Book List

<h2 style="text-align: center;">အခန်း (၁၈၆)</h2> <h2 style="text-align: center;">သူတို့အားလုံးက ခဲယဉ်းတဲ့ ပြိုင်ဘက်တွေပဲ</h2> <h2 style="text-align: center;">*</h2> <p> </p> <p>ကြီးမားသော ဆုလာဘ်နောက်တွင် ရဲရင့်သူများ အမြဲရှိစမြဲပင်။ ကောင်းကင်အဆင့် ဓာတ်ငါးပါး ဝိညာဉ်ပစ္စည်း တစ်ခုသည် မည်သည့်ကျင့်ကြံသူကိုမဆို ရူးသွပ်သွားစေနိုင်လောက်သော ရတနာဖြစ်သည်။</p> <p>နတ်သားတော်များသည် သူတို့၏ လေသံကို တစ်ယောက်ပြီးတစ်ယောက် ပြောင်းလဲလိုက်ကြပြီး သွားရောက်ရန် အပြိုင်အဆိုင် အဆိုပြုကြတော့သည်။ နတ်သားတော် ကျင်းချန်း က အရင်ဆုံး ပြောလိုက်သည်။ “အကြီးအကဲ... ဒီတပည့်က ဂူပိုးကောင်ပညာရပ်မှာ အထူးပြုထားတာမို့ ဂိုဏ်းရဲ့ စိုးရိမ်ပူပန်မှုတွေကို ဝေမျှထမ်းဆောင်ပါရစေ........”</p> <p>နတ်သားတော် ချင်းယွီ ကလည်း သူ၏ ယပ်တောင်ကို ခတ်ရင်း ကြည့်ရသည်မှာ ယဉ်ကျေးသိမ်မွေ့စွာဖြင့် - “အကြီးအကဲ... တပည့် သေချာစဉ်းစားပြီးပါပြီ၊ ဂိုဏ်းကို အလုပ်အကျွေးပြုဖို့က ပိုပြီးတော့ အရေးကြီးပါတယ်........” ဟု ဆိုလာသည်။</p> <p>နတ်သားတော် ယောင်ဟန်  ကလည်း တခိခိရယ်မောလျက် - “အကြီးအကဲ... ကျွန်မလည်း သွားပြီး အတွေ့အကြုံယူချင်ပါတယ်........” ဟု ပြောသည်။ လီဖော်ထျန်း၊ ကွေ့ရန် နှင့် လုရှောက် တို့ကလည်း အသီးသီး သွားချင်ကြောင်း ပြောကြသည်။</p> <p>မုန့်ဝမ် တစ်ယောက်သာ အလေးအနက် ငြင်းဆန်နေ၏။ “အကြီးအကဲ... တပည့်ကတော့ အရင်ပြောခဲ့တဲ့အတိုင်းပါပဲ။ ဂိုဏ်းအတွက် အကျိုးပြုချင်ပေမဲ့ ကံမကောင်းစွာနဲ့ တပည့်ရဲ့ အစွမ်းက နိမ့်ပါးလွန်းနေသေးတော့ ဒီတာဝန်ကြီးကို မထမ်းဆောင်နိုင်မှာ စိုးရိမ်ပါတယ်”</p> <p>ရှီရှင်းထျန်း က မုန့်ဝမ်ကို အံ့ဩသလို တစ်ချက်ကြည့်လိုက်ပြီးမှ ကျေနပ်စွာ ခေါင်းညိတ်ပြသည်။ သူက အားလုံးကို ဝေ့ကြည့်ကာ စိတ်အေးသွားသည့်လေသံဖြင့် - “နင်တို့တွေ တိုးတက်ချင်စိတ်ရှိတာကို မြင်ရတာ ငါ့အတွက် ဝမ်းသာစရာပဲ။ ဒါပေမဲ့ ဒီခရီးက အန္တရာယ်လည်း ရှိနိုင်တာကြောင့် လူသုံးယောက်ပဲ လိုအပ်တယ်” ဟု ပြောကာ အမည်များကို ခေါ်လိုက်တော့သည်။</p> <p>“မုန့်ဝမ်၊ ချင်းယွီ၊ လီဖော်ထျန်း... နင်တို့ သုံးယောက်က ကျန်တဲ့ တပည့်တွေကို ဦးဆောင်ပြီး ငါတို့ ရွှမ်ယင်ဂိုဏ်း ကိုယ်စား သတ္တုတွင်းဧရိယာကို သွားကြ........ မှတ်ထား... သတ္တုတွင်း ပဋိပက္ခက ဒုတိယပဲ။ နင်တို့ရဲ့ ပန်းတိုင်က တခြားဂိုဏ်းက ပါရမီရှင်တွေကို အမဲလိုက်သတ်ဖြတ်ဖို့ပဲ။ များလေ... ကောင်းလေပဲ........”</p> <p>“ဟုတ်ကဲ့... အကြီးအကဲရဲ့ မျှော်လင့်ချက်တွေကို အပျက်စီးမခံပါဘူး........”</p> <p>အမိန့်ရသည်နှင့် မုန့်ဝမ်၊ ချင်းယွီ နှင့် လီဖော်ထျန်း တို့သည် အဖွဲ့ကို ချက်ချင်းစုစည်းကာ သတ္တုတွင်းဧရိယာသို့ ထွက်ခွာရန် ပြင်ဆင်ကြသည်။ လိုက်ပါလာသော တပည့်များမှာလည်း သာမန်မဟုတ်ဘဲ နတ်သားတော် အလျောင်းအလျာ အဆင့်ရှိသူများသာ ဖြစ်ကြပြီး တစ်ဦးချင်းစီမှာ ထူးခြားသော စွမ်းရည်နှင့် တိုက်ခိုက်ရေးစွမ်းအား ရှိကြသည်။</p> <p>အကြီးအကဲ ရှီရှင်းထျန်းသည် လီဖော်ထျန်းအား အဖွဲ့ကို ဦးဆောင်ရန် အထူးညွှန်ကြားလိုက်ပြီး မုန့်ဝမ်နှင့် ချင်းယွီတို့မှာမူ ကူညီပံ့ပိုးပေးရန်ဖြစ်သည်။</p> <p>ထို့နောက် လေသင်္ဘောပေါ် သို့တက်ရောက်ကာ သတ္တုတွင်းဧရိယာသို့ အရှိန်အဟုန်ဖြင့် ထွက်ခွာခဲ့ကြသည်။ လမ်းတွင် လီဖော်ထျန်းသည် မုန့်ဝမ်နှင့် ချင်းယွီတို့ထံသို့ လာကာ သူမ၏ သိုလှောင်အိတ်ထဲမှ လျှို့ဝှက်စွာဖြင့် ကျောက်စိမ်းပြား အထပ်လိုက်ကို ထုတ်ယူလိုက်သည်။</p> <p>“ဒါတွေက အကြီးအကဲ ပေးထားတဲ့ ဂိုဏ်းကြီးလေးခုက ပါရမီရှင်တပည့်တွေရဲ့ သတင်းအချက်အလက်တွေပဲ။ ဒီတစ်ခေါက် သတ္တုတွင်းပဋိပက္ခမှာ ဂိုဏ်းတစ်ခုချင်းစီက အနည်းဆုံး ခဲယဉ်းတဲ့ပြိုင်ဘက် နှစ်ယောက်၊ သုံးယောက်လောက် စေလွှတ်ထားတယ်။ ငါတို့ သတိထားရမယ်”</p> <p>ချင်းယွီသည် သူ၏ ယဉ်ကျေးသိမ်မွေ့သော ပုံစံအတိုင်း ယပ်တောင်ကို အေးအေးလူလူ ခတ်ရင်း “ဪ... နတ်သားတော် လီ အသေးစိတ် ရှင်းပြပေးနိုင်မလား........” ဟု မေးလိုက်သည်။</p> <p> လီဖော်ထျန်းက ချောင်းတစ်ချက်ဟန့်ကာ စတင်မိတ်ဆက်ပေးတော့သည်။</p> <p>“ရွှေတိမ်တိုက်ဂိုဏ်း  က ချင်ရှောက်ယန်၊ သူက ‘ရွှေအလင်း ကိုယ်တော်’ လို့ အမည်တွင်ပြီး အစွမ်းထက်တဲ့ ‘မဟာနေမင်း ရွှေရောင်အလင်းပညာရပ်’ ကို အသုံးပြုတယ်။ ကျင့်ကြံမှုအဆင့်တူ မိစ္ဆာသားရဲတစ်ကောင်ကို တစ်ချက်တည်းနဲ့ သတ်နိုင်ခဲ့ဖူးတယ်။</p> <p>နောက်တစ်ယောက်က မုရွှယ်ယန်  ‘အသံ နတ်သမီး’ လို့ ခေါ်တယ်။</p> <p>အသံလှိုင်းတိုက်ခိုက်မှုတွေမှာ ကျွမ်းကျင်ပြီး ကာကွယ်ဖို့ အလွန်ခက်ခဲတယ်။ ဒီကျောက်စိမ်းပြားထဲမှာ သူတို့ရဲ့ ပုံရိပ်တွေ ပါဝင်တယ်။ ဆုံတဲ့အခါ သတိထားလို့ရအောင် ကြည့်ထားကြ........”</p> <p>မုန့်ဝမ်သည် သူမ၏ ဝိညာဉ်အာရုံဖြင့် ကျောက်စိမ်းပြားကို စစ်ဆေးကာ ထိုနှစ်ဦး၏ သတင်းအချက်အလက်များကို မှတ်သားလိုက်သည်။ “တခြားဂိုဏ်းတွေကရော........”</p> <p>“ထာဝရစိတ်ဝိညာဉ်ဂိုဏ်းက ရှောင်ရိ ၊ ‘ကောင်းကင်မျက်လုံး နတ်သားတော်’ လို့ ခေါ်တယ်။ အစွမ်းထက်တဲ့ ဝိညာဉ်အာရုံ ထောက်လှမ်းနိုင်စွမ်း ရှိတဲ့အတွက် သူ့မျက်စိအောက်မှာ လှည့်ကွက်သုံးဖို့ မဖြစ်နိုင်သလောက်ပဲ။</p> <p>ဟွာလီ၊ ‘ပန်းရိပ်နတ်သမီးတော်’ ကတော့ သစ်ပင်တွေနဲ့ ပက်သက်တဲ့ ဆန္ဒကို နားလည်ထားပြီး ကိုင်တွယ်ရ အလွန်ခက်ခဲတယ်” လီဖော်ထျန်း၏ လေသံမှာ အနည်းငယ် လေးနက်နေသည်။ “ဒီတစ်ခေါက် လာတဲ့သူတွေက အားလုံး ခဲယဉ်းတဲ့ ပြိုင်ဘက်တွေချည်းပဲ၊ တော်တော်လေး ကိုင်တွယ်ရခက်မဲ့သူတွေပဲ”</p> <p>ဤလူများသည် ဂိုဏ်းကြီးများမှ ဂရုတစိုက် ပျိုးထောင်ထားသော ပါရမီရှင်များဖြစ်သလို ကျော်ကြားသည့် ကျွမ်းကျင်သူများလည်း ဖြစ်သည်။</p> <p>ချင်းယွီက နှုတ်ခမ်းကို တွန့်လိုက်ရင်း “ရွှန်ထျန်းဓားဂိုဏ်းနဲ့ မျောလွင့်နန်းတော်ကရော........ သူတို့ကိုလည်း မိတ်ဆက်ပေးပါဦး” ဟု မေးလိုက်သည်။</p> <p>“မျောလွင့်နန်းတော်က ငါတို့ ရွှမ်ယင်ဂိုဏ်းလိုပဲ မိစ္ဆာဂိုဏ်းဖြစ်လို့ သူတို့ကို သတ်ဖို့က တခြားဂိုဏ်းကြီး သုံးခုပြီးမှပဲ။ ဒါပေမဲ့ ရွှန်ထျန်းဓားဂိုဏ်းက လူနှစ်ယောက်ကိုတော့ အထူးသတိထားရမယ်။ လီရွှမ်ရိ၊ ‘ဓားရူး’ လို့ ခေါ်တဲ့သူက ဓားဆန္ဒ သုံးမျိုးကို နားလည်ထားပြီး ကျင့်ကြံမှုအဆင့်တူသူတွေထဲမှာ အရှုံးမရှိဘူးလို့ ဆိုကြတယ်။ လင်းချင်းယွဲ့ ၊ ‘သစ်ခွဓားနတ်သမီး’ ကတော့ လျင်မြန်တဲ့ ဓားသိုင်းပညာရှိပြီး ခန့်မှန်းရခက်တဲ့ ပြောင်းလဲမှုတွေကြောင့် ကာကွယ်ဖို့ မဖြစ်နိုင်ဘူး...”</p> <p>ပါရမီရှင်များကို မိတ်ဆက်ပေးပြီးနောက် ချင်းယွီက မုန့်ဝမ်ကို လှည့်မေးသည်။ “ညီမလေးမုန့်... နင် ဒီပါရမီရှင်တွေထဲမှာ ဘယ်သူက ကိုင်တွယ်ရ အခက်ဆုံးလို့ ထင်လဲ........”</p> <p>မုန့်ဝမ်က ရှက်ကိုးရှက်ကန်း ပြုံးလိုက်ရင်း - “စီနီယာချင်းယွီကလည်း... ကျွန်မက သူတို့နဲ့ မတိုက်ဖူးသေးတော့ ဘယ်သူက သန်မာတယ်၊ ဘယ်သူက အားနည်းတယ်ဆိုတာ ဘယ်သိပါ့မလဲ။ တွေ့ရင် သတ်မယ်၊ တကယ်လို့ မနိုင်ရင်တော့ ထွက်ပြေးမှာပေါ့” ဟု ဖြေလိုက်သည်။</p> <p>ချင်းယွီက ခေါင်းညိတ်လိုက်ပြီး မုန့်ဝမ်၏ စကားကို ထောက်ခံကြောင်း သိသာလှသည်။ မုန့်ဝမ်၏ မဆင်မခြင်ပြောလိုက်သော စကားကို ကြားသောအခါ လီဖော်ထျန်းက သူ၏ ခေါင်းကို ကုတ်လိုက်ပြီး သူတို့နှစ်ဦးကို အကြံပေးလိုက်သည်။</p> <p>“မိစ္ဆာကျင့်ကြံသူတွေဆိုတာ လူတိုင်းရဲ့ ရွံရှာမုန်းတီးမှုကို ခံရတဲ့သူတွေပဲ။ ငါတို့က တခြားဂိုဏ်းက ပါရမီရှင်တွေကို အမဲလိုက်ချင်သလိုပဲ သူတို့ကလည်း ငါတို့ကို သတ်ချင်နေကြတာ။</p> <p>တကယ်လို့ ငါတို့ သုံးယောက်သာ တစ်ဖွဲ့တည်း အတူတူလှုပ်ရှားကြမယ်ဆိုရင် အခွင့်အရေး ပိုများတာပေါ့... ဘယ်လိုလဲ........”</p> <p>ချင်းယွီက ယပ်တောင်ကို ခတ်လိုက်ရင်း သူ၏ နှုတ်ခမ်းပေါ်တွင် နောက်ပြောင်လိုသော အပြုံးတစ်ခု ပေါ်လာသည်။ “နတ်သားတော် လီ ပြောတာ အမှန်ပဲ၊ ဒါပေမဲ့...” သူ၏ အကြည့်က မုန့်ဝမ်ဆီသို့ ရောက်သွားသည်။ “ကျွန်တော်ကတော့ ဘာမှမဖြစ်ပါဘူး၊ ဒါပေမဲ့ ညီမလေးမုန့်ရဲ့ သဘောထားက ဘယ်လိုလဲ........”</p> <p>မုန့်ဝမ်၏ မျက်နှာမှာ တည်ငြိမ်နေပြီး သူမ၏ အကြည့်မှာ နက်ရှိုင်းလှသဖြင့် ဘာတွေးနေမှန်း မသိနိုင်ပေ။ သူမက အေးဆေးတည်ငြိမ်သော အသံဖြင့် “စီနီယာလီ ပြောသလို အတူတူ ပူးပေါင်းဆောင်ရွက်ဖို့ ဆိုတာကကောင်းပါတယ်.............</p> <p>ဒါပေမဲ့ ပါရမီရှင်တွေကို အမဲလိုက်တဲ့နေရာမှာ ကျွန်မက တစ်ယောက်တည်း သွားရတာ ပိုကြိုက်တယ်။ အောင်မြင်မှုမှတ်တမ်းတွေ ခွဲဝေတဲ့အခါ ပြဿနာ မတက်ချင်လို့ပါ” ဟု ပြတ်ပြတ်သားသား ငြင်းပယ်လိုက်သည်။</p> <p>လီဖော်ထျန်းမှာ မျက်နှာပျက်သွားသော်လည်း မကြာခင်မှာပင် အပြုံးကို ပြန်ထိန်းလိုက်သည်။ “ညီမလေးမုန့်ကလည်း နောက်နေပြန်ပြီ။ ဒီသတ္တုတွင်းဧရိယာက အန္တရာယ်တွေနဲ့ ပြည့်နေတာ၊ တစ်ယောက်တည်း သွားတာက အရမ်းစွန့်စားလွန်းရာ ရောက်တယ်။ အတူတူ သွားမှ တစ်ယောက်ကို တစ်ယောက် ကြည့်ရှုစောင့်ရှောက်နိုင်မှာပေါ့”</p> <p>မုန့်ဝမ်က ချက်ချင်းပြန်မဖြေဘဲ သတ္တုတွင်းဧရိယာရှိရာ အရပ်ကိုသာ လှမ်းကြည့်နေသည်။ ထိုအခါ ချင်းယွီက တဟားဟား ရယ်မောလိုက်ပြီး “နတ်သားတော် လီ... မုန့်ဝမ်ရဲ့ ဆိုလိုရင်းက ရှင်းနေတာပဲ။ ဘာလို့ အတင်းအကျပ် လုပ်နေဦးမှာလဲ........” ဟု ဆိုလိုက်သည်။</p> <p> လီဖော်ထျန်းမှာ အနည်းငယ် မကျေမနပ် ဖြစ်သွားသော်လည်း ချင်းယွီ၏ အဆင့်အတန်းကြောင့် ဒေါသမထွက်ရဲပေ။ “ဒါဆိုရင်လည်း အခြေအနေပေါ် ကြည့်လုပ်ကြတာပေါ့” ဟုသာ ပြောနိုင်တော့သည်။</p> <p>မုန့်ဝမ်နှင့် ချင်းယွီတို့ ထွက်သွားပြီးနောက် လီဖော်ထျန်းသည် သူ့ရှေ့က စားပွဲကို ဒုန်းကနဲ မြည်အောင် ရိုက်လိုက်သည်။ “ဟမ့်... ကောင်းကောင်းပြောတာကို မရဘူးပေါ့........” ဒီမုန့်ဝမ်က အစွမ်းတော့ရှိပါတယ်.... ၊ ဒါပေမဲ့ အပြုအမူတွေက အရမ်းမောက်မာလွန်းတယ်.........” လီဖော်ထျန်းသည် စိတ်ထဲတွင် ဆုံးဖြတ်ချက်တစ်ခု ချလိုက်သည်။</p> <p>မုန့်ဝမ်က ပူးပေါင်းဆောင်ရွက်ဖို့ ငြင်းဆန်နေမှတော့ သူမကို အဖွဲ့ထဲကနေ ဝိုင်းပယ်ထားလိုက်မည်။ ဒုက္ခတွေနဲ့ ရင်ဆိုင်ရပြီး အကူအညီမဲ့နေတဲ့ ခံစားချက်ကို သိသွားတဲ့အခါ မုန့်ဝမ်က သူမရှေ့မှာ ခေါင်းငုံ့ရပေမည်။</p> <p>ချင်းယွီသည် အပြင်သို့ ထွက်လာပြီး ရှေ့က လျှောက်သွားသော မုန့်ဝမ်ကို လှမ်းခေါ်လိုက်သည်။ “လုပ်စရာ ဘာမှမရှိသေးရင် ငါ့အခန်းမှာ ခဏလာထိုင်ပါလား........” မုန့်ဝမ်က သူ့ကို တစ်ချက်ကြည့်ကာ ခေါင်းညိတ်ပြပြီး ချင်းယွီ၏ အခန်းထဲသို့ လိုက်သွားခဲ့သည်။</p> <p>“မုန့်ညီမလေး... ပြီးခဲ့တဲ့တစ်ခေါက်က နင် ငါ့ကို အကြွေးတစ်ခု တင်ထားတယ်နော်” ချင်းယွီက ဝိုင်ငှဲ့ပေးရင်း နောက်ပြောင်သလို ပြောလိုက်သည်။ မုန့်ဝမ်က အနည်းငယ် ပြုံးကာ - “ချင်းယွီအစ်ကို... စိတ်ချပါ၊ ကျွန်မ မမေ့ပါဘူး။ အခု အဲဒီအကြွေးကို ပြန်ယူတော့မလို့လား........”</p> <p>ချင်းယွီက ဝိုင်ခွက်ကို မုန့်ဝမ်ဘက်သို့ တိုးပေးရင်း ပြုံးလိုက်သည်။ “ဒါပေါ့... ကောင်းကင်အဆင့် ဓာတ်ငါးပါး ဝိညာဉ်ပစ္စည်းကို ဘယ်သူက မလိုချင်ဘဲ နေမှာလဲ။ ဒီခရီးမှာ ညီမလေးကို အားကိုးရမယ့် အချိန်ရှိလာနိုင်တယ်”</p> <p>မုန့်ဝမ်သည် ဝိုင်ခွက်ကို ယူကာ သောက်ရန် ပြင်လိုက်သော်လည်း ရုတ်တရက် မျက်မှောင်ကြုတ်သွားကာ ခွက်ကို စားပွဲပေါ်သို့ ပြင်းထန်စွာ ပြန်ချလိုက်တော့သည်။</p> <p> </p> <p style="text-align: center;">***</p> <p> </p>


Save