Book List

<h2 style="text-align: center;">အခန်း (၇၀၈)</h2> <h2 style="text-align: center;">*</h2> <p> </p> <p style="text-align:justify">စင်ကာပူသည် ကျဲခယ်အဖွဲ့အား လက်နက်ချလိုက်သည် ဟူသော သတင်းများ ပျံ့နှံ့သွားသောအခါ ကျဲခယ် အဖွဲ့က စင်ကာပူကို သိမ်းပိုက်နိုင်မည်ဟု ယုံကြည်ထားသော နိုင်ငံများပင် အံ့အားသင့်သွားကြသည်။ အကြောင်းမှာ စင်ကာပူကို သိမ်းပိုက် အောင်နိုင်ခဲ့သည့် အမြန်နှုန်းက အလွန် မြန်ဆန်လွန်းပြီး အချိန်ကလည်း အလွန် တိုတောင်းလွန်းသောကြောင့်ပင်။</p> <p style="text-align:justify">နှစ်ရက် ဟူသော အချိန်အတွင်းမှာပင် စစ်တပ်အင်အား တစ်သိန်းခွဲ စုဆောင်းထားသော စင်ကာပူသည် ကျဲခယ် အဖွဲ့၏ လျှပ်စီး စစ်ဆင်ရေးအောက်တွင် ကျဆုံးသွားပြီး စစ်ရှုံးနိုင်ငံတစ်ခု ဖြစ်သွားခဲ့သည်။</p> <p style="text-align:justify">ယင်းအချိန်တွင် ကုလသမဂ္ဂ လုံခြုံရေး ကောင်စီသည် အမေရိကန်၏ တောင်းဆိုချက်အရ ကျဲခယ် အဖွဲ့နှင့် မလေးရှားတို့က စင်ကာပူကို ရဲတင်းစွာ ကျူးကျော်ဝင်ရောက်မှုနှင့် ပတ်သက်၍ ပူးတွဲ အစည်းအဝေး တစ်ရပ် ကျင်းပရန် ပြင်ဆင်နေဆဲသာ ရှိသေးလေသည်။</p> <p style="text-align:justify">သို့သော် သူတို့၏ အစည်းအဝေးကို မစတင်ရသေးမီပင် စင်ကာပူက အကြွင်းမဲ့ လက်နက်ချသွားကာ နှစ်ရက်အတွင်း ကျဲခယ် အဖွဲ့၏ သိမ်းပိုက်မှုကို ခံလိုက်ရပြီး ကျဲခယ် အဖွဲ့ထံ အညံ့ခံသွားခဲ့ပြီ ဖြစ်သည်။</p> <p style="text-align:justify">ထိုသတင်းကို ကြားသောအခါ အမေရိကန်က ဆွံ့အသွားပြီး အနောက်နိုင်ငံများကလည်း မှင်တက်သွားကြကာ ကုလသမဂ္ဂ လုံခြုံရေး ကောင်စီမှ စင်ကာပူ သံအမတ်မှာမူ ပို၍ပင် အရှက်ရသွားတော့သည်။</p> <p style="text-align:justify">သူသည် မူလက ကုလသမဂ္ဂ လုံခြုံရေး ကောင်စီတွင် ကျဲခယ် အဖွဲ့၏ ရက်စက်ကြမ်းကြုတ်မှုများကို စွပ်စွဲရန် စီစဉ်ထားသော်လည်း သူ၏ နိုင်ငံက ဦးစွာ လက်နက်ချကာ ကျဲခယ် အဖွဲ့ထံ ဒူးထောက်သွားခဲ့ပြီ ဖြစ်သည်။ သူ့တွင် တစ်ဦးတည်း ရပ်တည်နိုင်စွမ်း မရှိတော့သဖြင့် သူ၏ လေသံကို ချက်ချင်း ပြောင်းလဲကာ ကျဲခယ် အဖွဲ့ကို ဆန့်ကျင်ကန့်ကွက်ခြင်းမှ ကျဲခယ် အဖွဲ့ကို ထောက်ခံအားပေးခြင်းသို့ ပြောင်းလဲသွားတော့သည်။</p> <p style="text-align:justify">နစ်နာသူ ကိုယ်တိုင်ဖြစ်သော စင်ကာပူကပင် ပြဿနာတစ်ခု အဖြစ် မသတ်မှတ်တော့သည့်အတွက် ကုလသမဂ္ဂ လုံခြုံရေး ကောင်စီ အစည်းအဝေးမှာလည်း မကျင်းပနိုင်တော့ပေ။ အမေရိကန်က အလွန် မကျေမနပ် ဖြစ်နေလျှင်တောင် သူလုပ်နိုင်သည့်အရာ ဘာမှ မရှိတော့ပေ။</p> <p style="text-align:justify">တကယ်တမ်းတွင် တစ်ခုခုကို သဘောတူလိုက်လျှင်တောင် ကျဲခယ် အဖွဲ့က လက်ခံမည် မဟုတ်ပေ။ သူတို့ လက်မှတ် မထိုးထားသော မည်သည့် စာရွက်စာတမ်းမဆို အမှိုက်စာရွက် တစ်ရွက်သာ ဖြစ်ပြီး ဖင်သုတ်ဖို့တောင် ကြမ်းလွန်းနေသေးသည်။</p> <p style="text-align:justify">အတိုချုပ်ပြောရလျှင် ကျဲခယ် အဖွဲ့က နှစ်ရက်အတွင်း စင်ကာပူနိုင်ငံကို သိမ်းပိုက်လိုက်ခြင်းနှင့် အတူ ကျဲခယ် အဖွဲ့၏ ဂုဏ်သတင်းက ပိုမို ပြန့်နှံ့သွားပြီး ကျဲခယ်အဖွဲ့၏ စစ်အင်အားသည် ကမ္ဘာတစ်ဝှမ်းရှိ နိုင်ငံများကို တုန်လှုပ်သွားစေခဲ့သည်။</p> <p style="text-align:justify">အထူးသဖြင့် အရှေ့တောင်အာရှ နိုင်ငံများ အားလုံး ထိတ်လန့်သွားကြသည်။</p> <p style="text-align:justify">အခြားသူများက ဤအရာကို ဖျော်ဖြေရေး တစ်ခုအဖြစ် သဘောထားနိုင်သော်လည်း ကျဲခယ် အဖွဲ့နှင့် အိမ်နီးချင်း ဖြစ်နေသူများကတော့ လုံးဝ မပြုံးနိုင်ကြတော့ပေ။</p> <p style="text-align:justify">အရှေ့တောင်အာရှတွင် အလတ်စား စစ်ရေးအင်အားကြီး နိုင်ငံဖြစ်သော စင်ကာပူသည် အရှေ့တောင် အာရှ နိုင်ငံများအကြားတွင် အစွမ်းအစရှိသူဟု သတ်မှတ်ခံထားရသော်လည်း ကျဲခယ် အဖွဲ့၏ စစ်အင်အားရှေ့တွင် နှစ်ရက်သာ ခံလိုက်သည်။</p> <p style="text-align:justify">ကျဲခယ် အဖွဲ့ကဲ့သို့ ဓားသွေးနေသော အိမ်နီးချင်းမျိုးနှင့် ကြုံတွေ့ရချိန်တွင် မည်သူက မကြောက်ဘဲ နေနိုင်တော့မည်နည်း။ </p> <p style="text-align:justify">………………..</p> <p style="text-align:justify">စင်ကာပူ၊ ချန်ဂီ ရေတပ်စခန်း</p> <p style="text-align:justify">ချန်ဂီရေတပ်စခန်းသည် စင်ကာပူ၏ အရှေ့မြောက်ဘက် အစွန်ဆုံးတွင် တည်ရှိပြီး ၈၆ ဟက်တာ ကျယ်ဝန်းကာ သင်္ဘောဆိုက်ကပ်နိုင်သော ပင်လယ်ပြင်ဧရိယာ ၁၂၈ ဟက်တာ ရှိသည်။</p> <p style="text-align:justify">၎င်း၏ အဓိက အဆောက်အအုံများတွင် ရေတပ်စု ကွပ်ကဲမှု ရုံးအဆောက်အအုံ၊ နည်းဗျူဟာ လေ့ကျင့်ရေး စင်တာ၊ ကွပ်ကဲမှုနှင့် ထိန်းချုပ်မှု စင်တာ၊ ရေတပ် လေ့ကျင့်ရေးစခန်း၊ ဆိပ်ခံတံတားများ၊ ဂိုဒေါင်များနှင့် သင်္ဘောပြင်ဆင်ရေး အဆောက်အအုံများ ပါဝင်သည်။</p> <p style="text-align:justify">ရေနက်ဆိပ်ကမ်းတစ်ခု ဖြစ်သောကြောင့် ချန်ဂီ ရေတပ်စခန်းသည် လေယာဉ်တင်သင်္ဘောများ အပါအဝင် ကြီးမားသော ရေတပ်အုပ်စုများကို လက်ခံနိုင်စွမ်း ရှိသည်။</p> <p style="text-align:justify">ချန်ဂီ ရေတပ်စခန်းနှင့် ပတ်သတ်၍ စင်ကာပူနှင့် အမေရိကန်တို့သည် နားလည်မှု စာချွန်လွှာတစ်ရပ် လက်မှတ်ရေးထိုးခဲ့ကြပြီး အမေရိကန် စစ်တပ်အား ချန်ဂီ ရေတပ်စခန်းကို ငှားရမ်း အသုံးပြုခွင့် ပေးကာ ဖြတ်သန်းသွားလာသော သင်္ဘောများ အထူးသဖြင့် လေယာဉ်တင်သင်္ဘော အုပ်စုများအတွက် ထောက်ပံ့ ပို့ဆောင်ရေးနှင့် ရိက္ခာများ ပံ့ပိုးပေးနိုင်ရန် ခွင့်ပြုထားသည်။</p> <p style="text-align:justify">ဤသည်မှာ စင်ကာပူက အမေရိကန်ထံ သစ္စာခံခြင်းအတွက် အပြန်အလှန်အနေဖြင့် အမေရိကန်၏ ကာကွယ်မှုနှင့် အထူးခံစားခွင့်များကို ရရှိရန် ဖြစ်သည်။</p> <p style="text-align:justify">ချန်ဂီ ရေတပ်စခန်း၏ အရေးပါမှုကြောင့် ၎င်းသည် အမေရိကန် ရေတပ်အတွက် မလက္ကာ ရေလက်ကြားကို ထိန်းချုပ်ကာ အရှေ့နှင့် အနောက်သို့ လှုပ်ရှားနိုင်စွမ်း ရရှိစေမည့် အရေးကြီးသော တံတားဦးတစ်ခု ဖြစ်လာခဲ့သည်။</p> <p style="text-align:justify">ချန်ဂီ ရေတပ်စခန်းကို အသုံးပြုခြင်းဖြင့် အမေရိကန် ရေတပ်သည် ၂၄ နာရီအတွင်း မလက္ကာ ရေလက်ကြား တစ်ခုလုံးကို ထိန်းချုပ်နိုင်ပြီး အမေရိကန် ရေတပ်၏ သတ္တမမြောက် ရေတပ်စုသည် တောင်တရုတ်ပင်လယ်နှင့် ကပ္ပလီပင်လယ်တို့ကို ဖြတ်သန်းကာ ပစိဖိတ်သမုဒ္ဒရာနှင့် အိန္ဒိယ သမုဒ္ဒရာတို့ကို အလွယ်တကူ စုန်ဆန် သွားနိုင်ပေသည်။</p> <p style="text-align:justify">ချန်ဂီ ရေတပ်စခန်းကို ဆက်သွယ်ရေး အချက်အချာအဖြစ် အသုံးပြုကာ အမေရိကန်သည် အရှေ့တောင်အာရှတွင် စစ်စခန်း အုပ်စုတစ်ခုအား တည်ဆောက်ခဲ့သည်။ ယနေ့တိုင်အောင် အမေရိကန်သည် ချန်ဂီ ရေတပ်စခန်းတွင် စစ်ဘက်ဆိုင်ရာ ဝန်ထမ်း ရာပေါင်းများစွာနှင့် ကမ်းခြေစောင့် တိုက်ခိုက်ရေး သင်္ဘော သုံးစင်းကို တပ်ဖြန့်ထားဆဲ ဖြစ်သည်။</p> <p style="text-align:justify">ဧပြီလ ၂၀ ရက်နေ့…</p> <p style="text-align:justify">ကျဲခယ် အဖွဲ့က စင်ကာပူကို လုံးဝ သိမ်းပိုက်ပြီးနောက် စင်ကာပူကို အကြွင်းမဲ့ လက်နက်ချ အညံ့ခံကြောင်း ကြေညာရန် ဖိအားပေးပြီးချိန်တွင် ဖြစ်သည်။</p> <p style="text-align:justify">ချန်ဂီ ရေတပ်စခန်းသည် သီချင်းဆို ကခုန်မှုများဖြင့် ငြိမ်းချမ်းနေဆဲ ဖြစ်သည်။</p> <p style="text-align:justify">နံနက် ၉ နာရီတွင် အမေရိကန် ရေတပ်သားများသည် ပုံမှန်အတိုင်း နေ့စဉ် လေ့ကျင့်မှုများကို ပြုလုပ်နေကြသည်။</p> <p style="text-align:justify">ဝူး... ဝူးဟူး... ဝူးဟူး</p> <p style="text-align:justify">ရုတ်တရက် စူးရှသော သတိပေး ဥဩသံကြီး ချန်ဂီ ရေတပ်စခန်း တစ်ခွင်တွင် ထွက်ပေါ်လာပြီး စူးရှသော အသံက လူများ၏ နားစည်ထဲသို့ တိုက်ရိုက် တိုးဝင်သွားသည်။</p> <p style="text-align:justify">အမေရိကန် ရေတပ်သားများသည် မည်သည့်အရာကို လုပ်နေသည်ဖြစ်စေ သူတို့၏ အလုပ်များကို ချထားလိုက်ပြီး ခေါင်းမော့ကာ ဘေးပတ်လည်ကို လိုက်ကြည့်နေကြသော်လည်း အခြေအနေကို နားမလည်ကြသေးပေ။</p> <p style="text-align:justify">"ဒီနေ့ သတိပေး ဥဩသံ လေ့ကျင့်ခန်း ရှိလို့လား။ ငါ ဘာအကြောင်းကြားစာမှ မရပါဘူး"</p> <p style="text-align:justify">"ငါလည်း အထက်က ဘာအမိန့်မှ မရပါဘူး”</p> <p style="text-align:justify">"အထက်က ဘာတွေ လျှောက်လုပ်နေကြတာလဲ။ မှားနှိပ်မိတာဆိုရင်လည်း မြန်မြန် သွားပိတ်လိုက်ပါ။ နားကွဲတော့မယ်”</p> <p style="text-align:justify">"တစ်ခုခုတော့ မှားနေပြီထင်တယ်။ ငါ အကြောင်းပြချက် မရှိဘဲ စိတ်လှုပ်ရှားနေတယ်”</p> <p style="text-align:justify">အမေရိကန် စစ်သားများ အချင်းချင်း တီးတိုး ပြောဆိုနေကြပြီး ရုတ်တရက် ထွက်ပေါ်လာသော ဥဩသံကြောင့် လုံးဝ ဇဝေဇဝါ ဖြစ်နေကြသည်။</p> <p style="text-align:justify">"သတိပေးချက်၊ သတိပေးချက်။ ချန်ဂီ ရေတပ်စခန်း အပြင်ဘက်ကို အမည်မသိ စစ်သင်္ဘောတွေ ချဉ်းကပ်လာတာကို တွေ့ရပါတယ်။ ဝန်ထမ်းအားလုံး တိုက်ပွဲဝင် နေရာတွေကို ချက်ချင်း ပြန်သွားကြပါ”</p> <p style="text-align:justify">“ဒါဟာ လေ့ကျင့်ခန်း မဟုတ်ပါဘူး။ ထပ်ပြောပါမယ်။ ဒါဟာ လေ့ကျင့်ခန်း မဟုတ်ပါဘူး..."</p> <p style="text-align:justify">သို့သော် မကြာမီမှာပင် စခန်း၏ အမြင့်ဆုံး အရာရှိ၏ အော်ဟစ်သံက ချန်ဂီ ရေတပ်စခန်း တစ်ခွင်တွင် ပဲ့တင်ထပ်သွားပြီး သူ၏ အသံတွင် စိုးရိမ်ပူပန်မှုများ ရောယှက်နေသည်။</p> <p style="text-align:justify">အမေရိကန် ရေတပ်သားများ တုန်လှုပ်သွားကြသည်။ အခြေအနေ၏ ကြီးလေးမှုကို နောက်ဆုံးတွင် သူတို့ သဘောပေါက်သွားကြပြီး သူတို့၏ သက်ဆိုင်ရာ တာဝန်ကျ နေရာများဆီသို့ အပြေးအလွှား သွားကြတော့သည်။</p> <p style="text-align:justify">အချို့က ဆိပ်ခံတံတားတွင် ဆိုက်ကပ်ထားသော ကမ်းခြေစောင့် တိုက်ခိုက်ရေး သင်္ဘောများဆီသို့ ပြေးသွားကြပြီး အချို့က စခန်းအတွင်း တပ်ဆင်ထားသော လေယာဉ်ပစ် အမြောက်စခန်းများဆီသို့ ပြေးသွားကြကာ အချို့က ဒုံးပျံ ကင်းလှည့်လှေများကို သွားရောက် စက်နှိုးကြသည်။</p> <p style="text-align:justify">သို့သော် သူတို့ တိုက်ပွဲဝင် နေရာများသို့ မရောက်မီမှာပင်...</p> <p style="text-align:justify">ချန်ဂီ ရေတပ်စခန်း၏ အပြင်ဘက် ပင်လယ်ပြင်တွင် တန်ပေါင်း သောင်းချီသော ပင်လယ်ရေများ မြင့်တက်လာကာ ကွဲဟသွားပြီး အလျား မီတာ ၂၅၀ နီးပါးနှင့် တန်ချိန် လေးသောင်းကျော် ရှိသော မျိုစင်္ကြာ အတန်းအစား ရေနက်ပိုင်း ခရူဇာစစ်သင်္ဘောကြီးတစ်စင်း ရေပြင်ကို ခွဲထွက်လာသည်။</p> <p style="text-align:justify">ဤသည်မှာ ကျဲခယ် အဖွဲ့ ရေတပ် ပထမ ရေတပ်စု၏ အလံတင် စစ်သင်္ဘောဖြစ်သော ဧရာဝတီ ခရူဇာစစ်သင်္ဘောကြီးပင် ဖြစ်သည်။</p> <p style="text-align:justify">ရေပေါ်ပေါ်လာပြီးနောက် ဆိပ်ခံတံတားနှင့် အတော်လေး ဝေးကွာနေသေးသော်လည်း မျိုစင်္ကြာ အတန်းအစား ခရူဇာစစ်သင်္ဘောကြီး၏ ဧရာမ အရွယ်အစားကြောင့် ပင်လယ်ပြင်၌ ၎င်းကို အလွယ်တကူ မြင်တွေ့နိုင်ပေသည်။</p> <p style="text-align:justify">ချန်ဂီ ရေတပ်စခန်းရှိ အမေရိကန် စစ်သားအားလုံး ဧရာဝတီ ခရူဇာစစ်သင်္ဘောကြီးကို မြင်တွေ့လျှင် သူတို့၏ ဦးရေပြားများ ချက်ချင်း ထုံကျင်သွားကာ ထိတ်လန့် တုန်လှုပ်ကုန်ကြသည်။</p> <p style="text-align:justify">ယခုကာလအတွင်း ကမ္ဘာ့ ရေပန်းအစားဆုံး သတင်းတစ်ခု အနေဖြင့် မျိုစင်္ကြာ အတန်းအစား ခရူဇာစစ်သင်္ဘောကြီး၏ စွမ်းအားသည် ကမ္ဘာတစ်ဝှမ်းသို့ ပျံ့နှံ့နေပြီ ဖြစ်သည်။ အိန္ဒိယ ရေတပ်ကို အမှုန့်ကြိတ်ပစ်ခဲ့ခြင်းက မျိုစင်္ကြာ အတန်းအစား ခရူဇာစစ်သင်္ဘောကြီး၏ ဂုဏ်သတင်းကို ပိုမို ကျော်ကြားစေခဲ့၏။</p> <p style="text-align:justify">ဒုံးကျည် ရာပေါင်းများစွာကို သယ်ဆောင်ထားပြီး အလွန် ကောင်းမွန်သော လေကြောင်းကာကွယ်ရေး ပစ်ခတ်နိုင်စွမ်း ပိုင်ဆိုင်သည့် လက်နက်တိုက် ခရူဇာစစ်သင်္ဘော ဖြစ်သော ကျဲခယ်အုပ်စု၏ ဧရာဝတီ ခရူဇာစစ်သင်္ဘောကို မည်သူမျှ အထင်မသေးရဲကြချေ။ ထို့အပြင် သူတို့၏ ချန်ဂီ ရေတပ်စခန်းတွင် လက်ရှိအချိန်၌ ကမ်းခြေစောင့် တိုက်ခိုက်ရေး သင်္ဘော သုံးစင်းသာ ရှိသည်။</p> <p style="text-align:justify">ကမ်းခြေစောင့် တိုက်ခိုက်ရေး သင်္ဘောများသည် အလျား ၁၂၇ မီတာသာ ရှိပြီး တန်ချိန် သုံးထောင်အောက်သာ ရှိကာ အပေါ့စား ဖရီးဂိတ်စစ်သင်္ဘော အတန်းအစားတွင် ပါဝင်သည်။</p> <p style="text-align:justify">ကမ်းခြေစောင့် တိုက်ခိုက်ရေး သင်္ဘော သုံးစင်း၏ စုစုပေါင်း တန်ချိန်သည်ပင် ဧရာဝတီ၏ ငါးပုံတစ်ပုံသာ ရှိပြီး သူတို့၏ တိုက်ခိုက်ရေး စွမ်းအားမှာ များစွာ နိမ့်ကျလှသည်။ ပစ်ခတ်မှု တစ်ကြိမ်တည်းဖြင့်ပင် သူတို့၏ ကမ်းခြေစောင့် တိုက်ခိုက်ရေး သင်္ဘော သုံးစင်းစလုံးကို နစ်မြုပ်ပစ်နိုင်သည်။</p> <p style="text-align:justify">ထို့ထက်ပို၍ ဆိုးရွားသည်မှာ ကမ်းခြေစောင့် တိုက်ခိုက်ရေး သင်္ဘောများသည် ဆိပ်ခံတံတားတွင် ဆိုက်ကပ်ထားဆဲဖြစ်ရာ ပစ်ကွင်းထဲမှ ဘဲများကဲ့သို့ ဖြစ်နေပြီး ဧရာဝတီနှင့် ယှဉ်ပြိုင်ရန် ပို၍ပင် မဖြစ်နိုင်တော့ပေ။ နှစ်ဖက်စလုံးသည် တူညီသော အဆင့်အတန်းရှိ ပြိုင်ဘက်များ မဟုတ်ကြပေ။</p> <p style="text-align:justify">ဤမျှ အစွမ်းထက်သော ခရူဇာစစ်သင်္ဘောကြီး ဤနေရာတွင် ပေါ်လာခြင်းက အတိတ်နိမိတ် မကောင်းပုံပေါ်နေပြီး ချန်ဂီ ရေတပ်စခန်းရှိ အမေရိကန် စစ်သားအားလုံး တင်းမာသွားကြသည်။</p> <p style="text-align:justify">"ကျဲခယ် အဖွဲ့... ဒါ ဘာသဘောလဲ။ ငါတို့နိုင်ငံရဲ့ ရေတပ်စခန်းကို လူသိရှင်ကြား ကျူးကျော်တာက နိုင်ငံတကာ ဥပဒေကို ချိုးဖောက်နေတာပဲ”</p> <p style="text-align:justify">ချန်ဂီ ရေတပ်စခန်း၏ တပ်မှူးဖြစ်သူ ရေတပ်ဗိုလ်ချုပ် နာဝင်းသည် ကွပ်ကဲရေး အခန်းထဲတွင် ရပ်ကာ အင်ဒို-ပစိဖိတ် ကွပ်ကဲမှု ဌာနချုပ်သို့ အခြေအနေကို သတင်းပို့နေစဉ် ဧရာဝတီနှင့် ရေဒီယိုမှတစ်ဆင့် အဆက်အသွယ် ရရန် အဆက်မပြတ် ကြိုးစားနေသည်။</p> <p style="text-align:justify">ဧရာဝတီ ခရူဇာစစ်သင်္ဘောပေါ်တွင် သင်္ဘောအုပ်ကပ္ပတိန် ထူဖုန်းပူက ခနဲ့တဲ့တဲ့ နှစ်ချက်ရယ်လိုက်ပြီး ရေဒီယိုထဲသို့ ပြောလိုက်သည် - "မင်းတို့ အမေရိကန်က တော်တော် ရဲတင်းပါလား ငါတို့ကို အရင် စွပ်စွဲရဲသေးတယ်ပေါ့လေ။ ဒါ ငါတို့ မြေပဲ”</p> <p style="text-align:justify">“မင်းတို့က ငါတို့ အမိမြေကို တရားမဝင် သိမ်းပိုက်ထားတာ”</p> <p style="text-align:justify">“မင်းတို့ ကုလသမဂ္ဂ လုံခြုံရေး ကောင်စီကို တိုင်ရင်တောင် ငါတို့ဘက်က အမှန်ပဲ”</p> <p style="text-align:justify">ရေတပ်ဗိုလ်ချုပ် နာဝင်း၏ နဖူးမှ သွေးကြောများ ထောင်တက်လာပြီး အံတင်းတင်းကြိတ်လိုက်ကာ ပြောလိုက်သည်။ "အဓိပ္ပာယ်မရှိတာ ချန်ဂီ ရေတပ်စခန်းဆိုတာ စင်ကာပူက ငါတို့နဲ့ သဘောတူညီချက် လုပ်ပြီး ငါတို့ အမေရိကန်ကို အသုံးပြုဖို့ လွှဲပြောင်းပေးထားတာ။ ငါတို့ ဒီမှာ ရှိနေတာ တရားဝင်ပြီး တရားဥပဒေနဲ့ အညီပဲ”</p> <p style="text-align:justify">"စင်ကာပူ ဟုတ်လား။ လက်ရှိ စင်ကာပူက ငါတို့ ကျဲခယ် အဖွဲ့ဆီ သစ္စာခံပြီးသွားပြီ။ မင်းတို့ အမေရိကန်နဲ့ သူတို့ လက်မှတ်ထိုးထားတဲ့ သဘောတူညီချက်က တရားဝင်မှု မရှိတော့ဘူး။ ငါတို့ ကျဲခယ် အဖွဲ့က အဲဒါကို အသိအမှတ် မပြုဘူး”</p> <p style="text-align:justify">သင်္ဘောအုပ်ကပ္ပတိန် ထူဖုန်းပူက ကွပ်ကဲရေး တံတားပေါ်တွင် ရပ်လျက် အတော်လေး ကစဉ့်ကလျား ဖြစ်နေသော ချန်ဂီ ရေတပ်စခန်းကို ကြည့်ကာ အမိန့်ပေးလိုက်သည်။ "အခု အချိန်ကစပြီး မင်းတို့ ချန်ဂီ ရေတပ်စခန်းက ဝန်ထမ်းအားလုံး လက်နက်တွေကို ချက်ချင်း အောက်ချထားလိုက်။ မဟုတ်ဘဲနဲ့ မင်းတို့က ခုခံမှုတွေ လုပ်မယ် ဆိုရင် မင်းတို့ရဲ့ ဘယ်လိုခုခံမှုကိုမဆို ငါတို့နိုင်ငံအပေါ် စစ်ကြေညာတဲ့ လုပ်ရပ်အဖြစ် သတ်မှတ်မယ်။ အကျိုးဆက်တွေကိုလည်း မင်းတို့ဘာသာ တာဝန်ယူရလိမ့်မယ်”</p> <p style="text-align:justify"> </p> <p style="text-align: center;">***</p>


Save