Book List

<h2 style="text-align: center;">အခန်း (၁၆၄)</h2> <h2 style="text-align: center;">အစွမ်းထက် နဂါးငါးဖြူနှင့် ရှီရှောင်ယွမ်၏ အသွင်ပြောင်းခြင်း (၂)</h2> <h2 style="text-align: center;">*</h2> <p> </p> <p> </p> <p>သာမန် နဂါးငါးဖြူ တစ်ကောင်မှာ ယေဘုယျအားဖြင့် သုံးပေခန့်သာ ရှည်လျား၏။ သို့သော် ယခုတွေ့နေရသော နဂါးငါးဖြူမှာမူ ငါးပေနှင့် ခုနစ်လက်မ အတိအကျ ရှိနေပြီး သာမန် အရွယ်အစားထက် နှစ်ဆနီးပါး ပိုမို ကြီးမားနေပေသည်။</p> <p>တိရစ္ဆာန်လောကတွင် အရွယ်အစား ဆိုသည်မှာ ထူးခြားမှု၏ လက္ခဏာရပ်တစ်ခု ဖြစ်သလို ခွန်အား၏ သင်္ကေတ တစ်ခုလည်း ဖြစ်ပေသည်။ ဤကဲ့သို့ ကောက်ကျစ်စဉ်းလဲသော ရေသတ္တဝါမျိုး ဖြစ်သည့် နဂါးငါးဖြူမှာ အရွယ်အစား ပိုကြီးလေ ပို၍ အစွမ်းထက်လေ ဖြစ်သော်လည်း လူ့ခန္ဓာကိုယ် အတွက်မူ အကျိုးကျေးဇူး ပိုမို ကြီးမားသည်ဟု ဆိုလိုခြင်းပင်။</p> <p>ဤသည်ကို သိထားသော ရှီရှောင်ယွမ်မှာ အလွန်တရာ ကျေနပ်ဝမ်းမြောက်နေတော့သည်။</p> <p>ထိုစဉ် လူနှစ်ယောက်က လက်ကို ရှေ့သို့ လွှဲကာ နဂါးငါးဖြူဆီသို့ ငါးဖမ်းပိုက် နှစ်ခုအား မျက်စိတစ်မှိတ် အတွင်း ပစ်လွှတ်လိုက်ကြ၏။</p> <p>ပိုက်ကွန်၏ ထောင့်တစ်ခုစီတိုင်းတွင် သံဘောလုံးများ ချိတ်ဆွဲထားသည်။ ပိုက်ဖြင့် ဖမ်းမိသည်နှင့် တစ်ပြိုင်နက် ရှုပ်ယှက်ခတ်နေမည့် သံဘောလုံးများက နဂါးငါးဖြူ၏ လှုပ်ရှားမှုများကို ကန့်သတ်ချုပ်ချယ်ပစ်မည် ဖြစ်သည်။</p> <p>နောက်တစ်ခဏတွင်...</p> <p>နဂါးငါးဖြူက ၎င်း၏ အမြီးကို ရမ်းခါလိုက်ပြီး ပိုက်ကွန်ပေါ်ရှိ သံဘောလုံးများကို တိကျစွာ ရိုက်ချလိုက်တော့သည်။</p> <p>ဘန်း...</p> <p>ဘန်း...</p> <p>ဘန်း...</p> <p>သံဘောလုံးများ လွင့်စဉ်ထွက်သွားပြီး ဆွေးမြေ့နေသော သင်္ဘောအခန်းကို ဝင်ဆောင့်ကာ ချက်ချင်းပင် အပေါက်ကြီးများ အများအပြား ဖြစ်ပေါ်သွားစေ၏။</p> <p>ထိုနောက် ချက်ချင်း ဆိုသလိုပင် နဂါးငါးဖြူက ၎င်း၏ အရှိန်ကို မြှင့်တင်လိုက်သည်။</p> <p>၎င်း၏ သွယ်လျရှည်လျားသော ခန္ဓာကိုယ် ပုံပန်းသဏ္ဍာန်က ရေထဲတွင် ထူးကဲစွာ လျင်မြန်စွာ လှုပ်ရှားနိုင်စေသည်။ အဖြူရောင် အလင်းတန်း တစ်ခုပမာ မျက်တောင်တစ်ခတ်အတွင်း ခြံဝင်း အနည်းငယ်စာ အကွာအဝေးကို ဖြတ်ကျော်ကာ ထိုလူများအနီးသို့ ကပ်လာခဲ့လေသည်။</p> <p>"အချိန်ကိုက်ပဲ..."</p> <p>ရှီရှောင်ယွမ်က တည်ငြိမ်နေဆဲဖြစ်ပြီး နဂါးငါးဖြူကို သူ့ဓားဖြင့် ချက်ချင်း ခုတ်ပိုင်းလိုက်၏။</p> <p>ထိုအခိုက်အတန့်တွင် သူ့ဓားမှာ လေဟာနယ်ကိုသာ ပိုင်းဖြတ်သွားသကဲ့သို့ ခံစားလိုက်ရပြီး နဂါးငါးဖြူ၏ ခန္ဓာကိုယ်ကို ပွတ်ကာသီကာသာ ကျော်လွန်သွားခဲ့သည်။ ဤအချိန်တိုလေး အတွင်းမှာပင် နဂါးငါးဖြူက ဓားချက်ကို ရှောင်တိမ်းသွားခဲ့ခြင်းဖြစ်သည်။</p> <p>အမြီးတစ်ချက် ခတ်လိုက်သည်နှင့် ကိုးဆယ်ဒီဂရီ အချိုးအကွေ့ကို ချက်ချင်း ပြောင်းလဲသွား၏။</p> <p>ရုတ်တရက် လမ်းကြောင်း ပြောင်းလဲသွားမှုကြောင့် ရှီရှောင်ယွမ်အား ကျော်လွန်သွားကာ သူ့နောက်ရှိ လူများဆီသို့ တိုက်ရိုက် ဦးတည်သွားတော့သည်။</p> <p>"ကောက်ကျစ်လှတဲ့ တိရစ္ဆာန်..." ရှီရှောင်ယွမ်၏ မျက်လုံးများထဲတွင် ဒေါသအမျက်များ တောက်လောင်သွားသည်။</p> <p>လက်ထဲရှိ ပေါက်ကွဲထွက်လုမတတ် အရှိန်ကို ထိန်းချုပ်ပြီးနောက် သူက ဓားကိုကိုင်လျက် လှည့်ကြည့်လိုက်ရာ သူ့နောက်ရှိ လူနှစ်ယောက်က ငါးဖမ်းပိုက်၏ ထောင့်တစ်ဖက်စီကို ကိုင်ထားသည်အား တွေ့လိုက်ရ၏။ ထိုနှစ်ယောက် ပူးပေါင်း၍ နဂါးငါးဖြူအား ပိုက်ကွန်ဖြင့် ချက်ချင်း ဖုံးအုပ် ဖမ်းဆီးကြလေသည်။</p> <p>သို့သော် သူ ဝမ်းသာအားရ ဖြစ်ချိန်ပင် မရလိုက်ပေ။</p> <p>ပိုက်ကွန်ဖြင့် ချည်နှောင်ခံထားရသော နဂါးငါးဖြူက ပါးစပ်ကို ကျယ်ကျယ်ဟလိုက်ပြီး လွှသွားကဲ့သို့ ဖြူဖွေးချွန်ထက်နေသော သွားနှစ်တန်းကို ထုတ်ဖော်ပြသလိုက်သည်ကို မြင်တွေ့လိုက်ရသည်။</p> <p>ထိုသွားများ၏ ကိုက်ဖြတ်မှုအောက်တွင် အစပိုင်းက အလွန် ခိုင်ခံ့လှသော ပိုက်ကွန်မှာ လွန်စွာ ပျော့ညံ့သွားပြီး နဂါးငါးဖြူ၏ အလွယ်တကူ ဆုတ်ဖြဲခြင်းကို ခံလိုက်ရ၏။ ထို့နောက် ၎င်း၏ သွယ်လျ ရှည်လျားသော ခန္ဓာကိုယ်က အပေါက်ထဲမှ မျက်စိတစ်မှိတ်အတွင်း လျှိုထွက်သွားတော့သည်။</p> <p>"ဒုက္ခပဲ..." ဤသည်ကို မြင်လျှင် ရှီရှောင်ယွမ်၏ ရင်ထဲ ထိတ်ခနဲ ဖြစ်သွားသည်။</p> <p>မကောင်းသော အငွေ့အသက် တစ်ခုကို သူ ခံစားလိုက်ရလေသည်။</p> <p>နောက်တစ်ခဏတွင်...</p> <p>ဘိုင်း...</p> <p>ဘိုင်း...</p> <p>အမြီးတစ်ချက် ရိုက်ခတ်မှုနှင့်အတူ လူနှစ်ယောက်မှာ သွေးများ ပန်းထွက်ကာ နောက်သို့ လွင့်စဉ်သွားကြသည်။</p> <p>ထို့နောက်...</p> <p>ဘန်း...</p> <p>ဘန်း...</p> <p>သူတို့၏ ဝင်ဆောင့်မှုကြောင့် ဆွေးမြေ့နေသော သင်္ဘော သစ်သားပျဉ်ပြားများ ထပ်မံ ပျက်စီးသွားပြီး အပေါက်ကြီး နှစ်ပေါက် ထပ်မံ ဖြစ်ပေါ်သွားပြန်၏။</p> <p>တခြားတစ်နေရာတွင်…</p> <p>ကျန်းနင်က သင်္ဘောအပြင်ဘက်တွင် တစ္ဆေတစ်ကောင်ကဲ့သို့ ရှိနေလေသည်။ သင်္ဘောအပြင်ဘက်မှတစ်ဆင့် ဤမြင်ကွင်းကို သူ ရှင်းရှင်းလင်းလင်း မြင်တွေ့နေရ၏။</p> <p>"ဒီနဂါးငါးဖြူက... ဘယ်လောက်တောင် ကြောက်စရာကောင်းတဲ့ ပေါက်ကွဲအားလဲ..." ကျန်းနင်က စိတ်ထဲမှ တီးတိုး ရေရွတ်လိုက်မိသည်။</p> <p>အဘယ်ကြောင့်ဆိုသော် ရှီရှောင်ယွမ်နှင့်အတူ ရေထဲသို့ ဝင်ရောက်လာသူများမှာ အစစ်အမှန် နဝမအဆင့် သိုင်းပညာရှင်များ ဖြစ်ကြသောကြောင့်ပင်။ ထိုနဝမအဆင့် သိုင်းပညာရှင်များမှာ ဤနဂါးငါးဖြူရှေ့တွင်တော့ ပြန်လည် တိုက်ခိုက်နိုင်စွမ်း မရှိသလောက်ပင် ဖြစ်နေလေသည်။</p> <p>ရင်ဘတ်ကို အမြီးဖြင့် တစ်ချက် အရိုက်ခံရရုံဖြင့် လူနှစ်ယောက်မှာ အတွင်းဒဏ်ရာများ ရရှိသွားခဲ့သည်။ ဤကဲ့သို့သော ဒဏ်ရာမျိုးက ကုန်းမြေပေါ်တွင် ဆိုလျှင် ထိန်းချုပ်နိုင်စွမ်းရှိပြီး အသက်အန္တရာယ် မစိုးရိမ်ရသည်မှာ သေချာလှ၏။</p> <p>သို့သော် ယခုအခြေအနေက ကွာခြားနေသည်။ သူတို့မှာ ရေအောက် အတော်နက်နက်တွင် ရောက်နေပြီး ကျန်းမာရေး ကောင်းမွန်နေသည့် အချိန်၌ပင် ရေပေါ်သို့ ပြန်တက်ရန် အနည်းဆုံး နှစ်မိနစ်၊ သုံးမိနစ်ခန့် ကြာမြင့်မည် မဟုတ်ပါလား။</p> <p>ယခုမူ သူတို့၏ အတွင်းကလီစာများ ပျက်စီးသွားပြီး ပါးစပ်မှ သွေးများ ပန်းထွက်နေသဖြင့် အဆုတ်ထဲရှိ အောက်ဆီဂျင်မှာ ကုန်ဆုံးသွားပေလိမ့်မည်။ ဤကဲ့သို့သော အခြေအနေမျိုးတွင် သူတို့ မည်သို့ အသက်ရှင်နိုင်မည်နည်း။</p> <p>…</p> <p>ထိုအချိန်တွင် ရှီရှောင်ယွမ်က သူ့ဓားဖြင့် ထပ်မံ ခုတ်ပိုင်းလိုက်ပြန်သည်။</p> <p>သို့သော် ရေအောက်တွင် ရောက်နေပြီး ရေ၏ ခုခံမှုကြောင့် သူ့ဓားအရှိန်မှာ ကုန်းမြေပေါ်ထက် အဆပေါင်းများစွာ နှေးကွေးနေ၏။ ဤဓားချက်မှာ နဂါးငါးဖြူ၏ အကြေးခွံများကို ပွတ်တိုက်သွားရုံသာ တတ်နိုင်ခဲ့သည်။</p> <p>ချွင်...</p> <p>မှိန်ဖျော့ဖျော့ သင်္ဘောခန်းအတွင်း သတ္တုချင်း ထိခတ်သံနှင့်အတူ မီးပွားများ တစ်ခဏတာ လွင့်စင်ထွက်ပေါ်လာခဲ့သည်။</p> <p>ရှီရှောင်ယွမ်၏ မျက်နှာအမူအရာ ထပ်မံ ပြောင်းလဲသွားပြန်၏။ အခြေအနေများမှာ သူမျှော်လင့်ထားသည်ထက် ပိုမို ဆိုးရွားလာကြောင်း သူ သဘောပေါက်လိုက်သည်။</p> <p>ဤနဂါးငါးဖြူ၏ စွမ်းအားမှာ သူခန့်မှန်းထားသည်ထက် များစွာ သာလွန်နေသည်။ ဓားချက်က အပြည့်အဝ မထိခိုက်မိသော်ငြား ငါး၏ အကြေးခွံများကိုတော့ ထိမှန်သွားခဲ့သည်။</p> <p>သို့သော် အကြေးခွံများမှ ပြန်လည် ခံစားရသော တုံ့ပြန်မှုမှာ သတ္တုနှင့် တူညီနေပြီး သတ္တုချင်း ထိခတ်သံ ထွက်ပေါ်လာရုံသာမက မီးပွားများပါ လွင့်စင်လာစေခဲ့သည်။ ဤကဲ့သို့သော ခိုင်မာမှုမှာ ကြေးနီအရေပြား အဆင့်ကိုပင် ကျော်လွန်နေပြီဖြစ်သည်။</p> <p>ယခင်က ယုံကြည်မှု ရှိခဲ့သော်လည်း ယခုအခိုက်အတန့်တွင်မူ ကျန်းနင်ပင် အနည်းငယ် စိုးရိမ်ပူပန်လာမိသည်။ ဤမျှ အစွမ်းထက်သော ကာကွယ်မှု စွမ်းအား ရှိနေသည့်အပြင် ထိုနေရာမှာ နဂါးငါးဖြူ၏ ပိုင်နက်ပင် မဟုတ်ပါလား။</p> <p>နဂါးငါးဖြူကို အနိုင်ယူရန် မလွယ်ကူကြောင်း သူ သဘောပေါက်လိုက်၏။ တစ်ချိန်တည်းမှာပင် ရှီရှောင်ယွမ်၏ ဓားချက် ထိမှန်သွားသောကြောင့် နာကျင်သွားသည့် နဂါးငါးဖြူ၏ အရှိန်မှာ တစ်ဟုန်ထိုး ထပ်မံ တက်လာပြန်သည်။</p> <p>နောက်ထပ် လူတစ်ယောက် ရှေ့သို့ ရောက်လာပြီး ၎င်း၏ အမြီးဖြင့် ထပ်မံ ရိုက်ချလိုက်ပြန်၏။ မျက်စိတစ်မှိတ်အတွင်း သံပွတ်ကြိုး တစ်ချောင်းဖြင့် လွှဲရိုက်လိုက်သကဲ့သို့ပင်။</p> <p>ဘန်း...</p> <p>ဤရိုက်ချက်က ထိုလူ၏ လက်မောင်းပေါ်သို့ ပြင်းထန်စွာ ကျရောက်သွားသည်။ လက်မောင်းဖြင့် ကာကွယ်လိုက်နိုင်သော်ငြား ထိုလူမှာ နောက်သို့ လွင့်စဉ်သွားဆဲပင်။ သူ့မျက်နှာမှာ ပြာနှမ်းနေပြီး နာကျင်မှုကို အစွမ်းကုန် အံကြိတ်ခံစားနေရကြောင်း သိသာလှ၏။</p> <p>"ထွက်ပြေးကြ..."</p> <p>ရှီရှောင်ယွမ်က လှမ်းအော်လိုက်ရာ ရေလှိုင်းများမှတစ်ဆင့် သူ့အသံ ရှင်းရှင်းလင်းလင်းက လူတိုင်း၏ နားထဲသို့ ရောက်ရှိသွားသည်။</p> <p>ဤအမိန့်ကို ကြားသည်နှင့် ကျန်ရှိနေသော သုံးယောက်မှာ ထွက်ပြေးရန် ချက်ချင်း လှည့်ထွက်သွားကြသည်။ သူတို့ထက်ပင် နဂါးငါးဖြူက ပို၍ လျင်မြန်နေလေသည်။</p> <p>ရေထဲ၌ ၎င်းမှာ အဖြူရောင် နဂါးတစ်ကောင်ပမာ လျင်မြန်လှပြီး သူတို့ထဲမှ တစ်ယောက်နောက်သို့ ချက်ချင်း ရောက်ရှိသွား၏။</p> <p>တစ်ချက် ကိုက်ဖြတ်လိုက်သည်နှင့်...</p> <p>ရှဲ...</p> <p>၎င်း၏ လွှသွားကဲ့သို့ ချွန်ထက်နေသော သွားများက ထိုလူ၏ လည်ပင်းထဲသို့ နက်ရှိုင်းစွာ စိုက်ဝင်သွားပြီးနောက် အသားစများ ဆုတ်ဖြဲခံလိုက်ရတော့သည်။</p> <p>"တိရစ္ဆာန်ကောင်..." ရှီရှောင်ယွမ်၏ မျက်လုံးများမှာ ဒေါသကြောင့် ပြူးကျယ်နေတော့သည်။</p> <p>ဤလူများ အားလုံးမှာ မြစိမ်းရောင်မြွေဂိုဏ်း၏ မဏ္ဍိုင်များ ဖြစ်ကြပြီး နဝမအဆင့် သိုင်းပညာတွင် ကျွမ်းကျင်သူများပင်။ အကယ်၍ သူတို့အားလုံး ဤနေရာတွင် ကျဆုံးသွားပါက မြစိမ်းရောင်မြွေဂိုဏ်း တစ်ခုလုံးလည်း ပျက်စီးယိုယွင်းသွားပေလိမ့်မည်။</p> <p>ထို့ပြင် သူ၏ ဂိုဏ်းချုပ် ရာထူးမှာလည်း နာမည်ခံသာ ကျန်ရှိတော့မည် မဟုတ်ပါလား။ ဤအခိုက်အတန့်တွင် ရှီရှောင်ယွမ် အနေဖြင့် မည်သည့် အရာကိုမှ ထိန်ချန်မထားရဲတော့ပေ။ ကြမ်းပြင်ကို ဆောင့်ကန်၍ အခြားသူများအား ကာကွယ်ရန် ရည်ရွယ်ကာ လျင်မြန်သော အရှိန်ဖြင့် နောက်မှ ထပ်ကြပ်မကွာ လိုက်ပါသွားတော့သည်။</p> <p>ယခုအချိန်တွင် နဂါးငါးဖြူနှင့် ရင်ဆိုင်တိုက်ခိုက်လိုစိတ် သူ့ထံတွင် မရှိတော့ချေ။ အဘယ်ကြောင့်ဆိုသော် နဂါးငါးဖြူ၏ စွမ်းအားမှာ အနည်းငယ်မျှ အားနည်းမနေကြောင်း သိသာလွန်းနေ၍ ဖြစ်သည်။</p> <p>ရေထဲတွင် ၎င်း၏ အရှိန်မှာ အလွန် မြန်ဆန်လွန်းလှ၏။ ငါးဖမ်းပိုက်၏ ကန့်သတ်ချုပ်ချယ်မှု မပါဘဲနှင့် ဤဝိညာဉ်ငါးကို ဖမ်းဆီးဖို့ နေနေသာသာ နဂါးငါးဖြူ၏ အရှိန်ကို မီအောင်ပင် သူ မလိုက်နိုင်ပေ။</p> <p>ဤအခိုက်အတန့်ကို သူ မလိုလားသော်ငြား နဂါးငါးဖြူနှင့် သူ ကံမစပ်ကြောင်းကို သိနေခဲ့သည်။ ယခုမူ အဆုံးအရှုံးများကို လျှော့ချ၍ ကျန်ရှိနေသေးသော လူအနည်းငယ်နှင့်အတူ ရေမျက်နှာပြင်ပေါ်သို့ ပြန်တက်ပြီးမှသာ အခြားဆုံးဖြတ်ချက်များ ချမှတ်နိုင်တော့မည်။</p> <p>သို့သော် နောက်တစ်ခဏတွင်...</p> <p>သူ အရမ်း အကောင်းမြင်လွန်းနေခဲ့ကြောင်း သဘောပေါက်လိုက်သဖြင့် ရှီရှောင်ယွမ် ခြေလှမ်းများ ရပ်တန့်သွားရ၏။</p> <p>အခြားသူများကို ရှေ့မှ သွားခွင့်ပြုလိုက်သော်လည်း နဂါးငါးဖြူက အမီလိုက်လာချိန်တွင် သူ ကယ်တင်ရန် နောက်ကျသွားခဲ့လေပြီဖြစ်သည်။</p> <p>နဂါးငါးဖြူ၏ အစွမ်းကုန် တိုက်ခိုက်မှုအောက်တွင် တစ်ယောက်ပြီး တစ်ယောက် သေဆုံးသွားခဲ့ကြရပြီး သူတို့၏ သွေးများက ပျံ့နှံ့သွားကာ ရေပြင်တစ်ခုလုံးကို နီရဲသွားစေတော့သည်။</p> <p>မျက်တောင်တစ်ခတ် အတွင်းမှာပင် ပျက်စီးနေသော သင်္ဘောတစ်ခုလုံး၌ ရှီရှောင်ယွမ် တစ်ယောက်တည်းသာ ကျန်ရစ်ခဲ့တော့၏။</p> <p>နစ်မြုပ်နေသော သင်္ဘောအပြင်ဘက်တွင်မူ ကျန်းနင်က ဤမြင်ကွင်းကို ကြည့်နေဆဲပင်။</p> <p>"တကယ်ကို အစွမ်းထက်တဲ့ နဂါးငါးဖြူပဲ..." သူက အနည်းငယ် အံ့အားသင့်စွာဖြင့် တွေးလိုက်မိသည်။</p> <p>မျက်တောင်တစ်ခတ် အတွင်းမှာပင် နဝမအဆင့် ကျွမ်းကျင်ပညာရှင် စုစုပေါင်း ငါးယောက်လုံး ဤနေရာတွင် သေဆုံးသွားခဲ့ရလေပြီ။ ဤနဂါးငါးဖြူ၏ စွမ်းအားမှာ ၎င်း၏ မျိုးနွယ်များထက် များစွာ သာလွန်နေပေသည်။</p> <p>မှတ်တမ်းများအရ နဂါးငါးဖြူမှာ ရေပြင်၏ အရှင်သခင်များထဲမှ တစ်ကောင် ဖြစ်သော်ငြား အတွေ့အကြုံရှိသော တံငါသည်အိုတစ်ယောက် အနေဖြင့် ပြည့်စုံသော ကိရိယာများ ပါရှိပါက နဂါးငါးဖြူကို ဖမ်းဆီးနိုင်ချေ ရှိသည်ဟု ဆိုထားသည်။</p> <p>သို့ဖြစ်ရာ ဤနဂါးငါးဖြူ ပြသလိုက်သော စွမ်းအားမှာ သာမန်လူတစ်ယောက် ကိုင်တွယ်ဖြေရှင်းနိုင်သည့် အရာမျိုး လုံးဝ မဟုတ်ပေ။ နဝမအဆင့် ကျွမ်းကျင်သူများပင် ထိတွေ့မိသည်နှင့် တစ်ပြိုင်နက် သေဆုံးသွားခဲ့ရသည် မဟုတ်ပါလား။</p> <p>ထိုကဲ့သို့သော စွမ်းအားမျိုးက ကုန်းမြေပေါ်တွင်ဆိုလျှင် သာမန် အဋ္ဌမအဆင့် နတ်ဘုရားစွမ်းအား နယ်ပယ်မှ သိုင်းပညာရှင် တစ်ယောက်ပင် လုပ်ဆောင်နိုင်ရန် ခက်ခဲလှပေမည်။ တစ်ချိန်တည်းမှာပင် ကျန်းနင်က တိတ်တဆိတ် စိတ်လှုပ်ရှားလာမိ၏။</p> <p>အဘယ်ကြောင့်ဆိုသော် နဂါးငါးဖြူ ပို၍ အစွမ်းထက်လေလေ အလွန်အာဟာရဖြစ်သော ဝိညာဉ်ငါး တစ်ကောင်ဖြစ်ကြောင်း ပို၍ ထင်ရှားလေလေ ဖြစ်သောကြောင့်ပင်။</p> <p>အခြားတစ်ဖက်တွင်...</p> <p>ရှီရှောင်ယွမ်က နဂါးငါးဖြူကို လေးနက်သော အမူအရာဖြင့် စိုက်ကြည့်နေသည်။ သို့သော် ငါး၏ မျက်လုံးများထဲတွင်မူ ကစားချင်နေသော အရိပ်အယောင်များသာ ရှိနေ၏။</p> <p>"တကယ်ကို ထူးကဲလှတဲ့ ဉာဏ်ရည်ပဲ..." ထိုအကြည့်ကို ကြည့်ရင်း ရှီရှောင်ယွမ်က စဉ်းစားလိုက်သည်။</p> <p>"ဒီလိုဆိုမှတော့ တခြားရွေးချယ်စရာ မရှိတော့ဘူး..." သူက တိတ်တဆိတ် ထပ်မံ တွေးတောလိုက်မိ၏။</p> <p>အခြေအနေများ ထိုအဆင့်ထိ ရောက်လာမှတော့ လောင်းကြေးထပ်၍ ဤထူးခြားသော နဂါးငါးဖြူကို သတ်ဖြတ်ရန် ကြိုးစားဖို့သာ ဆန္ဒရှိတော့သည်။ ဤနည်းဖြင့်သာ ဆုံးရှုံးမှုအချို့ကို ပြန်လည် ကုစားနိုင်ပေမည်။ ထိုသို့လုပ်မှသာ ထိုလူများ၏ စတေးခံရမှုက တန်ဖိုးရှိလာမည် မဟုတ်ပါလား။</p> <p>ထိုအဆင့်တွင် ဤမျှလောက် စွမ်းအားရှိနေခြင်းကို ကြည့်၍ အနီးအနားတွင် ထူးခြားသည့် ကောင်းကင်နှင့် မြေကြီး၏ သဘာဝရတနာများ သေချာပေါက် ရှိနေမည်ဟု သူ ပို၍ပင် ယုံကြည်လာခဲ့သည်။</p> <p>ထိုကဲ့သို့သော အရာများ၏ အကူအညီ မပါဘဲနှင့် သာမန် နဂါးငါးဖြူ တစ်ကောင် အနေဖြင့် ဤမျှ အစွမ်းထက်လာရန် မည်သို့မှ မဖြစ်နိုင်ချေ။</p> <p>သံမဏိကဲ့သို့ မာကျောသော အကြေးခွံများ၊ ပေါင်သောင်းချီသော ခွန်အားများဖြင့် ပေါက်ကွဲထွက်နိုင်စွမ်းများ ရှိနေခဲ့သည်။ ဤကဲ့သို့ ကြောက်မက်ဖွယ် ကောင်းသော စွမ်းအားမျိုးသာ မရှိခဲ့လျှင် မြစိမ်းရောင်မြွေဂိုဏ်း၏ မဏ္ဍိုင်များက ထိုနေရာတွင် မည်သို့ ရုတ်တရက် ကျဆုံးသွားနိုင်မည်နည်း။</p> <p>နဂါးငါးဖြူကို အနိုင်ယူနိုင်သရွေ့ အလွန်အာဟာရဖြစ်သော ဝိညာဉ်ငါးကို သူ ပိုင်ဆိုင်နိုင်ပေမည်။ ထို့အပြင် အနီးအနားတွင် ရှိနိုင်သော ကောင်းကင်နှင့် မြေကြီး၏ သဘာဝရတနာ အချို့ကိုလည်း သူ ရှာဖွေတွေ့ရှိနိုင်ပေလိမ့်မည်။</p> <p>ယင်းအပြင် သံရိုင်းများ အပြည့်ရှိနေသော ဂိုဒေါင်ကြီးကလည်း သူ့အပိုင် ဖြစ်လာဦးမည်။</p> <p>"ဒီလိုဆိုမှတော့ ဘာမှ ထိန်ချန်ထားစရာ မလိုတော့ဘူး..." ရှီရှောင်ယွမ်က အပြည့်အဝ ဆုံးဖြတ်ချက် ချလိုက်တော့သည်။</p> <p>နောက်တစ်ခဏတွင်...</p> <p>သူ့စိတ်ထဲမှ အတွေးနှင့်အတူ...</p> <p>ဂွပ်... ဂွပ်...</p> <p>အရိုးများနှင့် အဆစ်အမြစ်များ ထိခတ်သံကို ကြားလိုက်ရပြီး သူ့ကြွက်သားများမှာ ကြောက်မက်ဖွယ်ကောင်းစွာ ရုန်းကန် လိမ်ယှက်လာတော့သည်။</p> <p>သူ့အရပ်အမောင်းမှာလည်း ဆက်လက် မြင့်တက်လာပြီး မျက်တောင်တစ်ခတ် အတွင်းမှာပင် ခုနစ်ပေကျော်အထိ ရောက်ရှိသွားကာ ကြွက်သား အဖုအထစ်များဖြင့် ဖုံးလွှမ်းနေသော ဘီလူးတစ်ကောင်အဖြစ် ပြောင်းလဲသွားလေသည်။ ယခင် ရှီရှောင်ယွမ်၏ ပုံစံဟုပင် လုံးဝ မှတ်မိနိုင်စရာ အကြောင်း မရှိတော့ပေ။</p> <p>End</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save