉ်အတွင်း၌ အသက်ကြီးသော အမျိုးသားတစ်ဦးသည် တစ်ဦးတည်း ကျားထိုးနေစဉ် ရုတ်တရက် ဟင်းလင်းပြင်အတွင်း၌ စွမ်းအင်လှိုင်းများ ပေါ်ထွက်လာခဲ့သည်။</p> <p>ထိုလူကြီး၏ မျက်နှာရိပ်မျက်နှာကဲ ပြောင်းလဲသွားပြီး ခေါင်းကို မော့ကာ ပြင်းထန်သော အရှိန်အဝါတစ်ခုကို ထုတ်ဖော်လိုက်သည်။</p> <p>သို့သော် မကြာမီမှာပင် သူသည် ပေါ်ထွက်လာသော ပုံရိပ်ကို မှတ်မိသွားခဲ့သည်။</p> <p>"ဒါက... ဘိုးဘေးလား"</p> <p>ဧကရာဇ်ယုမှာ မှင်သက်သွားခဲ့သည်။ ရုတ်တရက် ပေါ်လာသော ပုံရိပ်မှာ ကျန်းမိသားစု၏ ဘိုးဘေးဖြစ်နေလိမ့်မည်ဟု သူ မမျှော်လင့်ထားခဲ့ပေ။</p> <p>မကြာမီမှာပင် သူ သတိပြန်ဝင်လာပြီး အလျင်အမြန် ဒူးထောက်လိုက်သည်။</p> <p>ကျန်းမိသားစု ဘိုးဘေးသည် သူ၏ မျိုးဆက်များ လုပ်ဆောင်ခဲ့သမျှကို သိရှိထားပြီး ဖြစ်သလို ဤထူးချွန်သော မျိုးဆက်အပေါ် အလွန်ပင် ကျေနပ် အားရမိသဖြင့် ညင်သာစွာ သက်ပြင်းချရင်း ပြောလိုက်သည်။</p> <p>"အခမ်းအနားတွေ လုပ်မနေပါနဲ့တော့။ မင်းရဲ့ နှစ်ပေါင်းများစွာ ကြိုးစားအားထုတ်မှုတွေကြောင့် ငါ ပြန်လည် နိုးထခွင့် ရခဲ့တာပဲ၊ ဒါဟာ အလွန် ချီးကျူးစရာကောင်းတဲ့ အောင်မြင်မှုတစ်ခုပါ"</p> <p>ဧကရာဇ်ယုမှာ အလွန် စိတ်လှုပ်ရှားသွားပြီး "ဘိုးဘေးသာ ပြန်လည် နိုးထနိုင်မယ်ဆိုရင် ကျန်းမိသားစုအနေနဲ့ ဘိုးဘေးတို့ရဲ့ ဂုဏ်ကျက်သရေကို ပြန်လည် ထူထောင်နိုင်မှာပါ၊ အရာအားလုံးက တန်ပါတယ်" ဟု ပြောလိုက်သည်။</p> <p>ကျန်းမိသားစု ဘိုးဘေးက "ငါ မင်းကို နေရာတစ်ခုဆီ ခေါ်သွားမယ်။ ငါ့နောက်ကို လိုက်ခဲ့၊ သွားရင်းနဲ့ပဲ ရှင်းပြပေးမယ်" ဟု ခပ်တိုးတိုး ပြောလိုက်သည်။</p> <p>ဧကရာဇ်ယုမှာ ဇဝေဇဝါ ဖြစ်သွားပြီး သူ့ကို နားမလည်နိုင်စွာ ကြည့်နေမိသည်။</p> <p>ကျန်းမိသားစု ဘိုးဘေးသည် များစွာ မပြောတော့ဘဲ သူ့ကို စွမ်းအင်ဖြင့် လွှမ်းခြုံကာ ချင်းကျိုးမြို့ဘက်သို့ ပျံသန်းသွားခဲ့သည်။</p> <p>လမ်းခရီးတွင် သူသည် ပြန်လည် နိုးထလာပြီးနောက် ကျင့်ကြံအားထုတ်နေခဲ့သဖြင့် သေမျိုးလောက၏ ကိစ္စရပ်များကို လှည့်မကြည့်နိုင်ခဲ့ခြင်း ဖြစ်ကြောင်း ဧကရာဇ်ယုကို ရှင်းပြခဲ့သည်။</p> <p>သူ၏ ရှင်းပြချက်ကို ကြားသောအခါ ဧကရာဇ်ယုမှာ ဂုဏ်ယူဝမ်းမြောက်သလို အံ့ဩလည်း သွားခဲ့သည်။ ထို့နောက် ကျန်းမိသားစု ဘိုးဘေးက ကောင်းကင်ဘုံအသီးသီး၏ ကိစ္စများကို ပြောပြသောအခါ ဧကရာဇ်ယုမှာ ထိတ်လန့်တုန်လှုပ်သွားပြီး တိတ်ဆိတ်သွားခဲ့သည်။</p> <p>သူတော်စင်များမှာ အသင့်ပြင်ထားပြီး ဖြစ်သဖြင့် လူတိုင်းကို လျင်မြန်စွာ စုစည်းကာ အင်မော်တယ်တံခါးဆီသို့ ပြန်သွားကြသည်။</p> <p>အင်မော်တယ်တံခါးကို ဖြတ်ကျော်ပြီးနောက် ဧကရာဇ်ယုနှင့် လီမိသားစုဝင်များအားလုံး အင်မော်တယ်တံခါးအတွင်းသို့ ရောက်ရှိသွားကြသည်။</p> <p>လီမိသားစုဝင်များအပြင် ရှမိသားစု၏ အကြီးအကဲ ရှလင်းလုံလည်း ပါဝင်လာခဲ့သည်။ သူ(မ)သည် လီဟောင်နှင့် အကြိမ်အနည်းငယ် ဆုံဖူးသူ ဖြစ်သဖြင့် သူတော်စင်များက သူ(မ)ကို တမန်တော်တစ်ဦးအဖြစ် ခေါ်ဆောင်လာခဲ့ခြင်း ဖြစ်သည်။</p> <p>"မဟာကောင်းကင်ရိုင်းကြင်ယာတော်မိသားစုကိုတော့ ယင်ယန်မဟာသူတော်စင်က ဖိတ်ကြားပေးလိမ့်မယ်" ဟု မင်မိသားစု သူတော်စင်က ပြောလိုက်သည်။</p> <p>အရင်းအမြစ် ဘိုးဘေးက အနည်းငယ် ခေါင်းညိတ်ပြပြီးနောက် လူတိုင်းကို ဦးဆောင်ခေါ်သွားခဲ့သည်။</p> <p>"ဒါက သူတော်စင်နယ်မြေလား"</p> <p>"ဘယ်လောက်တောင် ကြွယ်ဝတဲ့ စွမ်းအားတွေလဲ၊ ကျင့်ကြံခြင်း မလုပ်ရင်တောင် ဒီစွမ်းအားတွေက ခန္ဓာကိုယ်ထဲကို အလိုလို စီးဝင်နေသလိုပဲ။ အံ့ဩစရာ ကောင်းလိုက်တာ"</p> <p>"ဒီမှာ ရှိတဲ့သူတိုင်းက သိုင်းပညာရှင်တွေ ဖြစ်ကုန်ကြမှာ မဟုတ်လား"</p> <p>ဤနေရာသို့ အသစ်ရောက်လာသူများ အားလုံးမှာ ကောင်းကင်ဘုံအသီးသီး၏ ထူးခြားမှုများကို ခံစားရပြီး အံ့ဩမှင်သက်နေကြသည်။</p> <p>လီမူရှို့နှင့် ရန်ချန်ချန်တို့သည် လူအုပ်ကြားမှ လိုက်ပါလာရင်း သူတော်စင်နယ်မြေ၏ အငွေ့အသက်ကို ဂရုတစိုက် ခံစားနေကြသလို ဤနေရာ၏ အခြေအနေများကိုလည်း သတိထား၍ စုံစမ်းနေကြသည်။</p> <p>သူတော်စင်များမှာ သူတို့က လီဟောင်ကို ကောင်းမွန်စွာ ဖျောင်းဖျပေးနိုင်လိမ့်မည်ဟု မျှော်လင့်ထားကြသဖြင့် သူတို့ကို အလွန် ယဉ်ကျေးပျူငှာစွာ ဆက်ဆံကြသည်။</p> <p>နတ်ဘုရားဘုရင်တစ်ဦးတည်းသာ အေးစက်သော မျက်နှာထားကို ထိန်းထားပြီး လူစိမ်းများ အနားမကပ်ဝံ့သော အရှိန်အဝါကို ထုတ်ဖော်နေသဖြင့် မည်သူမျှ သူ့ကို စကားမပြောဝံ့ကြပေ။</p> <p>"ဟောင်ထျန်းဟာ သူတော်စင်တစ်ပါးရဲ့ လုပ်ကြံမှုကို ခံခဲ့ရတယ်လို့ ကျွန်တော် ကြားဖူးပါတယ်။ လေးစားအပ်တဲ့ အရှင်သူတော်စင်တို့ခင်ဗျာ... အဲဒါ တကယ်ပဲလားဆိုတာ သိချင်ပါတယ်၊ ပြီးတော့ အဲဒီ သူတော်စင်က ဘာဖြစ်သွားပြီလဲ။ အဲဒီကလေးက ကောင်းကင်ဘုံမှာ ဘယ်သူ့အကူအညီမှ မပါဘဲ တစ်ယောက်တည်း ဘယ်လိုများ ဖြတ်သန်းခဲ့ရတာလဲ"</p> <p>ဧကရာဇ်ယုသည် လီမိသားစုဝင်များထက် ကောင်းကင်ဘုံ၏ အကြောင်းကို ပိုမို သိရှိထားသော်လည်း အချို့သော လျှို့ဝှက်ချက်များကို သူတို့ကို မပြောပြခဲ့ပေ။ ယခုအခါတွင်မူ သူသည် ဤဖြစ်ရပ်များအကြောင်းကို မမေးဘဲ မနေနိုင်တော့ပေ။</p> <p>သူ၏ မေးခွန်းများကို ကြားသောအခါ သူတော်စင်များမှာ တစ်ဦးကိုတစ်ဦး ကြည့်လိုက်ကြသည်။ အရင်းအမြစ် ဘိုးဘေးသည် ဖုံးကွယ်မထားဘဲ ပြောပြလိုက်သည်။</p> <p>"အဲဒီ သူတော်စင်ကို ဟောင်ထျန်းသူတော်စင်က သတ်ပစ်လိုက်ပါပြီ။ သူတော်စင်နယ်မြေမှာ သူရဲ့ တိုးတက်မှုက အရမ်းကို မြန်ဆန်လွန်းတယ်။ နှစ်အနည်းငယ်အတွင်းမှာတင် သူက ပြိုင်ဘက်ကင်းသူ တစ်ယောာက်ဖြစ်လာခဲ့တယ်..."</p> <p> </p> <p> </p> <p>***</p>


Save