Book List

<h2 style="text-align: center;">အခန်း(၁၄)</h2> <h2 style="text-align: center;">သည်းခံခြင်း အဆင့်</h2> <h2 style="text-align: center;">*</h2> <p> </p> <p> </p> <p>အနွယ်တော် မျက်လုံး မှိတ်လိုက်သည်နှင့် သမာဓိထူထောင်ခြင်း အဆင့်သို့ ချက်ချင်းလိုလို ရောက်ရှိသွားသည်။ ပညာသင်သည့် သုံးနှစ်တာကာလအတွင်း နေ့စဉ် တရားထိုင်ရသဖြင့် အနွယ်တော်အတွက် ထိုအခြေအနေသို့ ရောက်ဖို့ လွယ်ကူပေသည်။</p> <p>မြေကြီး၏ သည်းခံခြင်း ဆိုသည်မှာ အဘယ်နည်း။ မဟာပထဝီ မြေပြင်သည် သစ်ရွက်ကြွေသည်ကစ တောင်ပြိုသည်အဆုံး မည်သို့မျှ တုန့်ပြန်ခြင်း မပြုဘဲ သည်းခံနိုင်၏။ ရေဆိုသည်မှာ လှိုင်းထတတ်သည်။ လေဆိုသည်မှာ ရိုက်ခတ်တတ်သည်။ မည်သို့မျှ တုန့်ပြန်ခြင်း မပြုဘဲ သည်းခံနိုင်သည်မှာ မဟာပထဝီ မြေကြီးသာ ရှိသည်။</p> <p>သို့ဆိုလျှင် သည်းခံခြင်း အဆင့်သို့ ရောက်ရှိရန်အတွက် မြေကြီးကဲ့သို့ သည်းခံရမည်လော။ ထိုသို့လည်း မဖြစ်နိုင်ပေ။ ထိုသို့သာ သည်းခံရမည်ဆိုလျှင် လောက၌ တိုက်ပွဲဟူသည်မှာ ရှိတော့မည် မဟုတ်ပေ။ ထိုသို့မဟုတ်လျှင် မည်သို့နည်း။</p> <p>အနွယ်တော်သည် မေးခွန်းများကို အဖြေရှာရင်း သည်းခံခြင်း အကြောင်းအား ဆက်လက် ဆင်ခြင်လိုက်သည်။</p> <p>သည်းခံခြင်းဆိုသည်မှာ အရာရာတိုင်းအတွက် သည်းခံရမည် မဟုတ်ပေ။ ကျင့်စဉ်များ ကျင့်ကြံရာတွင်သာ အသုံးပြုရမည့် စိတ်နေစိတ်ထားပင် ဖြစ်သည်။ ကာမဂုဏ်အာရုံများဆိုသည့် ကာမစ္ဆန္ဒ၊ ဒေါသထွက်ခြင်းများ အညှိုးအတေးများနှင့် မကျေမနပ်ဖြစ်ခြင်းများဆိုသည့် ဗျာပါဒ၊ ပျင်းရိခြင်း ထိုင်းမှိုင်းခြင်းဆိုသည့် ထိနမိဒ္ဓ၊ စိတ်ပျံ့လွင့်ခြင်းများ မတည်မငြိမ် ဖြစ်ခြင်းများဆိုသည့် ဥဒ္ဓစ္စကုက္ကုစ္စနှင့် ကျင့်စဉ်အပေါ် သံသယဝင်ခြင်းဆိုသည့် ဝိစိကိစ္ဆာ စသည်တို့မှာ နိဝရဏ ငါးပါးတို့ပင် ဖြစ်သည်။</p> <p>သည်းခံခြင်းဆိုသည်မှာ ထိုနီဝရဏများအား သည်းခံရခြင်း ဖြစ်သည်။ သည်းခံခြင်းဆိုသည်မှာ လမ်းစဉ်ကို လျှောက်လမ်းရန် စိတ်ဓာတ်အား ထုထစ်ရသည့် အဆင့်တစ်ဆင့်ဟု ဖခင်ဖြစ်သူက ပြောခဲ့ဖူးသည်။ ထိုသည်မှာ ဈာန်တန်ခိုးကျင့်ရန်တွင်လည်း အခြေခံများပင် ဖြစ်လေရာ အနွယ်တော်အတွက် ရင်းနှီးပြီးသား အရာများပင် ဖြစ်သည်။</p> <p>အနွယ်တော်သည် ရှေ့ဆက်ရမည့် လမ်းကို မြင်နေရပြီ ဖြစ်၍ လျှောက်လှမ်းရန် မခက်ခဲတော့ပေ။ စိတ်ဓာတ်အား ထုထစ်ရာတွင် စိတ်စွမ်းအားကို အဓိကသုံးသော သမထကျင့်စဉ်ထက် မည်သည့်ကျင့်စဉ်မျှ ပိုမကောင်းနိုင်ပေ။</p> <p>ထိုသို့ဖြင့် အနွယ်တော်သည် စိတ်အား တဖြည်းဖြည်း ပုံဖော်ကာ ထုထစ်လေသည်။ စိတ်ကို မိမိအလိုကျ ထိန်းချုပ်နိုင်ပြီဆိုပါက သည်းခံခြင်းအဆင့် အောင်မြင်ပြီ ဖြစ်လေသည်။</p> <p>အချိန်များမှာ တရွေ့ရွေ့ ကုန်ဆုံးနေလေသည်။ ညနေစောင်းသို့ ရောက်လာချိန်တွင် စောရဝိဇ္ဇာသည် သားဖြစ်သူ ပြန်မလာသဖြင့် လိုက်ရှာနေသည်။ သူ လိုက်ရှာနေရင်း ရေခပ်သွားသည့် ရသေ့ငယ်များ ပြောပြသဖြင့် အနွယ်တော်က မြစ်ငယ်ဘေး၌ တရားထိုင်နေကြောင်း သိလိုက်ရသည်။ စောရဝိဇ္ဇာသည် အနွယ်တော် ရှိနေသည့် နေရာအား သိလိုက်သည်နှင့် ချက်ချင်း ထွက်လာခဲ့သည်။</p> <p>စောရဝိဇ္ဇာ မြစ်ကမ်းဘေး ရောက်လာသည်တွင် အနွယ်တော်အား လှမ်းမြင်လိုက်ရသည်။ သူ သားဖြစ်သူ အနား ရောက်လာသောအခါ တအံ့တဩ ဖြစ်သွားလေသည်။</p> <p>"သည်းခံခြင်း အဆင့်ကို ရောက်တော့မှာပဲ။ လောကဦး ကြာပန်းက မွေးဖွားပေးလိုက်တဲ့ ကလေးလို့ မပြောရဘူး တကယ် ပါရမီ ရှိတာပဲ" စောရဝိဇ္ဇာ အံ့အားသင့်စွာ ရေရွတ်မိသည်။</p> <p>သူသည်လည်း အထက်ဘုံတွင် ပါရမီရှင်စာရင်း၌ ထိပ်ဆုံးက ပါရှိလေသည်။ သူပင် သည်းခံခြင်း အဆင့်သို့ ရောက်ရန် ဆယ်ရက်ခန့် ကြာခဲ့သည်။ ကွာခြားချက်က ကြီးမားလွန်းပေသည်။ စောရဝိဇ္ဇာ တစ်ချက် ပြုံးကာ ခေါင်းယမ်းရင်း နေရာတွင် ထိုင်ကာ အနွယ်တော်အား စောင့်နေလိုက်သည်။</p> <p>နောက်ထပ် တစ်နာရီခန့် အကြာတွင် အနွယ်တော် မျက်လုံးဖွင့်လာခဲ့သည်။ သူ မျက်လုံးဖွင့်လိုက်သည်နှင့် မျက်ဝန်းထဲမှ ရွှေရောင့်ဖျော့ဖျော့လေး တစ်ချက် လက်သွားသည်။ ထိုအရာမှာ သိသာအောင် မရှိသဖြင့် မည်သူမျှ သတိမထားမိလိုက်ပေ။</p> <p>"သား ကျင့်စဉ်ဖြုတ်လိုက်ပြီပဲ။ သည်းခံခြင်း အဆင့် ရောက်တာ ဘယ်လိုလဲ" စောရဝိဇ္ဇာ အပြုံးဖြင့် မေးလိုက်သည်။</p> <p>"သားတစ်ကိုယ်လုံး ငြိမ်ကျသွားတယ် အဖေ။ အရင်က မမြင်တာတွေကို အခု မြင်နိုင်သွားတယ်။ လောကကြီးက ပိုပြီး အဓိပ္ပါယ်ရှိသွားသလိုပဲ" အနွယ်တော် သူ့ခံစားချက်များကို ပြောပြလိုက်သည်။</p> <p>"သည်းခံခြင်းဆိုတာ ဒါပဲ။ စိတ်က ငြိမ်သွားရင် တစ်ခုချင်းကို သေချာ အာရုံစိုက်နိုင်တာမို့ အရင်က မမြင်ခဲ့တာတွေကို မြင်လာတာပေါ့" စောရဝိဇ္ဇာက သေချာ ရှင်းပြလိုက်သည်။</p> <p>အနွယ်တော် ခေါင်းညိတ်ကာ ထောက်ခံလိုက်သည်။ သူသည်လည်း ထိုအရာကို သတိထားမိပေသည်။</p> <p>"ဒါဆို နောက်တစ်ဆင့်အတွက် သား ရွေးချယ်ရတော့မယ်။ လောကကြီးဆီက စွမ်းအင်တွေကို စုပ်ယူပြီး အဆင့်တက်မလား၊ ကိုယ်တိုင် စွမ်းအင်လုပ်ပြီး အဆင့်တက်မလားဆိုတာ သား ရွေးချယ်ရတော့မယ်။ သူ့လမ်းနဲ့သူတော့ အကောင်း အဆိုး ရှိတယ်။ ဒီရွေးချယ်မှုက သားဘဝကို အဆုံးအဖြတ် ပေးမှာမို့ သား အချိန်ယူပြီး စဉ်းစားသင့်တယ်" စောရဝိဇ္ဇာက အလေးအနက် ရှင်းပြသည်။</p> <p>"စဉ်းစားစရာ မလိုတော့ပါဘူး အဖေ။ သား ကိုယ်တိုင်ပဲ စွမ်းအားလုပ်မယ်၊ သိဒ္ဓိတင်မယ်။ ဒါက အကောင်းဆုံး လမ်းကြောင်းဆိုမှတော့ အကောင်းဆုံးကို ရွေးချယ်မယ်" အနွယ်တော် ယုံကြည်ချက်ရှိစွာ ပြောလိုက်သည်။</p> <p>"ကောင်းပြီ သား။ ငါ့သားဖြစ်ချင်တာကို အဖေက ဘေးကနေ ပံ့ပိုးပေးမှာပါ။ သား ရှေ့ဆက်မယ့် လမ်းကို ရဲရဲသာ လျှောက်လမ်းပါ" စောရဝိဇ္ဇာ စကားပြောပြီးသည်နှင့် ရင်ဘတ်ထဲမှ စာအုပ်တစ်အုပ်အား ထုတ်ယူလိုက်သည်။</p> <p>"ဒါက အဖေ လျှို့ဝှက်နေရာက တွေ့ခဲ့တဲ့ သိုင်းပညာပဲ။ အဖေကိုယ်တိုင်တော့ ပညာရပ်ရဲ့ လိုအပ်ချက်ကြောင့် လေ့ကျင့်လို့ မရခဲ့ဘူး။ ဒါကြောင့် အဖေ ပညာရပ်တစ်ခုလုံးကို အလွတ်ကျက်ထားခဲ့တာ။ ဒါက အဖေ ကျက်ထားတာတွေ ချရေးထားတဲ့ စာအုပ်ပဲ။ ရော့... သား ယူလိုက်" စောရဝိဇ္ဇာက သိုင်းပညာကို အနွယ်တော်အား ပေးလိုက်သည်။</p> <p>အနွယ်တော် စာအုပ်ကို ယူကာ မျက်နှာဖုံးတွင် ရေးထားသည့် နာမည်အား ဖတ်ကြည့်လိုက်သည်။</p> <p>"နှောင်ကြိုးမဲ့ ဓားသိုင်း ၉ ကွက် ဆိုပါလား။ စိတ်ဝင်စားစရာပဲ" အနွယ်တော် ဓားပညာရပ် နာမည်အား ရေရွတ်ကာ စာအုပ်ကို လှန်ကြည့်လိုက်သည်။</p> <p>မိတ်ဆက်တွင် ဖော်ပြထားသည်မှာ ဤပညာရပ်အား လေ့ကျင့်ရန်အတွက် အလင်းရောင်ကို ကိုယ်စားပြုသည့် အရှိန်အဝါ ရှိရမည်ဟု ဆိုထားသည်။ ကိုယ်စားပြု အရှိန်အဝါဆိုသည်မှာ လူတစ်ယောက်၏ စိတ်ဓာတ်အပေါ် မူတည်၍ ထွက်ပေါ်လာသော အရှိန်အဝါပင် ဖြစ်သည်။</p> <p>အလင်းရောင်ဆိုသည်မှာ အမှောင်ကို ခွင်းသည့် ဓာတ်တစ်မျိုး ဖြစ်သည်။ ဆိုလိုသည်မှာ ဤပညာရပ်အား လူကောင်းများသာ လေ့ကျင့်နိုင်မည် ဖြစ်သည်။ အနွယ်တော်အတွက် ထိုပညာရပ်မှာ လွန်စွာ ကိုက်ညီပေသည်။</p> <p>"အဖေက သားကို အတော် အထင်ကြီးနေတာပဲ။ သားက တကယ်ပဲ လူကောင်းဖြစ်မှာလားဆိုတာ မသေချာဘူးလေ။ အနာဂတ်ဆို ဘယ်သူမှ ကြိုမသိနိုင်ဘူးလေ။ တချိန်ချိန်ရောက်ရင် သားလည်း ဆိုးချင်း ဆိုးသွားနိုင်တာပဲ" အနွယ်တော်က အပြုံးဖြင့် ပြောသည်။</p> <p>"ကိုယ့်သားအကြောင်း ကိုယ်မသိရင် အဖေ လုပ်နေတာ အလကား ဖြစ်သွားမှာပေါ့။ အဖေက သား အဖေပါကွာ။ ငါ့သားက အမှောင်ထဲမှာ လုံးဝ နေမှာ မဟုတ်ဘူး" စောရဝိဇ္ဇာက သေချာစွာ ပြောသည်။</p> <p>"အဖေ မျက်နှာပျက်အောင် သား မလုပ်ပါဘူး အဖေရယ်။ ဒီပညာရပ်ကို သား တန်ဖိုးထားပြီး သုံးပါ့မယ်" အနွယ်တော် ခေါင်းညိတ်ကာ ပြောလိုက်သည်။</p> <p>"ကဲ... စကားပြောနေတာ တော်လောက်ပြီ။ ညစာ စားချိန်ရောက်ပြီ။ သား နေ့လယ်စာတောင် မစားရသေးဘူး မဟုတ်လား။ အဖေ ဒီည သားကြိုက်တဲ့ ကြက်သားဟင်း ချက်ထားတယ်။ လာ ပြန်ရအောင်" စောရဝိဇ္ဇာ ထရပ်ကာ ဂိုဏ်းဆီ ဦးတည်လိုက်သည်။</p> <p>အနွယ်တော်သည်လည်း စာအုပ်ကို ရင်ဘတ်ထဲကာ ဖခင်နောက်မှ လိုက်လာခဲ့တော့သည်။</p> <p> </p> <p style="text-align: center;"> </p> <p style="text-align: center;"> </p> <p style="text-align: center;">***</p>


Save