BIT

Title

Show in VIP/Series

Status (Active / Inactive)

<h2 style="text-align: center;">အပိုင်း (၁၇၃၂)</h2>

<h2 style="text-align: center;">ချိပ်စည်းသုံးခု ပေါင်းစည်းခြင်း</h2>

"တကယ်ကို အရှက်မရှိတဲ့ ကောင်ပဲ"

ချန်ချင်းစီက အေးစက်စက် ကျိန်ဆဲလိုက်၏။

"ရှောင်ဟုန် ခဏနေရင် ငါတို့ ဒီလူယုတ်မာကို ဝိုင်းရိုက်ကြမယ်"

ဝူတာချန်က ဟိန်းဟောက်လိုက်သည်။

"ဟေ့ ကောင်မစုတ်လေး မင်းက မိုးကြိုးအသံခန္ဓာကိုယ်ကို ပိုင်ဆိုင်ထားရုံနဲ့ မင်းကိုယ်မင်း အရမ်းကြီးကျယ်တယ်လို့ မထင်နဲ့။

ငါ ပြောပြမယ် မင်းက ငါ့ဖိနပ်တိုက်တဲ့ နေရာနဲ့ ပိုသင့်တော်တယ်"

ချန်ချင်းစီ၏ ခန္ဓာကိုယ်မှာ တုန်ယင်သွားပြီး သူမ၏ မျက်လုံးများထဲတွင် ထိတ်လန့်မှုများ ပေါ်လာကာ ယင်းနောက်တွင်တော့ အဆုံးမဲ့ သတ်ဖြတ်လိုသည့် အရှိန်အဝါများ ပေါက်ကွဲထွက်လာတော့သည်။

"မိုးကြိုးအသံခန္ဓာကိုယ်လား"

ယွင်ရှောင်မှာ အနည်းငယ် လန့်သွား၏။ ၎င်းက ဖူယောင်မြင့်မြတ်နန်းတော်၏ သန့်စင်သော ခန္ဓာကိုယ်အမည် ဖြစ်ရမည်ဟု သူ သိလိုက်သော်လည်း သူ၏မှတ်ဉာဏ်များထဲတွင် ရှာဖွေကြည့်သည့်တိုင် မည်သည့် သဲလွန်စကိုမျှ မတွေ့ရှိခဲ့ရချေ။

ချန်ချင်းစီ၏ သတ်ဖြတ်လိုသော အကြည့်ကို မြင်ရသည့်အခါ ဝူတာချန် ပြောသည်မှာ မှန်ကန်နိုင်ခြေ ရှိပေသည်။

သို့သော် ဝူတာချန်က မည်သို့ သိနေသနည်း။ သူက တစ်ချက်ကြည့်ရုံဖြင့် သူမကို ထိုးထွင်းသိမြင်နိုင်ခဲ့ခြင်းများလား။ ယွင်ရှောင်၏ တုန်လှုပ်မှုမှာ ပိုမို နက်ရှိုင်းလာခဲ့၏။

အခြားသူများမှာလည်း သူတို့၏ မျက်လုံးများထဲတွင် အံ့အားသင့်သည့် အရိပ်အယောင်များ ပြသလာကြပြီး တိတ်တဆိတ် တွေးတောလာကြသည်။

ရွက်တစ်ထောင်ကျွန်းရှိ ဖူယောင်မြင့်မြတ်နန်းတော်သည် အထီးကျန် နေထိုင်သော မျိုးနွယ်စုများကြားတွင် အလွန် မြင့်မားသော အဆင့်အတန်းတစ်ခုရှိပြီး မျိုးဆက်တစ်ဆက်ပြီးတစ်ဆက် လက်ဆင့်ကမ်းလာခဲ့သည့် ၎င်း၏ “မြင့်မြတ်ခန္ဓာကိုယ်" မှာ ပို၍ပင် စိတ်ဝင်စားစရာ ကောင်းလှသည်။

သို့သော် မည်သူကမျှ အသေးစိတ် အချက်အလက်များကို မသိကြချေ။ ယခုမူ ဤလီယွင်ရှောင် အတုက စကားတစ်ခွန်းတည်းဖြင့် အမှန်တရားကို ရုတ်တရက် ဖော်ထုတ်လိုက်ခြင်းပင်။

ဝူတာချန်က မာနထောင်လွှားသည့် အမူအရာဖြင့် အောင်ပွဲခံသည့် လေသံဖြင့် ပြောလိုက်၏။

"ဘာလဲ မင်းက ငါ့ကို သတ်ချင်တာလား။ မင်းက အရည်အချင်း မပြည့်မီသေးပါဘူး"

ချန်ချင်းစီက အေးစက်စက် ပြန်ပြောလိုက်သည်။

"အဲဒီလိုလား။ အရာအားလုံးက ရှင် မျှော်လင့်ထားတဲ့အတိုင်း ဖြစ်လာဖို့ မျှော်လင့်ပါတယ်"

ဝူတာချန်က ထိုစကားကို အလေးအနက် မထားဘဲ သူ၏နှုတ်ခမ်းထက်တွင် အေးစက်သော အပြုံးတစ်ခုဖြင့် ယုံကြည်မှုရှိနေပုံရသည်။

ယိုချင်ဖေးမှာလည်း တိတ်တဆိတ် အံ့အားသင့်သွားခဲ့သော်လည်း အပြင်ပန်းတွင်တော့ တည်ငြိမ်နေခဲ့၏။ သူက သံသေတ္တာတစ်လုံးကို ထုတ်၍ သူ့လက်ထဲတွင် ကိုင်ထားရင်း ပြောလိုက်သည်။

"စုစုပေါင်း ကတ်ဆယ့်ကိုးကတ် ရှိပါတယ်။ နံပါတ်သုည တစ်ခုတည်းကသာ တိုက်ခိုက်စရာမလိုဘဲ တိုက်ရိုက် အဆင့်တက်နိုင်တဲ့ မဂဏန်းဖြစ်ပါတယ်။ ကျန်တဲ့ နံပါတ်တစ်ခုကနေ ကိုးအထိ ကတ်တွေကိုတော့ သိုင်းပြိုင်ပွဲအတွက် အသုံးပြုသွားမှာပါ"

သူက သံသေတ္တာကို ပုတ်လိုက်ရာ အလင်းတန်းတစ်ခုက ကောင်းကင်ယံသို့ ပစ်ထွက်သွား၏။

သံပြားဆယ့်ကိုးချပ်က မီးရှူးမီးပန်းများကဲ့သို့ လွင့်စင်ထွက်လာပြီးနောက် အလွန် မျက်စိကျိန်းမတတ် စူးရှသော အလင်းတန်း ဆယ့်ကိုးခုအဖြစ် ပြောင်းလဲသွားတော့သည်။

အလင်းတန်းများ ထွက်ပေါ်လာသည့် အခိုက်အတန့်မှာပင် ပြာလဲ့လဲ့ အလင်းတန်းတစ်ခု ပေါ်လာပြီး ယွင်ရှောင်က ပထမဆုံး လှုပ်ရှားလိုက်ကာ လှစ်ခနဲ အထက်သို့ နေရာရွှေ့ပြောင်းသွားပြီး ကတ်တစ်ခုကို လှမ်းဖမ်းလိုက်သည်။

"ဖြန်း"

ရုတ်တရက် သွေးဆုတ်ဖြူရော်နေသော လက်တစ်ဖက်က သူ့လက်ဖျံပေါ်သို့ ရိုက်ချလိုက်ရာ ပေါင်တစ်ထောင်ခန့် ဖိချလိုက်သည့်အလား သူ့လက်မောင်းတစ်ခုလုံး ချက်ချင်း နိမ့်ဆင်းသွားပြီး လမ်းကြောင်းလွဲသွားတော့သည်။

လက်ပိုင်ရှင်က သူ့ထက် ပိုမို လျင်မြန်စွာ လှုပ်ရှားလိုက်ပြီး ကတ်ကို လှမ်းယူလိုက်၏။

"မင်းရဲ့ စွမ်းအားက ထူးကဲပါတယ်။ ဒါကြောင့် ကျေးဇူးပြုပြီး ဒီကတ်ကို ငါ့ကို ပေးလိုက်ပါ"

ကျင်းချီက အရင်ရောက်ရှိလာခြင်းဖြစ်သည်။ ယွင်ရှောင်၏ မျက်ဝန်းများ ကျဥ်းမြောင်းသွားပြီး သူ့ကို ဖမ်းရန် လက်လှမ်းလိုက်သည်။

သူ့လက်ငါးချောင်းက ကျင်းချီ၏ ညာဘက်ပခုံးပေါ်သို့ ချိတ်ဆက်သွားပြီး တော်တော်လေး နက်ရှိုင်းစွာ စိုက်ဝင်သွား၏။

၎င်းက မာကျောသော သစ်သားကို ကိုင်ထားရသကဲ့သို့ ခံစားရပြီး သူ၏အသားအရေမှာ လုံးဝ ပျော့ပျောင်းမှု မရှိချေ။ လူတိုင်းက သူ့ကို သေနေသော အလောင်းကောင်ဟု ခေါ်ကြသည်မှာ အံ့သြစရာ မဟုတ်တော့ပေ။

ယွင်ရှောင်သည် သူ့လက်ငါးချောင်းဖြင့် လက်ကိုင်ကို တင်းကျပ်စွာ ဆုပ်ကိုင်ပြီးနောက် ရုတ်တရက် အားကုန်ဆွဲလိုက်သည်။

ကျင်းချီ၏ လက်မှာ သံပြားနှင့် သုံးလက်မခန့်သာ ကွာဝေးတော့ချိန်တွင် ယွင်ရှောင်က အတင်းအကျပ် ဆွဲဖယ်လိုက်ခြင်းဖြစ်သည်။

သူက ညင်သာစွာ ညည်းတွားလိုက်ပြီး အနောက်သို့ လှည့်မကြည့်ဘဲ အနည်းငယ် ယိမ်းယိုင်ကာ ခြေထောက်ဖြင့် အနောက်သို့ ကန်ထုတ်လိုက်ရာ အလင်းတန်းတစ်ခု ထွက်ပေါ်လာ၏။

ယွင်ရှောင်က သူ့ခန္ဓာကိုယ်ကို ကျုံ့ကာ လေထဲသို့ ပျံလွှားတစ်ကောင်ကဲ့သို့ ပေါ့ပါးစွာ ခုန်တက်လိုက်သည်။

ခြေထောက်လှုပ်ရှားမှု၏ လမ်းကြောင်းအတိုင်း လိုက်ပါကာ သူသည် လေထဲတွင် နောက်ပြန်လှည့်လိုက်ပြီး ကျင်းချီ၏ ဘယ်ဘက်ပခုံးကို ဆုပ်ကိုင်ထားသော သူ၏ညာဘက်လက်က လက်ဝါးအဖြစ် ပြောင်းလဲသွားကာ အောက်သို့ ရိုက်ချလိုက်ရာ ကျင်းချီ၏ ခန္ဓာကိုယ်ကို အောက်သို့ ဖိချလိုက်ပြီးနောက် ထိုစွမ်းအားကို အသုံးပြု၍ အဝေးသို့ နေရာရွှေ့ပြောင်းသွားတော့သည်။

"သစ်တော်သီးကို မျှဝေစားတဲ့ အကျင့် ငါ့ဆီမှာ တစ်ခါမှ မရှိခဲ့ဖူးဘူး"

ကျင်းချီက အေးစက်စက် နှာမှုတ်လိုက်ပြီး သူ၏မျက်လုံးများထဲတွင် အစိမ်းရောင် မီးတောက်ကဲ့သို့ အလင်းရောင်တစ်ခု လင်းလက်သွားကာ သူ့လက်ငါးချောင်းဖြင့် လေဟာနယ်ကို လှမ်းဆွဲလိုက်၏။

သူတို့ အရှေ့ရှိ လေဟာနယ်မှာ ချက်ချင်း လိမ်ကောက်သွားပြီး သံပြားမှာ လေဟာနယ် ရေစီးကြောင်းထဲသို့ မျောပါသွားကာ ပျောက်ကွယ်သွားတော့သည်။

ယွင်ရှောင် ထိုနေရာသို့ နေရာရွှေ့ပြောင်းရောက်ရှိသွားချိန်တွင် သူ၏ညာဘက်လက်က လေဟာနယ်ကိုသာ ဖမ်းဆုပ်မိလိုက်ပြီး သူက ကျိန်ဆဲလိုက်သည်။

"တကယ်ကို ယုတ်မာတာပဲ"

ကျင်းချီက အသေးစား လေဟာနယ် လိမ်ကောက်ခြင်း သိုင်းပညာကိုသာ အသုံးပြုခဲ့ခြင်းဖြစ်သဖြင့် သံပြားမှာ ကျွန်းအထက်ရှိ ဧရိယာအတွင်း၌သာ လှည့်ပတ်နေမည်ဖြစ်ပြီး အလွန်ဝေးကွာသော နေရာသို့ ရောက်ရှိသွားမည် မဟုတ်ပေ။

"ဟားဟား ဒီနံပါတ်သုည ကတ်က ငါ့ဟာဖြစ်သွားပြီ"

ရုတ်တရက် ထူးဆန်းသော ရယ်မောသံ ထွက်ပေါ်လာ၏။ ဝူတာချန်က ကျယ်လောင်စွာ ပြုံးလိုက်ပြီး သူ၏မျက်လုံးများမှာ တောက်ပနေကာ သူ၏အကြည့်များက လေဟာနယ်ကို ဖြတ်သန်းသွားသည်။

ခြေတစ်လှမ်းတည်းဖြင့် သူသည် ကျင်းချီ၏ အနောက်ဘက် ဆယ်ပေအကွာသို့ မယုံနိုင်လောက်အောင် ရောက်ရှိလာပြီး လေဟာနယ်ထဲသို့ လက်လှမ်းလိုက်၏။

လေဟာနယ်မှာ ဝါဂွမ်းသကြားလုံးတစ်ခုကဲ့သို့ ဆန့်ထွက်လာပြီး လက်ငါးချောင်းကြားရှိ အတားအဆီးအတွင်းတွင် သံပြားတစ်ချပ် ပေါ်လာခဲ့သည်။

သူ၏မျက်နှာမှာ ဝမ်းသာအားရ ဖြစ်သွားပြီး သူက ရယ်မောလိုက်သည်။

"ဟားဟား မင်းက ငါ့ကို မြှောက်ပေးနေတာပဲ"

"ဟမ့် ရှင်က နံပါတ်သုညကို ယူချင်တာလား။ အိပ်မက်မက်နေလိုက်။ ငါနဲ့ တူညီတဲ့ နံပါတ်ကိုပဲ ယူလိုက်"

ချန်ချင်းစီ၏ အေးစက်သော အသံ ထွက်ပေါ်လာ၏။ သူမက လက်ဟန်များ ပြုလုပ်လိုက်ရာ ချက်ချင်းပင် စည်းမျဥ်းများ၏ စွမ်းအားက သူမ၏ ပတ်လည်တွင် မြင့်တက်လာပြီး သူမက အော်ဟစ်လိုက်သည်။

"အသေးစား နေရာရွှေ့ပြောင်းသိုင်း"

သူမက လက်ချောင်းများကို ခေါက်လိုက်ရာ ပျံသန်းလာသော သံပြားမှာ ရုတ်တရက် ပျောက်ကွယ်သွားပြီး ဝူတာချန်၏ လက်ချောင်းထိပ် အတားအဆီးအတွင်းရှိ သံပြားနှင့် နေရာချင်း လဲလှယ်သွားတော့သည်။

ဝူတာချန်၏ မျက်နှာအမူအရာမှာ သိသိသာသာ ပြောင်းလဲသွား၏။ သူ့လက်ဝါးထဲရှိ အတားအဆီး စွမ်းအားမှာ ပျောက်ကွယ်သွားပြီး သံပြားမှာ အောက်သို့ ပြုတ်ကျသွားကာ သူ့လက်ကို လှန်ကြည့်လိုက်သောအခါ ၎င်းမှာ နံပါတ်ခုနစ် ဖြစ်နေကြောင်း တွေ့လိုက်ရသည်။

တစ်ချိန်တည်းမှာပင် နံပါတ်သုည သံပြားမှာ ဝေးကွာသော နေရာတစ်ခုသို့ ရွှေ့ပြောင်းခံလိုက်ရပြီး ကောင်းကင်ယံသို့ ပစ်ထွက်သွားတော့သည်။

ယွင်ရှောင်နှင့် ကျင်းချီတို့မှာ သံပြားနောက်သို့ လိုက်လံ ဖမ်းဆီးရန် တစ်ပြိုင်နက်တည်း ပျောက်ကွယ်သွားကြ၏။

ချန်ချင်းစီက ရယ်မောလိုက်သော်လည်း သူမ၏ မျက်လုံးများထဲတွင် သတ်ဖြတ်လိုသော အရှိန်အဝါများ ပြည့်နှက်နေပေသည်။ သူမက အေးစက်စက် ပြောလိုက်သည်။

"သေဖို့သာ စောင့်နေလိုက်တော့"

လျှပ်တစ်ပြက်အတွင်း သူမက အခြား နံပါတ်ခုနစ် သံပြားကို လှမ်းယူလိုက်ပြီး "ရှင်တော့ သေပြီ" ဟူသော အမူအရာဖြင့် သူ့ကို ကြည့်လိုက်၏။

ဝူတာချန်၏ အမူအရာမှာ အနည်းငယ် ပြောင်းလဲသွား၏။ သူက သရော်လိုက်သည်။

"မင်းက နံပါတ်ခုနစ်ဆိုရင် ငါ အဲဒါကို ပြောင်းလို့မရဘူးလား"

သူ၏အကြည့်က အနီးဆုံးရှိ သိုင်းပညာရှင်အပေါ်သို့ ကျရောက်သွားပြီး လျင်မြန်သော ခြေလှမ်းဖြင့် သူသည် ထိုလူ၏ ဘေးသို့ ရောက်ရှိသွားကာ ထိုလူ၏ သံပြားကို လုယူပြီး သူ၏ကိုယ်ပိုင် နံပါတ်ခုနစ်ကို ထိုလူ၏ လက်ထဲသို့ ထည့်ပေးလိုက်၏။

လှုပ်ရှားမှု တစ်ခုလုံးမှာ မျက်စိတစ်မှိတ်အတွင်း ဖြစ်ပျက်သွားသကဲ့သို့ ချောမွေ့ပြီး အပြစ်အနာအဆာကင်းလှသည်။

တံဆိပ်ပြား လဲလှယ်ခံလိုက်ရသူမှာ မည်သည့်အရာများ ဖြစ်ပျက်သွားသည်ကို နားလည်ရန် အသက်ရှူချိန် အနည်းငယ်မျှ အချိန်ယူလိုက်ရသည်။

သူ့လက်ထဲရှိ တံဆိပ်ပြားနံပါတ်ကို ကြည့်လိုက်ပြီးနောက် ချန်ချင်းစီကို လှမ်းကြည့်လိုက်ရာ သူ၏မျက်နှာမှာ ပြာနှမ်းသွားတော့၏။

ချန်ချင်းစီက ဒေါသတကြီး ပြန်ပြောလိုက်သည်။

"ဒီ လီယွင်ရှောင် အတုကောင် ရှင့်မှာ အရှက်မရှိဘူးလား"

ဝူတာချန်က ကျယ်လောင်စွာ ရယ်မောလိုက်၏။

"ဟားဟား ဒါကို လိမ္မာပါးနပ်တယ်လို့ ခေါ်တယ်။ မင်းမှာ မင်းရဲ့ ပါးနပ်တဲ့ အစီအစဥ်တွေ ရှိသလို ငါ့မှာလည်း ငါ့ရဲ့ တန်ပြန်အစီအမံတွေ ရှိတယ် ဟားဟားဟား"

ချန်ချင်းစီက အေးစက်စက် ပြောလိုက်သည်။

"ရှင် နောက်ဆုံးမှာ ငါ့လက်ထဲကို ရောက်လာမှာပါ"

အကယ်၍ သူမက အခြား နံပါတ်များကို လုယူရန် ကြိုးစားပါက ဝူတာချန်ကလည်း ၎င်းတို့ကို လုယူပြီး လဲလှယ်နိုင်သဖြင့် အဓိပ္ပာယ်ရှိမည် မဟုတ်ပေ။

ထို့ကြောင့် သူမသည် တင်ပျဥ်ခွေထိုင်ချလိုက်ပြီး သူ့အား လျစ်လျူရှုထားလိုက်တော့သည်။

နံပါတ် အခိုးခံလိုက်ရသော သိုင်းပညာရှင်၏ အမည်မှာ ကျောက်ကျီထျန်း ဖြစ်သည်။ သူသည်လည်း ရှစ်ပွင့်ကြယ် သိုင်းသူတော်စင်အုပ်စိုးသူအဆင့် စွမ်းအားကို ပိုင်ဆိုင်ထားပြီး မူလက ထိပ်ဆုံး ဆယ့်နှစ်ယောက်စာရင်းသို့ ဝင်ရောက်ရန် အခွင့်အရေး အလွန် များပြားပေသည်။

သို့သော် ယခုအခါ သူ၏ပြိုင်ဘက်က ချန်ချင်းစီ ဖြစ်သွားသောကြောင့် သူသည် မျှော်လင့်ချက်မဲ့သွားပြီး အဆုံးမဲ့ ဒေါသများက ငယ်ထိပ်သို့ ဆောင့်တက်လာတော့သည်။ သူက သူ့ဓားကို ဆွဲထုတ်ကာ ဝူတာချန်ကို ခုတ်ပိုင်းလိုက်ပြီး ဟိန်းဟောက်လိုက်၏။

"ငါ ကျောက်ကျီထျန်းက ဒီအခြေအနေကို လက်မခံဘူး။ ငါ့ရဲ့ နံပါတ်ပြားကို ပြန်ပေး"

"ဝုန်း"

ဓားစွမ်းအင်များ ကျဆင်းလာသည်နှင့်အမျှ မြေပြင်တွင် အက်ကွဲကြောင်းတစ်ခု ပေါ်လာပြီး အနက် ဆယ်ပေခန့်နှင့် အရှည် ပေတစ်ရာခန့် ရှိပေသည်။

လော့ဖူကျွန်း၏ မြေမျက်နှာသွင်ပြင်မှာ အလွန် ခိုင်မာပေသည်။ အကယ်၍ အခြားကျွန်းတစ်ခုသာ ဖြစ်ခဲ့ပါက ၎င်းမှာ နှစ်ခြမ်းကွဲသွားလောက်ပြီ ဖြစ်သည်။

ဝူတာချန်မှာ ကြိုတင် သတိထားနေပြီးသားဖြစ်သဖြင့် ဘေးသို့ အလျင်အမြန် ရှောင်တိမ်းလိုက်ကာ ဓားချက်ကို အဝေးမှ ရှောင်ရှားလိုက်၏။

ကျောက်ကျီထျန်း၏ မျက်နှာမှာ ပြာနှမ်းနေပြီး သူ၏မျက်လုံးများထဲတွင် ဒေါသမီးတောက်များ တောက်လောင်နေကာ သူ့နောက်သို့ လိုက်လံ ဖမ်းဆီးနေပြီး လုံးဝ ရူးသွပ်ကာ မျှော်လင့်ချက်မဲ့နေသည့် အခြေအနေသို့ ရောက်ရှိနေပေသည်။

ဝူတာချန်က မကြောက်သော်လည်း တစ်ချိန်လုံး လိုက်လံဖမ်းဆီးခံနေရသဖြင့် စိတ်အနှောင့်အယှက် ဖြစ်လာကာ အော်ဟစ်လိုက်၏။

"ဟေ့ ဝက်ကောင် အဲဒီ အရူးမနဲ့ မတွေ့ချင်ရင် မြန်မြန်သွားပြီး တခြားတစ်ယောက်ရဲ့ တံဆိပ်ပြားကို လုယူလိုက်လေ"

ထိုစကားက ကျောက်ကျီထျန်းကို သတိပေးလိုက်သလို ဖြစ်သွားသည်။ သူက ဝူတာချန်ကို မမီနိုင်ကြောင်း သိသော်လည်း အခြားတစ်ယောက်၏ တံဆိပ်ပြားကို လုယူနိုင်ပါက မဆိုးလှချေ။

သူက ချက်ချင်းပင် အားနည်းသော သိုင်းပညာရှင်များဆီသို့ အကြည့်ကို လွှဲပြောင်းလိုက်၏။

၎င်းက လူတိုင်းကို ချက်ချင်း သတိပေးလိုက်သလို ဖြစ်သွားပြီး သူတို့ အားလုံး အနောက်သို့ ဆုတ်သွားကြသည်။

ဆယ်ပေအကွာတွင် တည်ငြိမ်စွာ ရပ်နေသော သိုင်းပညာရှင် တစ်ယောက်တည်းသာ မကြောက်မရွံ့ ဖြစ်နေပုံရသည်။

ကျောက်ကျီထျန်းက ထိုဧရိယာကို သူ၏နတ်ဘုရားအာရုံဖြင့် စူးစမ်းလိုက်ရာ ဝမ်းသာအားရ ဖြစ်သွား၏။ ထိုသိုင်းပညာရှင်မှာ ကြယ်လေးပွင့် သိုင်းသူတော်စင်အုပ်စိုးသူအဆင့် စွမ်းအားသာ ရှိသဖြင့် သူ့ကို အလွယ်တကူ ဖမ်းဆီးနိုင်မည်မှာ သေချာပေသည်။

သူက ချက်ချင်းပင် သူ၏ဓားရှည်ဖြင့် ထိုလူ၏ လည်ချောင်းကို ချိန်ရွယ်လိုက်ရာ ဓားသွားမှာ သုံးလက်မခန့်သာ ကွာဝေးတော့ချိန်တွင် ရပ်တန့်သွားပြီး အော်ဟစ်လိုက်သည်။

"မင်း မသေချင်ရင် မင်းရဲ့ နံပါတ်ပြားကို ငါနဲ့ လဲလိုက်"

ထိုလူက ခါးသီးစွာ ပြုံးလိုက်ပြီး သူ၏နံပါတ်ပြားကို ချက်ချင်း ထုတ်ကာ ဝှေ့ယမ်းပြရင်း ပြောလိုက်၏။

"နံပါတ်သုံးပါ။ နောက်ထပ် နံပါတ်သုံးက အောင်းဝူရှင်းပဲ။ မင်း လိုချင်ရင် လဲလို့ရပါတယ်"

"ဖူး"

ကျောက်ကျီထျန်းမှာ သွေးတစ်ပွက် ပန်းထုတ်လိုက်ရပြီး ဒေါသတကြီး အော်ဟစ်လိုက်သည်။

"ခွေးမသား လစ်စမ်း"

အောင်းဝူရှင်းနှင့်သာ ယှဥ်ပြိုင်ရမည်ဆိုပါက အနိုင်ရရှိနိုင်ခြေမှာ အနုတ်လက္ခဏာနီးပါး ရှိပေမည်။

ဒေါသထွက်သွားသော သူသည် ချက်ချင်းပင် ထိုလူကို ဓားကျောဖြင့် ရိုက်ချလိုက်ရာ မြေပြင်ပေါ်သို့ လဲကျသွားပြီးနောက် အခြား သိုင်းပညာရှင်များဆီသို့ ပြေးဝင်သွားတော့သည်။

ယခုအချိန်တွင် လူတိုင်း၏ အာရုံမှာ လော့ဖူကျွန်း ပတ်လည်ရှိ ပင်လယ်ပြင်အထက် ကောင်းကင်ယံသို့ ရောက်ရှိနေကြပြီး ထိုနေရာတွင် ယွင်ရှောင်နှင့် ကျင်းချီတို့၏ ပုံရိပ်များက အဆက်မပြတ် ဖြတ်သန်းသွားလာနေကြကာ တိုက်ရိုက် အဆင့်တက်ခွင့်ရမည့် နံပါတ်သုည သံပြားကို လုယက်နေကြ၏။

အသက်ရှူချိန် အနည်းငယ်အတွင်းမှာပင် သူတို့နှစ်ဦးမှာ တိုက်ကွက် ရာပေါင်းများစွာ ဖလှယ်ခဲ့ကြသည်။

ယွင်ရှောင်မှာ ရွှေရောင် အလင်းတန်းများဖြင့် ဖုံးလွှမ်းနေပြီး သူ၏ မပျက်စီးနိုင်သော ရွှေခန္ဓာကိုယ်ကို မဆင်မခြင် ထုတ်လွှတ်နေရာ အောက်ဘက်မှ စောင့်ကြည့်နေသော အောင်းဝူရှင်းကိုပင် အံ့အားသင့်သွားစေခဲ့သည်။

ယွင်ရှောင်၏ မပျက်စီးနိုင်သော ရွှေခန္ဓာကိုယ်မှာ သူနှင့် မတူညီကြောင်း အလိုလို သိမြင်နေသော်လည်း ဘာတွေ မှားယွင်းနေသည်ကို သေချာ မသိနိုင်ပေ။

"လုံးဝ အသစ်ဖြစ်တဲ့ ချဥ်းကပ်မှုတစ်ခုလား။ ခန္ဓာကိုယ် သန့်စင်ဖို့အတွက် ဘာပါရမီမှ မပါဘဲနဲ့ တခြားနည်းလမ်းကို ရှာတွေ့ပြီး အာဏာရှင်နတ်ဘုရားခန္ဓာကိုယ်ကျင့်စဉ်ကို ဒီအဆင့်အထိ ကျင့်ကြံနိုင်တယ်ဆိုတာ လီယွင်ရှောင်က တကယ်ကို ပြိုင်ဘက်ကင်း ပါရမီရှင်တစ်ယောက်ပဲ"

အောင်းဝူရှင်းမှာ စိတ်လှုပ်ရှားမှုများ ပြည့်နှက်သွားခဲ့၏။ သူ၏အောင်းမျိုးနွယ်စုမှာ မျိုးဆက်တစ်ဆက်ပြီးတစ်ဆက် လက်ဆင့်ကမ်းလာခဲ့သော ခန္ဓာကိုယ် သန့်စင်သူများ၏ မျိုးနွယ်စုဖြစ်သော်လည်း နှစ်များတစ်လျှောက်တွင် သူနှင့် အောင်းချန်ခုံးတို့သာ သူတို့၏ ထူးခြားသော ပါရမီနှင့် တူညီသော မွေးရာပါ စွမ်းရည်ကြောင့် အာဏာရှင်နတ်ဘုရားခန္ဓာကိုယ်ကျင့်စဉ်ကို ကျင့်ကြံနိုင်ခဲ့ကြသည်။

မျိုးနွယ်စုအတွင်းရှိ ပါရမီရှင်များစွာမှာ လူတိုင်းနှင့် သင့်တော်သော လမ်းကြောင်းတစ်ခုကို ရှာဖွေတွေ့ရှိရန် မျှော်လင့်ချက်ဖြင့် အာဏာရှင်နတ်ဘုရားခန္ဓာကိုယ်ကျင့်စဉ်ကို လေ့လာရန် အချိန်နှင့် ခွန်အား အများအပြား သုံးစွဲခဲ့ကြသော်လည်း ခြွင်းချက်မရှိ အားလုံး ကျရှုံးခဲ့ကြပေသည်။

ကောင်းကင်ယံရှိ တိုက်ခိုက်သူ နှစ်ဦးမှာ ပိုမို ဒေါသထွက်လာကြ၏။ ယွင်ရှောင်၏ လက်သီးနှင့် လက်ဝါးချက်တိုင်းတွင် ဓားစွမ်းအင်များက သူ့ပတ်လည်၌ လှည့်ပတ်နေပြီး အလွန် ထက်ရှကာ တိုက်ကွက်တိုင်းက လေဟာနယ်ကို ခုတ်ပိုင်းသွားလေသည်။

ကျင်းချီ၏ လက်မောင်းပတ်လည်တွင်ပင် အဖြူရောင် မီးခိုးငွေ့တစ်မျှင် လှည့်ပတ်နေပြီး ၎င်းမှာ လျှို့ရှာရွှမ်ယွီအဆိပ်ဖြစ်သော်လည်း သူ မည်သို့ပင် လုပ်ဆောင်စေကာမူ ပြိုင်ဘက်၏ နတ်ဆိုးစွမ်းအင် အကာအကွယ်ကို မချိုးဖောက်နိုင်ခဲ့ချေ။

သူတို့နှစ်ဦးမှာ ထိန်းချုပ်မှုအတွက် တိုက်ခိုက်မှုတစ်ခုအနေဖြင့် စတင်ခဲ့ကြသော်လည်း ပြင်းထန်မှုမှာ တဖြည်းဖြည်း မြင့်တက်လာပြီး သူတို့သည် ပိုမို အသေအလဲ တိုက်ခိုက်လာကြသည်။

အကယ်၍ ယွင်ရှောင်သည် ယခင်က ကျင်းချီနှင့် ပတ်သက်၍ သံသယများ ရှိခဲ့ပါက ယခုအခါတွင် သူသည် ကောင်းကင်ဘုံကိုးပါးနယ်ပယ် ကြယ်ကိုးပွင့် အထွတ်အထိပ်အဆင့်သို့ ရောက်ရှိနေပြီဖြစ်ရာ သူတော်စင်တစ်ပါးကို စိုးရိမ်ပူပန်မှုမရှိဘဲ တိုက်ခိုက်ရန် လုံလောက်ပေသည်။

"အစ်ကိုကျင်းချီက ဒီလောက်တောင် ခေါင်းမာနေမှတော့ မင်းကို အရင်ဆုံး သေလမ်းပို့ရုံကလွဲပြီး ရွေးချယ်စရာ မရှိတော့ဘူး"

ယွင်ရှောင်၏ အမူအရာမှာ လေးနက်နေပြီး သူ၏မျက်လုံးများထဲတွင် သတ်ဖြတ်လိုသော အရှိန်အဝါများ တောက်ပသွား၏။

လျှပ်တစ်ပြက်အတွင်း သူသည် ခေါင်းသုံးလုံး လက်ခြောက်ဖက်ပါရှိသော ရွှေခန္ဓာကို ဖန်တီးလိုက်သည်။

လက်ခြောက်ဖက်က သူ့အရှေ့တွင် အဆက်မပြတ် လှုပ်ရှားနေပြီး လက်ဟန်များ အဆက်မပြတ် ပြုလုပ်နေ၏။

ကောင်းကင်နှင့် မြေကြီး၏ ဝိညာဥ်စွမ်းအင်များက ပတ်ဝန်းကျင် အားလုံးမှ စုဝေးလာပြီး လက်ဟန် သုံးခုကြားတွင် အစွမ်းထက်သော စွမ်းအားတစ်ခု ထွက်ပေါ်လာတော့သည်။

လူတိုင်း တုန်လှုပ်သွားကြ၏။ သိုင်းပညာ၏ အစွမ်းထက်ပြီး အံ့ဖွယ်ကောင်းသော စွမ်းအားကြောင့်သာမက ယွင်ရှောင်၏ စကားကြောင့်ပါ တုန်လှုပ်သွားကြခြင်း ဖြစ်သည်။

သူသည် ယခုမှ ကြယ်ကိုးပွင့် နယ်ပယ်၏ အထွတ်အထိပ်သို့ ရောက်ရှိလာခြင်းဖြစ်ပြီး ကျင်းချီမှာမူ လွန်ခဲ့သော နှစ်ပေါင်းများစွာကတည်းက သူတော်စင်နယ်ပယ်သို့ ဝင်ရောက်ခဲ့သော အစွမ်းထက် ပုဂ္ဂိုလ်တစ်ဦး ဖြစ်သည်။ မည်သူက မည်သူ့ကို သေလမ်းပို့မည် ဆိုသည်မှာ တကယ်ကို မသေချာလှချေ။

"ဘဝဆိုတာ အိပ်မက်တစ်ခုပါပဲ… မျက်စိတစ်မှိတ်အတွင်း ပျောက်ကွယ်သွားမယ့် အရိပ်အယောင်တစ်ခုပါ"

"ကမ္ဘာကြီးက ဆင်းရဲဒုက္ခ ပင်လယ်ကြီး ဖြစ်ပေမဲ့ ငါတို့က တစ်ဖက်ကမ်းကို ကူးဖြတ်နိုင်တယ်"

"ကောင်းကင်နဲ့ မြေကြီးက အဆုံးအစမဲ့ပြီး သံသရာခြောက်ပါးက တည်ရှိနေတယ်"

လက်ခြောက်ဖက်က မတူညီသော လက်ဟန်များကို ပြုလုပ်လိုက်ရာ ၎င်းတို့မှာ ၊ လွင့်မျောအသက်ရှည်ချိပ်စည်း၊ မြေကမ္ဘာချိပ်စည်းနှင့် ကောင်းကင်နှင့်မြေကြီးချိပ်စည်းအားလုံးက သူ့အရှေ့တွင် ရှိနေကာ နေနှင့် ဘီးတစ်ခုကဲ့သို့ ရွှေရောင် အလင်းတန်းများဖြင့် တောက်ပနေ၏။

ကျယ်ပြန့်ပြီး ခမ်းနားသော စွမ်းအားသုံးခုက ဓမ္မခန္ဓာပတ်လည်တွင် လှည့်ပတ်နေသည်။

ယွင်ရှောင်က ချိပ်စည်းသုံးခုကို တစ်ပြိုင်နက်တည်း မြှောက်လိုက်ရာ ၎င်းတို့က ကောင်းကင်ယံတွင် စွမ်းအင်တစ်ခုတည်းအဖြစ် ပေါင်းစည်းသွားပြီး ဧကများစွာ ကျယ်ဝန်းသော ရွှေရောင် အလင်းလွှားတစ်ခုအဖြစ် ဖန်တီးလိုက်ကာ ၎င်းအတွင်းတွင် မှော်စာလုံး သန်းပေါင်းများစွာ လှိမ့်ဆင်းကာ တောက်ပနေတော့သည်။

***

Book List