Book List

<h2 style="text-align: center;">အခန်း (၄၁၃)</h2> <h2 style="text-align: center;">*</h2> <p> </p> <p> </p> <p> </p> <p style="text-align:justify">ဂိုးသမား အလီဆန်သည် ပုံမှန်အားဖြင့် စိတ်သဘောထား နူးညံ့သိမ်မွေ့သူ ဖြစ်ပြီး အသင်းဖော်များကို လူပုံအလယ်တွင် ဆဲဆိုကြိမ်းမောင်းလေ့ရှိသူ မဟုတ်ပေ။ သို့သော် ယခုအချိန်တွင်မူ လီဗာပူး၏ ခံစစ်အခြေအနေမှာ ကြည့်မရနိုင်လောက်အောင် ဆိုးရွားနေချေပြီ။ </p> <p style="text-align:justify">မန်ချက်စတာ ယူနိုက်တက်အသင်းက လီဗာပူးဂိုးပေါက်ကို ထိရောက်သော ခြိမ်းခြောက်မှု ဘယ်နှစ်ကြိမ်တောင် ပြုလုပ်ခဲ့ပြီးပြီလဲ…။</p> <p style="text-align:justify">အလီဆန်သည် သူ၏လက်သီးဖြင့် ဂိုးတိုင်ကို အရှိန်အကုန်လွှဲကာ ဝုန်းခနဲ ထုလိုက်ပြီးနောက် ဒေါသတကြီး အော်ဟစ်လိုက်တော့သည်။</p> <p style="text-align:justify">"သူတို့ကို မတားနိုင်ရင် နည်းဗျူဟာမြောက် ဖောင်းဘော လုပ်ပြီးတော့ပဲဖြစ်ဖြစ် တားကြစမ်းပါဗျာ... ဒီအတိုင်း လွယ်လွယ်ကူကူ အကန်မခံကြနဲ့"</p> <p style="text-align:justify">လီဗာပူးအသင်းသည် ယနေ့ပွဲတွင် ခံစစ်ပိတ်ကစားရန် ဆုံးဖြတ်လိုက်သည့် အချိန်ကတည်းကပင် အစစအရာရာ လွဲချော်နေခဲ့သည်ဟု သူခံစားနေရသည်။ အသင်းတိုင်းတွင် ကိုယ်ပိုင်ဟန် ရှိကြသည်မှာ ဓမ္မတာပင်။ </p> <p style="text-align:justify">အကယ်၍ အခြားသူ၏ ပုံစံကို အတင်းအဓမ္မ လိုက်လံတုပရန် ကြိုးစားပါက ဆိုးကျိုးများသာ ဖြစ်ထွန်းလာတတ်သည်။ ဥပမာအားဖြင့် လီဗာပူးသည် ပြိုင်ဘက်ကို အတင်းလိုက်ဖိကစားသည့် နည်းစနစ်ကြောင့် လူသိများသော်လည်း ယခုမူ မိမိတို့ဘက်ခြမ်းတွင်သာ ခံစစ်ကို အတင်းပိတ်ထားရန် ကြိုးစားနေခြင်းက မြင်းကို သုံး၍ လည်ထွန်သကဲ့သို့ အခြေအနေမျိုး ဖြစ်နေချေပြီ။</p> <p style="text-align:justify">ဟန်ဒါဆန်က မျက်နှာပေါ်မှ မိုးရေများကို သုတ်လိုက်ရင်း ခပ်တိုးတိုး ဆိုလိုက်သည်။</p> <p style="text-align:justify">"ငါ့အမှားပါ... ငါက မန်ယူ နံပါတ် (၇) ကိုပဲ အာရုံစိုက်နေမိလို့ တခြားပြေးဝင်လာတဲ့ ကစားသမားတွေကို သတိမထားမိလိုက်ဘူး..."</p> <p style="text-align:justify">မန်ချက်စတာ ယူနိုက်တက်၏ ၄-၂-၃-၁ ကစားကွက်မှာ ရက်ရှ်ဖို့ဒ် တစ်ယောက်တည်းကိုသာ လူစားလဲထားခြင်း ဖြစ်သော်လည်း ကွင်းအတွင်း အခြေအနေတစ်ခုလုံးကို ပြောင်းပြန် လှန်ပစ်လိုက်နိုင်သည်။ ရှေ့သို့ အဆက်မပြတ် ပြေးဝင် တိုက်စစ်ဆင်နေသော ကစားသမားများကြောင့် လီဗာပူးခံစစ်မှာ မည်သူ့ကို ထိန်းရမည်မှန်း မသိလောက်အောင် ဖြစ်နေရသည်။</p> <p style="text-align:justify">ဗန်ဒိုက်ကလည်း သူ၏ နားထင်ကို လက်ဖြင့် ဖိနှိပ်လိုက်ရင်း အလေးအနက် သတိပေးလိုက်ရသည်။<br /> "နောက်တစ်ခုက ခံစစ်တန်းကို အရမ်း နောက်မဆုတ်ကြနဲ့... အခု မန်ယူရဲ့ အဓိက တိုက်စစ်မှူးက ချူဖုန်း မဟုတ်ဘူး။ နံပါတ် (၁၀) လူကာကူ ဖြစ်နေတာ..."</p> <p style="text-align:justify">လီဗာပူးနှင့် မန်ယူသည် အကြိမ်ကြိမ် တွေ့ဆုံဖူးသည့် ပြိုင်ဘက်ဟောင်းများ ဖြစ်ကြသဖြင့် ဗန်ဒိုက် အနေဖြင့် ချူဖုန်းကို ထိန်းချုပ်ရန်သာ ကျင့်သားရနေခဲ့ပြီး ယခုကဲ့သို့ လူကာကူနှင့် ရုတ်တရက် ရင်ဆိုင်ရချိန်တွင် အသားမကျ ဖြစ်နေခြင်းပင်။</p> <p style="text-align:justify">"သူက ဘယ်လို ခြိမ်းခြောက်မှုမျိုး ပေးနိုင်မှာမို့လို့လဲ"</p> <p style="text-align:justify">အလီဆန်မှာ ဂိုးပေါက်ကို အကြိမ်ကြိမ် ခြိမ်းခြောက်ခံထားရသဖြင့် စိတ်တိုနေသည်မှာ သိသာလှသည်။ သူက လူကာကူကို လက်ညှိုးထိုးပြရင်း ဒေါသတကြီး ဆက်ပြောလိုက်သည်။</p> <p style="text-align:justify">"သူ့ကိုထိန်းဖို့ မင်းတို့ထဲက နှစ်ယောက် သုံးယောက်လောက် လိုနေပြီ... ခုနက ကန်ချက်ဆိုရင် ဝင်သွားဖို့ လက်မတင်လေးပဲ လိုတော့တာ။ မင်းတို့ လူကျွံထောင်ချောက်ကိုပဲ သေချာဂရုစိုက်... ကျန်တာကို ငါ့ကိုထားခဲ့"</p> <p style="text-align:justify">အလီဆန်သည် ဒီဂီယာကဲ့သို့ ဂိုးစည်းပေါ်တွင်သာ ငြိမ်ရပ်နေတတ်သူ မဟုတ်ဘဲ ဂိုးဧရိယာအတွင်းမှ ထွက်၍ ကာကွယ်ရန် ဝန်မလေးသူဖြစ်သည်။ ဘောလုံးဆီသို့ ထွက်လာမည့် အချိန်နှင့် ဆုံးဖြတ်ချက်ပေးမှုမှာ သူသည် ပရီးမီးယားလိဂ်တွင်သာမက ဥရောပတွင်ပါ ထိပ်တန်း ဂိုးသမား ၃ဦး စာရင်း အတွင်း ဝင်သူ ဖြစ်သည်။ </p> <p style="text-align:justify">မိမိ၏ ခံစစ်ကစားသမားများ၏ တည်နေရာကို ကြည့်ပြီးမှ အဝေးသို့ ထွက်၍ ကာကွယ်ရမည်လား၊ အနီးကပ် ထွက်ရမည်လား ဆိုသည်ကို သူက ကျွမ်းကျင်စွာ ဆုံးဖြတ်နိုင်သည်။ ထို့အပြင် ဘေးတိုက်လဲကာ ကာကွယ်ခြင်းနှင့် "K-type block" နည်းစနစ်များတွင်လည်း သူက အထူးကျွမ်းကျင်သူ ဖြစ်သည်။ လီဗာပူး၏ အတင်းလိုက်ဖိသည့် နည်းစနစ် အောင်မြင်ရခြင်းမှာ အလီဆန်၏ တစ်ဦးချင်း ရင်ဆိုင်ကာကွယ်နိုင်စွမ်းကြောင့်လည်း ပါဝင်နေ၏။</p> <p style="text-align:justify">ဗန်ဒိုက်က ခေါင်းညိတ်လိုက်ပြီး - "ငါ့နေရာကို ကြည့်ထား... လူကျွံထောင်ချောက်ကို ဆင်မယ်။ ပြီးရင် မန်ယူ နံပါတ် (၁၀) ကို လွှတ်ထားလိုက်..." ဟု ပြန်ပြောလိုက်သည်။ သူသည်လည်း လူကာကူကို ထိန်းရန် အတွက် ခံစစ်အင်အားကို အလွန်အကျွံ သုံးနေခြင်းက အလဟဿ ဖြစ်သည်ဟု ခံစားနေရသည်။</p> <p style="text-align:justify">လူကာကူကတော့ ထိုစကားများကို ကြားနေရသော်လည်း ဘာမှမသိသလိုပင် ငြိမ်သက်စွာ ရပ်နေလိုက်သည်။ သူ့ကို ဘယ်သူမှ ဂရုမစိုက်လေ ပိုကောင်းလေပင်။ </p> <p style="text-align:justify">လူကျွံထောင်ချောက် ဆင်မည်ဟု ဆိုသော်လည်း အရည်အသွေးမြင့် တိုက်စစ်မှူးများ ဆိုသည် လူကျွံထောင်ချောက်ကို ဖောက်ထွက်နိုင်သည်သာ မဟုတ်ပါလား။ သူက ကြည့်ရသည်မှာ အနည်းငယ် အေးတိအေးစက် ရှိသော်လည်း ယူရို သန်း (၆၀) တန် ကစားသမား တစ်ဦး ဖြစ်သလို ဉာဏ်လည်း ကောင်းပေသည်။</p> <p style="text-align:justify">လီဗာပူးသည် ပွဲအတွင်း အပြောင်းအလဲလုပ်နိုင်စွမ်း အလွန်ကောင်းမွန်သော အသင်းဖြစ်သည်။ နည်းဗျူဟာ သတ်မှတ်ပြီးသည်နှင့် ကစားသမားတိုင်းက တုံ့ဆိုင်းမနေဘဲ အစွမ်းကုန် အကောင်အထည်ဖော်ကြသည်။</p> <p style="text-align:justify">"လီဗာပူးက တိုက်စစ်လမ်းကြောင်းကို ပြောင်းလိုက်ပြီး မာနေးကို ဘယ်တောင်ပံကနေ တစ်ဦးချင်း စွမ်းဆောင်ရည် သုံးပြီး ထိုးဖောက်ခိုင်းနေတယ်... ဒါပေမဲ့ ဒါက ခန္ဓာကိုယ်အတွက် အရမ်း ဝန်ပိစေမှာ မဟုတ်ဘူးလား..." ဟု ကာရေဂါက သုံးသပ်ပြသည်။</p> <p style="text-align:justify">လီဗာပူး၏ ကွင်းလယ်မှာ ဒီဘရိုင်းကဲ့သို့ တီထွင်ဖန်တီးနိုင်စွမ်း နည်းနေသဖြင့် တိုက်စစ်မှူးများကသာ ကိုယ်တိုင် အားထုတ်နေရ၏။ ထိုသို့ ပြုလုပ်ခြင်း၏ နောက်ဆက်တွဲ ဆိုးကျိုးမှာ ကစားသမားများ ပင်ပန်းနွမ်းနယ်လာချိန်တွင် တိုက်စစ်မှာ လုံးဝ ရပ်တန့်သွားနိုင်ခြင်းပင်။ </p> <p style="text-align:justify">ဝမ်-ဘစ်ဆာကာသည် မနေ့ညက အိပ်ရေးပျက်ထားသဖြင့် မာနေးကို ရင်ဆိုင်ရန် စိုးရိမ်နေသော်လည်း တကယ်တမ်းတွင်မူ မာနေးမှာလည်း အခြေအနေ သိပ်မဟန်လှပေ။ ဆီနီဂေါ ကြယ်ပွင့် မာနေးသည် ယခုရာသီတွင် အဆက်မပြတ် ကစားထားရသဖြင့် ကြွက်သားဒဏ်ရာ ပြဿနာများနှင့် ရုန်းကန်နေရသည်။ ဝမ်-ဘစ်ဆာကာက သိပ်အားထုတ်စရာမလိုဘဲ မာနေးဆီမှ ဘောလုံးကို ဖျက်ထုတ်နိုင်ခဲ့သည်။</p> <p style="text-align:justify">"ဟေး... ဒီနေ့ မန်ယူရဲ့ ခံစစ်က မဆိုးဘူးပဲနော်... ပထမအကျော့တုန်းကလို ဖိအားတွေ မရှိတော့ဘဲ စိတ်အေးလက်အေး ရှိပုံရတယ်..." ဟု နဗီးလ်က ဆိုသည်။</p> <p style="text-align:justify">သူက ခဏမျှ စဉ်းစားပြီးမှ ဆက်ပြောလိုက်သည်။</p> <p style="text-align:justify">"ဒါက ပြီးခဲ့တဲ့ အပတ်က ကစားခဲ့တဲ့ လိဂ်ပွဲစဉ်တွေနဲ့ ဆိုင်လိမ့်မယ်... မန်ယူက ဟတ်ဒါဖီးလ်နဲ့ ပွဲမှာ အစောကြီးကတည်းက အသာစီး ရထားခဲ့ပေမဲ့ လီဗာပူးကတော့ နယူးကာဆယ်နဲ့ ပွဲမှာ အနိုင်ရဖို့ အစွမ်းကုန် ရုန်းကန်ခဲ့ရတာ... အိုရီဂီရဲ့ မိနစ် ၈၆ ဂိုးသာ မရှိရင် လီဗာပူးတို့ သုံးမှတ် ရမှာ မဟုတ်ဘူး... အဲဒီပွဲမှာ ဆာလာဆိုရင် ခေါင်းထိခိုက်ပြီး ဦးနှောက် တုန်ခါမှုပါ ဖြစ်ခဲ့တာ... သူ ဒီနေ့ပွဲ ပါဝင်နိုင်တာကိုက အံ့သြစရာပဲ..."</p> <p style="text-align:justify">တစ်ပတ်အတွင်း သုံးပွဲကစားရခြင်းက ကစားသမားများ၏ ကြံ့ခိုင်မှုကို ပြင်းပြင်းထန်ထန် ထိခိုက်စေသည်။ နယူးကာဆယ် အသင်း၏ နည်းပြမှာ လီဗာပူးကို အစ္စတန်ဘူလ် အံ့ဖွယ်ပွဲစဉ်ဖြင့် အောင်မြင်မှု ပေးခဲ့သော ရာဖေးလ် ဘင်နီတက်ဇ် ဖြစ်သော်လည်း သူသည် လီဗာပူးကို အလျှော့ပေးခဲ့ခြင်း မရှိပေ။ </p> <p style="text-align:justify">ဘောလုံးလောကတွင် ဘင်နီတက်ဇ်သည် နည်းဗျူဟာအတွက် အစွဲအလမ်း အလွန်ကြီးသူဖြစ်သဖြင့် မည်သည့်အခါမျှ အလျှော့ပေးလေ့ မရှိသူလည်း ဖြစ်သည်။</p> <p style="text-align:justify">လီဗာပူး၏ တိုက်စစ်မှာ ရပ်တန့်မသွားသေးဘဲ ဘောလုံးက ဟန်ဒါဆန်ဆီသို့ ရောက်လာသည်။ ဟန်ဒါဆန်က ဘောလုံးကို လက်ခံရင်း လှည့်ထွက်ရန် ကြိုးစားချိန်တွင် ဟာရဲရားနှင့် ထိပ်တိုက် တိုးမိလေသည်။ ဒိုင်လူကြီးက မန်ယူအသင်း ပြစ်ဒဏ်ကျူးလွန်သည်ဟု ဆိုကာ ဝီစီမှုတ်လိုက်သော်လည်း ဟန်ဒါဆန်မှာတော့ ဒူးကိုကိုင်ကာ မြေပြင်ပေါ်တွင် နာကျင်စွာ လဲကျနေချေပြီ။</p> <p style="text-align:justify">"ဒါက သတင်းဆိုးပဲ... ဟန်ဒါဆန်က ဒူးဒဏ်ရာဟောင်း ရှိသူလေ... ပွဲတွေ ဆက်တိုက် ကစားနေရတော့ ဒဏ်ရာဟောင်း ပြန်ပေါ်လာတာ ဖြစ်နိုင်တယ်..." </p> <p style="text-align:justify">ကာရေဂါက စိုးရိမ်တကြီး ပြောလိုက်သည်။ လီဗာပူးအတွက် အခြေအနေများက တဖြည်းဖြည်း ပြောင်းလဲလာနေချေပြီ။</p> <p style="text-align:justify">ဟန်ဒါဆန်သည် ကွင်းပြင်သို့ ထွက်၍ စစ်ဆေးမှု ခံယူရသည်။ ထိုအချိန်တွင် မန်ယူအသင်းက အားကစား စိတ်ဓာတ် ပြသသောအားဖြင့် တိုက်စစ်ကို လျှော့ချပေးခြင်း မရှိဘဲ ပို၍ပင် ဖိအားပေးလာသည်။ </p> <p style="text-align:justify">လီဗာပူးသည် လူမစုံသော်လည်း အံကြိတ်ကာ ခံစစ်ကို ငါးမိနစ်ခန့် ခိုင်ခိုင်မာမာ ပိတ်ထားနိုင်ခဲ့သည်။ ဟန်ဒါဆန်သည်မူ နာကျင်နေသော်လည်း အသင်းအတွက် ဆက်လက် ကစားမည်ဟု ဆုံးဖြတ်ကာ ကွင်းထဲသို့ ပြန်ဝင်လာခဲ့သည်။ သူသည် ဂျရတ်ကဲ့သို့ပင် အသင်းကို အစွမ်းကုန် ကာကွယ်လိုသူ ဖြစ်သည်။</p> <p style="text-align:justify">ဟန်ဒါဆန် ပြန်ပါလာသော်လည်း ပွဲက လီဗာပူးအတွက် အကျပ်အတည်း ဆိုက်နေပြန်သည်။ လီဗာပူး၏ အတင်းလိုက်ဖိသည့် ကစားဟန်က မန်ယူကို ကစားကွက် တည်ဆောက်ရန် ခက်ခဲစေသော်လည်း လီဗာပူး ကစားသမားများ ပင်ပန်းလာခြင်းက မန်ယူအတွက် အခွင့်အရေး ဖြစ်လာသည်။ ပွဲချိန် ၃၁ မိနစ်တွင် လီဗာပူး၏ ဖိအားပေးမှု လျော့ကျသွားပြီး မန်ယူက ကွင်းလယ်မှတစ်ဆင့် တိုက်စစ်ကို စတင် ပုံဖော်တော့သည်။</p> <p style="text-align:justify">ချူဖုန်းက ကွင်းလယ်သို့ ဆင်း၍ အကူအပေးပြုလုပ်ပြီး ပေါ့ဘာဆီသို့ ဘောလုံး ပေးပို့လိုက်သည်။ ထို့နောက် သူက မာတစ်၏ အနောက်ဘက်သို့ လျှပ်စီးကဲ့သို့ ပြေးဝင်သွား၏။ </p> <p style="text-align:justify">အာနိုးလ်မှာ ချူဖုန်းကို ကြည့်မနေဘဲ ပေါ့ဘာကိုသာ အာရုံစိုက်နေမိသဖြင့် အမှားကြီး မှားသွားတော့သည်။ ပေါ့ဘာက မာတစ်နှင့် ဝမ်းတူး ဘောလုံးပေးပြီး ညာတောင်ပံတွင် နေရာယူလိုက်သဖြင့် လီဗာပူး ခံစစ်ကို ရှုပ်ထွေးသွားစေသည်။ </p> <p style="text-align:justify">ထို့နောက် ဟန်ဒါဆန်၏ အနားမှနေ၍ ချူဖုန်းဆီသို့ မျှောပေးဘော တစ်လုံးကို အကွက်စေ့စေ့ ပေးပို့လိုက်သည်။</p> <p style="text-align:justify">ချူဖုန်းသည် ဘောလုံးကို လက်ခံကာ အရှိန်အကုန်သုံး၍ ပင်နယ်တီ ဧရိယာထဲသို့ တိုးဝင်သွား၏။ သူက ဘယ်ခြေဖြင့် ဂိုး၏ အဝေးထောင့်သို့ ကန်သွင်းလိုက်သော်လည်း အလီဆန်က အံ့သြဖွယ် ပုတ်ထုတ်သွားနိုင်ခဲ့သည်။</p> <p style="text-align:justify">"ဝိုး... အဲဒါ တကယ် နှမြောစရာပဲ" </p> <p style="text-align:justify">ချူဖုန်းက သက်ပြင်းချလိုက်ရင်း ပေါ့ဘာကို လက်မထောင်ပြကာ - "အဲဒီပေးပို့မှုက တကယ်ကို အချိန်ကိုက်ပဲ" ဟု ချီးကျူးလိုက်သည်။</p> <p style="text-align:justify"><br /> ***</p>


Save