Book List

<h2 style="text-align: center;">အခန်း (၄၀၃)</h2> <h2 style="text-align: center;">*</h2> <p> </p> <p> </p> <p> </p> <p> </p> <p style="text-align:justify">မက်တော်မီနေးက သူ့ခေါင်းကို ပွတ်ရင်း ပြောသည်။ "ခုနက ငါ ဖောင်းဘောလုပ်ဖို့ ခဏ ဝေခွဲမရ ဖြစ်သွားတယ်... နောက်တစ်ခါကျရင်တော့ ပိုပြီး ပြတ်ပြတ်သားသား လုပ်ပါ့မယ်..." </p> <p style="text-align:justify">ဆာလာက ဘောလုံးကို အေးအေးဆေးဆေး ထိန်းထားသဖြင့် ဆာလာ ကျော်ထွက်လိမ့်မည်ဟု သူက မထင်ထားခဲ့မိပေ။ ထိုသို့ သတိလစ်သွားစဉ်မှာပင် တိုက်စစ်က ဖောက်ထွက်သွားခြင်း ဖြစ်သည်။</p> <p style="text-align:justify">"ငါလည်း ပိုပြီး ရှေ့တိုးနေပြီး စကော့ကို စောစောစီးစီး ကူညီပေးခဲ့သင့်တယ်..." လုခ်ရှောကလည်း အမှားကို ဝန်ခံလိုက်သည်။</p> <p style="text-align:justify">"ဟုတ်တယ်... အာနိုးလ် ဒီနေ့ ပွဲမထွက်ဘူးဆိုတော့ လီဗာပူးက တောင်ပံမှာ ထပ်ဆင့်တိုက်စစ် ဆင်တာ နည်းလိမ့်မယ်... ဒါကြောင့် မင်းတို့ ရှေ့ကို နည်းနည်း ပိုတိုးနေလို့ ရတယ်..." ချူဖုန်းက အားပေးလိုက်သည်။</p> <p style="text-align:justify">လူတွေက အချင်းချင်း စကားပြောဆို ဆက်သွယ်နေသရွေ့ ပြဿနာမရှိပေ။ သူ ကြောက်သည်မှာ လူတွေ စကားမပြောတော့ဘဲ စိတ်ဓာတ်ကျနေကြမည်ကိုသာ ဖြစ်သည်။</p> <p style="text-align:justify">နောက်ဆုံးတွင် သူက ဒီဂီယာကို ကြည့်ကာ ပြောလိုက်သည်။ "ဒေးဗစ်... မင်းလည်း ပိုပြီး အာရုံစိုက်မှ ရမယ်... မင်းက ရွှေလက်အိတ်ရှင်ပဲ။ သူတို့ကို ဒီလောက် လွယ်လွယ်ကူကူ ဂိုးပေးလို့ မဖြစ်ဘူး..."</p> <p style="text-align:justify">"ခုနက ကာကွယ်မှုမှာ ငါ အမှားအယွင်း အချို့ ရှိသွားတယ်... နောက်ပိုင်းမှာတော့ ဒါမျိုး မဖြစ်စေရပါဘူး... လီဗာပူးကို အဝေးကန်ချက်တွေ ဆက်တိုက် ကန်ခွင့် မပေးသရွေ့ ငါတို့ အဆင်ပြေမှာပါ..." </p> <p style="text-align:justify">ဒီဂီယာက သူ၏ လက်အိတ်များကို ရေဖြင့် ဆေးလိုက်သည်။ ထို့နောက် တစ်ခုခုကို သတိရသွားဟန်ဖြင့် ချူဖုန်းကို ကြည့်ကာ ပြောလိုက်သည်။ </p> <p style="text-align:justify">"ချူ... မင်းလည်း ပိုပြီး ကြိုးစားမှ ရမယ်... မင်း ရှေ့တန်းမှာ ခြိမ်းခြောက်နိုင်လေလေ၊ ငါတို့ နောက်တန်းမှာ ဖိအား လျော့လေလေပဲ..."</p> <p style="text-align:justify">ချူဖုန်းက ခေါင်းညိတ်လိုက်သည်။ သူကလည်း ထိုသို့ပင် တွေးထားသည်။ လီဗာပူးက ဘောလုံး ပေးပို့မည့် လမ်းကြောင်းများကို ပိတ်ထားသော်လည်း သူ ငြိမ်နေရမည်ဟု ဆိုလိုခြင်း မဟုတ်ပေ။ </p> <p style="text-align:justify">ဘယ်သူမှ မကူညီနိုင်လျှင် သူကိုယ်တိုင်ပဲ လုပ်ကြည့်မည်။ အောင်မြင်သည်ဖြစ်စေ၊ မအောင်မြင်သည် ဖြစ်စေ ကြိုးစားပင် မကြိုးစားဝံ့လျှင် ပရီးမီးယားလိဂ်၏ လစာအများဆုံး ကစားသမား ဖြစ်နေရကျိုး မနပ်ပေ။ </p> <p style="text-align:justify">ထို့ပြင် သူ၏ ရှေ့တွင် ရှိနေသည်မှာ လိဂ်၏ အကောင်းဆုံး ဗဟိုနောက်ခံလူ ဗန်ဒိုက် မဟုတ်ပါလား။ </p> <p style="text-align:justify">မော်ရင်ညိုက သူ့ကို ခဏခဏ ပြောလေ့ရှိသည်။ </p> <p style="text-align:justify">"လူသားတွေရဲ့ စွမ်းဆောင်ရည်က အကန့်အသတ် မရှိဘူး... ဒါပေမဲ့ အဲဒီစွမ်းအားတွေကို သေတ္တာထဲမှာ သော့ခတ်ထားတာ... ယုံကြည်မှုကပဲ အဲဒီသော့ကို ဖွင့်နိုင်မှာ..."</p> <p style="text-align:justify">ချူဖုန်းသည် သူ၏ စွမ်းရည်အပေါ် လုံးဝ သံသယ မရှိပေ။ </p> <p style="text-align:justify">တီ…</p> <p style="text-align:justify">ခရာသံနှင့်အတူ ပွဲပြန်လည် စတင်သည်။ ချူဖုန်းက ဘောလုံးကို ပေါ့ဘာထံ ပေးလိုက်ပြီး လီဗာပူး၏ ခံစစ်တန်းဆီသို့ တိုက်ရိုက် ဦးတည်သွားကာ လူကျွံဘောစည်း အနီးတွင် ဝဲပျံနေတော့သည်။ ဗန်ဒိုက် တစ်ယောက်တည်းကသာ သူ့ကို ထိန်းချုပ်ထားနိုင်ပါ့မလား။ လီဗာပူးကသာ ထိုသို့ တွေးလိုက်သည်နှင့် မန်ယူက အဝေးဘော လှမ်းတင်ပေးလိုက်မည် ဖြစ်သည်။</p> <p style="text-align:justify">လီဗာပူး၏ ဖိအားပေးမှုမှာ အနည်းငယ် ဖရိုဖရဲ ဖြစ်နေပုံရသည်။ နဗီးလ်သည် အဖြေကို ရှာမရ ဖြစ်နေသည်။ သူက နည်းပြကောင်း တစ်ယောက် မဟုတ်ခဲ့သည်မှာလည်း ထိုအကြောင်းအရင်းကြောင့်ပင် ဖြစ်ပေလိမ့်မည်။</p> <p style="text-align:justify">ကွင်းဘေးတွင် ရပ်နေသော မော်ရင်ညိုကမူ ရှင်းပြလိုက်သည်။ "လီဗာပူးရဲ့ လှုပ်ရှားမှုနဲ့ ချူဖုန်းရဲ့ ပြေးလွှားမှုကို ပေါင်းစပ်ကြည့်လိုက်ရင် သူက လီဗာပူးရဲ့ ဖိအားပေးမှုကို ဖျက်ဆီးလိုက်တာကို တွေ့ရလိမ့်မယ်..."</p> <p style="text-align:justify">ဖာရီယာက နားမလည်သေးပေ။</p> <p style="text-align:justify">"ဥပမာဆိုရင် ငါတို့က ညာဘက်ခြမ်းကနေ တိုက်စစ်ဆင်မယ်ဆိုရင် လီဗာပူးက ရှေ့ကို တိုးလာပြီး လူအင်အား အသာစီးနဲ့ ဖိအားပေးသင့်တယ် မဟုတ်လား... ဒါပေမဲ့ အဲဒီအချိန်မှာပဲ ချူဖုန်းက အဲဒီဘက်ခြမ်းက နေရာလွတ်ထဲကို ပြေးဝင်သွားမယ်... အဲဒီအခါ လီဗာပူး ကစားသမားတွေက ရှေ့ကို မတက်ရဲတော့ဘူး... ဒါကြောင့် သူတို့ရဲ့ ဖိအားပေးမှုက ထိရောက်မှု မရှိတော့တာပဲ..." မော်ရင်ညိုက ရိုးရှင်းစွာ ရှင်းပြလိုက်သည်။</p> <p style="text-align:justify">ဖာရီယာက ရုတ်တရက် သဘောပေါက်သွားသည်။ "ဒါက တော်တော်လေး ရိုးရှင်းတာပဲနော်..."</p> <p style="text-align:justify">ဒါကိုကြားတော့ မော်ရင်ညိုက ဒေါသထွက်ကာ ရယ်မိသွားသည်။ ဒါက ဘယ်လိုလုပ် ရိုးရှင်းမှာလဲ။ </p> <p style="text-align:justify">လီဗာပူး၏ ခံစစ်အခြေအနေကို ခန့်မှန်းရမည်ဖြစ်သလို မန်ယူ၏ တိုက်စစ်လမ်းကြောင်းကိုလည်း လမ်းညွှန်ပေးရမည် ဖြစ်သည်။ ထိုကဲ့သို့ ခက်ခဲသော ပြေးလမ်းကြောင်းကို ကြည့်လိုက်လျှင် ဘာလော့တယ်လီသာဆိုလျှင် ဦးနှောက်တောင် ပေါက်ကွဲသွားပေလိမ့်မည်။ ထို့အပြင် လီဗာပူး ကစားသမားများ ပင်ပန်းလာသောကြောင့်သာ ချူဖုန်းက ထိုကဲ့သို့ ဖောက်ထွက်နိုင်ခြင်း ဖြစ်သည်။</p> <p style="text-align:justify">"ကွင်းလယ်မှာ နေရာလွတ်တွေ ပိုများလာပြီ..." </p> <p style="text-align:justify">ပေါ့ဘာ ဘောလုံးကို ထပ်မံရရှိချိန်တွင် သူက ရှင်းရှင်းလင်းလင်း ခံစားလိုက်ရသည်။ ယခင်က သူ ခြေစွမ်းမပြနိုင်ခဲ့သည်မှာ ဘောလုံးထိန်းရန် နေရာလွတ် နည်းလွန်းသောကြောင့် ဖြစ်သော်လည်း အခုတော့ သူ လွတ်လွတ်လပ်လပ် ကစားနိုင်ပြီ ဖြစ်သည်။</p> <p style="text-align:justify">ယခုတစ်ကြိမ်တွင် လီဗာပူးသည် ထပ်မံ အနှောင့်အယှက် မခံလိုသဖြင့် ပေါ့ဘာထံမှ ဘောလုံးကို အတင်းလုယူရန် ကြိုးစားသည်။ ပေါ့ဘာက V ပုံစံ ဘောလုံးလိမ်ကွက်ကို အသုံးပြု၍ ဖာဘင်ညိုကို ကျော်ဖြတ်ကာ နောက်သို့ ဆင်းပေးနေသော ချူဖုန်းထံသို့ မျှောပေးလိုက်သည်။</p> <p style="text-align:justify">"မင်းရဲ့ ဘယ်ဘက်ကို သတိထား" </p> <p style="text-align:justify">ဗန်ဒိုက်က ပြတ်ပြတ်သားသား သတိပေးလိုက်သည်။ ရောဘတ်ဆန်က ရှေ့သို့ အလွန် တိုးနေသဖြင့် မာရက်ဇ်ကို မမီတော့ပေ။ ချူဖုန်းကသာ ဘောလုံးကို လှည့်၍ ထောင့်ဖြတ် ပေးပို့လိုက်မည်ဆိုလျှင် မန်ယူအတွက် တစ်ဦးချင်း ထိပ်တိုက်တွေ့ဆုံမည့် အခွင့်အရေး ရရှိသွားပေလိမ့်မည်။</p> <p style="text-align:justify">ဒါကို ဖျက်ဆီးရမည်။ မာတစ်က ဗန်ဒိုက်၏ အတွေးကို သိနေပုံရသည်။ သူသည် ချူဖုန်းထံမှ ဘောလုံးကို လုယူရန် ယုံကြည်မှု မရှိသော်လည်း လူကိုတော့ တားဆီးနိုင်သည်။ ထို့ကြောင့် သူက ချူဖုန်းကို ဆွဲလှဲလိုက်တော့သည်။</p> <p style="text-align:justify">တီ…</p> <p style="text-align:justify">ဒိုင်လူကြီးက ခရာမှုတ်၍ ဖောင်းဘော သတ်မှတ်ပေးလိုက်ပြီး မန်ယူကို တိုက်စစ်ဇုန်အတွင်း ပြစ်ဒဏ်ဘော ရရှိစေသည်။ </p> <p style="text-align:justify">"လီဗာပူးအနေနဲ့ အဝါကတ် တစ်ကတ် အထိခံပြီး မန်ယူရဲ့ တိုက်စစ်ကို တားဆီးလိုက်တာက လက်ခံနိုင်စရာပါပဲ..."</p> <p style="text-align:justify">"ကံမကောင်းတာက ဂိုးနဲ့ အရမ်းနီးနေလို့ ကန်သွင်းဖို့ ခက်ခဲသွားတာပါပဲ..." နဗီးလ်က ခေါင်းခါလိုက်သည်။</p> <p style="text-align:justify">သူ ခန့်မှန်းသည့်အတိုင်းပင် အလီဆန်က ဘောလုံးကို ဖမ်းယူလိုက်သည်။ ချူဖုန်းက အသက်ကို ပြင်းပြင်း ရှူရင်း LED ဘုတ်ကို ကြည့်လိုက်သည်။ ပထမပိုင်း ပြီးတော့မည်ဖြစ်သဖြင့် အချိန်ပို များစွာ ရလိမ့်မည် မဟုတ်ဟု သူ ခန့်မှန်းထားသည်။ </p> <p style="text-align:justify">မန်ယူက အရှိန်ရလာသည်ကို မြင်သောအခါ လီဗာပူးက အခြေအနေကို ထိန်းသိမ်းရန်အတွက် ခံစစ်ကို ပို၍ တည်ငြိမ်အောင် ကစားလိုက်သည်။ ပထမပိုင်း အပြီးတွင် မန်ယူသည် လီဗာပူးကို ၀-၁ ဖြင့် ရှုံးနိမ့်နေပြီး လီဗာပူးက အသာစီးဖြင့် အနားယူချိန်သို့ ရောက်ရှိသွားလေတော့သည်။</p> <p style="text-align:justify">“ပထမပိုင်းမှာ လီဗာပူးကို တစ်ဂိုးပဲ ပေးလိုက်ရတာက တကယ်တော့ မဆိုးလှပါဘူး... မင်းတို့ကိုယ် မင်းတို့ ဖိအားတွေ အများကြီး မပေးထားကြနဲ့...”</p> <p style="text-align:justify">မော်ရင်ညိုက ကစားသမားတွေကို နှစ်သိမ့်ပေးနေခြင်း မဟုတ်။ သူ၏ နည်းဗျူဟာ အစီအစဉ်အရ နှစ်ဂိုးအထိ ပေးလိုက်ရလျှင်ပင် လက်ခံနိုင်သည့် အနေအထားတွင် ရှိနေသည်။ အကြောင်းမှာ ကလော့ပ်၏ ဟဲဗီးမက်တယ် တိုက်စစ်နှင့် လီဗာပူး၏ အထူးအဆန်း ဖိအားပေးမှုဒဏ်ကို ဥရောပတွင် တောင့်ခံနိုင်သည့်အသင်းမှာ လက်ချိုးရေတွက်၍ ရနိုင်သောကြောင့် ဖြစ်သည်။ </p> <p style="text-align:justify">ထို့အပြင် ချန်ပီယံလိဂ်သည် လိဂ်ပြိုင်ပွဲနှင့် မတူဘဲ အသင်း၏ တည်ငြိမ်မှုထက် တိုတောင်းသော အချိန်အတွင်း အစွမ်းကုန် ပေါက်ကွဲနိုင်စွမ်းကို ပို၍ ဦးစားပေးရသည်။ ထို့ကြောင့်ပင် မော်ရင်ညိုက ချန်ပီယံလိဂ်တွင် လီဗာပူးသည် မန်စီးတီးထက် ပို၍ ကြောက်စရာကောင်းသည်ဟု ယူဆထားခြင်း ဖြစ်သည်။</p> <p style="text-align:justify">“ဒုတိယပိုင်းမှာ လီဗာပူးရဲ့ လှုပ်ရှားမှုကို မျက်ခြေမပြတ် စောင့်ကြည့်ရမယ်... သူတို့ရဲ့ တိုက်စစ်အရှိန် နည်းနည်း လျော့သွားတာနဲ့ ငါတို့က ရှေ့ကို တိုးပြီး ခံစစ်ကနေ တိုက်စစ်ကို ချက်ချင်း ပြောင်းရမယ်... သူတို့ကို အသက်ရှူခွင့် လုံးဝ မပေးရဘူး...”</p> <p style="text-align:justify">မန်ယူကစားသမားများ စိတ်တည်ငြိမ်သွားသည်နှင့် မော်ရင်ညိုက နည်းဗျူဟာများကို စတင် ရှင်းပြတော့သည်။</p> <p style="text-align:justify">“ချူ... ရှေ့တန်းက တိုက်စစ်ဆင်မှုတွေကို မင်းပဲ ဦးဆောင်ရမယ်... ဘယ်နေရာ၊ ဘယ်အချိန်မှာ တိုက်စစ်စမလဲ ဆိုတာကိုတော့ မင်းကိုယ်တိုင်ပဲ ဆုံးဖြတ်လိုက်...”</p> <p style="text-align:justify">ချူဖုန်း၏ ပွဲဖတ်နိုင်စွမ်းကို မော်ရင်ညိုက အပြည့်အဝ ယုံကြည်ထားသည်။</p> <p style="text-align:justify">“ကျွန်တော် ညာဘက်ခြမ်းမှာပဲ နေမယ်... မာတစ်နားမှာပေါ့... သူက အဝါကတ် တစ်ကတ် ထိထားပြီးသားဆိုတော့ သူ့ဆီကနေ စဖောက်တာ ပိုကောင်းမယ်...” ချူဖုန်းက ခေါင်းညိတ်ရင်း ပြောလိုက်သည်။</p> <p style="text-align:justify">လီဗာပူး၏ ဗဟိုနောက်ခံလူ နှစ်ယောက်လုံးမှာ အဆင့်အတန်း မြင့်မားလှသဖြင့် အတင်း တိုးဖောက်ရန်မှာ ခက်ခဲလှသည်။ ချူဖုန်းအနေဖြင့် မိမိကိုယ်ကိုယ် မယုံကြည်ခြင်း မဟုတ်ဘဲ ဘောလုံးကွင်းသည် တစ်ကိုယ်တော် စွမ်းရည် ပြရမည့် နေရာ မဟုတ်ဟု သူ ခံယူထားသောကြောင့် ဖြစ်သည်။ အနည်းဆုံးသော ပေးဆပ်မှုဖြင့် ပြိုင်ဘက်၏ ခံစစ်ကို ဖျက်ဆီးပြီး ဂိုးသွင်းနိုင်ရန်ကသာ အဓိက ဖြစ်သည်။</p> <p style="text-align:justify">“သူတို့ရဲ့ ညာနောက်ခံလူ မီလ်နာက သိပ်မသန်မာဘူး... ငါ ကွင်းလယ်ဘက်ကို တိုးဝင်ပြီး မင်းကို ကူညီပေးမယ်... မာတစ်ကို လူအုပ်နဲ့ ဝိုင်းထားဖို့ ကြိုးစားကြည့်ရအောင်...” ရက်ရှ်ဖို့ဒ်ကလည်း သူ၏ အကြံဉာဏ်ကို ထုတ်ဖော်ပြောဆိုသည်။</p> <p style="text-align:justify">“နောက်ဆုံးအနေနဲ့ တစ်ခု ထပ်ပြောချင်တာက... လီဗာပူးက တကယ် သန်မာတယ်။ ငါတို့ ထင်ထားတဲ့ အတိုင်း ဖြစ်လာမှာ မဟုတ်ဘူး... ပွဲထဲမှာ သူတို့ရဲ့ နည်းဗျူဟာ အပြောင်းအလဲတွေကလည်း ချက်ချင်း ဖြစ်လာနိုင်တယ်... တစ်ခုခု မမျှော်လင့်တာ ဖြစ်လာရင်လည်း မတုန်လှုပ်ကြနဲ့”</p> <p style="text-align:justify">မော်ရင်ညိုက ကစားသမားများ၏ မျက်လုံးများကို စိုက်ကြည့်လိုက်သည်။ သူ မန်ယူကို စတင် ကိုင်တွယ်ကတည်းက အရာရာ အဆင်ပြေနေခဲ့သဖြင့် ယခုကဲ့သို့ အခြေအနေတွင် အနည်းငယ် စိုးရိမ်နေမိခြင်း ဖြစ်သည်။</p> <p style="text-align:justify">“စိတ်မပူပါနဲ့ ဆရာ...”</p> <p style="text-align:justify">ချူဖုန်းက ပြုံးလျက် ပြောလိုက်ပြီး သူ၏ ညာလက်ကို ရှေ့သို့ ဆန့်ထုတ်လိုက်သည်။ “ညီအစ်ကိုတို့... လီဗာပူးကို အလဲထိုးဖို့ ငါတို့ အစွမ်းကုန် ကြိုးစားကြရအောင်”</p> <p style="text-align:justify">“လာထားဟေ့”</p> <p style="text-align:justify">လက်ဝါးပေါင်း တစ်ဒါဇင်ကျော် ထပ်တူကျသွားသည့်အချိန်တွင် အဝတ်လဲခန်းအတွင်းမှ ဟိန်းထွက်လာသော အော်ဟစ်သံက လှိုဏ်ခေါင်းအတွင်း ပဲ့တင်ထပ်သွားသည်။ ချူဖုန်း တံခါးကို တွန်းဖွင့်ပြီး ထွက်လာချိန်တွင် လီဗာပူး ကစားသမားများနှင့် ဆုံမိသည်။ သူသည် အသင်းခေါင်းဆောင် လက်ပတ် ပတ်ထားသော ဟန်ဒါဆန်ကို မော့ကြည့်လိုက်သည်။</p> <p style="text-align:justify">ဆန်းဒါးလန်းသား လီဗာပူး အသင်းခေါင်းဆောင်သည် တစ်ချိန်က မန်ယူပရိသတ် အမာခံဖြစ်ခဲ့ဖူးသလို သရဲနီ တပ်ဖွဲ့ထဲသို့ ဝင်ရောက်ရန်ပင် စဉ်းစားခဲ့ဖူးသူ ဖြစ်သည်။ သို့သော် မန်ယူ ဆေးအဖွဲ့က ဖာဂူဆန်ကို အကြံပေးခဲ့သည်မှာ - ဟန်ဒါဆန်၏ အပြေးဟန်မှာ ထူးဆန်းလွန်းသဖြင့် ဒဏ်ရာ မကြာခဏ ရနိုင်ခြေ ရှိသည် ဟူ၍ ဖြစ်သည်။ နောက်ဆုံးတွင် မန်ယူက ဟန်ဒါဆန်ကို ခေါ်ယူရန် လက်လျှော့ခဲ့သည်။</p> <p style="text-align:justify">သို့သော် မန်ယူက စွန့်ပစ်ခဲ့သော ထိုကောင်လေးသည် ပြိုင်ဘက် လီဗာပူး၏ ခေါင်းဆောင်တစ်ဦးအဖြစ် တဖြည်းဖြည်း ကြီးထွားလာလိမ့်မည်ဟု မည်သူမျှ မထင်ထားခဲ့ကြပေ။ ထို့ပြင် ၂၀၁၆-၁၇ ရာသီတွင် သူသည် ကွင်းအတွင်း အများဆုံး ပြေးလွှားနိုင်သူအဖြစ် စံချိန်တင်ခဲ့သည်။ </p> <p style="text-align:justify">သို့သော် မန်ယူဆေးအဖွဲ့၏ ခန့်မှန်းချက်မှာလည်း လုံးဝ မမှားခဲ့ပေ။ ဟန်ဒါဆန်သည် ခြေဖဝါး ရောင်ရမ်းသည့် ရောဂါကို ခံစားနေရပြီး ယခုအခါ မတ်တပ်ရပ်နေလျှင်ပင် အမြဲတမ်း နာကျင်နေရသူ ဖြစ်သည်။</p> <p style="text-align:justify">ထိုနာကျင်မှုမျိုးမှာ လူတိုင်း သည်းခံနိုင်သည့်အရာ မဟုတ်ပေ။ သို့သော် ဟန်ဒါဆန်ကမူ တည်ငြိမ်နေဆဲ ဖြစ်ကာ အကောင်းဆုံး အခြေအနေတွင် ရှိနေသယောင်ပင်။ သူတို့ကြားတွင် မည်သည့် စကားတစ်ခွန်းမျှ မဟကြပေ။ နှစ်သင်းလုံးမှ ကစားသမားများ ကွင်းထဲသို့ ပြန်လည် ရောက်ရှိလာကြပြီး ဘက်ပြောင်းကာ နေရာယူလိုက်ကြသည်။</p> <p style="text-align:justify">***</p>


Save