BIT

Title

Show in VIP/Series

Status (Active / Inactive)

<h2 style="text-align: center;">ဓားမြစ်ဂိုဏ်း၏ ကံကြမ္မာ (၄)</h2>

ဒေါသထွက်၍ ပေါက်ကွဲရာမှ စတင်ခဲ့သော အရာသည် ဂိုဏ်းပိုင်နက်၏ ထက်ဝက်ခန့်ကို ဖျက်ဆီးလုမတတ် ဖြစ်သွားစေသော သေရေးရှင်ရေးတိုက်ပွဲကြီး တစ်ခုအဖြစ်သို့ ပြောင်းလဲသွားခဲ့သည်။

နောက်ဆုံးတွင် အကြီးအကဲချုပ်မှာ ရှုံးနိမ့်သွားခဲ့သော်လည်း၊ ဂိုဏ်းချုပ်က သူ၏အသက်ကို ချမ်းသာပေးရန်သာ ရွေးချယ်ခဲ့သည်။

ထိုညမှာပင်၊ ထိုအကြီးအကဲချုပ်သည် အခြားအကြီးအကဲ ထက်ဝက်ခန့်နှင့်အတူ သူတို့၏ ကိုယ်ပိုင်တပည့်များကိုပါ ခေါ်ဆောင်၍ ထွက်ခွာသွားခဲ့သည်။

၎င်းက ဂိုဏ်း၏ အခြေခံအုတ်မြစ်ကို ပိုမို ဆုတ်ယုတ်သွားစေသည်။

အကြီးအကဲချုပ်က ဆက်နေရမည်ထက် သေရသည်က ပိုကောင်းသည်ဟု အခိုင်အမာ ပြောဆိုထားပြီး၊ သူ့နောက်သို့ လိုက်သွားသူများကလည်း ထိုခံစားချက်မျိုး အတူတူပင် ရှိနေကြသဖြင့် ဂိုဏ်းချုပ်အနေဖြင့် သူတို့ကို မတားဆီးခဲ့ပေ။

ထိုအရာများ အားလုံး ဖြစ်ပျက်ခဲ့သည့်တိုင်အောင်၊ ဂိုဏ်းချုပ်သည် မြေးဖြစ်သူကို ပြစ်ဒဏ်မပေးခဲ့ဘဲ ဂိုဏ်း၏ သံတမန်တစ်ဦးအဖြစ် ခန့်အပ်ရန်သာ ဆုံးဖြတ်ခဲ့သည်။

ထိုရာထူးက သူ၏အချိန်အများစုကို ဂိုဏ်းပြင်ပတွင်သာ ကုန်ဆုံးစေမည် ဖြစ်ရာ ကျန်ရစ်ခဲ့သော ဂိုဏ်းသားများအတွက်တော့  သက်သာရာရမှုတစ်ခု ဖြစ်လာခဲ့သည်။

မျှော်လင့်ထားသည့်အတိုင်းပင် အရာအားလုံးက အဆင်ပြေသွားပြီး၊ မြေးဖြစ်သူ မရှိတော့သဖြင့် ဂိုဏ်းအတွင်းသို့ ငြိမ်းချမ်းမှု အတိုင်းအတာတစ်ခုအထိ ပြန်လည်ရောက်ရှိလာခဲ့သည်။ သို့သော် ဂိုဏ်းပြင်ပရှိ သူများအတွက်တော့ ထိုသို့ မဟုတ်ခဲ့ပေ။

ဤဒေသ၏ အစစ်အမှန်အရှင်သခင်ဖြစ်သော  ဓားမြစ်ဂိုဏ်းချုပ်၏ မြေးဆိုသော အာဏာကို ပြသကာ၊ သူသည် ဂိုဏ်း၏ ပိုင်နက်အတွင်း ကြောက်မက်ဖွယ်ကောင်းသော အိပ်မက်ဆိုးတစ်ခု ဖြစ်လာခဲ့သည်။

ဆာလောင်မွတ်သိပ်နေသော ဝံပုလွေတစ်ကောင်ကဲ့သို့ ပိုင်နက်အတွင်း လုယက်သောင်းကျန်းနေသဖြင့် အသက်ပေါင်းများစွာ ဆုံးရှုံးပျက်စီးခဲ့ရသည်။

သူ၏ သောင်းကျန်းမှု တစ်ခုအတွင်း အလှပန်းလေးတစ်ပွင့်က သူ၏အာရုံကို ဖမ်းစားသွားခဲ့သည်။ သူမကို မြင်လိုက်ရချိန်တွင် လုပ်နေကျအတိုင်း ပြုမူခဲ့သည်။

သူက ဆွဲဆောင်မှုများကို အသုံးပြုရန် ကြိုးစားခဲ့ပြီး အလုပ်မဖြစ်သောအခါ ချက်ချင်းပင် အတင်းအဓမ္မ အင်အားသုံးသည့် နည်းလမ်းသို့ ပြောင်းလဲခဲ့သည်။

သို့သော် ကံဆိုးစွာဖြင့် သူပစ်မှတ်ထားခဲ့သော အမျိုးသမီးမှာ သူ့ကို အလွယ်တကူ နှိမ်နင်းနိုင်သည့် နန်းတော်အဆင့် ကျွမ်းကျင်သူတစ်ဦး ဖြစ်နေခဲ့ပြီး၊ နောက်ဆုံးတွင် သူ၏ ကျင့်ကြံခြင်းကို ဖျက်ဆီးပစ်လိုက်သည်။

ပို၍ကံဆိုးသည်မှာ ထိုအမျိုးသမီးတွင် အစောပိုင်းနယ်မြေအဆင့် ကျွမ်းကျင်သူဖြစ်သော တာအိုလက်တွဲဖော်တစ်ဦး ပါရှိနေခြင်းပင်။

ထို့ကြောင့် သူ၏ ကျင့်ကြံခြင်း ဖျက်ဆီးခံလိုက်ရသည့်တိုင်အောင်၊ ဂိုဏ်းချုပ်၏မြေးဖြစ်သူက သူ၏ ဂိုဏ်းနှင့် အဘိုးဖြစ်သူ၏ နာမည်ကို အသုံးပြုကာ သူတို့ကို ခြိမ်းခြောက်လာသောအခါ၊ ထိုအမျိုးသမီး၏ တာအိုလက်တွဲဖော်သည် ကျေကျေနပ်နပ်ကြီးလက်ခံကာ သူနှင့်အတူ ဂိုဏ်းအထိ လိုက်ပါသွားခဲ့လေသည်။

ဂိုဏ်းသို့ ရောက်ရှိချိန်တွင်၊ တာအိုလက်တွဲဖော် ဖြစ်သူက သူရောက်ရှိနေကြောင်း အသိပေးရန်နှင့် ဂိုဏ်းသားများ၊ အထူးသဖြင့် ဂိုဏ်းချုပ်ကို ထွက်လာစေရန်အတွက် ဂိုဏ်း၏ အကာအကွယ်အစီအရင်ကို ဖျက်ဆီးပစ်လိုက်သည်။

ဂိုဏ်းချုပ်နှင့် အကြီးအကဲများအားလုံးက ထိုတိုက်ခိုက်မှုကို တုံ့ပြန်ရန် ထွက်လာကြသော်လည်း၊ အမည်မသိနယ်မြေအဆင့် ကျွမ်းကျင်သူတစ်ဦး၏ လက်ထဲတွင် ကြက်တစ်ကောင်ကဲ့သို့ တွဲလောင်း ဆွဲခံထားရသော မြေးဖြစ်သူကိုသာ မြင်တွေ့လိုက်ရသည်။

နယ်မြေအဆင့် ကျွမ်းကျင်သူထံမှ အဖြစ်အပျက်အားလုံးကို သိရှိသွားပြီးနောက်၊ ဂိုဏ်းချုပ်မှာ ဒူးထောက်တောင်းပန်ခဲ့ပြီး သူ၏ မြေးဖြစ်သူမှလွဲ၍ ကျန်ဂိုဏ်းကို ချမ်းသာပေးရန်အတွက် သူ၏အသက်နှင့် ဂိုဏ်း၏ ရတနာများ အားလုံးကို လဲလှယ်ရန် ကမ်းလှမ်းခဲ့သည်။

ထိုအချိန်တွင် မြေးဖြစ်သူအတွက် သေခြင်းတရားမှာ သေချာနေပြီ ဖြစ်ကြောင်း သူ သိထားသည်။

သူလုပ်နိုင်သမျှမှာ ဤအခြေအနေသို့ ရောက်သည်အထိ လျစ်လျူရှုထားခဲ့သော ဂိုဏ်းကို သူ၏သေဆုံးမှုက ကယ်တင်နိုင်မည်ဟု မျှော်လင့်ရန်သာ ရှိတော့သည်။

ကံကောင်းစွာဖြင့် နယ်မြေအဆင့် ကျွမ်းကျင်သူက သဘောတူခဲ့ပြီး သူ၏ သေဆုံးမှုနှင့်အတူ ပြဿနာများ ပြေလည်သွားခဲ့သည်။

ထိုအရာကို မြေးဖြစ်သူမှာ သူသေဆုံးချိန်အထိပင် မယုံကြည်နိုင်ခဲ့ပေ။ ဂိုဏ်း၏ ဘဏ္ဍာတိုက်များ အားလုံး ပြောင်သလင်းခါသွားပြီးနောက် နယ်မြေအဆင့် ကျွမ်းကျင်သူလည်း ထွက်ခွာသွားခဲ့သည်။

ထို့နောက်တွင်တော့ ဂိုဏ်းကြီး ပြိုကွဲသွားကာ အခြေအနေများမှာ လျင်မြန်စွာ ကျဆင်းသွားခဲ့သည်။ ဂိုဏ်းချုပ်၏ မြေးဖြစ်သူ ကျေးဇူးကြောင့် သူတို့တွင် ရန်သူများ အလွန် များပြားနေပြီ ဖြစ်သည်။

သူတို့၏ ဂိုဏ်းချုပ်နှင့် အကာအကွယ်အစီအရင်အပြင် အရင်းအမြစ်များပါ ဆုံးရှုံးသွားကြောင်းကိုသာ လူတွေ သိသွားမည်ဆိုလျှင်၊ ဂိုဏ်းချုပ် မြေးဖြစ်သူ၏ပြစ်မှုများအတွက် ပေးဆပ်ရန် ဝိုင်းဝန်းတိုက်ခိုက်ခံရဖို့ အချိန်သိပ်ကြာမည် မဟုတ်ပေ။

ကျန်ရှိနေသော အဖွဲ့ဝင်များမှာ အုပ်စုအသီးသီး ကွဲသွားကြသည်။

ဓားမြစ်ဂိုဏ်းကို  စွန့်ခွာပြီး တခြားတစ်နေရာရာမှာ အသစ်က ပြန်စရန် ဆုံးဖြတ်သူများ ရှိသလို၊ ဂိုဏ်းကို ပြန်လည်အသက်သွင်းလိုသူများလည်း ရှိသည်။

ဓားမြစ်ဂိုဏ်း၏ ဂုဏ်သိက္ခာဖြင့် ထိုသို့ လုပ်ဆောင်ရန် လွယ်ကူမည်ဟု ယူဆကြပြီး၊ ဂိုဏ်းချုပ်နှင့် မြေးဖြစ်သူ မရှိတော့ကြောင်းကို ကြားလျှင် ထွက်ခွာသွားသော အကြီးအကဲချုပ်နှင့် အခြားအကြီးအကဲများ ပြန်လာကြမည်ဟု ထင်မှတ်ခဲ့ကြသဖြင့် နောက်ပိုင်းအုပ်စုတွင် လူအရေအတွက် ပိုများပြားခဲ့သည်။

ဝမ်ရီလည်း ထိုအုပ်စုတွင် ပါဝင်ခဲ့သည်။ သို့သော် ဂိုဏ်းချုပ်၏ မြေးဖြစ်သူကို မည်မျှအထိ မုန်းတီးနေကြသနည်း ဆိုသည်ကို သူတို့ လုံးဝအထင်သေးခဲ့မိသည်။

သူက မရေမတွက်နိုင်သော သွေးကြွေးများကို ဖန်တီးခဲ့ပြီး ဂိုဏ်း၏ ဂုဏ်သတင်းမှန်သမျှကို ဖျက်ဆီးပစ်ခဲ့သည်။

ဂိုဏ်းချုပ်သေဆုံးသွားပြီ ဆိုသည့် သတင်းထွက်ပေါ်သွားသည်နှင့် တစ်ပြိုင်နက်၊  ဓားမြစ်ဂိုဏ်းမှာ ထောင်ပေါင်းများစွာသော ရန်သူများ၏ ဝိုင်းဝန်းတိုက်ခိုက်ခြင်းကို ခံခဲ့ရသည်။

သူအုပ်ချုပ်နေစဉ်အတွင်း လူအင်အားများ ဆုံးရှုံးခဲ့ရသော်လည်း၊ ဂိုဏ်းချုပ်သည် သတ္တမအဆင့် နန်းတော်အဆင့် ကျွမ်းကျင်သူတစ်ဦး ဖြစ်သဖြင့် သူ၏တည်ရှိမှု တစ်ခုတည်းကပင် သူတို့၏ ပိုင်နက် တစ်ခုလုံးအတွက် လုံလောက်သော ဟန့်တားမှု တစ်ခု ဖြစ်ခဲ့သည်။

သို့သော် သူ သေဆုံးသွားပြီးနောက်၊ ကျန်ရစ်သူများထဲတွင် နန်းတော်အဆင့်သို့ ရောက်ရှိသူတစ်ဦးသာ ရှိပြီး သူသည်လည်း ပထမအဆင့်တွင်သာ ရှိသေးသည်။

တိုက်ခိုက်သူများထဲတွင်တော့ နန်းတော်အစောပိုင်းအဆင့် ကျွမ်းကျင်သူ အနည်းငယ် ပါဝင်နေသည်။

အချို့မှာ ဓားမြစ်ဂိုဏ်း ဖျက်ဆီးခံရမှုနှင့်အတူ လစ်လပ်သွားသော နေရာကို ဝင်ယူရန် မျှော်လင့်ချက်ဖြင့် ဝင်ရောက်လာသော သူတို့၏ ပိုင်နက်အတွင်းရှိ အဆင့် ၃ တိုင်းပြည်မှ ဖြစ်ပြီး၊ အချို့မှာမူ ဂိုဏ်းနှင့် အချိန်အတော်ကြာ  ရန်ငြိုးများ ရှိခဲ့သော်လည်း ဂိုဏ်း၏ အခြေခံအုတ်မြစ်များကြောင့် ဘာမှမလုပ်နိုင်ခဲ့သော အဖွဲ့အစည်းများမှ ဖြစ်သည်။

အဆက်မပြတ် တိုက်ခိုက်ခံရပြီး နှစ်အနည်းငယ်အကြာတွင်၊ ကျန်ရှိနေသော တစ်ဦးတည်းသော နန်းတော်အဆင့်အဖွဲ့ဝင်မှာ သေဆုံးသွားခဲ့သည်။

ပြန်လည် အသက်သွင်းလိုသူများ အနေဖြင့် တစ်ချိန်ချိန်တွင်တော့ ထွက်သွားသော အကြီးအကဲချုပ်နှင့် တခြားအကြီးအကဲများက ဝင်ပါလာလိမ့်မည်ဟု တွေးထင်ထားခဲ့သော်လည်း၊ မည်သည့်အခါမျှ ရောက်မလာခဲ့ကြပေ။

နောက်ဆုံး နန်းတော်အဆင့်ကျင့်ကြံသူ သေဆုံးသွားပြီးနောက်တွင်တော့ အခြေအနေများမှာ ဆက်လက် ကျဆင်းသွားခဲ့ပြီး၊ အသက်ရှင် ကျန်ရစ်သူများမှာ ယင်ကောင်များပမာ အသေအပျောက်များစွာဖြင့် ထွက်ပြေးခဲ့ကြရာ နောက်ဆုံးတွင် သမင်တောင်တိုင်းပြည်သို့ ရောက်ရှိသွားကြသည်။

သို့သော် ထိုအချိန်ရောက်သောအခါ လူတစ်ရာပင် မပြည့်တော့ဘဲ အသက်ရှင် ကျန်ရစ်သူများမှာလည်း အားအနည်းဆုံး သူများသာ ဖြစ်နေခဲ့သည်။

လိုက်လံဖမ်းဆီးသူများ၏ အာရုံစိုက်မှုနှင့်ပင် မထိုက်တန်ဟု သတ်မှတ်ခံရသူများသာ ဖြစ်သည်။

ထိုအရာကြောင့်သာ ဂိုဏ်းမှာ ရှင်သန်ရပ်တည်ရေး လမ်းကြောင်းငယ်လေး တစ်ခုကို ဖောက်လုပ်နိုင်ခဲ့ခြင်း ဖြစ်သည်။

သို့သော် လွန်ခဲ့သော နှစ်ပေါင်း ၂၀၀ အတွင်း ဂိုဏ်းကို ဦးဆောင်နိုင်လောက်အောင် အင်အားကြီးသူ သို့မဟုတ် ပါရမီရှင်တစ်ဦးမျှ မရှိခဲ့သဖြင့်၊ အမည်ခံဓားမြစ်ဂိုဏ်းအဖြစ်သာ ကျန်ရှိတော့သည့် အခြေအနေအထိ ကျဆင်းသွားခဲ့ရသည်။

ဝမ်ရီသေဆုံးသွားပြီးနောက် အားလုံးထွက်မသွားခင် တစ်နှစ်လောက်တောင် ရှင်သန်နိုင်ပါဦးမလားဟု ယန်ချင်းသံသယ ဝင်မိပြီး၊ ထိုအချိန်ရောက်လျှင် ဂိုဏ်း၏အမည်နာမပင် ပျောက်ကွယ်သွားပေလိမ့်မည်။

၎င်းမှာ ဂိုဏ်း ရှိခဲ့ဖူးကြောင်း သိရှိသူများအတွက် သတိပေး သင်ခန်းစာ ယ တစ်ပုဒ်သက်သက်သာ ဖြစ်လာတော့မည် ဖြစ်သည်။

ယန်ချင်းသည် ဘာပြောရမည်ကို ချိန်ဆရင်း သူ၏ ပါးစပ်ကို ဖွင့်လိုက် ပိတ်လိုက် လုပ်နေမိသည်။

ဝမ်ရီမှာ လမ်းပျောက်နေဆဲဖြစ်ပြီး၊ သူ ပြောလိုက်မည့် နောက်ထပ်စကားများက ဓားမြစ်ဂိုဏ်း၏ စာအုပ်ကို ပိတ်လိုက်ခြင်းနှင့် တူညီနေသဖြင့် ယန်ချင်းမှာ တွန့်ဆုတ်နေခဲ့သည်။

ယန်ချင်းကို ညင်သာစွာ ပြုံးပြရင်း ဝမ်ရီက ပြောလိုက်သည်။

“ရပါတယ် သခင်ကြီးယန်ချင်း... ဘာပဲဖြစ်ဖြစ် ကျွန်တော်လည်း ဒီလောကမှာ သိပ်ကြာကြာ နေရတော့မှာမှ မဟုတ်တာ...”

နဂါးနှင့် တိမ်တိုက်ပုံစံများ ထွင်းထုထားသော အနက်ရောင်သစ်သားသေတ္တာတစ်လုံးထဲမှ စာလိပ်တစ်ခုကို ဆွဲထုတ်ရင်း သူက ဆက်ပြောလိုက်သည်။

“သခင်ကြီးရဲ့ ကြင်နာမှုအတွက် ကျေးဇူးတင်ပါတယ်...”

တွန့်ဆုတ်စွာဖြင့်ပင် ထိုစာလိပ်ကို ယန်ချင်းထံသို့ ကမ်းပေးရင်း သူက မေးလိုက်သည်။

“ဒါ လိုအပ်မယ် ထင်တယ်...”

ယန်ချင်းက ယဉ်ကျေးစွာ ခေါင်းညိတ်ပြပြီး စာလိပ်ကို ဖြေချရင်း ပြန်ဖြေလိုက်သည်။

“ဟုတ်ကဲ့ လိုအပ်ပါတယ်... ကျေးဇူးပါပဲ...”

ထိုအထဲတွင် အဖွဲ့အစည်းမှ ဂိုဏ်းသို့ ထုတ်ပေးထားသော အသိအမှတ်ပြုလက်မှတ် ပါရှိသည်။

***

Book List