Book List

<h2 style="text-align: center;">အခန်း (၅၇၁)</h2> <h2 style="text-align: center;">မိစ္ဆာသိုင်းဆရာကြီး။ ကောင်းကင်သို့ ပျံတက်သွားသော မြားတစ်စင်း (၃)</h2> <h2 style="text-align: center;">*</h2> <p> </p> <p> </p> <p>"ဝုန်း"</p> <p>ကြောက်မက်ဖွယ်ကောင်းသော အင်အားတစ်ခု ပေါက်ကွဲထွက်လာပြီး စူးချန်ခုန်းသည် သူ၏ လက်မောင်းတစ်ခုလုံး ထုံကျင်သွားသလို ခံစားလိုက်ရသည်။ သူ၏ ခန္ဓာကိုယ်မှာလည်း ထိန်းမနိုင်ဘဲ နောက်သို့ လွင့်ထွက်သွားကာ သစ်တောအတွင်းရှိ သစ်ပင်ကြီး လေးငါးပင်ကို ရိုက်မိကျိုးပဲ့စေပြီးမှသာ ရပ်တန့်သွားတော့သည်။</p> <p>“ဒီထန်ယို့က... တကယ်ကို ကြောက်ဖို့ကောင်းလိုက်တာ။ သူ့ရဲ့ အတွင်းအား၊ မိစ္ဆာစွမ်းအားနဲ့ ခန္ဓာကိုယ် ကြံ့ခိုင်မှုတွေက အထွတ်အထိပ်ကို ရောက်နေတာပဲ။”</p> <p>သူ၏ ဘယ်ဘက်လက်မောင်းမှ နာကျင်ကိုက်ခဲမှုကို ခံစားရင်း စူးချန်ခုန်း၏ စိတ်မှာ လေးလံသွားလေ၏။</p> <p>ထန်ယို့သည် လွန်ခဲ့သော ဆယ်စုနှစ်များစွာကတည်းက 'မူလဓာတ်ငါးပါးသိုင်းပညာရှင်' အဆင့်သို့ ရောက်ရှိခဲ့သူဖြစ်ပြီး ယခုအခါ အဆင့်မြင့် နတ်ဆိုးအမြုတေနှင့် ပေါင်းစပ်ထားပြီး ဖြစ်သဖြင့် သူ၏ ခန္ဓာကိုယ်မှာ အားနည်းချက် လုံးဝမရှိတော့ပေ။ သူ၏ အတွင်းအားမှာလည်း ခိုင်မာပြီး မိစ္ဆာစွမ်းအားမှာလည်း အလွန်ပင် ကြီးမားလှသည်။ သူ၏ သာမန်တိုက်ခိုက်မှု တစ်ခုသည်ပင် သာမန် 'မူလဓာတ်ငါးပါးသိုင်းပညာရှင်'တစ်ဦး အစွမ်းကုန် ထုတ်သုံးလိုက်သော အင်အားနှင့် ညီမျှနေသည်။</p> <p>ချီကန်း ကဲ့သို့သော အခြား 'မူလဓာတ်ငါးပါးသိုင်းပညာရှင်'များမှာမူ သူ၏ ရှေ့တွင် ကလေးငယ်လေးများကဲ့သို့ အားနည်းနေပေလိမ့်မည်။</p> <p>"ဒိတ် ဒိတ် ဒိတ်"</p> <p>စူးချန်ခုန်း၏ နှလုံးခုန်သံမှာ ပြင်းထန်လာပြီး မီတာ ရာနှင့်ချီသော အကွာအဝေးအထိ ပဲ့တင်ထပ်သွားသည်။ သူ၏ နှလုံးသားအတွင်းရှိ နတ်ဘုရားသွေးများမှာ ခန္ဓာကိုယ်အနှံ့ လျင်မြန်စွာ ပျံ့နှံ့သွားပြီး သူ၏ အရပ်အမောင်းမှာ ပိုမိုမြင့်မားလာကာ ကြွက်သားများ ဖောင်းကားလာသည်။ အပူရှိန်ကြောင့် နီမြန်းလာသော သူ၏ အရေပြားနှင့် ဖောင်းကြွလာသော အကြောများမှာ လူသားနှင့်မတူသော ရက်စက်ကြမ်းကြုတ်သည့် အရှိန်အဝါများကို ရူးသွပ်စွာ ထုတ်လွှတ်နေတော့သည်။</p> <p>"ဟူး... ဟူး..."</p> <p>စူးချန်ခုန်းသည် အေးစက်သော လေထုကို ပြင်းပြင်းရှူသွင်းလိုက်ရာ သူ၏ မျက်ဝန်းများတွင် သွေးရောင်များ ယှက်သန်းလာသည်။</p> <p>"ဟေး... ဒါက အဲဒီကောင်လေး အရင်က သုံးခဲ့တဲ့ နည်းလမ်းပဲ။" ဝတ်ရုံနက် အကြီးအကဲသည် စူးချန်ခုန်း၏ တောရိုင်းတိရစ္ဆာန်ကဲ့သို့ ကြမ်းတမ်းသော အရှိန်အဝါကို ခံစားမိသဖြင့် မျက်မှောင်ကြုတ်လိုက်သည်။ စူးချန်ခုန်းသည် ဤနည်းလမ်းဖြင့် သူတို့သုံးဦး၏ ဝိုင်းရံတိုက်ခိုက်မှုကို လွယ်ကူစွာ ခုခံနိုင်ခဲ့ပြီး ချီကန်းကိုပင် လျင်မြန်စွာ သတ်ဖြတ်နိုင်ခဲ့ခြင်း ဖြစ်သည်။</p> <p>"ဟင်.. ဒီနည်းလမ်းက စိတ်ဝင်စားဖို့ ကောင်းသားပဲ... နတ်ဘုရားစွမ်းရည်တွေရဲ့ အခြေခံ အငွေ့အသက် ပါနေတယ်။ ဒီအင်အားက နှလုံးနဲ့ သွေးကနေ လာတာ မဟုတ်လား။"</p> <p>ထန်ယို့သည် သူ့ရှေ့တွင် ဘီလူးငယ်တစ်ဦးအလား ပြောင်းလဲသွားပြီး တောရိုင်း တိရစ္ဆာန်တစ်ကောင်ကဲ့သို့ အပူရှိန်များ ထုတ်လွှတ်နေသော စူးချန်ခုန်းကို ကြည့်ကာ သူ၏ နည်းစနစ်များနောက်ကွယ်မှ လျှို့ဝှက်ချက်ကို ဆန်းစစ်ရင်း ရေရွတ်လိုက်သည်။</p> <p>ဝုချင်းရှီ၊ မျောက်ဝံနတ်ဆိုး လေဟာနယ်ဖမ်းဆုပ်ခြင်း။</p> <p>သူ၏ နှလုံးသားရှိ နတ်ဘုရားသွေးများကို လှုံ့ဆော်ကာ ဧရာမ ဝေလငါး ခန္ဓာကိုယ်အတတ်ကို အသုံးပြုလိုက်ပြီးနောက် စူးချန်ခုန်းသည် များပြားလှသော သဘာဝဝိညာဉ်စွမ်းအင်များကို စုစည်းကာ သူ၏ စိတ်ဝိညာဉ်ကို ပုံဖော်လိုက်သည်။</p> <p>သူ၏ နောက်ကျောတွင် ရွှေရောင်အမွှေးအမျှင်များရှိသော မျောက်ဝံကြီးတစ်ကောင်၏ ပုံရိပ်ယောင် ပေါ်လာသည်။ ၎င်း၏ ရှည်လျားသော လက်မောင်းများကို ဖြန့်ကားလိုက်ပြီး ကြီးမားသော လက်ဝါးများကို စုစည်းကာ လေထုကို ဖမ်းယူလိုက်သည်။ ဤသည်မှာ ‘မျောက်ဝံနတ်ဆိုး’ ကို လေ့လာခြင်းဖြင့် ရရှိခဲ့သော သေစေနိုင်သည့် တိုက်ကွက်ပင် ဖြစ်သည်။</p> <p>"ဂျောက် ဂျောက်"</p> <p>ထန်ယို့ ရပ်နေသော နေရာရှိ လေထုမှာ စတင်ပုံပျက်လာပြီး မမြင်နိုင်သော ကြီးမားသည့် လက်နှစ်ဖက်ဖြင့် ညှစ်ထားသကဲ့သို့ ဘေးတစ်ဖက်တစ်ချက်စီမှ ပြင်းထန်သော ဖိအားများ သက်ရောက်လာသည်။</p> <p>'ဒီတာ့ဝူဖုန်းက အသက်ငယ်ပေမယ့် နည်းစနစ်တွေက အများကြီးပဲ... အားလုံးကလည်း နက်ရှိုင်းတဲ့ အဆင့်မှာ ရှိနေတယ်။ တကယ့်ကို အာဂလူပဲ။ ငါနဲ့တောင် မခြားဘူး။'</p> <p>သံမဏိကိုပင် ကြိတ်ခြေနိုင်သည့် ထိုဖိအားအောက်တွင် ထန်ယို့မှာမူ ထိခိုက်မှုမရှိဘဲ အနည်းငယ်သာ မျက်မှောင်ကြုတ်လိုက်သည်။</p> <p>ယေဘုယျအားဖြင့် သိုင်းပညာရှင်တစ်ဦးသည် ဓားသိုင်း သို့မဟုတ် လက်သီးသိုင်းကဲ့သို့သော ကဏ္ဍတစ်ခုတွင်သာ ထူးချွန်လေ့ရှိပြီး အခြားနယ်ပယ်များတွင် အားနည်းလေ့ရှိသည်။ လူတစ်ယောက်၏ စွမ်းအင်မှာ ကန့်သတ်ချက်ရှိသဖြင့် အရေအတွက်ထက် အရည်အသွေးကိုသာ ဦးစားပေးရခြင်း ဖြစ်သည်။</p> <p>သို့သော် စူးချန်ခုန်းမှာမူ သိုင်းပညာ အမြောက်အမြားကို အလွန်မြင့်မားသော နယ်ပယ်သို့ ရောက်အောင် လေ့ကျင့်ထားသည်မှာ သိသာလှသည်။ ဓားသိုင်းတွင်လည်း သူသည် 'ဓားဝိညာဉ်' ကို ရရှိထားပြီး သူ၏ အတွင်းအားမှာလည်း ခန္ဓာကိုယ်ကို ပြောင်းလဲစေနိုင်သည့် အဆင့်သို့ ရောက်နေသည်။ ထို့အပြင် စိတ်ဝိညာဉ်ကို ပုံဖော်နိုင်သည့် ဆန်းကြယ်သော သိုင်းပညာကိုပါ တတ်မြောက်ထားသေးသည်။</p> <p>ဒါက တကယ့်ကို ထိပ်တန်းမိစ္ဆာပင် ဖြစ်သည်။</p> <p>ထိုသို့သော ထိပ်တန်းမိစ္ဆာများကို မိမိအကျိုးအတွက် အသုံးချ၍ မရပါက အနာဂတ်တွင် ဘေးအန္တရာယ် မဖြစ်စေရန် အမြစ်ပြတ် ဖျက်ဆီးပစ်ရန်သာ ရှိတော့သည်။</p> <p>"ဓားခုတ်ချက်"</p> <p>မျောက်ဝံနတ်ဆိုး၏ လေဟာနယ်ဖမ်းဆုပ်ခြင်းဖြင့် ထန်ယို့ကို ချုပ်နှောင်ထားစဉ် ဧရာမဝေလငါး ခန္ဓာကိုယ်အတတ်ကို အသုံးပြုထားသော စူးချန်ခုန်း၏ နဖူးပေါ်တွင် နီမြန်းသော တိုက်ပွဲအမှတ်အသားများ လက်ခနဲ ပေါ်လာသည်။ သူက အော်ဟစ်လိုက်ပြီး ခြေလှမ်းအကျယ်ကြီးဖြင့် အကွာအဝေးကို ချက်ချင်း ကျဉ်းမြောင်းလိုက်ပြီး ကြွက်သားများ တင်းမာနေသော လက်မောင်းဖြင့် နတ်ဘုရားသွေးများ စီးဆင်းနေသည့် မီးငရဲဓားကို အရှိန်ပြင်းစွာ လွှဲယမ်းလိုက်သည်။</p> <p>ဓားအတွင်းတွင် ဖိသိပ်ထားသော ဓားဝိညာဉ်မှာ ကောင်းကင်နှင့် မြေကြီးကိုပင် ပိုင်းဖြတ်တော့မည့်အလား ပြင်းထန်စွာ ကျရောက်လာသည်။</p> <p>"ဝုန်း"</p> <p>ပြင်းထန်လှသော ဓားချက်မှာ ထန်ယို့၏ ဦးခေါင်းပေါ်သို့ ကျရောက်သွားပြီး မြေပြင်မှာ တုန်ခါသွားကာ ပေ ၂၀ မှ ၃၀ အထိ ရှည်လျားသော မြေကွဲကြောင်းကြီး ဖြစ်ပေါ်သွားသည်။ ၎င်းမှာ နတ်ဘုရားတစ်ပါး၏ ဓားဖြင့် ခုတ်ပိုင်းလိုက်သကဲ့သို့ပင်။</p> <p>"ဗြိ"</p> <p>အဝတ်စုတ်ပြဲသံကဲ့သို့ အသံအနည်းငယ် ထွက်ပေါ်လာပြီး ထန်ယို့၏ ခန္ဓာကိုယ်ကို ကာကွယ်ထားသော ပါးလွှာသော အလွှာတစ်ခု စုတ်ပြဲသွားသည်။ ၎င်းမှာ သူ၏ မိစ္ဆာစွမ်းအားဖြင့် ဖန်တီးထားသော အကာအကွယ် ဖြစ်သည်။ စူးချန်ခုန်း၏ အစွမ်းကုန် အားထုတ်မှုကြောင့် ထိုအကာအကွယ်မှာ စုတ်ပြဲသွားသော်လည်း ထိုမျှသာ ဖြစ်သည်။</p> <p>မိစ္ဆာစွမ်းအား အကာအကွယ်ကို ထိုးဖောက်ရန်အတွက် စူးချန်ခုန်း၏ ဓားစွမ်းအား အားလုံး ကုန်ခမ်းသွားခဲ့ပြီး ထန်ယို့ကတော့ ထိခိုက်ဒဏ်ရာ တစ်စုံတစ်ရာ မရရှိခဲ့ပေ။</p> <p>'အဆင့်မြင့် နတ်ဆိုးအမြုတေနဲ့ ပေါင်းစပ်ထားတဲ့ မူလဓာတ်ငါးပါး သိုင်းပညာရှင်က... တကယ်ကို အစွမ်းထက်လွန်းတယ်။ ဒီအတိုင်း ထွက်ပေါ်နေတဲ့ မိစ္ဆာစွမ်းအား တစ်ခုတည်းနဲ့တင် သာမန် မူလဓာတ်ငါးပါး သိုင်းပညာရှင်တစ်ယောက် အစွမ်းကုန် တိုက်ခိုက်ရင်တောင် ထိုးဖောက်ဖို့ ခက်ခဲလိမ့်မယ်။ သူက မူလဓာတ်ငါးပါး သိုင်းပညာရှင်တွေကို ခြေမှုန်းနိုင်သူ... မဟာသိုင်းဆရာကြီးအဆင့် တိုက်ခိုက်ရေးသမားလို့တောင် သတ်မှတ်လို့ရတယ်။'</p> <p>ဤမြင်ကွင်းကို ကြည့်နေသော ဝတ်ရုံနက် အကြီးအကဲမှာလည်း စိတ်ထဲတွင် မနာလိုမှုများ ပေါ်လာသည်။</p> <p>အဆင့်မြင့် နတ်ဆိုးအမြုတေများမှာ အသက်ခြွေအသင်းအတွင်းမှာပင် အကန့်အသတ်ဖြင့်သာ ရှိသည်။ ထို့ပြင် ၎င်းတို့နှင့် ပေါင်းစပ်နိုင်ရန်အတွက် သတ်မှတ်ချက်များမှာ အလွန်မြင့်မားလှသည်။ မိမိ၏ သိစိတ်ပင်လယ်အတွင်း၌ ချီငါးပါးကို လှည့်ပတ်နိုင်သော ဆရာကြီးများသာ ပေါင်းစပ်မှုကို အောင်မြင်နိုင်ခြေ ရှိသည်။</p> <p>(ချီငါးပါး သို့မဟုတ် မူလဓာတ်ငါးပါး = ရေ၊မီး၊မြေ၊သတ္တု၊သစ်သား)</p> <p>ထိုသို့မဟုတ်ဘဲ အတင်းအဓမ္မ ပေါင်းစပ်ရန် ကြိုးစားသူတိုင်းမှာ သေဆုံးရန်သာ ရှိသည်။</p> <p>အဆင့်မြင့် နတ်ဆိုးအမြုတေနှင့် ပေါင်းစပ်ထားသော မိစ္ဆာစစ်သည်များမှာ သာမန်လူတို့၏ စိတ်ကူးထက် များစွာ ပို၍ ကြောက်မက်ဖွယ်ကောင်းလှသည်။ အဘယ်ကြောင့်ဆိုသော် သူတို့သည် မပေါင်းစပ်မီကတည်းက 'မူလဓာတ်ငါးပါး သိုင်းပညာရှင်' များ ဖြစ်နေကြသောကြောင့် ဖြစ်သည်။</p> <p>မိစ္ဆာစွမ်းအား၊ မသေနိုင်သော ခန္ဓာကိုယ်နှင့် မိစ္ဆာအတတ်များကြောင့် သူတို့သည် တစ်ကျော့ပြန် မွေးဖွားလာသကဲ့သို့ပင်။ 'သိုင်းဝိဇ္ဇာသူတော်စင်' အောက်တွင် သူတို့မှာ ပြိုင်ဘက်ကင်းသလောက်ပင် ဖြစ်သည်။</p> <p>ချီကန်းကို သတ်နိုင်ခဲ့သည့် 'တာ့ဝူဖုန်း' ပင်လျှင် ထိပ်တန်းမိစ္ဆာစစ်သည်ဖြစ်သူ ထန်ယို့အား မည်သို့မျှ ခြိမ်းခြောက်နိုင်စွမ်း မရှိပေ။ သူသည်လည်း အဆင့်မြင့် နတ်ဆိုးအမြုတေနှင့် မပေါင်းစပ်ထားသရွေ့ အရေးနိမ့်ရန်သာ ရှိတော့သည်။</p> <p>"နှလုံးသားတစ်ထောင်၊ စိတ်ဝိညာဉ်လက်ဝါးတိုက်ကွက်"</p> <p>စူးချန်ခုန်း၏ ဓားခုတ်ချက်ကို အသာလေး ခုခံပြီးနောက် ထန်ယိုသည် နတ်ဆိုးမျောက်ဝံ၏ ချုပ်နှောင်မှုမှ ရုန်းထွက်လိုက်သည်။ သူ၏ ဘယ်ဘက်လက်ဝါးမှာ ပုံရိပ်ယောင်များစွာဖြင့် ထွက်ပေါ်လာပြီး လက်ဝါးပေါင်း တစ်ထောင်မှာ တစ်ခုတည်းအဖြစ် ပေါင်းစပ်သွားသည့်နှယ်။ ရိုးရှင်းပုံရသော ဤလက်ဝါးရိုက်ချက်မှာ အမှန်တကယ်တွင် အဆုံးမဲ့ ပြောင်းလဲမှုများ ပါဝင်သော ပြင်းထန်သည့် စွမ်းအားတစ်ခုဖြစ်ကာ စူးချန်ခုန်းထံသို့ အနီးကပ် ရိုက်ခတ်လာတော့သည်။</p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save