BIT

Title

Show in VIP/Series

Status (Active / Inactive)

<h2 style="text-align:center">နဂါးအတောင်ပံ၏ အရှိန်နှင့်</h2>

<h2 style="text-align:center">အကဲဖြတ် ခရစ္စတယ် ၅၀၀၀၀</h2>

မသေနိုင်သော မိုးကြိုးခန္ဓာ၏ ဆဋ္ဌမအဆင့်မှ ရရှိသော စွမ်းရည်များက များသောအားဖြင့် ကျင့်စဉ်၏ အခြေခံဖြစ်သော နဂါးမျိုးနွယ် သားရဲများထံမှ ကျပန်းရရှိတတ်ခြင်း ဖြစ်သည်။ အကောင်းဆုံး စွမ်းရည်များမှာ နဂါးအတောင်ပံ၊ နဂါးအရှိန်အဝါနှင့် လျှပ်စီးထိန်းချုပ်မှုတို့ ဖြစ်ကြပြီး သိပ်မထူးခြားသော စွမ်းရည်များမှာ နဂါးလက်သည်းနှင့် နဂါးအသက်ရှူထုတ်ချက်တို့ ဖြစ်သည်။

အဆိုးဆုံး စွမ်းရည်မှာမူ ခန္ဓာကိုယ်အနောက်ဘက်မှ နဂါးအမြီး ထွက်လာခြင်းပင်။ ထိုအမြီးက ခန္ဓာကိုယ် ဟန်ချက်ညီမှုကို အနည်းငယ် ကူညီပေးနိုင်ပြီး ထင်မှတ်မထားသော တိုက်ကွက်အချို့ကို ပေးစွမ်းနိုင်သည်မှလွဲ၍ အခြားနေရာတွင် လုံးဝ အသုံးမဝင်ပေ။

နဂါးအတောင်ပံမှာမူ ရှုကျင်းမင်က အလိုချင်ဆုံး စွမ်းရည်များထဲမှ တစ်ခုဖြစ်သည်။ မိုးကြိုးနဂါး အတောင်ပံများ ရှိလာပါက သူ၏ အရှိန်နှင့် လျှင်မြန်မှုမှာ အဆမတန် မြင့်တက်သွားပေလိမ့်မည်။ ထိုအခါမှသာ လေဓာတ် စွမ်းရည်ပိုင်ရှင်များနှင့် ရင်ဆိုင်ရပါက အမျိုးသား တက္ကသိုလ်ပေါင်းစုံ လိဂ်ပြိုင်ပွဲတုန်းကလို သူတို့ကို အပိုင်းပိုင်း ပြတ်သွားအောင် မိုးကြိုးမုန်တိုင်းကို သုံးနေစရာ မလိုတော့ပေ။ အခုဆိုရင် တည့်တည့် ပျံသွားပြီး တစ်ချက်တည်းနဲ့ အလဲထိုးရုံသာ ရှိတော့သည်။

"အရင်ဆုံး မိုးကြိုးနဂါး အတောင်ပံတွေရဲ့ ပျံသန်းမှု စွမ်းဆောင်ရည်ကို စမ်းကြည့်ရအောင်" ရှုကျင်းမင်က မိမိကိုယ်ကို ရေရွတ်လိုက်သည်။

သူက မြေပြင်မှ ထရပ်လိုက်ပြီး တိုက်ပွဲဝင် ဝတ်စုံကို ချွတ်လိုက်ရာ သူ၏ ကြွက်သားအဖုအထစ်များဖြင့် သန်မာလှသော ခန္ဓာကိုယ်အထက်ပိုင်း ပေါ်ထွက်လာသည်။ တစ်ဖက်ရှိ ဆာကူရာဂီ ရင်းမှာမူ ဤမြင်ကွင်းကို မြင်လိုက်ရသောအခါ ကျောရိုးထဲအထိ စိမ့်တက်သွားအောင် တုန်လှုပ်သွားရသည်။ သူမက ပြောင်းပြန်စာချုပ်ကို လက်မှတ်ထိုးလိုက်ကတည်းက ဤကဲ့သို့သော အခြေအနေမျိုးကို ကြိုတင်မျှော်လင့်ထားခဲ့ပြီးသား ဖြစ်သည်။ သူမတွင် ခုခံလိုစိတ်လည်း မရှိပေ။ အဘယ်ကြောင့်ဆိုသော် သူမ၏ အသက်ကို တစ်ဖက်လူ၏ လက်ထဲသို့ အပ်နှံထားရသည် မဟုတ်ပါလား။

သို့သော်လည်း ရှုကျင်းမင်က ဤကာလပတ်လုံး သူမအပေါ် ထိုကဲ့သို့သော စိတ်ဝင်စားမှုမျိုး မပြခဲ့သဖြင့် သူမ၏ ပုံစံကို သူ မကြိုက်ဟုပင် ထင်နေမိခြင်း ဖြစ်သည်။ ဤအရာကို ယခုအထိ စောင့်ဆိုင်းနေလိမ့်မည်ဟု သူမ တစ်ခါမျှ မတွေးခဲ့မိပေ။

ထိုသို့တွေးမိသည်နှင့် ဆာကူရာဂီ ရင်းက အသက်ကို ပြင်းပြင်းတစ်ချက် ရှူလိုက်ပြီး သူမ၏ ဖြူစင်နူးညံ့သော ညာဘက်လက်ကို လည်ပင်းနောက်ဘက်ရှိ တိုက်ပွဲဝင် ဝတ်စုံ၏ဇစ်ဆီသို့ လှမ်းလိုက်သည်။ သို့သော် သူမ ဇစ်ကို မဆွဲချရသေးမီမှာပင် ရှုကျင်းမင်၏ ကျောဘက်မှ သုံးမီတာကျော် ရှည်လျားသော အတောင်ပံတစ်စုံ ချက်ချင်း ပေါက်ထွက်လာသည်ကို မြင်လိုက်ရတော့သည်။

ငှက်များ သို့မဟုတ် သားရဲများ၏ တောင်ပံများကဲ့သို့ အမွှေးအမျှင်များ မရှိဘဲ သတ္တုရောင် တောက်ပနေသော ရက်စက်ကြမ်းကြုတ်သည့် နဂါးတစ်ကောင်၏ အတောင်ပံများနှင့် ပိုတူလှသည်။ အတောင်ပံများ၏ အနားသတ်တွင် ဓားမြှောင်များသဖွယ် ထက်မြက်လှသော အရိုးဆူးချွန်များမှာ အေးစိမ့်သော အရှိန်အဝါများကို ထုတ်ဖော်နေကြသည်။ ဆာကူရာဂီ ရင်းကို ပို၍ ထိတ်လန့်သွားစေသည်မှာ ထိုအတောင်ပံ တစ်ခုလုံးတွင် လျှပ်စီးတန်းများ ပြည့်နှက်နေခြင်းပင်။ အတောင်ပံကို ခပ်ဖွဖွလေး ခတ်လိုက်ရုံဖြင့် မိုးကြိုးမုန်တိုင်းတစ်ခုကို ဖန်တီးနိုင်မည့်ပုံမျိုး ဖြစ်နေသည်။

"ဒါက မိုးကြိုးနဂါး အတောင်ပံပဲ" ရှုကျင်းမင်က ကျေနပ်စွာ ပြောလိုက်သည်။

ထို့နောက် သူက အတောင်ပံများကို တစ်ချက် ခတ်လိုက်ရာ ပုံရိပ်ယောင်တစ်ခုအဖြစ် ပြောင်းလဲသွားပြီး ဂူအတွင်းမှ ထွက်ခွာကာ ကောင်းကင်ယံသို့ တည့်တည့် ပျံတက်သွားတော့သည်။

"ဟင်..." ဆာကူရာဂီ ရင်းမှာ ဂူထဲမှ ပျောက်ကွယ်သွားသော ရှုကျင်းမင်ကို ကြည့်ရင်း အံ့အားသင့်သွားရသည်။

ထိုအခါမှသာ သူမ အထင်မှားသွားခဲ့ခြင်း ဖြစ်ကြောင်း သိလိုက်ရသဖြင့် သူမ၏ လှပသော မျက်နှာလေးမှာ ချက်ချင်းပင် နီမြန်းသွားတော့သည်။ သူမက ဇစ်ဆီသို့ လှမ်းထားသော လက်ကို အမြန်ပင် ပြန်ချလိုက်ရလေတော့သည်။ ရှုကျင်းမင်က ကောင်းကင်ယံတွင် လွတ်လပ်စွာ ပျံသန်းနေသည်။ လေတိုးသံမှာ နားထဲတွင် တဝီဝီ မြည်နေပြီး အောက်ဘက်ရှိ တောအုပ်ကြီးမှာလည်း ပြေးလွှားနေသော ရုပ်ရှင်ပြကွက်များကဲ့သို့ နောက်ဘက်သို့ ကျန်ရစ်ခဲ့သည်။ သူ၏ အရှိန်မှာ တစ်စက္ကန့်လျှင် ၂၀၀ မီတာကို ကျော်လွန်သွားသည်။

"ဒီအရှိန်က... တကယ့်ကို အံ့သြစရာပဲ" ရှုကျင်းမင်က စိတ်လှုပ်ရှားစွာ အော်ဟစ်လိုက်သည်။

စတုတ္ထအဆင့်သို့ ရောက်ပြီးနောက် သူ၏ အမြင့်ဆုံး ပြေးနှုန်းမှာ တစ်စက္ကန့်လျှင် ၁၂၀ မီတာခန့် ရှိသည်။ ဤအရှိန်မှာပင် စတုတ္ထအဆင့်မြင့် စွမ်းရည်ပိုင်ရှင် အများစုကို ကျော်လွန်နေပြီ ဖြစ်သည်။ အခု မိုးကြိုးနဂါး အတောင်ပံများကို ဖွင့်လိုက်သောအခါ သူ၏ အရှိန်မှာ ကြောက်စရာကောင်းလှသည်။ ထို့အပြင် ကောင်းကင်ယံတွင် ပျံသန်းခြင်းမှာ မြေပြင်ပေါ်မှာလို ကွေ့ကောက်သွားနေစရာ မလိုတော့ပေ။ မြေပြင်ပေါ်က တိုက်ခိုက်မှုတွေထက် အဆပေါင်းများစွာ ပိုမြန်နေတော့သည်။

"ဒါပေမဲ့ ဒါက ငါ့ရဲ့ အကန့်အသတ် မဟုတ်သေးဘူး... မိုးကြိုးအထွတ်အထိပ် အခြေအနေ"

“ဘုန်း...”

ရှုကျင်းမင်က မိုးကြိုးအထွတ်အထိပ် အခြေအနေထဲသို့ ရုတ်တရက် ဝင်လိုက်ရာ သူ၏ အတောင်ပံများအပါအဝင် တစ်ကိုယ်လုံးမှာ တစ်ဆခန့် ကြီးထွားလာတော့သည်။ သုံးမီတာကျော် ရှည်သော မိုးကြိုးနဂါး အတောင်ပံများက ငါးမီတာကျော်အထိ ဖြစ်သွားသည်။ သူ၏ အရှိန်မှာလည်း တစ်စက္ကန့်လျှင် ၂၀၀ မီတာမှ ၂၆၀ မီတာအထိ အဆမတန် မြင့်တက်သွားတော့သည်။

အမှန်စင်စစ် မိုးကြိုးနဂါး အတောင်ပံများ ခတ်ရုံမျှဖြင့် ယခုကဲ့သို့ အရှိန်မျိုး ရရှိရန် မဖြစ်နိုင်ပေ။ ကီလိုဂရမ် ၁၂၀ ကျော် လေးလံသော သူ၏ ခန္ဓာကိုယ်ကို သုံးမီတာကျော် တောင်ပံများဖြင့် ပျံတက်ရန်မှာ မလွယ်ကူပေ။ သူ ပျံသန်းနိုင်ရခြင်းမှာ မိုးကြိုးနဂါး အတောင်ပံများပေါ်ရှိ ထူးခြားသော သင်္ကေတများက လေဓာတ် စွမ်းရည်ပိုင်ရှင်များကဲ့သို့ လေဓာတ်ကို ထိန်းချုပ်ပေးနိုင်ခြင်းကြောင့် ဖြစ်သည်။

"ဟားဟား... ကောင်းလိုက်တာ"

ရှုကျင်းမင်က ကောင်းကင်ယံတွင် မယုံနိုင်လောက်အောင် မြန်သော အရှိန်ဖြင့် ပျံသန်းနေသည်။ သို့သော် အလွန်မြင့်မားသော နေရာတွင် ရှိနေသောကြောင့် မြေပြင်ပေါ်မှ ကြည့်မည်ဆိုပါက ကြယ်တစ်ပုဒ်ကဲ့သို့ တောက်ပနေသော အလင်းတန်းတစ်ခုကိုသာ မြင်တွေ့ရပေလိမ့်မည်။

"အဲဒါ ဘာလဲ... အရမ်းမြန်တာပဲ"

"ငါ အတောင်ပံတစ်စုံကို မြင်လိုက်သလိုပဲ... လျှပ်စီးဓာတ်ရှိတဲ့ ပျံသန်းတတ်တဲ့ သားရဲဖြစ်မယ်"

မှောင်မည်းနေသော ကောင်းကင်ယံတွင် တောက်ပသော အလင်းတန်းတစ်ခု ရုတ်တရက် ပေါ်လာခြင်းက အခြားစွမ်းရည်ပိုင်ရှင်များ၏ အာရုံကို ဆွဲဆောင်သွားခဲ့သည်။ ယခုအချိန်တွင် တောအုပ်အတွင်းရှိ မိုးကြိုးသိုင်းသင်တန်းကျောင်းနှင့် ဝက်ဝံကြမ်း သိုင်းသင်တန်းကျောင်း အဖွဲ့များ၌ လင်းဟွေ၊ လော့ဟန်၊ ရှာလန်နှင့် အခြားသူများက ဤမြင်ကွင်းကို အံ့ဩတုန်လှုပ်စွာ ကြည့်နေကြသည်။ အပျက်အစီး နယ်မြေထဲတွင် ပျံသန်းတတ်သော သားရဲများ ရှိသော်လည်း ဤမျှအထိ ကြောက်မက်ဖွယ်ကောင်းသော စွမ်းအားမျိုးကို မြင်ဖူးသည်မှာ ယခုက ပထမဆုံးပင် ဖြစ်သည်။

"ကဲ... ကြည့်မနေကြနဲ့တော့... မနက်ဖြန် ငါတို့ အဓိက အခြေစိုက်စခန်းကို သွားကြမယ်... ငါတို့မှာ အကဲဖြတ် ခရစ္စတယ် ဘယ်လောက်ရှိပြီလဲဆိုတာ တွက်ကြည့်ရအောင်"

မီးပုံဘေးတွင် မိုးကြိုးသိုင်းသင်တန်းကျောင်းမှ နည်းပြ ချင်းကျိန့်က လက်ခုပ်တီးကာ အော်ဟစ်လိုက်သည်။ လင်းဟွေနှင့် အခြားသူများက ထိုအသံကို ကြားသည်နှင့် အနားသို့ အမြန် စုရုံးလာကြသည်။

"ဆရာချင်း... ကျွန်တော်တို့ အကဲဖြတ် ခရစ္စတယ် ခုနစ်ထောင်၊ ရှစ်ထောင်လောက်တော့ စုမိပြီ မဟုတ်လား" ဝက်ဝံကြမ်း သိုင်းသင်တန်းကျောင်းမှ လော့ဟန်က လက်ဝါးချင်း ပွတ်ရင်း ရယ်မောကာ မေးလိုက်သည်။

"ဒီတစ်ခေါက် ထျန်းယွီ သိုင်းသင်တန်းကျောင်းကလူတွေက အရမ်းသန်မာလွန်းတယ်... ငါတို့ သူတို့ကို မယှဉ်နိုင်ဘူး... စုစုပေါင်း အကဲဖြတ် ခရစ္စတယ် ၆၄၅၁ ခုပဲ ရခဲ့တယ်"

ချင်းကျိန့်က ခေါင်းခါလိုက်ပြီး သူ၏ ဟင်းလင်းပြင် လက်စွပ်အတွင်းမှ အကဲဖြတ် ခရစ္စတယ်များကို မြေပြင်ပေါ်သို့ တောင်ပုံရာပုံ ထုတ်လိုက်သည်။

"ငါတို့ လူကြီးနှစ်ယောက်အတွက်တော့ ဒီခရစ္စတယ် ၆၄၀၀ ကျော်က မလိုပါဘူး.... မင်းတို့ သုံးယောက်ပဲ အညီအမျှ ခွဲယူလိုက်ကြ"

အသက် ၄၀ ကျော်မှ ဆဋ္ဌမအဆင့်နိမ့်သို့ ရောက်ခြင်းမှာ ပါရမီ အားနည်းကြောင်း ဖော်ပြနေခြင်းပင်။ ထို့ကြောင့် ဤအကဲဖြတ် ခရစ္စတယ်များကို သူတို့အတွက် အဖြုန်းမခံဘဲ ထူးချွန်သော လူငယ်များအတွက် အခွင့်အရေး ပေးလိုက်ခြင်း ဖြစ်သည်။

"ဟုတ်ကဲ့ပါ" လင်းဟွေနှင့် အခြားသူများက လူကြီးများ၏ ဆုံးဖြတ်ချက်ကို သိရှိထားကြသဖြင့် ခရစ္စတယ် ၆၀၀၀ ကျော်ကို အမြန်ပင် ခွဲဝေယူလိုက်ကြသည်။

"ဒါနဲ့... စုချန်းကတော့ တကယ်ကို ထူးဆန်းတဲ့ကောင်ပဲ... အပျက်အစီး နယ်မြေထဲ ရောက်ကတည်းက အကဲဖြတ် ခရစ္စတယ်တွေကို မရှာဘဲ သားရဲတွေကိုပဲ အသည်းအသန် လိုက်သတ်နေတာ... ဘာတွေးနေလဲ မသိဘူး" လင်းဟွေက ခေါင်းခါလျက် သက်ပြင်းချလိုက်သည်။ သူတို့တောင်မှ သားရဲမုဆိုးဟူသော ဘွဲ့ကို ကြားဖူးနေပြီ ဖြစ်သည်။

"ဘယ်သူသိမှာလဲ... အခုဆိုရင် နှစ်လနီးပါး ရှိနေပြီ သူ့မှာ အကဲဖြတ် ခရစ္စတယ် တစ်ရာတောင် ရှိမှာ မဟုတ်ဘူး" ဘေးတွင် ရပ်နေသော လော့ဟန်က လှောင်ပြုံးဖြင့် ပြောလိုက်သည်။ စုချန်းက တိုက်ခိုက်ရေးမှာ သန်မာသော်လည်း ဦးနှောက်ထဲမှာတော့ ဝက်အူတစ်ခု လျော့နေပုံရသည်။ ဤရှေးဟောင်း အပျက်အစီး နယ်မြေကို လာပြီးမှ အကဲဖြတ် ခရစ္စတယ်တွေ မစုရင် ဘာလာလုပ်တာလဲ။

"စုချန်းမှာရှိတဲ့ အနီရောင်ရွှေရောင် မိုးကြိုးအစစ်ဆိုတာ Aအဆင့် လျှပ်စီးစွမ်းရည် ဖြစ်ရမယ် အကဲဖြတ် ခရစ္စတယ်တွေ မရှိရင်တောင် သူက အခြေစိုက်စခန်းမှာ ဆုလာဘ်အချို့တော့ ရမှာပါ" ချင်းကျိန့်က ထိုကိစ္စကို သိပ်ဂရုစိုက်ပုံမရပေ။ သူ အလေးထားသည်မှာ မနက်ဖြန် အခြေစိုက်စခန်းတွင် စုချန်းကို မည်သို့ စည်းရုံးရမည်ဆိုသည်ကိုသာ ဖြစ်သည်။

"ဟုတ်ပါတယ်... ဒါပေမဲ့ အကဲဖြတ် ခရစ္စတယ်တွေ မရှိတဲ့အတွက် သူရမယ့် ဆုလာဘ်တွေက ခရစ္စတယ်တွေ ရှိတဲ့ ကျွန်တော်တို့လောက်တော့ များမှာ မဟုတ်ဘူး" လော့ဟန်က ယုံကြည်မှုအပြည့်ဖြင့် ပြုံးလိုက်သည်။

ရှာလန်မှာမူ ထိုစကားကို ကြားသောအခါ မျက်တောင်ခတ်လျက် တိတ်ဆိတ်နေခဲ့သည်။ ဟင်းလင်းပြင် လှိုင်းဂယက်များ ရှိနေသော စုချန်းက မြင်တွေ့နေရသလောက် မရိုးရှင်းကြောင်း သူမ အမြဲတမ်း ခံစားနေရသည်။ အခြားတစ်ဖက်တွင်မူ မိုးကြိုးနဂါး အတောင်ပံများ၏ အရှိန်အဝါကို ခံစားပြီးနောက် ရှုကျင်းမင်က ဂူအနားသို့ လျင်မြန်စွာ ပြန်လည် ဆင်းသက်လိုက်သည်။

"မိုးကြိုးနဂါး အတောင်ပံတွေက တကယ်ကို မြန်ပေမဲ့ စွမ်းရည်အင်အား စားသုံးမှုကလည်း အရမ်းများတာပဲ"

သာမန် အခြေအနေတွင် နာရီဝက်ခန့်သာ အသုံးပြုနိုင်ပြီး မိုးကြိုးအထွတ်အထိပ် အခြေအနေတွင်မူ ၁၅ မိနစ်ပင် ခံမည် မဟုတ်ပေ။ ရှုကျင်းမင်က တွေးတောရင်း ဂူထဲသို့ လှမ်းဝင်လိုက်သည်။ လက်ရှိ အခြေအနေအရ မိုးကြိုးနဂါး အတောင်ပံများကို ခဏတာ အသုံးပြုရန်အတွက်သာ သင့်တော်ပေသည်။ အမှန်စင်စစ် တိုက်ပွဲအများစုမှာ နာရီဝက်အထိ ကြာမြင့်လေ့ မရှိပေ။

"သခင်" ရှုကျင်းမင် ဂူထဲဝင်လာသည်နှင့် ဆာကူရာဂီ ရင်းက ရိုသေစွာ နှုတ်ဆက်လိုက်သည်။

"အင်း" ရှုကျင်းမင်က ခေါင်းညိတ်လိုက်သည်။

တကယ်တော့ သူ ခုနက ရုတ်တရက် ပျံသန်းသွားခြင်းမှာ ဆာကူရာဂီ ရင်းက ထွက်ပြေးမပြေး စမ်းသပ်ခြင်းလည်း ဖြစ်သည်။ သို့သော် လက်ရှိ အခြေအနေအရ သူမက တော်တော်လေး ရိုးသားပုံရသည်။

"ဒါနဲ့... မနက်ဖြန် ငါတို့ အဓိက အခြေစိုက်စခန်းကို သွားကြမယ်... မင်းဆီမှာရှိတဲ့ အကဲဖြတ် ခရစ္စတယ်တွေ အကုန် ငါ့ကိုပေး" ရှုကျင်းမင် ပြောလိုက်သည်။

အခြေစိုက်စခန်းတွင် ရရှိမည့် ဆုလာဘ်များမှာ ပါရမီနှင့် အကဲဖြတ် ခရစ္စတယ် အရေအတွက်ပေါ်တွင် မူတည်သည်။ သူ့တွင် SSအဆင့် စွမ်းရည်ရှိသဖြင့် ဆုလာဘ်များမှာ များပြားမှာ သေချာသော်လည်း အကဲဖြတ် ခရစ္စတယ်များ ပိုရှိနေခြင်းက ပို၍ စိတ်ချရပေမည်။

"ကျွန်မဆီမှာ အကဲဖြတ် ခရစ္စတယ် ၅၀၀၀၀ လောက် ရှိပါတယ်... သခင် အကုန်ယူလိုက်ပါ" ဆာကူရာဂီ ရင်း၏ လက်ချောင်းများပေါ်ရှိ ဟင်းလင်းပြင်လက်စွပ်မှာ လက်ခနဲ ဖြစ်သွားပြီးနောက် ဂူတစ်ခုလုံးတွင် အကဲဖြတ် ခရစ္စတယ် တောင်ပုံရာပုံကြီး ရုတ်တရက် ပေါ်ထွက်လာတော့သည်။

***

Book List