Book List

<h2 style="text-align: center;">အခန်း (၇၄၉) လျှို့ဝှက်ဆန်းကြယ်သော မိန်းမစိုး</h2> <h2 style="text-align: center;">*</h2> <h2 style="text-align: center;"> </h2> <p> </p> <p> </p> <p>"မအော်ပါဘူး... မအော်ပါဘူး... သူရဲကောင်းမိန်းကလေးရဲ့ လက်တော့ မတုန်စေနဲ့နော်၊ " စုန့်ချင်းရှုက အလိုက်အထိုက် ပင် လက်နှစ်ဖက်ကို မြှောက်လိုက်သည်။</p> <p>အနောက်ဘက်ရှိ အမျိုးသမီးမှာ သိသိသာသာ ကြောင်သွားသည်။ ဤ မိန်းမစိုးက ဤမျှလောက် အလွယ်တကူ အညံခံလိမ့်မည် ဟု လုံးဝ မထင်မှတ်ထားခဲ့ပေ၊  အပြင်ပန်းတွင် အလွန် ကြောက်ရွံ့ တုန်လှုပ် နေသည့် ပုံစံ ပြသနေသော်လည်း၊ သူမစိတ်ထင်တော့ ဤ မိန်းမစိုးသည် သူမကို အနည်းငယ်မျှ ကြောက်ရွံ့နေပုံ မရဘူး ဟူသော ထူးဆန်းသည့် ခံစားချက် တစ်ခု ရနေမိသည်။</p> <p>"စကား မများနဲ့၊  နင့်ရဲ့ အခန်းက ဘယ်မှာလဲ... ငါ့ကို မြန်မြန် ခေါ်သွားစမ်း၊ " အမျိုးသမီး၏ အသံက ပိုမို အေးစက်လာပြီး ဓားဖျားကလည်း သူ၏ ကျောပြင်ကို နောက်တစ်ကြိမ် ဖိထောက်လိုက်သည်။</p> <p>စုန့်ချင်းရှုသည် သူမ၏ ဓားပေါ်တွင် သတ်ဖြတ်လိုစိတ် အနည်းငယ်မျှ မခံစားရသဖြင့် မိမိကို ခြောက်လှန့်ရန် သက်သက်သာ ဖြစ်ကြောင်း သိလိုက်သည်။ သို့သော် ယခု သူ့အတွက် ခေါင်းကိုက် စရာ အကောင်းဆုံး ပြဿနာမှာ... ရှောင်ရှင်းကော် ဆိုသည့် မသာပေါ်သွားသည့် မိန်းမစိုးက ဘယ်မှာ နေသလဲ ဆိုတာကို သူ လုံးဝ မသိခြင်း ပင် ဖြစ်သည်!</p> <p>"သူရဲကောင်းမိန်းကလေး..." စုန့်ချင်းရှုသည် သူမနှင့် ညှိနှိုင်း ဆွေးနွေးရန် လိုအပ်သည်ဟု ခံစားလိုက်ရသည်။ လက်ရှိ အခြေအနေ အရ ကြည့်မည် ဆိုလျှင်၊ သူမသည် ယနေ့ည နန်းတော် ထဲသို့ ဝင်ရောက်လာသော လုပ်ကြံသူ ဖြစ်ရန် ဆယ်ပုံ ကိုးပုံခန့် သေချာနေသည်။ သူတို့ နှစ်ဦးစလုံး၏ ရည်ရွယ်ချက်မှာ နန်းတော် ထဲမှ ထွက်ပြေးရန် ဖြစ်ရာ... ရည်မှန်းချက် တူညီနေသဖြင့် အထင်လွဲမှုများကြောင့် အချင်းချင်း ပြန်လည် တိုက်ခိုက်နေရန် မလိုအပ်ပေ၊  ထို့အပြင် သူမသည် နန်းတော် ထဲသို့ ဝင်ရောက် လုပ်ကြံရဲသူ ဖြစ်ရာ၊ မိမိနှင့် ရည်မှန်းချက်တူညီသော သူ တစ်ယောက် ဖြစ်နိုင်ခြေ များသဖြင့် သင့်တော်သလို ကူညီပေးသင့်သည်ဟု တွေးလိုက်သည်။</p> <p>စုန့်ချင်းရှုက နောက်သို့ လှည့်ရန် ပြင်လိုက်စဉ် ထို အမျိုးသမီးက ချက်ချင်း အော်ဟစ် တားမြစ်လိုက်သည်။ "နောက်ကို မလှည့်နဲ့၊ " တစ်ချိန်တည်းမှာပင် ဓားဖျားကလည်း ရှေ့သို့ အနည်းငယ် ထပ်တိုးလာသည်။</p> <p>စုန့်ချင်းရှုက သတိမထားမိအောင် ခန္ဓာကိုယ်ကို အနည်းငယ် ရွှေ့လိုက်သည်။ အကယ်၍ တစ်ဖက်လူက တကယ်ပဲ သတ်ဖြတ်ရန် ကြံရွယ်လာပါက... သူ၏ ကိုယ်တွင်းရှိ ကာကွယ်ရေး အတွင်းအားများက ဓားဖျားကို ချက်ချင်း တွန်းထုတ် ပစ်နိုင်ရန် အတွက် သေချာ ပြင်ဆင်ထားလိုက်သည်။ ထို့နောက်မှ ဆက်လက် မေးလိုက်သည်။ "သူရဲကောင်းမိန်းကလေးက ဘာဖြစ်လို့ ကျွန်တော်ရဲ့ အခန်းကို သွားချင်ရတာလဲ မသိဘူး၊  ညသန်းခေါင်ယံ အချိန်ကြီးမှာ ယောကျ်ားလေး တစ်ယောက်နဲ့ မိန်းကလေး တစ်ယောက်... သိပ်ပြီး အဆင်မပြေဘူး ထင်တယ်။" သူသည် ရှောင်ရှင်းကော် ဘယ်မှာ နေသလဲ ဆိုတာ မသိသဖြင့် နောက်ပြောင် ပြောဆိုကာ အခြေအနေကို အချိန်ဆွဲ နေရုံမှလွဲ၍ အခြား ရွေးချယ်စရာ မရှိပေ။</p> <p>"ယောကျ်ားလေး တစ်ယောက်နဲ့ မိန်းကလေး တစ်ယောက်၊ " ထို အမျိုးသမီးက မနေနိုင်ဘဲ တခစ်ခစ် ရယ်မောလိုက်သည်။ "နင်က မိန်းမစိုး တစ်ယောက် လေ..." ဤနေရာ အရောက်တွင် သူမ ရုတ်တရက် စကား ရပ်သွားသည်။</p> <p>"မိန်းမစိုး ဆိုတော့ရော ဘာဖြစ်လဲ၊ မိန်းမစိုးတွေမှာလည်း လူ့အခွင့်အရေး ရှိတာပဲလေ၊ " စုန့်ချင်းရှုက အလွန် စိတ်ပျက်လက်ပျက် ဖြစ်နေသည့် မျက်နှာထားဖြင့် ပြောလိုက်သည်။</p> <p>"ပါးစပ်ပိတ်ထား၊ လူတွေ လာနေပြီ၊ " ထို အမျိုးသမီးသည် ကျောက်ဆောင်တုများ ကြားသို့ လျှပ်တစ်ပြက် ပြန်လည် ဝင်ရောက် ပုန်းအောင်း သွားသည်ကို စုန့်ချင်းရှု ရှင်းလင်းစွာ ခံစားလိုက်ရသည်။ သို့သော် သူမ၏ ဓားကတော့ သူ၏ ကျောပြင် ပေါ်တွင် ရှိနေဆဲ ပင်၊</p> <p>"ဘယ်လို ပြောရမလဲ ဆိုတာ နင့်ဘာသာ ကြည့်လုပ်၊  မဟုတ်ရင် ငါ့ ဓားက သက်ညှာ နေမှာ မဟုတ်ဘူး၊ " အမျိုးသမီး၏ တမင် အသံ နှိမ့်ထားသော သတိပေး စကားက သူ၏ နားအနီးတွင် ထွက်ပေါ်လာသည်။</p> <p>စုန့်ချင်းရှုက ပြုံးလိုက်ပြီး သိပ်ပြီး ဂရုမစိုက်သည့် ပုံစံဖြင့်... ရှေ့မှ လျှောက်လာသော အစောင့် နှစ်ယောက်ကို အေးအေးဆေးဆေး ကြည့်နေလိုက်သည်။ သူတို့က မိမိကို မေးမြန်း စစ်ဆေး လာပါက... ဘယ်လို ပြန်ဖြေရမလဲ ဆိုတာကို စဉ်းစားနေစဉ်... ထို အစောင့် နှစ်ယောက်က သူ့ကို မြင်လိုက်ရသည်နှင့် မျက်လုံးများ အရောင်လက်သွားပြီး၊ ခပ်သုတ်သုတ် ပြေးလာကာ အလွန် ရိုသေ လေးစားစွာ ဖြင့် နှုတ်ဆက်လိုက်ကြသည်။ "အို... တိုက်ဆိုင်လိုက်တာ၊  ဒီနေရာမှာ ရှင်းကုန်းကုန်းနဲ့ လာဆုံရတယ် လို့၊ "</p> <p>"ဟုတ်ပါရဲ့... ဟားဟား... ဒီနေ့ည ရာသီဥတုက သိပ်ကောင်းတာပဲ..." စုန့်ချင်းရှု၏ မျက်နှာပေါ်တွင် အပြုံးများ ရှိနေသော်လည်း စိတ်ထဲတွင်တော့ ထို အစောင့်ကို ဆဲရေး တိုင်းထွာ နေတော့သည်။ 'မင်း မှ မိန်းမစိုး... မင်း တစ်မိသားစု လုံး မိန်းမစိုး တွေ။'</p> <p>သို့သော် သူ၏ ရင်ထဲတွင် တိတ်တဆိတ် အံ့သြနေမိသည်။ ဤ အစောင့် နှစ်ယောက်၏ ဖားယားနေသော အပြုံးများကို ကြည့်ခြင်းအားဖြင့်၊ ရှောင်ရှင်းကော်သည် နန်းတော် အတွင်း အတော်လေး သြဇာအာဏာ ကြီးမားသူ တစ်ယောက် ဖြစ်ပုံ ရသည်။ သို့ဆိုလျှင်... ဘယ်သူကများ သူ့ကို သတ်ပစ်ရဲသနည်း။</p> <p>ထို အစောင့် နှစ်ယောက်သည် သူ သိပ်ပြီး စိတ်မဝင်စားကြောင်း မြင်သောအခါ အလိုက်တသိ ပင် ဆက်လက် မနှောင့်ယှက်တော့ဘဲ လျင်မြန်စွာ နှုတ်ဆက် ထွက်ခွာသွားကြသည်။ သို့သော် ခြေလှမ်း အနည်းငယ် အလှမ်းတွင် သူတို့က နောက်သို့ ပြန်လှည့်ကြည့်ကာ ပြောလိုက်သည်။ "ရှင်းကုန်းကုန်း... ဒီနေ့ည နန်းတော် ထဲမှာ လုပ်ကြံသူ ဝင်လာလို့၊ အပြင်မှာ သွားလာနေတာ သိပ်ပြီး မလုံခြုံဘူး၊  အခန်းကို စောစော ပြန်ပြီး အနားယူတာ ပိုကောင်းလိမ့်မယ်၊ "</p> <p>"လုပ်ကြံသူ၊ " စုန့်ချင်းရှုက အလွန် စိတ်ဝင်စားသည့် ပုံစံ ဟန်ဆောင်လိုက်သည်။ "နန်းတော် ထဲမှာ အစောင့်တွေ ဒီလောက် အများကြီး ရှိတာတောင်... လုပ်ကြံသူ တစ်ယောက်ကို မဖမ်းနိုင်ဘူးလား၊ "</p> <p>"ရှင်းကုန်းကုန်း မသိလို့ပါ။ အဲဒီ လုပ်ကြံသူက တစ်ယောက်တည်း ဆိုပေမယ့်၊ သိုင်းပညာက အရမ်း မြင့်တယ်။ ကျွန်တော်တို့ ညီအစ်ကိုတွေ အများကြီး သူ့ လက်ချက်နဲ့ ဒဏ်ရာ ရကုန်ပြီ။ နောက်ဆုံးတော့ အကြီးအကဲ ကိုယ်တိုင် ဝင်ပါမှ သူ့ကို ဒဏ်ရာ ရသွားအောင် လုပ်နိုင်ခဲ့တာ၊ " အစောင့် တစ်ယောက်က ပြန်ဖြေလိုက်သည်။</p> <p>"အကြီးအကဲ" စုန့်ချင်းရှုက အဝတ်လျှော်ဆောင်တွင် မိမိနှင့် လက်ရည် ယှဉ်ခဲ့သော ထိုသူကို ချက်ချင်း သတိရသွားသည်။ သူ၏ သိုင်းပညာက တကယ်ကို အလွန် မြင့်မားလှသည်။</p> <p>"ဟီးဟီး... အဲဒီ လုပ်ကြံသူက မိန်းမ တစ်ယောက် လို့ ပြောတယ်။ မျက်နှာကိုတော့ သေချာ မမြင်လိုက်ရပေမယ့်... အဲဒီ ပြီးပြည့်စုံတဲ့ ကိုယ်လုံးကိုယ်ပေါက်ကို ကြည့်ရုံနဲ့တင်... ရုပ်ရည်ကလည်း သေချာပေါက် ဆိုးမှာ မဟုတ်ဘူး၊ " နောက်ထပ် အစောင့် တစ်ယောက်က အလွန် ညစ်ညမ်းသော အပြုံးဖြင့် ပြောလိုက်သည်။</p> <p>စုန့်ချင်းရှုသည် သူ၏ ကျောပြင် နောက်မှ အလွန် ပြင်းထန်သော သတ်ဖြတ်လိုစိတ်များ ထွက်ပေါ်လာသည်ကို ချက်ချင်း ခံစားလိုက်ရသည်။ နောက်က အမျိုးသမီးက ဒေါသ အလျောက် လှုပ်ရှားလိုက်ပြီး လူမိသွားမည်ကို စိုးရိမ်သဖြင့်၊ သူက အလျင်အမြန် လေးနက်သော အသံဖြင့် ဟန့်တားလိုက်သည်။ "မင်းတို့ တွေ သွားပြီး လုပ်ကြံသူကို မရှာဘဲ... ဒီမှာ လာပြီး အတင်း လျှောက်ပြောနေတာ... တကယ်လို့များ အကြီးအကဲသာ ကြားသွားရင် မင်းတို့ ဒုက္ခရောက်လိမ့်မယ်၊ "</p> <p>ထို အစောင့် နှစ်ယောက် အလျင်အမြန် တောင်းပန်လိုက်ကြသည်။ "ရှင်းကုန်းကုန်း ဆုံးမတာ မှန်ပါတယ်။ ကျွန်တော်တို့ မှားသွားပါတယ်။" ပြောပြီးသည်နှင့် အလောတကြီး ထွက်ပြေး သွားကြတော့သည်။</p> <p>အတော်လေး ဝေးဝေးသို့ ရောက်သွားသောအခါ အစောင့် တစ်ယောက်က နောက်တစ်ယောက်ကို တိတ်တဆိတ် အပြစ်တင်လိုက်သည်။ "မင်းရဲ့ ဦးနှောက်က ဘယ်လိုများ ဖြစ်နေတာလဲ၊  မိန်းမစိုး တစ်ယောက်ရဲ့ ရှေ့မှာ သွားပြီး မိန်းမ အကြောင်း လျှောက်ပြောရသလား၊ "</p> <p>"ငါ ကလည်း ညီအစ်ကိုတွေနဲ့ စကားပြောရင်း အကျင့် ပါနေလို့... ပါးစပ်ကနေ လွှတ်ခနဲ ထွက်သွားတာပါ။" ထို အစောင့်မှာလည်း အလွန် နောင်တရနေသည့် မျက်နှာထားဖြင့် ပြန်ပြောလိုက်သည်။</p> <p>သူတို့ နှစ်ယောက်၏ အသံမှာ အလွန် တိုးညင်းလှသဖြင့် ရှောင်ရှင်းကော် အနေဖြင့် ကြားနိုင်မည် မဟုတ်ဟု ယုံကြည်ထားကြသည်။ သို့သော် ယခု ရှောင်ရှင်းကော်မှာ အရင် ရှောင်ရှင်းကော် အစစ် မဟုတ်တော့ကြောင်း သူတို့ ဘယ်လိုလုပ် သိနိုင်မည်နည်း။ စုန့်ချင်းရှု၏ အတွင်းအားနှင့် အကြားအာရုံမှာ အလွန် ကောင်းမွန်သဖြင့်၊ သူတို့ ပြောသမျှကို ရှင်းလင်းစွာ ကြားနေရသည်။ ထို့အပြင်... သူ၏ နောက်ကျောဘက်ရှိ အမျိုးသမီး လုပ်ကြံသူ ကလည်း သေချာပေါက် ကြားလိုက်မည် ဖြစ်သည်။</p> <p>"ဖူး..." ထို အမျိုးသမီး လုပ်ကြံသူမှာ ရယ်ချင်စိတ်ကို မထိန်းနိုင်ဘဲ ရယ်လိုက်မိသော်လည်း လျင်မြန်စွာပင် ပါးစပ်ကို ပြန်အုပ်လိုက်သည်။</p> <p>စုန့်ချင်းရှု ရင်ထဲတွင် အကြံတစ်ခု ရသွားသည်။ 'မင်းက ရယ်ချင်နေတယ် ပေါ့လေ... မင်းကို နည်းနည်းလောက် ခြောက်လှန့်လိုက်တာ ကောင်းမယ်။' ထို့ကြောင့် အသံကျယ်ကျယ်ဖြင့် အော်ခေါ်လိုက်သည်။ "အစောင့် ညီအစ်ကိုတို့၊ "</p> <p>သူ ထင်ထားသည့် အတိုင်းပင်... သူက အစောင့်များကို လှမ်းခေါ်လိုက်သည်နှင့် တစ်ပြိုင်နက်၊ ထို အမျိုးသမီး၏ ဓားဖျားက ရှေ့သို့ အနည်းငယ် ထပ်တိုးလာပြီး တိုးတိုးလေး ဟန့်တားလိုက်သည်။ "နင် ဘာလုပ်မလို့လဲ၊ "</p> <p>စုန့်ချင်းရှုက သူမကို လုံးဝ ဂရုမစိုက်ဘဲ ထိုနေရာတွင် တည်ငြိမ်စွာ ရပ်နေလိုက်သည်။ သိပ်မကြာခင်မှာပင် ထို အစောင့် နှစ်ယောက်က အပြေးလေး ပြန်ရောက်လာကြပြီး၊ အလွန် ဖားယားသော အပြုံးဖြင့် သူ့ကို ကြည့်ကာ မေးလိုက်သည်။ "ရှင်းကုန်းကုန်း... ဘာများ အမိန့် ရှိပါသေးလဲ ခင်ဗျာ၊ "</p> <p>'ဒီ သင်းကွပ် ခံထားရတဲ့ ကောင် ကများ... ခုနက ငါတို့ ပြောတဲ့ စကားတွေကို ကြားသွားတာများလား' ဟု သူတို့ နှစ်ယောက် ရင်ထဲတွင် အလွန် စိုးရိမ် ပူပန် နေစဉ် မှာပင်၊ စုန့်ချင်းရှုက စကားပြောလာသည်။ "ခုနက မင်းတို့ ပြောတဲ့ အဲဒီ လုပ်ကြံသူက အရမ်း အစွမ်းထက်တယ် ဆိုတော့... ငါ နည်းနည်း... နည်းနည်း ကြောက်သွားလို့ပါ။ မင်းတို့ နှစ်ယောက်က ငါ့ကို အခန်း အထိ လိုက်ပို့ပေးလို့ ရမလား၊ "</p> <p>သူ ပြောချင်သည်မှာ ဤအကြောင်းအရာ ဖြစ်နေသည်ကို ကြားရသောအခါ အစောင့် နှစ်ယောက်လုံး သက်ပြင်း အရှည်ကြီး ချနိုင်သွားကြသည်။ "မရစရာ အကြောင်း မရှိပါဘူး ခင်ဗျာ၊  ရှင်းကုန်းကုန်းကို အလုပ်အကျွေး ပြုရတာ ကျွန်တော်တို့ ညီအစ်ကို နှစ်ယောက်ရဲ့ ကံကောင်းမှု ပါပဲ၊ "</p> <p>"တကယ်လို့များ မင်းက မိဖုရားကြီးရဲ့ အနားမှာ မျက်နှာသာရနေတဲ့ လူယုံတော် တစ်ယောက် သာ မဟုတ်ရင်... ငါတို့ ညီအစ်ကို နှစ်ယောက် လို တော်ဝင် အစောင့်တွေက... မင်းလို ခြောက်ဆင့် ရာထူး ရှိတဲ့ မိန်းမစိုး လေး တစ်ယောက်ကို ဒီလောက် ရိုသေ နေပါ့မလား၊ " အစောင့် နှစ်ယောက်မှာ ပါးစပ် ကနေ ယဉ်ကျေးစွာ ပြောနေသော်လည်း၊ စိတ်ထဲတွင်တော့ စုန့်ချင်းရှုကို အသေအလဲ ဆဲရေး တိုင်းထွာ နေကြတော့သည်။</p> <p>စုန့်ချင်းရှု၏ ကျောပြင် ပေါ်ရှိ ဓားဖျားက ပိုမို တင်းကျပ် လာသည်ကို သူ ရှင်းလင်းစွာ ခံစားနေရသည်။ သူ၏ အရေပြားကို အချိန်မရွေး ဖောက်ထွင်း သွားတော့မည့် အနေအထား မျိုး ဖြစ်နေသော်လည်း၊ စုန့်ချင်းရှုက အနည်းငယ်မျှ ဂရုမစိုက်သည့် အပြင်... "ဒါဆိုရင် ညီအစ်ကိုတို့ နှစ်ယောက် ရှေ့ကနေ လမ်းပြပေးပါဦး၊ " လို့တောင် အေးအေးဆေးဆေး ပြောလိုက်သေးသည်။</p> <p>"မာန်ကတော့ မသေးဘူးပဲ၊ " ထို အစောင့် နှစ်ယောက်မှာ စိတ်ထဲတွင် ကျိန်ဆဲ လိုက်သော်လည်း မျက်နှာ ပေါ်တွင်တော့ ပြုံးရွှင်စွာဖြင့် ရှေ့မှ လမ်းပြ သွားကြတော့သည်။</p> <p>"နင် တကယ် ဘာတွေ လုပ်နေတာလဲ၊ " အစောင့် နှစ်ယောက် အရှေ့သို့ ရောက်သွားသောအခါ ထို အမျိုးသမီး လုပ်ကြံသူက အရိပ်ထဲမှ ထွက်လာပြီး ဒေါသတကြီးဖြင့် မေးလိုက်သည်။</p> <p>စုန့်ချင်းရှုက ပခုံး တွန့်လိုက်ပြီး "ကျွန်တော်က... ဒီလို လုပ်လိုက်ရင် သူရဲကောင်းမိန်းကလေးကို ဘယ်သူမှ သတိထားမိတော့မှာ မဟုတ်ဘူး လို့ ထင်လို့ပါ။"</p> <p>ထို အမျိုးသမီး လုပ်ကြံသူက အချိန်အတော်ကြာ တိတ်ဆိတ် သွားပြီးနောက် နောက်ဆုံးတွင် ပြောလိုက်သည်။ "ကောင်းပြီ... နင် ရှေ့က သွား၊  ပြီးတော့... တခြား ကောက်ကျစ်တဲ့ အကြံအစည်တွေ မတွေးနဲ့ လို့ ငါ သတိပေးလိုက်မယ်၊  ဒီ အစောင့် နှစ်ယောက်ကို အားကိုးပြီး လွတ်မယ် လို့များ မထင်နဲ့... ငါ့ရဲ့ သိုင်းပညာနဲ့ ဆိုရင် သူတို့ကို သတ်ဖို့ ဆိုတာ လက်ညှိုး တစ်ချက် လှုပ်လိုက်ရုံနဲ့တင် လုံလောက်တယ်။"</p> <p>"ကျွန်တော် သိပါတယ်။" စုန့်ချင်းရှု ရင်ထဲတွင် တိတ်တဆိတ် ရယ်မော နေမိသည်။ သူ ဤသို့ ရုတ်တရက် အစီအစဉ် ပြောင်းလိုက်ရခြင်းမှာ... ဤ အစောင့် နှစ်ယောက်၏ သူ၏အပေါ် ဆက်ဆံပုံ အရ... ရှောင်ရှင်းကော်၏ နောက်ခံမှာ သာမန် နန်းတွင်း အဝတ်အထည်ဆောင် အကြီးအကဲ တစ်ယောက် အဆင့်ထက် အများကြီး ပိုမို နက်နဲ ရှုပ်ထွေး နေမည်ဟု ခန့်မှန်း မိသောကြောင့် ဖြစ်သည်။ ဤ အထောက်အထားက မမျှော်လင့်ထားသော နေရာများတွင် အသုံးဝင်လာနိုင်သည် ဟု တွေးမိသဖြင့်... ဤ ရှောင်ရှင်းကော်၏ နောက်ကွယ်တွင် မည်သည့် လျှို့ဝှက်ချက်များ ရှိနေသလဲ ဆိုတာကို သွားရောက် စုံစမ်းရန် ဆုံးဖြတ်လိုက်ခြင်း ဖြစ်သည်။ သို့သော် သူက ရှောင်ရှင်းကော်၏ အခန်း ဘယ်မှာ ရှိသလဲ ဆိုတာကို မသိပေ၊  ထို့ကြောင့် ဉာဏ်နီဉာဏ်နက် ထုတ်ကာ... အစောင့် အဖြစ် အကြောင်းပြပြီး လမ်းပြခိုင်းလိုက်ခြင်း ဖြစ်သည်။ မည်သို့ပင်ဖြစ်စေ ဤ အစောင့် နှစ်ယောက်က မိမိကို ကောင်းကောင်း သိနေပုံ ရသဖြင့်၊ ရှောင်ရှင်းကော်၏ အခန်းကို သေချာပေါက် သိမည်ဟု ယုံကြည်ထားသောကြောင့် ဖြစ်သည်။</p> <p>***</p> <p> </p>


Save