Book List

<h2 style="text-align: center;">အခန်း ၁၇၀ - ပလက်ဖောင်း၏ အစီအစဉ်</h2> <h2 style="text-align: center;">*</h2> <p> </p> <p> </p> <p>နာရေးဝန်ဆောင်မှု ဆိုင်တံခါးကို တွန်းဖွင့်လိုက်ပြီး လက်ဆွဲအိတ်ကို ကောင်တာပေါ်သို့ တိတ်ဆိတ်စွာ တင်လိုက်လေသည်။</p> <p>အထဲတွင် ဝေ့ဝမ်ချန်ပေးသည့် ဂါရဝကြေး ယွမ်တစ်သန်း ရှိနေ၏။</p> <p>အစက လီယီတောင်း လက်ခံရန် တွန့်ဆုတ်နေသော်လည်း ဝေ့ဝမ်ချန်က အဘိုးအိုထံ ဖုန်းဆက်လိုက်သဖြင့် နောက်ဆုံးတွင် ထိုငွေကို သူ ယူလာခဲ့ရခြင်း ဖြစ်သည်။</p> <p>ထိုင်နေကျ ပက်လက်ကုလားထိုင်ပေါ်တွင် မှီလျက် ချန်ချန်ယွီ၏ နောက်ဆုံး ဆုံးဖြတ်ချက်ကို ပြန်တွေးရင်း လီယီတောင်း တိတ်ဆိတ်သွားမိ၏။</p> <p>' အမှားနဲ့ အမှန်... ဘယ်သူကများ အမှားမလုပ်မိဘူးလို့ အာမခံနိုင်မှာလဲ...'</p> <p>အပြုအမူတစ်ခုက မှန်သည်ဖြစ်စေ၊ မှားသည်ဖြစ်စေ... ဤနောက်ဆုံး ဆုံးဖြတ်ချက်နှင့်အတူ အရာအားလုံးက အရေးမပါတော့ပေ။</p> <p>သူ သေဆုံးသွားသည်နှင့်အတူ အရာရာတိုင်းက လေနှင့်အတူ လွင့်ပါးသွားပေလိမ့်မည်။</p> <p>အတွေးနယ်ချဲ့နေရင်းမှ လီယီတောင်း အိပ်ပျော်သွားခဲ့လေသည်။</p> <p>" တီတီ... တီတီ... "</p> <p>ရုတ်တရက် မြည်လာသော ဖုန်းသံကြောင့် လီယီတောင်း လန့်နိုးသွားပြီး မျက်လုံးဖွင့်ကြည့်လိုက်၏။ သူ ဖုန်းကို ကောက်ကိုင်ကြည့်လိုက်ရာ နံပါတ်စိမ်းတစ်ခု ဖြစ်နေသဖြင့် မျက်မှောင်ကြုတ်သွားလေသည်။</p> <p>" ဟယ်လို... "</p> <p>" ဟယ်လို... အစ်ကိုယီတောင်းနဲ့ ပြောလို့ရမလားဟင်... " </p> <p>တစ်ဖက်မှ မိန်းကလေး အသံတစ်ခု ထွက်ပေါ်လာသည်။ </p> <p>လီယီတောင်း ခဏတာ ငြိမ်သွားပြီး... <br /> " ကျွန်တော် လီယီတောင်း ပါ... ဘယ်သူလဲ မသိဘူး... "</p> <p>" မင်္ဂလာပါ အစ်ကိုယီတောင်း... ကျွန်မက ပလက်ဖောင်းရဲ့ စီမံခန့်ခွဲရေး ဌာနကပါ..."</p> <p>" မကြာခင်မှာ ကျွန်မတို့ ပလက်ဖောင်းပေါ်မှာ အပြန်အလှန် တွေ့ဆုံမှု အစီအစဉ်ကြီး တစ်ခု ရှိပါတယ်... အခု လက်ရှိ နာမည်ကြီးနေတဲ့ အနုပညာရှင်တွေနဲ့အတူ ကျွန်မတို့ရဲ့ ထိပ်တန်း Streamer တချို့ကို ဖိတ်ခေါ်ပြီး အပြန်အလှန် တွေ့ဆုံတဲ့ ပုံစံမျိုး လုပ်မှာပါ..."</p> <p>" အခု အစ်ကို့ရဲ့ ပရိသတ် အင်အားက ပလက်ဖောင်းပေါ်မှာ တော်တော်လေး အားကောင်းနေပြီမို့လို့ ဒီအစီအစဉ်မှာ ပါဝင်ဖို့ ဖိတ်ခေါ်ချင်လို့ပါ... အစ်ကို အဆင်ပြေနိုင်မလားဟင်..."</p> <p>ပလက်ဖောင်း စီမံခန့်ခွဲရေး ဌာန ဟုတ်လား... အစီအစဉ်မှာ ပါဝင်ရမယ် ဟုတ်လား...။</p> <p>လီယီတောင်း ငြင်းပယ်ရန် စဉ်းစားလိုက်၏။</p> <p>မဖြေရှင်းရသေးသော ကိစ္စများစွာ ရှိနေသည့်အပြင် လီယီနို၏ သတင်းအစအနပင် မရသေးသော အချိန်မျိုးတွင် မည်သည့် အစီအစဉ်တွင်မှ ပါဝင်ချင်စိတ် မရှိပေ။</p> <p>" စိတ်မရှိပါနဲ့ဗျာ... ကျွန်တော်က..." ဟု သူ ချက်ချင်း ငြင်းရန် ပြင်လိုက်သည်။</p> <p>သို့သော် ထိုအချိန်မှာပင် တစ်ဖက်မှ အလျင်အမြန် ဖြတ်ပြောလာ၏။ </p> <p>" အစ်ကိုယီတောင်း... ကျေးဇူးပြုပြီး ချက်ချင်းကြီး မငြင်းလိုက်ပါနဲ့ဦး..."</p> <p>သူမက ဆက်လက် ရှင်းပြလေသည်။ </p> <p>" ဒီအစီအစဉ်ကနေ ရလာမယ့် လက်ဆောင်ငွေတွေ အားလုံးကို Streamer ရဲ့ ဝေစုကို ဖယ်ပြီးတာနဲ့ ပရဟိတ အဖွဲ့အစည်းတစ်ခုကို တိုက်ရိုက် လှူဒါန်းသွားမှာပါ... ဒါ့အပြင် စုစုပေါင်း ရရှိတဲ့ လက်ဆောင်ငွေက အတိုင်းအတာတစ်ခုအထိ ရောက်သွားရင် ကျွန်မတို့ ဖောင်ဒေးရှင်းတစ်ခုတောင် တည်ထောင်သွားမှာပါ..."</p> <p>" အစီအစဉ် အတွင်းမှာ အစ်ကို ရရှိတဲ့ လက်ဆောင်တွေကိုလည်း လှူဒါန်းလို့ ရသလို၊ အစ်ကို့ဘာသာ သိမ်းထားချင်ရင်လည်း ရပါတယ်... တကယ်လို့ လှူဒါန်းဖို့ ဆုံးဖြတ်လိုက်မယ် ဆိုရင်တော့ အစ်ကို့ရဲ့ ပလက်ဖောင်း အကောင့်ဘေးမှာ အမြဲတမ်း ပေါ်နေမယ့် ပရဟိတ သံတမန် တံဆိပ်လေးတစ်ခု ရမှာပါ..."</p> <p>" အဲဒီလို ရည်ရွယ်ချက်ကြောင့်ပဲ ကျွန်မတို့က အခု နာမည်ကြီးနေတဲ့ အနုပညာရှင် အများကြီးကို ဖိတ်ခေါ်ထားတာပါ..."</p> <p>" ဒါကြောင့် အစ်ကိုယီတောင်း... တစ်ချက်လောက် စဉ်းစားပေးပါဦး... အစ်ကို့ရဲ့ နာမည်ကျော်ကြားမှုက ဒီအစီအစဉ်အတွက် တကယ်ကို လိုအပ်နေလို့ပါ..."</p> <p>ပရဟိတ ဟုတ်လား...။</p> <p>ရိုးရိုးသားသား ပြောရလျှင် ဤကဲ့သို့ ကိုယ်ကျင့်တရားနှင့် အကျပ်ကိုင်သော နည်းလမ်းကို သူ သိပ်သဘောမကျပေ။</p> <p>သို့သော်လည်း အစီအစဉ်က ပရဟိတ သဘောတရား ဖြစ်နေသဖြင့် အတိုင်းအတာတစ်ခုအထိတော့ သူ ပါဝင်ပေးနိုင်ပါသည်။</p> <p>" အစီအစဉ်ရဲ့ အသေးစိတ်က ဘယ်လိုလဲ..."</p> <p>အစီအစဉ် အသေးစိတ်ကို လီယီတောင်း မေးလိုက်သည်ကို ကြားသောအခါ ရှောင်ဝမ် ပြုံးမိလေသည်။</p> <p>ရင်ထဲမှ စိတ်လှုပ်ရှားမှုကို ထိန်းချုပ်ရင်း... </p> <p>" ဒီအစီအစဉ်က ရိုးရိုးလေးပါ အစ်ကို... ကျွန်မတို့က အနုပညာရှင် ဧည့်သည်တွေကို Streamer တွေနဲ့ ကျပန်း အပြန်အလှန် စကားပြောခိုင်းမှာပါ..."</p> <p>" ကျွန်မတို့ဘက်က စီစဉ်ပေးမယ့်သူ ရှိပါတယ်... တကယ်လို့ အစ်ကိုက သီးသန့် ဧည့်သည်တစ်ယောက်ယောက်နဲ့ အပြန်အလှန် ပြောချင်တယ် ဆိုရင်လည်း ကျွန်မတို့ စီစဉ်ပေးလို့ ရပါတယ်..."</p> <p>လီယီတောင်း ခဏမျှ စဉ်းစားပြီးနောက်... " ကောင်းပြီလေ... " ဟု ပြောလိုက်သည်။</p> <p>" ဒါပေမဲ့ ကျွန်တော် ဘယ်အချိန် Live လွှင့်နိုင်မလဲ ဆိုတာတော့ သေချာ မပြောနိုင်ဘူး... တကယ်လို့ ကျွန်တော် မလာဖြစ်ရင်တော့ မပါဝင်ဘူးလို့ပဲ သတ်မှတ်လိုက်ပါ..."</p> <p>" ပြဿနာ မရှိပါဘူး... အစ်ကို့ရဲ့ အချိန်ဇယား အပေါ်မှာပဲ မူတည်ပါတယ် အစ်ကိုယီတောင်း..." </p> <p>ရှောင်ဝမ်က မဆိုင်းမတွ သဘောတူလိုက်လေသည်။</p> <p>ဘာပဲဖြစ်ဖြစ် ဤအစီအစဉ်ကို နှစ်ပတ်ကြာ ပြုလုပ်ရန် သူတို့ စီစဉ်ထားသည် မဟုတ်ပါလား။</p> <p>လက်ရှိ နာမည်ကြီးနေသော အနုပညာရှင် ၂၀ ကျော်ကိုလည်း သူတို့ ဖိတ်ခေါ်ထားပြီး ဖြစ်သည်။</p> <p>မမျှော်လင့်ထားသော ကိစ္စများ မရှိလျှင် လဝက်ခန့်အထိ ဤအစီအစဉ်ကို ရေပန်းစားအောင် ထိန်းသိမ်းထားနိုင်ရန်မှာ ပြဿနာ မဟုတ်ပေ။</p> <p>ပလက်ဖောင်း အဖွဲ့သားများက အရာအားလုံးကို ကြိုတင် စီစဉ်ထားပြီး ဖြစ်လေသည်။</p> <p>လီယီတောင်း၏ အခန်းကဏ္ဍနှင့် ပတ်သက်၍မူ... ရိုးရိုးသားသား ပြောရလျှင် တစ်ပလက်ဖောင်းလုံး၏ အမြင်တွင် သူ၏ သြဇာလွှမ်းမိုးမှုက အနုပညာရှင် အတော်များများထက်ပင် ပိုကြီးမားနေလေသည်။</p> <p>မည်သို့ပင်ဖြစ်စေ လက်ရှိ နာမည်အကြီးဆုံး အနုပညာရှင်အချို့ပင်လျှင် တစ်ကြိမ် Live လွှင့်လျှင် ကြည့်ရှုသူ သန်းနှင့်ချီ ရှိရန် အာမမခံနိုင်ပေ။ သို့သော် လီယီတောင်း အတွက်မူ ထိုကဲ့သို့သော ကိန်းဂဏန်းများမှာ နေ့စဉ် ကြုံတွေ့နေရသော သာမန် ကိစ္စတစ်ခုသာ ဖြစ်၏။</p> <p>လီယီတောင်းက ဆက်ပြောလေသည်။ </p> <p>" ကောင်းပြီ... အဲဒီအတိုင်းပဲ လုပ်ကြတာပေါ့... အစီအစဉ် စတဲ့အခါကျရင် ကျွန်တော့်ကို ဆက်သွယ်လိုက်ပါ... အဲဒီအချိန်မှာ ကျွန်တော် အားနေရင် Live လွှင့်ပေးပါ့မယ်..."</p> <p>" ဟုတ်ကဲ့ပါ အစ်ကိုယီတောင်း... အစီအစဉ်က နောက်သုံးရက်နေရင် စဖို့ မှန်းထားပါတယ်... ကျွန်မ အစ်ကို့ကို ဆက်သွယ်လိုက်ပါ့မယ်... အစ်ကို အားရင် Live လွှင့်ပေးပါဦးနော်..."</p> <p>" ဒါနဲ့... ကျွန်မတို့ သူဌေးက ပြောပါတယ်... အစီအစဉ် အတွင်းမှာ အစ်ကို့ရဲ့ Live က ရတဲ့ ဝင်ငွေတွေအပေါ် ပလက်ဖောင်းက ဘာအခကြေးငွေမှ ဖြတ်မှာ မဟုတ်ပါဘူးတဲ့... အစ်ကို အကုန် ထုတ်ယူချင်တာပဲ ဖြစ်ဖြစ်၊ လှူချင်တာပဲ ဖြစ်ဖြစ်၊ တစ်စိတ်တစ်ပိုင်း လှူချင်တာပဲ ဖြစ်ဖြစ်... အစ်ကို့ သဘောအတိုင်းပါပဲတဲ့..."</p> <p>" သဘောပေါက်ပါပြီ... " </p> <p>လီယီတောင်း၏ လေသံက တည်ငြိမ်နေ၏။ သူ ဝင်ငွေ ခွဲဝေမှုအပေါ် သိပ်ပြီး စိတ်မဝင်စားမှန်း သိသာလှပေသည်။</p> <p>" ဒါဆိုရင်တော့ အစ်ကို့ကို ထပ်မနှောင့်ယှက်တော့ပါဘူးရှင်..."</p> <p>" ဒါနဲ့ အစ်ကိုယီတောင်း... အစ်ကို အချိန်ရရင် Live လေး တစ်ခုလောက် လွှင့်ပေးပါဦးနော်..."</p> <p>" ရိုးရိုးသားသား ပြောရရင် အစ်ကိုသာ Live မလွှင့်ရင် ကျွန်မတို့ ပလက်ဖောင်းရဲ့ ဝန်ဆောင်မှု ဖုန်းတွေကို အစ်ကို့ ပရိတ်သတ်တွေက လာလာ ဆဲရော..."</p> <p>ရှောင်ဝမ်က အနည်းငယ် ကူကယ်ရာမဲ့သည့် လေသံဖြင့် ပြောလိုက်ခြင်း ဖြစ်သည်။</p> <p>သူမက ချဲ့ကား ပြောနေခြင်း မဟုတ်ပေ။</p> <p>လီယီတောင်းသာ Live မလွှင့်လျှင် သူ၏ ပရိသတ်များက ပလက်ဖောင်း၏ ဝန်ဆောင်မှု ဌာနကို လာသောင်းကျန်းတော့မည်မှာ အသေအချာပင်။<br /> ဖုန်းချလိုက်ပြီးနောက် လီယီတောင်းက အပြင်ဘက်မှ ညအမှောင်ထုကို လှမ်းကြည့်ရင်း ပျင်းရိစွာဖြင့် ကိုယ်လက်ဆန့်လိုက်လေသည်။</p> <p>ဂွီ...</p> <p>သူ့ဗိုက်က မြည်လာ၏။</p> <p>ကျိုးရှုရီတို့ ရှိရာ ဆိုင်ခန်းဘက် သူ အလိုလို လှမ်းကြည့်မိသွားလေသည်။</p> <p>' အင်း... ဒီနေ့တော့ စားဖိုးဆောင် ပိတ်ထားတဲ့ ပုံပဲ... အပြင်ကပဲ မှာစားရတော့မှာပေါ့...'</p> <p>ထို့ကြောင့် အသည်းစွဲ ဝက်လက်ထမင်းပေါင်း တစ်ပွဲကို သူ မှာယူလိုက်၏။ ထို့နောက် ခဏမျှ စဉ်းစားပြီးနောက် Live လွှင့်ရန် ဆုံးဖြတ်လိုက်သည်။</p> <p>ပရိသတ်တွေနဲ့ ပေါ့ပေါ့ပါးပါး စကားပြောတာကလည်း အကြံကောင်းတစ်ခုပဲလေ...။</p> <p>ပရိသတ်တွေရဲ့ စိတ်ဝင်စားစရာ Comment တွေကို ကြည့်ရတာကလည်း အနားယူဖို့ နည်းလမ်းတစ်ခုပေါ့...။</p> <p>ဤအချိန်တွင် ကျိုးရှုရီနှင့် လီရှင်းထင်တို့မှာ ဆိုင်တွင် မရှိကြပေ။ ကျေးလက်ဒေသသို့ ဦးတည်မောင်းနှင်နေသော ဘတ်စ်ကားတစ်စီးပေါ်တွင် ရောက်နေကြလေသည်။</p> <p>ဤခရီးစဉ်၏ ဦးတည်ရာမှာ လီရှင်းထင်၏ မွေးရပ်မြေပင် ဖြစ်လေသည်။</p> <p>ပြန်ရသည့် အကြောင်းရင်းမှာ လီရှင်းထင်၏ အချစ်ဆုံး သူငယ်ချင်း၊ ညီမအရင်းလို ခင်ရသည့် သူငယ်ချင်း တစ်ယောက် မင်္ဂလာဆောင်တော့မည် ဖြစ်သောကြောင့်ပင်။</p> <p>ပုံမှန်အားဖြင့် မင်္ဂလာဆောင် ဆိုသည်မှာ ပျော်ရွှင်စရာ ကိစ္စတစ်ခု ဖြစ်၏။ သို့သော် ဤသူငယ်ချင်း၏ မင်္ဂလာဆောင်ကတော့ အဖြစ်ဆိုး တစ်ခုသာ။</p> <p>လီရှင်းထင်က သွားပြီး ဆုမွန်တောင်းပေးမည် မဟုတ်ဘဲ မဖြစ်သင့်မဖြစ်ထိုက်သော မင်္ဂလာဆောင်တစ်ခုကို သွားရောက် ဖျက်ဆီးပစ်ရန် ပြင်ဆင်ထားခြင်း ဖြစ်၏။</p> <p>သူမက သူငယ်ချင်းကို ထွက်ပြေးနိုင်အောင် ကူညီပေးတော့မည် ဖြစ်သည်။</p> <p>" ထွက်ပြေး " ဆိုသည့် စကားလုံးကို သူမ သုံးရခြင်းမှာ ချဲ့ကား ပြောဆိုခြင်း မဟုတ်ဘဲ သူမ၏ သူငယ်ချင်းမှာ သူမ၏ မိဘများက ရောင်းစားခြင်း ခံလိုက်ရသောကြောင့်ပင်။</p> <p>အင်း… မိဘ အရင်းလည်း မဟုတ်ပါဘူး… မွေးစားမိဘတွေ… ကျွေးကျေးဇူးကို ဆပ်ဖို့ဆိုပြီး အတင်း မင်္ဂလာဆောင်ခိုင်းနေတာ…။</p> <p>ဤကိစ္စကို ကြားကြားချင်း လီရှင်းထင် ဒေါသူပုန်ပြီး ငွေကြေးပမာဏ တစ်ခု သတ်မှတ်၍ သူငယ်ချင်း မွေးစားမိဘများကို ပေးရန် ကမ်းလှမ်းခဲ့သေးသည်။ သို့သော် သူငယ်ချင်းဖြစ်သူက ငြင်းပယ်ပြီး မင်္ဂလာပွဲကို လက်ခံခဲ့လေသည်။</p> <p>ဒါပေမဲ့… ဒီကောင်မ ဒုက္ခတောထဲ ခုန်ဆင်းမှာကို ငါ လက်ပိုက်ကြည့်မနေနိုင်ဘူး…။</p> <p>နောက်ဆုံးတွင်တော့ သူမ ကိုယ်တိုင် သွားရန်မှတစ်ပါး အခြား ရွေးချယ်စရာ မရှိတော့ပေ။</p> <p>ဘာပဲဖြစ်ဖြစ်... အဲဒါက ငါ့ရဲ့ အချစ်ဆုံး သူငယ်ချင်းလေ...။</p> <p>ငါ့တို့က ညီအစ်မတွေလိုပဲ… တကယ်ဆို သူက ငါ့ အသက်ကိုတောင် ကယ်ခဲ့ဖူးတာလေ… သူ ဒုက္ခရောက်မှာကို ထိုင်ကြည့်နေလို့ ဘယ်မဖြစ်မလဲ…။</p> <p> </p> <p> </p> <p> </p> <p> </p>


Save