Book List

<h2 style="text-align: center;">အခန်း ၃၃၄</h2> <h2 style="text-align: center;">တစ်ချက်တည်းနဲ့ အလဲထိုးခြင်း</h2> <h2 style="text-align: center;">*</h2> <p style="text-align:justify"> </p> <p style="text-align:justify">"ဆယ်ရက်ကျော်နေပြီပဲ... အကဲဖြတ် ခရစ္စတယ် တစ်ထောင်ကျော်လေးပဲ စုမိသေးတယ်... ငါတို့ရဲ့ တိုးတက်မှုက သိပ်မကောင်းလှဘူးလို့ ခံစားရတယ်"</p> <p style="text-align:justify"> </p> <p style="text-align:justify">တောနက်ထဲတွင် အထက်တန်းလွှာ လေ့ကျင့်ရေးစခန်းမှ လင်းဟွေ နှင့် သူ၏အဖွဲ့က ရွှံ့ဗွက်ထနေသော မြေပြင်ပေါ်၌ လျှောက်လှမ်းနေကြသည်။ သာမန် စွမ်းရည်ပိုင်ရှင် အဖွဲ့များနှင့် ယှဉ်လျှင် သူတို့က များစွာ ပို၍ ပေါ့ပါးလွတ်လပ်နေပုံရသည်။ ဆဋ္ဌမအဆင့်နိမ့် တိုက်ခိုက်ရေးသမား နှစ်ယောက်နှင့် ပဉ္စမအဆင့် တိုက်ခိုက်ရေးသမား သုံးယောက် ပါဝင်သောကြောင့် ဤတောနက်ထဲတွင် တကယ်တမ်း စိုးရိမ်စရာ သိပ်မရှိလှပေ။ ဆဋ္ဌမအဆင့်မြင့် သားရဲ တစ်ကောင်နှင့် တွေ့လျှင်တောင် မအနိုင်ယူနိုင်ပါက ထွက်ပြေးနိုင်စွမ်း ရှိကြသေးသည်။</p> <p style="text-align:justify"> </p> <p style="text-align:justify">"ထျန်းယွီ သိုင်းသင်တန်းကျောင်းက အဖွဲ့တွေ အရမ်းများလွန်းတယ်.... ဒီအကဲဖြတ် ခရစ္စတယ် တစ်ထောင်ကျော်လောက်ကို လုယူနိုင်ခဲ့တာကပဲ တော်တော်လေး ကောင်းနေပါပြီ"</p> <p style="text-align:justify"> </p> <p style="text-align:justify">ဤသည်က အဖွဲ့ခေါင်းဆောင် ချင်းကျိန့် ၏ ကူကယ်ရာမဲ့စွာ ပြောလိုက်သော စကားဖြစ်သည်။ ယခင်နှစ်များက ထျန်းယွီ သိုင်းသင်တန်းကျောင်းက စွမ်းရည်ပိုင်ရှင် အမြောက်အမြားကို ခေါ်ဆောင်လာလေ့ရှိသော်လည်း အဖွဲ့တစ်ဖွဲ့စီ၏ အင်အားကတော့ သိပ်အစွမ်းထက်လှသည်ဟု မသတ်မှတ်နိုင်ခဲ့ပေ။ သို့သော် ဒီနှစ်တွင်တော့ ဂျပန်မှ ထိုSအဆင့် စွမ်းရည်ပိုင်ရှင် ပါလာသောကြောင့်လား မသိပေ။ ထျန်းယွီ သိုင်းသင်တန်းကျောင်းမှ အဖွဲ့များ၏ အင်အားက မနှစ်ကထက် သိသိသာသာကို တိုးတက်လာခဲ့သည်။</p> <p style="text-align:justify"> </p> <p style="text-align:justify">အကဲဖြတ် ခရစ္စတယ် များကို ရှာတွေ့သည့်တိုင် ထျန်းယွီ သိုင်းသင်တန်းကျောင်းမှ အဖွဲ့များက လမ်းခုလတ်မှ ဖြတ်လုသွားသည်က အကြိမ်ပေါင်း မနည်းတော့ချေ။</p> <p style="text-align:justify"> </p> <p style="text-align:justify">"အဲဒါတော့ ဟုတ်တယ်" လင်းဟွေက ခေါင်းအနည်းငယ် ညိတ်လိုက်ပြီးနောက် သိချင်စိတ်ဖြင့် မေးလိုက်သည်။ "ဆရာချင်း... ဒီအကဲဖြတ် ခရစ္စတယ် တွေက တကယ်ပဲ အဲဒီလောက် အသုံးဝင်လို့လား... ပိုများများရလေ ဆုလာဘ် ပိုရလေပဲလား"</p> <p style="text-align:justify"> </p> <p style="text-align:justify">"မသေချာဘူး"</p> <p style="text-align:justify"> </p> <p style="text-align:justify">ချင်းကျိန့်က ခေါင်းယမ်းလိုက်သည်။ "အရင်နှစ်တွေက အမှတ် ၉ ယဉ်ကျေးမှု အပျက်အစီး ထဲကို ဝင်ရောက်ခဲ့တဲ့ စွမ်းရည်ပိုင်ရှင်တွေရဲ့ နောက်ဆုံး ရရှိခဲ့တဲ့ အကျိုးအမြတ်တွေကို ကြည့်ရသလောက်ဆိုရင်တော့... စမ်းသပ်မှုအပြီး ဆုလာဘ် ခွဲဝေမှု လုပ်ငန်းစဉ်မှာ တစ်ဦးချင်းစီရဲ့ မွေးရာပါ ပါရမီက အဓိက အဆုံးအဖြတ်ပေးတဲ့ နေရာမှာ ရှိနေတယ်"</p> <p style="text-align:justify"> </p> <p style="text-align:justify">"အကယ်လို့ မင်းရဲ့ ပါရမီက အရမ်းနိမ့်ကျနေမယ်ဆိုရင် အကဲဖြတ် ခရစ္စတယ် တွေ ဘယ်လောက်ပဲ များများ ဘာမှ အထောက်အကူ ဖြစ်လာမှာ မဟုတ်ဘူး"</p> <p style="text-align:justify"> </p> <p style="text-align:justify">"ဒီလိုကိုး... ကျွန်တော့်ရဲ့ ပါရမီနဲ့ဆိုရင်တော့ သေချာပေါက် ဆုလာဘ် အများကြီး ရမှာ ကျိန်းသေတယ်" လော့ဟန်က သူ၏ ရင်ဘတ်ကို ပုတ်ကာ ယုံကြည်မှု အပြည့်ဖြင့် ပြောလိုက်သည်။</p> <p style="text-align:justify"> </p> <p style="text-align:justify">အခြားတစ်ဖက်တွင်လည်း ကျက်သရေရှိစွာ ရပ်နေသော ရှာလန်၏ လှပသော မျက်ဝန်းများထဲတွင် မျှော်လင့်တကြီး အရိပ်အယောင်များ ရှိနေခဲ့သည်။ သူမ၏ Aအဆင့် ဟင်းလင်းပြင် စွမ်းရည်က သူမအတွက် သင့်တင့်လျောက်ပတ်သော ဆုလာဘ်အချို့ ရရှိရန် လုံလောက်သင့်ပေသည်။</p> <p style="text-align:justify"> </p> <p style="text-align:justify">"ကျွန်တော် တောင်းဆိုချင်တာက သိပ်မမြင့်ပါဘူး နောက်ဆုံးကျရင် စွမ်းအင်ဓာတ် လက်နက် တစ်လက်လောက် ရရင်ကို ကျေနပ်ပါပြီ" လင်းဟွေက ရယ်မောလျက် ပြောသည်။</p> <p style="text-align:justify"> </p> <p style="text-align:justify">စွမ်းအင်ဓာတ် လက်နက်များက စွမ်းအင်ပညာရှင်များအတွက် သီးသန့် လက်နက်ကိရိယာများ ဖြစ်သည်။ အကယ်၍ စွမ်းအင်ပညာရှင် တစ်ယောက်က သင့်တော်သော စွမ်းအင်ဓာတ် လက်နက် တစ်လက်ကို ပိုင်ဆိုင်ထားပါက သူတို့၏ စွမ်းအားကို အနည်းဆုံး ၃၀ ရာခိုင်နှုန်းအထိ မြှင့်တင်နိုင်ပေသည်။ စွမ်းအင်ဓာတ် လက်နက်များက အလွန်တရာ စျေးကြီးလှပြီး ယနေ့အချိန်အထိ သူနှင့် ကိုက်ညီသော လက်နက်တစ်လက်ကို သူ မပိုင်ဆိုင်နိုင်သေးပေ။</p> <p style="text-align:justify"> </p> <p style="text-align:justify">"ဒါနဲ့ စကားမစပ်... ဒီအမှတ် ၉ ယဉ်ကျေးမှု အပျက်အစီးထဲက စုဆောင်းထားတဲ့ ရတနာတွေက တကယ်ကို အံ့မခန်းပဲနော်"</p> <p style="text-align:justify"> </p> <p style="text-align:justify">စမ်းသပ်မှုကို တစ်နှစ်တစ်ကြိမ် ကျင်းပသည်ဟု တွက်ဆကြည့်လျှင် ၃၀၂၁ ကြိမ်မြောက်ဆိုသည်က အနည်းဆုံး နှစ်ပေါင်း သုံးထောင်ကျော် ကြာမြင့်နေပြီ ဖြစ်သည်။ နှစ်စဉ် ဆုလာဘ်များ ထုတ်ပေးနေသည့်တိုင် ရတနာအချို့က ယနေ့တိုင် တည်ရှိနေဆဲဖြစ်သည်။</p> <p style="text-align:justify"> </p> <p style="text-align:justify">လင်းဟွေက အံ့သြတကြီးဖြင့် လျှာသပ်လိုက်ပြီး ပြောသည်။ "ဘာလို့များ အဲဒီ နဝမအဆင့် သိုင်းသူတော်စင်တွေက ယဉ်ကျေးမှု အခြေစိုက်စခန်း တစ်ခုလုံးကို ပြောင်သလင်းခါအောင် မယူသွားကြတာလဲ"</p> <p style="text-align:justify"> </p> <p style="text-align:justify">"သူတို့ မယူချင်ဘူးလို့ မင်းထင်နေလား... အမှတ် ၉ ယဉ်ကျေးမှု အပျက်အစီးကို စတင်ရှာဖွေတွေ့ရှိပြီးကတည်းက သူတို့ ကြိုးစားခဲ့ကြပြီးပြီ"</p> <p style="text-align:justify"> </p> <p style="text-align:justify">သို့သော် နဝမအဆင့် သိုင်းသူတော်စင်များက ဤနေရာသို့ လုံးဝ ဝင်ရောက်၍ မရပေ။ အကယ်၍ အတင်းအဓမ္မ ဝင်ရောက်ရန် ကြိုးစားပါက အပျက်အစီး လျှို့ဝှက်နယ်မြေ တစ်ခုလုံး ပြိုကျပျက်စီးသွားနိုင်သည့် အန္တရာယ် ရှိနေသည်။ ဝင်ရောက်နိုင်ခဲ့သော ဆဋ္ဌမအဆင့် စွမ်းရည်ပိုင်ရှင်များကလည်း အမှတ် ၉ ယဉ်ကျေးမှု အခြေစိုက်စခန်း၏ ကာကွယ်ရေးစနစ်များကို မဖောက်ထွင်းနိုင်ခဲ့ကြပေ။ အချိန်ကြာလာသည်နှင့်အမျှ သူတို့လည်း လက်လျှော့သွားခဲ့ကြရသည်။</p> <p style="text-align:justify"> </p> <p style="text-align:justify">ချင်းကျိန့်က ပြုံးလျက် ပြန်ဖြေလိုက်သည်။ တစ်ချိန်တည်းမှာပင် သူ၏ အားကောင်းသော စိတ်ဝိညာဉ်စွမ်းအား များကို ဖြန့်ကြက်ကာ ပတ်ဝန်းကျင်ရှိ အလားအလာရှိသော အန္တရာယ်များကို ဂရုတစိုက် ရှာဖွေနေခဲ့သည်။ သူက လေဓာတ် စွမ်းအင်ပညာရှင် တစ်ယောက်ဖြစ်ပြီး စိတ်စွမ်းအားရှင် တစ်ယောက် မဟုတ်ပေ။ သို့သော် ဝိညာဉ်သန့်စင်ရေး တိုက်ခိုက်ရေးနည်းစနစ်များ ကို ကျင့်ကြံထားသော စွမ်းအင်ပညာရှင် တစ်ယောက်ဖြစ်ရာ သူ၏ စိတ်ဝိညာဉ်စွမ်းအား က ကြောက်မက်ဖွယ် ကောင်းနေဆဲ ဖြစ်သည်။ ဤနည်းဖြင့် စိတ်ဝိညာဉ်စွမ်းအားကို ရိုးရှင်းစွာ အသုံးပြုနိုင်စွမ်း ရှိသေးသည်။</p> <p style="text-align:justify"> </p> <p style="text-align:justify">"ဟင်... ဒီအရှိန်အဝါက..."</p> <p style="text-align:justify"> </p> <p style="text-align:justify">ချင်းကျိန့် ၏ စိတ်ဝိညာဉ်စွမ်းအား ဖြန့်ကြက်မှုအောက်တွင် ရင်းနှီးနေသော အရှိန်အဝါ တစ်ခုကို အလျင်အမြန် ရှာဖွေတွေ့ရှိသွားသည်။</p> <p style="text-align:justify"> </p> <p style="text-align:justify">"ဒါ... စုချန်းပဲ... သူ့ကို ပဉ္စမအဆင့် စွမ်းရည်ပိုင်ရှင် တချို့က ဝိုင်းထားကြတဲ့ပုံပဲ"</p> <p style="text-align:justify"> </p> <p style="text-align:justify">"စုချန်း တစ်ယောက် ဒီအပျက်အစီးထဲမှာ အခုချိန်ထိ အသက်ရှင်နေနိုင်တာ တော်တော်လေး အံ့သြစရာ ကောင်းတာပဲ"</p> <p style="text-align:justify"> </p> <p style="text-align:justify">ထိုစကားကို ကြားလိုက်ရသောအခါ လင်းဟွေ နှင့် ရှာလန်အပါအဝင် အခြားသူများလည်း အနည်းငယ် အံ့သြသွားကြသည်။ ပဉ္စမအဆင့် အောက်ရှိ တစ်ကိုယ်တော် စွမ်းရည်ပိုင်ရှင်အများစုက အပျက်အစီး ထဲသို့ ဝင်ရောက်ပြီး ရက်အနည်းငယ် အတွင်းမှာပင် သားရဲများ၏ အစွယ်များကြား၌ အသက်ဆုံးရှုံးသွားလေ့ ရှိကြသည်။</p> <p style="text-align:justify"> </p> <p style="text-align:justify">"သူက တကယ်ကို တော်တာပဲ.... သူ့ရဲ့ ပါရမီက ငါ ထင်ထားတာထက်တောင် ပိုမြင့်မားနေတဲ့ပုံပဲ... သွားကြည့်ကြရအောင်... သူ့အသက်ကို ကယ်တင်နိုင်ရင် ပိုကောင်းတာပေါ့"</p> <p style="text-align:justify"> </p> <p style="text-align:justify">စုချန်းကို တွေ့လိုက်ရသဖြင့် ဝမ်းသာသွားသော ချင်းကျိန့်က စိတ်ဝိညာဉ်စွမ်းအားဖြင့် ထောက်လှမ်းမိသော နေရာဆီသို့ အဖွဲ့ကို ချက်ချင်း ဦးဆောင်သွားလေသည်။ သာမန် စတုတ္ထအဆင့်မြင့် စွမ်းရည်ပိုင်ရှင် တစ်ယောက်ဆိုလျှင် သူ ဤမျှလောက် အလျင်လိုနေမည် မဟုတ်ပေ။ သို့သော် စုချန်းက အလွန် ငယ်ရွယ်လွန်းလှပြီး အသက် ၂၁ နှစ်ပင် မပြည့်သေးပုံရသည်။ ဤမျှလောက် ပါရမီရှင် တစ်ယောက် အထက်တန်းလွှာ လေ့ကျင့်ရေးစခန်းထဲသို့ ဝင်ရောက်လာမည်ဆိုပါက အကောင်းဆုံးပင် ဖြစ်ပေမည်။</p> <p style="text-align:justify"> </p> <p style="text-align:justify">“ဒီတစ်ကြိမ် သူ့အသက်ကို ကယ်တင်ပေးလိုက်ရင် မိုးကြိုးသိုင်းသင်တန်းကျောင်းရဲ့ အထက်တန်းလွှာ လေ့ကျင့်ရေးစခန်း ဝင်ခွင့်စာမေးပွဲ ကို ဝင်ဖြေဖို့ သူ ငြင်းဆန်တော့မှာ မဟုတ်ဘူးမလား”</p> <p style="text-align:justify"> </p> <p style="text-align:justify">ထိုသို့ တွေးမိသောအခါ ချင်းကျိန့်က သူ၏ ခြေလှမ်းများကို ထပ်မံအရှိန်တင်လိုက်တော့သည်။ အခြားတစ်ဖက်တွင်တော့ ရှုကျင်းမင်က ဤလူများ မပေါ်လာမီ အစောကြီးကတည်းက အီဗာ၏ ထောက်လှမ်းမှုမှတစ်ဆင့် သူတို့ ရှိနေကြောင်းကို သိရှိပြီး ဖြစ်သည်။ သို့သော် ဤလူလေးယောက်က ကိုရီးယားနိုင်ငံမှ ဖြစ်နေပြီး သူ့ကို လုယက်ရဲလိမ့်မည်ဟု သူ မမျှော်လင့်ထားခဲ့ပေ။</p> <p style="text-align:justify"> </p> <p style="text-align:justify">"မင်းရဲ့ တိုက်ပွဲဝင်ဝတ်စုံ၊ ဟင်းလင်းပြင်လက်စွပ် နဲ့ လက်နက်ကိရိယာတွေ အားလုံးကို ချွတ်ပေးလိုက်စမ်း... အဲဒါဆိုရင် မင်းရဲ့ အသက်ကို ချမ်းသာပေးကောင်း ချမ်းသာပေးလိမ့်မယ်"</p> <p style="text-align:justify"> </p> <p style="text-align:justify">ခေါင်းဆောင်ဖြစ်သူ တိုက်ပွဲဝင် ဓားမကြီး ကိုင်ဆောင်ထားသော ကိုရီးယား စွမ်းရည်ပိုင်ရှင်က ဗလုံးဗထွေး တရုတ်စကားဖြင့် ပြောလိုက်သည်။</p> <p style="text-align:justify"> </p> <p style="text-align:justify">"ပဉ္စမအဆင့်လတ် နှစ်ယောက်၊ ပဉ္စမအဆင့်နိမ့် နှစ်ယောက်..."</p> <p style="text-align:justify"> </p> <p style="text-align:justify">"မင်းတို့လို အောက်တန်းစား ကောင်တွေကများ ငါ့ရဲ့ လက်နက်ကိရိယာတွေနဲ့ အကဲဖြတ် ခရစ္စတယ်တွေကို လုယူနိုင်မယ်လို့ ထင်နေတာလား"</p> <p style="text-align:justify"> </p> <p style="text-align:justify">ရှုကျင်းမင်၏ စိတ်ဝိညာဉ်စွမ်းအား တစ်ချက် လွှမ်းခြုံလိုက်သည်နှင့် ဤလူလေးယောက်၏ အဆင့်များကို သူ ချက်ချင်း ခံစားသိရှိသွားသည်။ ထိုစကားကို ကြားလိုက်ရသောအခါ တစ်ဖက်မှ စွမ်းရည်ပိုင်ရှင် လေးယောက်စလုံး မှင်သက်သွားကြပြီး သူတို့ နားကြားများ မှားသလားဟုပင် ထင်မှတ်သွားကြသည်။</p> <p style="text-align:justify"> </p> <p style="text-align:justify">“စတုတ္ထအဆင့်မြင့် စွမ်းရည်ပိုင်ရှင် တစ်ယောက်က သူတို့ကို ဒီလိုစကားမျိုး ပြောရဲတယ်ပေါ့လေ...”</p> <p style="text-align:justify"> </p> <p style="text-align:justify">ပဉ္စမအဆင့် စွမ်းရည်ပိုင်ရှင်များ အနေဖြင့် သူတို့ ဘယ်လိုလုပ် နားကြားမှားနိုင်မည်နည်း။ ခေါင်းဆောင်ဖြစ်သူ၏ မျက်နှာထားက ချက်ချင်းပင် ရေခဲတမျှ အေးစက်သွားတော့သည်။</p> <p style="text-align:justify"> </p> <p style="text-align:justify">"မင်းတို့ မဟာနွေရာသီ တိုင်းပြည်က လူတွေ အားလုံးက ဒီလောက်တောင် မောက်မာကြတာလား"</p> <p style="text-align:justify"> </p> <p style="text-align:justify">"ကောင်းပြီလေ... ငါ စိတ်ပြောင်းသွားပြီ... မင်းရဲ့ ပစ္စည်းတွေတင် မကဘူး... မင်းရဲ့ အသက်ကိုပါ ငါတို့ ယူရလိမ့်မယ်"</p> <p style="text-align:justify"> </p> <p style="text-align:justify">ပြောပြီးသည်နှင့် တစ်ပြိုင်နက် သူတို့လေးယောက်စလုံးက သူတို့၏ စွမ်းရည်များကို တစ်ပြိုင်နက်တည်း အသက်သွင်းလိုက်ကြသည်။</p> <p style="text-align:justify"> </p> <p style="text-align:justify">“ဘုန်း...”</p> <p style="text-align:justify"> </p> <p style="text-align:justify">သူတို့လေးယောက်စလုံးက ခန္ဓာကိုယ်စွမ်းရည် မြှင့်တင်ပေးသော စွမ်းရည်ပိုင်ရှင်များ ဖြစ်ကြသည်။ သူတို့၏ စွမ်းရည်များကို အသက်သွင်းလိုက်ပြီးနောက် သူတို့၏ ခန္ဓာကိုယ် အရွယ်အစားများက ပုံစံအမျိုးမျိုးဖြင့် ပြောင်းလဲသွားကြသည်။ ထိုမှ ပေါက်ကွဲထွက်လာသော အားကောင်းလှသည့် အရှိန်အဝါကြောင့် သာမန်ပဉ္စမအဆင့်လတ် သားရဲအများစုပင် ကြောက်ရွံ့တုန်လှုပ်သွားနိုင်ပေသည်။</p> <p style="text-align:justify"> </p> <p style="text-align:justify">"ငါက မောက်မာနေတာ မဟုတ်ပါဘူး... မင်းတို့က အားနည်းလွန်းနေတာပါ"</p> <p style="text-align:justify"> </p> <p style="text-align:justify">စကားဆုံးသည်နှင့် တစ်ပြိုင်နက် အနီရောင်ရွှေရောင် လျှပ်စီးများ ဖြတ်ခနဲ လင်းလက်သွားပြီး လှံကို ကိုင်ဆောင်ထားသော ရှုကျင်းမင်၏ အရပ်ရှည်ရှည် ခန္ဓာကိုယ်ကြီးက ထိုနေရာမှ ရုတ်တရက် ပျောက်ကွယ်သွားလေသည်။ တစ်ချိန်တည်းမှာပင် တစ်ဖက်မှ အဖွဲ့ခေါင်းဆောင်ဖြစ်ဟန်တူသော လူက အနီရောင်ရွှေရောင် အလင်းတန်းများ ရစ်ပတ်နေသော အနက်ရောင် လှံရိပ်ကြီးတစ်ခုက သူ၏ မျက်နှာရှေ့မှ ဖြတ်ပြေးသွားသည်ကို ခံစားလိုက်ရသည်။</p> <p style="text-align:justify"> </p> <p style="text-align:justify">ထို့နောက်သူက သူ၏ ကိုယ်ပိုင် ကျောပြင်ကြီးကို မြင်တွေ့လိုက်ရသည်။ ကျောပြင်တင် မဟုတ်ပဲ သူ၏ ခန္ဓာကိုယ်တစ်ခုလုံးကို အပြည့်အဝ မြင်တွေ့နေရခြင်း ဖြစ်သည်။ ခေါင်းမရှိတော့သော ထိုခန္ဓာကိုယ်၏ လည်ပင်းပြတ်မှ သွေးများ ပန်းထွက်နေလေသည်။ ဤအချိန်ရောက်မှသာ သူ၏ ခေါင်း ပြတ်ထွက်သွားခဲ့ပြီဖြစ်ကြောင်း သူ သဘောပေါက်သွားတော့သည်။ ထိုအချက်ကို သဘောပေါက်သွားပြီးမှသာ သူ၏ အသိစိတ်များက ဖြည်းညင်းစွာ မှေးမှိန်ပျောက်ကွယ်သွားပြီး လွင့်စင်သွားသော သူ၏ ခေါင်းက မြေပြင်ပေါ်သို့ အားပျော့စွာ ကျဆင်းသွားလေသည်။</p> <p style="text-align:justify"> </p> <p style="text-align:justify">"ကျစ်... ဘယ်လိုလုပ် ဒီလို ဖြစ်သွားရတာလဲ"</p> <p style="text-align:justify"> </p> <p style="text-align:justify">"အဖွဲ့ခေါင်းဆောင်... အဖွဲ့ခေါင်းဆောင်"</p> <p style="text-align:justify"> </p> <p style="text-align:justify">ကျန်ရစ်သူ သုံးယောက်က ရုတ်တရက် ပြောင်းလဲသွားသော အခြေအနေကြောင့် ကြက်သေ သေသွားကြပြီး ဗလုံးဗထွေး တရုတ်စကားဖြင့် အဆက်မပြတ် အော်ဟစ်နေကြသည်။ မူလက သားကောင်အဖြစ် သတ်မှတ်ထားသော မဟာနွေရာသီ တိုင်းပြည်မှ လူက သူတို့၏ အဖွဲ့ခေါင်းဆောင်ကို တစ်ချက်တည်းနှင့် အပြတ်ရှင်းသွားလိမ့်မည်ဟု သူတို့ အိပ်မက်တောင် မမက်ဖူးခဲ့ပေ။</p> <p style="text-align:justify"> </p> <p style="text-align:justify">"မိစ္ဆာကွ... သူက မိစ္ဆာကြီးပဲ"</p> <p style="text-align:justify"> </p> <p style="text-align:justify">အံ့သြထိတ်လန့်မှုများနှင့်အတူ သူတို့ သုံးယောက်စလုံးက မတူညီသော လမ်းကြောင်း သုံးခုဆီသို့ ထွက်ပြေးကြတော့သည်။</p> <p style="text-align:justify"> </p> <p style="text-align:justify">"ထွက်ပြေးချင်သေးတာလား... နောက်ကျသွားပြီကွ"</p> <p style="text-align:justify"> </p> <p style="text-align:justify">ရှုကျင်းမင်က အေးစက်စွာ နှာမှုတ်လိုက်ပြီးနောက် လျှပ်စီးကဲ့သို့ မြန်ဆန်စွာ လှုပ်ရှားလိုက်သည်။ အနက်ရောင် ပဆစ်ဒီးယန်းလှံက ဆက်တိုက် ထိုးစိုက်ဝင်ရောက်သွားပြီး ထိုလူသုံးယောက်၏ အသက်များကို အလျင်အမြန် အဆုံးသတ်လိုက်လေသည်။ စတုတ္ထအဆင့်လတ်သို့ ရောက်ရှိသွားပြီးနောက် သူ၏စွမ်းအားက အလွန် ကြောက်မက်ဖွယ် ကောင်းနေခဲ့ပြီ ဖြစ်သည်။</p> <p style="text-align:justify"> </p> <p style="text-align:justify">ဆဋ္ဌမအဆင့် စွမ်းရည်ပိုင်ရှင် တစ်ယောက်ကို ရင်ဆိုင်ရလျှင် အားအင်အနည်းငယ် စိုက်ထုတ်ရနိုင်သော်လည်း ပဉ္စမအဆင့် စွမ်းရည်ပိုင်ရှင် အနည်းငယ်ကို ရင်ဆိုင်ရန်ကတော့ အခြေခံအားဖြင့် တစ်ချက်တည်းနှင့် အလဲထိုးနိုင်ရုံသာ ရှိတော့သည်။ အမှန်တကယ်လည်း ထိုအတိုင်းပင်။ တိုက်ပွဲ စတင်ချိန်မှ ပြီးဆုံးချိန်အထိ သူ့အတွက် ၄၊ ၅ စက္ကန့်ပင် မကြာလိုက်ပေ။ ဤမြင်ကွင်းကို အနီးအနားမှ ကယ်ဆယ်ရန် ပြေးလာသော ချင်းကျိန့် နှင့် အခြားသူများအားလုံး မျက်ဝါးထင်ထင် မြင်တွေ့သွားကြလေသည်။</p> <p style="text-align:justify"> </p> <p style="text-align: center;">***</p> <p style="text-align:justify"> </p>


Save