BIT

Title

Show in VIP/Series

Status (Active / Inactive)

<h2 style="text-align: center;">ချန်ဇီယွင်၏ ခန္ဓာကိုယ်ပေးဆပ်မှု</h2>

<h2 style="text-align: center;">နတ်ဘုရားအသွင်ပြောင်း ပြီးပြည့်စုံခြင်းအဆင့်သို့</h2>

<h2 style="text-align: center;">တက်လှမ်းခြင်းနှင့် စစ်မှန်သော ဝိညာဉ်လောက(၄)</h2>

တစ်ညတာ ကုန်လွန်သွားလေပြီ။

[ သင်သည် ယမန်နေ့က ပြင်းပြသော ချစ်ခြင်းမေတ္တာကို ရရှိထားသည်။ 'ချစ်ခြင်းမေတ္တာကူ'၏ စွမ်းအားသည် အတိုင်းအတာတစ်ခုအထိ တိုးတက်လာခဲ့သည်။ ]

[ သင်၏ ကျင့်ကြံမှုသည် ဝိညာဉ်သန္ဓေသားနှောင်းပိုင်းအဆင့် အထွတ်အထိပ်သို့ တက်လှမ်းသွားပြီ ဖြစ်သည်။ ]

[ သင်၏ စိတ်ဝိညာဉ်အမြစ် အရည်အချင်းသည် အတိုင်းအတာတစ်ခုအထိ တိုးတက်လာခဲ့သည်။ ]

[ သင်သည် နတ်ဘုရားအသွင်ပြောင်းအဆင့် ကျင့်ကြံသူတစ်ဦး၏ တာအိုကျင့်ကြံခြင်းဆိုင်ရာ အတွေ့အကြုံများကို အတိုင်းအတာတစ်ခုအထိ ရရှိခဲ့သည်။ ]

[ သင်သည် နတ်ဆိုးဂိုဏ်း၏ လျှို့ဝှက်ပညာရပ်အချို့ကို ရရှိခဲ့သည်။ ]

ချက်ချင်းပင် ကျိုးစွေ့၏သိစိတ်ပင်လယ် နက်ရှိုင်းသောနေရာတွင် 'ချစ်ခြင်းမေတ္တာကူ'ထံမှ ပေးပို့လာသော သတင်းစကားများ ထွက်ပေါ်လာလေသည်။

ဤတစ်ကြိမ် ကျင့်ကြံမှုက ကျိုးစွေ့အား ကြီးမားလှသော အကျိုးကျေးဇူးများကို ရရှိစေခဲ့ပြီး၊ အနည်းဆုံး နှစ်တစ်ရာကျော်ခန့် ကြိုးစားကျင့်ကြံရမည့် အချိန်များကို သက်သာစေခဲ့သည်မှာ ထင်ရှားလှပေသည်။

မည်သို့ပင်ဖြစ်စေ ဤသည်မှာ နတ်ဘုရားအသွင်းပြောင်းကနဦးအဆင့် အမျိုးသမီးကျင့်ကြံသူတစ်ဦး၏ သန့်စင်သော ယင်အနှစ်သာရပင် ဖြစ်လေသည်။

ဤစွမ်းအင်က မည်မျှအထိ ကြီးမားမည်ကို တွေးကြည့်ရုံဖြင့် သိနိုင်ပေ၏။

သာမန်ကျင့်ကြံသူတစ်ဦးသာဆိုလျှင် ဤစွမ်းအင်များကြောင့် ခန္ဓာကိုယ်ပေါက်ကွဲကာ အပိုင်းပိုင်းအစစ ပြတ်တောက်သွားမည် ဖြစ်သည်။

သို့သော် ကျိုးစွေ့သည်ကား လုံးဝ ကွာခြားလေသည်။ သူသည် 'ကူနတ်ဘုရားကျင့်စဉ်'ကို ကျင့်ကြံထားသူ ဖြစ်၏။

မူလကတည်းက သူ၏ ခန္ဓာကိုယ်အတွင်းရှိ မှော်စွမ်းအင်သိပ်သည်းမှုသည် တူညီသော ဝိညာဉ်သန္ဓေသားအဆင့်များ ယှဉ်ပြိုင်နိုင်စွမ်း မရှိပေ။

ဤသည်ကပင် သူ စုပ်ယူရန် လိုအပ်သော စွမ်းအင်များကို ပိုမို များပြားစေခဲ့လေသည်။

ထို့ကြောင့် သူသည် စတုတ္ထအဆင့် တန်ဖိုးကြီးဆေးလုံး အမြောက်အမြားကို စားသုံးခဲ့သော်လည်း တူညီသောအဆင့်ရှိ ကျင့်ကြံသူများ၏ ကျင့်ကြံမှုအမြန်နှုန်းနှင့် မတိမ်းမယိမ်းသာ ရှိနိုင်သေးသည်။

အကယ်၍ စတုတ္ထအဆင့် တန်ဖိုးကြီးဆေးလုံးများနှင့် တာအိုလက်တွဲဖော်များ၏ အကူအညီသာ မရှိခဲ့လျှင် သူ၏ ကျင့်ကြံမှုအမြန်နှုန်းမှာ အလွန်တရာ နှေးကွေးနေမည်မှာ သေချာပေ၏။

'အခု ခန္ဓာကိုယ်ထဲက မှော်စွမ်းအင်တွေဟာ အရင်ကထက် အနည်းဆုံး သုံးဆယ်ရာခိုင်နှုန်းကျော် ပိုအားကောင်းလာတယ်...’ ကျိုးစွေ့က တွေးလိုက်မိ၏။

ကျိုးစွေ့သည် မိမိခန္ဓာကိုယ်တွင်းရှိ သိပ်သည်းလှသော ဝိညာဉ်သန္ဓေသားမှော်စွမ်းအင်များက သွေးကြောတိုင်းတွင် မြစ်တစ်စင်းကဲ့သို့ စီးဆင်းနေကာ ပြီးပြည့်စုံသော လည်ပတ်မှုတစ်ခုအား ဖန်တီးနေသည်ကို ခံစားလိုက်ရ၏။ လည်ပတ်မှုတိုင်းသည် ချန်ကျန်းမြစ်နှင့် မြစ်ဝါမြစ်တို့ စီးဆင်းနေသည့်အလား ထင်မှတ်ရပေသည်။

ဤသည်မှာ သူ၏ ခန္ဓာကိုယ်တွင်းရှိ မှော်စွမ်းအင်များက သမုဒ္ဒရာကြီးတစ်ခုအဖြစ် ပြောင်းလဲသွားသကဲ့သို့ ဖြစ်နေလေသည်။

ထို့အပြင် ဤတစ်ကြိမ် ချန်ဇီယွင်၏ ခန္ဓာကိုယ်မှ ရရှိလာသော သန့်စင်ယင်အနှစ်သာရများကို အပြည့်အဝ ချေဖျက်နိုင်ခြင်း မရှိသေးပေ။

တစ်စိတ်တစ်ပိုင်းကိုသာ ချေဖျက်နိုင်ခဲ့ခြင်း ဖြစ်၏။

မည်သို့ပင်ဖြစ်စေ ဤသည်မှာ နတ်ဘုရားအသွင်ပြောင်းအဆင့် ကျင့်ကြံသူထံမှ ရရှိသော သန့်စင်ယင်အနှစ်သာရဖြစ်ရာ ၎င်းအတွင်းရှိ စွမ်းအင်ကြီးမားမှုသည် သာမန် ပဉ္စမအဆင့် ဆေးလုံးများထက်ပင် ကျော်လွန်နေလေသည်။

ထို့ကြောင့် ဤစွမ်းအင်၏ ကြီးမားကျယ်ပြန့်မှုကို သိမြင်နိုင်ပေသည်။

"ဒါက ဝိညာဉ်သန္ဓေသားနှောင်းပိုင်းအဆင့် ပြီးပြည့်စုံခြင်းဆိုတာလား...” ကျိုးစွေ့က ရေရွတ်လိုက်သည်။

ဤအချိန်တွင် ကျိုးစွေ့၏ ဝိညာဉ်အာရုံသည် မိမိ၏ ဒန်တျန်ချီပင်လယ်အတွင်းသို့ ဝင်ရောက်သွားပြီး ဒန်တျန်ချီပင်လယ်အတွင်းရှိ ဝိညာဉ်သန္ဓေသားမှာ အရွယ်ရောက်ပြီးသူတစ်ဦးအသွင်သို့ ကြီးထွားလာသည်ကို ချက်ချင်း သတိပြုမိလိုက်လေသည်။

၎င်း၏ လက်ရှိရုပ်ရည်သွင်ပြင်နှင့် သူနှင့် တစ်ပုံစံတည်းပင် ဖြစ်ချေသည်။

အခြားသော မိမိကိုယ်တစ်ခုနှင့် တူညီနေသည်။ ၎င်းသည် အပြည့်အဝ ရင့်ကျက်နေပြီ ဖြစ်သည်။ အရာအားလုံးက တစ်သားတည်း ဖြစ်တည်နေ၏။

ထိုကဲ့သို့သော ဝိညာဉ်သန္ဓေသားမှာ သူ၏ ဝိညာဉ်ကဲ့သို့ပင် ဖြစ်နေလေသည်။

ဤသည်ကပင် အမှန်တကယ် ဝိညာဉ်သန္ဓေသားနှောင်းပိုင်းအဆင့် အထွတ်အထိပ်သို့ ရောက်ရှိခြင်းဖြစ်သည်ဟု ဆိုနိုင်ပေသည်။

မှော်စွမ်းအင်၊ ဝိညာဉ်အာရုံ သို့မဟုတ် ခန္ဓာကိုယ် မည်သည်ဖြစ်စေ အရာအားလုံးက ပြီးပြည့်စုံသည့် အခြေအနေသို့ ရောက်ရှိသွားခဲ့ပြီ ဖြစ်၏။

ဤအခိုက်အတန့်တွင် သူ၏ မှော်စွမ်းအင်၊ ဝိညာဉ်အာရုံနှင့် ခန္ဓာကိုယ်တို့သည် အတိုင်းအတာတစ်ခုအထိ ပဲ့တင်ထပ်မှုတစ်ခု ဖြစ်ပေါ်လာပုံရသည်။

ကောင်းကင်နှင့် မြေကြီး၏ ဝိညာဉ်ချီများအပေါ် သူ၏ ထိန်းချုပ်နိုင်စွမ်းသည် ယခင်က မရှိခဲ့ဖူးသော အမြင့်မားဆုံးအဆင့်သို့ ရောက်ရှိသွားခဲ့လေသည်။

သူသည် နတ်ဘုရားအသွင်ပြောင်းအဆင့် နယ်ပယ်၏ အသွင်အပြင် အနည်းငယ်ကို ရရှိသွားပြီဟု မသိမသာ ခံစားလိုက်ရသည်။

ကောင်းကင်နှင့် မြေကြီး၏ ဝိညာဉ်ချီ အမျှင်တိုင်းကို ပြီးပြည့်စုံစွာ ထိန်းချုပ်နိုင်စွမ်း ရှိသွားလေပြီ။

'ဒီလိုကိုး၊ ဝိညာဉ်သန္ဓေသားနှောင်းပိုင်းအဆင့် အထွတ်အထိပ်ဆိုတာ မူလဝိညာဉ်မျိုးစေ့ကို မွေးဖွားပေးတာပဲ...’

ကျိုးစွေ့မှာ ချက်ချင်းပင် ဉာဏ်အလင်းပွင့်သွား၏။

သူသည် မိမိ၏ ဒန်တျန်ချီပင်လယ်အတွင်းရှိ ဝိညာဉ်သန္ဓေသားမှာ ယခင်ကနှင့် မည်သို့ ကွာခြားသွားသည်ကို ချက်ချင်း သတိပြုမိလိုက်သည်။ မူလဝိညာဉ်မျိုးစေ့တစ်ခုသည် ဝိညာဉ်သန္ဓေသားအတွင်း၌ စတင်မွေးဖွားလာပြီး အဆက်မပြတ် ကြီးထွားလာနေပုံရသည်။

အတိုင်းအတာတစ်ခုအထိ ကြီးထွားလာသောအခါ အခွံကိုဖောက်ထွက်လာသကဲ့သို့ ဝိညာဉ်သန္ဓေသားကို ခွဲထွက်ကာ စစ်မှန်သော မူလဝိညာဉ်ကို မွေးဖွားလာမည် ဖြစ်၏။

ဤသည်ကိုပင် ဝိညာဉ်သန္ဓေသားကွဲကြေ၍ မူလဝိညာဉ်မွေးဖွားခြင်းဟု ခေါ်ဆိုလေသည်။

ဤသည်မှာ သဘာဝအလျောက် ဖြစ်ပေါ်လာသော ဖြစ်စဉ်တစ်ခုဟု ဆိုနိုင်ပေသည်။

သို့သော် ဤအချက်ကို အလွန် ပြီးပြည့်စုံသော အခြေခံအုတ်မြစ်ရှိသည့် ဝိညာဉ်သန္ဓေသားအဆင့် ကျင့်ကြံသူများသာ လုပ်ဆောင်နိုင်ပေသည်။

အကယ်၍ အခြေခံမခိုင်မာသော ဝိညာဉ်သန္ဓေသားအဆင့် ကျင့်ကြံသူများဖြစ်ပါက ပြီးပြည့်စုံသော မူလဝိညာဉ်ကို မွေးဖွားနိုင်မည် မဟုတ်ချေ။

မူလဝိညာဉ်စုစည်းမှု ကျရှုံးသည့် အခြေအနေသို့ပင် ရောက်ရှိသွားနိုင်သည်။

ထိုသို့ဖြစ်ပါက ကျင့်ကြံသူသည် အသက်သေဆုံးပြီး ကျင့်ကြံမှုများလည်း ပျက်သုဉ်းသွားမည် ဖြစ်၏။

မှန်ပေသည်၊ သာမန် ဝိညာဉ်သန္ဓေသားအဆင့် ကျင့်ကြံသူများသည် ဤကဲ့သို့ မူလဝိညာဉ် စုစည်းသည့်ဖြစ်စဉ်ကို အရှိန်မြှင့်တင်ရန်အတွက် နတ်ဘုရားအသွင်ပြောင်းအဆင့် ဝိညာဉ်ပစ္စည်းများ၏ အကူအညီကို ရယူတတ်ကြပေသည်။

ယခင်က ချန်ဇီယွင်နှင့် ယဲ့ဖေးရိုတို့သည်လည်း ထိုကဲ့သို့ပင် ဖြစ်ခဲ့ကြလေသည်။

'မူလဝိညာဉ်ကို မွေးဖွားနိုင်တာနဲ့ အဲဒါက စစ်မှန်တဲ့ နတ်ဘုရားအသွင်ပြောင်းအဆင့်ကို ရောက်သွားတာပဲ...’

'ရှေးဟောင်းခေတ်တုန်းက ဒီအဆင့်ကို မူလဝိညာဉ်အဆင့်လို့လည်း ခေါ်ခဲ့ကြတယ်...’

'ဒီအဆင့်ကို ရောက်သွားပြီးတဲ့နောက်မှာ ကိုယ့်ခန္ဓာကိုယ်ထဲက ဝိညာဉ်က ခန္ဓာကိုယ်အပြင်ကို ထွက်နိုင်ပြီး လက်တွေ့ကမ္ဘာထဲမှာ အချိန်အကြာကြီး ရှင်သန်နေနိုင်တယ်...’

'ဒါကြောင့် တစ်စိတ်တစ်ပိုင်းအားဖြင့် ပြောရရင် ဒီအဆင့်က ကျင့်ကြံသူတွေကို လူ့ပြည်က နတ်ဘုရားတွေလို့လည်း ခေါ်လို့ရတယ်...’

'နတ်ဘုရားတွေရဲ့ လက္ခဏာရပ် အနည်းငယ်လောက်ကို ပိုင်ဆိုင်ထားသလိုပဲ...’

'မူလဝိညာဉ်က မျက်စိတစ်မှိတ်အတွင်း မိုင်တစ်ထောင်အထိ သွားနိုင်ပြီး မိုင်သောင်းချီ ကျယ်ဝန်းတဲ့ မြေပြင်ကို ရှင်းရှင်းလင်းလင်း သိမြင်နိုင်သလို နေရာတိုင်းက အသံတွေကိုလည်း နားထောင်နိုင်တယ်...’

'အိမ်ပြင်မထွက်ရင်တောင် မိုင်သောင်းချီဝန်းကျင်က ဘယ်ကိစ္စကိုမဆို သိနိုင်စွမ်းရှိတယ်...’

ကျိုးစွေ့သည် မိမိ၏ တာအိုလက်တွဲဖော်များမှတစ်ဆင့် နတ်ဘုရားအသွင်ပြောင်းအဆင့် ကျင့်ကြံသူများ၏ စွမ်းရည်အချို့ကို သိရှိထားပြီး အခြေခံအားဖြင့် ၎င်းမှာ မူလဝိညာဉ်နှင့်အတူ ပါလာသော စွမ်းရည်များသာ ဖြစ်ပေသည်။

နယ်ပယ်စွမ်းရည်၊ အာရုံခံစွမ်းရည် သို့မဟုတ် လှုပ်ရှားမှုစွမ်းရည် မည်သည်ဖြစ်စေ မူလဝိညာဉ်နှင့် ကြီးမားသော ဆက်စပ်မှုရှိပြီး အရာအားလုံး၏ အခြေခံစွမ်းအားများသည် ဝိညာဉ်မှတစ်ဆင့် ဖြစ်ပေါ်လာခြင်း ဖြစ်၏။

ကျင့်ကြံသူများအတွက် ဝိညာဉ်၏ အရေးပါမှုကို တွေးကြည့်ရုံဖြင့် သိနိုင်ပေသည်။

သို့သော် ခန္ဓာကိုယ်သည်လည်း အတော်လေး အရေးပါလှ၏။

အကယ်၍ မူလဝိညာဉ်ကို သင်္ဘောမာလိန်မှူးဟု ဆိုရမည်ဆိုလျှင် ခန္ဓာကိုယ်မှာ သင်္ဘောတစ်စင်းပင် ဖြစ်ပေသည်။

သံသရာဒုက္ခပင်လယ်ကို ဖြတ်ကျော်လိုပါက မာလိန်မှူးရှိရုံဖြင့် အသုံးမဝင်ဘဲ ရတနာသင်္ဘောတစ်စင်းလည်း လိုအပ်သေးသည်။

အကယ်၍ မူလဝိညာဉ်သည် ခန္ဓာကိုယ်နှင့် အချိန်ကြာမြင့်စွာ ခွဲခွာနေပါက ပျက်စီးယိုယွင်းမှုကို ခံရနိုင်သေး၏။

မည်သို့ပင်ဖြစ်စေ ကောင်းကင်နှင့် မြေကြီးကြားတွင် အဆိပ်ပြင်းသော ဒြပ်စင်များနှင့် အဆိပ်ငွေ့များစွာ ရှိနေပြီး မူလဝိညာဉ်ကို ပျက်စီးယိုယွင်းစေနိုင်ပေသည်။

အချိန်ကြာလာသည်နှင့်အမျှ မူလဝိညာဉ်သည် ညစ်ညမ်းလာကာ အသိဉာဏ်ဆုံးရှုံးသွားပြီး နတ်ဆိုးဝိညာဉ်အဖြစ်သို့ ပြောင်းလဲသွားမည် ဖြစ်သည်။

'နောက်ထပ်က နတ်ဘုရားအသွင်ပြောင်းအဆင့်ကို တက်လှမ်းချင်ရင် မူလဝိညာဉ်မျိုးစေ့ကို အားကောင်းလာအောင် လုပ်ဖို့ လိုအပ်တယ်...’ ကျိုးစွေ့က ဆက်တွေးလိုက်သည်။

'ဒါပေမဲ့ အခုကြည့်ရတာ မူလဝိညာဉ်မျိုးစေ့ ကြီးထွားလာဖို့ အချိန်တစ်ခုတော့ ယူရဦးမှာပဲ...’

'ဒါကြောင့် အခုချက်ချင်း နတ်ဘုရားအသွင်ပြောင်းအဆင့်ကို တက်လှမ်းလို့ မရသေးဘူး...’

'ဒါပေမဲ့ အချိန်အကြာကြီးလည်း မလိုအပ်လောက်ဘူး… နှစ်အနည်းငယ်လောက်ဆိုရင် လုံလောက်မယ်လို့ ထင်တာပဲ...’

'ဒီလောက် တိုတောင်းတဲ့အချိန်လေးအတွင်း ရှေးဟောင်းနတ်ဆိုးတံခါးကနေ မျှော်လင့်မထားတဲ့ကိစ္စတွေ အများကြီးဖြစ်လာမှာ မဟုတ်ဘူးလို့ ယုံကြည်တယ်...’

ကျိုးစွေ့သည် အလွန် ကျေနပ်သွားလေ၏။ ဤတစ်ကြိမ် ချန်ဇီယွင်ထံမှ သန့်စင်ယင်အနှစ်သာရကို ရရှိလိုက်ခြင်းက သူ့အတွက် အမှန်တကယ်ပင် အလွန်တရာ ကြီးမားသော အထောက်အကူ ဖြစ်စေခဲ့သည်။

သူ၏ ကျင့်ကြံမှုကို ဝိညာဉ်သန္ဓေသားနှောင်းပိုင်းအဆင့် အထွတ်အထိပ်သို့ တက်လှမ်းရန် ကူညီပေးရုံသာမကပေ။

တစ်ချိန်တည်းမှာပင် မူလဝိညာဉ်မျိုးစေ့ကို မွေးဖွားလာစေရန်လည်း ကူညီပေးခဲ့လေ၏။

သူ နတ်ဘုရားအသွင်ပြောင်းအဆင့်သို့ တက်လှမ်းရန်အတွက် လမ်းခင်းပေးလိုက်သည်ဟု ဆိုနိုင်ပေသည်။

အဆုံးအစမရှိသော အကျိုးကျေးဇူးများကို ရရှိလိုက်ခြင်းပင် ဖြစ်ချေသည်။

'နှမြောစရာပဲ၊ စိတ်ဝိညာဉ်အမြစ် အရည်အသွေးကတော့ ချိုးဖြတ်နိုင်စွမ်း မရှိသေးဘူး...’

'ပထမအဆင့် စိတ်ဝိညာဉ်အမြစ်ရဲ့ ကိုးဆယ့်ကိုးရာခိုင်နှုန်းအထိ ရောက်လာပေမဲ့လည်း...'

‘"ကောင်းကင်အဆင့် စိတ်ဝိညာဉ်အမြစ်" ကို တက်လှမ်းနိုင်ဖို့ နည်းနည်းလေး လိုနေသေးတယ်...’

ကျိုးစွေ့မှာ အနည်းငယ် နှမြောသွားလေသည်။

သူသည် ချန်ဇီယွင်၏ စွမ်းအင်အကူအညီဖြင့် စိတ်ဝိညာဉ်အမြစ်ကို 'ကောင်းကင်အဆင့် စိတ်ဝိညာဉ်အမြစ်' သို့ တက်လှမ်းနိုင်မည်ဟု မူလက ထင်မှတ်ထားခဲ့သည်။ သို့သော်ငြား အောင်မြင်ရန် အနည်းငယ် လိုအပ်နေသေးမည်ဟု ထင်မှတ်မထားခဲ့မိပေ။

ဤအနည်းငယ်သော လိုအပ်ချက်မှာ ကောင်းကင်ချောက်ကမ်းပါးကဲ့သို့ ဖြစ်နေပြီး မည်မျှကြာအောင် အချိန်ယူရမည်ကို သူ မသိနိုင်တော့ချေ။

ဤသည်မှာ ဝိညာဉ်သန္ဓေသားအဆင့် ပြီးပြည့်စုံခြင်းနှင့် နတ်ဘုရားအသွင်ပြောင်းအဆင့်တို့ကြားမှ ကွာခြားချက်နှင့် တူညီပေသည်။

တစ်ဖက်နှင့်တစ်ဖက် မျဉ်းတစ်ကြောင်းစာမျှသာ ကွာခြားသည်ဟု ထင်ရသော်လည်း တကယ်တမ်းတွင်မူ ကောင်းကင်နှင့်မြေကြီးသဖွယ် ကွာခြားလှ၏။

ပထမအဆင့် စိတ်ဝိညာဉ်အမြစ်နှင့် ကောင်းကင်အဆင့် စိတ်ဝိညာဉ်အမြစ်တို့သည်လည်း ထိုနည်းတူပင် ဖြစ်လေသည်။

အကယ်၍ အဆင့်တက်နိုင်ခဲ့ပါက ကျယ်ပြောလှသော ပင်လယ်နှင့်ကောင်းကင်ကြီးပမာ ဖြစ်သွားမည်ဖြစ်ပြီး ကျင့်ကြံခြင်းလောကတွင် ပါရမီအထက်မြက်ဆုံး ကျင့်ကြံသူအဖြစ်သို့ တစ်ဟုန်ထိုး ရောက်ရှိသွားမည်ဖြစ်သည်။

ထို့ကြောင့် ဤအဆင့်အတားအဆီးကို ဖြတ်ကျော်ရန် ခက်ခဲနေခြင်းမှာလည်း သဘာဝကျလှပေသည်။

***

Book List