Book List

<h2 style="text-align: center;">အပိုင်း(၄၇၃)</h2> <h2 style="text-align: center;">လင်းယွီကျွန်းက ကျွန်းတစ်ကျွန်း မဟုတ်ဘူး</h2> <h2 style="text-align: center;">*</h2> <p> </p> <p> </p> <p>မိုးသောက်ယံ အလင်းရောင် သဲ့သဲ့ထွက်ပေါ်လာချိန် ကောင်းကင်ယံထက်တွင်မူ မိုးတိမ်မည်းများ ဖုံးလွှမ်းနေပြီး မိုးသက်မုန်တိုင်းများ ပြင်းထန်စွာ ကျရောက်နေသည်။</p> <p>လင်းယွမ်တွင် လက်ပတ်နာရီ ပါမလာခဲ့ချေ။ တကယ်တမ်းပြောရလျှင် ဤကမ္ဘာပျက်ကပ်ကြီးထဲမှ လူသားများအတွက် အချိန်နာရီဆိုသည်မှာ မည်သည့်အဓိပ္ပာယ်မျှ မရှိတော့ပေ။</p> <p>အသက်ရှင်နေနိုင်ဖို့သာ အဓိကဖြစ်ပြီး တစ်မိနစ် ပိုရှင်သန်ရလျှင် တစ်မိနစ် အမြတ်ပင်။</p> <p>သို့သော်လည်း နေ့ခင်းဘက်အချိန်က ညဘက်ထက်စာလျှင် လူကို ပို၍ စိတ်အေးသက်သာ ရှိစေသည်မှာ အမှန်ပင်။</p> <p>ရေနတ်ဘုရားဂိုဏ်း၏ စစ်သင်္ဘောပေါ်တွင် လင်းယွမ်က မျက်လုံးများကို ဖွင့်လိုက်သည်။ မျက်နှာဖုံးအောက်ရှိ သူ၏ မျက်နှာအမူအရာက ရေကန်ငယ်လေးတစ်ခုလို တည်ငြိမ်အေးဆေးနေ၏။</p> <p>တစ်ညလုံးလုံး စူးစမ်းလေ့လာပြီးနောက် ဤရေနတ်ဘုရားဂိုဏ်း၏ ဖွဲ့စည်းပုံအဆင့်ဆင့်ကို သူ တဖြည်းဖြည်း နားလည်သဘောပေါက်လာခဲ့သည်။</p> <p>ရေနတ်ဘုရားဂိုဏ်းသည် ရေနတ်ဘုရားကို ကိုးကွယ်ယုံကြည်ကြပြီး သူတို့၏ အဓိကအယူဝါဒမှာ "အဆင့်သုံးဆင့် ရှင်သန်ပျက်စီးခြင်း သီအိုရီ" ပင် ဖြစ်သည်။</p> <p>ထိုသီအိုရီဆိုသည်မှာ "ပထမဒီရေ"၊ "ထာဝရချောက်နက်" နှင့် "မူလအစသို့ ပြန်လည်ရောက်ရှိခြင်း" ဟူသည့် အဓိကအဆင့် သုံးဆင့်ကို ရည်ညွှန်းခြင်း ဖြစ်၏။</p> <p>ရေနတ်ဘုရားဂိုဏ်းသားများ၏ အဆိုအရ "ပထမဒီရေ" အဆင့်တွင် နတ်ဘုရားများသည် လူသားများ၏ မာနထောင်လွှားမှုများကို ရေလွှမ်းမိုးခြင်းဖြင့် ဆေးကြောသန့်စင်မည်ဖြစ်ပြီး ရေနတ်ဘုရားကို ရိုသေကိုင်းရှိုင်းစွာ ယုံကြည်သူများသာလျှင် ရေနစ်သေဆုံးခြင်းမှတစ်ဆင့် ပြန်လည်ဝင်စားခွင့် ရရှိမည်ဟု ဆိုကြသည်။</p> <p>"ထာဝရချောက်နက်" အဆင့်တွင်မူ သမုဒ္ဒရာပြင်ကြီးက ကုန်းမြေများကို အပြီးတိုင် ဝါးမြိုသွားမည်ဖြစ်ရာ ယုံကြည်သူများအနေဖြင့် ရေကမ္ဘာခေတ်သစ်နှင့် လိုက်လျောညီထွေဖြစ်စေရန် မိမိတို့၏ ခန္ဓာကိုယ်များကို ပြုပြင်ပြောင်းလဲကြရမည် ဖြစ်သည်။</p> <p>"မူလအစသို့ ပြန်လည်ရောက်ရှိခြင်း" အဆင့်မှာမူ ယဉ်ကျေးမှုအားလုံး ပင်လယ်အောက်သို့ နစ်မြုပ်သွားချိန်တွင် နတ်ဘုရားများက သက်ရှိများ၏ သံသရာကို အသစ်တစ်ဖန် ပြန်လည် စတင်ပေးမည့် အချိန်ပင် ဖြစ်သည်။</p> <p>ဤကမ္ဘာပျက်မည့် သီအိုရီက ကွမ်ဖူဒေသတွင် ယုံကြည်လက်ခံသူ အလွန်များပြားလှပြီး လူအများအပြားက ရေနတ်ဘုရားကို ကိုးကွယ်ယုံကြည်နေကြပြီ ဖြစ်သည်။</p> <p>သေချာသည်ကတော့ ဂိုဏ်းကြီးသုံးဂိုဏ်း၏ အခြေခံ အုတ်မြစ်များက ယေဘုယျအားဖြင့် ဤကမ္ဘာပျက်သီအိုရီများပေါ်တွင်သာ တည်ဆောက်ထားကြခြင်း ဖြစ်၏။</p> <p>မြေမိခင်ဂိုဏ်း ကလည်း ထိုနည်းတူပင် ဖြစ်သည်။ ကမ္ဘာပျက်ကပ်အပေါ် လူသားများ၏ ကြောက်ရွံ့ထိတ်လန့်မှုကို အသုံးချကာ ဂိုဏ်းကို တည်ထောင်ထားခြင်း ဖြစ်သည်။</p> <p>ကမ္ဘာပျက်ကပ် ပိုဆိုးလာလေလေ ဤကဲ့သို့သော မိစ္ဆာဂိုဏ်းများ ပို၍ ထွက်ပေါ်လာလေလေ ဖြစ်မည်ဆိုတာကို လင်းယွမ်က စိတ်ထဲမှ ကောင်းစွာ သဘောပေါက်ထားသည်။</p> <p>ဤဂိုဏ်းများက အပေါ်ယံကြည့်လျှင် အသစ်အဆန်းများဟု ထင်ရသော်လည်း တကယ်တမ်း နက်နက်ရှိုင်းရှိုင်း လေ့လာကြည့်လိုက်သည့်အခါ ထိုအယူဝါဒများ၏ နောက်ကွယ်တွင် ဟိုမှဒီမှ ယူငင်ပေါင်းစပ်ထားသည့် အရာများစွာ ပါဝင်နေကြောင်း လင်းယွမ် မြင်တွေ့လိုက်ရသည်။</p> <p>ထို့အပြင် ရေနတ်ဘုရားဂိုဏ်းက ရေကြီးမှုထဲမှ သန္ဓေပြောင်း သတ္တဝါများကို အလှဆင်ရန်အတွက် ကမ္ဘာကျော်ထူးဆန်းထွေလာ သရဲတစ္ဆေ စာရေးဆရာကြီး အိတ်ချ်ပီလပ်ဗ်ခရပ်၏ ဇာတ်လမ်းများ၏ အစိတ်အပိုင်း အများအပြားကိုပင် ပေါင်းစပ်အသုံးပြုထားသေးသည်။</p> <p>(H. P. Lovecraft - အိတ်ချ်ပီလပ်ဗ်ခရပ် ဆိုတာ Monster နဲ့Horror ဝတ္ထုတွေရဲ့ ဖခင်ကြီးလို့ပြောလို့ရတဲ့ အမေရီကန်လူမျိုး စာရေးဆရာကြီးပါ။ အခုနာမည်ကြီးနေတဲ့ Lord of Mysteries ဆိုတဲ့ ဝတ္ထုဆိုရင်လည်း ဒီစာရေးဆရာကြီးရဲ့ ဇာတ်လမ်းတွေကို အများကြီးကိုးကားထားတာပါ)</p> <p>မပြောကောင်းမဆိုသာ၊ ဤအချက်ကို ယုံကြည်နေသူများကလည်း တကယ်ကို မနည်းလှပေ။</p> <p>အနည်းဆုံးတော့ ဤစစ်သင်္ဘောပေါ်တွင် ရေနတ်ဘုရား တည်ရှိနေကြောင်းကို အကြွင်းမဲ့ ယုံကြည်နေကြသည့် သာမန်ဂိုဏ်းသား အများအပြားကို လင်းယွမ် တွေ့မြင်နေရသည်။</p> <p>ဤလူများထဲမှ အတော်များများ၏ ခန္ဓာကိုယ်များတွင် သန္ဓေပြောင်းလဲမှုများ ဖြစ်ပေါ်နေပြီး မျက်နှာဖုံးများ၏ အောက်ရှိ မျက်နှာများတွင် ငါးအကြေးခွံများနှင့် ပါးဟက်များကဲ့သို့သော အင်္ဂါအစိတ်အပိုင်းများ ထွက်ပေါ်နေသည်ကို လင်းယွမ် ဆက်စပ် တွေးတောမိလိုက်သည်။</p> <p>ဤအရာများက သာမန်လူများ၏ စိတ်ပိုင်းဆိုင်ရာကို လွှမ်းမိုးထားသည့် အချက်တစ်ချက်လည်း ဖြစ်နိုင်ပေသည်။</p> <p>ဘာပဲဖြစ်ဖြစ် တကယ်လို့သာ ငါးပါးဟက်လို အင်္ဂါအစိတ်အပိုင်းမျိုး ပိုင်ဆိုင်ထားမည်ဆိုပါက ရေလွှမ်းမိုးမှုထဲတွင် ရေနစ်သေဆုံးရမည့် အန္တရာယ်ကို ပူပန်နေစရာ မလိုတော့ပေဘူးလား။</p> <p>သို့သော် ထိုပါးဟက်ကဲ့သို့ အင်္ဂါများက ရေနေသတ္တဝါများနည်းတူ အောက်ဆီဂျင် လိုအပ်ချက်ကို အပြည့်အဝ ကျော်လွှားနိုင်ပြီး ရေအောက်တွင် တကယ် အသက်ရှူနိုင်ခြင်း ရှိမရှိဆိုတာကိုတော့ မသိရသေးပေ။</p> <p>"ပေါ်..."</p> <p>လင်းယွမ် တွေးတောနေစဉ်မှာပင် ရုတ်တရက် သင်္ဘောက အရှိန်လျှော့လာပြီး ဥဩဆွဲသံတစ်ချက် ထွက်ပေါ်လာသည်။</p> <p>လင်းယွမ်က ခေါင်းမော့ကြည့်လိုက်ရာ အပြာရောင် ဝတ်ရုံရှင် အများအပြားက အခန်းများထဲမှ ထွက်လာကြပြီး သင်္ဘောကုန်းပတ်ပေါ်သို့ ရောက်ရှိလာကြသည်ကို တွေ့လိုက်ရသည်။</p> <p>သူလည်း အလျင်အမြန် မတ်တတ်ရပ်ကာ ဝတ်ရုံကို သပ်သပ်ရပ်ရပ်ဖြစ်အောင် ပြင်ဆင်လိုက်ပြီး လူအုပ်ထဲသို့ ဝင်ရောက်သွားခဲ့သည်။</p> <p>ခေါင်းဆောင်ပုံစံ ဝတ်ဆင်ထားသော ခန္ဓာကိုယ် ထွားကျိုင်းသည့် အပြာရောင်ဝတ်ရုံရှင် အမျိုးသားက ခပ်သြသြအသံဖြင့် အမိန့်ပေးလိုက်သည်။ "ဆန်းယွမ် အဆောက်အအုံကို ရောက်ပြီ... ချူမင်... ဝမ်ကျန့်... ဆန်းယွမ် အဆောက်အအုံက ခေါင်းဆောင်ကို သင်္ဘောပေါ် လာတွေ့ခိုင်းလိုက်စမ်း"</p> <p>လူအုပ်ထဲမှ အပြာရောင်ဝတ်ရုံရှင် တမန်တော်နှစ်ဦး ချက်ချင်း ထွက်လာကြသည်။</p> <p>"ဟုတ်ကဲ့ပါ အရှင်"</p> <p>သူတို့နှစ်ဦးက အမိန့်ကို နာခံလိုက်ပြီး ချက်ချင်းပင် ကိုယ်ကို တစ်ချက်လွှင့်ကာ ရေပြင်ထဲသို့ ခုန်ဆင်းသွားကြသည်။</p> <p>သို့သော် ထိုနှစ်ဦးက ရေအောက်သို့ နစ်မြုပ်မသွားဘဲ ရေလှိုင်းများက လိပ်တက်လာကာ သူတို့နှစ်ဦးကို ပင့်ဆောင်လျက် မလှမ်းမကမ်းရှိ အဆောက်အအုံဆီသို့ အရှိန်ပြင်းပြင်းဖြင့် ပျံသန်းသွားကြသည်။</p> <p>"ရေဓာတ် အစွမ်းပိုင်ရှင် နှစ်ယောက်ပါလား"</p> <p>လင်းယွမ်၏ မျက်လုံးများ အရောင်လက်သွားသည်။ ဤရေနတ်ဘုရားဂိုဏ်းရှိ အစွမ်းပိုင်ရှင် အတော်များများက ရေဓာတ် အစွမ်းပိုင်ရှင်များ ဖြစ်ကြသည်။</p> <p>"ကြည့်ရတာ ရေနတ်ဘုရားဂိုဏ်းက ရေဓာတ် မျိုးရိုးဗီဇမျိုးစေ့တွေ အများကြီးကို ပိုင်ဆိုင်ထားတဲ့ပုံပဲ... ဒါပေမဲ့ သူတို့ရဲ့ မျိုးရိုးဗီဇမျိုးစေ့တွေကို ဘာကနေ ထုတ်ယူထားသလဲ ဆိုတာတော့ မသိရသေးဘူး"</p> <p>တစ်ဖက်လူတွင် ရေဓာတ်နှင့် သက်ဆိုင်သော ရေပေါ်ကျွန်း တစ်ကျွန်းကို ဌာနချုပ်အဖြစ် အသုံးပြုထားသလားဟု လင်းယွမ်က ခန့်မှန်းမိလိုက်သည်။</p> <p>ထိုသို့မဟုတ်ပါက ဤမျှများပြားသော မျိုးရိုးဗီဇမျိုးစေ့ အစွမ်းပိုင်ရှင်များ မည်သို့ ရှိနေနိုင်သနည်းဆိုသည်ကို ရှင်းပြ၍ ရမည် မဟုတ်ပေ။</p> <p>အချိန် သိပ်မကြာလိုက်ဘဲ ထိုအဆောက်အအုံထဲမှ တမန်တော်နှစ်ဦးသည် လူလတ်ပိုင်းအရွယ် အမျိုးသားတစ်ဦးကို ဆွဲကိုင်လျက် ရေလှိုင်းများကို စီးနင်းကာ ပြန်လည် ရောက်ရှိလာကြသည်။</p> <p>သင်္ဘောပေါ်သို့ ခုန်တက်လာပြီးနောက် ထိုတမန်တော် နှစ်ဦးထဲမှ ဝမ်ကျန့် ဟုခေါ်သော မျက်နှာဖုံးစွပ် အမျိုးသားက ပြောလိုက်သည်။ "အရှင်... ဆန်းယွမ် အဆောက်အအုံရဲ့ ခေါင်းဆောင် လီဟုန်ကို ခေါ်လာခဲ့ပါပြီ"</p> <p>မြေပြင်ပေါ်ရှိ လီဟုန် ဟုခေါ်သော လူလတ်ပိုင်း အမျိုးသား၏ မျက်နှာမှာ ဖြူရော်နေပြီး အထိတ်တလန့်ဖြင့် ဒူးထောက်ကာ ပြောလိုက်သည်။ "သိုးထိန်း လီဟုန်... အရှင့်ကို ဂါရဝပြုပါတယ်"</p> <p>ရေနတ်ဘုရားဂိုဏ်း၏ အပြင်ဘက် အဖွဲ့ဝင်အားလုံးကို သိုးထိန်း ဟု တညီတညွတ်တည်း ခေါ်ဆိုကြကြောင်းကို လင်းယွမ် သိထားသည်။</p> <p>(ဒီ သိုးထိန်း ဆိုတာက ခရစ်ယာန်ဘာသာရဲ့ စကားလုံးကို ယူသုံးထားတဲ့ပုံပါပဲ)</p> <p>ဤလူများ၏ အဓိက အရည်အသွေးမှတ်က အမှတ် သုံးဆယ်ကို ကျော်လွန်သွားပါက ရေနတ်ဘုရားဂိုဏ်းထဲသို့ တရားဝင် အဖွဲ့ဝင်အဖြစ် သွတ်သွင်းခံရမည်ဖြစ်ပြီး ရေနတ်ဘုရားဂိုဏ်း၏ သန့်စင်သော နယ်မြေထဲသို့ ဝင်ရောက်ခွင့် ရရှိမည် ဖြစ်သည်။</p> <p>ထို သန့်စင်သော နယ်မြေက မည်သည့်နေရာတွင် ရှိသနည်း ဆိုသည်ကိုတော့ လင်းယွမ် စုံစမ်း၍ မရသေးပေ။</p> <p>ခန္ဓာကိုယ် ထွားကျိုင်းသော မျက်နှာဖုံးစွပ် အမျိုးသားက လီဟုန်ကို ငုံ့ကြည့်လိုက်ပြီး ခပ်သြသြအသံဖြင့် မေးလိုက်သည်။ "မင်းက လင်းယွီကျွန်းရဲ့ သဲလွန်စကို ရထားတယ်ဆို"</p> <p>လီဟုန်က စိတ်ထဲမှ အံ့သြသွားပြီး ရေနတ်ဘုရားဂိုဏ်း၏ သတင်းအချက်အလက် စုံစမ်းနိုင်စွမ်းအပေါ် တုန်လှုပ်သွားမိသည်။</p> <p>သူက ဖုံးကွယ်မထားဝံ့ဘဲ ခေါင်းငုံ့ကာ ပြောလိုက်သည်။ "ဟုတ်ကဲ့ပါ အရှင်... လွန်ခဲ့တဲ့ တစ်ပတ်လောက်က လင်းယွီကျွန်းက လူတွေ ဆန်းယွမ် အဆောက်အအုံကို လာပြီး ကျွန်တော်တို့ဆီက လူအင်အားတချို့ကို လာလဲလှယ်သွားကြပါတယ်"</p> <p>"အဲဒီအချိန်တုန်းက သူတို့ကအစွမ်းကုန် ရုပ်ဖျက်ထားပေမယ့် သူတို့က လင်းယွီကျွန်းက လူတွေဆိုတာကိုတော့ ကျွန်တော် အတည်ပြုနိုင်ခဲ့ပါတယ်"</p> <p>ခန္ဓာကိုယ် ထွားကျိုင်းသော အမျိုးသားက ချက်ချင်း မေးလိုက်သည်။ "မင်းက ဘယ်လိုလုပ်ပြီး အတည်ပြုနိုင်ခဲ့တာလဲ"</p> <p>"အရင်တစ်ခေါက်က တမန်တော်အရှင် ချန်ထားခဲ့တဲ့ ခြေရာခံ သင်္ကေတကြောင့်ပါ... သူတို့ ခေါ်သွားတဲ့ လူတွေထဲက တစ်ယောက်ရဲ့ ကိုယ်ပေါ်မှာ ခြေရာခံ သင်္ကေတကို ကျွန်တော် တိတ်တဆိတ် ချန်ထားခဲ့တာပါ"</p> <p>"ခြေရာခံ သင်္ကေတက မလှုပ်ရှားတော့တဲ့ အချိန်ကျမှ ကျွန်တော်ကိုယ်တိုင် နောက်ကနေ လိုက်သွားကြည့်လိုက်တော့ တမန်တော်အရှင် ပြောပြထားတာနဲ့ တစ်ပုံစံတည်းပါပဲ... ဘောလုံးကွင်း နှစ်ကွင်းစာလောက် ကျယ်တဲ့ ကျွန်းတစ်ကျွန်းက ရေမျက်နှာပြင်ပေါ်မှာ ရွေ့လျားနေတာကို တွေ့ခဲ့ရပါတယ်"</p> <p>"အဲဒါက လင်းယွီကျွန်း ဆိုတာ သေချာပေါက် မမှားနိုင်ပါဘူး"</p> <p>ခန္ဓာကိုယ် ထွားကျိုင်းသော မျက်နှာဖုံးစွပ် အမျိုးသားက ချက်ချင်းပင် အော်ဟစ်မေးမြန်းလိုက်သည်။ "မင်း သူတို့ရဲ့ နေရာကို ရှာတွေ့ခဲ့တယ်ပေါ့... သူတို့ ဘယ်မှာလဲ"</p> <p>ခန္ဓာကိုယ် ထွားကျိုင်းသော အမျိုးသား၏ အသံထဲတွင် စိတ်လှုပ်ရှားမှုနှင့် အံ့ဩဝမ်းသာမှုများ ရောယှက်နေသည်။</p> <p>လီဟုန်က အလျင်အမြန် ပြောလိုက်သည်။ "တောင်ဘက်ကို ၉ မိုင်ခန့် အကွာအဝေးလောက်မှာပါ... ဒါပေမဲ့ အဲဒါက လွန်ခဲ့တဲ့ နှစ်ရက်က နေရာပါ... ဒီနှစ်ရက်အတွင်း တမန်တော်အရှင်တို့ကို ကြိုဆိုဖို့အတွက် ကျွန်တော်တို့က ထပ်ပြီး သွားမကြည့်ရသေးပါဘူး"</p> <p>"ငတုံး"</p> <p>ခန္ဓာကိုယ် ထွားကျိုင်းသော မျက်နှာဖုံးစွပ် အမျိုးသားက ကျိန်ဆဲလိုက်ပြီး ချက်ချင်း အမိန့်ပေးလိုက်သည်။ "လင်းယွီကျွန်းရဲ့ နေရာကို အခုချက်ချင်း ပြန်ရှာစမ်း"</p> <p>"အာ... ဟုတ်... ဟုတ်ကဲ့ပါ"</p> <p>လီဟုန်က ကမန်းကတန်း ခေါင်းညိတ်လိုက်ပြီး မျက်လုံးများကို အလျင်အမြန် မှိတ်ကာ ခြေရာခံ သင်္ကေတ၏ ဦးတည်ရာကို စတင် အာရုံခံလိုက်သည်။</p> <p>လင်းယွမ်က လူအုပ်ထဲမှနေ၍ ဤမြင်ကွင်းကို ကြည့်ရင်း စိတ်ထဲတွင် အံ့အားသင့်သွားသည်။</p> <p>ရေနတ်ဘုရားဂိုဏ်းရဲ့ ခြေရာခံ သင်္ကေတ ဆိုတာက ဘာကြီးလဲ...</p> <p>တကယ်ပဲ တည်နေရာကို ခြေရာခံနိုင်လို့လား...</p> <p>ခဏအကြာတွင် လီဟုန်က မျက်လုံးများကို ဖွင့်လိုက်ပြီး အလျင်အမြန် ပြောလိုက်သည်။ "တမန်တော်အရှင်... ခြေရာခံ သင်္ကေတရဲ့ နေရာက တောင်ဘက်မှာပဲ ရှိနေပါသေးတယ်... ဒါပေမဲ့ အကွာအဝေးကတော့ ၁၂ မိုင်လောက် ကျော်သွားပါပြီ"</p> <p>"လိုက်"</p> <p>ခန္ဓာကိုယ် ထွားကျိုင်းသော မျက်နှာဖုံးစွပ် အမျိုးသားက စကားအပို မပြောတော့ဘဲ ခေါင်းလှည့်ကာ အမိန့်ပေးလိုက်သည်။</p> <p>ချက်ချင်းပင် စစ်သင်္ဘောက လမ်းကြောင်းပြောင်းသွားပြီး တောင်ဘက်ဆီသို့ အရှိန်အဟုန်ဖြင့် လိုက်လံသွားတော့သည်။</p> <p>တစ်ချိန်တည်းမှာပင် ခန္ဓာကိုယ် ထွားကျိုင်းသော မျက်နှာဖုံးစွပ် အမျိုးသားက လီဟုန်ဟူသော လူသားရေဒါကို လင်းယွီကျွန်း၏ နေရာကို အချိန်ပြည့် အာရုံခံနေရန် အမိန့်ပေးထားသည်။</p> <p>၁၂ မိုင်ဆိုသည့် အကွာအဝေးမှာ ဝေးသည်ဟုလည်း မဆိုသာသလို နီးသည်ဟုလည်း မပြောနိုင်ပေ။</p> <p>ရေနတ်ဘုရားဂိုဏ်း၏ စစ်သင်္ဘော အမြန်နှုန်းဖြင့်ပင် တစ်နာရီခန့် အချိန်ယူမှသာ ရောက်ရှိနိုင်မည် ဖြစ်သည်။</p> <p>တစ်နာရီခွဲခန့် အကြာတွင် လီဟုန်က ရုတ်တရက် စိတ်လှုပ်ရှားစွာဖြင့် အော်ဟစ်လိုက်သည်။ "ရောက်ပြီ... အာရုံခံမိပြီ"</p> <p>ခန္ဓာကိုယ် ထွားကျိုင်းသော အမျိုးသားက သင်္ဘောလက်ရန်းဆီသို့ အလျင်အမြန် လျှောက်သွားကာ အရှေ့ဘက် ရေပြင်ကို လှမ်းကြည့်လိုက်သည်။</p> <p>အရှေ့ဘက်ရှိ ကျယ်ပြောလှသော ရေပြင်ကြီးထက်တွင် ပလတ်စတစ်များနှင့် သစ်သားစများကဲ့သို့သော အမှိုက်သရိုက် အမြောက်အမြား မျောပါနေသည်ကို တွေ့လိုက်ရသည်။</p> <p>ရေအောက်ရှိ အရိပ်များထဲတွင်လည်း တိုက်မြင့် အဆောက်အအုံများ၏ ပုံရိပ်များကို ဝိုးတဝါး မြင်တွေ့နေရသည်။</p> <p>သူက ထိုအရာများကို လျစ်လျူရှုလိုက်ပြီး အဝေးဆီသို့ လှမ်းကြည့်လိုက်သည်။</p> <p>ရေနှင့် ကောင်းကင် တစ်ဆက်တည်း ဖြစ်နေသော မိုးကုပ်စက်ဝိုင်း အဆုံးတွင် အမည်းရောင် ကျွန်းတစ်ကျွန်းက သူ၏ မျက်စိရှေ့၌ တဖြည်းဖြည်း ပေါ်ထွက်လာသည်ကို တွေ့လိုက်ရ၏။</p> <p>"အရှိန်အကုန်တင်ပြီး လိုက်စမ်း"</p> <p>သူက ချက်ချင်း အမိန့်ပေးလိုက်ရာ ချက်ချင်းပင် စစ်သင်္ဘော တစ်စီးလုံးက အရှိန်မြှင့်တင်သွားပြီး ထိုအမည်းစက်ဆီသို့ အလွန် လျင်မြန်စွာ ချဉ်းကပ်သွားတော့သည်။</p> <p>လင်းယွမ်ကလည်း ထိုအမည်းရောင် ကျွန်းကြီးကို လှမ်းကြည့်နေခဲ့သည်။</p> <p>စစ်သင်္ဘောက တဖြည်းဖြည်း နီးကပ်လာသည်နှင့်အမျှ ကျွန်း၏ ပုံသဏ္ဍာန်ကလည်း ပိုမို ရှင်းလင်းပြတ်သားလာသည်။</p> <p>အဝေးမှ ကြည့်လိုက်လျှင် ထိုကျွန်းက သိပ်မကြီးမားလှသော်လည်း ကျွန်းပေါ်တွင် တောင်တန်းများ၊ ရေပြင်များ၊ သစ်တောများနှင့် အနိမ့်စား အိမ်ခြေများက စီတန်းနေသည်ကို တွေ့ရသည်။</p> <p>သို့သော် ဘာကြောင့်မှန်း မသိဘဲ လင်းယွမ်က ထိုကျွန်းကို ကြည့်ရင်း အကြောင်းပြချက်မရှိဘဲ ရင်းနှီးနေသလို ခံစားလိုက်ရသည်။</p> <p>ထိုအချိန်တွင် ထိုကျွန်းက သိသာထင်ရှားစွာ ရွေ့လျားနေသည့် အရိပ်အယောင်မျိုး မရှိသေးပေ။</p> <p>သို့သော်လည်း ထိုကျွန်းက ရေမျက်နှာပြင်ပေါ်တွင် အမှန်တကယ် ပေါလောပေါ်နေပြီး ရေစီးကြောင်းနှင့်အတူ မျောပါနေကြောင်းကို လင်းယွမ်က ခံစားသိရှိနေဆဲ ဖြစ်သည်။</p> <p>"လင်းယွီကျွန်း... တကယ်ပဲ လင်းယွီကျွန်းပါလား"</p> <p>"ဟားဟားဟား... ရေနတ်ဘုရားက ကယ်မလို့ နောက်ဆုံးတော့ မင်းကို ဖမ်းမိပြီပေါ့"</p> <p>ခန္ဓာကိုယ် ထွားကျိုင်းသော ခေါင်းဆောင်က ဟားတိုက် ရယ်မောလိုက်ပြီးနောက် ချက်ချင်း အော်ဟစ်လိုက်သည်။ "ရေနစ် ဝိညာဉ်တပ်ဖွဲ့ဝင် အားလုံး... တိုက်ပွဲဝင်ဖို့ အသင့်ပြင်ထားကြ"</p> <p>"မိုးကြိုး အမြောက်တွေကို အသက်သွင်းလိုက်"</p> <p>သူ၏ အမိန့်ပေးသံနှင့်အတူ ပတ်ဝန်းကျင်ရှိ ရေနတ်ဘုရားဂိုဏ်းသားများ အားလုံးက အလျင်အမြန် လှုပ်ရှားလာကြပြီး မိမိတို့၏ နေရာ အသီးသီးဆီသို့ ပြေးသွားကြသည်။</p> <p>လင်းယွမ်က ဆူညံပွက်လောရိုက်နေသော လူအုပ်ကြားထဲတွင် အသံတိတ်စွာ ရောနှောဝင်ရောက်သွားပြီး သင်္ဘောခန်းထဲသို့ ဝင်သွားခဲ့သည်။</p> <p>ဤသင်္ဘော အတွင်းပိုင်းရှိ လက်နက် တပ်ဆင်ထားမှုများကို သူ ကြည့်ရှုချင်နေသည်။</p> <p>အထူးသဖြင့် ဒီ မိုးကြိုး အမြောက် ဆိုတဲ့ အရာကိုပင်...</p> <p>မနေ့ညကတည်းက ဤသင်္ဘောတွင် အဝေးပစ် တိုက်ခိုက်နိုင်စွမ်း ရှိကြောင်း သူ ကြားသိထားခဲ့သော်လည်း သင်္ဘောခန်းထဲသို့ ဝင်ရောက်ရန် အခွင့်အရေး မရခဲ့ပေ။</p> <p>ယခုအခါ တိုက်ပွဲ စတင်ပြီဖြစ်ရာ နောက်ဆုံးတွင် သူ အခွင့်အရေး ရရှိသွားပြီ ဖြစ်သည်။</p> <p>သင်္ဘောခန်း အတွင်းပိုင်းသို့ ဝင်ရောက်သွားသည်နှင့် လင်းယွမ်က အလုပ်ရှုပ်နေကြသော အပြာရောင် ဝတ်ရုံရှင် တမန်တော် အများအပြားကို တွေ့လိုက်ရသည်။</p> <p>ဤလူများက သင်္ဘောကိုယ်ထည်ပေါ်ရှိ စက်ဝိုင်းပုံ အပေါက် အကာအရံများကို ဆွဲဖွင့်လိုက်ကြပြီး အမြောက်ပြွန်များကို အပြင်သို့ တွန်းထုတ်လိုက်ကြသည်။</p> <p>ဤအမြောက်ပြွန်များ အားလုံးကို သံမဏိဖြင့် သွန်းလုပ်ထားသော်လည်း ၎င်းတို့ပေါ်တွင် လှပသေသပ်သော သင်္ကေတများကို ရေးထွင်းထားကြောင်း လင်းယွမ် သတိထားမိလိုက်သည်။</p> <p>သင်္ကေတ တစ်ခုနှင့် တစ်ခုကြားတွင် ချိုင့်ခွက်လေးများ ရှိနေပြီး ထိုချိုင့်ခွက်များ အတွင်း၌ ခရမ်းရောင် စွမ်းအင်ကျောက်တုံး အမြောက်အမြားကို ထည့်သွင်းထားသည်။</p> <p>လင်းယွမ်က အနည်းငယ် အာရုံခံကြည့်လိုက်ရာ ဤစွမ်းအင်ကျောက်တုံးများ၏ ဓာတ်သဘာဝကို ချက်ချင်း သိရှိသွားခဲ့သည်။</p> <p>ဒါတွေ အကုန်လုံးက လျှပ်စီးဓာတ် စွမ်းအင်ကျောက်တုံးတွေပဲ...</p> <p>ထိုသို့ဆိုလျှင် ဤသင်္ကေတများကလည်း လျှပ်စီးဓာတ်နှင့် ဆက်စပ်နေမည်မှာ ပြောစရာပင် မလိုတော့ချေ။</p> <p>လင်းယွမ်က ဤအမြောက်ကြီးများကို ကြည့်နေသော်လည်း သူတို့က အမြောက်ဆန်များကို ထည့်သွင်းနေသည်ကို မတွေ့ရဘဲ အပေါက်ဝသို့ တွန်းထုတ်ပြီးနောက် ဆက်လက် စောင့်ဆိုင်းနေကြသည်ကိုသာ တွေ့ရသည်။</p> <p>သင်္ဘောဦးပိုင်း လှည့်သွားသည်နှင့်အမျှ အမြောက်ပြွန်များရှိသည့် ဘက်က လင်းယွီကျွန်းဆီသို့ မျက်နှာမူသွားသည်။</p> <p>အပြင်ဘက်မှ ပြင်းထန်သော အော်ဟစ်သံတစ်ချက် ထွက်ပေါ်လာသည်။ "ပစ်"</p> <p>ထို့နောက် သင်္ဘောခန်း အတွင်းရှိ အသံချဲ့စက်ထဲမှလည်း ပြင်းထန်သော အော်ဟစ်သံက ရှင်းလင်းစွာ ထွက်ပေါ်လာသည်။</p> <p>"ပစ်"</p> <p>လင်းယွမ်က ခေါင်းမော့ကြည့်လိုက်ရာ သင်္ဘောခန်း၏ အမိုးပေါ်တွင်လည်း အလားတူ သင်္ကေတ တစ်စုကို ရေးထွင်းထားသည်ကို သတိပြုမိလိုက်သည်။</p> <p>ထိုသင်္ကေတများ လင်းလက်လာပြီး ၎င်းက အသံပို့လွှတ်သည့် ကိရိယာတစ်ခု၏ သင်္ကေတ ဖြစ်ပုံရသည်။</p> <p>ထို "ပစ်" ဟူသော အသံ ထွက်ပေါ်လာသည်နှင့် တစ်ပြိုင်နက်...</p> <p>မိုးကြိုး အမြောက်များ အနီးရှိ အပြာရောင် ဝတ်ရုံရှင် တမန်တော်များ အားလုံးက အမြောက်ပြွန်များကို အသီးသီး အသက်သွင်းလိုက်ကြသည်။</p> <p>မျက်စိတစ်မှိတ် အတွင်းမှာပင် ခရမ်းရောင် လျှပ်စီးကြောင်းများ တစ်ခုပြီးတစ်ခု လင်းလက်လာကာ စွမ်းအင်ကျောက်တုံးများက ချက်ချင်း လှုံ့ဆော်ခံလိုက်ရသည်။</p> <p>စွမ်းအင် အမြောက်အမြားက အမြောက်ပြွန်ဝဆီသို့ စုစည်းသွားကြသည်။</p> <p>စက္ကန့်အနည်းငယ်ခန့် အကြာတွင် ကျယ်လောင်သော မြည်ဟည်းသံကြီး တစ်ချက် ပေါက်ကွဲထွက်လာတော့သည်။</p> <p>"ဝုန်း"</p> <p>အမြောက်ပြွန်ဝမှ ဧရာမ ခရမ်းရောင် လျှပ်စီးတန်းကြီး တစ်ခုက ချက်ချင်း ပေါက်ကွဲထွက်ကာ အရှိန်ပြင်းပြင်းဖြင့် ပစ်လွှတ်သွားသည်။</p> <p>လျှပ်စီးအလင်းလုံးကြီးများက လေထုကို ခွဲထုတ်ကာ မိုးစက်များကို ဖြတ်သန်းပြီး အဝေးရှိ လင်းယွီကျွန်းဆီသို့ အလွန် လျင်မြန်စွာ ပစ်ခတ်သွားကြသည်။</p> <p>"ဘုန်း... ဘုန်း... ဘုန်း"</p> <p>မြည်ဟည်းသံများ ပေါက်ကွဲထွက်လာပြီး လင်းယွီကျွန်းပေါ်တွင် ချက်ချင်းပင် ပြင်းထန်သော ပေါက်ကွဲမှုများ ဖြစ်ပေါ်လာသည်။</p> <p>ဖုန်မှုန့်များ လွင့်စင်သွားပြီး ပေါက်ကွဲသံများက ကောင်းကင်ယံအထိ ပဲ့တင်ထပ်သွားသည်။</p> <p>လင်းယွီကျွန်းပေါ်မှ ဒေါသတကြီး အော်ဟစ်သံတစ်ချက် ချက်ချင်း ထွက်ပေါ်လာပြီး ပေရာပေါင်းများစွာ ကွာဝေးနေလင့်ကစား ထိုအသံက အမျိုးသမီးတစ်ဦး၏ စူးရှသော အော်ဟစ်သံဖြစ်ကြောင်းကို လင်းယွမ် ကြားလိုက်ရသည်။</p> <p>နောက်တစ်ခဏတွင် လင်းယွီကျွန်း တစ်ခုလုံး၏ ကောင်းကင်ယံ၌ အလွန် အစွမ်းထက်သော စွမ်းအင် အကာအကွယ် တစ်ခု လျင်မြန်စွာ ဖြစ်ပေါ်လာသည်ကို တွေ့လိုက်ရသည်။</p> <p>ဤအကာအကွယ်က ခြောက်ထောင့်ပုံစံ အကြည်ရောင် အပြာရောင် အကာအကွယ် အလွှာများသဖွယ် လင်းယွီကျွန်း တစ်ခုလုံးကို ချက်ချင်း ဖုံးလွှမ်းသွားတော့သည်။</p> <p>ထိုမိုးကြိုး အမြောက်များက အပြာရောင် အကာအကွယ်ပေါ်သို့ ဗုံးကြဲတိုက်ခိုက်လိုက်သော်လည်း အကာအကွယ်၏ တားဆီးခြင်းကို ချက်ချင်း ခံလိုက်ရသည်။</p> <p>လျှပ်စီးကြောင်းများ ပေါက်ကွဲထွက်ကာ မိုးကြိုးများ လှိမ့်တက်သွားသော်လည်း ဤအပြာရောင် အကာအကွယ်ကို မထိုးဖောက်နိုင်ခဲ့ပေ။</p> <p>တစ်ချိန်တည်းမှာပင် လင်းယွီကျွန်းက အလွန် လျင်မြန်သော အမြန်နှုန်းဖြင့် လျင်မြန်စွာ ရွေ့လျားလာခဲ့သည်။</p> <p>လင်းယွမ်က အရှိန်အဟုန်ပြင်းစွာဖြင့် ချဉ်းကပ်လာသော လင်းယွီကျွန်းကို ကြည့်ရင်း စိတ်ထဲတွင် အနည်းငယ် ထိတ်လန့်သွားမိသည်။</p> <p>"ရေပေါ်ကျွန်း တစ်ကျွန်းက ဒီလောက်တောင် မြန်တဲ့ ရွေ့လျားနှုန်း ရှိနေတာလား"</p> <p>သူက အနည်းငယ် မယုံကြည်နိုင်သလို ခံစားလိုက်ရသည်။</p> <p>မြူခိုးမြို့တော်သည် ရေပေါ်တွင် ပေါလောပေါ်၍ ရွေ့လျားနိုင်သည် ဆိုသော်လည်း ၎င်းက သမုဒ္ဒရာ ရေစီးကြောင်းများနှင့်အတူ မျောပါနေခြင်းဖြစ်ပြီး ရေလှိုင်းများ၏ တွန်းကန်မှုဖြင့် ရွေ့လျားနေခြင်းသာ ဖြစ်ကြောင်းကို သိထားရမည်။</p> <p>သူ့ရှေ့မှ ဤလင်းယွီကျွန်းကတော့ သက်ရှိ သတ္တဝါ တစ်ကောင်လိုပင် ရေထဲတွင် ရေဆန်ကိုပင် ဆန်တက်လာနိုင်ပြီး အလွန် ရည်ရွယ်ချက်ရှိရှိဖြင့် လိုက်လံ တိုက်ခိုက်လာနေခြင်း ဖြစ်သည်။</p> <p>ဤသည်က လင်းယွမ် တစ်ခါမှ မကြုံဖူးသေးသော အခြေအနေမျိုး ဖြစ်သည်။</p> <p>"မကောင်းတော့ဘူး... အမြန် ရှောင်ကြ"</p> <p>"ရေနတ်ဘုရား နံပါတ် ၂ နဲ့ ၃ သင်္ဘောတွေ... ဆက်တိုက် ပစ်... ပစ်စမ်း"</p> <p>ရေနတ်ဘုရားဂိုဏ်းဘက်မှ ခန္ဓာကိုယ် ထွားကျိုင်းသော ခေါင်းဆောင်က ဒေါသတကြီး ဟိန်းဟောက်ကာ အမိန့်ပေးလိုက်သည်။</p> <p>တစ်ချိန်တည်းမှာပင် ရေနတ်ဘုရား သင်္ဘောကို ရန်သူများထံမှ လျင်မြန်စွာ ရှောင်တိမ်းရန် အမိန့်ပေးလိုက်သည်။</p> <p>သို့သော် ရေနတ်ဘုရား စစ်သင်္ဘော၏ အရွယ်အစားက အလွန် ကြီးမားလွန်းသဖြင့် အလွန် နှေးကွေးနေခဲ့သည်။</p> <p>တစ်မိနစ်ပင် မပြည့်သေးခင်မှာပဲ ထိုလင်းယွီကျွန်းက အရှိန်ပြင်းပြင်းဖြင့် ဝင်တိုက်လာတော့သည်။</p> <p>ထိုသို့ ဖြစ်လာသည်ကို မြင်သောအခါ ခန္ဓာကိုယ် ထွားကျိုင်းသော ခေါင်းဆောင်က ချက်ချင်း အော်ဟစ်လိုက်သည်။ "ရေနတ်ဘုရား အကာအကွယ်... ရေနတ်ဘုရား အကာအကွယ်ကို ဖွင့်လိုက်စမ်း"</p> <p>နောက်တစ်ခဏတွင် သင်္ဘောကိုယ်ထည် တစ်ခုလုံး၌ ရေလှိုင်းများနှင့် တူသော အကာအကွယ် တစ်ခု လျင်မြန်စွာ ပေါ်ထွက်လာပြီး သင်္ဘော တစ်စီးလုံးကို ဖုံးလွှမ်းသွားတော့သည်။</p> <p>"ဝုန်း"</p> <p>ရေနတ်ဘုရား သင်္ဘော တစ်စီးလုံးက လင်းယွီကျွန်းနှင့် ပြင်းထန်စွာ ဝင်တိုက်မိသွားပြီး အကြည်ရောင် ရေနတ်ဘုရား အကာအကွယ်က ထိုအပြာရောင် လင်းယွီကျွန်း အကာအကွယ်နှင့် တိုက်မိသွားတော့သည်။</p> <p>ပေါက်ကွဲသံများ အဆက်မပြတ် ထွက်ပေါ်နေသည်နှင့် တစ်ချိန်တည်းမှာပင် လင်းယွီကျွန်းက ရုတ်တရက် အပေါ်သို့ ပင့်တက်လာပြီး လေထဲသို့ မြင့်တက်လာသည်ကို တွေ့လိုက်ရသည်။</p> <p>နောက်တစ်ခဏတွင် ထိုကျွန်း၏ ရေအောက်မှ အလွန် ကြီးမားလှသော ခေါင်းကြီး တစ်ခု ထွက်ပေါ်လာခဲ့သည်။</p> <p>ထိုခေါင်းကြီးတွင် အရောင်အသွေး စုံလင်သော အကြေးခွံများ ဖုံးလွှမ်းနေပြီး အပေါက်နက်ကြီးများကဲ့သို့ ကြီးမားသော မျက်လုံးကြီး နှစ်လုံးက ရေနတ်ဘုရား သင်္ဘောကို ရက်စက်ကြမ်းကြုတ်စွာ စိုက်ကြည့်နေသည်။</p> <p>၎င်းက ပါးစပ်ကို ဖြဲကာ ရေနတ်ဘုရား နံပါတ် ၁ ၏ အကာအကွယ်ပေါ်သို့ အားကုန် ကိုက်ချလိုက်သည်ကို တွေ့လိုက်ရသည်။</p> <p>မျက်စိတစ်မှိတ် အတွင်းမှာပင် ရေဓာတ် အကာအကွယ်က ဂျယ်လီတစ်ခုလို ထိုပါးစပ်ကြီး၏ စုပ်ယူစားသောက်ခြင်းကို ချက်ချင်း ခံလိုက်ရတော့သည်။</p> <p>ရေနတ်ဘုရား နံပါတ် ၁ ပေါ်ရှိ ကာကွယ်ရေး သင်္ကေတအစီအရင်အတွက် အသုံးပြုထားသော စွမ်းအင်ကျောက်တုံးများ အားလုံးမှာ ချက်ချင်းပင် အကုန်အစင် ကုန်ခန်းသွားတော့သည်။</p> <p>အကာအကွယ် ပျက်စီးသွားသည်နှင့်အမျှ လင်းယွီကျွန်းက ထပ်မံ၍ အရှိန်ပြင်းပြင်းဖြင့် ဝင်တိုက်လာပြန်သည်။</p> <p>ဝုန်းခနဲ အသံနှင့်အတူ ရေနတ်ဘုရား နံပါတ် ၁ တစ်စီးလုံး ချက်ချင်းပင် အစိတ်စိတ်အမွှာမွှာ ကွဲအက်သွားပြီး သင်္ဘောကိုယ်ထည် ပြတ်တောက်သွားကာ ရေလွှမ်းမိုးမှုများက ကောင်းကင်ယံအထိ လိမ့်တက်လာပြီး အလုံးအရင်းနှင့် ဝင်ရောက်လာတော့သည်။</p> <p>ခန္ဓာကိုယ် ထွားကျိုင်းသော ရေနတ်ဘုရား တမန်တော် ခေါင်းဆောင်က ဒေါသတကြီး ဟိန်းဟောက်လိုက်ပြီး အော်ဟစ်လိုက်သည်။ "ကုန်းမြေက သေဆုံးသွားပြီ... ဒီရေက ထာဝရ ရှင်သန်နေမယ်... ကျွန်းပေါ်ကို တက်သတ်ကြစမ်း"</p> <p>"သတ်"</p> <p>ချက်ချင်းပင် သင်္ဘောပေါ်ရှိ ရေနတ်ဘုရား တမန်တော်များက ဝတ်ရုံများကို ဆွဲဖြဲလိုက်ကြပြီး မျက်နှာဖုံးများကို ချွတ်ချကာ ငါးအကြေးခွံများကဲ့သို့ အရေပြားများနှင့် ငါးပါးဟက်များကဲ့သို့ ပါးပြင်များကို ဖော်ထုတ်လိုက်ကြသည်။</p> <p>ထို့နောက် ရူးသွပ်စွာဖြင့် ရေထဲသို့ ခုန်ဆင်းသွားကြပြီး ရေပြင်ကြီးကို အနည်းငယ်မျှပင် မကြောက်ရွံ့ကြပေ။</p> <p>ဤလူအုပ်ထဲတွင် လူတစ်ယောက်တည်းကသာ ရေမြုပ်တော့မည့် ရေနတ်ဘုရား နံပါတ် ၁ ပေါ်တွင် မယုံနိုင်စရာကောင်းလောက်အောင် ရပ်နေပြီး ထို "လင်းယွီကျွန်း" ဆိုသည်ကို မျက်တောင်မခတ် စိုက်ကြည့်နေသည်။</p> <p>"ဘယ်လိုလုပ် ဖြစ်နိုင်မှာလဲ"</p> <p>လင်းယွမ်က ရေများ လွှမ်းမိုးလာသည်ကို ဂရုမစိုက်ဘဲ ဤလင်းယွီကျွန်းကို မယုံကြည်နိုင်စွာ စိုက်ကြည့်နေမိသည်။</p> <p>ဒါက ဘယ်လိုလုပ် ကျွန်းတစ်ကျွန်း ဖြစ်နေရမှာလဲ... အလွန် ကြီးမားလှတဲ့ လိပ်ကြီး တစ်ကောင် ဖြစ်နေတာ အသိသာကြီးကို...</p> <p>အဲဒီ ခေါင်းကြီးက လိပ်ခေါင်းကြီးပဲ...</p> <p>အဲဒီ ကျွန်းဆိုတာက လိပ်ခွံပေါ်မှာ နှစ်ပေါင်းများစွာ စုပုံနေတဲ့ သဲတွေနဲ့ ဖုန်မှုန့်တွေ စုပုံပြီး ဖြစ်လာတဲ့ ကျွန်းပဲ...</p> <p>ဤလိပ်ကြီးကို သူ အလွန် ရင်းနှီးကျွမ်းဝင်နေခဲ့သည်။</p> <p>မိန်တုဥယျာဉ် မှ သူ ထွက်လာပြီးကတည်းက ၎င်းနှင့် တွေ့ဆုံခဲ့ဖူးသည်။</p> <p>အဲဒီ အကြိမ်တုန်းကပဲ မိန်တုဥယျာဉ် ကနေ သူနဲ့အတူ ထွက်လာခဲ့တဲ့ အိမ်နီးချင်း တော်တော်များများကို သူ ဆုံးရှုံးခဲ့ရတာ...</p> <p>လိပ်ကျွန်း...</p> <p>လင်းယွီကျွန်း ဆိုတာက... အရင်တုန်းက လိပ်ကျွန်းကြီး ဖြစ်နေခဲ့သည်ကိုး။</p> <p>ဆက်ရန်...</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save