Book List

<h2 style="text-align: center;">အခန်း (၄၁၉)</h2> <h2 style="text-align: center;">*</h2> <p> </p> <p> </p> <p> </p> <p style="text-align:justify">ပရိသတ်ပေါင်းများစွာ၏ စောင့်မျှော်မှုကို ရရှိနေသော ပရီးမီးယားလိဂ် နောက်ဆုံးပွဲစဉ်သည် မျက်စိတစ်မှိတ် အတွင်းမှာပင် ရောက်ရှိလာချေပြီ။ မေလ ၁၂ ရက်နေ့၊ နေ့လယ် ၃ နာရီတိတိတွင် ပရီးမီးယားလိဂ်၏ အစဉ်အလာအတိုင်း အသင်းပေါင်း (၂၀)၏ ပွဲစဉ် (၁၀) ပွဲစလုံးကို တစ်ပြိုင်နက်တည်း ယှဉ်ပြိုင်ကစားစေခြင်းဖြင့် ချန်ပီယံဆုအတွက် ရင်ခုန်သံကို နောက်ဆုံးမိနစ်အထိ ဆွဲဆန့်ထားလေသည်။</p> <p style="text-align:justify">အိုးထရက်ဖို့ဒ် ကွင်းကြီးထဲတွင်မူ မန်ယူပရိသတ်များမှာ ချန်ပီယံလိဂ် ဆီမီးဖိုင်နယ်တုန်းကထက် ပို၍ များပြားနေသေးသည်။ နွေရာသီ၏ အပူရှိန်က အထွတ်အထိပ်သို့ ရောက်နေသော်လည်း ပရိသတ်တို့ကတော့ ဂရုမစိုက်နိုင်အား။ သူတို့သည် မြို့၏ လမ်းတကာ၊ အိမ်တကာကို ကျော်ဖြတ်၍ နီရဲသော ဒီရေလှိုင်းကြီးများအသွင် အိုးထရက်ဖို့ဒ်ဆီသို့ ချီတက်လာသည်။ </p> <p style="text-align:justify">မန်ချက်စတာ ယူနိုက်တက်၏ အသင်းဘတ်စ်ကားကြီး တရွေ့ရွေ့ ဝင်ရောက်လာချိန်တွင်တော့ ပရိသတ်တို့၏ အောင်သံဟိန်းဟောက်သံများက လှိုင်းလုံးကြီးများပမာ ဆူညံပွက်လော ရိုက်သွားတော့၏။</p> <p style="text-align:justify">"မန်ချက်စတာ ယူနိုက်တက်"</p> <p style="text-align:justify">"မန်ချက်စတာ ယူနိုက်တက်"</p> <p style="text-align:justify">ပရိသတ်တို့၏ အားပေးသံကို ကြားရသောအခါ ချူဖုန်းက ဘတ်စ်ကားပြတင်းပေါက်ကို ဖွင့်ကာ အပြင်သို့ လက်ဝှေ့ယမ်းပြလိုက်ရာ အားပေးသံများမှာ ယခင်ထက် အဆပေါင်းများစွာ ပိုမို ကျယ်လောင်သွားရပြန်သည်။</p> <p style="text-align:justify">မကြာမီမှာပင် ချူဖုန်းသည် စိမ်းလန်းစိုပြေသော မြက်ခင်းပြင်ထက်သို့ ခြေချလိုက်သည်။ ပွဲစရန် အချိန်လိုသေးသဖြင့် ပရိသတ်အများစုမှာ ကွင်းထဲသို့ မရောက်သေးသော်လည်း သစ္စာရှိ ပရိသတ်ကြီးများကတော့ ရောက်ရှိနေကြပြီဖြစ်ကာ မီးခိုးတုတ်များ၊ ပိုစတာများ၊ ဗုံများနှင့် အလံများကို ပြင်ဆင်နေကြပြီ ဖြစ်သည်။ သူတို့အားလုံးသည် (၂၂) ကြိမ်မြောက် လိဂ်ချန်ပီယံဆုကို အောင်ပွဲခံရန် အသင့်ပြင်ထားကြချေပြီ။</p> <p style="text-align:justify">တစ်ဖက်မှ ကာဒစ်ဖ်စီးတီး ပရိသတ်များမှာမူ ဤကဲ့သို့သော ရူးသွပ်မှုကို တစ်ခါမျှ မမြင်ဖူးကြသဖြင့် အနီရောင်လွှမ်းနေသော ပွဲကြည့်စင်ကြီးနှင့် ဆူညံသံများအောက်တွင် သူတို့၏ စိတ်ဓာတ်များမှာ သိသိသာသာ ယိမ်းထိုးနေရသည်။ ဤသည်ကား အိမ်ကွင်းအားသာချက်နှင့် အင်္ဂလန် ထိပ်တန်းကလပ် တစ်ခု၏ အရှိန်အဝါပင် ဖြစ်ပေသည်။</p> <p style="text-align:justify">ဘုန်း…</p> <p style="text-align:justify">သွေးပူလေ့ကျင့်ခန်း လုပ်နေရင်း ချူဖုန်းက မက်တော်မီနေးဆီမှ ပေးပို့လိုက်သော ဘောလုံးကို လက်ခံလိုက်ပြီး ပင်နယ်တီဧရိယာ အစပ်ကနေ ခြေဖမိုးဖြင့် အားပါပါ ကန်လိုက်သည်။ ဘောလုံးက ဂိုးဘားတန်းကို အရှိန်အဟုန်နှင့် သွားမှန်ရာ ဒိန်း ဆိုသည့် အသံကြီးနှင့်အတူ ဂိုးတိုင်တစ်ခုလုံး တုန်ခါသွားပြီး ကန်ချက်၏ ပြင်းအားကို သက်သေပြနေတော့သည်။</p> <p style="text-align:justify">ဂိုးသမား ဒီဂီယာမှာ ရင်တုန်တုန်နှင့် တံတွေးကို ဂလုခနဲ မြိုချလိုက်မိပြီး - "ချူ... မင်း ဒီနေ့ အရမ်း အားပါနေတာပဲ... အဝေးကန်တာတွေ ရပ်ပြီး ဟိုဘက်မှာ သွားကစားပါတော့ကွာ..." ဟု အော်ပြောလိုက်ရသည်။ </p> <p style="text-align:justify">ချူဖုန်း၏ ကန်ချက်မှာ တစ်နာရီလျှင် ၁၁၀ ကီလိုမီတာခန့် အရှိန်ရှိရာ ဒီဂီယာအနေဖြင့် ကာကွယ်နိုင်သော်လည်း လက်ထဲသို့ လာမှန်သည့်အခါ အတော်လေး နာကျင်လှသည် မဟုတ်ပါလား။</p> <p style="text-align:justify">"အဝေးကန်ချက်တွေက ဒီနေ့ အခြေအနေ ကောင်းနေတယ် ဒေးဗစ်... ဒီအတိုင်းပဲ ဆက်ကစားပြီး ခြေစွမ်းကို ထိန်းထားရမယ်" ဟု ပြောကာ ချူဖုန်းမှာ နေရာတွင်ပင် ခုန်ပေါက်နေပြီး နောက်ထပ် အဝေးကန်ချက်များကို ဆက်လက် လေ့ကျင့်နေတော့သည်။ </p> <p style="text-align:justify">ဘောလုံးကစားခြင်းသည် စိတ်အခြေအနေအပေါ် များစွာ မူတည်နေသဖြင့် ယနေ့ကဲ့သို့ အစစအရာရာ အဆင်ပြေနေခြင်းမှာ ချူဖုန်း အကောင်းဆုံး ပုံစံသို့ ရောက်နေခြင်းပင် ဖြစ်သည်။ ချန်ပီယံဆုနှင့် နီးကပ်လာခြင်းက သူ့ကို ပုံမှန်ထက် ပို၍ စိတ်လှုပ်ရှားစေပုံရသည်။</p> <p style="text-align:justify">ဒီဂီယာမှာ မျက်နှာပျက်ပျက်နှင့် ရိုမီရိုဘက်သို့ လှည့်ကာ - "ဆာဂျီယို... ငါ ဗိုက်နည်းနည်း အောင့်လာလို့... ခဏလောက် မင်းပဲ ကြည့်ထားပေးလိုက်ဦး" ဟု ဆိုကာ ရိုမီရို ငြင်းခွင့်ပင် မရလိုက်ခင် ကစားသမားဝင်ပေါက်ထဲသို့ အပြေးကလေး ဝင်သွားတော့သည်။</p> <p style="text-align:justify">တစ်ချိန်တည်းမှာပင်...</p> <p style="text-align:justify">အမေရိကန် အိတ်စပရက်စ်ကွင်းတွင် ဂွာဒီယိုလာသည် ကွင်းဘေး၌ ရပ်နေပြီး "အက်သလက်တီကိုက ရိုဒရီနဲ့ ဆွေးနွေးမှု ဘယ်လိုရှိလဲ" ဟု အာတီတာကို မေးမြန်းနေသည်။ </p> <p style="text-align:justify">အက်သလက်တီကိုက လွှတ်ပေးရန် ဝန်လေးနေသော်လည်း ရိုဒရီကိုယ်တိုင်က မန်စီးတီးသို့ လာလိုသဖြင့် စာချုပ်ဖျက်သိမ်းကြေး ပေးရုံနှင့် အဆင်ပြေနိုင်ကြောင်း အာတီတာက ပြန်ဖြေကြားခဲ့သည်။</p> <p style="text-align:justify">ဂွာဒီယိုလာက ခေါင်းညိတ်လိုက်သော်လည်း သူ၏ စိတ်ထဲတွင်တော့ စိုးရိမ်မှုများ ရှိနေဆဲ ဖြစ်သည်။ အဂူရို၊ ဆေးလ်ဗားနှင့် ဖာနန်ဒင်ဟိုတို့ကဲ့သို့ ကစားသမားကြီးများမှာ အိုမင်းလာပြီဖြစ်၍ အစားထိုးရန် အရေးတကြီး လိုအပ်နေချေပြီ။ အထူးသဖြင့် ထိပ်တန်း ဗဟိုတိုက်စစ်မှူး တစ်ဦး မရှိခြင်းက ဂွာဒီယိုလာ အတွက် အခက်ခဲဆုံး ပြဿနာ ဖြစ်နေသည်။ </p> <p style="text-align:justify">သူသည် တိုက်စစ်မှူးမပါသော ကစားကွက်ကို နှစ်သက်သော်လည်း ပရီးမီးယားလိဂ်တွင် ခံစစ်ပိတ် ကစားသော အသင်းများကို ထိုးဖောက်ရန်မှာ တောင့်တင်းသော ဗဟိုတိုက်စစ်မှူး မပါဘဲ မဖြစ်နိုင်မှန်း သူ နားလည်လာခဲ့ပြီ ဖြစ်သည်။</p> <p style="text-align:justify">ထိုအချိန်တွင် သူ ပထမဆုံး သတိရမိသည်မှာ သူ၏ အနာဂတ် သမက်လောင်း ချူဖုန်းပင် ဖြစ်သည်။ ချူဖုန်းသာ သူ့လက်ထဲတွင် ရှိခဲ့လျှင် မန်ယူတွင် ကစားနေသည်ထက် ပို၍ စွမ်းဆောင်ရည် ပြည့်ဝလာမည်ဟု သူ ယုံကြည်နေမိသည်။ </p> <p style="text-align:justify">"တိုက်စစ်မှူး ဘယ်သူရမလဲ စောင့်ကြည့်ရဦးမှာပဲ... ဂျေဇူးကတော့ သိပ်ပြီး အားကိုးလို့ မရသေးဘူး" ဟု ဂွာဒီယိုလာက မျက်မှောင်ကြုတ်ကာ ဆိုလိုက်သည်။ သူသည် အိမ်ပြန်ရောက်လျှင် သူ၏သမီးမှ တစ်ဆင့် ချူဖုန်း၏ စိတ်ကူးကို စုံစမ်းကြည့်ရန် အစီအစဉ်ဆွဲနေတော့သည်။ </p> <p style="text-align:justify">အကယ်၍ ချူဖုန်းသာ မန်စီးတီးသို့ ရောက်လာခဲ့လျှင် ပရီးမီးယားလိဂ် ချန်ပီယံဆုသာမက ချန်ပီယံလိဂ် သုံးနှစ်ဆက် ရယူနိုင်ရန်မှာလည်း မခဲယဉ်းတော့ဟု သူ တွေးနေမိသည်။</p> <p style="text-align:justify">---</p> <p style="text-align:justify">အန်ဖီးလ်ကွင်းတွင်မူ ကလော့ပ်သည် ကစားသမားများ သွေးပူလေ့ကျင့်ခန်း လုပ်နေသည်ကို ငေးကြည့်နေမိသည်။ လီဗာပူးသည် ယနေ့တွင် ဝုဗ်အသင်းနှင့် ကစားရမှာဖြစ်ပြီး အနိုင်ရရန် မခက်ခဲသော်လည်း ချန်ပီယံဆုအတွက်မူ မန်ယူနှင့် မန်စီးတီးတို့၏ ပွဲရလဒ်ပေါ်တွင်သာ မူတည်နေချေပြီ။</p> <p style="text-align:justify">"နောက်ရာသီမှာတော့ ငါတို့ လူသစ်ဝယ်မှာ မဟုတ်ဘူး... လက်ရှိ အင်အားက တော်တော်လေး ကောင်းနေပြီမို့လို့ ဒဏ်ရာမရအောင်ပဲ ထိန်းချုပ်ရမယ်" </p> <p style="text-align:justify">ကလော့ပ်က ခပ်တိုးတိုး ပြောလိုက်သည်။ လီဗာပူးပိုင်ရှင်များမှာ အလွန်စေးနှဲသူများ ဖြစ်ကြသဖြင့် ရာသီအစတွင် ဖာဘင်ညိုနှင့် အလီဆန်တို့အတွက် အကုန်အကျ ခံထားပြီးဖြစ်ရာ နောက်ထပ် လူသစ်ဝယ်ရန်မှာ အိပ်မက်ပင် ဖြစ်နေချေတော့သည်။</p> <p style="text-align:justify">---</p> <p style="text-align:justify">ဒေသစံတော်ချိန် ညနေ ၃ နာရီသို့ ရောက်သောအခါ...</p> <p style="text-align:justify">ပရီးမီးယားလိဂ်၏ နောက်ဆုံးပွဲစဉ် (၁၀) ပွဲစလုံးကို တစ်ပြိုင်နက်တည်း စတင်လိုက်ချေပြီ။ အိုးထရက်ဖို့ဒ် ကွင်းကြီးထဲတွင်မူ နဗီးလ်နှင့် ဝိန်းရွန်းနီတို့က ဝေဖန်ရေးစင်မြင့်ထက်၌ ရောက်ရှိနေကြသည်။</p> <p style="text-align:justify">နဗီးလ်က မိုက်ခရိုဖုန်းမှတစ်ဆင့် - "အနီရောင် ဝတ်စုံနဲ့ အသင်းကတော့ မန်ချက်စတာ ယူနိုက်တက်ပဲ ဖြစ်ပါတယ်။ သူတို့ရဲ့ ပွဲထွက်လူစာရင်းကို ကြည့်ရအောင်..." ဟု ဆိုကာ မန်ယူ၏ အင်အားအပြည့် ပွဲထွက်လူစာရင်းကို ဖတ်ပြလိုက်သည်။ မော်ရင်ညိုသည် တန်းဆင်းဇုန်နှင့် ရင်ဆိုင်နေရသော ကာဒစ်ဖ်စီးတီး၏ အစွမ်းကို လျှော့မတွက်ဘဲ အတောင့်တင်းဆုံး လူစာရင်းကို ထုတ်သုံးလိုက်ခြင်းပင်။</p> <p style="text-align:justify">"ဒီနေ့ပွဲဟာ မန်ယူအသင်းခေါင်းဆောင် ဗလင်စီယာရဲ့ နောက်ဆုံး လိဂ်ပွဲစဉ်လည်း ဖြစ်ပါတယ်... သူဟာ ဖာဂူဆန်၊ ဗန်ဟားလ်နဲ့ မော်ရင်ညို ခေတ်အဆက်ဆက်ကို ဖြတ်သန်းလာတဲ့ မန်ယူရဲ့ မရှိမဖြစ် ဂန္ထဝင်တစ်ဦးပါပဲ" ဟု နဗီးလ်က ချီးကျူးလိုက်သည်။ </p> <p style="text-align:justify">ဗလင်စီယာသည် အသင်းအတွက် ခြေသလုံးရိုး ကျိုးသည်အထိ တိုက်ပွဲဝင်ခဲ့ဖူးသူဖြစ်သလို အေးဂျင့်က အသင်းပြောင်းရန် တိုက်တွန်းမှုကိုလည်း ပြတ်ပြတ်သားသား ငြင်းဆိုခဲ့သူ ဖြစ်သည်။ သူသည် သူ၏ ခန္ဓာကိုယ်ပေါ်တွင် မန်ယူအသင်း တံဆိပ်ကိုပါ ဆေးမင်ကြောင် ထိုးထားသည်အထိ အသင်းအပေါ် သစ္စာရှိသူ မဟုတ်ပါလား။</p> <p style="text-align:justify">ဘေးတွင်ရှိသော ရွန်းနီသည်လည်း အိုးထရက်ဖို့ဒ်ကွင်းကြီးကို ငေးကြည့်ရင်း ၂၀၀၄ မှ ၂၀၁၇ အထိ သူ ဖြတ်သန်းခဲ့သော နေ့ရက်များကို လွမ်းဆွတ်နေမိသည်။ ပွဲပေါင်း ၅၅၉ ပွဲ၊ ၂၅၃ ဂိုးနှင့် ဆုဖလား ၁၆ လုံး... </p> <p style="text-align:justify">အချိန်များက ရွန်းနီ၏ ဆံပင်များကို ယူဆောင်သွားခဲ့သော်လည်း သူ၏ ငယ်အိပ်မက်များကိုတော့ မဖျက်ဆီးနိုင်ခဲ့ပေ။</p> <p style="text-align:justify">"လူငယ်ဘဝက သိပ်လှတာပဲ... အားနည်းချက်တစ်ခုကတော့ အရမ်းမြန်မြန် ကုန်ဆုံးသွားတာပဲ" ဟု ရွန်းနီက သက်ပြင်းချကာ ဆိုလိုက်သည်။ </p> <p style="text-align:justify">နဗီးလ်ကတော့ ရွန်းနီကို ကြည့်ပြီး - 'မင်းသာ ချူဖုန်းရဲ့ တစ်ဝက်လောက် စည်းကမ်းရှိခဲ့ရင် ၊ ပါတီတွေ လျှော့သွားခဲ့ရင် အသက် ၄၀ အထိ ကစားနိုင်ဦးမှာပဲ' ဟု စိတ်ထဲမှ တွေးနေမိတော့သည်။</p> <p style="text-align:justify">တီ…</p> <p style="text-align:justify">စူးရှသော ဝီစီသံနှင့်အတူ အိုးထရက်ဖို့ဒ်တွင် ပွဲစတင်လိုက်ချေပြီ။ မန်ယူအသင်းသည် ချန်ပီယံဆု အတွက် အချိန်ဆွဲမနေဘဲ တိုက်စစ်ကို တိုက်ရိုက် စတင်တော့သည်။ ကွင်းလယ်တွင် ကန်တေက အခွင့်အရေးကို ဖမ်းဆုပ်ပြီး ပေါ့ဘာဆီသို့ မျှောပေးဘော ထိုးပေးလိုက်သည်။ ပေါ့ဘာက ဘောလုံးကို လက်ခံကာ မန်ယူ နံပါတ် (၇) ဆီသို့ အလိုက်သင့် ပြန်ထုတ်ပေးလိုက်ရာ...</p> <p style="text-align:justify">မန်ယူပရိသတ်တို့၏ ရင်ခုန်သံများ မြန်ဆန်လာချိန်တွင် ချူဖုန်းက ဘောလုံးကို ဆွဲယူကာ ရှေ့က ခံစစ်မှူးနှစ်ဦးကို ထိပ်တိုက် ရင်ဆိုင်လိုက်သည်။ သူက ဘယ်ခြေဖြင့် ဘောလုံးကို ပုတ်ကာ ဟန်ပြလှည့်စားလိုက်ပြီး ညာခြေဖမိုးဖြင့် ကာဒစ်ဖ် နောက်ခံလူ ရိုင်ယန်၏ ခြေထောက်ကြားမှ ဘောလုံးကို တိုးထွက်သွားလေသည်။</p> <p style="text-align:justify">"လှပလိုက်တဲ့ V-shaped လူလိမ်ခေါက်ကွက်ဗျာ"</p> <p style="text-align:justify">"ချူဖုန်းက တောင်ပံကနေ အဆက်မပြတ် ထိုးဖောက်နေပြီ... ဒါဟာ ပြိုင်ဘက်အတွက်တော့ ကြောက်စရာကောင်းတဲ့ ဖျက်ဆီးမှုပဲ"</p> <p style="text-align:justify">နဗီးလ်က အဆုတ်ကွဲမတတ် အော်ဟစ်လိုက်သည်။ ချူဖုန်းသည် ပင်နယ်တီဧရိယာထဲသို့ တိုးဝင်သွားပြီး ဘောလုံးဖြတ်ပေးမည့်ဟန် ပြင်လိုက်ရာ ကာဒစ်ဖ်ဂိုးသမားမှာ ချူဖုန်း၏ အပေးကို ကြောက်ပြီး တစ်ဖက်သို့ ယိုင်သွားတော့သည်။ ထိုအချိန်တွင်မှ ချူဖုန်းက ဂိုးတိုင်နားက ဟာကွက်လေးထဲသို့ အပိုင် ကန်သွင်းလိုက်တော့၏။</p> <p style="text-align:justify">ဘုန်း</p> <p style="text-align:justify">၁ - ၀ </p> <p style="text-align:justify">ပွဲစပြီး ၁ မိနစ် ၄၆ စက္ကန့်မှာတင် မန်ချက်စတာ ယူနိုက်တက်တို့ ဦးဆောင်ဂိုး ရရှိသွားချေပြီ။ ချူဖုန်းသည် နွေရာသီ၏ အပူရှိန်အောက်တွင် လေထဲသို့ မြင့်မားစွာ ခုန်တက်ကာ သူ၏ အမြဲတမ်း အောင်ပွဲခံဟန်အတိုင်း အောင်ပွဲခံလိုက်တော့သည်။</p> <p style="text-align:justify">"ဟေး ဟေး ဟေး"</p> <p style="text-align:justify">ပရိသတ်တို့၏ ဟိန်းဟောက်သံကြီးက ကွင်းတစ်ခုလုံးကို လွှမ်းမိုးသွားသည်။ ချူဖုန်း၏ ဤဂိုးကြောင့် ပရီးမီးယားလိဂ် ဂိုးသွင်းစံချိန်မှာလည်း နောက်ထပ် အဆင့်တစ်ခုသို့ ထပ်မံ မြင့်တက်သွားရပြန်သည်။</p> <p style="text-align:justify">"အံမခန်း စွမ်းဆောင်ရည်ပဲဗျာ။ ချူဖုန်းက မန်ယူအတွက် အိပ်မက်ဆန်တဲ့ အစပြုမှုကို ဖော်ဆောင်ပေးလိုက်ပြီ" ဟု နဗီးလ်က ဆိုကာ ရွန်းနီဘက်သို့ လှည့်၍ - "မင်းရဲ့ ကလပ်ဂိုးသွင်းစံချိန်ကို ချူဖုန်း ချိုးဖျက်ဖို့ ဘယ်လောက်ကြာမယ် ထင်လဲ" ဟူ၍ မေးလိုက်သည်။</p> <p style="text-align:justify">ရွန်းနီမှာတော့ ဆွံ့အသွားရ၏။ သူ၏ ၂၅၃ ဂိုး စံချိန်ကို ချိုးဖျက်ရန်မှာ မက်ဆီ၏ အဆင့်အတန်းမျိုးနှင့်ပင် သုံးရာသီခန့် ကစားရမည် ဖြစ်သော်လည်း ချူဖုန်း၏ တိုးတက်မှုနှုန်းအရ ဆိုလျှင် ၄ ရာသီခန့်ဆိုလျှင် ကျော်တက်သွားနိုင်သည် မဟုတ်ပါလား။ </p> <p style="text-align:justify">သူက ၁၃ နှစ်ကြာအောင် တည်ဆောက်ခဲ့ရသည့် စံချိန်ကို တရုတ်ကောင်လေးက မျက်စိတစ်မှိတ် အတွင်း ကျော်ဖြတ်တော့မည်ဟု တွေးမိသောအခါ ရွန်းနီမှာ စိတ်ပျက်လက်ပျက် ဖြစ်သွားရရှာသည်။</p> <p style="text-align:justify">***</p>


Save