BIT

Title

Show in VIP/Series

Status (Active / Inactive)

<h2 style="text-align: center;">အပိုင်း (၁၇၃၁)</h2>

<h2 style="text-align: center;">မဲပြန်နှိုက်ခြင်း</h2>

ချယ်ယုံကလည်း ပြန်လည် တိုက်ခိုက်သည့်အနေဖြင့် ဒေါသတကြီး ကျိန်ဆဲလိုက်၏။

"မင်းလို ကောင်စုတ်လေးက ငါလောက်တောင် သူ့ရဲ့ ထူးဆန်းမှုကို မသိဘဲနဲ့များ မင်းက ဘယ်လို ထူးဆန်းလဲဆိုတာတောင် မသိဘူးမလား"

ယွင်ရှောင်က ပြောလိုက်သည်။

"သူ့ရဲ့ ခြေလှမ်းတွေက အရမ်းကို အံ့သြစရာကောင်းနေတာဆိုတော့ ဘယ်သူမှ သူ့ကို မထိနိုင်ဘူးပေါ့"

ချယ်ယုံက နှာမှုတ်လိုက်၏။

"သေချာပေါက် မဟုတ်ဘူး။ လေဟာနယ်ကို သော့ခတ်ထားသရွေ့ ပြဿနာ ပြေလည်သွားလိမ့်မယ်။

ဒါပေမဲ့ အဆင့်တူတွေကြားမှာတော့ ဘယ်သူမှ သူ့ကို မထိနိုင်ဘူးလို့ ငါ ထင်တယ်။ ဒီတိုက်ပွဲက သရေကျသွားမယ်၊ ဒါမှမဟုတ် သူ နိုင်လိမ့်မယ်"

ယွင်ရှောင်မှာ နက်နက်ရှိုင်းရှိုင်း တွေးတောနေခဲ့သည်။ ဝူတာချန်မှာ အရမ်းကို ထူးဆန်းလွန်းလှပြီး ၎င်းက သူ၏ခြေလှမ်းများကြောင့်သက်သက် မဟုတ်ဘဲ နက်နဲသော လျှို့ဝှက်ချက်တစ်ခုကို ဖုံးကွယ်ထားသည်ဟု သူ ခံစားနေရ၏။

ရုတ်တရက် အော်ဟစ်သံတစ်ခု ထွက်ပေါ်လာပြီး ပိုင်လီဖူမှာ ဝူတာချန်၏ ရင်ဘတ်ကို ထိုးကြိတ်ခြင်းခံလိုက်ရကာ သွေးတစ်ပွက် ပန်းထုတ်လိုက်ရပြီး အနောက်သို့ လွင့်စင်သွားတော့သည်။

"ဘာ"

လူတိုင်းမှာ လန့်သွားကြပြီး သူတို့၏ မျက်လုံးများမှာ အံ့အားသင့်စွာဖြင့် ပြူးကျယ်သွားကြ၏။

ယွင်ရှောင်က အံ့အားသင့်စွာဖြင့် မေးလိုက်သည်။

"နဂါးအိုကြီး စောနက သူ့ရဲ့ လှုပ်ရှားမှုတွေကို မြင်လိုက်လား"

ချယ်ယုံက ပြောလိုက်၏။

"ငါတို့ စကားပြောနေတာ မဟုတ်ဘူးလား။ ငါ ဘာမှမမြင်လိုက်ဘူး။ မင်းက သွေးလမျက်လုံးရဲ့ စွမ်းအားကို တစ်ချိန်လုံး သုံးနေတာလေ မင်းရော မမြင်လိုက်ဘူးလား"

ယွင်ရှောင်က စိတ်ပျက်လက်ပျက်ဖြင့် ပြောလိုက်သည်။

"စကားပြောတာက အသက်တစ်ချောင်းကိုတောင် သေစေနိုင်တယ်"

သူက လှည့်ကာ မေးလိုက်၏။

"အကြီးအကဲ မူကျန့် ဝူတာချန် ဘယ်လို လှုပ်ရှားသွားလဲဆိုတာ ခင်ဗျား မြင်လိုက်လား"

မူကျန့်ကလည်း သူ၏ဆန်းကြယ်ဝိညာဉ်မျက်လုံးကို အသုံးပြု၍ အာရုံမလွင့်ဘဲ သေချာ စောင့်ကြည့်နေခဲ့သည်။ ခဏမျှ တွေးတောပြီးနောက် သူက ပြောလိုက်၏။

"ဒီမှာ ထူးဆန်းတာ ဘာမှမရှိပါဘူး။ ပိုင်လီဖူရဲ့ ရင်ဘတ်ကို ထိသွားတဲ့ လက်သီးတစ်ချက်ပါပဲ။ အရမ်းကို သာမန်ဆန်တဲ့ လက်သီးတစ်ချက်ပါ။

ဒါပေမဲ့... ထူးဆန်းတာကို ရှာတွေ့ဖို့အတွက် အရမ်းကို သာမန်ဆန်လွန်းနေတာပဲ။ ဆန့်ကျင်ဘက်အနေနဲ့ အဲဒါက ထူးဆန်းနေတယ်..."

မူကျွမ်းက လေးလေးနက်နက် ပြောလိုက်သည်။

"အဲဒီ လက်သီးချက်က သာမန်လို့ ထင်ရပေမဲ့ လုံးဝ မဟုတ်ဘူး။ ဒီလို သာမန် လို့ ထင်ရတဲ့ လက်သီးချက်မျိုးကို ပေးနိုင်ဖို့ မရေမတွက်နိုင်တဲ့ စမ်းသပ်မှုတွေကတစ်ဆင့် သွေးကြောတွေကို သန့်စင်ထားရမယ်"

ယွင်ရှောင်နှင့် ချယ်ယုံတို့ နှစ်ဦးလုံးမှာ တစ်ချိန်တည်းမှာပင် လန့်သွားကြပြီး စိတ်ထဲမှ ရေရွတ်လိုက်ကြ၏။

"နဂါးစစ်ဓမ္မခန္ဓာ"

ချယ်ယုံက လေးနက်သော လေသံဖြင့် ပြောလိုက်သည်။

"နဂါးစစ်ဓမ္မခန္ဓာဆိုတာ ခွန်အား တိုက်ခိုက်မှု ကာကွယ်မှုနဲ့ အရှိန်တို့ရဲ့ ပြည့်စုံတဲ့ ပေါင်းစပ်မှုတစ်ခုပဲ။

သူက စည်းမျဥ်းတစ်ခုနီးပါး ဖြစ်နေတဲ့ တိုက်ခိုက်မှုတစ်ခုကို စောနကလေးတင် ထုတ်လွှတ်လိုက်တာ ဖြစ်ရမယ်။

နဂါးစစ်ဓမ္မခန္ဓာရဲ့ တိုက်ခိုက်မှု နဲ့ အရှိန်ကို ကျွမ်းကျင်စွာ တတ်မြောက်ထားရင် အဆင့်တူတွေကြားမှာ ပြိုင်ဘက်ကင်း ဖြစ်သွားစေတယ်"

ယွင်ရှောင်က မေးလိုက်၏။

"သူက ကျန်တဲ့ နှစ်ခုကိုလည်း ကျွမ်းကျင်နေတာများလား"

ချယ်ယုံက ပြောလိုက်သည်။

"လုံးဝ မဟုတ်ဘူး။ သူ ပထမဆုံး အရိုက်ခံရတုန်းက သွေးတွေ ထွက်နေတာကို မင်း မမြင်ဘူးလား။ သူ့ရဲ့ ခွန်အားနဲ့ ကာကွယ်မှုက အရမ်းကို ဆိုးရွားတယ်"

သူ၏မျက်လုံးများထဲတွင် စူးရှသော အလင်းရောင်တစ်ခု တောက်ပသွား၏။ သူက နှုတ်ခမ်းသပ်ကာ ပြောလိုက်၏။

"ကျွတ် ကျွတ် ဒီကောင့်ကို ငါတို့ လုံးဝ လွှတ်ပေးလို့မရဘူး။ သူ့ကို ဖမ်းပြီး သန့်စင်ပစ်ရမယ်။ ဒီဓမ္မခန္ဓာ စွမ်းအားနှစ်ခုရဲ့ မူလအစကို ဖော်ထုတ်ဖို့ ငါ သူ့ကို အတင်းအကျပ် ခိုင်းစေချင်တယ်"

ယွင်ရှောင်က ပြောလိုက်သည်။

"သူ သိထားတာက တိုက်ခိုက်မှုနဲ့ အရှိန်ပဲဆိုရင်တော့ ကြောက်စရာ မလိုပါဘူး။ ငါ ထူးဆန်းနေတာက လူသားတွေလည်း နဂါးစစ်ဓမ္မခန္ဓာကို ကျင့်ကြံနိုင်သလားဆိုတာပဲ"

ချယ်ယုံက ခဏမျှ ရပ်တန့်သွားပြီးနောက် တိတ်ဆိတ်သွားကာ ပြောလိုက်၏။

"ဒါတွေ အားလုံးက မဟာတာအိုရဲ့ စည်းမျဥ်းတွေကို နားလည်သဘောပေါက်မှုတွေပဲ၊ ဒါကြောင့် သီအိုရီအရဆိုရင် သူတို့ အားလုံး လုပ်နိုင်သင့်တယ်။

ဒါပေမဲ့ နဂါးခန္ဓာကိုယ်မရှိဘဲ ဒီလို မဟာတာအိုမျိုးကို ဆုပ်ကိုင်ဖို့ ခက်ခဲတာက တကယ်ကို ထူးဆန်းတယ်။

ဒီလူက နဂါးမျိုးနွယ်နဲ့ သက်ဆိုင်ဖို့ များတယ်။ ဘယ်လိုပဲဖြစ်ဖြစ် သူ့ကို အရင်ဖမ်းတာက သေချာပေါက် မှန်ကန်တဲ့ လုပ်ရပ်ပဲ"

ဝူတာချန်မှာ လက်သီးတစ်ချက် ထိုးရန် အခွင့်အရေးကို နောက်ဆုံးတွင် မဆုပ်ကိုင်နိုင်မီ နေ့တစ်ဝက်နီးပါး ထွက်ပြေးနေခဲ့သည်။ ၎င်းမှာ သာမန်ဖြစ်ပြီး ထူးခြားမှုမရှိသော တိုက်ကွက်တစ်ခုသာ ဖြစ်သော်လည်း တိုက်ပွဲ၏ ရလဒ်ကို တိုက်ရိုက် အဆုံးအဖြတ်ပေးလိုက်ပေသည်။

အရိုက်ခံရပြီးနောက် ပိုင်လီဖူသည် လက်သီးချက်၏ အချိန်ကိုက်မှုမှာ မဖော်ညွှန်းနိုင်လောက်အောင် အလွန် အနုစိတ်လွန်းကြောင်း ခံစားလိုက်ရ၏။

သူ စွမ်းအင်များကို လှည့်ပတ်နေချိန် အားအနည်းဆုံး အမှတ်ကို ထိမှန်သွားခဲ့ပြီး သူ့ခန္ဓာကိုယ် ဖွဲ့စည်းပုံတစ်ခုလုံးကို ပြိုကျသွားစေကာ သူ၏အရေးပါသော စွမ်းအင်များကို ပြတ်တောက်သွားစေခဲ့သည်။

၎င်းက သူ့ခန္ဓာကိုယ်အတွင်း ဆက်တိုက် တုံ့ပြန်မှုတစ်ခုကို ဖြစ်ပေါ်စေခဲ့ပြီး သွေးကြောစုံမှတ် အသီးသီးကို ထိခိုက်ပျက်စီးစေခဲ့သည်။

သူသည် လုံးဝ တုန်လှုပ်သွားခဲ့ပြီး ထိုလက်သီးချက်မှာ ပြိုင်ဘက်၏ မယုံနိုင်လောက်အောင် တိကျသော တွက်ချက်မှုများကြောင့်လား သို့မဟုတ် တိုက်ဆိုင်မှုတစ်ခုကြောင့်လား ဆိုသည်ကို မသေချာတော့ပေ။

သူကိုယ်တိုင်ကတော့ ဒုတိယအချက်ကို ပိုယိမ်းသော်လည်း ထိုသို့ ဖြစ်လာရန် ဖြစ်နိုင်ချေက အရမ်း နည်းလွန်းလှ၏။

မည်သို့ပင်ဖြစ်စေ ပိုင်လီဖူမှာ ထိုအရာများအကြောင်း တွေးတောရန် အချိန်မရှိတော့ချေ။ အခြေအနေများမှာ ဆိုးရွားစွာ ပြောင်းပြန်ဖြစ်သွားခဲ့ပြီဖြစ်သည်။

သူသည် ဝူတာချန်ထက် နယ်ပယ်တစ်ဝက်ခန့် အားနည်းနေပြီဖြစ်ပြီး ပြိုင်ဘက်၏ မညှာမတာ တိုက်ခိုက်မှုများကြောင့် စွမ်းအား မျှခြေမှာ ပြောင်းလဲသွားခဲ့ကာ ယခုအခါတွင် သူ ဒဏ်ရာရရှိသွားသဖြင့် သူ၏အခြေအနေမှာ အန္တရာယ်ရှိနေပေသည်။

"ဟားဟား မင်း ငါ့ကို အဲဒီလောက်တောင် လိုက်ဖမ်းပြီးမှ ငါ မင်းကို ဘယ်လို သတ်မလဲဆိုတာ ကြည့်ကြတာပေါ့"

ဝူတာချန်က ရုတ်တရက် ခုန်ထပြီး လေဝဲ ခြေကန်ချက်တစ်ခုကို ထုတ်လွှတ်လိုက်သည်။

ပိုင်လီဖူက ကာကွယ်ရန်အတွက် သူ့လက်များကို အလျင်အမြန် မြှောက်လိုက်၏။ ခြေကန်ချက်၏ စွမ်းအားက သူ့လက်မောင်းများကို ထိမှန်သွားပြီး အရိုးများ အက်ကွဲသွားသည့် အသံကို ရှင်းလင်းစွာ ကြားလိုက်ရသည်။

သူသည် အနောက်သို့ ဆုတ်ခွာသွားရပြီး ခြေလှမ်းတိုင်းတွင် မြေပြင်မှာ ပြိုကျသွားရာ စွမ်းအားမည်မျှ ပြင်းထန်ကြောင်း ပြသနေပေသည်။

"ဖူး"

ပိုင်လီဖူမှာ နောက်ဆုံးတွင် ဆက်လက် တောင့်ခံမထားနိုင်တော့ဘဲ နောက်ထပ် သွေးတစ်ပွက်ကို ပန်းထုတ်လိုက်ရသည်။

ထို့နောက် ဝူတာချန်သည် သူ၏အားသာချက်ကို မညှာမတာ ဆက်လက် အသုံးပြုကာ မည်သည့် ဗျူဟာမျှမရှိဘဲ လက်သီးချက်များကို မိုးရွာချသကဲ့သို့ ဆက်တိုက် ထိုးကြိတ်လိုက်ရာ ပိုင်လီဖူမှာ သွေးများကို အန်ထုတ်နေရတော့သည်။

ယွင်ရှောင်က တိတ်ဆိတ်စွာ စောင့်ကြည့်နေခဲ့၏။ လက်သီးသိုင်းမှာ တကယ်ကို ရှုပ်ထွေးနေပေသည်။

ဤအချိန်တွင် ဝူတာချန်မှာ တားဆီး၍မရနိုင်တော့ဘဲ အနိုင်ရရှိရန် သေချာနေပြီဖြစ်သည်။ သူသည် ပြိုင်ဘက်ကို လွှမ်းမိုးရန် သူတို့၏ ကျင့်ကြံခြင်းအဆင့် ကွာဟချက်ကို အလွယ်တကူ အသုံးပြုနိုင်ပေသည်။

မည်သို့ပင်ဆိုစေကာမူ နဂါးစစ်ခန္ဓာကိုယ်ကို ထုတ်လွှတ်ခြင်းက စွမ်းအင် အများအပြားကို ကုန်ဆုံးစေသည်။

"တိုက်ခိုက်တာကို ရပ်လိုက်တော့ ငါတို့ အရှုံးပေးတယ်"

အခြေအနေမှာ ကယ်တင်၍ မရနိုင်တော့ကြောင်း မြင်လိုက်ရသဖြင့် ရှန်းဖန်ဂိုဏ်း၏ ဂိုဏ်းချုပ်မှာ ချက်ချင်း မတ်တပ်ရပ်ကာ အရှုံးပေးကြောင်း အော်ဟစ်လိုက်သည်။

ပိုင်လီဖူက နာကြည်းမှုနှင့် မကျေနပ်မှုများ ပြည့်နှက်နေသော မျက်နှာဖြင့် ဝူတာချန်ကို စိုက်ကြည့်နေခဲ့၏။

"ဘာလဲ မင်း မယုံသေးဘူးလား။ မင်း မယုံရင် ငါ မင်းကို ထပ်ရိုက်မယ်"

ဝူတာချန်၏ မျက်လုံးများမှာ ဒေါသကြောင့် ပြူးကျယ်သွားပြီး တိုက်ခိုက်ရန် သူ့လက်သီးကို မြှောက်လိုက်သော်လည်း သူသည် မျက်စိဖြင့် မမြင်နိုင်သော စွမ်းအားတစ်ခု၏ ချည်နှောင်ခြင်းကို ခံလိုက်ရပြီး မလှုပ်ရှားနိုင်တော့ချေ။ ၎င်းမှာ ထျန်းချန်ချောက်ကမ်းပါးမှ ယိုချင်ဖေးနှင့် အခြားနှစ်ဦး တိုက်ခိုက်လိုက်ခြင်းဖြစ်ကြောင်း သူ သိလိုက်သည်။

ယိုချင်ဖေးက တည်ငြိမ်စွာ ပြောလိုက်၏။

"နဂါးစွယ်အိမ်တော်က လီယွင်ရှောင် နိုင်တယ်"

ထို့နောက် ဝူတာချန်က အေးစက်စက် နှာမှုတ်လိုက်ပြီး သူ၏အဝတ်အစားများပေါ်မှ ဖုန်မှုန့်များကို ခါထုတ်ကာ ပတ်ဝန်းကျင် အားလုံးကို အသံကျယ်ကျယ်ဖြင့် အော်ဟစ်လိုက်သည်။

"ငါက လီယွင်ရှောင်ကွ။ အဲဒါကို မှတ်ထားကြ။ ငါ့ကို ဒူးမထောက်တဲ့ကောင်တိုင်း ငါ့လက်သီးတွေနဲ့ အညံ့ခံလာအောင် ရိုက်နှက်ပစ်မယ်"

"ဝူး"

ပတ်ဝန်းကျင် အားလုံးမှ လှောင်ပြောင်သံများ ထွက်ပေါ်လာပြီး မထီမဲ့မြင်ပြုမှုနှင့် အထင်အမြင်သေးမှုများ ပြည့်နှက်နေကြ၏။

"တကယ်ကို ‌ောက်ရူးပဲ။ မင်း နောက်ဆုံးတော့ နိုင်သွားပြီ၊ အရင်က မင်း ဘယ်လို အရိုက်ခံရပြီး ပတ်ပြေးနေရတယ်ဆိုတာကို မေ့သွားပြီလား"

"သူက အရှင်ယွင်ရှောင်လို အယောင်ဆောင်ရဲတယ်ပေါ့။ ဒီလူယုတ်မာက သေလမ်း ရှာနေတာပဲ"

"သခင်လေးယွင်ရှောင်က လူတိုင်းအပေါ် ကောင်းမွန်ခဲ့တယ်။ ဒီအရူး အပေါ်ရောက်လာတာကို စောင့်ပြီးတော့ သူ့ကို ဘယ်တော့မှ မေ့လို့မရတဲ့ သင်ခန်းစာတစ်ခု ပေးဖို့ ငါတို့တွေ ပူးပေါင်းလိုက်ကြမလား"

"အရမ်းကောင်းတယ် ဒီအကြံပြုချက်ကို ငါ သဘောကျတယ်"

သတ်ဖြတ်လိုသော အရှိန်အဝါတစ်ခုက ပင်လယ်ပြင်အထက် ကောင်းကင်ယံတွင် ရုတ်ခြည်း ပြည့်နှက်သွားခဲ့သည်။ အေးစက်ပြီး စူးရှသော အကြည့်ရာပေါင်းများစွာက ဝူတာချန်အပေါ် ကျရောက်လာ၏။

သူသည် ကောင်းကင်ဘုံကိုးပါးနယ်ပယ် သိုင်းသူတော်စင်အုပ်စိုးသူ အထွတ်အထိပ်အဆင့် ဖြစ်သော်လည်း လူရာပေါင်းများစွာ၏ ပေါင်းစပ်ထားသော အရှိန်အဝါမှာ တောင်ကြီးတစ်လုံးကဲ့သို့ ကြီးမားခမ်းနားပြီး ကြီးကျယ်ခမ်းနားလွန်းလှသဖြင့် ဝူတာချန်၏ မျက်နှာအမူအရာမှာ သိသိသာသာ ပြောင်းလဲသွားခဲ့သည်။

"အဟမ်း မင်းတို့အားလုံး နဂါးစွယ်အိမ်တော်ကို မျက်နှာသာ တော်တော်ပေးကြတာပဲ"

နဂါးစွယ်အိမ်တော်၏ စစ်သင်္ဘောအတွင်းမှ ညင်သာသော ချောင်းဆိုးသံတစ်ခု ထွက်ပေါ်လာသည်။

လူတိုင်းက မည်သူဖြစ်ကြောင်း ချက်ချင်း မှတ်မိသွားကြပြီး သူတို့၏ အမူအရာများမှာ ချက်ချင်း ပြောင်းလဲသွားကြ၏။ သူတို့မှာ လေထဲတွင် နောက်သို့ တစ်လှမ်း မဆုတ်ဘဲ မနေနိုင်အောင် ဖြစ်သွားကြသည်။

သံမဏိကဲ့သို့ ခိုင်မာသော အရှိန်အဟုန်မှာ ဝုန်းခနဲ ပြိုကျသွားပြီး ဝူတာချန်က အခွင့်အရေးကို အရယူကာ ခုန်တက်၍ စစ်သင်္ဘောဆီသို့ ပြန်လည် ပျံသန်းသွားတော့သည်။

မူကျွမ်းက ပြောလိုက်၏။

"ဒါက ကျွယ်ထျန်းဟန်ပဲ။ ဒီလူလိမ်ကို သူ ဒီလောက်တောင် ကာကွယ်ပေးနေလိမ့်မယ်လို့ ငါ မထင်ထားဘူး"

ယွင်ရှောင်က ပြောလိုက်သည်။

"နောက်ဆုံးဗိုလ်လုပွဲမှာ ဒီလူရဲ့ စစ်မှန်တဲ့ အရောင်ကို ကျုပ် ရှာဖွေရမယ်။ သူက မြင်ရတာထက် ပိုတယ်ဆိုတာ သေချာတယ်"

မူကျွမ်းက ပြောလိုက်၏။

"မှန်တာပေါ့။ ကိုယ်ဖော့သိုင်းတစ်ခုတည်းကိုပဲ အားကိုးပြီး ကျွယ်ထျန်းဟန်လို အရေးကြီးတဲ့ လူတစ်ယောက်ကို အနိုင်ယူဖို့ဆိုတာ မဖြစ်နိုင်ဘူး။

သခင်လေးယွင် မင်း သတိထားဖို့ လိုတယ်။ နောက်ဆုံးဗိုလ်လုပွဲမှာ သူက ကျင်းချီ ဒါမှမဟုတ် အောင်းဝူရှင်းနဲ့ တွေ့ရင် အကောင်းဆုံးပဲ။

ဟီးဟီး ဒါဆိုရင် စိတ်ဝင်စားစရာ ကောင်းလိမ့်မယ်"

ယွင်ရှောင်က ပြောလိုက်သည်။

"ကျင်းချီကို ရင်ဆိုင်ဖို့ အစီအစဥ်ကို ခဏ ရွှေ့ဆိုင်းထားလို့ ရပါတယ်။ ကျင်းချီ ရှိနေရင် သူက အသုံးဝင်တဲ့ အရာတစ်ခုတောင် ဖြစ်လာနိုင်တယ်"

"အို"

မူကျွမ်းက မေးလိုက်၏။

"ငါ့ကို ကျင်းချီအပေါ် အရေးမယူစေချင်တာ သေချာလား"

ယွင်ရှောင်က ခေါင်းညိတ်ကာ ပြောလိုက်သည်။

"ဟုတ်တယ် ပိုအစွမ်းထက်လေ ပိုကောင်းလေပဲ… အခြေအနေ ပိုရှုပ်ထွေးလေလေ အခွင့်အရေးတွေ ပိုများလာလေလေပဲ"

မူကျွမ်းက ခဏမျှ တွေးတောလိုက်ပြီး ပြောလိုက်၏။

"အလုံးစုံ အခြေအနေကို ထိန်းချုပ်နိုင်မှု မရှိတဲ့အချိန်မှာ အရာတွေက ပိုရှုပ်ထွေးလေလေ ပိုအကျိုးရှိလေလေပဲ။

အဲဒီလိုဆိုရင်တော့ ကျင်းချီကို ဖြေရှင်းဖို့ကိစ္စကို ငါ ရွှေ့ဆိုင်းထားလိုက်မယ်။ သူ ငါ့ရဲ့ အကြီးအကဲနှစ်ယောက်ကို သတ်ခဲ့တဲ့ ကိစ္စက အနှေးနဲ့အမြန် ဖြေရှင်းရမှာပဲ"

ဝူတာချန်၏ ပထမဆုံးပွဲစဥ် ပြီးနောက် နောက်ဆက်တွဲ ပွဲစဥ်များမှာ ထူးခြားမှု မရှိခဲ့ချေ။

နောက်ဆုံး အယောက်နှစ်ဆယ် ပြိုင်ပွဲသို့ တက်ရောက်ရန် အစွမ်းထက် ပြိုင်ပွဲဝင် ဆယ့်ကိုးဦးကို လျင်မြန်စွာ ရွေးချယ်လိုက်သည်။

ယိုချင်ဖေးက ပြောလိုက်၏။

"နောက်ဆုံး ရွေးချယ်မှု ပြိုင်ပွဲမှာ အစွမ်းထက် ပုဂ္ဂိုလ် ဆယ့်ကိုးဦးက လူဆယ်ယောက်ကို ဆုံးဖြတ်ဖို့ ယှဥ်ပြိုင်ကြရမယ်၊

ပြီးရင် ကျန်တဲ့ ကိုးယောက်ထဲကနေ နှစ်ယောက်ကို ရွေးချယ်ပြီး စုစုပေါင်း ဆယ့်နှစ်ယောက် နောက်ဆုံးဗိုလ်လုပွဲကို တက်ရောက်ရမယ်။

တရားမျှတမှု ရှိစေဖို့အတွက် အစွမ်းထက် ပုဂ္ဂိုလ် ဆယ့်ကိုးဦးကို စင်မြင့်ပေါ်တက်ပြီး မဲပြန်နှိုက်ပေးဖို့ မေတ္တာရပ်ခံပါတယ်"

"မဲပြန်နှိုက်ရမယ်"

လူတိုင်းမှာ လန့်သွားကြသော်လည်း မဲနှိုက်နှိုက် မနှိုက်နှိုက် စည်းမျဥ်းများကို ထိခိုက်မည် မဟုတ်သောကြောင့် ကြီးမားသော တုံ့ပြန်မှု မရှိခဲ့ချေ။

အဆင့် ဆယ့်ကိုးတွင်ရှိသော သိုင်းပညာရှင် တစ်ဦးတည်းသာ အလွန် မှုန်ကုပ်ကုပ် မျက်နှာထား ရှိနေပေသည်။ မူလစည်းမျဥ်းများအရ သူသည် ထိပ်ဆုံး ဆယ်ယောက်စာရင်းသို့ တိုက်ရိုက် တက်ရောက်နိုင်မည်ဖြစ်သော်လည်း ယခုအခါတွင်တော့ သူသည် တိုက်ပွဲဝင်ရမည်မှာ သေချာသလောက် ရှိနေပြီဖြစ်သည်။

ဘုန်းကြီးဝက ညည်းတွားလာ၏။

"တိုက်ပွဲတွေ အများကြီး တိုက်ရတာက အရမ်းကို ဒုက္ခများတယ်။ ဝူရှင်းကို တိုက်ခိုက်စရာမလိုဘဲ တိုက်ရိုက် အဆင့်တက်ဖို့ အခွင့်အရေး ပေးလိုက်ပါလား။

ဘယ်လိုပဲဖြစ်ဖြစ် လူတိုင်းက ဝူရှင်းကို ပထမနေရာ ရလိမ့်မယ်လို့ မျှော်လင့်ထားကြတာပဲလေ"

လူတိုင်းက လှောင်ပြောင်လိုက်ကြသည်။ အကယ်၍ ဘုန်းကြီးဝသာ ရွေးချယ်မှု ပြိုင်ပွဲမတိုင်မီက ဤစကားကို ပြောခဲ့ပါက လူအများစု ယုံကြည်ကောင်း ယုံကြည်နိုင်မည်ဖြစ်သော်လည်း ယခုအခါတွင်တော့ သူတို့သည် အေးစက်စက် ရယ်မောလိုက်ကြရုံသာ ဖြစ်သည်။

အောင်းဝူရှင်း ရှုံးနိမ့်မည်ဟု မသေချာသော်လည်း ပထမနေရာ ရရှိရန် သူ၏အခွင့်အလမ်းများမှာ များစွာ လျော့ကျသွားခဲ့ပြီဖြစ်သည်။

လော့ဖူကျွန်းပတ်လည်တွင် တိတ်ဆိတ်နေပြီး လူတိုင်းက အချင်းချင်း တီးတိုး စကားပြောနေကြ၏။ ပြိုင်ပွဲဝင် သုံးဦးသာ ကျွန်းပေါ်သို့ ဆင်းသက်လာပြီး တိတ်ဆိတ်စွာ ရပ်နေကြသည်။

ယိုချင်ဖေးက ပြောလိုက်သည်။

"ပြိုင်ပွဲဝင် အားလုံးကို အသက်ဆယ်ရှိုက်စာအတွင်း စင်မြင့်ပေါ်တက်ဖို့ မေတ္တာရပ်ခံပါတယ်၊ မဟုတ်ရင် အရှုံးပေးတယ်လို့ သတ်မှတ်ပါမယ်။ မကျေနပ်တဲ့သူတိုင်း ထွက်သွားလို့ရပါတယ်"

သူ စကားပြောပြီးသည်နှင့် တစ်ပြိုင်နက် အလင်းတန်းများစွာက ကျွန်းပေါ်သို့ ပျံသန်းဆင်းသက်လာပြီး လူဆယ့်နှစ်ဦးလုံး ရောက်ရှိလာကြသည်။

လူအများစု၏ အကြည့်များက ယွင်ရှောင်အပေါ်တွင် ရှိနေပြီး သူတို့၏ အမူအရာများမှာ ရှုပ်ထွေးနေကြ၏။

ရှောင်ဟုန်က စိုးရိမ်တကြီးဖြင့် ခေါ်လိုက်သည်။

"အစ်ကိုကြီး"

ယွင်ရှောင်က အနည်းငယ် ပြုံးကာ ပြောလိုက်၏။

"ရှောင်ဟုန်လေးတောင် အရမ်း ကြီးလာပြီပဲ။ မင်း လူဆိုးတွေ ဖမ်းခေါ်သွားခံရတုန်းက အစ်ကိုကြီး အရမ်း စိတ်ပူနေခဲ့တာ"

ရှောင်ဟုန်၏ မျက်နှာမှာ ရဲရဲနီသွားပြီး ဝမ်းသာအားရ ပြောလိုက်သည်။

"အစ်ကိုကြီးက ကျွန်မကို မှတ်မိသေးတာပဲ။ ကျွန်မ အရမ်း ဝမ်းသာတာပဲ"

လူတိုင်း မှင်သက်သွားကြ၏။ သူတို့နှစ်ဦးက သိကျွမ်းနေကြသည်ကိုး။

ယွင်ရှောင်က ခေါင်းမော့ကာ လေးနက်သော လေသံဖြင့် ပြောလိုက်သည်။

"အစ်ကိုတာချန် ယုံရှန်းမြို့မှာ ငါတို့ လမ်းခွဲပြီးကတည်းက ငါ့ပါးရိုက်ချက်ကြောင့် ရောင်နေတဲ့ မင်းရဲ့ မျက်နှာက ဘယ်လိုနေသေးလဲ"

"မင်း ဘာအဓိပ္ပာယ်မရှိတာတွေ လျှောက်ပြောနေတာလဲကွ"

ဝူတာချန်မှာ ဒေါသထွက်သွားပြီး အော်ဟစ်လိုက်၏။

"မင်းကသာ ဝူတာချန်ကွ။ ငါက လီယွင်ရှောင်"

ယွင်ရှောင်က အံ့အားသင့်စွာဖြင့် မေးလိုက်သည်။

"ဟင်။ ငါက မင်းကို အစ်ကိုတာချန်လို့ပဲ ခေါ်တာလေ… မင်းရဲ့ မျိုးရိုးနာမည်က ဝူ မှန်း ဘယ်လိုလုပ် သိမှာလဲ"

ဝူတာချန်မှာ ခဏမျှ မှင်သက်သွားပြီးနောက် လှောင်ပြုံးပြုံးလိုက်၏။

"မင်းရဲ့ စကားနဲ့ လွတ်အောင်ပြောဖို့ မကြိုးစားနဲ့တော့။ ခဏနေရင် ငါ ဘာပြောလဲဆိုတာ မင်း သိလာမှာပါ"

ယွင်ရှောင်က သရော်လိုက်သည်။

"မျှော်လင့်နေပါတယ်"

ရှောင်ဟုန်က ပြောလိုက်၏။

"အစ်ကိုကြီး စိတ်မပူပါနဲ့၊ ခဏနေရင် ကျွန်မ သူ့ကို အစ်ကိုကြီးအတွက် ရိုက်နှက်ပေးမယ်။ သူက အစ်ကိုကြီးအဖြစ် အယောင်ဆောင်နေတာ"

ဝူတာချန်က ရှောင်ဟုန့်ကို စိုက်ကြည့်ကာ ပြုံးဖြီးဖြီးဖြင့် ပြောလိုက်သည်။

"ဟီးဟီး ကောင်မလေး မင်း တော်တော်လေး ဖွံ့ဖြိုးလာတာပဲ။ ခဏနေရင် အစ်ကိုကြီး မင်းကို စစ်ဆေးပေးမယ်"

ရှောင်ဟုန်မှာ လုံးဝ နားမလည်ဘဲ နှာမှုတ်လိုက်၏။

"ရှင် ကျွန်မကို စစ်ဆေးပေးဖို့ မလိုပါဘူး၊ ကျွန်မ လုံးဝ အဆင်ပြေတယ်"

"ဟားဟား…"

ရယ်မောသံများက ပတ်ဝန်းကျင် အားလုံးမှ ထွက်ပေါ်လာပြီး သရော်လှောင်ပြောင်သည့် အသံများနှင့် လေချွန်သံများစွာ ပါဝင်နေသည်။

ဝူတာချန်က ရယ်မောကာ ပြောလိုက်၏။

"တကယ်ကို ဖြူစင်တဲ့ ကောင်မလေးပဲ… ဘယ်လောက်တောင် အပြစ်ကင်းစင်တဲ့ ခန္ဓာကိုယ်လေးလဲ ဟားဟား"

ပါးနပ်သည့် အလင်းရောင်တစ်ခုက သူ၏မျက်လုံးများထဲတွင် လင်းလက်သွားပြီး မျက်စိတစ်မှိတ်အတွင်း ပျောက်ကွယ်သွားခဲ့သည်။

သို့သော် ယွင်ရှောင်သည် သူ့ကို သေချာ စောင့်ကြည့်နေခဲ့သဖြင့် ထိုစူးရှသော အကြည့်ကို ချက်ချင်း ဖမ်းမိလိုက်ပြီး အနည်းငယ် လန့်သွားခဲ့၏။

"ဖြူစင်တဲ့ ခန္ဓာကိုယ်" ဆိုသည့် စကားစုမှ သူ တစ်ခုခုကို ရှာဖွေတွေ့ရှိသွားခဲ့လေသလော…

***

Book List